Krista Hruaina I Tân A tak em?
“‘Hruaitute’ tihin awm hek duh u, in hruaitu chu pakhat chauh a ni, Krista chu.”—MATTHAIA 23:10.
1. Kristian dikte Hruaitu awm chhun chu tunge ni?
NISAN 11, Thawhlehnî a ni a. A hnu ni thum lekah Isua Krista chu tihhlum a ni tawh mai dâwn a. Tûn hi biak in a tlawh hnuhnunna ber tûr a ni. Chu mi nî chuan Isua chuan a zirtîrte leh mipui pungkhâwmte chu he thu pawimawh tak hi a zirtîr a ni: “Nangni erawh chu ‘Rabbi’ tihin awm suh u; in zirtîrtu chu pakhat chauh a ni a, nangni zawng zawng chu unau in ni si a. Tin lei chungah hian tumah ‘Ka pa’ ti suh u; in Pa chu pakhat chauh a ni, vâna mi khi. ‘“Hruaitute” tihin awm hek suh u’ in hruaitu chu pakhat chauh a ni, Krista chu,” tiin. (Matthaia 23:8-10) Isua Krista chu Kristian dikte Hruaitu a ni tih a chiang hle.
2, 3. Jehova thu ngaihthlâkna leh Hruaitu ni tûra a mi ruat pawmna chuan kan nunah eng nghawng nge a neih?
2 Isua hruaina kan pawmna chuan kan nunah nghawng ṭha a va nei tak êm! He hruaitu lo lang tûr chungchâng hi hrilh lâwkin Pathian Jehova chuan a zâwlnei Isaia hmangin hetiang hian a lo puang chhuak a ni: “Hawh u, tuihâl apiangte u, tuiahte hian lo kal rawh u, tangka nei lote pawh; lo kal ula, lei ula, ei rawh u; a ni, lo kal ula, uain leh hnutetui tangka pe lovin, a man pawh pe lovin lei rawh u. . . . Ka thu ngun takin ngaithla ula, thil ṭha chu ei rawh u, in nunna chu thil thauvah chuan hlim rawh se. . . . Ngai teh, ani chu mi tin tân hretuah ka ruat a, mi tin tân hruaitu leh hotuah ka ruat a ni” tiin.—Isaia 55:1-4.
3 Isaia chuan Jehova thu kan ngaihthlâk a, Hruaitu leh Hotu ni tûra a mi ruat kan zuinain kan nun a nghawng dân târ lan nân, thil tuiril hriat lâr tak—tui, hnutetui, leh uain te—a hmang a ni. Pathian mi ruat Hotu zuina rah chhuah chu a hahdam thlâk hle; khaw lum êm êm nia tuisik vawt raih in ang maiin thutak leh felnaa kan tuihâlna chu a tireh a ni. Hnutetuiin nausên a tichak a, a ṭhantîr angin, ‘thutak hnutê’ chuan min tichakin, Pathian nêna kan inlaichînna a tiṭha zual a ni. (1 Petera 2:1-3) Kût nî vâng thla a lo thlen hunah uain chuan hlimna a belhchhah tih tuin nge pha thei ang? Chutiang bawkin, Pathian dik chibai bûk leh a Hruaitu thlan hniak hnung zuina chuan nun chu ‘lâwmna hlîrin’ a tikhat a ni. (Deuteronomy 16:15) Chuvângin, kan za hian—a hmei a pa, a pui a pangin—Krista hruaina chu kan tân a tak a ni tih lântîr a pawimawh hle a ni. A nih leh, engtin nge kan nî tin nunah Messia chu min Hruaitu a ni tih kan lantîr ang?
Ṭhalaite U—“Fing Deuh Deuh” Rawh U
4. (a) Kum 12-a upa Isua’n Kalhlên Kût hmang tûra Jerusalem a tlawh ṭum khân eng thil nge thleng? (b) Isua kha kum 12 mi lek a nih lai pawhin, eng ang takin nge hriatna a ngah?
4 Min Hruaituin ṭhalaite tâna entawn tûr a lo siam hi han ngaihtuah ta la. Isua naupan lai chanchin chu hriat tam ni lo hle mah se, a chanchin pakhat mai pawh hian entawn tlâk a nihzia a târ lang chiang hle a ni. Isua chu kum 12 mi a nihin, a nu leh pain Kalhlên Kût hmang tûra kum tina Jerusalem an tlawhnaah an hruai ve a. Chu mi ṭum chuan Pathian Lehkha Thu sawikhâwmnaah chuan a tui êm êm mai a, a chhûngte chuan an hawsan palh ta hial a ni. Ni thum hnuah chuan a nu leh pa lungngai tak, Josefa leh Mari chuan biakinah “zirtîrtute zînga ṭhua an thu lo ngaithlaa lo zâwtin” an hmu ta a ni. Chu mai a ni lo, “a thu hria apiang chuan a hriatzia leh a chhânzia chu mak an ti hle” mai bawk a ni. Han ngaihtuah teh, kum 12 mi lek a la nih lai pawhin Isua chuan rilru khawih tak, thlarau lam zawhna ril tak takte a zâwt thei mai ni lovin, fing takin a chhâng thei bawk a ni! A nu leh a pate’n an zirtîr ṭhîn tih chu rinhlelh rual a ni lo.—Luka 2:41-50.
5. Engtin nge naupangte chuan chhûngkaw Bible zirna chunga an rilru put hmang chu an chhût theih?
5 Nang pawh i la naupang hle mai thei a. I nu leh pate chu Pathian chhiahhlawh inpumpêk tak an nih chuan, in inah chhûngkuaa Bible zirna hun mumal taka in neih ziah a rinawm a ni. Chhûngkaw zirna chu eng angin nge i ngaih? Engvângin nge hêng zawhnate hi kan inzawh loh vang? ‘Kan chhûngkuaa Bible zirna chu rilru zawng zawngin kan thlâwp em? Kan zirna hun tibuai thei thil engmah ti lovin, zirna chu kan thlâwp em?’ (Philippi 3:16) ‘Zirnaah chuan ka chhâng ṭha em? Tihâwm a nih hunah chuan, kan zirlai thute chungchâng zawhna ka zâwtin, nunpui dân tûr thute ka sawi ṭhîn em? Thlarau lama hma ka sâwn zêl hian “chaw rum puitlingte ta” châkna chu ka nei em?’ tihte chu.—Hebrai 5:13, 14.
6, 7. Nî tina Bible chhiar chu naupangte tân eng anga hlu nge ni thei?
6 Nî tina Bible chhiarna hun neih pawh hi a hlu hle a ni. Fakna hla phuahtu chu: “Mi suaksualte remruat anga awm ngai lo . . . mi chu, a eng a thâwl e. A lâwmna chu LALPA dânah a ni zawk a; a dân thu chu achhûn azânin a ngaihtuah ṭhîn,” tiin a zai a ni. (Sâm 1:1, 2) Mosia thlâktu Josua chuan “dân thu chu [chhiarin] achhûn azânin a ngaihtuah ṭhîn” a. Chu chuan fing takin a chêttîr theiin, Pathian hna tukte chu hlawhtling takin a hlenchhuahtîr thei a ni. (Josua 1:8) Min Hruaitu, Isua Krista chuan: “‘Mihring hi chhang chauhvin an nung lo vang a, Pathian kaa thu tin chhuakin an nung zâwk ang’ tih ziak a ni,” a ti a. (Matthaia 4:4) Tisa lam chaw mah nî tina kan mamawh chuan, thlarau lam chaw phei chu kan va mamawh nasa lehzual dâwn êm!
7 Kum 13-a upa Nicole-i chuan a thlarau lam mamawh chu hriain, nî tin Bible a chhiar ṭan a.a Tûnah chuan kum 16 mi a ni a, Bible vawikhat a chhiar chhuak tawh a, a vawihnihna tûr atân a bu chanve a thleng leh tawh a ni. A tih dân chu hotê a ni. “Nî tinin bung khat chhiar ziah chu ka tum tlat a ni,” a ti. Engtin nge nî tina a Bible chhiarna chuan a ṭanpui? Hetiang hian a sawi: “Tûn lai hian rilru latu thil ṭha lo tak tak a tam êm êm a. Nî tinin school-ah leh hmun dang dangah ka rinna kalhtu nêksâwrnate ka tâwk a ni. Nî tina Bible chhiarna chuan Bible thupêk leh thu bulte hre chhuak zung zung tûrin min ṭanpui a, chu chuan nêksâwrnate chu do tûrin min fuih a ni. Chutianga ka tih avâng chuan Jehova leh Isua chu ka hnaih zual sauhvin ka hria,” tiin.
8. Inkhâwmna in chungchânga Isua tihṭhin dân chu eng nge ni a, engtin nge naupangte’n amah an entawn theih?
8 Isua chuan inkhâwmna ina Pathian Lehkha Thu chhiar leh sawihonaa tel chu tihṭhanah a nei a. (Luka 4:16; Tirhkohte 15:21) Chu a entawn tûr siam chu Bible chhiarna leh zirna hmun Kristian inkhâwma tel ziahna hmanga entawn chu naupangte tân a va ṭangkai dâwn êm! Chutiang inkhâwmte avânga a lâwmzia sawiin kum 14 mi Richard-a chuan: “Inkhâwmte hi ka tân chuan an hlu hle a. Chutah chuan thil ṭha leh ṭha lo te, nungchang ṭha leh bawlhhlawh te, Krista anna leh an lohna te eng nge ni tih hriatnawntîr ka ni fo va. Chûng thilte chu a tak ngeia tawn a, a harsa zawnga zir chhuah ka ngai lo a ni,” a ti. Ni e, “LALPA thuhriattîr chu a rinawm a, mi mâwl a tifing ṭhîn” a ni. (Sâm 19:7) Nicole-i pawhin chawlhkâr tina kohhran inkhâwm chi ngate chu pelh miah loh a tum tlat a. Chûngte atâna inpuahchah nân dârkâr hnih aṭanga dârkâr thum vêl a hmang ziah bawk.—Ephesi 5:15, 16.
9. Engtin nge naupangte chu an ‘fin deuh deuh’ theih?
9 Vânglai hun hi ‘Pathian tak chauh leh a tirh Isua Krista hriatna’ zawnna hun ṭha tak a ni. (Johana 17:3) Mahse, naupang tê tê fiamthu bu chhiar nasa tak te, television en nasa tak te, video games khêl nasa te, a nih loh leh Internet khawih nasa lutuk te chu i hre mai thei a. Min Hruaitu entawn tûr siam ṭha famkim chu i zui thei reng si a, engah nge chûng mite chu i entawn ang ni? Ani chuan naupang mai a nih lai pawhin Jehova chanchin zir chu nuam a ti hle a. Chu chuan eng rah nge a chhuah? Thlarau lam thil a duh avângin, “Isua chu a fing deuh deuh” a ni. (Luka 2:52) Nang pawh chutiang chu i ni thei a ni.
“Intulût Tawn Ṭheuh Rawh U”
10. Engin nge chhûngkaw nun chu remna leh hlimna hnâr ni tûra ṭanpui dâwn?
10 In hi remna leh lungawina hmun emaw, inhnialna leh ânna hmun emaw a ni thei a. (Thufingte 21:19; 26:21) Krista hruaina kan pawmna chuan chhûngkuaa remna leh hlimna chu a tipung a ni. Dik tak chuan, Isua entawn tûr siam chu chhûngkaw inlaichînna atân entawn tûr ṭha tak a ni. Pathian Lehkha Thu chuan: “Krista ṭih dêkin intulût tawn ṭheuh rawh u. Nupuite u, Lalpa hnêna in intulût ang hian mahni pasalte hnênah intulût rawh u. Krista chu amah ngei taksa chhandamtu nia kohhranho lû a ni ang bawk hian, pasal chu nupui lû a ni si a. . . . Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khân,” a ti. (Ephesi 5:21-25) Kolossa kohhran mite hnêna a lehkha thawnah tirhkoh Paula chuan tihian a ziak a: “Naupangte u, engkimah in nu leh in pate thu zâwm rawh u, chu chu Lalpaah chuan a lâwmawm si a,” tiin.—Kolossa 3:18-20.
11. Engtin nge pasal chuan Krista hruaina chu a tân a tak a ni tih a lantîr theih?
11 He fuihna zui tûr chuan chhûngkuaah pasalin hma a hruai ang a, a nupuiin rinawm takin a ṭawiawm ang a; tin, naupangte’n an nu leh pate thu an awih tûr a ni. Nimahsela, mipa lû nihna chuan a nihna tûr taka hman a nih chauhvin hlimna a thlen ṭhîn. Pasal fing chuan a Lû leh amah Hruaitu, Isua Krista entawnna hmangin lû nihna hman dân chu a zir ngei tûr a ni. (1 Korinth 11:3) Isua chu he leia a lo kal hnuah ‘engkim zawng zawng chunga lû atân kohhranho hnêna pêk’ lo ni mah se, “rawngbâwlsak tûrin a lo kal lo va, rawngbâwl tûr” zâwkin a lo kal a ni. (Ephesi 1:22; Matthaia 20:28) Chutiang bawkin, Kristian pasal pawhin lû a nihna chu mahni ṭhatna tûr ni lovin, a nupui leh a fate—a chhûngkaw zînga mi tinte—ṭhatna tûrin a hmang zâwk tûr a ni. (1 Korinth 13:4, 5) A lû, Isua Krista Pathian ngaihsakna miziate chu entawn a tum tlat a. Isua angin, thuhnuairawlh leh rilrua inngaitlâwm tak a ni bawk. (Matthaia 11:28-30) A dik loh palh châng pawhin, “I ngaihdamna ka dîl e” tih emaw, “I dik zâwk e” tih emaw chu a harsat lo. A entawn tûr siam ṭha tak chuan a nupui pawh chu a hnên aṭanga zir a, a thawh apiang thawhpui a, amah “ṭanpuitu,” a “kawppui,” nih a tiawlsam sawt a ni.—Genesis 2:20; Malakia 2:14.
12. Engin nge nupui chu lû nihna thu bul zâwm tlat tûrin ṭanpui ang?
12 Nupui pawh a pasal lakah a intulût tûr a ni a. Amaherawhchu, khawvêl hri a vei chuan, chu chuan lû nihna thu bul a thlîr dân chu a tichhiain, mipa hnêna intukluh chu atân chuan thil duhawm a ni lo vang. Pathian Lehkha Thute chuan mipa chu nupuite awpbet tlat tûrin a ti lo va; mahse, nupuite chu an pasalte hnêna intulût tûrin a phût a ni. (Ephesi 5:24) Tin, Bible chuan pasal emaw, pa emaw chu chhûngkuaa mawhphurhna la tûrin a ti bawk a, chu fuihna chu pawm a nih chuan, chu chuan chhûngkuaah remna leh inruahman felna a awmtîr a ni.—Philippi 2:5.
13. Isua’n intukluhna chungchângah naupangte tân entawn tûr eng nge a siam?
13 Naupangte pawhin an nu leh pate thu an awih tûr a ni a. He mi chungchângah hian Isua chuan entawn tûr ṭha ber min hnutchhiah a ni. Kum 12 mi Isua chu biak ina ni thum chhûng kalsan a nih hnuah, ani chu “an hnênah a kal thla a, Nazaret khua chu a zu thleng a, an thu zâwmin a awm a.” (Luka 2:51) Naupangin an nu leh pate thu an zawm chuan chhûngkuaah remna leh inthurualna chu a pung a ni. Chhûngkuaa mi tinte Krista hruaina hnuaia an intukluh hian, chhûngkaw hlim tak an lo ni ṭhîn.
14, 15. In lama dinhmun harsa kan tawh hunah hlawhtling tûrin engin nge min ṭanpui dâwn? Entîrna pakhat pe rawh.
14 Chhûngkuaah dinhmun khirh tak a lo chhuah châng pawhin, hlawhlinna bul ber chu Isua entawn leh a kaihhruaina pawm hi a ni. Entîr nân, kum 35-a upa Jerry-a’n fanu tleirâwl nei tawh Lana-i a neihna chuan an rin phâk bâk buaina a thlen a. Jerry-a chuan: “Chhûngkaw kaihruaitu, lû ṭha tak ni tûr chuan chhûngkaw danga hlawhtlinna thlentu Bible thu bulte ka zawm ve a ngai tih ka hria a. Mahse, chûngte chu finna leh hriatthiam theihna nên ka hman a ngai nasa lehzual a ni tih ka hmuchhuak thuai a ni,” a ti. A fanu hrawn chuan a nu nêna an inkâra mi pakhat lo tlazep ringawt angah ngaiin, ani chu a haw êm êm ringawt mai a. Jerry-a chuan a fanu hrawn thiltih leh ṭawngkam chhuak aṭanga chu rilru put hmang a neihzia hre thiam tûrin hriatthiam theihna a mamawh a ni. Engtin nge chu dinhmun chu a chinfel? Heti hian a sawi: “Lana-i nêna kan inremnain hun engemawti chen chu naupang zilhna kawngah ani chuan hma a hruai ang a, chutih chhûngin ka fanu hrawn nêna inlaichinna ṭha siam ka tum thung dâwn a ni. Nakinah chuan, kan thiltih chuan rah ṭha a chhuah a ni,” tiin.
15 In lama harsatna kan tawh hunah chuan, chhûngkaw mite ṭawngkam chhuak leh an thiltihte phêna a chhan leh vâng awm chu hmu chhuak tûrin hriathiam theihna kan mamawh a ni. Pathian dân bulte dik taka hmang tûrin finna kan mamawh bawk. Entîr nân, Isua chuan hmeichhe thi pûtin a va deh chhan kha a hre chiang êm êm a; chuvângin fing tak leh lainat takin a cheibâwl a ni. (Leviticus 15:25-27; Marka 5:30-34) Finna leh hriatthiam theihna hi min Hruaitu mizia a ni. (Thufingte 8:12) A tih dân tûr anga kan tih ve chuan kan hlim ang.
‘Ram Chu Zawng Hmasa Rawh’
16. Kan nuna dah pawimawh ber tûr chu eng nge ni a, chu chu engtin nge Isua’n a entawn tûr siam hmanga min kawhhmuh?
16 Isua chuan a hruaina pawmtute nuna thil pawimawh ber tûr chu hetiang hian chiang takin a sawi a: “A ram leh a [Pathian] felna chu zawng hmasa zâwk rawh u,” tiin. (Matthaia 6:33) A tih dân tûr pawh a entawn tûr siam hmangin min kawhhmuh a ni. Baptisma a chan hnua ni 40 chhûng a chaw ngei hun, a inngaihtuah hun, leh a ṭawngṭai hun tâwp lamah chuan Isua chuan thlêmna a tâwk a. Diabol-Setana chuan “khawvêl ram zawng zawng” chunga rorêltu nihna chu a pe a ni. Isua chuan chu Diabola thilpêk chu pawm ta se, a nun awm dân tûr chu han ngaihtuah teh! Nimahsela, Krista chuan a Pa duhzâwng tih chauh a ngaihtuah a. Chu bâkah, Setana khawvêla chutianga nun chu hun rei lotê chauh a daih dâwn tih a hre reng bawk a ni. Tichuan, “‘Lalpa i Pathian chibai bûk la, ama rawng chauh bâwl rawh’ tih ziak a ni” tiin Diabola thilpêk chu a hnâwl nghâl ṭhuai a ni. Chuta chinah chuan Isua’n, “‘Sim rawh u! vân ram a hnai tawh e,’ tiin a hril ṭan ta a.” (Matthaia 4:2, 8—10, 17) Chuta ṭanga he leia a dam chhûng zawng chuan Krista chu hunbi kima Pathian Ram chanchin puangchhuaktu a ni tluan parh a ni.
17. Engtin nge Lalram kaihhnawih thilte chu kan nunah kan dah hmasa ber a ni tih kan lantîr theih?
17 Min Hruaitu chu kan entawn tûr a ni a, sum tam tak hlawh theihna hna chu kan nuna thil tum ber nihtîr tûra Setana khawvêlin min thlêm chu kan remti tûr a ni lo. (Marka 1:17-21) Khawvêl thila inhamtân tlat a, Lalram kaihhnawih thilte a pahnihnaa dah chu a va âtthlâk dâwn êm! Isua chuan Lalram thuhrilhna leh zirtîr siam rawngbâwlna chu kan kutah a dah a ni. (Matthaia 24:14; 28:19, 20) Chhûngkaw enkawl leh mawhphurhna dangte pawh kan nei mai thei; mahse, tlai lam leh chawlhkâr tâwpte chu thuhril leh zirtîr siam tûra kan Kristian mawhphurhna hlen chhuah nâna kan hmang thei hi kan lâwm hlê a ni lâwm ni? Kum 2001 rawngbâwl kum chhûnga mi 780,000 vêlin hunbi kima rawngbâwltu, a nih loh leh pioneer anga rawng an bâwl thei chu a va lâwmawm êm!
18. Engin nge rawngbâwlnaa hlimna hmu tûrin min ṭanpui?
18 Chanchin Ṭha ziakte chuan Isua chu hna thawktu leh mi khawngaih thei tak angin a târ lang a. A vêla mite thlarau lam thil mamawhzia a hmuh chuan, anni chu a khawngaih êm êm a, phûr takin a ṭanpui a ni. (Marka 6:31-34) Mi dangte hmangaihna leh anmahni ṭanpui duhna tak tak avânga rawng bâwl kan nih chuan kan rawngbâwlna chu a hlimawm sawt ṭhîn. A nih leh chutiang duhna chu engtin nge kan neih theih ang? Jayson-a chuan: “Ka tleirâwl lai chuan rawng bâwl chu nuam ka ti lêm lo,” a ti. Rawngbâwlnaa tel duhna nei tûrin ani chu engin nge ṭanpui? Amah vêk chuan heti hian a chhâng: “Kan chhûngkuaah chuan, Inrinni zîng apiang hi thlawhhma rawng bâwl nâna hman a ni ṭhîn a. Hei hi ka tân thil ṭha tak a ni, a chhan chu rawngbâwlnaa ka chhuah tam poh leh a rah chhuah ṭha ka hmu tam a, nuam ka ti tawlh tawlh mai a ni,” tiin. Keini pawh rawngbâwlnaah taima takin kan tel ziah tûr a ni.
19. Krista hruaina chungchângah eng nge kan tum tlat tûr chu ni?
19 Krista hruaina pawm chu a hahdamthlâkin, a manhla tak zet a ni. A hruaina kan pawm chuan, kan vânglai nîte chu hriatna leh finna lama hmasâwn hun a lo ni a. Chhûngkaw nun pawh remna leh hlimna bul a lo ni a, rawngbâwlna pawh hi hlimna leh lungawina thlentu a lo ni bawk. Chuvângin, kan nî tin nunah leh thutlûkna siamah hian Krista hruaina kan tân a takzia lantîr chu i tum tlat zêl ang u. (Kolossa 3:23, 24) Nimahsela, Isua Krista chuan thil dang—Kristian kohhran—hmang pawhin hma a hruai bawk a ni. Chu ruahmanna kan hlâwkpui theih dân chu thuziak dawtlehin a sawifiah ang. (w02 3/15)
[Footnote]
a An hming dik tak hman a ni lo.
I La Hre Reng Em?
• Engtin nge Pathian Hruaitu ruat zuina chuan hlâwkna min pêk?
• Engtin nge naupangte chuan Isua hruaina zui an duhzia an lantîr theih?
• Krista hruaina hnuaia intulûtte chhûngkaw nunah chu chuan eng nghawng nge a neih?
• Engtin nge kan rawngbâwlna chuan Krista hruaina kan tân a takzia a lantîr theih?
[Phêk 21-naa milemte]
Vânglai hun hi Pathian leh min Hruaitu atâna a mi ruat hriatna neih theihna hun ṭha a ni
[Phêk 22-naa milem]
Krista hruaina hnuaia intukluhna chuan chhûngkaw hlimna a tipung
[Phêk 24-naa milemte]
Isua chuan Lalram a zawng hmasa. I zawng hmasa ve em?