‘Jehova Ni Ropui Tak Chu A Hnai’
“LALPA ni ropui tak chu a hnai e, a hnaiin a thleng thuai dâwn a ni.”—ZEPHANIA 1:14.
1, 2. (a) Kristiante’n eng ni danglam bîk tak nge an nghah? (b) Eng zawhnate nge kan inzawh a ngaih a, engvângin nge?
NULA pakhat chuan a pasal neih nî tûr chu hlim tak leh phûr takin a nghâk a. Nu naupai chuan a fa neih hun tûr chu hlim takin a thlîr a. Tin, hnathawktu hah tak chuan hun rei tak ata a lo nghah tawh a chawlh hman hun tûr chu a nghâkhlel hle bawk a ni. Hêng mite hian eng nge inanna an neih? An vai hian ni danglam bîk tak—an nun khawih danglam thei tûr chu an nghâk vek a ni. An ngaihtuahna chu kal thui hle mah se, an thil ngaihtuah erawh a inang lo hle thung. A tâwpah chuan an ni nghahhlelh tak chu a lo thleng ang a, a lo thlen chuan, chu mi atâna lo inpeih reng chu an inbeisei a ni.
2 Chutiang bawkin, tûn laia Kristian dik takte chuan ni danglam bîk tak lo thleng tûr chu nghâkhlel takin an nghâk a. Chu chu ‘Jehova nî’ ropui tak chu a ni. (Isaia 13:9; Joela 2:1; 2 Petera 3:12) Eng nge chu ‘Jehova ni’ lo thleng tûra chu ni a, a lo thlenna chuan mihringte chu engtin nge a nghawng ang? Chu bâkah, engtin nge chu mi atân chuan kan inpeih tih chu kan tihchian theih ang? “LALPA ni ropui tak chu a hnai e, a hnaiin a thleng thuai dâwn a ni,” tih Bible thu dikzia thil thlengte’n an tar lan tawh avângin, hêng zawhnate chhânna hi tûna kan zawn nghâl a pawimawh hle a ni.—Zephania 1:14.
‘Jehova Ni Ropui Tak Chu’
3. Eng nge ‘Jehova ni ropui tak’ chu?
3 Eng nge ‘Jehova ni ropui tak’ chu? Bible bu pumah hian, “LALPA ni” tih ṭawngkam chuan Jehova’n a hmêlmate thiam loh a chantîrna leh a hming ropui tak a chawimawina tûr hun danglam bîk tak chu a kâwk a ni. Judai ram leh Jerusalema mipui rinawm lote leh Babulon leh Aiguptaa chêng mipui mi hnehchhiah hmangte chuan Jehova rorêlna tâwkin, ‘Jehova nî,’ chu an tawng ṭheuh va. (Isaia 2:1, 10-12; 13:1-6; Jeremia 46:7-10) Amaherawhchu, ‘Jehova ni’ ropui ber chu kan hmaah hian a la awm cheu a ni. Chu chu Jehova’n a hming sawichhetute thiam loh a chantîrna tûr nî a ni a. “Babulon khaw ropui,” khawvêl sakhaw dik lo lalram tihchhiatnain a inṭan ang a, Armageddon indonaa kalhmang suaksual a la bâng zawngte tihchimihnaah chuan a vâwrtâwp a thleng ang.—Thu Puan 16:14, 16; 17:5, 15-17; 19:11-21.
4. Engvângin nge mihring a tam zâwkte chuan lo thleng thuai tûr Jehova nî hi an râp ang?
4 An hria emaw, hre lo emaw pawh ni se, mihring a tam zâwkte chuan he ni hmanhmawh taka lo thleng tûr hi an râp hle tûr a ni. Engvângin nge? Jehova chuan a zâwlnei Zephania kaltlangin heti hian a chhâng a ni: “Chumi nî chu thinurna nî a ni a, mangan leh hrehawm nî, chhiatna leh ṭiauna nî, thimna leh khawdur nî, chhûm leh thim chhah mup nî a ni,” tiin. A râpawm ngei mai! Chu bâkah, zâwlnei chuan heti hian a sawi a ni: “Mihringte chungah hrehawmna ka rawn thlen ang . . . LALPA chungah an sual avângin,” tiin.—Zephania 1:15, 17.
5. Maktaduai tam takin Jehova nî chungchângah thlîr dân duhawm tak eng nge an neih a, engvângin nge?
5 Amaherawhchu, mi dang maktaduai têlte chuan Jehova nî lo thlen hun tûr chu an nghâkhlel hle thung a ni. Engvângin nge? Anni chuan chhandamna nî leh mi felte tân chhan chhuahna hun, Jehova ngei chawimawina leh a hming ropui tak tih thianghlimna nî a ni tih an hria a. (Joela 3:16, 17; Zephania 3:12-17) Chu mi nî a hlauhawmna emaw, a nghahhlelh awmna emaw chu mite’n tûna an nun hman dânah nasa takin a innghat a ni. Chu nî lo thleng tûr chu engtin nge i thlîr? Chu mi nî atân chuan i inpeih em? Jehova ni a hnaihna chuan tûna i nî tin nun a khawih pha em?
‘Nuihsantute Chu Nuihsan Chungin An Lo Kal Ang’
6. Engtin nge mi tam takin ‘Jehova nî’ chu an thlîr a, engvângin nge Kristiante’n chu chu mak an tih loh?
6 Hun a hmâwr tawh hle chung pawhin, leia chêng a tam zâwkte chuan lo thleng tûr ‘Jehova nî’ chungchâng chu an ngaihsak lo. Anni chuan chu nî a lo thlen ṭêp tawh thu vaukhântute chu an nuihsawhin, an nuihsan a. Kristian dikte chuan chu chu mak an ti lo. Tirhkoh Petera chuan: “Hei hi hre hmasa ula, ni hnuhnûngahte chuan nuihsantute chu anmahni châkna anga awmin, nuihsan chungin an lo kal ang a, ‘A lo kal lehna thutiam chu khawiah nge? Siam tirh aṭangin engkim a awm pângngai angin chi thlahtute muthilh nî ata tawh kha a la awm zêl alâwm,’ an la ti ang,” tia vaukhânna thu a chhinchhiah chu an hre reng a ni.—2 Petera 3:3, 4.
7. Engin nge hun hmâwr tawhzia hre reng tûra min ṭanpui ang?
7 Engin nge chutiang ngaih dân dik lo pumpelh tûr leh hun hmâwr tawhzia hre reng tûrin min ṭanpui ang? Petera chuan heti hian min hrilh a ni: “In rilruah ngaihtuahna thianghlim chawk tho tûrin hêng thilte hi hriat nawntîrna tûr che uin ka ziak a ni. Zâwlnei thianghlimte thusawi lâwk leh in tirhkohte kaa Lalpa leh Chhandamtu thu pêk chu in hriat rengna tûrin,” tiin. (2 Petera 3:1, 2) Hrilh lâwk vaukhânna thute ngun taka kan bengkhawnna chuan ‘rilrua ngaihtuahna thianghlim chawk tho’ tûrin min ṭanpui ang. Hêng hriattîrnate hi kan hre nawn fo pawh a ni thei a; mahse, hêng vaukhânnate hi tûn hma zawng aia ngun taka kan bengkhawn zui zêl chu a pawimawh a ni.—Isaia 34:1-4; Luka 21:34-36.
8. Engvângin nge mi tam takin Bible hriattîrnate an ngaihthah?
8 Engvângin nge ṭhenkhatte’n hêng hriattîrnate hi an ngaihthah le? Petera chuan heti hian a sawi chhunzawm a: “Hêng hi an haider lui si ṭhîn: Pathian thuin hmân laiin vânte a lo awm a, lei pawh tui ata leh tui zîngah awm khâwmin a lo awm a; chûngah chuan chu mi laia khawvêl awm chu tuiin a chîm a, a boral ta, tih hi,” tiin. (2 Petera 3:5, 6) Ni e, Jehova nî lo thleng lo se titu an awm a ni. An nun phung pângngai tih khaihlak chu an duh lo. An nun dân hmasial tak avângin Jehova hnêna an chanchin sawi chu an duh tlat lo! Petera sawi angin, ‘an mahni châkna angin’ an awm a ni.
9. Nova leh Lota dam laia mite khân eng rilru put hmang nge an lantîr?
9 An duhthuin, hêng nuihsantute hian Jehova chu hun kal tawhahte khân mihringte chungchângah a lo inrawlh tawh ṭhîn tih chu an ngaihthah zâwk a. Isua Krista leh tirhkoh Petera chuan chutiang thilthleng pahnih—‘Nova dam lai’ leh ‘Lota dam lai’—chanchin chu an sawi ve ve a ni. (Luka 17:26-30; 2 Petera 2:5-9) Tuilêt hma zawngin, mite chuan Nova pêk vaukhânna chu an ngaihsak duh lo. Chutiang bawkin, Sodom leh Gomorra tihchhiat a nih hmain, Lota chu a mâkpate ngaihah chuan “fiamthu sawi ang lek a ni.”—Genesis 19:14.
10. Jehova’n a hre duh lotute a chhân lêt dân chu eng nge ni?
10 Tûn laiah pawh a danglam bîk lo. Mahse, Jehova’n chûng a hre duh lote a chhân lêt dân hi chhinchhiah teh: “Uain mawng nawi anga awm mai maia, an rilrua, LALPA chuan achhia aṭha tih a nei ngai nêm, titu te chu ka hrem ang. Tin, an sum te chu râllâkah a lo la chang ang a, an inte chu a ram ang: a ni, inte an sa ang a, mahse an luah lo vang; grêp huante an siam ang a, mahse a uaiin chu an in lo vang,” tia a sawi hi. (Zephania 1:12, 13) Mipuite chuan “dân pângngai” angin an nî tin thiltihte chu an chhunzawm zêl a ni thei, mahse an thawh rimnaah chuan hlâwkna kumkhaw daih engmah an hmu lo vang. Engvângin nge? Jehova nî chu a lo thlen thut dâwn avâng leh sum leh pai hausakna engmahin anni chu a chhan him dâwn loh avângin.—Zephania 1:18.
“Nghâk Rawh”
11. Eng zilhna nge rilrua kan vawn ang?
11 Min hual vêltu khawvêl suaksual ang lo takin, zâwlnei Habakuka zilhhauna chhinchhiah hi kan rilruah kan vawng reng tûr a ni: “Inlârna hi hun ruat chhûng atân mai a ni nghe nghe si a, a kin nî chu a hnai tial tial a, a thlâwn lo vang. Rei deuh mah se, nghâk rawh; a lo thlen ngei dâwn avângin a tlai chuang lo vang,” tih hi. (Habakuka 2:3) Chu mi nî chu kan thlîrna ṭha famkim lo aṭang chuan tlai deuh anga a lan pawhin, Jehova chu a muang lo tih kan hre reng tûr a ni. Ama nî chu a hun takah, mihringte’n an beisei loh dârkârah tak a lo thleng ang.—Marka 13:33; 2 Petera 3:9, 10.
12. Isua’n eng lakah nge min vaukhân a, hei hi Isua zuitu rinawmte thiltih nên engtin nge a inkalh?
12 Jehova nî nghah reng a pawimawhna chu sawi uarin, Isua chuan amah zuitute zînga mi ngei ṭhenkhat pawhin hun hmâwr tawhzia an theihnghilh dâwn tih a sawi lâwk a ni: “Bawi sual chuan, a rilruin, ‘Ka pu a lo kal lawk dâwn lo ve,’ tiin, a bawipuite lo vêl ta sela, mi ruite hnênah eiin bâr sela, chu bawia pu chu a rin loh nîah, a hriat loh laiin a lo kal ang a, bung hnihah a rawn chhuah ang,” tiin. (Matthaia 24:48-51) Inkalh takin, bâwih rinawm leh fing tak chuan hun hmâwr tawhzia a hriatna chu rinawm takin a vawng reng a ni. Bâwih pâwl chu inring reng leh inpeih rengin a awm a. Isua chuan he leia “a neih zawng zawng chunga hotuah” a siam a ni.—Matthaia 24:42-47.
Hun Hmâwr Tawhzia Hriatna Neih A Ngai
13. Engtin nge Isua’n hun hmâwr tawhzia rilrua vawn reng a ngaihzia chu a târ lan?
13 Kum zabi khatnaa Kristiante’n hun hmâwr tawhzia rilrua an vawn reng chu a pawimawh hle a. ‘Sipaihoten khua an hual’ lai an hmuh veleh Jerusalem chu an tlân chhiatsan nghâl vat a ngai a ni. (Luka 21:20, 21) Chu chu C.E. kum 66-ah a lo thleng a. Isua’n chutih hun laia Kristiante tâna hun hmâwr tawhzia a târ lan hi lo chhinchhiah teh: “In chunga awm chu a ina englo chuh tûrin chhuk suh se; tin, lova awm chu a puan chuh tûrin kîr leh suh se,” tih hi. (Matthaia 24:17, 18) Jerusalem chu kum li dang a la ding tih hmân lai chanchin ziakin a târ lan avângin, engvângin nge Kristiante chuan Isua thusawi chu C.E. 66-ah hmanhmawh taka an zawm a ngaih?
14, 15. Engvângin nge kum zabi khatnaa Kristiante chuan sipaihote’n Jerusalem an hual an hmuh veleha tâwi khawmuang hauh lova an tlân chhiat nghâl a ngaih?
14 Rom sipaite’n C.E. 70 hma chuan Jerusalem chu an tichhe lo ngei mai a; mahse, a kâra kum tlate hi a râlmuang bîk lo rêng rêng! Chûng kumte chu tharum thawhna leh thisen chhuahnain a khat a. Hmân lai thilthleng chanchin ziaktu pakhat chuan chutih laia Jerusalem dinhmun chu “tualchhûng indona hlauhawm tak leh nunrâwnna râpthlâk tak inpawlh awmna hun” niin a sawi a ni. Râwltharte chu kulh thuam nghet tûr te, râlthuam chelek tûr te, leh sipaia ṭang tûr tein an la a. Chûng mite chuan nî tina sipai insâwizawinate chu an ti chho va. An thiltih hleih hluak tak ṭan lote chu phatsantu anga ngaih an ni. Kristiante kha khawpui chhûngah la awm zêl sela chuan dinhmun hlauhawm tâwpkhâwkah an indah dâwn a ni.—Matthaia 26:52; Marka 12:17.
15 Isua’n Jerusalema awmte chauh ni lovin “Judai rama awmte” pawh tlân chhe ṭan tûrin a ti tih hi kan chhinchhiah tûr a ni. Rom sipaite chuan Jerusalem aṭanga an inhnuh dawh hnu thla rei lo têah indo chu an ṭan ṭhat leh avângin chu chu a pawimawh a ni. A hmasain Galili chu C.E. 67-ah khân a tlâwm a, chu mi hnuah Judai ram chu an la hret hret a ni. Hei hian Jerusalem khaw pâwn ram dung leh vâng zawng zawngah lungngaih manganna nasa tak a thlen a. Juda tawh phawtte tân Jerusalem tlân chhuah san chu a harsa tial tial bawk a. Khawpui kawngkhârte chu ven tlat a ni a, tlân chhiat tum apiangte chu Rom lama ṭang anga ngaih an ni bawk a ni.
16. Chu manganna huna dam khawchhuak tûrin kum zabi khatnaa Kristiante’n eng rilru put hmang nge an neih ngai?
16 Hêng thil zawng zawngte rilrua vawng rengin, Isua’n hmanhmawh taka chêt lâk a ngaihzia a sawi uar chhan chu kan hre thiam thei a ni. Kristiante chuan sum leh pai hausaknate’n a kalpêntîr loh nân chân an inhuam tûr a ni a. Isua vaukhânna zâwm tûrin an “neih zawng zawng kalsan” chu an inhuam tûr a ni. (Luka 14:33) Thu âwih a, Jordan râl leh lama tlân chhe nghâlte chu an him a ni.
Hun Hmâwr Tawhzia Rilrua Vawng Rengin
17. Engvângin nge hun hmâwr tawhzia kan hriatna chu kan tih chak ang?
17 Bible hrilh lâwknate chuan tâwpna hunah kan lût thûk tawh hle tih chiang takin a târ lang a. Tûn hma zâwng aiin hun hmâwr tawhzia chu rilrua kan dah ngheh sauh a ngai a ni. Sipai chuan râlmuan laiin indo hlauhawmna a hre lo. Mahse, chu dinhmun avânga harhvân reng a ngai tih a ngaihthah laia râl do tûra koh ni ta se, a inrâl ring lovin chu chu a nunna atân a hlauhawm thei a ni. Hei hi thlarau lam thil atân pawh a dik a ni. Kan rilrua hun hmâwr tawhzia kan hriatna zawi zawia kan hloh chuan, min rawn beitute lakah chuan kan invêng him thei lo vang a, Jehova nî a lo thlen tak tak hunah chuan mak kan ti hle thei a ni. (Luka 21:36; 1 Thessalonika 5:4) ‘Jehova hawisantu’ tu tân pawh tûn hi amah zawn leh hun chu a ni.—Zephania 1:3-6; 2 Thessalonika 1:8, 9.
18, 19. Engin nge ‘Jehova nî lo thlen hun tûr’ rilrua vawng reng tûrin min ṭanpui ang?
18 Tirhkoh Petera’n “Pathian nî lo thlen hun tûr” ṭhahnem ngai taka duh tûra min zilh hi a mak lo ve! Chu chu engtin nge kan tih theih? Kan tih theih dân kawng khat chu, ‘awm dân thianghlim leh Pathian ngaihsak kawnga’ tel ve hi a ni. (2 Petera 3:11, 12) Chutiang thiltiha buai rengna chuan ‘Jehova nî’ lo thlen hun nghâkhlel taka thlîr tûrin min ṭanpui ang. Greek thu mal ‘ṭhahnemngai taka duh’ tih awmzia dik tak chu “thlen hmatîr” tihna a ni. Jehova nî a lo thlen hmaa ni awmte chu a ngial a nganin kan liamtîr zung zung thei lo va. Mahse, chu mi nî kan nghah laia Pathian rawngbâwlnaa kan buai reng chuan, hun chu a ral chak hle dâwn a ni.—1 Korinth 15:58.
19 Pathian Thu ngun taka ngaihtuahna leh chuta thuhriattîrte chîk taka ngaihtuahna chuan, chutianga ti thei tûr chuan min ṭanpui ang—chu mi nî “lo thlen hlân nghâkhlel tak (beisei leh hmanhmawhtîr),” a ni, “beisei renga” awm tûrin min ṭanpui ang. (2 Petera 3:12, The Amplified Bible; The New Testament, by William Barclay) Chûng thuhriattîrte zîngah chuan Jehova nî lo thlen tûr thu chauh ni lo, ‘Jehova nghâk’ rengtute dawn tûr malsâwmna tam takte hrilh lâwkna thu tam tak a tel a ni.—Zephania 3:8.
20. Eng fuihna thu nge kan ngaihsak ang?
20 Tûn hi zâwlnei Zephania kal tlanga fuihna pêk ngaihsak ṭheuh hun a ni: “LALPA thinrimna hlauhawm tak chu in chunga a lo thlen hmâ leh LALPA thinrimna nî chu in chunga a lo thlen hmâ hian tlân khâwm rawh u, a ni, tlân khâwm huai huai rawh u. Nangni leia mi thuhnuairawlh zawng zawng, a thu âwihtute u, LALPA chu zawng rawh u; felna zawng ula, thuhnuairawlh tum rawh u: LALPA thinrimna nîah chuan thuhrûkin in awm thei mahna,” tih hi.—Zephania 2:1-3.
21. Eng nge kum 2007 chhûnga Pathian mite tum ruh tlat tûr chu?
21 Chuti a nih chuan kum 2007 kum châng atâna: ‘Jehova ni ropui tak chu a hnai,’ tih thlan chu a inhmeh hle a ni. Pathian mite chuan chu mi nî chu “a hnaiin a thleng thuai dâwn a ni” tih an ring nghet tlat a. (Zephania 1:14) “A tlai chuang lo vang.” (Habakuka 2:3) Chu mi ni kan nghah lai chuan, hêng hrilh lâwknate thlen famkimna hnuhnûng ber a hnai hle tawh tih hre reng chungin, kan hun hmâwr tawhzia hriain i harhvâng reng ang u! (w06 12/15)
I Chhâng Thei Em?
• Eng nge ‘Jehova ni ropui tak’ chu?
• Engvângin nge mi tam takin hun hmâwr tawhzia chu an ngaihthah?
• Engvângin nge kum zabi khatnaa Kristiante chu hun hmâwr tawhzia an hriatna nêna an chêt vat a ngaih?
• Engtin nge hun hmâwr tawhzia kan hriatna chu kan tihzual sauh vang?
[Phêk 11-naa thu lâk chhuah]
Kum 2007 kum châng tûr chu hei hi a ni: ‘Jehova ni ropui tak chu a hnai.’—Zephania 1:14.
[Phêk 9-naa milem]
Nova dam lai angin nuihsantute chuan Jehova chêt lâk hunah mak an ti ang
[Phêk 10-naa milem]
Kristiante chuan “sipaihoten Jerusalem khua an hual” an hmuh vêleh muang khawtlai lova chêt an lâk a ngai