‘In Hotute Chu Hre Reng Rawh U’

TIRHKOH Paula thu, Hebrai 13:7-a chhinchhiah hi: “In chunga rorêltute chu hre reng rawh u,” tia lehlin theih a ni. C.E. 33 Penticost nî aṭang khân, Lalpa Isua Krista tirhkoh rinawmte chuan Kristian kohhran din thar tâna governing body angin, kaihhruaina pêkna kawngah hma hruaiin chu nihna chu an chelh ṭan a. (Tirh. 6:2-4) C.E. 49 kum vêlah khân, he governing body-ah hian Isua tirhkohte bâkah mi dangte pawh an tel ta a. Serh tan chungchâng thu rêlho a nih lai khân, governing body-ah chuan “Jerusalem khuaa tirhkohte leh upate” an tel tawh a ni. (Tirh. 15:1, 2) Hmun tina awm Kristiante nghawng thei thilte ngaihtuah chu an mawhphurhna a ni a. Anni chuan lehkha thawnte leh thupêkte chu an thawn chhuak a, chûng chuan kohhrante a tichakin, ngaihtuahna leh thiltihah an inpumkhat phah a. Kohhrante chuan governing body kaihhruaina tawh phawt chu an zâwm tlat a, chuvâng chuan Jehova malsâwmna dawngin, an pung nasa a ni.—Tirh. 8:1, 14, 15; 15:22-31; 16:4, 5; Heb. 13:17.

² Tirhkohte an thih zawh hnu chuan, kalpênna nasa tak a lo lût ta a. (2 Thes. 2:3-12) Isua’n buh lem leh buh tak tehkhin thua a lo sawi lâwk ang chiahin, buh tak (hriak thih Kristiante) zîngah buh lem (Kristian suakte) chu theh a lo ni a. Buh seng hun, ‘khawvel tâwpna’ a lo thlen hma loh chuan kum zabi tam tak chhûng chu an ṭo za a ni. (Mt. 13:24-30, 36-43) Chumi hun chhûng chuan, hriak thih Kristiante chuan a mi malin Isua duhsakna chu an dawng chhunzawm zêl a; mahse, governing body a awm lo va, Isua’n a hnung zuitute kaihhruaina petu tûra hman bîk he leiah hian a awm lo. (Mt. 28:20) Amaherawhchu, Isua chuan buh seng hun chhûnga inthlâkthlengna a awm tûr thu a sawi lâwk a ni.

³ “Bâwih rinawm, fing tak . . . chu, tu ber nge ni ang le?” He zawhna hmang hian, Isua chuan “khawvêl tâwpna chhinchhiahna” zînga tel thawnthu tawi, a nih loh leh tehkhin thu chu a sawi ṭan a. (Mt. 24:3, 42-47) Chu bâwih rinawm chu Pathian mite hnênah “a hun apianga” thlarau lam chaw pe tûrin a buai hle dâwn tih a târ lang a ni. Isua chuan kum zabi khatnaah hotu anga hma hruai tûrin mi pakhat a hmang lo va, mipa ho khat a hmang a ni; chutiang bawkin, khawvêl tâwpna hun chhûnga a hman bâwih rinawm pawh mi pakhat chauh a ni lo.

“BAWIH RINAWM, FING TAK” HRIAT THEIH DAN

⁴ Isua chuan a hnung zuitute châwm tûrin tu nge a ruat? He leia hriak thih Kristiante a hmang chu a âwm hle. Bible-in anni chu ‘thim ata chhuaka, a êng mak taka lût tûra kotu ṭhatna chu entîr’ tûra chanvo pêk, “lal puithiamho” tiin a ko a ni. (1 Pet. 2:9; Mal. 2:7; Thup. 12:17) He leia hriak thih awm zawng zawngte hi bâwih rinawm an ni vek em? Ni vek lo. Isua’n hmeichhia leh naupangte tiam lova, mipui 5,000 vêl a hrai khân, an ei tûr chu mipuite hnênah amah ngeia pe lovin, a zirtîrte hmangin a sem a. (Mt. 14:19) Mi tlêm tê hmangin mipui tam tak a hrai a ni. Tûn laiah pawh, thlarau lam chaw chu chutiang bawkin a sem a ni.

⁵ Chuvângin, “sum enkawltu rinawm, fing tak” chu Krista lo awm lehna hun chhûnga thlarau lam chaw buatsaiha sem chhuahna kawnga a taka inhmang, hriak thih unaupa tlêm tê chauh hi an ni. (Lk. 12:42) Ni hnuhnûng chhûng hian, “bawih rinawm, fing tak,” zînga tel hriak thih unaupate chuan kan headquarter-ah rawng an bâwl a. Chûng hriak thih unaupate hmang chuan, tûn laia Jehova Thuhretute Governing Body chu din a ni.

⁶ Krista chuan Governing Body chu Bible hrilh lâwkna thute thlen famkimna chungchâng lehkhabute chhuah tûr leh nî tin nuna Bible thu bulte nunpui theih dân chungchânga a hun taka kaihhruaina pe tûrin a hmang a. Chutiang thlarau lam chaw chu tualchhûnga Jehova Thuhretute kohhran hmanga pêk a ni. (Is. 43:10; Gal. 6:16) Bible hun lai chuan, chhiahhlawh rin tlâk, a nih loh leh sum enkawltu rinawm tak chu in chhûngkhur zawng zawng chunga mawhphurhna neitu a ni ṭhîn. Chutiang bawkin, bâwih rinawm, fing tak pawh rinna chhûngkua zawng zawngte enkawl tûra mawhphurhna pêk a ni. Chuvângin, bâwih rinawm, fing tak chuan “a chhûngte” zawng zawngin an hlâwkpui sum leh pai leh thil neih te, thu hrilh rawngbâwlna te, inkhâwmpui program te, inawpna pâwla hna hrang hrang enkawltu tûr ruatna te, leh Bible ṭanchhan thu leh hla tihchhuahna te chu a enkawl bawk a ni.—Mt. 24:45.

⁷ A nih leh, tute nge “a chhûngte” chu ni ta ang? A awlsam zâwnga sawi chuan, thlarau lam châwmna dawngtu zawng zawngte hi an ni. Atîrah chuan a chhûngte zawng zawng chu hriak thih an ni vek a. A hnuah chuan, mipui tam tak zînga mi “berâm dang” an rawn tel belh a. (Joh. 10:16) Chûng pâwl hnihte chu bâwih rinawm leh fing tak sem chhuah thlarau lam chaw chuan an inchâwm a ni.

⁸ Hrehawm nasa tak chhûnga Isua’n he khawvêl suaksual tak chunga ro a rêl hunah bâwih rinawm leh fing tak chu ‘a neih zawng zawng chunga hotuah’ a siam ang. (Mt. 24:46, 47) Bâwih rinawm leh fing tak zînga telte chuan an vân lam lâwmman chu an dawng ang a. Mi 1,44,000 zînga tel mi dangte rualin, Krista vân lam thuneihna chu an ṭâwmpui ang. Chutih hunah chuan, leiah hian bâwih rinawm leh fing tak awm tawh dâwn lo mah se, Jehova leh Isua chuan ‘mi lian’ anga a ruatte hmangin leia Messia Lalram khua leh tuite hnênah kaihhruaina an la pe ang.—Sâm 45:16.

ENGVANGIN NGE ‘HOTUTE CHU KAN HRIAT RENG ANG’?

⁹ ‘Hotute kan hriat reng’ leh kan rin nachhan tûr tam tak a awm a. Engvângin nge chutianga tih chu kan hlâwkpui? Tirhkoh Paula chuan heti hian a sawi a ni: “Chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a.” tiin. (Heb. 13:17) Kan hotute chuan thlarau lama kan ṭhatna tûr leh himna tûra min vên avângin, an kaihhruaina zawm leh an laka intukluh chu a pawimawh hle.

¹⁰ Korinth thawn khat 16:14-a kan hmuh angin, Paula chuan: “In tih apiang chu hmangaiha tih ni vek rawh se,” tiin a sawi a. Pathian mite tâna thu tlûkna siamte chu he mize chungnung bîk tak, hmangaihna ṭanchhana siam vek a ni. Hmangaihna chungchângah, 1 Korinth 13:4-8 chuan heti hian a sawi a ni: “Hmangaihnain a dawhthei a, ngil a nei bawk ṭhîn; hmangaihnain a îtsîk lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lâwm lo va, thutak erawh chu a lâwmpui ṭhîn a; engkim a tuar hrâm hrâm a, engkim a ring a, engkim a beisei a, engkim a tuar chhuak ṭhîn. Hmangaihna hi entikah mah a reh lo vang,” tiin. Jehova chhiahhlawhte hlâwkpui atâna thu tlûkna siam zawng zawng chu hmangaihna ṭanchhana siam vek a nih avângin, chutiang kaihhruaina hnuaiah chuan him nia inhriat chhan tûr kan nei a ni. Chu bâkah, chutiang kaihhruaina chu Jehova hmangaihna lan chuahtîrna a ni bawk.

¹¹ Kum zabi khatna lai ang bawkin, Jehova’n a mite chunga hotu atâna a hmante chu ṭha famkim an ni lo. Mahse, Jehova chuan tûn hmain a duh zâwng hlen chhuah nân mi ṭha famkim lote a lo hmang tawh ṭhîn. Nova chuan lawng a tuk a, a hun laia chhiatna lo thleng tûr thu a hril a. (Gen. 6:13, 14, 22; 2 Pet. 2:5) Mosia chu Jehova mite Aigupta ram aṭanga hruai chhuak tûra ruat a ni. (Ex. 3:10) Bible ziak tûrin mi ṭha famkim lote thlarauva thâwk khum an ni bawk. (2 Tim. 3:16; 2 Pet. 1:21) Chuvângin, tûn laiah thu hrilh leh zirtîr siam rawngbâwlna kaihruai tûrin Jehova’n mi ṭha famkim lote hmang mah se, Pathian inawpna pâwl kan rinna chu a kiam chuang lo. Chutih ahnêkin, inawpna pâwlin tûna a hlen chhuah zawng zawngte hi Jehova ṭanpuina tel lo chuan thil theih a ni dâwn lo tih kan hriat avângin, kan ring sawt zâwk mah a ni. Harsatna nasa tak leh thiltawn chi hrang hrang kârah, bâwih rinawm chuan Pathianin thil awm dân a kaihhruaizia a lantîr tawh a. Tûn laia Jehova inawpna pâwl hmuh theih chungah hian malsâwmna nasa tak a thleng a ni. Chuvângin, thinlung tak zeta thlâwpin, kan rinchhan a ni.

KAN RINZIA KAN LANTIR DAN

¹² Kohhrana mawhphurhna chelh tûra ruatte chuan an rinchhanzia chu ruat an nihnain a ken tel mawhphurhnate chu lâwm taka pawm a, rinawm taka thawhna hmangin an lantîr a. (Tirh. 20:28) Lalram thu hriltu kan nih angin, in tina rawngbâwlnaah ṭhahnemngai takin kan thawk a, tlawhkîrte neiin, in lama Bible zirnate kan kaihruai a ni. (Mt. 24:14; 28:19, 20) Bâwih rinawm pêk chhuah thlarau lam chaw hnianghnâr tak chu kan hlâwkpui tak zet theih nân, bial inkhâwmpui leh regional inkhâwmpui tân pawh tiamin kan Kristian inkhâwmte atâna inbuatsaihin, kan tel kim vek bawk ṭhîn. Hêng Kristian inkhâwmnaa kan unaute nêna inkâwma infuih tawnna kan neihte chu kan hlâwkpui tak zet a ni.—Heb. 10:24, 25.

¹³ Thawhlâwm kan thawhna pawh hian inawpna pâwl kan rinzia a târ lang bawk. (Thuf. 3:9, 10) Kan unaute’n tisa lam mamawh an nei tih kan hriat hian, kan ṭanpui nghâl ṭhîn. (Gal. 6:10; 1 Tim. 6:18) Chu chu unaute kan hmangaih avanga ti kan ni a, kan chunga a ṭhatnate avânga Jehova leh a inawpna pâwl kan ngaihhlutzia lantîr theihna hun remchâng kan zawng reng a ni.—Joh. 13:35.

¹⁴ Inawpna pâwl thu tlûkna siamte thlâwpin, kan rinchhanzia kan lantîr bawk. Chutah chuan hma hruaitu atâna ruat bial kantute leh kohhran upate kaihhruaina pêk inngaitlâwm taka zawm a tel a. Chûng unaupate chu an thu âwih a, an thu thua awm tûra tih kan nihna “hotute” zînga mi an ni. (Heb. 13:7, 17) Thu tlûkna ṭhenkhat an siam chhante chu hre thiam vek lo mah ila, zawm mai chu chatuana kan ṭhatna tûr a ni tih kan hria a. Chutianga a Thu leh a inawpna pâwl thu kan âwihna avângin, Jehova malsâwmna kan dawng ṭhîn a. Chutiang chuan, kan Hotu, Isua Krista hnuaia kan intukluhna kan lantîr a ni.

¹⁵ Ni e, bâwih rinawm leh fing tak rin loh chhan tûr kan nei lo. He khawvêl Pathian, Setana hian Jehova hming leh inawpna pâwl tihhmingchhiat nân theih tâwp a chhuah a. (2 Kor. 4:4) Setana thiltih dân suaksual tak thangah chuan âwk suh! (2 Kor. 2:11) Ani chuan leilâwta paih a nih hmain “hun tlêm tê” chauh a nei tawh tih a inhriat avângin, Jehova mi a tam thei ang ber lâk bo a tum nghet tlat a ni. (Thup. 12:12) Mahse, Setanan ṭan a lâk zual sauh hian, Jehova chu i hnaih lehzual sauh vang u. Pathian Jehova leh tûn laia a mite kaihhruaina pêk nâna a kawng hman chu i rinchhan tlat ang u. Chutianga kan tihna chuan unau inpumkhatna a thlen a ni.