Nun leh Rawngbâwlna Inzirna Lehkhabu Atâna Thu Lâk Chhuahnate
MARCH 5-11
PATHIAN THU AṬANGA RO HLUTE | MATTHAIA 20-21
“Tupawh In Zînga Mi Lian Nih Duh Apiang Chu In Rawngbâwltuah A Awm Zâwk Tûr A Ni”
(Matthaia 20:3) Tin, feh reh sân lai vêlin a va chhuak a, mi dang dâwr hmuna ding mai maite a hmu a.
nwtsty media
Dâwr Hmun
Dâwr hmun ṭhenkhat chu milema kan hmuh angin kawng dunga awm a ni a. Thil zuartute chuan an thil zawrhte chu kawng dâl khawpin an dah ṭeuh ṭhîn a. Tualchhûng mite chuan ina ei tûr te, thlêng te leh bungbêl te, no man to te, leh thlai tharte chu an lei thei a ni. Refrigeration (thil dah rei theihna) a awm loh avângin, mite chuan an mamawh châkkhaite lei tûrin nî tin dâwra an kal a ngai a. Chutah chuan thil leituin sumdâwngte leh khualzinte hnên aṭangin chanchin a hre thei a, naupangte pawh an infiam theiin, hna nei lote’n hna an zawng thei a ni. Dâwr hmunahte chuan Isua’n dam lote a tidam a, Paula’n thu a hril bawk. (Tirh. 17:17) Chu mi nêna inkalh takin, mi chapo tak lehkhaziaktute leh Pharisaite chuan chûng vântlâng hmuna mite hriat hlawh leh chibai bûk chu an ngaina a ni.
(Matthaia 20:20, 21) Chu mi lai chuan Zebedaia fapate nu chu a fapate hruaiin, a hnênah a lo kal a, chibai a bûk a, thil eng emaw a dîl a. 21 Tin, ani chuan a hnênah, “Engnge i duh?” a ti a. Tin, anin a hnênah, “Hêng ka fapate pahnih hi i ramah, i ding lamah pakhat, i vei lamah pakhat an ṭhut theihna tûrin thu pe ang che,” a ti a.
Mt. 20:20, 21 ṭanchhan nwtsty study note
Zebedaia fapate nu: Ani chu tirhkoh Jakoba leh Johana te nu a ni a. Marka ziak chuan Jakoba leh Johana te chu Isua pantute an ni a ti a. Anni chu a dîltu ber an ni a; mahse, an nu Salomi aṭangin an dîl a, an nu chu Isua nî a ni.—Mt. 27:55, 56; Mk. 15:40, 41; Joh. 19:25.
i ding lamah pakhat, i vei lamah pakhat: Heta dinhmun pahnih hian chawimawina leh thuneihna a kâwk a; mahse, chawimawina sâng ber awmna chu ding lam a ni fo ṭhîn.—Sâm 110:1; Tirh. 7:55, 56; Rom 8:34.
(Matthaia 20:25-28) Isua erawh chuan anniho chu a ko va, “Jentailte chunga rorêltute chu an chungah an lal êm êm ṭhîn a, an mi liante chuan an chungah thu an nei êm êm bawk ṭhîn tih in hria. 26 Nimahsela, nangni zîngah zawng chutiang a ni lo vang; tupawh in zînga mi lian nih duh apiang chu in rawngbâwltuah a awm zâwk tûr a ni; 27 tupawh in zînga hmasa ber nih duh apiang chu in chhiahhlawhah a awm bawk tûr a ni; 28 Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zawka a lo kal ang khân,” a ti a.
Mt. 20:26, 28 ṭanchhan nwtsty study note
rawngbâwltu: A nih loh leh “chhiahhlawh.” Bible-in Grik thu mal di·aʹko·nos hi mi dangte tâna inthlahdah lova hna hnuaihnung thawktu sawi nân a hmang ṭhîn a. He thu mal hi Krista (Rom 15:8), Krista rawngbâwltute (1 Kor. 3:5-7; Kol. 1:23), kohhranho rawngbâwltute (Phil. 1:1; 1 Tim. 3:8), ina rawngbâwltute (Joh. 2:5, 9), leh sawrkâr thuneitute (Rom 13:4) sawi nâna hman a ni.
rawngbâwlsaka awm tûr ni lovin, rawngbâwl tûr zâwkin: A nih loh leh “hnathawhsaka awm tûr ni lovin, hna thawk tûr zâwkin.”
Thlarau Lam Lunghlute Laih Chhuahna
(Matthaia 21:9) Tin, mipui a hma lama kalte leh a zuite chuan, “Davida fapa hnênah Hosanna! Lalpa hminga lo kal chu fakin awm rawh se, chungnung berah khian Hosanna!” tiin an au va.
Mt. 21:9 ṭanchhan nwtsty study note
Hosanna: He Grik ṭawngkam hi “chhandam rawh, kan ngên a che,” a nih loh leh “khawngaihin, chhandam rawh” tih awmze nei Hebrai ṭawng aṭanga lo chhuak a ni a. He ṭawngkam hi Pathian hnêna chhandamna emaw, hnehna emaw ngenna atâna hman a ni; chu chu “khawngaihin, chhandamna pe rawh,” tia lehlin theih a ni. A hnuah, ṭawngtaina leh chawimawina atâna hman a ni. Chu ṭawngkam chu Sâm 118:25-ah hmuh a ni a, Kalhlên Kûta an sak ṭhin Fakna Hla-ah a tel a ni. Chuvângin, chûng hun laiahte chuan chu ṭawngkam chu an rilruah a lang nghâl ṭhîn a. Pathianin Davida Fapa chhandam rawh tih ṭawngṭaina a chhân dân kawng khat chu thihna ata a kaihthawh lehna hmangin a ni. Isua chuan Mt. 21:42-a a thusawiah Messia chungchâng sawi nân Sâm 118:22, 23-a thu chu a lachhâwng a ni.
Davida fapa: He ṭawngkam hian Isua thlahtute leh thutiam Messia nia a chanvo chu a târ lang a ni.
(Matthaia 21:18, 19) Tin, zîngah khawpui lama a kîr leh laiin a ril a lo ṭâm ta a. 19 Tin, kawng sîrah chuan theipui kûng a hmu a, a va pan a, a hnah chauh lo chu engmah a hmu lo va. Tin, a hnênah, “Kumkhuain lo rah tawh suh ang che,” a ti a. Tin, theipui chu a vuai ta nghâl mai a.
jy-E 244 ¶4-6
Rinna Chungchâng Zirtîr Nân Theipui Kûng Hman A Ni
A nih leh, engvângin nge Isua’n thingkûng chu a tihvuai? Chutianga a tihchhan chu: “Tih tak meuhvin ka hrilh a che u, rinna in neih a, in rinhlelh loh chuan, theipui chunga tih ang chang hi in ti lo vang a, he tlâng hnênah pawh hian, ‘Lo insawn la, tuifinriatah lo inpaih rawh,’ in tih chuan, in tih ang chuan a lo awm ang. Tin, engkim ring chunga ṭawngṭaia in dîl apiang chu in hmu ang,” tia a sawi aṭangin a hriat theih a. (Matthaia 21:21, 22) Tlâng sawn thei khawp rinna neih chungchâng a lo sawi tawh chu a sawi nawn leh a ni.—Matthaia 17:20.
Chuvângin, Isua chuan thingkûng chu tivuaiin Pathian rin a ngaihzia zir tûr pawimawh tak a pe a. “Engkim in ṭawngṭaia in dil apiang chu hmu tawhah inngai ula, tichuan in hmu ang,” tiin a sawi a ni. (Marka 11:24) Isua hnungzuitute tân zir tûr pawimawh a va ni tak êm! Nakin lawka fiahna khirh tak hmachhawn mai tûr tirhkohte tân a pawimawh lehzual a ni. Theipui kûng tihvuaina leh rinnain inkûngkaihna dang a la nei a ni.
Theipui kûng ang bawkin, Israel hnam chu mi tihder hmang ang an ni a. He hnam hi Pathian nêna inlaichînna thuthlung nei an ni a, a Dân zâwm angin an lang mai thei. Mahse, a hnam pumpui chuan rinna a tlachhamin rah ṭha a chhuah lo tih a chiang a ni. Pathian Fapa meuh pawh an hnawl hial a ni! Chuvângin, Isua chuan rah thei lo theipui kûng chu tivuaiin rah lo leh rinna nei lo hnam tihtâwp a nih dân tûr a lo târ lang a ni.
Bible Chhiar
(Matthaia 20:1-19) “Vân ram chu in neitupa a grêp huana hnathawktute ruai tûra zînga chhuaka ang chu a ni si a. 2 Tin, ani chuan hnathawktute nên chuan ni khata duli hlawha an inrem veleh a grêp huanah chuan a tîr ta hlawm a. 3 Tin, feh reh sân lai vêlin a va chhuak a, mi dang dâwr hmuna ding mai maite a hmu a; 4 tin, an hnênah, ‘Nangni pawh grêp huanah va kal ve tawh u, a mawi tâwk apiang ka pe ang che u,’ a ti a. Tichuan an kal ta a. 5 Tin, chawfâk hun lai vêlah leh behliang mun hun lai vêlah chuan a va chhuak leh a, chutiang bawkin a ti leh a. 6 Tin, pahmei zanriah chhum hun lai vêlah chuan a va chhuak a, mi dang dingte a hmu a; tin, an hnênah, ‘Engati nge nilêngin heta in din mai mai ni?’ a ti a. 7 Anni chuan a hnênah, ‘Tuman min rawih loh avângin,’ an ti a. Ani chuan an hnênah, ‘Nangni pawh grêp huanah va kal ve tawh u,’ a ti a. 8 “Tin, khua a lo tlai lam chuan, grêp huan neitupa chuan, a sum enkawltu hnênah, ‘Hnathawktute kha ko la, a hnuhnûng bera ṭanin a hmasa ber thlengin an hlawh pe rawh,’ a ti a. 9 Tin, pahmei zanriah chhum hun lai vêla a rawihte chu an lo kal chuan duli an hmu ṭheuh va. 10 Tin, a hmasa berte chu an lo kal chuan, hmuh tam deuh an inring a; nimahsela anni pawh chuan duli bawk an hmu ṭheuh va. 11-12 Tin, an han dawn chuan, ‘Heng hnuhnûng berte hian dârkâr khat chauh an thawk a, keini chhûn hrehawm leh thawsa tuartute tlukin i siam si,’ tiin in neitupa chungah chuan an phunnawi ta a. 13 “Ani erawh chuan, an zînga mi pakhat hnênah, ‘Ṭhiana, i chungah engmah ka tisual hlei nêm; duli hlawhah kan inrem lo vem ni? 14 I ta kha la la, kal mai rawh; nangmah ka pêk che ang bawk kha he hnuhnûng ber hnênah hian ka pe duh a ni. 15 Ka ta na nâ nâ chu ka duh duha ka tih a thiang lo vem ni? A nih loh leh kei ka ṭhat avângin nangin i itsîk em ni? tiin a chhâng a. 16 Chutiangin, hnuhnûng berte chu a hmasa berte an la ni ang, hmasa berte pawh chu a hnuhnûng berte an la ni ang,” a ti a. 17 Tin, Isua Jerusalem khuaa a han chhoh laiin zirtîr sâwm leh pahnihte chu a hruai hrang a, kalkawngah chuan an hnênah, 18 “Ngai teh u, Jerusalem khuaa kan chhoh dâwn hi; Mihring Fapa hi puithiam lalte leh lehkhaziaktute kuta mantîrin a awm dâwn a ni; tin, anni chuan thi tûrin a chungah thu an titlu ang a, 19 nuihza siam nâna hman tûr leh vuak tûr leh kraws-a khenbeh tûrin Jentailte hnênah an pe ang; tin ni thum nia kaihthawhin a awm ang,” a ti a.
MARCH 12-18
PATHIAN THU AṬANGA RO HLUTE | MATTHAIA 22-23
“Thupêk Ropui Ber Pahnih Chu Zâwm Rawh”
(Matthaia 22:35-38) Tin, an zînga mi pakhat, dân hretuin, “Zirtîrtu, Dân thuah chuan eng thupêk hi nge ropui ber?” tiin amah fiah nân thu a zâwt a. Tin, ani chuan a hnênah, “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,’ tih hi. 38 Chu chu thu pêk ropui leh pawimawh ber a ni.
Mt. 22:37 ṭanchhan nwtsty study note
thinlung: Entîr nei ṭawngkama hman a nih chuan he thu mal hian chhûng lam nihna a kâwk tlângpui a. Mahse, “thlarau” leh “rilru” te nêna hman kawp a nih chuan awmze hran a nei a, ngaihtuahna te, châkna te, leh rilru vei zâwngte a kâwk bîk a ni. Heta thu mal pathum (thinlung, thlarau, leh rilru) hi awmze hrang ṭheuh neia hman a ni lo va; inthlâwp tawn theia hman a ni a; Pathian hmangaihna pumhlûm neih a ngaihzia a uar thei ang bera sawi nâna hman a ni.
thlarau: A nih loh leh “nunna.”
rilru: Hei hi hriat theihna a ni a. Miin Pathian hre tûr leh amah hmangaih lehzual tûrin a hriatna chu a hmang tûr a ni. (Joh. 17:3; Rom 12:1) Deut. 6:5 aṭanga lâk chhuah a tîra Hebrai thu ziakah chuan, ‘thinlung, rilru, chakna,’ tih ṭawngkam a hmang a. Mahse, Matthaia ziaka Grik ṭawnga a lan dân angin, “chakna” tih thu mal hmang lovin “rilru” tih a hmang a. Chutianga thu mal hrang hrang hman a nih chhan tam tak a awm thei a ni. Pakhatnaah chuan, hmân lai Hebrai ṭawngah “rilru” sawi nân thu mal bîk awm lo mah se, Hebrai ṭawnga “thinlung” tih thu mal chu a huam tel fo nia ngaih theih a ni. He thu mal hi entîr neia hman a nih chuan, ngaihtuahna te, rilru veizâwng te, rilru put hmang te, leh chêttîrtute pawh tiamin, kan chhûng lam nihna a kâwk a ni. (Deut. 29:4; Sâm 26:2; 64:6; thinlung tih study note en rawh.) Chuvâng chuan, Hebrai thu ziaka “thinlung” tih thu mal a hmannaah, Grik Septuagint Bible chuan “rilru” tih thu mal nêna intluk ṭawngkam a hmang ṭhîn a ni. (Gen. 8:21; 17:17; Thuf. 2:10; Is. 14:13) Matthaia’n Deut. 6:5 thu a lâk chhâwn laia Grik thu mal “chakna” ni lovin “rilru” tih thu mal a hman mai theih chhan dang leh chu “chakna” [thahrui] tia lehlin Hebrai thu mal hian taksa lam leh rilru lam emaw, hriatna lam emaw a huam tel theih vâng a ni. Engpawh ni se, Hebrai leh Grik ṭawnga he awmze inthlâwp tawn thei hian Chanchin Ṭha ziaktute’n Deuteronomy-a thu an lâk chhâwn laiin thu mal inang chiah an hman loh chhan hrilhfiah thei tûrin min ṭanpui a ni.
(Matthaia 22:39) Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi.
Mt. 22:39 ṭanchhan nwtsty study note
A dawttu: Isua’n Pharisaite zawhna tlang taka a chhânna chu Mt. 22:37-ah a chuang a; mahse, an zawhna a chhân mai bâkah, thupêka a dawttu chu a la chhâwng a (Lev. 19:18), thupêk pahnihte chu thliar hran theih loh khawpin a inzawm tlat tih leh Dân thu leh Zâwlneite thu zawng zawng chu, chu thupêk pahnih chuan a inkhaikhâwm tih a zirtîr a ni.—Mt. 22:40.
vêngte: “Vêngte” (a ngial a nganna sawi chuan, “bula awm”) tih Grik thu malah hian kan bul hnaia mite mai aia tam a huam thei a. Miin inzawmna a neihpui tupawh a kâwk thei a ni.—Lk. 10:29-37; Rom 13:8-10.
(Matthaia 22:40) Chûng thupêk pahnih chuan dân thu leh zâwlneite thu zawng zawng a inkhaikhâwm vek a ni,” a ti a.
Mt. 22:40 ṭanchhan nwtsty study note
Dân thu leh Zâwlneite thu: “Dân thu” tih chuan Bible-a Genesis aṭanga Deuteronomy thleng a kâwk a. “Zâwlneite thu” tih chuan Hebrai Pathian Lehkha Thua hrilh lâwkna bute a kâwk a ni. Mahse, he ṭawngkam pahnih hi hman kawp a nih chuan Hebrai Pathian Lehkha Thu pumpui a tel tia hriatthiam theih a ni.—Mt. 7:12; 22:40; Lk. 16:16.
inkhaikhâwm: Grik ṭawnga a ngial a ngana awmze nei “inkhaikhâwm” tih thu mal chu hetah hian “innghat; ṭanchhan” tih entîr nei ṭawngkam atâna hman a ni a. Chuvângin, Isua chuan Dân leh Thu Sâwm Pêk mai ni lovin, Hebrai Pathian Lehkha Thu zawng zawng hi hmangaihnaa innghat a ni tih a târ lang a ni.—Rom 13:9.
Thlarau Lam Lunghlute Laih Chhuahna
(Matthaia 22:21) Anni chuan a hnênah “Kaisara,” an ti a. Tin, ani chuan an hnênah, “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a.
Mt. 22:21 ṭanchhan nwtsty study note
Kaisara thilte chu Kaisara hnênah: Heta Isua chhânnaah leh chanchin thuhmun ziahna Mk. 12:17 leh Lk. 20:25-ah chauh Rom Lal chungchâng sawi a ni a. “Kaisara thilte” tiah hian khawvêl sawrkârin thil min tihsakte avânga chhiah kan chawi te, thuneitute chunga lantîr tûr chawimawina te, leh inâwm tâwk intukluhnate pawh a tel a ni.—Rom 13:1-7.
Pathian thilte chu Pathian hnênah: Thinlung zawng zawnga biakna, thinlung zawng zawnga hmangaihna, leh rinawm taka thuâwih pumhlûmna a huam tel a ni.—Mt. 4:10; 22:37, 38; Tirh. 5:29; Rom 14:8.
(Matthaia 23:24) Nangni hruaitu mitdel, thosi thlifaia sanghâwngsei lem si ṭhînte u!
Mt. 23:24 ṭanchhan nwtsty study note
thosi thlifaia sanghâwngsei lem si ṭhînte u: Thosi leh sanghâwngsei hi Israel mite hriatah, sa thiang lote zînga tê ber leh lian ber a ni a. (Lev. 11:4, 21-24) Sakhaw hruaitute’n dân anga an thianghlim theih nân an thil inah thosi an thlifai a; mahse, sanghâwngsei lem nêna khaikhin theih Dân thupêka thil pawimawh zâwkte an ngaihthah leh si tia sawiin, Isua chuan thiltih inkalh pahnih târ langin sawi uarna ṭawngkam a hmang a ni.
Bible Chhiar
(Matthaia 22:1-22) Tin, Isuan anmahni a bia a, an hnênah tehkhin thuin a sawi leh a, 2 “Vân ram chu lal tuemaw a fapa tâna lawi chaw siam nên chuan tehkhin a ni. 3 Tin, lawi chaw eia a sâwmte chu ko tûrin a bawite a tîr a, nimahsela an lo kal duh lo va. 4 Tin, ani chuan, ‘Ka sâwmte hnênah, Ngai teh u, ka ruai chu ka peih ta; ka sebâwngpate leh ka ran châwm thaute ka talh a, engkim peih a ni ta e; lawi chaw ei tûrin lo kal tawh rawh u, ti rawh u,’ tiin bawi dangte a tîr leh a. 5 Nimahsela, an lo ngaihsak lo va, an kal ta mai a, pakhat chu a lovah a kal a, pakhat chu a sumdâwnnaah; 6 mi dangte chuan a bawite chu an man a, zahthlâk takin an siam a, an tihlum ta mai a. 7 Chutichuan, lal chu a thinur ta a; a sipaihote a tîr a, chûng tualthattute chu a tiboral a, an khua pawh a hâlsak ta a. 8 “Tin, a bawite hnênah chuan, ‘Lawi chaw peih a ni ta, ka sâwmte erawh kha chu ei tlâk an ni lo. 9 Chutichuan, kawng pêng ṭhuamahte kal ula, mi in hmuh apiang lawi chaw ei tûrin sâwm rawh u,’ a ti a. 10 Tichuan, chûng bawite chu an chhuak a, kawngahte chuan an va kal a, an hmuh apiang mi sual leh mi ṭhate pawh an hruai khâwm ta vek a; tichuan lawi chaw pindan chu mi sâwmtein an lo khat ta a. 11 “Nimahsela, lal chu mi sâwmte en tûra a lo luh chuanin, inneihna puan sin lo mi pakhat chutah chuan a hmu a; 12 tichuan, a hnênah, ‘Ṭhiana, eng tizia nge ni inneihna puan lovin hetah i lo luh le? a ti a. Tin, ani chu a ngawi reng a. 13 Tin, lal chuan a bawite hnênah, ‘A kut leh a ke phuar ula, pâwn lam thimah paih chhuak rawh u; chutah chuan ṭah leh ha ṭhial a awm ang,’ a ti a. 14 “Sâwmte chu tam tak an ni a, thlante erawh chu tlêmtê an ni,” a ti a. 15 Chu mi lai chuan Pharisaite chuan a thu sawia an man theihnazia tûr an va inrâwn a. 16 Tin, an zirtîrte, Heroda pâwla mite nên, a hnênah an tîr a, chu mite chuan, “Zirtîrtu, mi dik tak i ni a, tih tak zetin Pathian kawng thu i zirtîr ṭhîn a, pawisak chuan tumah i nei lo tih kan hria e; tumah thlei bîk i nei si lo va. 17 Chutichuan, engtin nge i ngaih? min hrilh teh khai! Kaisara hnêna chhiah chawi hi a thiang nge thiang lo?” an ti a. 18 Nimahsela, Isuan an sualzia chu a lo hria a, “Vervêkte u, engah nge mi fiah? 19 Chhiah tangka chu mi entîr rawh u,” a ti a. Tin, a hnênah duli an rawn la a, 20 Tin, ani chuan an hnênah, “Hei hi tu lem leh tu hming nge ni?” a ti a. 21 Anni chuan a hnênah “Kaisara,” an ti a. Tin, ani chuan an hnênah, “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. 22 Chûng thu chu an hriatin mak an ti hle a, amah chu an kalsan a, an kal ta daih a.
MARCH 19-25
PATHIAN THU AṬANGA RO HLUTE | MATTHAIA 24
“Ni Hnuhnûng Chhûng Hian Thlarau Lamah Harhvâng Reng Rawh”
(Matthaia 24:12) Tin, sual a la pun dâwn avângin mi tam zâwk hmangaihna chu a la dai ang.
it-2-E 279 ¶6
Hmangaihna
Kan Hmangaihna A Dai Thei. Isua Krista chuan a zirtîrte hnênah nakina thil lo awm tûr chungchâng a hrilhnaah Pathian ringtu nia inchhâl mi tam takte hmangaihna (a·gaʹpe) chu a dai ang tih a târ lang a. (Mt. 24:3, 12) Tirhkoh Paula chuan lo awm tûr hun khirh tak hriat theih dân hmêlhmang pakhat a sawinaah, mite chu “tangka ngainatu te” an ni ang a ti a. (2 Tim. 3:1, 2) Chuvângin, miin thu bul dikte chu pawisa tawh lovin, a lo neih ṭhin hmangaihna duhawm tak pawh a hloh leh thei tih a chiang a ni. Hei hian miin Pathian Thu chhût ngun a, A thu bulte mila a nun siam ṭhain a hmangaihna a chhawm nun leh vawn ngheh reng a pawimawhzia a târ lang a ni.—Eph. 4:15, 22-24.
(Matthaia 24:39) tui a lo lêt a, an zaa a lâk bo vek hma loh chuan engmah an hre lo va; Mihring Fapa lo kal lehna chu chutiang bawk a ni ang.
w99-E 11/15 19 ¶5
Pathian Laka I Mawhphurhna Zawng Zawng I Hlen Em?
5 Isua Krista chuan kan hun khirh tak chungchângah: “Nova dam lai ang bawk kha Mihring Fapa lo kal lehna chu a ni ang. Chûng nî tuilêt hmate chuan Nova lawnga a luh nî thlengin an eiin an bâr a, nupui pasal an innei ṭhîn; tui a lo lêt a, an zaa a lâk bo vek hma loh chuan engmah an hre lo va; Mihring Fapa lo kal lehna chu chutiang bawk a ni ang,” tiin a sawi a. (Matthaia 24:37-39) A awm tâwka ei a, in chu engmah sualna a awm lova, inneihna ruahmantu chu Pathian ngei a ni. (Genesis 2:20-24) Chutiang chu ni mah se, nuna thil pângngai takte chu kan lungkham berte a lo ni reng tih kan inhriat chuan, engvângin nge ṭawngṭaia kan ngaihtuah ṭhat loh vang? Jehova chuan Lalram dah hmasa tûrin, thil dik ti tûrin, leh a laka kan mawhphurhnate hlen thei tûrin min ṭanpui thei a ni.—Matthaia 6:33; Rom 12:12; 2 Korinth 13:7.
(Matthaia 24:44) Chuvângin, nangni pawh inring rengin awm rawh u, in rin loh hunah Mihring Fapa a lo kal dâwn si a.
jy-E 259 ¶5
Tirhkohte Chuan Chhinchhiahna An Dîl
Ani chuan a zirtîrte chu an harhvâng a, an inring reng a, an inpeih reng a ngai dâwn tih a sawi a. Entîrna dang hmangin he vaukhânna pawimawhzia heti hian a sawi uar a ni: “Hei hi hre rawh u, rûkru a lo kal hun tûr in neituin hria sela, a vêng ang a, a in a reh pawhtîr lo vang. Chuvângin, nangni pawh inring rengin awm rawh u, in rin loh hunah Mihring Fapa a lo kal dâwn si a,” tiin.—Matthaia 24:43, 44.
Thlarau Lam Lunghlute Laih Chhuahna
(Matthaia 24:8) Chûng zawng zawng chu nau vei ṭantirhna a ni.
Mt. 24:8 ṭanchhan nwtsty study note
nau vei: He Grik thu mal hi a ngial a ngan chuan nau vei laia na lutuk sawina a ni a. Hei hi lungngaihna, natna, leh hrehawmna lam sawina tlângpui ni mah se, nau vei laia nâ anga sawi theih hrilh lâwk buainate leh hrehawm tawrhnate chu Mt. 24:21-a târ lan hrehawm nasa tak hmain a thleng zingin, a nasain, a rei ang tih sawina a ni thei.
(Matthaia 24:20) Tin, in tlân bo hun tur chu thlasikah emaw, Chawlhniah emaw a lo thlen loh nân ṭawngṭai rawh u.
Mt. 24:20 ṭanchhan nwtsty study note
thlasikah: Hetih hun laia nasa taka ruah sûr te, tui lian te, leh khaw vâwtte chuan khual zin a tiharin, ei tûr leh awmna tûr hmuh a tiharsa ang.—Ezr. 10:9, 13.
Chawlhniah: Juda ram ang hmun ṭhenkhatah Chawlhni dân nêna inkaihhnawih khuahkhirhnate chuan mi chu khual hla taka zin vah leh thil phurhte a tiharsa ang a; Chawlhniah chuan khawpui kawngkhârte chu khâr reng a ni bawk.— Tirh. 1:12 leh App. B12 en rawh.
Bible Chhiar
(Matthaia 24:1-22) Tin, Isua Pathian biak in ata a chhuak a, a kal dâwn a. Tin, a zirtîrte chu Pathian biak inte entîr tûrin a hnênah an lo kal a. 2 Ani erawh chuan an hnênah, “Hêng zawng zawng hi in hmu maw? tih tak meuhvin ka hrilh a che u, tihchim lohva lung intiang rêng rêng hetah a awm lo vang,” a ti a, a chhâng a. 3 Tin, Oliv Tlângah chuan a ṭhut laiin zirtîrte chu anmahni chauhvin a hnênah an kal a, “Chûng chu engtikah nge a lo awm ang? i lo kal lehna leh khawvêl tâwpna chhinchhiahna chu engnge ni ang? min hrilh rawh,” an ti a. 4 Tin, Isuan a chhâng a, an hnênah, “Tuman an tihder loh nân che u fimkhur rawh u. 5 Mi tam takin, ‘Krista chu ka ni,’ tiin keima hming chhâlin an lo kal ang a, mi tam tak an tihder dâwn si a. 6 Tin, indo thu leh indo thuthang in la hria ang; in mangan loh nân fîmkhur rawh u; chûng chu a lo thleng tûr rêng a ni; nimahsela tâwpna chu a la ni rih lo vang. 7 Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah ṭâmte a tla ang a, lîrte a nghîng ang. 8 Chûng zawng zawng chu nau vei ṭantirhna a ni. 9 “Chu mi hunah chuan hrehawm tuar turin an mantîr ang che u a, an tihlum ang che u; ka hming avângin hnam zawng zawng huat in ni ang. 10 Chu mi hunah chuan mi tam tak an tlu ang a, an inmantîr tawn ang a, an inhaw tawn ang. 11 Zâwlnei der tam tak pawh an lo chhuak ang a, mi tam tak an tihder ang, 12 Tin, sual a la pun dâwn avângin mi tam zâwk hmangaihna chu a la dai ang. 13 Nimahsela, a tâwp thlenga tuar peih apiang chu, chu mi ngei chu chhandamin a awm ang. 14 Tin, he ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang. 15 “Chutichuan, tiṭiautu tenawm, zâwlnei Daniela sawia kha, hmun thianghlima dinga in hmuh hunah chuan (a chhiar apiangin a awmzia hre rawh se) 16 Judai rama awmte chu tlangahte tlân bo rawh se; 17 in chunga awm chu a ina englo chuh tûrin chhuk suh se; 18 tin, lova awm chu a puan chuh tûrin kîr leh suh se. 19 Chûng ni chuan raite leh nau no pawmte chung chu a pik ang. 20 Tin, in tlân bo hun tur chu thlasikah emaw, Chawlhniah emaw a lo thlen loh nân ṭawngṭai rawh u; 21 chu mi hunah chuan hrehawm nasa tak a awm dâwn si a; chutiang nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang. 22 Tin, chûng nite chu tihtawi ni suh sela mihring rêng rêng damin an chhuak lo vang; nimahsela, thlante avâng chuan chûng nîte chu tihtawi a ni ang.
MARCH 26–APRIL 1
PATHIAN THU AṬANGA RO HLUTE | MATTHAIA 25
“Ngaihven Rawh U”
(Matthaia 25:1-6) “Chu mi hunah chuan vân ram chu nula thianghlim sâwm an khâwnvâr kenga mo neitu hmuak tûra chhuakte nên chuan tehkhin a ni tawh ang. 2 An zînga mi panga an â a, panga an fing. 3 A âte chuan an khâwnvârte an kenin, a tui an keng tel si lo va; 4 a fingte erawh chuan an khâwnvârte an keng a, an ûmte chuan a tui an keng tel bawk a. 5 Tin, mo neitu chu a lo kal har avângin an zain an muthlu a, an lo muhîl ta a. 6 Tin, zan lai takah chuan, ‘Ngai teh u, mo neitu chu a lo kal e! A hmuak tûrin lo chhuak r’u khai!’ tiin au thâwm a lo awm ta a.
(Matthaia 25:7-10) Chu veleh chuan nula thianghlimho chu an tho vek a, an khâwnvârte chu an buatsaih a. 8 Tin, a âte chuan, a fingte hnênah, ‘In khâwnvâr tui kha min pe ve rawh u; kan khâwnvârte a thi dâwn e,’ an ti a. 9 Nimahsela, a fingte chuan, ‘Keini leh nangni tân a daih lo vang e; a zuartute hnênah kal ula lei ve zâwk rawh u,’ tiin an chhâng a. 10 Tin, lei tûra an kal bo hlân chuan mo neitu chu a lo thleng ta a; tichuan, a peihte chu amah nên lawi chaw eiin an lût a; tin, kawng chu an khâr ta a.
(Matthaia 25:11, 12) Chu mi hnuah chuan nula thianghlim dangte pawh chu an lo thleng a, ‘Ka pu, ka pu, min hawnsak rawh!’ an ti a. 12 Ani erawh chuan, ‘Tih tak meuhvin ka hrilh a che u, ka hre lo che u a ni,’ a ti a, a chhâng a.
Thlarau Lam Lunghlute Laih Chhuahna
(Matthaia 25:31-33) Amaherawhchu, Mihring Fapa hi chu, a vântirhkohte zawng zawng nên, a ropuinaa inthuama a lo kal hunah chuan, a ropuina ṭhutphahah a ṭhu ang a; 32 a hmaah chuan hnam tin an inkhâwm ang a: berâm vêngtuin kêl zîng ata a berâmte a hlîr angin anniho chu a hlîr ang a; 33 berâmte chu a ding lamah a dah ang a, kêlte erawh chu a vei lamah a dah ang.
Krista Unaute Chu Rinawm Takin Ṭanpui Rawh
7 Tûnah chuan, kêl leh beram tehkhin thu chu fiah takin kan hre thiam tawh a. Chûng thu-a tel mite nihna chungchângah, Isua chu Lalber, “mihring Fapa” a ni. “Ka unaute” a tih hian vâna Krista nêna rorêltu tûr thlarauva hriak thih unaunu leh unaupate a kâwk a ni. (Rom 8:16, 17) “Kêl” leh “berâm” chuan hnam zawng zawnga mi tinte a kâwk a. Anni chu thlarau thianghlima hriak thih an ni lo. An chunga rorêlna chu eng hunah nge a lo thlen ang? Chu chu lo thleng mai tawh tûr hrehawm nasa tak tâwp lamah a ni ang. A nih chuan, mi chu kêl, a nih loh leh berâm anga rorêlsak an nih chhan chu eng nge ni? Leia Krista hriak thih unau a la bângte an cheibâwl dânah a innghat a ni. He kal hmang tâwpna a hnaih tawlh tawlh rual hian, Pathian Jehova’n he tehkhin thu leh Matthaia bung 24 leh 25-a chhinchhiah tehkhin thu dangte min hriatthiamtîr avângin kan va lâwm tak êm!
(Matthaia 25:40) Tin, Lalber chuan an hnênah, ‘Tih tak meuhvin ka hrilh a che u, Hêng ka unau tê berte zînga mi pakhat chunga in tih chu ka chunga ti in ni,’ tiin a la chhâng ang.
“Ka Ṭhiante In Ni”
16 Pathian Ram rorêlna hnuaia leia nun i beiseina chuan, Krista unaute ṭhianah i siam tih engtin nge i târ lan theih? Târ lan theih dân kawng thum chauh i lo ngaihtuah ang u. A hmasa ber chu, thu hrilhnaa tih tak zeta tel a ni a. Krista chuan a unaute chu khawvêl puma chanchin ṭha hril tûrin thu a pe a ni. (Mt. 24:14) Amaherawhchu, tûn laia Krista unau leia a la bângte chuan an ṭhian berâm dangte ṭanpuina tel lo chuan chu mawhphurhna hlen chhuah chu harsa an ti hle dâwn a. A nihna takah chuan, berâm dang zînga mite’n thu hrilhnaa an tel a piang hian, Krista unaute chu an rawngbâwlna thianghlim hlen chhuak tûrin an ṭanpui tihna a ni a. Krista ang bawkin, bâwih rinawm leh fing tak pâwl chuan he inṭhianna thiltih hi an hlut hle a ni.
17 Berâm dangte’n Krista unaute an ṭanpui theih dân kawng hnihna chu thu hrilh rawngbâwlna sum leh paia ṭanpui hi a ni a. Isua chuan a hnungzuitute chu ‘sum lema’ ṭhian siam tûrin a fuih a ni. (Lk. 16:9) Isua emaw, Pathian Jehova emaw nêna inṭhianna chu kan lei thei tihna erawh a ni lo. Chu ai mah chuan, kan sum leh paite chu Lalram tihhmasâwn nâna kan hman chuan, kan inṭhianna leh kan hmangaihna chu ṭawngkam chauh ni lovin, “thiltih leh tih tak zetin” kan lantîr zâwk tihna a ni. (1 Joh. 3:16-18) Chutianga sum leh paia ṭanpuina chu thu hrilhnaa tel nâna kan insên hunah te, kan inkhâwmna inte sakna tûr leh a vawn ṭhatna tûra thawhlâwm kan thawh hunah te, leh khawvêl pum huap thu hrilh rawngbâwlna atâna thawhlâwm kan thawh hunah te kan pe a ni. Kan thawhlâwm thawh zât chu a tlêm emaw, a tam emaw pawh ni se, Pathian Jehova leh Isua chuan hlim taka kan pêk chu an hlut a ni.—2 Kor. 9:7.
18 Krista ṭhian kan nihzia kan târ lan ṭheuh theih dân kawng thumna chu kohhran upate pêk kaihhruainate zawm hi a ni a. Hêng mite hi Krista kaihhruaina hnuaia thlarau thianghlim hmanga ruat an ni. (Eph. 5:23) “In hotute thu âwih ula, an thu thuin awm rawh u,” tiin tirhkoh Paula chuan a ziak a. (Heb. 13:17) Tualchhûng upate’n Bible ṭanchhana kaihhruaina min pêkte zawm harsa tih châng kan nei mai thei. An ṭhat famkim lohna chu kan hre mai thei a, chu chuan an pêk kaihhruaina chu a dik lozâwngin min thlîrtîr mai thei a ni. Chuti chung pawh chuan, kohhranho Lû, Krista chuan hêng mi ṭha famkim lote hi lâwm takin a hmang tho va. Chuvâng chuan, an thu neihna kan chhân lêt dân chuan Krista nêna kan inṭhianna chu a nghawng a ni. Upate dik lohnate en reng lo va, hlim taka an kaihhruaina pêkte kan zawm hian, Krista kan hmangaihna kan lantîr tihna a ni.
Bible Chhiar
(Matthaia 25:1-23) “Chu mi hunah chuan vân ram chu nula thianghlim sâwm an khâwnvâr kenga mo neitu hmuak tûra chhuakte nên chuan tehkhin a ni tawh ang. 2 An zînga mi panga an â a, panga an fing. 3 A âte chuan an khâwnvârte an kenin, a tui an keng tel si lo va; 4 a fingte erawh chuan an khâwnvârte an keng a, an ûmte chuan a tui an keng tel bawk a. 5 Tin, mo neitu chu a lo kal har avângin an zain an muthlu a, an lo muhîl ta a. 6 Tin, zan lai takah chuan, ‘Ngai teh u, mo neitu chu a lo kal e! A hmuak tûrin lo chhuak r’u khai!’ tiin au thâwm a lo awm ta a. 7 Chu veleh chuan nula thianghlimho chu an tho vek a, an khâwnvârte chu an buatsaih a. 8 Tin, a âte chuan, a fingte hnênah, ‘In khâwnvâr tui kha min pe ve rawh u; kan khâwnvârte a thi dâwn e,’ an ti a. 9 Nimahsela, a fingte chuan, ‘Keini leh nangni tân a daih lo vang e; a zuartute hnênah kal ula lei ve zâwk rawh u,’ tiin an chhâng a. 10 Tin, lei tûra an kal bo hlân chuan mo neitu chu a lo thleng ta a; tichuan, a peihte chu amah nên lawi chaw eiin an lût a; tin, kawng chu an khâr ta a. 11 Chu mi hnuah chuan nula thianghlim dangte pawh chu an lo thleng a, ‘Ka pu, ka pu, min hawnsak rawh!’ an ti a. 12 Ani erawh chuan, ‘Tih tak meuhvin ka hrilh a che u, ka hre lo che u a ni,’ a ti a, a chhâng a. 13 “Chutichuan, ngaihven rawh u, a nî leh a hun in hre si lo va. 14 “Mi, ram danga kal dâwn a, ama bawite kova, a sumte an hnêna kawltîr ang chu a ni si a. 15 Bawi pakhat hnênah talent nga a pe a, bawi dang hnênah talent hnih a pe a, bawi dang hnenah talent khat a pe a; an tih theih tâwk tûr ang zêl ṭheuhvin a pe a; tichuan a kal ta a. 16 Tin, talent nga dawngtu chu chûng chuan a va sumdâwng ta nghâl a, talent nga dang a dek chhuak ta a. 17 Chutiang bawkin talent hnih dawngtua pawh chuan talent hnih dang a dek chhuak ta a. 18 Talent khat dawngtu erawh chu a va kal a, lei a lai a, a pu tangka chu a thukru ta zâwk a. 19 “Tin, rei tak hnuah chûng bawiho pu chu a lo haw a, an hnênah a sum chanchin a tifel a. 20 Tichuan, talent nga dawngtu a lo kal a, talent nga dang a rawn keng a, ‘Ka pu, nangin talent nga mi kawltîr kha; en teh, talent nga dang ka dek chhuak e,’ a ti a. 21 A pu chuan a hnênah, ‘Bawi ṭha leh rinawm, i ti ṭha e; tlêmte chungah i rinawm a, tam tak chungah ka awmtîr ang che; i pu lâwmnaah lût rawh,’ a ti a. 22 Tin, talent hnih dawngtu pawh chu a lo kal a, ‘Ka pu, nangin talent hnih mi kawltîr kha; en teh, talent hnih dang ka dek chhuak e,’ a ti a. 23 A pu chuan a hnênah, ‘Bawi ṭha leh rinawm, i ti ṭha e; tlêmte chungah i rinawm a, tam tak chungah ka awmtîr ang che; i pu lâwmnaah lût rawh,’ a ti a.