Nun leh Rawngbâwlna Inzirna Lehkhabu Atâna Thu Lâk Chhuahnate
DECEMBER 2-8
PATHIAN THU AṬANGA RO HLUTE | THU PUAN 7-9
“Jehova’n Chhiarsên Loh Mipui Tam Tak Mal A Sâwm”
(Thu Puan 7:9) Chûng hnuah chuan ka han en a; tin, ngai teh, mipui tam tak tu ma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te puan vâr sina tûm kau kengin, lalṭhutphah hmaah leh Berâm No hmaa ding ka hmu a.
it-1-E 997 ¶1
Mipui Tam Tak
Zawhna lo awm ta chu, “Mipui tam tak” chu chhandamna hmu a, leia awm rengte an nih chuan, engtin nge anni chu ‘lalṭhutphah hmaah leh Berâm No hmaa ding’ nia kan sawi theih? tih hi. (Thup. 7:9) Bible-ah ‘ding’ tih ṭawngkam hi Pathian duhsakna dawng, a nih loh leh lawm hlawh tih sawi nâna hman châng a awm a. (Sâm 1:5; 5:5; Thuf. 22:29, AT; Lk. 1:19) Dik tak chuan, Thu Puan bung rukah, “leia lal te, mi lian te, sipai hotu ber te, mi hausa te, mi chak te, bâwih leh bâwih lo tinrêngte” chu “lalṭhutphaha ṭhua hmêl lakah leh Berâm No thinurna lakah min hliah rawh u; an thinurna ni ropui tak chu a lo thlen tâk hi; tichuan, tu nge ding thei ang i le?” tia birûkna zawng anga târ lan an ni. (Thup. 6:15-17; Lk. 21:36 nên khaikhin rawh.) Chuvângin, “mipui tam tak” chu, chu thinurna hun chhûnga dam khawchhuak a, Pathian leh Berâm No lawm hlawhna dawnga “ding” theite niin an lang.
(Thu Puan 7:14) Tin, kei chuan a hnênah, “Ka pu, nangman i hria alâwm,” ka ti a. Tin, anin ka hnênah, “Hêng hi hrehawm nasa tak ata chhuakhote kha an ni a, an puante Berâm No thisena suin an tivâr ta a.
it-2-E 1127 ¶4
Hrehawmna
Jerusalem tihchhiat a nih hnu kum sawmthum vêlah, tirhkoh Johana chu hnam tin zînga mi te, chi tin zînga mi te, leh mi tin zînga mi, mipui tam tak chungchângah, “Hêng hi hrehawm nasa tak ata chhuakhote kha an ni,” tia hrilh a ni a. (Thup. 7:13, 14) Mipui tam tak ‘hrehawm nasa tak ata an chhuak,’ tih thu chuan chumi aṭangin an dam khawchhuak tih a târ lang a ni. Chu chu, chutiang ṭawngkam vêk hmanna Tirhkohte 7:9, 10-naa: ‘Pathian chu [Josefa] hnênah a awm a, a hrehawm tawrh zawng zawngah a chhan chhuak zêl a,’ tih hian a nemnghet a ni. Josefa chu a hrehawm tawrhna zawng zawngah chhanchhuahin a awm tih hian chûngte chu chhel takin a tuar chhuak thei mai ni lovin, a hrehawm tawrhna ata a dam khawchhuak tihna pawh a ni bawk.
(Thu Puan 7:15-17) Chuvângin, Pathian ṭhutphah hmaah an awm a ni; tin, a chhûn a zânin a biak inah chuan a rawng an bâwl ṭhîn; tin, lalṭhuhphaha ṭhua chuan an chungah a puan in chu a zâr ang. 16 An rilṭâm leh tawh lo vang a, an tuihâl leh tawh hek lo vang; niin a em hek lo vang a, lum rêng rêng pawhin a tihrehawm hek lo vang. 17 Berâm No, lalṭhutphah laia awm chu an vêngtu a ni ang a, nunna tuikhurahte a hruai ang; Pathianin an mit ata mittui zawng zawng a hru fai tawh ang,” a ti a.
it-1-E 996-997
Mipui Tam Tak
An nihna. “Mipui tam tak” nihna chu Thu Puan bung 7-naah leh an chanchin târ lanna dangahte hmuh theih a ni. Thu Puan 7:15-17-ah chuan Pathian chu ‘an chunga a puan in zâra,’ ‘nunna tuikhurahte hruai a,’ “an mit ata mittui zawng zawng” hru faitu anga sawi a ni a. Thu Puan 21:2-4-ah chutiang ṭawngkamte chu kan hmu a ni: ‘Pathian bâwktê chu mihring zîngah a lo awm ta,’ tih te, ‘an mit ata mittui zawng zawng a hrufai,’ tih leh ‘thihna a awm leh thei tawh lo vang,’ tihte hi. Chuta târ lan inlârna chu ‘khaw thianghlim Jerusalem thar lo chhukna’ vâna mite ni lovin, leia mihringte chungchâng sawina a ni.
Thlarau Lam Lunghlute Laih Chhuahna
(Thu Puan 7:1) Chumi hnuah chuan khawmualah leh, tuifinriatah leh, thing rêng rêngah chuan thli rêng a tleh loh nân, lei thli pali chu chelhin lei kil lia ding vântirhkoh pali ka hmu a.
re-E 115 ¶4
Pathian Israel Mite Chhinchhiahna
4 Hêng vântirhkoh palite hi hun ruat a thlen hmaa rorêlna la thlentîr lo tûra Jehova hman vântirhkoh pâwl pali aiawhte an ni tih rinhlelh rual a ni lo. Vântirhkohte’n chhim leh hmâr, chhak leh thlang aṭanga na taka tleh tûra Pathian thinurna thli an thlah hun chuan chhiatna chu râpthlâk tak a ni ang. Chu chu hmân lai Elam mite tidarh leh tiral vek tûra Jehova’n thli pali a hman ang khân râpthlâk tak a ni ang a. (Jeremia 49:36-38) Chu chu Jehova’n Amon mite nuaibo nâna a hman “thlipui” aia a lêt tam taka chhiatna thlen theitu thlipui na tak a ni ang. (Amosa 1:13-15) Jehova’n a lalchungnunna chatuan atân thiam a chantîr hun, a thinurna niah chuan, leia Setana pâwl pakhat mah ding zo an awm lo vang.—Sâm 83:15, 18; Isaia 29:5, 6.
(Thu Puan 9:11) Leilâwt tirhkoh chu an chunga lalberah an nei a, Hebrai ṭawngin a hming chu Abaddona a ni a, Grik ṭawng erawh chuan a hming chu Apolluona (Tiboraltua) a ni.
it-1-E 12
Abaddona
Leilâwt tirhkoh, Abaddona chu tu nge a nih?
Thu Puan 9:11-ah “leilâwt tirhkoh” hming sawi nân “Abaddona” tih ṭawngkam hman a ni a. Chumi tlukpui Grik hming Apolluona chu “Tiboraltua,” tihna a ni. Kum zabi 19th-naah, he Bible châng hi Lal Vespasian-a te, Muhammad-a te, leh Napoleon-a te chungchâng sawi lâwkna anga târ lan an lo tum tawh a, vântirhkoh chu “setana” anga ngaih a ni tlângpui. Mahse, kan hriat tûr chu Thu Puan 20:1-3-a “leilâwt chabi” nei vântirhkoh chu vân aṭanga Pathian aiawhtu anga târ lan a nih bâkah, “setana” nih ahnêkin, ani chuan Setana chu leilâwtah phuar chungin a peih thla tih hi. The Interpreter’s Bible chuan Thu Puan 9:11-na hi: “Abaddona chu Setana vântirhkoh ni lovin, Pathian thupêka tihboralna hna thawktu, Pathian vântirhkoh a ni,” tiin a sawi.
Kan sawi tâk Hebrai Pathian Lehkha Thu-ahte chuan ʼavad·dohnʹ chu Seol leh thihna nên thuhmun a ni tih a chiang a. Thu Puan 1:18-ah, Krista Isua’n: “Kumkhua atân ka nung leh ta a ni. Thihna leh Mitthi Khaw chabite chu ka nei bawk a,” tia a sawi chu kan hmu a. Leilâwt chungchânga a thuneihna chu Luka 8:31-naah târ lan a ni. Ani chuan Setana tiboral tûra a thiltihtheihna pawh tiamin, tihchhiat theihna a nei tih Hebrai 2:14 aṭangin chiang taka hriat theih a ni a, chu Bible châng chuan, a “thihnain thihna thuneitu (chu chu Diabola a ni) a tihboral theihna” tûrin Isua chu tisa leh thisenah a chang tih a sawi a. Thu Puan 19:11-16-ah, ani chu Pathian ruat Tiboraltu, a nih loh leh Tihlumtu anga chiang taka târ lan a ni.—APOLLYON en rawh.
Bible Chhiar
(Thu Puan 7:1-12) Chumi hnuah chuan khawmualah leh, tuifinriatah leh, thing rêng rêngah chuan thli rêng a tleh loh nân, lei thli pali chu chelhin lei kil lia ding vântirhkoh pali ka hmu a. 2 Tin, vântirhkoh dang, Pathian nung chhinchhiahna kenga ni chhuahnaa chho ka hmu bawk a; tin, ani chuan vântirhkoh pali, khawmual leh tuifinriat tihchhiat theihna pêkate hnênah chuan aw ring takin, 3 “Kan Pathian bâwihte chu an chala kan chhinchhiah hma loh zawng khawmual leh tuifinriat leh thingte chu tichhe rih suh u,” tiin a au va. 4 Tin, an chhinchhiah zât chu ka lo hria a, Israela thlahte hnam tina mi 1,44,000 an chhinchhiah tawh a ni. 5 Juda hnama mi 12,000, Reubena hnama mi 12,000, Gada hnama mi 12,000, 6 Asera hnama mi 12,000, Naphtalia hnama mi 12,000, Manasea hnama mi 12,000, 7 Simeona hnama mi 12,000, Levia hnama mi 12,000, Isakara hnama mi 12,000, 8 Zebuluna hnama mi 12,000, Josefa hnama mi 12,000, Benjamina hnama mi 12,000, an chhinchhiah tawh. 9 Chûng hnuah chuan ka han en a; tin, ngai teh, mipui tam tak, tu ma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te puan vâr sina tûm kau kengin, lalṭhutphah hmaah leh Berâm No hmaa ding ka hmu a; 10 tin, chûngte chuan aw ring takin, “Kan Pathian lalṭhutphaha ṭhua hnênah leh, Berâm No hnênah chhandamna,” tiin an au va. 11 Tin, vântirhkoh zawng zawng chu lalṭhutphah leh upate leh Thilnung palite vêlah chuan dingin an awm a; lalṭhutphah hmaah chuan bawkkhupin, 12 “Amen: Malsâwmna te, ropuina te, finna te, lâwm thu sawina te, chawimawina te, thiltihtheihna te, chakna te, chatuanin kan Pathian hnênah awm rawh se, Amen,” tiin Pathian chibai an bûk a.”
DECEMBER 9-15
PATHIAN THU AṬANGA RO HLUTE | THU PUAN 10-12
“‘Thuhretu Pahnihte’ Chu Tihhlum An Nih Hnuah Tihnun Leh An Ni”
(Thu Puan 11:3) Tin, ka thuhretu pahnihte hnênah chuan thu ka pe ang a; tichuan, saiip puan sinin ni 1,260 chhûng zawng thu an hril ang,” a ti a.
w14-E 11/15 30
Chhiartute Zawhna
Thu Puan bung 11-naa târ lan thuhretu pahnihte chu tute nge an nih?
Thu Puan 11:3-na chuan ni 1,260 chhûng hrilh lâwkna sawitu tûr thuhretu pahnih chungchâng a sawi a. An chanchin kan chhiar zawm chuan, sakawlhin “a hneh ang a, a tihlum ang,” tih kan hmu a ni. Mahse, “ni thum leh a chanve hnuah,” hêng thuhretu pahnihte hi an nung leh ang a, a hmutute chuan mak an ti hle ang.—Thup. 11:7, 11.
Hêng thuhretu pahnihte hi tute nge an nih? An chanchin chipchiar zâwk chuan anmahni hre chiang tûrin min ṭanpui ang. A hmasain, anni chu “olive thing pahnih leh khâwnvâr dahna pahnih [entîrnate, NW] . . . an ni,” tih kan hria a. (Thup. 11:4) Chu chuan Zakaria hrilh lâwknaa târ lan khâwnvâr dahna leh olive thing pahnih chu min hriatchhuahtîr a ni. Chûng olive thingte chu “fapa pahnih, hriak ngah takte” entîr nâna hman a ni a, chu chu ‘lei pum pui Lalpa kianga ding,’ Lal Zerubabela leh Puithiam Lal Josua-te an ni. (Zak. 4:1-3, 14) Pahnihnaah, thuhretu pahnihte chu Mosia leh Elija te tih ang thilmak titute anga târ lan an ni.—Thu Puan 11:5, 6 leh Number 16:1-7, 28-35 leh 1 Lalte 17:1; 18:41-45 nên khaikhin rawh.
Chûng thuziakahte chuan inanna eng nge awm? Bible châng târ lan zawng zawngte chuan fiahna hun khirh tak chhûnga hruaitu, Pathian hriak thihte a kâwk a ni. Chuvângin, Thu Puan bung 11-na thlen famkimnaah, kum 1914-a vâna Pathian Lalram din a nih khân, hruaitu hriak thih unaute chuan kum thum leh a chanve chhûng “saiip puan sinin” thu an hril a ni.
Saiip puan sin chunga an thu hrilhna tâwpah chuan, chûng hriak thihte chu ni thum leh a chanvein a entîr, hun rei lo tê chhûng chu tân ina khung niin, tihhlum angin an awm a ni. An hmêlmate mithmuhah chuan an hnathawh chu a tâwp ta a, chu chuan anmahni dotute chungah lâwmna nasa tak a thlen a ni.—Thup. 11:8-10.
Mahse, hrilh lâwkna thu chu a thleng dikin, ni thum leh a chanve tâwpah chuan thuhretu pahnihte chu an nung leh a. Chûng hriak thihte chu tân in aṭanga an chhuak mai ni lovin, rinawmna vawng tlattute chuan an Lal, Isua Krista hmanga Pathian pêk chanvo pawimawh tak an dawng a ni. Kum 1919-ah, anni chu ni hnuhnûng chhûnga Pathian mite thlarau lam mamawh ngaihsak tûrin “bawi rinawm, fing tak” nia rawngbâwl tûra ruatte zînga mi an ni.—Mt. 24:45-47; Thup. 11:11, 12.
Ngaihvenawm takin, Thu Puan 11:1, 2-na chuan chûng thilthlengte chu thlarau lam biak in tehna, a nih loh leh endikna hun nên a thlunzawm a. Malakia bung 3-na chuan chutiang thlarau lam biak in endikna chungchâng chu a târ lang a, chumi hnuah, then faina hunin a rawn zui nghâl a ni. (Mal. 3:1-4) Chu endikna leh then faina chu engtianga rei nge thawh a nih? Kum 1914 aṭanga kum 1919 tîr lam thleng a awh a ni. Chu hun chhûngah chuan ni 1,260 (thla 42) leh Thu Puan bung 11-a sawi, entîr nei ni thum leh a chanve a tel a ni.
Jehova’n hna ṭha thawk tûra chi thlan bîkte tihthianghlim nâna he thlarau lam tlen faina a ruahman avângin kan va lâwm tak êm! (Tita 2:14) Chu bâkah, chûng fiahna hun chhûnga hruaitu hriak thih rinawmte entawn tûr siam leh entîr nei thuhretu pahnihte anga an rawngbâwlna avângin kan lâwm hle a ni.
(Thu Puan 11:7) Tin, an hriattîrna thu chu an hril zawh huna leilâwt aṭanga sakawlh lo chhuak chho tûr chuan anmahni a do vang a, a hneh ang a, a tihlum ang.
(Thu Puan 11:11) Tin, ni thum leh a chanve hnuah chuan Pathian hnên ata nunna thaw chu an chhûngah a lo lût a, an kein an ding ta a; tichuan, a hmutute chuan an hlau ta êm êm a.
Thlarau Lam Lunghlute Laih Chhuahna
(Thu Puan 10:9, 10) Tin, vântirhkoh hnênah chuan ka va kal a, a hnênah, “Lehkhabu [zial] tê tak tê kha mi pe rawh,” ka ti a. Tin, ani chuan ka hnênah, “La la, ei zo vek rawh; tichuan, i pum chu a tikhâ ang a, i kâah erawh chuan khawizu angin a thlum ang,” a ti a. 10 Tin, vântirhkoh kut ata lehkhabu tê tak tê chu ka la a, ka ei zo vek a; tichuan, ka kâah chuan khawizu angin a thlum a; nimahsela, ka ei zawh veleh ka pum chu a kha zo ta a.
it-2-E 880-881
Lehkhabu Zial
Entîr Neia Hman. Bible-a “lehkhabu zial” tih thu mal hi entîr neia hmanna tam tak a awm a. Ezekiela leh Zakaria chuan a chhûng lam leh pâwn lama ziak lehkhabu zial an hmu ve ve a. Lehkhabu zial chu a chhûng lamah chauh ziah a nih ṭhin avângin, a chhûng lam leh pâwn lama ziahna chuan chûng lehkhabu ziala rorêlna thuziakte chu a ritin, a tamin, a pawimawh hle tih a kâwk thei a ni. (Ezek. 2:9–3:3; Zak. 5:1-4) Thu Puana inlârnaah, lalṭhutphaha ṭhua chuan Pathian Berâm No-in a phelh hma loh chhinchhiahna pasariha chhinchhiah tlat lehkhabu zial chu a kut ding lamin a keng a. (Thup. 5:1, 12; 6:1, 12-14) A hnuah, Johana ngei pawh inlârnaah lehkhabu zial pêk a ni a, ei tûra tih a ni bawk. Chu chu Johana tân thlum hle mah se, a pumah chuan a khâ a ni. Chu lehkhabu zial chu chhinchhiahnaa chhinchhiah a nih loh avângin, chu chu hriatthiam theih thil engemaw a ni ngei ang. Chu lehkhabu ziala thuchah a dawn chuan Johana tân a “thlum” a; mahse, chu thuchah chu sawi chhuak tûra tih a nih anga a sawi chuan atân thil kha tak ang a ni. (Thup. 10:1-11) Ezekiela pawhin chutiang thiltawn chu a nei a, a hnênah ‘ṭahnate, lusûnna te, chungpikna tea’ khat lehkhabu zial chu pêk a ni.—Ezek. 2:10.
(Thu Puan 12:1-5) Tin, thilmak ropui tak vânah a lo lang ta a; hmeichhia, nîa inthuam, a ke hnuaia thla awm, arsi sâwm leh pahniha siam lallukhum khum a lo awm a; 2 ani chuan nau a pai a; nau vei nâin a sa hrâm a. 3 Tin, thilmak dang vânah a lo lang leh a; ngai teh, drakon sen lian pui, lu sarih leh ki sâwm nei, lallukhum pasarih khum a lo awm a. 4 A mei chuan vân arsi hmun thuma ṭhena hmun khat chu a hnûk a, leiah a paih thla ta a; tin, a hrin huna a nau chu a lem theih nân, drakon chu hmeichhe nau hring tûr hmaah chuan a ding reng a. 5 Tin, fapa, hnam zawng zawng chunga thîr tianga rorêl tûr a hring a; tin, a fa chu Pathian hnênah leh a lalṭhutphahah chuan lâk chhohvin a awm ta a.
it-2-E 187 ¶7-9
Nau Vei Nâ
Thu Puan bu-a tirhkoh Johana hmuh inlârnaah, ani chuan vân lam hmeichhia chuan “nau a pai a; nau vei nâin” a ṭap tih a hmu a. Nau lo piang chu “fapa, hnam zawng zawng chunga thîrtianga rorêl tûr” a ni. Chu nausên chu dragon-in lem tum mah se, “a fa chu Pathian hnênah leh a lalṭhutphahah chuan lâk chhohvin a awm ta a.” (Thup. 12:1, 2, 4-6) Pathian lâk chhohvin a awm tih chu hmân lai chuan nau piang hlim chu a hringtu pa pawm atâna a hnêna pêk a nih ṭhin angin, Pathianin ama fapa angin a pawm tihna a ni a. (BIRTH en rawh.) “Hmeichhia” chu Pathian “nupui,” “chung lam Jerusalem,” Krista leh thlarau lam a unaute “nu” a ni.—Gal. 4:26; Heb. 2:11, 12, 17.
Ni e, Pathian vân lam “hmeichhia” chu ṭha famkim a ni a, fa a hrin hunah pawh nâ a tuar tak tak lo vang. Chuvângin, nau vei nâ chuan ‘hmeichhiain’ a fa hrin hun tûr a hnai tawh tih a hria ang a; rei lo têah a hrin a beisei ang tih entîr neiin a târ lang a ni.—Thup. 12:2.
Chu “fapa” chu tu nge ni ang? Ani chu “hnam zawng zawng chunga thîrtianga rorêl” tûr a ni ang. Chu chu Sâm 2:6-9-ah Pathian Messia Lal chungchâng hrilh lâwk a ni a. Mahse, Johana’n he inlârna hi leia Krista a pian a, a thih a, a thawh leh hnu daiha a hmuh a ni. Chuvângin, he inlârna hian thihna ata a thawh leh hnua ‘Pathian ding lama han ṭhu a; chuta chin chu a hmêlmate a kephah nghahchhana siam an nih hma loh nghâk rengtu’ Pathian Fapa, Isua Krista kuta awm Messia Lalram pianna a kâwk niin a lang.—Heb. 10:12, 13; Sâm 110:1; Thup. 12:10.
Bible Chhiar
(Thu Puan 10:1-11) Tin, vântirhkoh chak tak dang pakhat, chhûma inthuam, vân aṭanga lo chhuk ka hmu a; a lûah chuan chhimbâl chu a zâm a, a hmêl chu nî ang a ni a, a kete chu mei ban ang a ni. 2 Tin, a kut chuan lehkhabu tê tak tê hawn sa a keng a; tin, a ke ding lamin tuifinriat a rap a, a vei lamin khawmual a rap a. 3 Tin, sakeibaknei hahum angin aw ring takin a au ta a; tin, a au zawh chuan khawpui ri pasarihte chuan an aw an chhuah ta a. 4 Tin, khawpui ri pasarihte chuan an aw an chhuah veleh ka ziak dâwn a; tichuan, “Khawpui ri pasarihte thusawi chu zêp tlat la, ziak suh,” tiin vân aṭangin aw ka hre ta a. 5 Tin, vântirhkoh, tuifinriat leh khawmuala ding ka hmuha chuan a kut ding lam chu vân lamah a phar a, 6 chatuana nung renga, vân, a chhûnga thil awmte nên, lei, a chhûnga thil awmte nên, tuifinriat, a chhûnga thil awmte nêna siamtu chu chhâlin, “Hun a awm tawh lo vang; 7 nimahsela, vântirhkoh pasarihna thâwm a awm hunah a ham dâwn ṭêpin, Pathian thurûk chu a kim tawh ang, a bâwih zâwlneite hnêna a chanchin ṭha hrilh ang khân,” a ti a. 8 Tin, vân ata aw ka hriat khân mi be leh a, “Tuifinriat leh khawmuala ding vântirhkoh kuta lehkhabu hawn sa saw va la rawh,” a tih ka hria a. 9 Tin, vântirhkoh hnênah chuan ka va kal a, a hnênah, “Lehkhabu tê tak tê kha mi pe rawh,” ka ti a. Tin, ani chuan ka hnênah, “La la ei zo vek rawh; tichuan, i pum chu a tikhâ ang a, i kâah erawh chuan khawizu angin a thlum ang,” a ti a. 10 Tin, vântirhkoh kut ata lehkhabu tê tak tê chu ka la a, ka ei zo vek a; tichuan, ka kâah chuan khawizu angin a thlum a; nimahsela, ka ei zawh veleh ka pum chu a kha zo ta a. 11 Tin, ka hnênah, “Mi tam tak te, hnam tam tak te, ṭawng tam tak te, lal tam tak te chungchâng chu i hril leh ang,” an ti a.
DECEMBER 16-22
PATHIAN THU AṬANGA RO HLUTE | THU PUAN 13-16
“Sakawlh Ṭihbaiawm Tak Chu Hlau Suh”
(Thu Puan 13:1, 2) Tichuan, tuifinriat ṭiauphovah chuan a ding ta a. Tin, sakawlh ki sâwm leh lu sarih nei, tuifinriata lo chhuak ka hmu a, a kîahte chuan lallkukhum sâwm a awm a, a lûahte chuan Pathian sawichhiatna hmingte a awm bawk a. 2 Tin, ka sakawlh hmuh chu keitê ang a ni a; a kete chu savawm ke ang a ni a, a kâ chu sakeibaknei kâ ang a ni; tin drakon chuan a hnênah a thiltihtheihna leh a lalṭhutphah leh thuneihna nasa tak a pe a.
Jehova Chu “Thil Inthup Puangtu” A Ni
6 C.E. kum zabi khatna tâwpah, tho leh Isua chuan tirhkoh Johana hnênah inlârna inzawm ropui tak tak a hmuhtîr a. (Thup. 1:1) Inlârna a hmuhte zînga pakhatah, Johana chuan drakon anga târ lan Diabola, tuifinriat zau tak kama ding chu a hmu a ni. (Thu Puan 13:1, 2 chhiar rawh.) Johana chuan sakawlh ṭihbaiawm tak tuifinriat aṭanga lo chhuak a, Diabola hnên aṭanga thu neihna nasa tak dawng pawh a hmu bawk a. A hnuah vântirhkoh chuan Johana hnênah Thu Puan 13:1-a târ lan sakawlh lem, a nih loh leh a lim sakawlh sen tak chungchâng a sawi a, chu sakawlhin a neih lu sarih chuan “lal pasarih,” a nih loh leh sawrkâr pasarih a entîr thu a hrilh a ni. (Thup. 13:14, 15; 17:3, 9, 10) Johana’n Thu Puan bu a ziah lai chuan, chûng lalte zînga panga chu an tlâwm tawh a, pakhat chuan ro a rêl mêk a, a dang pakhat chu “a lo la awm rih lo.” Chûng lalram, a nih loh leh khawvêl awptu sawrkârte chu tute nge ni? Thu Puan bu-a târ lan sakawlh lute chu a mal malin i lo ngaihtuah ang u. Daniela thuziakin chûng ramte chungchâng hriat thiamna kimchang lehzual min pêk belh dân leh a châng chuan chûng lalramte an lo lan hma kum zabi tam taka min pêk lâwk dân kan ngaihtuah bawk ang.
(Thu Puan 13:11) Tin, sakawlh dang leia lo chhuak ka hmu a; berâm no kî ang kî pahnih a nei a, drakon ṭawng angin a ṭawng a.
(Thu Puan 13:15) Tin, sakawlh lim chu a ṭawng theihna tûr leh, sakawlh lim chibai bûk lo apiang a tihhlumtîr theih bawkna tûrin, sakawlh lim hnênah chuan thâwkna a pêk phal a ni.
re-E 194 ¶26
Ram Sakawlh Pahnih Nêna Inbeihna
26 Chu chu engtin nge a nih theih? Anglo-American Khawvêl Thuneitu—hi sakawlh hmasa zâwk, a lu sarihna kha a ni a; mahse, thil dang lam bîk tak a ti a! Inlârnaa he sakawlh a hranga târ lanna hian khawvêlah a hranga a chêt dânte hre thiam lehzual tûrin min ṭanpui a ni. Entîr neia ki pahnih nei he sakawlh hi zalên taka a hranga awm si; mahse, politic thuneihnate hmang dûn ram pahnihte an ni a. “Berâm no kî ang” a ki pahnihte chuan ani chu ngilnei tak leh mi pawi khawih lo, mi zawng zawngin an rawn pan tûr sawrkâr fing tak angin a târ lang a ni. Mahse, a rorêl dân an pawm duh lohna hmun apiangah tihluihna, tihṭhaihna, leh tharum thawhna hial pawh hmangin “drakon ṭawng angin” a ṭawng a. Mite chu Pathian Berâm kuta awm Pathian Lalram hnuaia intukluh aiin, drakon lian pui, Setana hlâwkna tûrte ûm zâwk tûrin a fuih a ni. Hnam hmangaihna avânga inṭhen darhna leh inhuatnate awmtîrin, sakawlh hmasa chu chibai a bûktîr a ni.
re-E 195 ¶30-31
Ram Sakawlh Pahnih Nêna Inbeihna
30 Khawvêl chanchin chuan he milem hi Britain leh United States-te rawtna, fuihna leh thlâwpna avânga lo awm pâwl a ni tih a tichiang a, atîrin, League of Nations tia hriat a ni. A hnuah, Thu Puan bung 17-ah, nunna nei leh thaw thei sakawlh sen anga a hranga awmin, chhinchhiahna dangin a lo lang ang. Khawvêl pum huap he pâwl hian amah chauh chu mihringte chunga remna leh himna thlen thei awm chhun a ni tiin chapo takin ‘thu a sawi’ a. Mahse, dik tak chuan, he pâwl hi a pâwla tel ram hrang hrangte invauna leh insawichhiatna hmun a ni a. A thuneihna hnuaia awm duh lo ram leh hnam tawh phawt chu hnâwlin emaw, hremin emaw a vau ṭhîn a ni. League of Nations chuan a ngaih dân pawm duh lo ramte chu a hnawt chhuak hial a. Hrehawm nasa tak a inṭan hunah, he sakawlh lema râlthuam ang a “ki” chuan tihchhiat hna a rawn thawk dâwn a ni.—Thu Puan 7:14; 17:8, 16.
31 Khawvêl Indopui II-na aṭangin, sakawlh lem—tûna United Nations organization anga ding mêk—chuan a tak takin mite chu a tihlum tawh a ni. Entîr nân, kum 1950 khân, UN sipai pâwl chu North Korea leh South Korea inbeihnaah a inrawlh a. UN sipai pâwl chuan South Korea mite nên ṭang dûnin, North Korea-a awmte leh China rama awm mi 1,420,000 an tihlum nia chhût a ni. Chutiang bawkin, kum 1960 aṭanga kum 1964 thleng khân, United Nations sipai pâwl chu Congo (Kinshasa) ramah an che leh a. Chu bâkah, pope Paul VI-na leh John Paul II-nate pawh tiamin, khawvêl hruaitute chuan he sakawlh lem hi remna leh muanna atâna mihringte beisei theih ṭha ber leh hnuhnûng ber a ni tih an la nemnghet zêl a ni. Mihringte hian chu sakawlh lem chu an be lo a nih chuan mihring zawng zawng hian mahni chhiatna an inthlen ang tih khauh takin a sawi bawk. Chuvângin, anni chuan chu sakawlh lem duh dân anga awm lo va, amah chibai bûk duh lo zawng zawngte chu entîr neiin an tihlum a ni.—Deuteronomy 5:8, 9.
(Thu Puan 13:16, 17) Tin, mi zawng zawng a lian a têin, a hausa a retheii, bâwih leh bâwih lo pawh, an kut ding lamah emaw, an chalah emaw chhinchhiahna a neihtîr hlawm a; 17 chhinchhiahna—sakawlh hming emaw, a hming number emaw—neite chauh lo chuan tu mân engmah an lei leh an hralh theih loh nân.
Jehova Thu Chu A Nung
Thu Puan Bu Aṭanga Thu Pawimawh Hrilhfiahna—II
13:16, 17. ‘Lei leh hralh’ ang chi, kan nî tin thiltihah chuan harsatna tâwk mah ila, sakawlh chu kan nun kan thununtîr tûr a ni lo. ‘Kan kut emaw, kan chal emawa sakhawlh chhinchhiahna’ neihna chu sakawlh chu kan thiltih emaw, kan ngaihtuahna emaw kan thununtîr tihna tluk a ni.
Thlarau Lam Lunghlute Laih Chhuahna
(Thu Puan 16:13, 14) Tin, drakon kâ aṭang leh, sakawlh kâ aṭang leh, zâwlnei der kâ aṭang chuan thlarau bawlhhlawh pathum, chungû ni âwm tak lo chhuak ka hmu a; 14 chûng chu ramhuai thlarau, thilmak ti ṭhînte an ni; anni chu Pathian Engkimtitheia ni ropuia indonaa hruai khâwm tûrin, khawvêl zawng zawnga lalte hnênah an kal a.
Jehova Thu Chu A Nung
Thu Puan Bu Aṭanga Thu Pawimawh Hrilhfiahna—II
16:13-16. “Thlarau bawlhhlawh” tih chuan Pathian thinurna berhbu pasarih leih buaknain leia lalte rilru a hneh loh nân leh Jehova do tûra a hruai zâwk theih nâna ramhuaite thu thehdarh chu a entîr a ni.—Mt. 24:42, 44.
(Thu Puan 16:21) Tin, rial lian tak, talent tluk laia rit ṭheuh, vân aṭangin mihringte chungah a tla a: tin, mihringte chuan riala hremna avâng chuan Pathian an sawichhe ta a; chu hremna chu a nasa êm êm si a.
‘In Chhan Chhuahna Tûr Chu A Hnai’!
9 Hrehawm nasa tak chu “ram chanchin ṭha” hrilhna hun a ni lo vang. Chu hunah chuan thu hrilhna a tâwp tawh ang a. “Tâwpna” lo thlen hun a ni ang! (Mt. 24:14) Pathian mite chuan mi zawng zawngte chunga nghawng nei tûr rorêlna thuchah khauh tak chu huaisen takin an puang chhuak ang. Chu thuchah chu Setana khawvêl suaksual tihboral chimihna chungchâng a ni thei ang. Bible chuan chu thuchah chu rial nên a khaikhin a, heti hian a sawi a ni: “Rial lian tak talent tluk laia rit ṭheuh, vân aṭangin mihringte chungah a tla a: tin, mihringte chuan riala hremna avâng chuan Pathian an sawichhe ta a; chu hremna chu a nasa êm êm si a,” tiin.—Thup. 16:21.
Bible Chhiar
(Thu Puan 16:1-16) Tin, pindan chhûngnung aṭang chuan aw ring takin, vântirhkoh pasarihte hnênah chuan, “Kal ula, Pathian thinurna berhbute chu leiah leih baw rawh u,” a tih ka hria a. 2 Tin, a hmasa ber chu a kal a, a berhbu chu leiah a leih bua a; tichuan, sakawlh chhinchhiahna neite leh a lem chibai bûktute chungah chuan, pân chhia na takah a chang ta a. 3 Tin, a pahnihna chuan a berhbu chu tuifinriatah a leih bua a; tichuan, mitthi thisen angin thisenah a chang ta a; chutichuan, thil nung tinrêng tuifinriata awmte chu an thi ta vek a. 4 Tin, a pathumna chuan a berhbu chu luiahte leh tuikhurahte a leih bua a; tichuan, thisenah a chang ta a. 5 Tin, tui vântirhkoh chuan, “Nang Mi Thianghlim, hetianga ro i rêl avâng hian, nang awm mêk leh awm tawh, i fel e. 6 Anni chuan mi thianghlimte leh zâwlneite thisen an chhuah a, tin, nangin in tûra thisen vêk i pêk thung hi; in tlâk an ni rêng e,” a tih ka hria. 7 Tin, maichâm chuan, “A ni, aw Lalpa Pathian, Engkimtithei, i rorêlte chu a dikin a fel a ni,” a tih ka hria a. 8 Tin, a palina chuan a berhbu chu nîah a leih bua a; tichuan, nî chu meia mihring em ût tûrin thiltihtheihna an pe a. 9 Chutichuan, mite chu sa tak em uhin an awm a, chûng hremna chunga thuneitu Pathian hming chu an sawichhia a, amah chawimawi tûrin an sim chuang lo. 10 Tin, a pangana chuan a berhbu chu sakawlh lalṭhutphahah a leih bua a; tichuan, a ram chu a lo thim ta vek a; tin, an nat avângin an lei an seh a, 11 an nâte leh an pânte avângin vân Pathian chu an sawichhia a; an thiltihte chu an sim chuang lo. 12 Tin, a parukna chuan a berhbu chu tuipui, Euphrates-ah chuan a leih bua a; tichuan, ni chhuahna lam aṭanga lal lo kal tûrte tâna kawng chu peih sa a lo nih theih nân, a tui chu a kangchat ta a. 13 Tin, drakon kâ aṭang leh sakawlh kâ aṭang leh zâwlnei der kâ aṭang chuan thlarau bawlhhlawh pathum, chungû ni âwm tak lo chhuak ka hmu a; 14 chûng chu ramhuai thlarau, thilmak ti ṭhînte an ni; anni chu Pathian Engkimtitheia ni ropuiah indonaa hruai khâwm tûrin, khawvêl zawng zawnga lalte hnênah an kal a, 15 (Ngai teh, rûkru angin ka lo kal dâwn e; inringa puan veng chu a eng a thâwl e; chutilochuan, saruakin a lêng ang a, a zahmawh an hmu dang ang e), 16 hmun pakhat, Hebrai ṭawnga Har–Magedon an tihah chuan an hruai khâwm ta a.
DECEMBER 23-29
PATHIAN THU AṬANGA RO HLUTE | THU PUAN 17-19
“Indo Zawng Zawng Titâwptu Tûr Pathian Indona”
(Thu Puan 19:11) Tin, vân inhawng ka hmu a; tin, ngai teh, sakawr vâr leh a chunga chuang, Rinawm-leh-Diktaka an tih chu ka hmu bawk a; ani chuan fel takin ro a rêl a, mi a do ṭhîn.
(Thu Puan 19:14-16) Tin, vâna sipaihote chuan puan zai sîn vâr tak, fai tak sinin, sakawr vâr chungahte chuangin an zui a. 15 Tin, a kâ aṭangin khandaih hriam tak a chhuak a, chu chu hnam tin a sahna tûr a ni; tin, thîrtiangin an ro a rêl ang a; Pathian Engkimtitheia thinur nasatna grêp sâwrna khurah chuan a rap sâwr ang. 16 Tin, a puanah leh a malpuiah chuan, “Lalte Lal leh Hotute Hotu,” tia hming ziak a awm a.
Armageddon—Indo Zawng Zawng Titâwptu Tûr Pathian Indona Chu
Mi suaksualte’n thuneihna an chan chhûng chuan, mi dikte chuan remna leh muanna an nei thei lo vang. (Thufingte 29:2; Thuhriltu 8:9) Dik tak chuan, mi hlemhlête leh mi suaksualte chu an thil sual tih kan simtîr thei lo. Chuvângin, remna leh rorêl dikna tluantling chu mi suaksualte tihboral an nih hnuah chauh a awm thei ang. Solomona chuan: “Mi suaksualte chu mi felte tlanna an ni,” tih a ziak a ni.—Thufingte 21:18.
Pathian chu Rorêltu a nih avângin, kawng engkimah mi suaksualte chu dik taka rorêlsak an ni ang tih kan chiang thei a ni. “Lei chung zawng zawng Rorêltu chuan fel takin a ti dâwn lâwm ni?” tiin Abrahama chuan a zâwt a. A chhânna hmuh chhuah chu hei hi a ni: Jehova chuan englai pawhin thil dik a ti a ni, tih chu! (Genesis 18:25) Chu bâkah, Bible chuan Jehova’n mi suaksualte tihboralnaah lâwmna rêng a neih loh thu min hrilh a; a loh theih loh chinah chauh a tiboral ṭhîn a ni.—Ezekiela 18:32; 2 Petera 3:9.
it-1-E 1146 ¶1
Sakawr
Tirhkoh Johana hmuh entîr nei inlârnaah, chawimawia awm Isua Krista chu sakawr vâr chunga chuang ang leh sakawr vârte chunga chuang vân sipaite nêna lo kal anga târ lan a ni a. Chu inlârna chuan Johana chu Krista’n a Pa leh a Pathian Jehova aiâwhin hmêlma zawng zawng a do vang a, chu chuan indona fel leh dik a entîr tih a hriattîr a ni. (Thup. 19:11, 14) Chumi hmain, sakawr chi hrang hrang leh an chhuahnate chuan lal nia Krista hma lâkna leh a hnua chhiatna lo awmte chu a entîr a ni.—Thup. 6:2-8.
(Thu Puan 19:19, 20) Tin, sakawlh te, leia lalho te, an sipaiho te, sakawr chunga chuang kha do tûr leh a sipaiho do tûra an inkhâwm ka hmu a. 20 Tin, sakawlh chu an man a; zâwlnei der, sakawlh chhinchhiahna nei leh a lem chibai bûktute a bum ṭhinna thilmak a mithmuha titu kha an man tel a; an pahnih chuan kâta kâng meidîlah chuan a nung chungin an paih a.
re-E 286 ¶24
Râl Do Thiam Lal Chuan Armageddon-ah Hnehna A Chang
24 Setana politic pâwlin a entîr tuifinriat aṭanga lo chhuak lu sarih leh ki sâwm nei sakawlh chu zâwlnei der, khawvêl thuneitu pasarihna rualin a awm tawh lo va. (Thup. 13:1, 11-13; 16:13) A la “nun” laiin, a nih loh leh lungrual taka leia Pathian mite a dodâl mêk laiin, ani chu ‘meidîla’ paih a ni. Chu chu meidîl tak tak a ni em? Sakawlh leh zâwlnei derte chu ramsa tak tak an nih lo ang bawkin, meidîl tak tak a ni lo. Chu aiin, kîr lehna awm lohna hmun, borâl pumhlûmna leh tâwpna entîrna a ni. Hei hi a hnua, thihna leh Mitthi Khua bâkah, Diabola ngei pawh paih thlâkna hmun tûr a ni. (Thup. 20:10, 14) Chu chu mi suaksualte chatuana nghaisakna hmun a ni lo, chutiang hmun a awm tih ngaih dân chu Jehova tâna thil tenawm tak a ni si a.—Jeremia 19:5; 32:35; 1 Johana 4:8, 16.
(Thu Puan 19:21) mi dangte chu sakawr chunga chuang khandaih, a kâ aṭanga chhuak khân sahhlum an ni ta a; sava zawng zawngte chu an sate eiin an puar ta vek a.
re-E 286 ¶25
Râl Do Thiam Lal Chuan Armageddon-ah Hnehna A Chang
25 Chutiang bawkin, sawrkâr pêng ni chiah lo mah se, he khawvêla siam ṭhat theih tawh loh nungchang chhe taka tel zawng zawngte chu ‘sakawr chunga chuanga khandaiha sahhlum’ an ni a. Isua chuan chûng mite chu thi tlâk niin a puang ang. An chungchâng thua meidîl târ lan a nih loh avângin, anni chu tholeh tûrin kan beisei tûr a ni em? Chutih huna thi tûra Jehova rorêlsakte chu an tholeh ang tia sawi lanna pakhatmah a awm lo. Isua ngeiin a târ lan angin, “berâm” ni lo zawng zawngte chu “kumkhaw hremnaah” tih awmze nei “kumkhaw mei, Diabola leh a tirhkohte tân an buatsaihah” an kal ang. (Mt. 25:33, 41, 46) Chu chu “Pathian ngaihsak lo mite rorêl leh boral nî” vâwrtâwp a ni.—2 Pet. 3:7; Nahum 1:2, 7-9; Mal. 4:1.
Thlarau Lam Lunghlute Laih Chhuahna
(Thu Puan 17:8) Sakawlh i hmuh kha a awm tawh zet a, a awm leh ta lo va; tin, leilâwt aṭangin a lo chhuak chho vang a, boralnaah a kal ang. Tin, leia awmte, leilung pian tirh ata Nunna Bua hming ziak lohte chuan sakawlh chu an hmuh hunah, a awm tawh zet a, a awm leh ta lo va, a lo kal leh dâwn chu mak an la ti ang.
re-E 247-248 ¶5-6
Thurûk Mak Tak Chu Laihlan A Ni
5 “Sakawlh . . . kha.” Ni e, chu chu January 10, 1920 aṭang khân League of Nations angin a lo awm tawh a, ram 63-te chu ṭum khatah emaw, ṭum dangah emaw an tel a ni. Mahse, Japan, Germany, leh Italy te chu an inhnûk dâwk leh a, tûn hmaa Soviet Union lo ni tawh pawh League of Nations aṭangin a chhuak a ni. September 1939-ah, German rama Nazi thuneitu chuan Khawvêl Indopui II-na a chawk chhuak a. League of Nations chuan khawvêlah remna a vawn reng theih loh avângin, ani chu engmah ti thei lova awmin leilâwtah tla ang a ni. Kum 1942-ah chuan, ani chu lo awm tawh ṭhîn ang lek a ni a. Chumi hma emaw, hnu deuhah emaw ni lovin, a hun dik takah Jehova’n a mite hnênah chu inlârna awmze dik tak chu kimchang takin a hrilh a! New World Theocratic Assembly-ah N. H. Knorr-a chuan chu hrilh lâwkna nêna inmilin chu “sakawlh chu . . . a awm leh ta lo,” tiin a puang a ni. Tichuan, heti hian a zâwt a, “League of Nations chu khuarkhurumah a awm reng ang em?” Thu Puan 17:8-a thu chu la chhuakin, heti hian a chhâng a ni: “Khawvêl ram inzawm khâwm pâwl chu a lo ding chhuak leh ang,” tiin. Chutiang chiaha a lo thlen avângin Jehova hrilh lâwkna Thu dikzia a lang a ni!
Leilâwt aṭangin a lo chhuak
6 Sakawlh sen chu leilâwt aṭangin a lo chhuak tak tak a ni. June 26, 1945 khân, San Francisco, U.S.A-ah ram 50-te chuan United Nations organization thuthlung an pawm thu ropui takin an puang zâr a. Chu pâwl chu “khawvêl puma remna leh himna vawng” tûra din a ni. League of Nations leh UN chuan inanna tam tak an nei a. The World Book Encyclopedia chuan: “UN hian Khawvêl Indopui I-na zawha din League of Nations nên inanna ṭhenkhat a nei a . . . UN dintu ram tam tak chu League of Nations dintute bawk kha an ni a. League of Nations ang bawkin, UN pawh hi ram leh ram inkâra inremna vawng nghet tlat tûra din a ni. UN-a thuneihna nei lehzual ramte chuan League of Nations-a thuneihna nei lehzual ramte nên inanna tam tak an nei,” tiin a sawi. Chuvângin, UN chu sakawlh sen lo chhuak leh a ni tih a chiang hle. Chu pâwla ram 190 vêl chu League of Nations-a tel ram 60-te ai chuan an tam hle a; dinhmun chelh hmasatu aiin mawhphurhna tam tak a vuan bawk a ni.
(Thu Puan 17:16, 17) Ki sâwm i hmuh leh sakawlh ngei chuan nawhchizuar chu an hua ang a, engmah nei lo leh saruakin an siam ang a, a sa pawh an ei ang a, meiin an hâl ral ang. 17 Pathian thute chu a thlen hma loh chuan a duh zâwng an tihna tûr leh, thu khat an lo vuakna tûr leh, an ram chu sakawlh hnênah an pêkna tûrin Pathianin an thinlungah a tîr si a.
Jehova Chuan “Thil Lo Awm Lawk Tur” A Puang Chhuak
17 Mahse, sakhaw dik lo chu zawi zawiin a ral mai dâwn lo. Pathianin rorêltute thinlunga hna a thawhtîr hma loh chu Nawhchizuar chuan thuneihna a la nei reng ang a, a duh zâwng anga awmtîr tumin lalte chu a thlêm zêl dâwn a ni. (Thu Puan 17:16, 17 chhiar rawh.) Nakin lawkah, Jehova chuan United Nations-in an ai a awh Setana kaihhruai khawvêl politics hruaitute chu sakhaw dik lote bei tûrin a tîr ang a. A thununna chu tichhiain, a hausakna chu a rawk vek ang. Kum sâwmbi kal ta-ahte chuan chutiang thil a thlen mai chu a beiseiawm lo hle pawh a ni thei. Tûnah chuan, nawhchizuar chu sakawlh sen tak chungah chuan a ṭhu nghet tawh lo va. Mahse, a ṭhutna ata chu zawi zawiin a tawlh thla lo vang a, râwng tak leh rang taka paih thlâk a ni zâwk ang.—Thup. 18:7, 8, 15-19.
Bible Chhiar
(Thu Puan 17:1-11) Tin, vântirhkoh pasarih, berhbu pasarih kengte zînga pakhat chuan mi bia a, “Hawh teh, tui tam taka ṭhu nawhchizuar ropui tak hremna chu ka entîr ang che; 2 leia lalte chuan ani chu an ngai ṭhîn a, leia awmte pawh chu a mi ngaih chînna uain chuan hrai ruihin an awm ṭhîn,” a ti a. 3 Chutichuan, ani chuan thlarauvin thlalêrah mi kalpui a; tin, Pathian sawichhiatna hminga khat, lû sarih leh ki sâwm nei sakawlh sen tak chunga chuang hmeichhia ka hmu a. 4 Chu hmeichhia chuan puan sen duk leh sen lâr a sin a, rangkachak leh lung man tam leh tuikeplungin a inchei a, rangkachak no, thil tenawm, a mi ngaih chînna thil bawlhhlawha khat a keng a, 5 a chalah chuan thurûk, ‘Babulon Khaw Ropui, Leia Nawhchizuarte leh Thil Tenawmte Nu,’ tia hming ziak a awm a. 6 Tin, chu hmeichhia chu mi thianghlimte thisen leh Isua martarho thisena ruiin ka hmu a. Ka hmuh veleh mak ka ti êm êm mai a. 7 Tichuan, vântirhkoh chuan ka hnênah, “Eng vângin nge mak i tih? Kha hmeichhia leh a phurtu sakawlh, lusarih leh ki sâwm nei thurûk chu ka hrilh ang che. 8 Sakawlh i hmuh kha a awm tawh zet a, a awm leh ta lo va; tin, leilâwt aṭangin a lo chhuak chho vang a, boralnaah a kal ang. Tin, leia awmte, leilung pian tirh ata Nunna Bua hming ziak lohte chuan sakawlh chu an hmuh hunah, a awm tawh zet a, a awm leh ta lo va, a lo kal leh dâwn chu mak an la ti ang. 9 Hetah hian fin thiam a ṭûlzia a lang. Lu sarihte chu hmeichhe ṭhutna tlâng sarihte chu an ni. 10 Lal pasarih pawh an ni a; pangate chu an tlâwm ta a, pakhat chu a la awm a, pakhat chu a lo la awm rih lo va; a lo awm hunah chuan rei lo tê a awm tûr a ni. 11 Tin, sakawlh, awm tawh zet a, awm leh ta lova ngei pawh kha a pariatna a ni a, pasarihte zînga mi kha a ni nghe nghe a; boralnaah a la kal ang.
DECEMBER 30–JANUARY 5
PATHIAN THU AṬANGA RO HLUTE | THU PUAN 20-22
“Ngai Teh, Thil Engkim Ka Siam Thar E”
(Thu Puan 21:1) Tin, vân thar leh lei thar ka hmu a; vân hmasa leh lei hmasa chu an boral tawh a, tuifinriat pawh a awm tawh lo a ni.
re-E 301 ¶2
Vân Thar leh Lei Thar
2 Johana hun hma kum za tam takah khân, Jehova chuan Isaia hnênah: “Ngai teh u, vân tharte leh lei thar ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang,” tiin a sawi a. (Is. 65:17; 66:22) Chu hrilh lâwkna chu atîrin Juda rinawmte Babulon sala kum 70 an tân hnu, B.C.E. 537-a Jerusalema an kîr leh khân a thleng famkim a. Chu din thar lehnaah, anni chuan rorêlna thar “vân thar” hnuaia awm pâwl thianghlim “lei thar” an din a ni. Mahse, tirhkoh Petera’n: “Nimahsela, a thutiam ang chuan vân tharte leh lei thar, a chhûnga felna awmte chu kan beisei a ni,” tia sawiin, thlen famkimna dang awm tûr pawh a târ lang a ni. (2 Petera 3:13) Johana chuan chu thutiam chu Lalpa nî chhûngin a thleng famkim tih a târ lang a. Setana leh a ramhuaite thununna hnuaia awm Setana khawvêla rorêlna “vân hmasa leh lei hmasa” chu a boral tawh ang. Mi sual leh hel hmang mihringin a entîr “tuifinriat” so but but pawh a awm tawh lo vang. Chu aiin, “vân thar leh lei thar”—Pathian Lalram sawrkâr thar hnuaia lei lam pâwl thar a awm tawh zâwk ang.—Thu Puan 20:11 nên khaikhin rawh.
(Thu Puan 21:3, 4) Tin, lalṭhutphah aṭangin aw ring takin, “Ngai te, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang. 4 An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” a tih ka hria.
w13-E 12/1 11 ¶2-4
“Ngai Teh, Thil Engkim Ka Siam Thar E”
“[Pathianin] an mit ata mittui zawng zawng a hrufai ang.” (Thu Puan 21:4) Eng ang mittui nge a hrûkfai ang? Hlim avânga tla mittui leh kan mit vênghimtu mittuite an ni lo. Heta Pathian thutiam hian hrehawm tawrhna leh lungngaihna avânga tla mittui a kâwk zâwk a ni. Pathian chuan chutiang mittui chu a hrufai mai ni lovin, ṭûl lo taka mittui tlâktîrtu hrehawm tawrhnate leh lungngaihnate chu a nuaibo vek ang.
“Thihna a awm leh thei tawh lo vang.” (Thu Puan 21:4) Hmêlma thihna aia mittui titlatu nasa zâwk eng dang nge awm? Jehova chuan thuâwih mihringte chu thihna khur ata a chhan chhuak tawh ang. Engtin nge? Thihna thlentîrtu dik tak: Adama hnên aṭanga kan rochun sual nuai bona hmangin a ni ang. (Rom 5:12) Jehova chuan Isua tlanna inthawina hmangin thuâwih mihringte chu ṭhat famkimnaah a hlângkai ang a. Tichuan, hmêlma hnuhnûng ber thihna chu ‘tihbovin’ a awm tawh ang. (1 Korinth 15:26) Mi rinawmte chu Pathian thiltum angin hrisêlna ṭha famkim neiin chatuanin an nung thei tawh ang.
“Nat te pawh a awm leh tawh hek lo vang.” (Thu Puan 21:4) Eng ang natnate nge awm tawh lo vang? Sual leh ṭhat famkim lohna avânga lo awm rilru lam leh tisa lam natna zawng zawng bâkah, mi maktaduai tam takte nun tihrehawmtute chu a awm tawh lo vang.
(Thu Puan 21:5) Tin, lalṭhutphaha ṭhu chuan, “Ngai teh, thil engkim ka siam thar e,” a ti a. Tin, “Ziak rawh, hêng thu hi a rinawmin a dik si a,” a ti a.
Jehova, Thutak Pathian Chu
14 Jehova’n a Thu hmanga thil min hrilhte chu kan la urhsûn hle tûr a ni. A chungchângah thudik a sawi reng a, a tih tum chu a ti ngei ngei dâwn a ni. Pathian rinchhan chhan tûr tam tak kan nei a. Jehova’n “Pathian hre lo mi leh kan Lalpa Isua chanchin ṭha âwih lo mite chunga phuba” a lâk tûr thu a sawi hi kan ring nghet tlat thei a ni. (2 Thes. 1:6-8) Jehova’n felna ûmtute a hmangaih thu a sawi te, rinna lantîrtute hnênah chatuan nunna a pêk tûr thu a sawi te, leh natna, ṭahna, leh thihnate a nuaibo dâwn tih a sawi te pawh kan ring tlat thei a ni. Jehova chuan he a thutiam hnuhnûng ber hi innghahna tlâk a nihzia târ lan nân, tirhkoh Johana hnênah: “Ziak rawh, hêng thu hi a rinawmin a dik si a,” tiin thu a pe a ni.—Thu Puan 21:4, 5; Thufingte 15:9; Johana 3:36.
Thlarau Lam Lunghlute Laih Chhuahna
(Thu Puan 20:5) Mitthi dangte erawh chu kum sângkhat a vei hma loh chuan an la nung rih lo va. Chu chu thawhlehna hmasa ber chu a ni.
it-2-E 249 ¶2
Nunna
Pathianin Adama hnêna a thupêkah khân, thu a âwih chuan a thi lo vang tih a hrilh a. (Gen. 2:17) Chuvângin, mihringte hmêlma hnuhnûng ber thihna tihbova a awm hun chuan, thuâwih hmihringte chungah sual hnathawh thihna a thleng tawh lo vang a. Kumkhuain an nung tawh ang. (1 Kor. 15:26) Thihna tihbova a awm hun tûr chu Thu Puan bu-a sawi angin, Krista kum 1,000 rorêl tâwpah a ni ang. Thu Puan bu-ah chuan Krista nêna lal leh puithiam ni tûrte chungchângah “kum sângkhat atân Krista nên rorêlin an awm a,” tia sawi a ni. ‘Kum sângkhat a vei hma loh’ la nung rih lo “mitthi dangte erawh chu” kum sângkhat tâwpa nung tûrte an ni; mahse, chu chu leilâwt ata Setana chhuah a nih a, mihringte a fiah hmain a ni ang. Kum sângkhat tâwpah chuan, leia mite chu Adama leh Evi te’n thil sual an tih hmaa an dinhmun ang khân, mi ṭha famkim an ni tawh ang. Chutih hunah chuan, anni chuan nun ṭha famkim an nei tak tak tawh ang a. Leilâwt ata hun rei lotê atân chhuah a nih huna Setana fiahna pal tlangtute chuan chatuan nun an chên thei tawh ang.—Thup. 20:4-10.
(Thu Puan 20:14, 15) Tin, Thihna leh Mitthi Khuate chu meidîlah an paih a. Chu chu thih hnihna chu a ni - meidîl chu. 15 Tu hming pawh Nunna Bua ziak an hmuh loh chuan meidîlah an paih bawk a.
it-2-E 189-190
Meidîl
He ṭawngkam hi Thu Puan bu-ah chauh a chuang a, entîrna a ni tih a chiang hle. Bible ngeiin: “Chu chu thih hnihna chu a ni—meidîl chu,” tia sawiin chu entîrna awmzia chu a hrilhfiah a ni.—Thup. 20:14; 21:8.
Meidîlin a entîr chu Thu Puan bu-a chumi ṭawngkam sawi lanna a chung leh hnuai thute aṭangin a chiang lehzual a ni. Thihna chu, chu meidîla paih nia sawi a ni a. (Thup. 19:20; 20:14) Thihna chu a kâng tak tak thei lo tih a chiang a. Chu bâkah, hmuh theih loh thlarau thil siam Diabola chu meidîla paih a ni bawk. Thlarau a nih avângin, ani chu mei tak taka tihkan theih a ni lo.—Thup. 20:10; Ex. 3:2 leh Ro. 13:20 nên khaikhin rawh.
Meidîl chuan “thih hnihna” a entîr avângin, leh Thu Puan 20:14-nain “Thihna leh Mitthi Khuate chu” chutah chuan paih an ni tia a sawi avângin, meidîl chuan Adama hnên aṭanga mihringte rochun thihna emaw (Rom 5:12), Hades (Mitthi Khuate) emaw a entîr thei lo tih a chiang a ni. Bible-ah hian Adama thlentîr thihna leh Mitthi Khuate’n (Seol) an chhûnga mitthi awmte chu an chhuahtîr tia a târ lan anga ‘meidîlin’ a chhuahtîr tia târ lanna pakhat mah a awm loh avângin, meidîl chuan sût lêt leh theih tawh loh thihna chi khat a entîr a ni ngei ang. (Thup. 20:13) Chuvângin, “Nunna Bua” hming ziah lohte chu inchhîrna nei lova Pathian lalchungnunna dodâltute niin, meidîla paih an ni a, chu chu chatuana boralna, a nih loh leh thih hnihna a ni.—Thup. 20:15.
Bible Chhiar
(Thu Puan 20:1-15) Tin, vântirhkoh, leilâwt chabi leh khaidiat lian pui kengin, vân ata lo chhuk ka hmu a. 2 Tin, drakon, rûlpui tar chu (chu chu Diabola leh Setana a ni) a man a, kum sângkhat atân a phuar a, 3 leilâwtah chuan a paih lût a, a khâr khum a, kum sângkhat chu a vei hma loh chuan hnam tin a bum leh tawh lohna tûrin a châr hnan ta a; chu mi hnuah chuan rei lo tê atân chhuah leh rih tûr a ni. 4 Tin, lalṭhutphahte ka hmu a, a chungah mi an ṭhu a, an hnênah chuan rorêlna an pe a; tin, Isua hriattîrna thu avâng leh Pathian thu avânga lu tante thlarau leh sakawlh leh a lem chibai bûk lo va, an chalah emaw, an kutah emaw chhinchhiahna nei lote thlarau chu ka hmu bawk a; chûngho chu an lo nung a, kum sângkhat atân Krista nên rorêlin an awm a. 5 Mitthi dangte erawh chu kum sângkhat a vei hma loh chuan an la nung rih lo va. Chu chu thawhlehna hmasa ber chu a ni. 6 Thawhlehna hmasa bera telte chu an engthâwlin an thianghlim a ni; chûngho chungah chuan thih hnihna chuan thu rêng a nei lo va, Pathian leh Krista puithiamte an ni ang a, amah nên kum sângkhat rorêlin an awm zâwk ang. 7 Tin, kum sângkhat chu a vei hunah chuan, Setana chu a tânna ata chu chhuahin a awm ang a, 8 lei kil lia hnam te, Goga leh Magoga chu buma indonaa hruai khâwm tûrin a kal chhuak ang; chûngho tamzia chu tuifinriata ṭiauvut ang mai an ni. 9 Tin, lei vâng lam dâpin an kal chho va, mi thianghlimte riah hmun leh khaw duhawm tak chu an hual ta a; tin, vân aṭangin mei a lo tla a, anni chu a kângral ta a. 10 Tin, anmahni bumtu Diabola chu sakawlh leh zâwlnei der awmna, mei leh kât dîlah chuan an paih ta a; tichuan, chatuanin achhûn azâna nghaisakin an awm ang. 11 Tin, lalṭhutphah lianpui, vâr tak leh a chunga ṭhu chu ka hmu a, a hma ata chu lei leh vân an tlân bo va, an tân hmun rêng a awm ta lo va. 12 Tin, mitthite chu a lian a têin, lalṭhutphah hmaa ding ka hmu a; tin, lehkhabute an hawng a; tin, lehkhabu dang, Nunna Bu chu an hawng bawk a; tin, mitthite chu lehkhabutea ziak an thiltih ang zêla rêlsakin an awm ta a. 13 Tuifinriat chuan a chhûnga mitthi awmte chu a chhuahtîr a, Thihna leh Mitthi khua chuan an chhûnga mitthi awmte chu an chhuahtîr bawk a; tin, mi tin an thiltih ang zêla rêlsakin an awm ta a. 14 Tin, Thihna leh Mitthi Khuate chu meidîlah an paih a. Chu chu thih hnihna chu a ni - meidîl chu. 15 Tu hming pawh Nunna Bua ziak an hmuh loh chuan meidîlah an paih bawk a.