Jehova Thuhretu Ni Tûrin Eng Nge Ka Tih Ngai?

Jehova Thuhretu ni tûra rahbi rah ngaite chu Isua’n a sawi a, chu chu Matthaia 28:19, 20-ah a hmuh theih a ni. Chu thu-ah chuan Krista zirtîr ni tûra miin a tih ngaite târ lan a ni a, chutah chuan Jehova chungchâng sawi, a nih loh leh hriattîr a tel a ni.

Rahbi 1-na: Bible zir. Isua’n a hnungzuitute chu “zirtîrahte siam ula, . . . zirtîr rawh u,” tiin kaihhruaina a pe a. (Matthaia 28:19, 20) “Zirtîr” tia lehlin thu hi a ngial a ngan chuan “zirlai” tihna a ni a. A bîk takin Bible-a chuang Isua Krista zirtîrnaahte chuan nun hlimawm leh hlawhtling nei tûra i hriat ngaite a tel a ni. (2 Timothea 3:16, 17) A thlâwna Bible zirpuina kan neih hmangin Bible zirtîrnate zir tûra ṭanpui che chu kan châk hle.—Matthaia 10:7, 8; 1 Thessalonika 2:13.

Rahbi 2-na: I thu zirte nunpui. Isua’n a thu zirtute chuan ‘[a] thupêk zawng zawng an pawm’ a ngai bawk tih a sawi a. (Matthaia 28:20) Chumi awmzia chu i Bible zirna chu thiamna neih nân chauh ni lovin—i ngaihtuahna leh i nungchang nasa taka thlâk danglam nân i hman a ngai tihna a ni. (Tirhkohte 10:42; Ephesi 4:22-29; Hebrai 10:24, 25) Isua thupêk zâwmtute chu Pathian Jehova hnêna inpumpêkna hmangin, amah zui tura mi mal thu tlûkna siam tûra chêttîrin an awm ang.—Matthaia 16:24.

Rahbi 3-na: Baptisma chan. (Matthaia 28:19) Bible-ah baptisma chan chu phûm nêna khaikhin a ni a. (Rom 6:2-4 nên khaikhin rawh.) Chu chu nun kawng hmasa thihsana, nun thar ṭanna entîrna ang a ni. Tichuan, i baptisma channa chu Isua sawi rahbi hmasa pahnih i rap zo tawh tih leh Pathian hnênah chhia leh ṭha hriatna thiang i dîl tih vântlâng hmaa hriattîrna a ni.—Hebrai 9:14; 1 Petera 3:21.

Baptisma chang tûrin ka inpeih tawh tih engtin nge ka hriat ang?

Kohhran upate bia la. Eng thilte nge i hriatthiam tih te, i thu zirte chu i nunpui em tih te, leh nangma duhthu ngeiin Pathian hnênah i inpumpêk em tihte hre tûrin an kâwm ang che.—Tirhkohte 20:28; 1 Petera 5:1-3.

Hêng rahbite hi Thuhretute fate tân rah a ngai em?

Ngai e. Kan fate chu Bible thupêk angin “Lalpa thununnaah” kan enkawl a. (Ephesi 6:4) Mahse, an rawn seilen rualin Baptisma chang tûra an tlin theih nân Bible zirtîrnate zir tûr te, pawm tûr te, leh nunpui tûr tein mahnia thu tlûkna an siam a ngai. (Rom 12:2) A tâwp berah, mi tinte hian biakna chungchângah mahniin thu tlûkna an siam tûr a ni.—Rom 14:12; Galatia 6:5.