KRISTIANTE ANGIN NUNG RAWH
Thu Hrilhna leh Zirtîrna—Zirtîr Siam Nân A Pawimawh
Isua’n a hnungzuitute chu kal a, zirtîr siam tûrin thu a pe a. (Mt. 28:19) Chutah chuan thu hrilh leh zirtîr a tel a ni. A châng chuan, heti hian kan inzâwt ṭheuh tûr a ni, ‘Engtin nge zirtîr siamnaa hêng hmêl hmang pawimawh takahte hian hma ka sâwn theih ang?’ tiin.
THU HRILHNA
Mite’n min rawn pan nghah ngawt aiin, ‘a thleng tlâkte’ phûr takin kan zawng tûr a ni. (Mt. 10:11) Rawngbâwlnaa kan tel hian, “lo awm apiangte” biak theihna hun remchâng zawngin kan harhvâng reng em? (Tirh. 17:17) Tirhkoh Paula’n ṭhahnemngai taka thu a hrilh avângin Ludi chu zirtîr pakhat a rawn ni.—Tirh. 16:13-15.
“Zîngah i chi tuh la, tlaiah i kut sûm suh” (Thur. 11:6)
‘BANG LOVIN’ THU HRIL ZEL RAWH—TAWNCHAWPIN LEH INTINAH TIH VIDEO CHU EN LA, TICHUAN A HNUAIA ZAWHNATE HI CHHANG ANG CHE:
Samuel-a chuan a nî tin hun hmannaah thutak chî tuh theihna hun remchâng a zawng reng tih engtin nge a târ lan?
Engvângin nge thu hrilh dân kawng hrang hranga kan tel hrâm hrâm ang?
I nî tin hun hmannaah Lalram thuchah chu tute hnênah nge i hrilh theih?
ZIRTIRNA
Zirtîr siam tûr chuan mite hnêna thu leh hla chhuah hnutchhiah aia tam kan tih a ngai a. Thlarau lama hma sâwn tûra ṭanpui tûr chuan kan tlawhkîr a, Bible kan zirpui a ngai a ni. (1 Kor. 3:6-9) Mahse, tuemaw chu taima taka Lalram thutak kan zirtîrna chuan rah ṭha a chhuah loh chuan engtin nge ni ang? (Mt. 13:19-22) “Lei ṭha” ang thinlung neitute chu kan zawng chhunzawm zêl tûr a ni.—Mt. 13:23; Tirh. 13:48.
“Keiin ka phun a, Apollovan tuiin a châwm a, nimahsela Pathianin a ṭhantîr a ni” (1 Kor. 3:6)
‘BANG LOVIN’ THU HRIL ZEL RAWH—VANTLANG HMUNAH LEH ZIRTIRA SIAMNAAH TIH VIDEO CHU EN LA, TICHUAN A HNUAIA ZAWHNATE HI CHHANG ANG CHE:
Engtin nge Solomon-a leh Mary-i chuan Ezekiel-a leh Abigail-i te thinlunga thutak chî chu tuia an châwm?
Vântlâng hmuna thu hrilh pawh tiamin, rawngbâwlna pêng hrang hranga kan thil tum ber tûr chu eng nge ni?
Engtin nge mi dangte thutak zirtîr chu kan ngaih pawimawh lehzual theih?