Isua hnungzuitu tlêm tê chauh thlarau thianghlim hmanga baptis an ni a. Anni chu Krista nên lal leh puithiamte nia vân aṭanga leia rorêl tûra koh an nih avângin thlarau thianghlim hmanga hriak thih an ni.e (1 Petera 1:3, 4; Thu Puan 5:9, 10) Lei Paradis-a chatuan nun beiseina neitu Isua hnungzui mi maktaduai tam takte chu an khua leh tuite an ni ang.—Matthaia 5:5; Luka 23:43.

Krista Isuaa baptisma channa leh a thihnaa baptisma channa. Thlarau thianghlim hmanga baptis-te chu “Krista Isuaa baptisma chang,” an ni bawk. (Rom 6:3) Chuvângin, chu baptisma channa chu vâna Isua nêna rorêl tûr a hnungzui hriak thihte chungah a thleng a. Isuaa baptisma changin a hriak thih kohhran zînga mite an ni ta a. Ani chu Lû a ni a, anni chu taksa an ni.—1 Korinth 12:12, 13, 27; Kolossa 1:18.

Buh chuan Isua thu ngaithlaa zâwmtute a entîr a. Anni chuan thlarau thianghlima baptisma chan theihna chanvo an nei a ni. Buh sî erawh chuan Isua thu ngaithla duh lotute a entîr thung a. Anni chuan chatuana boralna entîrtu, meiah baptisma an chang ang.—Matthaia 3:7-12; Luka 3:16, 17.