Chhiartute Zawhna
Nula thianghlim Mari ṭhat famkim lohna chuan a naupai Isua chungah nghawng ṭha lo a nei em?
“Isua Krista lo pian dân” chungchângah thlarauva thâwk khum thuziak chuan: “A nu Mari chu Josefa nên an inhual laiin, an inpâwl hmain, thlarau thianghlimin a raitîr tih an lo hre ta a,” a ti a. (Matthaia 1:18) Thlarau thianghlim chuan Mari nau paina kawngah chanvo pawimawh tak a nei a ni.
A nih leh, Mari chungchâng chu eng nge ni? A nau paina kawngah a hmeichhe chi chuan telna chhetê tal a nei em? Abrahama te, Isaaka te, Jakoba te, Juda te, leh Lal Davida te—Mari thlahtute—hnêna Pathian thutiam ngaihtuah chuan, naupang lo piang tûr chu an thlah dik tak a nih a ngai si a. (Genesis 22:18; 26:24; 28:10-14; 49:10; 2 Samuela 7:16) Chutiang a nih loh chuan Mari nau hrin chu chûng Pathian thutiamte roluahtu tûr dik tak a nih theih dân kawng dang eng nge awm chuang? Chuvângin, ani chu a fapa dik tak a nih a ngai a ni.—Luka 3:23-34.
Jehova vântirhkoh chu nula thianghlim Mari hnênah inlârin: “Mari, hlau suh; Pathian ngaihsakzâwng i ni e. Ngai rawh, i rai ang a, fapa i hring ang a, a hmingah chuan Isua i sa tûr a ni,” a ti a. (Luka 1:30, 31) Rai nân chuan hmeichhe chi chu naupai thei tûr khawpa puitling a nih a ngai a ni. A lan dân chuan, Pathian Jehova chuan a fapa mal neih chhun nunna chu thlarau khawvêl aṭanga leia dah sawnna hmangin, Mari chhûla hmeichhe chi pakhat chu nau pai thei tûrin a tipuitling a ni.—Galatia 4:4.
Ṭha famkim lo hmeichhiain chutianga a hrin naupang tisa chu a ṭha famkimin, sual tel lo a ni thei dâwn em ni? Ṭhat famkimna leh ṭhat famkim lohna a inkawp chuan ze inhlan chhâwnna dân chuan engtin nge hna a thawh? Thlarau thianghlim chuan Pathian Fapa nunna ṭha famkim dahsawn tûrin leh Mari raitîr tûrin hna a thawk a ni tih hria la. Chu thlarau chuan Mari hmeichhe chia ṭhat famkim lohna awm zawng zawng chu hnehin, atîr ata inthlah chhâwnna ṭha famkim a siam ni berin a lang.
Engpawhnise, chutih hun laia Pathian thlarau thianghlim hnathawh chuan Pathian thiltum chu a tihlawhtling a ni tih kan ring tlat thei a ni. Vântirhkoh Gabriela chuan Mari hnênah: “Thlarau thianghlim i chungah a lo thleng ang a, Chungnungbera thiltihtheihnain a hliahkhuh ang che; chuvângin mi thianghlim lo piang tûr pawh chu Pathian Fapa an ti ang,” tiin a hrilhfiah a ni. (Luka 1:35) Ni e, Pathian thlarau thianghlim chuan ṭhat famkim lohna leh thil dangin a tihbawlhhlawh loh nân, pum chhûnga nautê chu a insiam ṭantîrh ata a tuam tlat a ni.
Chiang takin, Isua chuan a hringnun ṭha famkim chu mihring tumah avânga a neih a ni lo va, a Pa, vâna mi avâng liau liauva a neih a ni. Jehova chuan a tân “taksa [a] buatsaihsak” a; tin, Isua chu Mari pum chhûnga a insiam ṭantirh ata “bawlhhlawh kai lo, mi sualte laka awm hrang,” a ni tak zet a ni.—Hebrai 7:26; 10:5. (w02 3/15)
[Phêk 19-naa milem]
“I rai ang a, fapa i hring ang”