Inhuam Takin Pathian Rawng Bâwl Rawh

“IN THLARAU tân lâwm êm êmin ka hmangral ang a, inhmangral vekin ka awm bawk ang,” tiin tirhkoh Paula chuan a lo ziak a. (2 Korinth 12:15) Hêng thute hian Jehova chhiahhlawhte neih tûr rilru put hmang leh ngaih dân tûr eng nge a hriattîr che? Bible scholar pakhat chuan, Korinth khuaa Kristiante hnêna Paula thu ziak a chunga mite chu: “Pain a fate tân lungâwi taka thil a tih angin, kei pawhin inhamṭhat nân ka chakna te, ka hun te, leh ka nunna te hi hmanral vek ka inhuam a ni,” a tihna niin a sawi a ni. Paula chuan a Kristian rawngbâwlna hlen chhuah nâna ṭûl a nih phawt chuan, “inhmangral vek,” a nih loh leh, “inhmang da vek a, chhiatpui ṭhak” pawh a inhuam a ni.

Chu bâkah, Paula chuan chûng zawng zawng chu “lâwm êm êmin” a ti bawk a ni. Ani chuan “Inhuam tak zet chungin” a ti a, tiin Jerusalem Bible chuan a sawi a. Eng nge i dinhmun ni ve? Pathian Jehova rawngbâwlna chu “inhmang da vek a, chhiatpui ṭhak” ngaih châng awm mah se, mi dangte leh Pathian rawng bâwl nân i hun te, i chakna te, i thiamna te, leh i sum leh pai te hmanral chu i inhuam ve em? Tin, chu chu “lâwm êm êmin” i ti ang em?

Rawngbâwlna An Hnâwl Ṭhak

Mi tam tak chuan Pathian rawngbâwl chu an hreh mai pawh ni lovin, an hnâwl hrim hrim a ni. Anni chuan lâwm nachâng hriat lohna rilru te, mahni hmasiala zalen duhna rilru te, leh helna rilru te an nei hial a ni. Chutiang ngaihtuahna hmang chuan Setana’n Adama leh Evi te chu a lo thlêm tawh a. Ani chuan dâwtin, “a chhia leh a ṭha hriain Pathian ang” an ni ang a, a chhia leh a ṭha chu anmahni ngeiin an thliar hrang thei tûr angin a sawi a ni. (Genesis 3:​1-5) Tûn laia chutiang rilru pute chuan, Pathian laka mawhphurhna nei loleh Pathian lo inrawlh ngai lova zalenna pumhlûm nei thei tûrah an inngai tlat a. (Sâm 81:​11, 12) Chuvângin, an thil neih zawng zawng chu an mahni mi mal tâna hman an duh ṭhîn a ni.​—Thufingte 18:1.

Mahse, chutiang a lutuka thil ngaih dân chu i nei lo mai thei a. Thilthlâwnpêk nunna leh lei paradis-a chatuana nun hlimawm zâwk beiseina ropui tak chu i hlut tak zet a ni thei bawk. (Sâm 37:10; Thu Puan 21:​1-4) I laka Jehova ṭhatna avângin a chungah tih tak zetin i lâwm pawh a ni thei bawk a. Mahse, Setana chuan kan ngaihtuahna chu engemaw tia kal sualtîrin, kan rawngbâwlna chu Pathian pawmtlâk lohvah a chantîr daih thei a, chuvângin harhvang taka kan awm reng a ngai a ni. (2 Korinth 11:3) Chu chu engtin nge a thlen theih?

Inhuam Taka Rawng Bâwl A Ngai

Jehova chuan thinlung zawng zawnga inhuam taka rawng bâwl chu a duh a ni. A duhzâwng ti tûrin min nawrlui ngai lo. A duhzâwng ti tûra min nawrluitu chu Setana a ni a, thlêmna leh nêksâwrna tinrêng a hmang a ni. Pathian rawngbâwlna kawngah Bible chuan tih tûr te, thupêk te, thil phût te, leh thil dang te a sawi ngei mai. (Thuhriltu 12:13; Luka 1:6) Mahse, Pathian rawng kan bâwl chhan bul ber chu amah kan hmangaih vâng a ni.​—Exodus 35:21; Deuteronomy 11:1.

Pathian rawngbâwlna kawngah lo inhmang nasa hle mah sela, ‘hmangaihna a neih si loh chuan’ engmah lo mai a ni dâwn tih Paula chuan a hre chiang hle a ni. (1 Korinth 13:​1-3) Bible ziaktute’n Kristiante chu Pathian bâwih anga an sawi hian anni chu tihluihna avânga bâwih nihtîr an tihna a ni lo. An sawi tum chu thinlung zawng zawnga Pathian leh a Fapa, Isua Krista hmangaihna thûk tak avânga inhuam taka intukluhna hi a ni.​—Matthaia 22:37; 2 Korinth 5:​14; 1 Johana 4:​10, 11.

Pathian rawng kan bâwlna chu mite hmangaihna nasa tak kan neih vâng a ni bawk tûr a ni. Paula chuan Thessalonika khuaa kohhran hnênah chuan, “nu, nau pawmin ama fate a duat angin in zîngah nunêm takin kan awm zâwk kha,” tiin a ziak a ni. (1 Thessalonika 2:7) Tûn lai ram tam takah chuan nu berin a fate enkawl tûrin mawhphûrhna a nei tih dân zam a awm a. Mahse, nu tam tak chuan chu dân zam avâng maiin an fate an enkawl lo. An fate an hmangaih avâng zâwka enkawl an ni. Chuvângin, nu, nau pawmte chuan a fate tân lâwm takin thil tam tak an tihsak rêng a ni! Paula’n a rawngbâwlsakte hnênah chutiang ‘duh ngawih ngawihna’ a nei a, a nun hial pawh pêk a ‘inpeih’ (“pêk a inhuam,” King James Version; “pêk a duh,” New International Version) a ni. (1 Thessalonika 2:8) Hmangaihna chuan Paula entawn tûrin min chêttîr ngei ang.​—Matthaia 22:39.

Hreh Chunga Rawngbâwlna Chungchâng Chu?

A ni, Pathian leh mite hmangaih aia mahni inhmangaih zâwk tûr a ni lo. Chutilochuan, thinlung zawng zawnga rawngbâwl lovin, hreh chungin rawng kan bâwl thei a, chu chu a hlauhawm hle a ni. Tin, kan duh ang ngawr ngawra kan khawsak theih loh avângin kan lungni lo hial thei bawk. Chutiang dinhmun chu hmân lai Israel mi, Pathian hmangaihna hloh va, tih tûr a nih avânga a rawngbâwl chhunzawmtute chungah a lo thleng tawh a ni. A rah chhuah chu eng nge ni? Pathian rawngbâwl chu an tân ‘ninawmah’ a chang zo ta a ni.​—Malakia 1:​13.

Pathian hnêna thilhlan zawng zawng chu “sawisêlbo,” sawisêl kai lova a “ṭha ber” a ni tûr a ni. (Leviticus 22:​17-​20; Exodus 23:​19, NW) Jehova hnênah an ran neih zînga ṭha ber chauh hlan tûr ni mah se, Malakia hun laia mite chuan anmahni pawhin an duh lohte chauh chu an hlân ta zâwk a. Jehova’n engtin nge a chhân lêt? Ani chuan puithiamte hnênah: “Inthawi nân a mitdel inhlanin sualna a awm hek lo maw? A kebai leh a silawng in hlanin sualna a awm hek lo maw? In ram awptu pawh pe teh u; a lâwm dâwn che u em ni? A nih leh, a lo ngaisâng ang che u maw? . . . Hnehchhuha in thil lâkte, a kebai te, a silawng te in rawn la a; chutiangin thilhlan chu in rawn la a: chûng chu in kut ata ka pawm dâwn em ni?” tiin a sawi a ni.​—Malakia 1:​8, 13.

Chutiang chu engtin nge kan zînga tu chungah pawh a lo thlen theih? Duhna rilru leh thinlung dik tak kan neih loh chuan kan inpêknate chu kan tân ‘ninawmah’ a chang zo dâwn a ni. (Exodus 35:​5, 21, 22; Leviticus 1:3; Sâm 54:6; Hebrai 13:​15, 16) Entîr nân, Jehova’n kan hun chuangliam chauh a chang em ni?

Chhûngkaw zînga ṭhahnemngai tak pakhatin emaw, Levia mi ṭhahnemngai tak emawin Israel mi, thilhlan atâna a ran neih zînga a ṭha ber thlang duh lova chu tihluihnain hlantîr ta se, chu chu Pathian pawmtlâk a nih kan ring thei ang em? (Isaia 29:13; Matthaia 15:​7, 8) Jehova chuan chutiang thilhlan chu a hnâwl a, a tâwpah a hlântute pawh a hnâwl a ni.​—Hosea 4:6; Matthaia 21:43

Pathian Duhzâwng Tih Duhna

Pathian pawmtlâk rawngbâwlna ni tûr chuan Isua Krista kan entawn a ngai a ni. Ani chuan, “keima thu thuin awm ka tum lo va, mi tîrtu thu thu zâwka awm ka tum ṭhîn” tiin a sawi a ni. (Johana 5:​30) Isua chuan inhuam taka Pathian rawng a bâwlnaah chuan hlimna nasa tak a hmu a ni. Tichuan, Davida thu hirlh lâwk chu a tifamkim bawk: “Aw ka Pathian, i duhzâwng tih hi ka lâwmzâwng tak a ni,” tih chu.​—Sâm 40:8.

Isua’n Jehova duhzâwng tih duhna nei mah se, chu chu thil awlsam tak a ni reng thei bîk lo. Man a nih a, nghaisak, leh tihhlum a nih hma lawka thilthleng kha han ngaihtuah teh. Gethsemani huana an awm lai khân, Isua chu a “lungngai êm êm” a, “a thlaphâng êm êm” bawk a ni. Chutianga rilru hrehawm lutuka a ṭawngṭai lai chuan, “a thlan chu thi far lian tak angin leiah a far,” hial a ni.​—Matthaia 26:38; Luka 22:44.

Engvangin nge Isua chu chutianga a thlaphân êm êm? A tâna hamṭhatna tûr a nih loh vâng emaw, Pathian duhzâwng tih a hreh vâng emaw a ni hauh lo. Ani chu thih ngamin an inpuahchahsa reng a, Petera’n “Lalpa, Pathianin khawngaih che rawh se; chûng chu i chungah a thleng tawp vang,” a tih laia a chhân dân aṭang pawhin a hriat theih a ni. Isua’n pawi a tih ber chu mi sual ber ang maia a thih dân tûr chuan Jehova leh A hming thianghlim a nghawng dân tûr hi a ni. Tin, a Fapa duh tak nunrâwng taka an sawisak lai a hmuh hian a Pa chuan a tuar hle dâwn tih Isua’n a hre bawk a ni.

Isua chuan Jehova thil tum tihhlawhtlin nâna hun pawimawh tak a lo thleng mêk tih a hre thiam bawk. Rinawm taka Pathian dân a zawm tlatna chuan Adama tân pawh khân Pathian dân a lo zâwm theih a ni tih a lantîr ang. Tin, Isua rinawmna chuan fiahna hnuaiah mihringin Pathian rawng chu duh tak leh rinawm takin an bâwl lo vang tih Setana puhna dik lohzia a tilang chiang hle bawk ang. Jehova chuan Isua hmangin Setana leh a helna sawhkhâwk zawng zawngte chu a nuaibo vek dâwn a ni.​—Genesis 3:​15.

Isua chunga innghat mawhphûrhna chu a va rit tak êm! A Pa hming te, lei leh vâna remna te, leh mihringte chhandamna te chu Isua rinawmnaah a innghat a ni. Chu chu hre thiamin, ani chu: “Aw ka Pa, a theih chuan he no hian mi pêl lul rawh se; nimahsela keima thu ni lovin, nangma thu thu ni zâwk rawh se,” tiin a ṭawngṭai a ni. (Matthaia 26:39) Lungngaihna nasa ber a tuar chung pawhin, Isua chuan a Pa duhzâwng tih a hreh ngai lo.

‘Thlarauvin A Peih A, Tisa Erawh A Chak Lo’

Jehova rawng a bâwlnaah Isua chuan rilru hahna nasa tak a tuar a, keini pawhin Pathian rawng kan bâwlnaah Setana’n kan chungah nêksawrna a thlentîr dâwn tih kan beisei thei a ni. (Johana 15:20; 1 Petera 5:8) Tin, ṭha famkim lo kan ni lehnghâl a. Chuvângin, Pathian rawng chu inhuam takin bâwl mah ila, chu chu kan tân thil awlsam a ni hauh lo vang. A tirhkohte’n a thupêkte tih tuma an beih fan fan dân chu hmuin, Isua’n heti hian a sawi a ni: “Thlarau zawngin a peih a, tisa erawh chu a chak lo a ni” tiin. (Matthaia 26:41) A tisa ṭha famkimah chuan engmah chak lohna a awm lo. Nimahsela, a zitrîrte tisa chak lohna, famkim lo Adama hnên aṭanga an rochun ṭhat famkim lohna chu a hriat reng avânga he thu hi sawi chhuak zâwk a ni. Jehova rawngbâwlnaa an tih duh zawng zawng tih theih nân, rochun ṭhat famkim lohna leh a rahchhuah chintâwk neihna avângin an beih hrâm hrâm a ngai dâwn tih chu Isua’n a hresa reng a ni.

Chuvângin, ṭhat famkim lohnain Pathian rawng a duh anga a bâwltîr theih loh avânga lungngai êm êm, Paula anga lungngaih châng kan nei mai thei. Ani chuan, “thil ṭha tih duhna chu keimahah a awm na a, thil ṭha tihna erawh chu keimahah a awm si lo,” tiin a ziak a ni. (Rom 7:18) Keini pawhin kan thil ṭha tih duh zawng zawng chu kan tithei lo. (Rom 7:19) Mahse, chu chu hrehna kan neih vâng a ni hauh lo. Kan tisa chak lohna hian kan thawhrimna a tihbahlah vâng mai zâwk a ni.

Mahse, i bei dawng lo vang u. Kan tih theih apiang thinlung zawng zawnga tih kan inhuam phawt chuan, kan rawngbâwlna chu Pathianin a pâwm ngei ang. (2 Korinth 8:​12) Pathian duhzâwnga Krista intukluhna pumhlûm entawn tûrin ‘theihtâwp chhuahin ṭhahnêm i ngai’ ang u. (2 Timothea 2:​15; Philippi 2:​5-7; 1 Petera 4:​1, 2) Chutiang rilru put hmang chu Jehova’n mal a sâwmin, a ṭanpui bawk ang. Ani chuan kan chak lohna khuhbo nân ‘thiltihtheihna nasa tak’ min pe dâwn a ni. (2 Korinth 4:​7-​10) Tichuan, Jehova min ṭanpuina zârah Paula angin A rawngbâwlna hlu takah ‘lâwm êm êmin kan inhmangral ang a, kan inhmangral vek’ ang. (w00 11/15)

[Phêk 29-naa milem]

Paula chuan a theihna zawng zawngin Pathian rawng chu inhuam takin a bâwl

[Phêk 31-naa milem]

Lungngaihna nasa ber tuar chûng pawhin, Isua chuan a Pa duhzâwng a ti