ZIRLAI 30
I Hmangaih Takte Chu An Nung Leh Thei!
Thihna chuan nasa taka lungngaihna leh manganna a thlen a. Chuvângin Bible chuan thihna chu hmêlma tiin a ko a ni. (1 Korinth 15:26) Zirlai 27-ah khân Jehova’n chu hmêlma chu a tiboral dâwn tih i hre tawh a. A nih chuan, mitthi tawhte chu engtin nge an awm ang? He zirlaiah hian Jehova thutiam ropui tak dang i zir belh ang—chhiar sên lohva tam mitthite chu chatuana hlimna chên tûrin a kaitho leh dâwn tih chu! Chu chu a thleng thei tak tak ang em? Khawiah nge an thawh leh dâwn? Vânah nge ni a, leiah?
1. Kan hmangaih thi tawhte tân Jehova’n eng nge tihsak a duh?
Jehova’n mitthi tawhte kaihthawh leh chu a châk hle a. Mi rinawm Joba chuan a thih hunah Pathianin a theihnghilh lo vang tih a ring tlat a ni. Pathian hnênah: “Mi ko vang a, keiin [Thlân aṭangin] ka chhâng ang che,” tiin a sawi a ni.—Joba 14:13-15 chhiar rawh.
2. Engtin nge mitthite kaihthawh theih an ni tih kan hriat?
Isua leia a awm lai khân Pathianin mitthite kaihthawh theihna a pe a. Isua chuan kum 12 mi hmeichhe naupang leh hmeithai fapa a kaitho a ni. (Marka 5:41, 42; Luka 7:12-15) A hnuah, a ṭhian Lazara a thi a. Thlâna an phûmna pawh ni li lai a ni tawh a; mahse, Isua’n a kaitho leh a ni. Pathian hnêna a ṭawngṭai zawhah, thlân lam hawiin: “Lazar, lo chhuak rawh!” a ti a. Tichuan, “mitthi chu . . . a lo chhuak ta a,”—a nung leh ta! (Johana 11:43, 44) Lazara chhûngte leh ṭhiante hlim dân tûr chu han mitthla teh!
3. I hmangaih thi tawhte tân eng beiseina nge awm?
Bible chuan: “Thawhlehna a awm ang,” tih min tiam a. (Tirhkohte 24:15) Isua leia a awm laia a kaihthawhte kha vânah an kal lo. (Johana 3:13) Anni chu he leia kaihthawh leh an nih avângin an lâwm hle. Chutiang bawkin, Isua’n he lei paradis-a chatuan hlimna chên tûrin mi tlûklehdingâwn tam takte chu a kaitho thuai dâwn a ni. Ani chuan ‘thlâna awm zawng zawng’—mite’n hre tawh lo mah se, Pathian hriatrengnaa awm zawng zawngte—chu kaihthawh leh an ni dâwn tih a sawi a ni.—Johana 5:28, 29.
ZIR BELHIN HMUH BELH RAWH
Mitthite chu kaihthawh theih leh kaihthawh ngei an ni dâwn tih Bible aṭanga finfiahnate chu bih chiang la. Thawhlehnain thlamuanna leh beiseina a pêk theih dân che zir rawh.
4. Isua chuan mitthite a kaitho thei tih a târ lang
Isua’n a ṭhian Lazara tâna a tihsakte chu zir belh rawh. Johana 11:14, 38-44 chhiarin, hêng zawhnate hi sawiho vang che u:
Engtin nge Lazara chu a thi tak tak tih kan hriat?—Châng 39 en rawh.
Lazara chu vânah a kal reng tawh ni ta se, Isua’n he leia nung leh tûrin a kaihthawh i ring em?
5. Mi tam takte chu kaihthawh an ni ang!
Sâm 37:29 chhiarin, he zawhna hi sawiho vang che u:
Tho leh mi tlûklehdingâwn tam takte chu khawiah nge an awm ang?
Isua chuan Jehova betute bâkah mi dang tam tak pawh a kaitho vang. Tirhkohte 24:15 chhiarin, he zawhna hi sawiho vang che u:
Tho lehte zîngah tu nge hmuh i châk?
Hei hi han ngaihtuah teh: Naupang muhîl lai a pain awlsam taka a kaihthawh theih angin, Isua chuan mitthite chu awlsam takin a kaitho thei
6. Thawhlehna chuan thlamuanna leh beiseina a pe thei che
Bible-a Jaira fanu chanchin chuan lusûn tam takte chu a thlamuanin, a tichak a ni. Chu mi chanchin chu Luka 8:40-42, 49-56-ah chhiar rawh.
Isua chuan Jaira fanu a kaihthawh khân a pa hnênah: “Hlau suh, ring mai rawh,” tiin a hrilh a. (Châng 50 en rawh.) Engtin nge thawhleh beiseina chuan hêng dinhmunahte hian a ṭanpui theih che?
I hmangaih tak a thih hunah
Dinhmun hlauhawma i awm hunah
VIDEO chu chhuah la, a hnuaia zawhna hi sawiho vang che u.
Engtin nge thawhleh beiseina chuan Phelicity-i nu leh pate chu thlamuanna leh chakna a pêk?
MI ṬHENKHAT SAWI DAN: “Thawhlehna chu a ṭha lutuk a, âwih a har mah mah ka ti.”
Engtin nge i ngaih?
Thawhlehna a awm dâwn tih kawh hmuh nân eng Bible châng nge i hman theih?
KHAIKHAWMNA
Bible chuan mitthi tlûklehdingâwn tam takte an rawn tho leh dâwn tih min tiam a. Jehova’n anni chu nung leh tûrin a duh a, Isua hnênah kaitho tûrin thiltihtheihna a pe a ni.
Ennawnna
Engtin nge Jehova leh Isua’n mitthite kaihthawh leh chu an ngaih?
Tho leh mi tlûklehdingâwn tam takte chu khawiah nge an awm ang—vânah nge ni a, leiah? Engvangin nge chutianga i sawi?
Engin nge i hmangaih tak thi tawhte chu an nung leh thei tih rinnghehtîr che?
HRIAT BELH NAN
Lusûnna hmachhawn thei tûra i tih theih ṭhenkhat chu chhiar rawh.
Bible thu bulte chuan lusûn tuemaw chu a ṭanpui thei tak tak em?
Engtin nge naupangte chuan an hmangaih tak thihna chu an hmachhawn theih?
Vâna kaihthawh an awm ang em? Tute nge kaihthawh ni lo vang?