“Hêngte Ai Hian Nangin Kei Mi Hmangaih Zâwk Em?”

1, 2. Zan khuaa lên a den hnuah Petera’n eng nge a hriatthiam tâk?

ISUA zirtîr pasarihte chuan Galili Dîlah zan khuain lên an dêng a. Mahse, engmah an man lo. Khawfîng a chahin tho leh Isua chuan ṭiauphovah dingin anni chu a en a. “Ani chuan an hnênah, ‘Lawng sîr ding lamah khân lên dêng ulang in hmu ang,’ a ti a. Tin, an dêng a, sangha tam avângin an hnûk chhuak zo ta lo va.”—Johana 21:1-6.

² Isua’n a zirtîrte tûkṭhuan atân chhang leh sangha a buatsaihsak a. Simon Petera lam hawiin: “Simon, Johana fapa, hêngte ai hian nangin kei mi hmangaih zâwk em?” tiin a zâwt a. Petera’n sangha man chu nuam a ti hle tih Isua’n a hria a. Chuvângin, Petera chu a ei zawnna sangha manna aiin amah leh a thil zirtîrte a hmangaih zâwk em tih a zâwt a ni thei ang. Petera chuan: “Lalpa; ka ngainâ che tih i hria e,” tiin a chhâng a. (Johana 21:15) Chumi nî aṭang chuan, Petera’n a sawi ang ngeiin a ti a. Thu hrilhna hnaa inhmang zovin Krista a hmangaihna chu a lantîr a, Kristian kohhrana mi pawimawh tak a rawn ni ta a ni.

3. Kristiante chu eng lakah nge an fîmkhur ngai?

³ Petera hnêna Isua thusawi aṭangin eng nge kan zir theih? Krista kan hmangaihna dai lo tûra kan fîmkhur a ngai a ni. He khawvêlah hian manganna a tamin lungkhamna leh buainate kan hmachhawn ang tih Isua’n a hria a. Isua’n buh chi theh tehkhin thuah, mi ṭhenkhatin “Ram thu” chu an pawm ang a, a tîr lamah chuan an phûr hle ang tih a sawi a. Mahse, “khawvêl lungkhamna leh hausakna bumna chuan thu chu a dîp” avângin an phûrnate an hloh leh ta a ni. (Matthaia 13:19-22; Marka 4:19) Kan fîmkhur loh chuan, nî tin nuna lungkhamnate chuan Jehova rawng kan bâwlnate chu a tibuai thei a. Chuvângin, Isua’n a zirtîrte chu: “Fîmkhur rawh u, chutilochuan ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang,” tiin a vaukhân a ni.—Luka 21:34.

4. Krista kan hmangaihna a nghet tih hre tûrin engin nge min ṭanpui? (A thupui chunga milem en rawh.)

⁴ Petera ang bawkin, kan nunah thu hrilh hna dah hmasakna hmangin Krista kan hmangaihzia kan lantîr thei a. He hna hi kan thawk zawm zêl ang tih engtin nge kan chian theih? Heti hian kan inzâwt thei: ‘Nuna kan ngaih pawimawh ber chu eng nge ni? Ka hlimna neih hi Jehova rawng ka bâwlna aṭanga lo awm nge ni a, thil dang ka tihna aṭang zâwk?’ tiin. Chumi chhâng tûr chuan Krista kan hmangaihna tidai theitu thil pathum chungchâng i lo bih chiang ang u. Chûngte chu ei zawnna te, chawlhhahdamna te, leh sum leh pai zawnnate a ni.

EI ZAWNNA CHU A HMUN TUR DIK TAKAH DAH RAWH

5. Chhûngkaw lûte chuan eng mawhphurhnate nge an neih?

⁵ Petera chuan sangha man chu nuam a tih vâng maia man a ni lo. A chhûngte châwm nâna thawk a ni. Tûn laiah pawh, Jehova chuan chhûngkaw lûte chu chhûngkuate châwm tûrin mawhphurhna a pe a. (1 Timothea 5:8) Chumi ti thei tûr chuan an thawhrim a ngai a ni. Mahse, hêng hun hnuhnûngahte hian ei zawnna chuan lungkhamna tam tak a thlen thei a ni.

6. Engvângin nge eizawnna hnaah lungkhamna a tam êm êm?

⁶ Hnathawh tûr aiin hna zawngtute an tam fo ṭhîn a. Chumi avâng chuan hna hmu tûra inelna chu a nasa hle. Mi tam tak chuan an thawh nasat ang hûin an phû tâwk hlawh an hmu lo niin an hria a. Sumdâwnnate chuan tûn hma zawng aiin thawktu tlêm zâwka thil tam zâwk siam chhuah tumin an bei a. Chuvângin, hnathawktute chuan lungkhamna an ngahin an hah thei hle a, an dam loh phah hial a ni. Hnathawktu tam tak chu an pute phût anga an tih theih loh chuan hna chân an hlau a ni.

7, 8. (a) Tu chungah nge kan rinawm tlat ang? (b) Thailand rama kan unaupain a hnathawhna chungchângah eng thil hlu tak nge a zir chhuah?

⁷ Kristiante kan nih angin, kan hnathawhna pûte pawh tiamin mi dang emaw, thil dang emaw aiin Jehova chungah kan rinawm zâwk tûr a ni a. (Luka 10:27) Kan ei zawnna hi kan mamawh bulpuite phuhrûkna leh kan rawngbâwlna min ṭanpui theitu a ni tûr a ni. Kan fîmkhur loh erawh chuan kan hnathawhna chuan kan biakna chu a tibuai thei a. Thailand rama kan unaupa hnên aṭangin kan inzir thei a ni. Ani chuan: “Computer siam ṭhatna hna ka thawh chu ka tui zâwng tak a ni a; mahse, dârkâr tam tak thawh a ngai a. Chuvâng chuan thlarau lam thiltih nân hun ka neih loh phah a ni. Lalram dah hmasa zâwk tûr chuan ka hna ka thlâk a ngai tih ka hre ta,” tiin a sawi. Unaupa chuan eng nge a tih tâk?

⁸ “Kum khat chhûng ruahmanna ka siam hnu chuan kawng sîra ice cream zawrh ka tum ta a. Atîr chuan, sum ka hmuh tlêm avângin ka lunghnual a. Tûn hmaa ka hnathawhpuite nên kan inhmuh chuan min nuisawh ṭhîn a, tichuan air-condition hnuaia computer siam aia ice cream zawrh chu ṭha zâwkah engtin nge i ngaih theih tiin min zâwt ṭhîn a ni. Jehova hnêna ṭawngṭaiin, chhêl taka tuar thei tûr leh thlarau lam thiltih nâna hun tam zâwk pe thei tûra ka thiltumte hlen tûrin ka dîl a. Rei vak lohvah, dinhmunte chu a ṭha chho hret hret a. Min dâwrtute tui tihzâwng ka hre chho zêl a, a siam dân pawh ka thiam chho telh telh bawk a ni. Tichuan nî tin ice cream chu ka hralh zo thei ta a. Tûnah chuan, computer ka siam lai aiin ka sum leh pai dinhmun a ṭha zâwk a ni. Tûn hmaa ka hnathawhna avânga ka neih rilru hahna leh lungkhamnate chu ka neih tawh loh avângin ka hlim lehzual a. A pawimawh ber chu Jehova ka hnaih lehzual hi a ni,” tiin a sawi.—Matthaia 5:3, 6 chhiar rawh.

9. Kan ei zawnna chungchângah thlîr dân inbûk tâwk tak kan nei tih engtin nge kan hriat?

⁹ Jehova’n taima taka kan hnathawh chu a ngai hlû a. Taima taka hnathawh chuan rah ṭha a chhuah ṭhîn a ni. (Thufingte 12:14) Mahse, kan ei zawnna chu Jehova rawng kan bâwlna aiin kan dah pawimawh lo zâwk tih kan chiang tûr a ni. Kan mamawh bulpuite chungchâng a sawinaah Isua’n: “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tiin a sawi a. (Matthaia 6:33) Mahse, kan ei zawnna chungchângah thlîr dân inbûk tâwk tak kan nei tih engtin nge kan hriat ang? Heti hian kan inzâwt thei a: ‘Ka hna chu ka tuipuiin ṭha ti êm êm mah ila, Pathian rawng ka bâwlna chu thiltih pângngai mai emaw, thil ninawm emaw angin ka ngai em?’ tiin. He zawhna ngaihtuahna hian kan thil ngainatte hre fiah tûrin min ṭanpui thei ang.

10. Eng zir tûr ṭha tak nge Isua’n a sawi?

¹⁰ Isua’n kan nuna kan dah hmasak ber tûr chu min hrilh a. Ṭum khat chu Mari leh Marthi te a va tlawh a. A thlen veleh, Marthi chuan a tân eiin a buatsaih nghâl a, Mari erawh chuan Isua bula ṭhuin a thusawi chu a ngaithla a ni. Marthi chuan Mari’n a ṭanpui loh avângin a vui thu a sawi a. Isua’n Marthi hnênah: “Marin chan ṭha chu a thlang a, chu chu lâksak tûr a ni lo ve,” a ti a. (Luka 10:38-42) Tah hian Isua’n zir tûr ṭha tak a sawi a ni. Kan thil mamawhte avânga kan rilru kal pêng lo tûr leh Krista kan hmangaih tih fihfiah tûrin, “chan ṭha chu” kan thlang tûr a ni. A awmzia chu kan nunah Jehova nêna kan inlaichînna chu englai pawhin a pawimawh ber tûr tihna a ni.

CHAWLHHAHDAMNA LEH INTIHHLIMNA KAN THLIR DAN

11. Bible-in chawlhhahdamna chungchângah eng nge a sawi?

¹¹ Kan nî tin nun chu a buai thei hle a, chuvângin, chawlhhahdam châng kan neih pawh a ngai a ni. Bible-ah: “Mihring tân chuan ei leh in te leh a thawhrimnaa a rilru tihnawm te aliama ṭha a lo awm lo,” tiin kan chhiar a. (Thuhriltu 2:24) A zirtîrte’n chawlhahdam an mamawh tih Isua’n a hria a. Entîr nân, thu hrilh hnaa rim taka an thawh hnuin, an hnênah: “Nangmahniho ngawtin thlalêr hmunah a hrangin lo kal ula, châwl rih rawh u,” tiin a hrilh a ni.—Marka 6:31, 32.

12. Chawlhhahdamna leh intihhlimna chungchângah engvângin nge kan fîmkhur a ngaih? Entîrna pe rawh.

¹² Chawlhhahdamna leh intihhlimmna chuan hahdam tûrin min ṭanpui thei a. Mahse, kan hlimpui thilte chu nuna kan thil dah pawimawh ber ni lo tûrin kan fîmkhur tûr a ni. Kum zabi khatnaa mi tam tak chuan: “I eiin i in ang u hmiang, naktûkah kan thi dâwn alâwm,” tih rilru put hmang an nei a. (1 Korinth 15:32) He rilru put hmang hi tûn laiah pawh a hluar hle. Entîr nân, Europe Khaw thlang lama tlangvâl pakhat chu Kristian inkhâwmahte a tel ṭan a. Mahse, intihhlimna a ngainat êm avângin Jehova Thuhretute zîngah a tel ta lo va. A hnuah chuan, intihhlimnaa a inhman lutukna chuan a chungah harsatna a thlen tih a hre ta a. Bible a zir ṭha leh a, a hnuah chanchin ṭha hrilhnaah a tel ṭan leh thei a ni. Baptisma a chan hnu chuan: “Khawvêlin a pêk intihhlimna ûm aiin Jehova rawngbâwlnain hlimna a thlen tam zâwk tih ka hriat hmaa hun tam tak ka lo khawhral chu pawi ka ti hle a ni,” tiin a sawi.

13. (a) Chawlhhahdamna leh intihhlimna atâna hun hman tam lutuk a ṭhat loh chhan entîrna pe rawh. (b) Chawlhhahdamna leh intihhlimna chungchânga thlîr dân inbûk tâwk nei tûrin engin nge min ṭanpui?

¹³ Chawlhhahdamna chuan hahdamna leh chakna mi pe tûr a ni a. Chuvângin, chawlhhahdamnaah hun eng zât nge kan hman ang? A chhânna hmu tûr chuan, heti hian kan ngaihtuah thei a ni. Mi tam tak chuan cake leh thil thlum an duh êm êm a. Mahse, chûngte chu kan ei reng chuan kan hrisêlna a khawih pawi thei tih kan hria. Hrisêl kan duh chuan chaw ṭha kan ei a ngai a. Chutiang bawkin, chawlhhahdamna leh intihhlimnaa hun kan hman tam lutuk chuan Jehova nêna kan inlaichînna a chhe thei a ni. Chawlhhahdamna chungchânga thlîr dân inbûk tâwk kan neih leh neih loh hre tûrin engin nge min ṭanpui thei? Thil pakhat kan tih theih chu chawlhkâr khat chhûnga Kristian inkhâwm te, thu hrilhna te, leh Bible zirnate ang chi Jehova rawng kan bâwlna nêna inkûngkaih thiltihtea hun kan hman zâtte ziah chhuah hi a ni. Chu bâkah, chu chawlhkâr chhûnga infiamna te, TV en te, leh video game khelhte ang chi intihhlimnaa kan hun hmante chu kan ziak chhuak bawk ang a. Chûng kan hun hmante khaikhinna aṭang chuan eng nge kan hmuh chhuah? Inthlâk danglam kan ngai em?—Ephesi 5:15, 16 chhiar rawh.

14. Chawlhhahdamna leh intihhlimna ṭha thlang tûrin engin nge min ṭanpui thei ang?

¹⁴ Jehova’n chawlhhahdamna kan thlan a phal a, chhûngkaw lûte chuan an chhûngkaw tân chawlhhahdamna an thlang thei a ni. Jehova’n Bible-ah a ngaihtuahnate târ langtu thu bulte min pe a. Chûng thu bulte chuan thu tlûkna ṭha siam tûrin min ṭanpui thei a ni.a (Footnote en rawh.) Chawlhhahdamna ṭha chu “Pathian thilpêk a ni.” (Thuhriltu 3:12, 13) Mihring kan danglam angin intihhlimna lama kan duh zâwng pawh a inang lo tih chu a dik ngei mai. (Galatia 6:4, 5) Mahse, intihhlimna eng pawh thlang mah ila, kan fîmkhur a la ngai tho a ni. Isua chuan: “I ro awmna apiangah i rilru pawh a awm ang,” tiin a sawi a. (Matthaia 6:21) Kan Lal, Isua kan hmangaihna chuan thil dang zawng aiin Lalram kan dah pawimawh zâwk tih kan ngaihtuahnaah te, kan thusawiah te, leh kan thiltihtea lantîr tûrin min chêttîr a ni.—Philippi 1:9, 10.

HAUSAK ATCHILHNA KAN DO

15, 16. (a) Hausak ûmna chu engtin nge kan tân thang a nih theih? (b) Hausak ûmna chungchângah Isua’n eng thurâwn fing tak nge a pêk?

¹⁵ Tûn laia mi tam tak chuan thawmhnaw te, phone te, computer-te, leh thil dang, a chhuak thar apiang chu neih an duh a. Thil dang zawng aiin sum leh pai ngaih pawimawhna leh hausak âtchilhnain an nun a thunun a ni. Kristiante kan nih angin, kan tân eng nge pawimawh ber? Heti hian i inzâwt thei: ‘Kohhran inkhâwm atâna inbuatsaih aiin car chhuak thar leh thawmhnaw chhuak thar ngaihtuah nân hun ka hmang tam zâwk em? Ka nî tin nuna ka buai lutuk avângin ṭawngṭaina leh Bible chhiarna atân hun ka hman tlêm phah em?’ tiin. Kan fîmkhur loh chuan Krista kan hmangaihna aiin hausak duhna chu kan dah pawimawh zâwk thei a ni. Isua thusawi: “Awhna rêng rêng lakah chuan invêng rawh u,” tih hi kan hre reng tûr a ni. (Luka 12:15) Engvângin nge he thu hi a sawi?

¹⁶ Isua chuan: “Tuman hotu pahnih rawng an bâwl kawp thei lo,” tiin a sawi a. “Pathian leh sum rawng in bâwl kawp thei lo ve,” tiin a sawi belh bawk. Hausakna kan ûm rualin Jehova hnênah kan thil neih ṭha ber pêk chu thil theih a ni lo. Ani chuan: ‘Pakhat huain pakhat kan duh ang a, a nih loh leh pakhat ṭanin pakhat kan hmusit ang,” tiin a sawi a. (Matthaia 6:24) Kan famkim loh avângin, hausak ûmna pawh tiamin “kan tisa châknate” chu kan do zawm zêl tûr a ni.—Ephesi 2:3.

17. (a) Engvângin nge mi ṭhenkhatin sum leh pai chungchângah thlîr dân inbûk tâwk neih harsa an tih? (b) Hausak âtchilhna do tûrin engin nge min ṭanpui?

¹⁷ Mi tam tak chuan an châkna leh nuam tih zâwngte an ngaih pawimawh lutuk avângin sum leh pai lamah thlîr dân inbûk tâwk neih an harsat a. (1 Korinth 2:14 chhiar rawh.) Ngun taka an ngaihtuah loh avângin, a chhia leh a ṭha thliar hran an harsat phah a ni. (Hebrai 5:11-14) Sum leh pai an ngainatna chu a zual telh telh a. Sum leh paiah duhtâwk an nei lo. (Thuhriltu 5:10) Chutiang ngaihtuahna kan do theih dân kawng a awm a. Pathian Thu chhiar ziahna chuan hausak âtchilhna do thei tûrin min tichak thei a ni. (1 Petera 2:2) Isua’n Jehova finnate ngun taka a ngaihtuah ṭhin avângin Diabola thlêmnate chu a do thei a. (Matthaia 4:8-10) Tûn laiah pawh, hausak âtchilhna do kan duh chuan Jehova finnate chu kan nunpui a ngai a ni. Chu chuan sum leh pai aiin Isua kan hmangaih zâwk tih a târ lang ang.

18. Eng nge tih i tum tlat?

¹⁸ Isua’n Petera hnênah: “Hêngte ai hian nangin kei mi hmangaih zâwk em?” tia a zawh khân nunah a dah pawimawh ber tûr chu Jehova rawngbâwlna a ni tih a zirtîr a. Petera’n “Lungpui,” tia awmze nei hming a nei hi ngaihven awm tak a ni. Petera neih mize ṭhate chu lungpui nêna khaikhin theih a ni a. (Tirhkohte 4:5-20) Tûn laiah, keini pawhin Krista kan hmangaihna chu tihngheh kan duh a. Chuvângin, kan nunah ei zawnna te, chawlhhahdamna te, leh sum leh paite chu hmun dik takah kan dah tûr a ni. Tichuan “Lalpa; ka ngainâ che tih i hria e,” tia sawitu Petera ang kan ni ve thei ang.