KRISTIANTE ANGIN NUNG RAWH

Chawlhkâr Chhûng Inkhâwma Tel Tûr Hmêlhmang Thar

January 2018 aṭangin, chawlhkâr chhûng inkhâwmah chuan in ṭawnga neih a la nih loh pawhin New World Translation of the Holy Scriptures (nwtsty) online study edition aṭanga lâk chhuah study note leh media a tel tawh dâwn a. He hmanrua hian inkhâwm atâna in inbuatsaihna a tiphuisui ang tih chu rinhlelh rual a ni lo. A pawimawh zâwk chu, hmangaihna nei tak kan Pa, Jehova a hnaihtîr lehzual tûr che u hi a ni.

STUDY NOTE

Study note chuan hnam dân te, hmun te, leh Bible chânga hman ṭawngkamte hriatthiamna min pe a ni.

Matthaia 12:20

La khu: In chhûnga hman ṭhin khâwnvâr chu olive hriaka khat hlum bêl tê a ni a. Chu khâwnvâra lâ, a nih loh leh a phita chuan hriak chu hîp chhovin mei alh chu a châwm a ni. “La khu” tia lehlin Grik ṭawngkam hian khâwnvâr phita, mei vâm la awm mah se, a alh tawh loh emaw, a mit tawh emaw vânga khu tawh lo emaw chu a kâwk thei a ni. Isaia 42:3-a hrilh lâwkna hian Isua khawngaihna chu a sawi lâwk a; ani chuan mi inngaitlâwm leh hnehchhiah tâwkte beiseina êng hnuhnûng ber pawh a timit ngai lo vang.

Matthaia 26:13

Tih tak meuhvin: Hebrai ṭawnga ʼa·menʹ tih a lam rîk dâna lehlin Grik ṭawnga a·menʹ tih chu “ni rawh se,” a nih loh leh “tehrêng mai” tihna a ni a. Isua chuan he ṭawngkam hi thu pakhat, thutiam pakhat, a nih loh leh hrilh lâwkna pakhat a sawi hmain a sawi chhuak ṭhîn a, chutiang chuan a thusawi dikna leh rin tlâkna chu a sawi uar ṭhîn. Isua’n “tih tak meuhvin,” a nih loh leh amen tih ṭawngkam a hman dân hi a danglam bîk hle. Chanchin Ṭha Johana ziaka kan hmuh ṭhin angin, vawi hnih azâwna (a·menʹ a·menʹ) a tih hian, Isua ṭawngkam chu “tih tak meuhvin, tih tak meuhvin,” tia lehlin a ni.—Joh. 1:51.

MEDIA

Thlalâk te, milem te, ṭawng tel lo video leh cartoon lemte chuan Bible-a chhinchhiah thil hrang hrangte chu chipchiar takin a târ lang a ni.

Bethphage Khua, Olive Tlâng, leh Jerusalem

He video tawi hian, khaw chhak lam aṭanga Jerusalem panna kawng, tûn laia et-Tur khua—Bible hun laia Bethphage khua nia rin—aṭanga Olive Tlâng sâng zâwk lam panna kawng chu a lantîr a. Bethani khua chu Bethphage khaw chhak lam, Olive Tlâng âwih chhuah lamah a awm a ni. Isua leh a zirtîrte Jerusalema an awm laiin tûn laia el-ʽAzariyeh (El ʽEizariya) tia hriat Bethani khuaah an riak ṭhîn a, Arabic ṭawng chuan “Lazara Awmna Khua” tihna a ni. Isua chu Mari, Marthi, leh Lazara te inah a thleng ṭhîn tih rinhlelh rual a ni lo. (Mt. 21:17; Mk. 11:11; Lk. 21:37; Joh. 11:1) An in aṭanga Jerusalema a kalin, Isua chuan video-a lang he kawng hi a zawh ngei a rinawm. C.E. 33, Nisan 9-a Olive Tlâng kal tlanga sabengtung no chung chuanga Jerusalem lam a pan khân, Bethphage aṭanga Jerusalem panna he kawng hi a zawh ngei a rinawm bawk a ni.

Bethani aṭanga Bethphage panna kawng
Bethphage
Olive Tlâng
Kidron Ruam
Biak In Tlâng

Ke Artui Ruha Perek Inkhêng

Hei hi mihring ke artui ruha a seizâwng 11.5 cm (4.5 in.) perek inkhêng lût lem siam chawp thlalâk a ni a. Rom hun laia mi a tak erawh chu Jerusalem hmâr lama thil hlui laih chhuahna aṭangin kum 1968-ah hmuh chhuah a ni. He thil hlui laih chhuah hian mi chu thing bana khêng beta tihhlum nân perek an hmang a ni tih a finfiah a. He perek hi Rom sipaite’n Isua bana khenbeh nâna an hman perek nên a inang mai thei. Ke artui ruha perek inkhêng tak tak chu ossuary tia koh, taksa a ṭawih chhiat vek hnuah ruhrote dah khâwmna lunga siam bâwm aṭanga an hmuh chhuah a ni. Hei hian bana tihhlum tawh tuemaw chu thlâna phûm theih a ni tih a târ lang.—Mt. 27:35.