Jehova Kawngah Kal Zel Rawh
“LALPA [Jehova, NW] chu nghâk la, a kawng chu zawh rawh, tichuan ram hi luah tûrin a chawimawi ang che.”—SAM 37:34
1, 2. Lal Davida tân khân Pathian kawnga kalna chuan engnge a kaihhnawih a, chu chuan kan tûn lai hunah engnge a phût?
“KA kalna tûr kawng chu mi hriattîr ang che; ka rilru hi i hnênah ka dah tlat si ṭhîn a.” (Sâm 143:8) Tûn laia kristiante chuan he Lal Davida thu hi thinlung zawng zawngin an tiri nawn a. Jehova tihlâwm leh a kawnga kal chu an duh tak zet a ni. Hei hian engnge kaihhnawih a neih? Davida tân chuan, Pathian dân vawn reng chu a ni. Hei hi kan vêla mite pathian rawngbâwl lo va, Jehova rawng rinawm ngheta bawl tihna a ni. Kristiante tân chuan, Jehova kawnga kal chuan kaihhnawi tam zâwk a nei a ni.
2 Tûn laia Jehova kawnga kal tih awmzia pakhatah chuan Isua Krista tlanna inthawina a rinna lantîr leh “kawng leh thutak leh nunna” a nih anga amah hriatna neih a ni. (Johana 3:16; 14:6; Hebrai 5:9) Tin, a awmze dang lehah chuan “Krista dân thu” tihfamkimna a ni a; chu chuan inhmangaih tawnna, a bîk takin Isua hriakthih unaute chunga lantîr a huam bawk a ni. (Galatia 6:2; Matthaia 25:34-40) Tupawh Jehova kawnga kalte chuan a thupêk leh dân bulte an hmangaih a. (Sâm 119:97; Thufingte 4:5, 6) Kristian rawngbâwlna-a an telvena chanvo hlu tak chu an khâwlkhâwm a ni. (Kolossa 4:17; 2 Timothea 4:5) Ṭawngṭai chu an nuna pêng pawimawh tak an tih zat zat ṭhîn a ni a. (Rom 12:12) Tin, ‘mi fing lote anga awm lovin mi fingte anga awm zâwkin, an awm dânah an fîmkhur a ni.’ (Ephesi 5:15) Khawvêl thila hlâwkna emaw tisa lam nawmsakna atân thlarau lam hausakna chu an hlân ngai lo. (Matthaia 6:19, 20; 1 Johana 2:15-17) Chu mai bâkah, Jehova laka rinawm ngheh leh amaha rinna nghah chu thil pawimawh ber a ni. (2 Korinth 1:9; 10:5; Ephesi 4:24) Engvâng nge? A chhan chu kan dinhmun hi hmân lai Israel-te nên a inan êm vângin.
Rinna leh Rinawm Nghehna Atâna Mamawh Chu
3. Engvângin nge rinawm nghehna, rinna, leh intukluhnate, hian Jehova kawng vawng reng tûra min ṭanpui ang?
3 Israel chu hnam lian lo tak, ṭhenawm ram nêlawm loh tak tak, mipat hmeichhiat serh leh sâng thil te milem pathiante biakna-a chêngte’n an hual vêl ram a ni a. (1 Chronicles 16:26) Israelte chauhvin, hmuh theih loh Pathian Jehova rawng chu bâwlin, leh a phût nungchang tehna sâng chu an vawng a ni. (Deuteronomy 6:4) Chutiang chiah chuan tûn laiah pawh, he khawvêl mi tlûklehdingâwn ruk dâwn, an tehna leh kohhran lan dân anmahni nên danglam êm êm te zîngah maktaduai engemaw zât chauhvin Jehova an bia a. Chûng maktaduai tlêmtê zînga mi chu kan nih chuan, kawng dik lo va hnehna chu kalhin kan invêng ngei tûr a ni. Engtin maw? Pathian Jehova laka rinawm nghetin, amah chu ringin, leh ṭanpui tûra a thutiamte chu a tihlawhtling ngei ngei dâwn tih rin ngheh tlat tûr a ni. (Hebrai 11:6) Hei hian khawvêl thilte-a rinna nghahna lak aṭangin min vêng dâwn a ni.—Thufingte 20:22; 1 Timothea 6:17.
4. Engvângin nge hnamte chu “hriatna-ah chuan an lo thim”?
4 Tirhkoh Paula chuan khawvêl mite lak aṭanga Kristiante danglam dân tûr hetiang hian a sawi a: “Hei hi ka sawiin Lalpaah chuan ka hriattîr che u a ni: Jentailte chu rilru lawi lo pua an awm angin awm tawh suh ula, hriat lohna anmahniah a awm, chu mi hriat lohna avâng chuan Pathian nunna lakah ṭhena lo awmin, an hriatnaah chuan an lo thim a ni, an thinlung a chawlawl avângin,” tiin. (Ephesi 4:17, 18) Isua chu “êng tak” a ni. (Johana 1:9) Tu pawh amah hnâwltu emaw, ringa inchhâl mahse “Krista dân” zâwm silote chu ‘hriatna-ah an thim’ a. Jehova kawng aṭanga pêngte chu, ‘Pathian nunna lak aṭangin ṭhenin an awm a ni.’ Khawvêl thil-ah chuan fing tak niin an inngai mah sela, nunna a hruaitu chu Pathian leh Isua hriatna chauh a nih avângin ‘an chawlawl’ a ni.—Johana 17:3; 1 Korinth 3:19.
5. Eng tak chu khawvêlah a êng chung pawhin engvângin nge mi tam takte thinlung chu a inhawn loh?
5 Chu bâkah, êng tak chu khawvêlah a êng a ni! (Sâm 43:3; Philippi 2:15) “Kawtthlêrah finna chu ring takin a au va.” (Thufingte 1:20) Kum kalta khân Jehova Hriatpuitute chuan Pathian Jehova leh Isua Krista chungchâng ṭhenawmte hnêna hrilh nân dârkâr maktaduai khat aia tam an khawh ral a, nuaih têlin an chhânglêt a ni. Chutih laia chhânglêt ve lo midang tam takte chu mak kan ti ang em? Ti lo vang. Paul’n ‘an thinlung chawlawl’ a sawi avângin. Mi ṭhenkhatte chu sum ngainat avâng emaw, mahni hma sialna emaw avângin an thinlung a inhawng lo a. Mi dangte chu sakhaw dik lo emaw, sorkâr ngaih dân tûn lai khawvêla darh zau takte thununin an awm bawk. Nuna thil tawn tawh harsa tak takte chuan tam tak chu Pathian hnuchhawnna lamah a hruai bawk ṭhîn. Mi dang lehte chuan Jehova nungchang tehna sâng tawn chu an hnâwl bawk a ni. (Johana 3:20) Hetiang kawngte hian Jehova kawnga kalte thinlung chu a lo chawlawl thei em?
6, 7. Pathian Jehova betute an ni chungin, eng hunah nge Israel mipuite kha an pen bova, engvâng nge?
6 Hei hi hmân lai Israelte chungah a lo thleng tawh tih Paula chuan a târ lang a. “Chûng chu kan tân entîrna a ni, thil sual an châk ang bawk khân kan châk ve loh nân. An zînga ṭhenkhat milem betu an ni ang khân milem betu ni suh u, ‘Mipui chu ei leh in tûrin an ṭhu hlawm a, infiam tûrin an tho leh a’ tih ziak ang khân. An zînga ṭhenkhatin nula an ngai a, ni khatah sînghnih leh sângthumin an tlûkhlum phah ang khân i inngai hek suh ang u,” tiin, tirhkoh Paula chuan a ziak a ni.—1 Korinth 10:6-8.
7 Paula chuan Sinai Tlâng bula Israel ten rangkachak bâwng no an biak lai khân a sawi lang hmasa ber a ni. (Exodus 32:5, 6) Chu chu chung lam thupêk kâr tlêmtê kalta-a zâwm tûra an lo pawm tawh zawmlohna a ni. (Exodus 20:4-6; 24:3) Chumi zawhah, Paula chuan Israelte Moab fanute leh Baal hnêna an kun laiin a sawi bawk. (Numbers 25:1-9) Bâwng no chuan ‘hun nuam neihna’ hleihluak taka châkna tinrêng a entîr a.a Baal biakna chu mipat hmeichhiatna khaw lo taka hmanna entîrna a ni. (Thu Puan 2:14) Engatinge Israelte chu chûng sualahte chuan an inhnamhnawih hnawih ni? A chhan chu ‘hming tihliau thei thilte’ zâwm chu an remti a ni—milem biakna a ni emaw, dân pawisaklohna thil chînte emaw chu.
8. Israel te thiltawn aṭangin engnge kan zir theih?
8 Paula chuan hêng thil thleng aṭang hian kan zîr tûr a ni tiin, a sawi chhuak a ni. Eng maw kan zîr ang? Hmân lai Moab pathian emaw, rangkachak bâwng no emaw chibai bûka an kûn kha chu a ngaih pawh ngaihtuah tlâk loh a ni a. A nih leh nungchang bawlhhlawhna emaw, mahni-duh ang anga khawsak khuahkhirhlohna emaw chungchâng chu engnge ni le? Hêngte hi tûn laiah a lâr êm êm a, chutiang duhthlanna chu kan thinlungah kan ṭhanlentîr chuan Jehova lak aṭangin min ṭhen hrang mai dâwn a ni. A rahchhuah chu milem biakna chungchâng kan pawm nên a inang chiah a—Pathian lak aṭanga ṭhenhranna chu. (Kolossa 3:5 khaikhin rawh; Philippi 3:19) Dik takin, Paula chuan: “milem biak hi tlânsan rawh u,” tiin, a rinpuite ngêna chutiang thil thlengte a sawihona chu a titâwp a ni.—1 Korinth 10:14.
Pathian Kawnga Kalna-a Ṭanpuina
9. (a) Jehova kawnga kal reng tûrin eng ṭanpuina nge kan dawn ṭhin? (b) ’Kan hnunga thu’ kan hriatna kawng khat chu engnge ni?
9 Jehova kawnga kal reng kan tum ruh tlat a nih phawt chuan, ṭanpui lo va kalsan kan ni lo va ni. “Ding lama in pên veleh emaw, vei lama in pên veleh emaw, in bengin hnung lama thu, ‘Hei hi kawng a nih hi, tah hian kal rawh u,’ tiin, a hre zêl ang,” tiin, a lo sawi lâwk a ni. (Isaia 30:21) Engtin nge ‘kan hnung lama thu chu kan bengin’ kan hriat ang? Aw le, tûn laiah tumahin Pathian aw tak tak emaw, a hnêna aṭanga hmuh theiha lo kal thuchah an hmu ngai lo va. “Thu” kan hriat chu kan vaia hnênah kawng thuhmun-in a lo kal a. A hmasa berah chuan, Pathian ngaihtuahna leh mihringte nêna an inpawhna chhinchhiahte keng, thâwkkhum Pathian Lehkha thu kaltlangin a lo kal a ni. “Pathian nunna lakah ṭhena lo awm” bulṭanna aṭanga puangzâr tûra nitîna kan chhuah aṭangin, thlarau lam hrisêlna ṭha atân chuan pelh lo va Bible chhiar leh ngaihtuah kan mamawh a ni. Hei hian “thil lawilote” pumpelh tûr leh ‘hna ṭha tinrêng thawk tûra kim taka inthuama famkim theih nân’ min pui dâwn a ni. (Tirhkohte 14:14, 15; 2 Timothea 3:16, 17) Chu chuan min tichak ang a, min tichhel ang a; tin, ‘kan kawngte chu lo titluang zêl’ tûrin min ṭanpui dâwn a ni. (Josua 1:7, 8) Chuvângin, Jehova thu chuan: “Khai le, ka fapate u, ka thu ngaithla rawh u, ka kawng zawhtute chu mi nihlawh an ni si a. Zirtîrna chu ngaithla ula, fing ula, duh lo suh u,” tiin, min thlêm a ni.—Thufingte 8:32, 33.
10. ‘Hnung lama thu’ kan hriat dân kawng dang pahnihna chu engnge ni?
10 Kan ‘hnung lama thu’ thu chu “Bawi rinawm, fing tak . . . a hun apianga chaw” semtu hmangin a lo kal bawk a. (Matthaia 24:45-47) He chaw sem dân kawng khat Bible ṭanchhana chhut thu chhuah te, chu tûn hnai kum hian hnianghnâr taka sem a ni. Entîr nân, Vênnainsâng magazine kaltlangin, hrilhlâwkna thu kan hriatthiamnate chu tihfiah a ni. He chanchinbu-ah hian, thuhrilhna hna bei fan fan tûr leh ngaihsaklohna ṭhanglian zêl chung pawh a zîrtîra siam hna thawk tûra fuih kan ni a; tin, hlauhawm pumpelh tûrin min ṭanpui a; tin, chu bâkah Kristian nihphung mawi tak chu tiṭhangduang tûra ngen kan ni bawk. A hun tak a chaw khâwlkhâwm chu kan ni tak zet e!
11. ‘Hnung lama thu’ kan hriat theih dân kawng thumna sawifiah teh.
11 Bawih rinawm leh fingte chuan, pelh hauh lo va kan inkhâwmnate hmangin chaw min pe leh a. Hei hian tualchhûng inkhâwm te, bial inkhâwmpui ang chi te, leh inkhâwmpui lian zâwk kum tina inkhâwmpui ang chite a huam vek a ni. Chutiang intawhkhâwmnate hlut ngai lo chu eng Kristian rinawm nge ni ang le? An vaiin Jehova kawnga kalna-a min ṭanpui tûra ṭangkai ber vek an ni. Chutih laia mi tam tak an hna-ahte emaw, school leh Company-ah te hun tam tak khawhral ngaite, chutiang rinna ṭawmpui thei ve lote tân pawh pelh lo va Kristian inhmuhkhâwmna hi a taka nun humhimna a ni. Inkhâwmte chuan ‘hmangaih leh thil ṭha tiha inchawk tho tawn tûrin’ hun remchâng min pe a ni. (Hebrai 10:24) Kan unaute kan hmangaih a, an mahni nêna intawhkhâwm chu kan châk a ni.—Sâm 133:1.
12. Jehova Hriatpuituten eng tumruhna nge an neih a, tûn hnaiah engtin nge chu chu an lantîr?
12 Chutiang thlarau lam chaw chuan mi tichakin, tûn lai mi maktaduai ruk dâwn laite chu Jehova kawngah an kal a; tin, mi dang maktaduai tam takte pawh chutiang ti ve tûr chuan Bible an zîr mêk a ni. A nihna takah chuan he lei mihring tlûklehdingâwn tam takte nêna khaikhin chuan an tlêm hle si a, chuvâng chuan an lunghnual emaw, an chak loh phah em? Teh suh e! Rinawm ngheta Jehova duh zâwng tiin, ‘an hnung lama thu’ chu rilru-a vawn an tum nghet tlat a. He tumruhna hi vântlâng hriata lanchhuahtîrna a nih angin, 1998/99 a “Pathian kawnga nunna” khawvêl pum leh bial inkhâwmpui chhûnga palaite chuan thinlung taka dingin he thurawtna hi an pawm tih an lantîr a ni. A dâwt chu chu thurawtna chu a ni a.
Thurawtna
13, 14. Khawvêl dinhmun chungchâng dik taka thlîrna Jehova Hriatpuituten engnge an neih?
13 “Kei ni Jehova Hriatpuitute ‘Pathian Kawnga Nunna’ inkhâwmpuia kalkhâwmte hian kan thinlung zawng zawngin Pathian Kawng hi nun kawng ṭha ber a ni tih kan pawm a. Chuvângin, tûn laia mihring tam zâwkte hian kawng dangin an ngai a ni tih kan hria a ni. Nuna kawng ṭha ber siamtu chungchângah mihring pâwlte chuan ngaih dân tam tak, finna, leh sakhaw ngaih dânte tihchhin tam tak an lo nei tawh a. Tûn lai mihring chanchin leh khawvêl dinhmun ngun taka han thlîr hian Jeremia 10:23-a ziah: ‘Tûngchhova kal mihringah hian, a pheikhai hruai tûr a awm lo’ tih thu chung lam thu puan chhuah dikna hi an tichiang a ni.
14 “A ni têlin khîng thute dikna tihchianna khi kan hmu tam deuh deuh va. A pawimawh berah chuan Mihringte hian Pathian nunna kawng chu an ngaihven lo hlê a, mite chuan an mithmuha dik âwm taka langte chu an ûm a ni. A rahchhuah chu lungchhiatthlâk tak—chhûngkaw nun tlâkchhiatna te, naupang kaihhruai lo va thlahthlamna te; khawih theih leh hmuh theih bâk engmah a awm rinlohna thilte ûm zêl, engmah lo leh tihhlawhchhamna te; tualthah leh pâwngnêkna pawisaklohna te a ni. Hêngte hi harsatna tam tak te zînga tlêmtê chauh hlimna, remna, leh muanna neih reng theihna anga inlante an ni.
15, 16. Pathian kawnga nun chungchângah, thurawtna-ah khân eng tumruhna nge lanchhuahtîr a nih?
15 “Mihring te lungngaihna nasa tak leh ‘engkimtitheia indona ni ropui’ Armageddon ti a koh (Thu Puan 16:14, 16) lo hnaihna chu thlîrin, keini Jehova Hriatpuitute chuan chûng thilah chuan thu tâwp kan siam a ni:
16 “A hmasa berin: Kan taksa pumhlûm chu Jehova hnêna hlanna neiin, ama tâ angin kan ngai a; tin, a Fapa, Isua Krista hmanga Jehova pêk tlanna-ah chuan rinna tihnghîn rual loh chu kan vawng reng ang. Isua Krista awpna kaltlanga lantîr a thuneihna sâng ber-ah chuan intulûtin leh a Hriatpuitu anga rawngbâwlin, Pathian nunna kawnga kal chu kan tum tlat a ni.
17, 18. Nungchang tehna leh Kristian inunauna chungchângah Jehova Hriatpuituten eng dinhmun nge chhawmnung tûra an beihzui?
17 “Pahnihna-ah chuan: Bible nungchang leh thlarau tehna sâng zawm chu kan chhunzawm zêl dâwn. Rilru lawi lo pu-a hnamte kalna kawng aṭanga invên chu kan tum tlat a ni. (Ephesi 4:17-19) He khawvêl bawlhhlawh kai lo va Jehova hma-a thianghlima din chu kan tum ber a ni.—Jakoba 1:27.
18 “A pathumna-ah chuan: Kan Pathian Lehkha thu khawvêl puma Kristian inunauna dinhmun chu chak takin kan vuan tlat a. Chi inthliarna te, hnam inthliarna te, a nih loh leh inhuatna te, leh inṭhenhranna te-a inbar luh chu phal lovin, hnamte zîngah Kristian tualdawihna chu vawn kan tum ang.
19, 20. (a) Kristian nu leh paten engnge an tih tûr? (b) Engtin nge Kristian dik zawng zawng ten Krista zirtîr anga inlantîr tûrin an chhunzawm tûr?
19 “Palina: Keini nu leh pate hian kan Fate hnênah Pathian kawng chu kan tuh ang a. Kristian nun dân pelh hauh lo va Bible chhiar te, chhûngkua-a zirna te, leh Kristian kohhran leh thlawhhma rawngbâwlna-ah kan thinlung zawng zawnga ṭawmpuiin entîrna kan siam ang.
20 “Panga-na: Kan za-in pathian lam hlutna kan Siamtu-in a entîrte chu chhawm tûrin kan bei ang a, a mizia leh a kawngte chu Isua lo tih tawh angin entawn kan tum hrâm hrâm ang. (Ephesi 5:1) Kan thiltih zawng zawngte chu hmangaihna nêna tih, nihtîr kan tum a, chu chu Isua zirtîr anga kan inlântîrna a ni.—Johana 13:35.
21-23. Jehova Hriatpuitute’n engnge an chhunzawm zêl dâwn a, eng thilte-in nge an ni chu hmin?
21 “Parukna: Thlahthlam lovin Pathian Lalram chanchin ṭha puan hna, zirtîra siam hna kan chhunzawm reng ang a; tin, Pathian kawnga nun kan zirtîrin leh kohhran inkhâwma zirtîrna zau zâwk dawng tûrin kan fuih ang.—Matthaia 24:14; 28:19, 20; Hebrai 10:24, 25.
22 “Pasarihna: Mimal leh sakhaw pâwl ang pawhin, Pathian duh zâwng chu kan nunah kan dah hmasa ber ang a. A thu Bible chu kan hruaitu a hmangin, kan ding lamah emaw, kan vei lamah emaw kan pêng lo vang a; tichuan, Pathian kawng chu he khawvêl kawngte aia a chungnun zâwkzia kan tichiang a ni. Tichuan, Pathian kawng a nunna ûm zêl chu kan tum ruh tlat a—nghet takin leh rinawm nghetin, tûn aṭanga kumkhua-in!
23 “Jehova hmangaih thutiam Pathian duh zâwng titute chu kumkhua-in an awm dâwn tihah chuan rinna pumhlum kan nghah avângin, he thurawtna hi kan siam a. Pathian Lehkha thu dân bul te, thurâwn te chuan, nunna tak tak chu kan vawn theih nân, tûna kan nuna kawng ṭha ber siam nân leh hun lo thleng tûr atân chuan lungphûm ṭha tak khâwlkhâwm tûra min hmin avângin he rawtna hi kan siam a ni. (1 Timothea 6:19; 2 Timothea 4:7, 8) Chûng zawng zawng bâkah chuan, Pathian Jehova chu kan thinlung zawng zawng, kan theihna zawng zawng, kan rilru zawng zawng, leh kan chakna zawng zawnga kan hmangaih avângin he rawtna hi kan siam bawk a ni.
24, 25. Rawtna thil ruahman chu engtin nge chhanlêt a nih a, Jehova kawnga kalte tumruhna chu engnge ni?
24 “He inkhâwmpuia tel zawng zawng he rawtna pawmtu zawng zawngte chuan, khawngaihin AW! tih tûr a ni.”
25 Khawvêl puma inkhâwmpui thlenna in leh stadium za tam taka telte chuan aw ring takin “AW!” an ti a ni. Jehova Hriatpuitute chuan Jehova kawnga kal chu an chhunzawm zêl dâwn tih an ringhlel hauh lo va. Jehova chu an rinchhan nghettlatin leh a thutiamte chu a tipuitling ngei dâwn tih an ring tlat a ni. Eng thil pawh thleng se la, a laka an rinawmna chu an vawng reng a. Tichuan a duh zâwng tih chu an tumruh tlat a ni.
“Pathian Chu Kan Tân a Ni”
26. Jehova kawnga kalte dinhmun hlimawm tak chu engnge ni?
26 Jehova Hriatpuitute chuan sâm ziaktu ngenna thu: “LALPA [Jehova, NW] chu nghâk la, a kawng chu zawh rawh, tichuan ram hi luah tûrin a chawimawi ang che,” tih hi an vawng reng a ni. (Sâm 37:34) Paula fuihna thu: “Chûng thuah chuan engnge kan sawi ang le? Pathian kan lama a ṭan chuan tuin nge min do thei ang? Ama Fapa ngei pawh zuah lova, kan zaa aia petu chuan thil zawng zawng pawh athlâwnin min pe tel lo va ngem ni?” tih hi an theihnghilh ngai lo a ni. (Rom 8:31, 32) Ni e, Jehova kawnga kan kal reng chuan, “Thil zawng zawng lâwmna” min pe dâwn a ni. (1 Timothea 6:17) Tûna kan awmna aia ṭha khawiah nge awm thei chuang ang—Jehova kawng a kala, a sîr tuaka kan unau duh takte awmna aia ṭha zâwk chu. Jehova chu kan lamah aṭang bawk si a, a hun takah chuan a thutiamte tâwp ber chu kan hmu dâwn tih ring tlatin tâwpna chu tuar chhuah leh chuta chên chu i tum tlat ang u.—Tita 1:2.
[Footnote-te]
a Heta Greek thumal ‘hun nuam neihna’ tih a lehlin chungchângah hian, ngaih dân sawitu pakhat chuan pagan kût nî a thil awm ṭhîn lâm chungchâng a sawi lang a: “Hêng lâm tam tak hriat lâr tak takte hi, taksa châkna thûk tak awlsam taka hmankhawloh theih nâna duan bîk a ni,” tiin, a sawi.
I Hre Chhuak Thei Em?
◻ Kristiante tân Jehova kawng kal tûrin engnge phût an nih?
◻ Jehova hnêna rinna tihhmasâwn leh a laka rinawm ngheh chu engvângin nge kan mamawh?
◻ Jehova kawnga kan kalin eng ṭanpuina nge kan hmuh theih?
◻ “Pathian kawng a nunna” inkhâwmpuia thurawt pawimawh zual ṭhenkhatte sawi rawh.
[Phêk 18-naa milemte]
Rawtna pawimawh tak chu “Pathian kawng nunna” Bial inkhâwmpui leh khawvêl pum huap inkhâwmpui-ah pawm a ni.