Bâwih Rinawm leh Fing Chu Tu Nge Ni?

Isua chuan a thih hma lawk khân a zirtîr pali—Petera, Jakoba, Johana, leh Andria—chu a hrangin a titipui a. Ni hnuhnûnga a lo awm lehna hun chhinchhiahna a sawi lâwk lai chuan, zawhna pawimawh tak pakhat a zâwt a ni: “Bawi rinawm, fing tak, a puin a hun apianga an chaw chan tûr semsak tûrin a chhûngte chunga hotua a siama chu, tu ber nge ni ang le?” tiin. (Matthaia 24:3, 45; Marka 13:3, 4) Isua chuan a zirtîrte hnênah chuan an ‘pu’ a nih angin, tâwpna hun chhûnga a hnungzuitute hnêna thlarau lam chaw khaihlak lova semsaktu tûr mite a ruat ang tih a tiam a ni. Chu bâwihah chuan tute nge tel ang?

Chu chu thlarauva hriak thih Isua hnungzuitu pâwl tlêm tê an ni. Chu ‘bâwih’ chu Jehova Thuhretute Governing Body tia hriat a ni a. Chu chuan Jehova chibai bûktu a unaute hnênah thlarau lam chaw a hun takah a sem ṭhîn. ‘A hun apianga kan chaw chan tûr’ min pe tûrin, chu bâwih rinawm chu kan rinchhan tlat a ni.—Luka 12:42.

Chu chuan Pathian chhûngte a enkawl. (1 Timothea 3:15) Isua chuan bâwih hnênah chuan lei lama Jehova inawpna pâwl hna zawng zawng—a thil neih zawng zawng enkawl te, thu hrilh rawngbâwlna kaihhruai te, leh kohhran kal tlanga min zirtîr te—enkawl tûrin mawhphurhna rit tak chu a pe a. Chuvângin, kan thil mamawhte kan mamawh hun taka min pe tûrin ‘bâwih rinawm leh fing’ chuan rawngbâwlnaa kan hman thu leh hla chhuahte leh kan inkhâwm leh inkhâwmpuia thusawite hmangin thlarau lam chaw min sem a ni.

Bâwih chu Bible thutak leh chanchin ṭha hril tûra a mawhphurhna chungah chuan a rinawm tlat a, he leia Krista thil neih zawng zawng a enkawl dân chungchângah a fing bawk a ni. (Tirhkohte 10:42) Jehova chuan mi tam tak chu a lama hîpin, bâwih pâwl hna thawh chu mal a sâwm a, thlarau lam chaw hnianghnâr taka pe chhuak tûrin a ṭanpui bawk a ni. —Isaia 60:22; 65:13.

• Isua’n a zirtîrte thlarau lama châwm tûrin tu nge a ruat?

• Eng kawngin nge bâwih chu a rinawm a, a fin bawk?