Chhiartute Zawhna
Engvângin nge inngaihna avânga ni khata Israel mi thi zât kha Number 25:9-in 24,000 a ni a tih laia 1 Korinth 10:8-in 23,000 a ni a tih?
He Bible châng pahniha number zât inan loh chhan hi kawng engemaw zât a awm a. A chhan mâwlmang ber chu, a thi zât chiah chu 23,000 leh 24,000 inkâr vêl a ni ang a, chu chuan a tlêm lam emaw, a tam lam emawa number bikima sawi mai a tirem a ni thei ang.
A chhan dang ni thei âwmte hi ngaihtuah teh. Tirhkoh Paula chuan Sittim-a Israelte chanchin chu nun kawng bawlhhlawhna avânga hmingthang, hmân lai Korinth khawpuia Kristiante tâna vaukhânna entîrna ni tûrin a târ lang a ni. Heti hian a ziak a: “An zînga ṭhenkhatin nula an ngai a, ni khatah sînghnih leh sângthumin an tlûkhlum phah ang khân i inngai hek suh ang u,” tiin. An inngaih avânga Jehova tihboralte chu la hrangin, Paula chuan mi 23,000 a ti a ni.—1 Korinth 10:8.
Mahse, Number bung 25-na chuan “Israel-ho chuan Peor hmuna Baal chu an pawm ve ta a; tichuan Israelho chungah LALPA thin chu a alh ta a,” tih min hrilh thung a. Tichuan Jehova chuan “mipuite hotu zawng zawng” chu tiboral tûrin Mosia chu thu a pe a. Chutah, Mosia’n chu thupêk anga ti tûrin rorêltute chu a hrilh lehchhâwng a ni. A tâwp a tâwpah Phinehasa’n puan in chhûnga Midian hmeichhe rawn hruai lûttu Israel mi rang taka a thah tâkah chuan “hremna chu a reh ta” a ni. Chutah, thuziak chu heti hian a tâwp a ni: “Chu mi hremnaa thite chu 24,000 an ni,” tiin.—Number 25:1-9.
Number bua a thi zât târ lanah hian, rorêltute’n an tihhlum “mipuite hotu zawng zawng” leh Jehova’n a thahte pawh an tel vek ngei ang. Rorêltute kuta thi mipuite hotute chu sângkhat vêl an ni ang a, chu chuan 24,000 a nihtîr a ni thei ang. Chûng mipuite hotute, a nih loh leh hruaitute chuan hmeichhia an ngai emaw, ngai lo emaw pawh ni se, inthâwinaah an tel ve, a nih loh leh chutianga mi dangte an tel chu an phal avângin, anni chuan ‘Peor hmuna Baal pawmna’ sual mawh chu an phur a ni.
He thu mal “pawm” tih chungchângah Bible hrilhfiahna pakhat chuan “tuemaw lama hîp tlata awm” tihna a kâwk thei a ti. Israelte chu Jehova hnêna inpumpêk an ni a; mahse, “Peor hmuna Baal an pawm” hian Pathian hnêna an inpumpêk inlaichînna chu an tichhia a ni. Chu mi hnu kum 700 vêlah, Jehova chuan zâwlnei Hosea hmangin heti hian Israelte chanchin a sawi a ni: “Anni chu Baal-peor hmunah an lo kal a, thil zahthlâk takah chuan an inpumpêk ta a, an ngaihnat tak milemte ang bawk chuan an tenawm a ni,” tiin. (Hosea 9:10) Chutianga ti apiang chuan Pathian rorêlna râpthlâk tak chu an phu a ni. Chuvângin, Mosia chuan Israel fate chu hetiang hian a hriattîr a ni: “Baal-peor avânga LALPA thiltih chu in mitin a hmu a: Baal-peor betu zawng zawngte chu LALPA in Pathianin in zîng ata a tiboral a,” tiin.—Deuteronomy 4:3. (w04 4/1)