Nun leh Rawngbâwlna Inzirna Lehkhabu Atâna Thu Lâk Chhuahnate
APRIL 1-7
PATHIAN THU AṬANGA RO HLUTE | 1 KORINTH 7-9
“Kawppui Neih Lohna Thilpêk”
(1 Korinth 7:32) Nimahsela, lungkham nei lova in awm ka duhsak che u a ni. Nupui nei lo chuan Lalpa tihlâwm theihnazia tûr ngaihtuahin Lalpa lam thil chu a lungkham ṭhîn.
Kawppui Neih Lohna Chu Hmang Ṭangkai Hle Rawh
3 Kawppui nei lo chu a nei aiin a zalên zâwk a. (1 Kor. 7:32-35) Chûng chu a rawngbâwlna zauh nân, mi dangte hmangaihna kawnga inhawn lehzual nân, leh Pathian Jehova hnaih lehzual nâna hman ṭangkai theih hun ṭha tak a ni. Chuvângin, Kristian tam tak chuan kawppui neih loh hlâwkna chu an hria a, hun engemawti chhûng tal nupui pasal nei lova awm chu an “pawm” a ni. Mi dangte chuan atîrah kawppui neih loh chu an tum hran lo; mahse, an dinhmunte a inthlâk danglam a, ṭawngṭaina nêna tih tak zeta an dinhmun an ngaihtuah hian Pathian Jehova ṭanpuinain kawppui nei lovin an awm thei dâwn tih an hria a ni. Chuvângin, an dinhmun inthlâkthleng chu pawmin, kawppui nei lova awm chu an pawm ta a ni.—1 Kor. 7:37, 38.
(1 Korinth 7:33, 34) Nupui nei erawh chuan a nupui tihlâwm theihnazia tûr ngaihtuahin khawvêl lam thil a lungkham zâwk ṭhîn. 34 Tin, pasal nei leh nula thianghlim chu an inang lo bawk a. Pasal nei lo chuan a taksa leh a thlarauvah chuan thianghlim taka a awm theihna tûrin Lalpa lam thil chu a lungkham ṭhîn; pasal nei erawh chuan a pasal tihlâwm theihnazia tûr ngaihtuahin khawvêl lam thil chu a lungkham zâwk ṭhîn.
Korinth Khuaa Mite Hnêna Lehkha Thawnte Aṭanga Thu Pawimawh Hrilhfiahna
7:33, 34—Paula’n nupui pasal neite lungkham “khawvêl lam thil” a tih hian eng a sawina nge ni? Paula chuan nupui pasal nei Kristiante ngaihsak ngai nî tin nun nêna inkûngkaih thilte a sawina a ni. Chûng zîngah chuan ei in tûr te, silhfên tûr te, in hmun lo ram te a tel a; mahse, Kristiante hawisan tûr khawvêla thil ṭha lote a tel lo.—1 Joh. 2:15-17.
(1 Korinth 7:37, 38) Nimahsela, rilru nghet tak pua, ṭûl ti lova, ama duh zâwng erawh chu hlen theia, a fa nula thianghlim chu vawn reng a rilrua tum tlattu chuan a tiṭha zâwk ang. 38 Chutichuan pasal neihtîrtu chuan a tiṭha e, nimahsela, a neihtîr lotu chuan a tiṭha lehzual a ni.
w96-E 10/15 12-13 ¶14
Kawppui Neih Lohna—Rilru Buai Lova Rawngbâwl Theihna
14 Mahni hmasialna thiltumte um duh avânga kawppui nei lova awm Kristian chu nupui pasal nei Kristiante aiin “a tiṭha lehzual” chuang lo. Ani chu “ram avânga” kawppui nei lova awm ni lovin, mi mal thil avânga awm a ni zâwk a. (Mattaia 19:12) Kawppui nei lo chuan “Lalpa lam thil chu a lungkham ṭhîn” a, “Lalpa tihlâwm theihnazia tûr” ngaihtuahin, ‘Lalpa rawng chu buai lovin a bâwl’ ṭhîn a ni. Chu chu Jehova leh Krista Isua rawngbâwl tûrin a rilru a pe tlat tihna a ni. Chutianga a tih chauhvin, kawppui nei lo Kristian chu nupui pasal nei Kristiante aiin “a tiṭha lehzual” ang.
Thlarau Lam Lunghlute Laih Chhuahna
(1 Korinth 7:11) A ṭhen vêk chuanin pasal nei tawh lovin awm law law rawh se, a nih loh leh a pasal nên vêk innei leh rawh se; tin, pasal chuan a nupui ma suh se.
lv p. 220 par. 2-p. 221 par. 2
Dinhmun khirh tak ṭhenkhatah chuan uirêna awm lo mah se, Kristian chuan awm hran emaw, inṭhen emaw a thlang pawh a ni thei. Chutiang dinhmunah chuan, Bible chuan a ṭhentu chu “pasal nei tawh lovin awm law law rawh se, a nih loh leh a pasal nên vêk innei leh rawh se,” tiin a hrilh a ni. (1 Korinth 7:11) Chutiang Kristiante tân mi dang neih tumna nêna ngaihzâwng neih theih a ni lo. (Matthaia 5:32) Awm hran theihna nia ngaih dinhmun khirh tak ṭhenkhat chu i lo ngaihtuah ang u.
Chhûngkaw enkawl duh lohna. Pasalin a châwm thei reng chung pawha a châwm duh loh avângin chhûngkua chu ei tûr nei lo khawpin an rethei hle pawh a ni thei a. Bible chuan: “Tupawh . . . mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk” tiin a sawi. (1 Timothea 5:8) Chutiang mi chu a insiam ṭhat duh loh chuan, a nupui tân amah leh a fate vênhim nân dân phalna laa awm hran mai tûr nge ni tih chungchângah thu tlûkna a siam a ngai ang. Kristianin a chhûngkua châwm duh lo anga puhna chungchângah Kristian upate chuan ngun takin an ngaihtuah a ngai ngei mai a. Mahni chhûngkaw châwm duh lohna chu kohhran aṭanga hnawh chhuah theihna sual a ni.
Nasa taka kut tawrhna. Kut thawh hmang chuan a kawppui hrisêlna leh nunna hial atân pawha hlauhawm khawpin tharum thawh a chîng pawh a ni thei. Chutiang kawppui chu kan unaupa a nih chuan Kohhran upate’n a chanchin an chhui chiang ang. Thinurna leh tharum thawhna chu kohhran aṭanga hnawh chhuah theihna sual a ni.—Galatia 5:19-21.
Thlarau lam thiltiha tel thei lo tûra khap behna. Mi chuan a kawppui tân biakna dik vuan thei lo tûr khawpin harsatna a siam zawm zêl emaw, Pathian dânte zâwm lo tûrin a nawrlui hial emaw pawh a ni thei. Chutiang dinhmunah chuan, ‘mihring thu aia Pathian thu a zawm zâwk’ theih dân kawng awmchhun chu dân phalna laa awm hran a nih leh nih loh chungchângah a tuartu chuan thu tlûkna a siam a ngai ang.—Tirhkohte 5:29.
(1 Korinth 7:36) Amaherawhchu tupawhin a fanu nula thianghlim a lên reitîr kawngah tidik lova a inrin chuan, ani chu a vânglai a nih a, a ṭûl bawk si chuan, a tih duh chu ti rawh se; thil a tisual lo ve; neihtîr rawh se.
w00-E 7/15 31 ¶2
Nungchang Bawlhhlawhna Khawvêlah Thianghlim Takin I Awm Thei
Chuvângin, tleirâwlte chuan tisa châkna an neih ṭan chuan nupui pasal neih an hmanhmawh tûr a ni lo. Inneihnaah thutiamte a tel avângin, chutiang mawhphurhna mila nung thei tûr chuan puitlin a ngai a ni. (Genesis 2:24) Tisa châkna a sosân hun “tleirâwl pârmawina” a pelh hun thleng nghah chu a ṭha zâwk a, chuti lo chuan thu tlûkna dik lo an siam thei a ni. (1 Korinth 7:36, Baptist Mid-Mission Translation) Puitling tawh nupui pasal neih duh chuan a kawppui tûr âwm a hmuh loh avâng maia nungchâng bawlhhlawhnaa a inhnamhnawih a nih chuan atân a âtthlâkin, a va pawi dâwn tak em!
Bible Chhiar
(1 Korinth 8:1-13) Tin, milemte laka inthawina thilte thu kha chu: Kan zain hriatna kan nei ṭheuh tih kan inhria. Hriatna zawngin mi a uantîr ṭhîn a, hmangaihna erawh chuan mi a siam ṭha ṭhîn. 2 Tupawhin thil eng emaw hriaa a inrin chuan a hriat tûr ang chu a la hre lo ve. 3 Amaherawhchu tupawhin Pathian a hmangaih chuan chu mi ngei chu ama hriat a ni. 4 Chutichuan, milemte laka inthawina thil ei kawngah zawng, khawvêlah hian milem rêng rêng chu engmah a nih lohzia leh pakhat chauh lo chu Pathian dang rêng rêng an awm lohzia chu kan hria. 5 Vânah emaw, leiah emaw, pathian hming pute awm mah sela, (chutiang pathian tam tak leh lalpa tam tak an awm si a,) 6 keini tân erawh chuan Pathian pakhat chauh (Pa chu) a awm a, ama hnên aṭangin engkim a chhuak a, keini pawh ama tâna awm kan ni; Lalpa pakhat chauh (Isua Krista chu) a awm bawk a, amah avângin engkim a awm a, keini pawh amah avâng bawka awm kan ni. 7 Amaherawhchu, chu hriatna chu mi zawng zawngah a awm lo; chutichuan, ṭhenkhatin tûn thlengin milem be ṭhang an nih avângin milem laka inthawina thil ang taka ngaiin an ei ṭhîn; tichuan an chhia leh ṭha hriatna chu a chak loh avângin an lo bawlhhlawh ṭhîn. 8 Nimahsela, ei tûr hian Pathian mit min tluntîr chuang lo vang; ei mah suh ila kan chhe chuang lo va, ei mah ila kan ṭha chuang hek lo. 9 Nimahsela, fimkhur rawh u, chutilochuan, duh duha in tlat theihna hi eng emaw tiin mi chak lote tân tlûkna a lo ni dah ang e. 10 Nang, hriatna nei mi, tupawhin milem biakna ina chaw kîla an hmuh si che chuan anni chu mi chak lo lo ni sela, an chhia leh ṭha hriatna chuan milem laka inthawina thil ei a lo ngam dâwn lâwm ni? 11 Tichuan, i hriatna avâng chuan mi chak lo (unau a thih ai Kristan a thihsaka) chu, a boral dâwn a ni. 12 Unaute chunga chutiang thil in tihsual a, an chhia leh ṭha hriatna chu a chak loh nâk alaia in hliam hlauh hian, Krista chungah thil tisual in ni. 13 Chu mi avâng chuan ei tûr hian ka unau a tihtlûk chuan, ka unau ka tihtlûk lohna tûrin kumkhuain sa rêng rêng ka ei tawh lo vang.
APRIL 8-14
PATHIAN THU AṬANGA RO HLUTE | 1 KORINTH 10-13
“Jehova Chu A Rinawm”
(1 Korinth 10:13) Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang.
Chhiartute Zawhna
Tirhkoh Paula chuan Jehova’n “in tuar theih tâwk aliam chu thlêmna [fiahnate, NW] in tawh a phal lo vang,” tiin a ziak a. (1 Korinth 10:13) Hei hi Jehova’n kan hmaa kan tawrh tûrte chu ruat lâwkin, kan tawh tûr fiahnate chu a thlang tihna a ni em?
▪ Chu chu a dik a nih chuan, kan nun a nghawng dân tûr hi han ngaihtuah teh. Entîr nân, unaupa fapa chu mahniin a intihlum a. A pa chuan a tuar na hle a ni. Jehova’n nakin hun tûr chu en lâwkin amah leh a nupuiin he chhiatna hi an tuar zo dâwn tih thu tlûkna a siam em ni aw tiin a ngaituah a ni. He kalhmangah hian, kan zînga tam tak chuan chhiatnate kan hmachhawn dâwn a. Chuti chu, kan nuna thilthleng zawng zawng hi Jehova’n a thunun vek angin kan ngai tûr a ni em?
Korinth thawnkhat 10:13 kan hriat angin, Jehova’n kan tawrh zawh tûrte chu en lâwkin eng ang fiahnate nge kan tawh ang tih a ruat lâwk anga ngaih chu Bible-in a thlâwp lohzia kan hmu ang. Engvângin nge chu chu kan sawi theih? A chhan pali i lo ngaihtuah ang u.
A hmasa berin, Jehova’n mihringte chu zalên taka duh thlan theihna a pe a. Mahnia thu tlûknate siam tûrin min duh a ni. (Deuteronomy 30:19, 20; Josua 24:15) Jehova tilâwmtu thu tlûknate kan siam chuan, ani chu min kaihruai tûrin kan rinchhan thei a. (Thufingte 16:9) Mahse, thu tlûkna ṭha lote kan siam erawh chuan a nghawng chhuahte chu kan tuar ngei ang. (Galatia 6:7) Jehova’n kan tawn tûr fiahnate a thlang a nih chuan, zalên taka duh thlan theihna kan nei tak zet ang em?
A pahnihnaah, Jehova chuan “hun leh khawrêl” lakah min vênghim lo. (Thuhriltu 9:11) Mi chu a hun lo leh a hmun lova a awm avângin accident râpthlâk tak a tawng thei a. In sâng chimin mi 18 a delh hluma thilthleng chungchâng Isua’n a sawi a. An thihna thlentu chu Pathian a ni lo tih chiang takin a sawi a ni. (Luka 13:1-5) Tih palh thil a thlen hmain, Pathianin thi tûr leh thi lo tûrte a ruat lâwk tih ngaih dân siam chu a âwm lo hle.
A pathumnaah, kan vai hian Jehova chungah kan rinawm tlat tûr a ni. Jehova chhiahhlawhte chuan Pathianin thil a pêk avâng chauhvin a rawng an bâwl tiin Setana’n a sawi a. Setana chuan fiahnate kan tawn hunah Jehova chungah kan rinawm dâwn lo a tihna a ni. (Joba 1:9-11; 2:4; Thu Puan 12:10) Jehova’n fiahna ṭhenkhat lakah min vênhim chuan, Setana chu dik niin a lang thei a ni.
A palinaah, Jehova chuan kan chunga thilthleng tûr engkim chu hriat lâwk a tum lo. Jehova chuan a duh chuan nakina thilthleng tûr chu a hre thei ngei mai. (Isaia 46:10) Mahse, Bible chuan nakina thilthleng tûr engkim hriat lâwk a tum lo tih a sawi a. (Genesis 18:20, 21; 22:12) Jehova chu hmangaihna nei leh fel tak a ni a, chuvângin duh thlang thei tûra kan zalênaah a inrawlh buai lo.—Deuteronomy 32:4; 2 Korinth 3:17.
A nih leh, Paula chuan Jehova’n “in tuar theih tâwk aliam chu thlêmna in tawh a phal lo vang,” a tih hian eng a sawina nge? Paula chuan Jehova’n fiahnate kan tawh hma ni lovin, kan tawh laia a thiltih a sawi a ni. Jehova kan rinchhan chuan, kan nuna fiahna kan tawh engpawh tuar chhuak tûrin min ṭanpui ang. (Sâm 55:22) Chu chu a dik tih Paula’n a sawi theih chhan pahnih kan endik ang.
A chhan hmasa zâwk chu fiahna kan tawhte hi “mihring tuar theih ang chauh” a ni. Setana kalhmanga kan awm chhûng chu, dinhmun khirh tak takte kan hmachhawn dâwn a, chhiatna hial pawh kan tawng thei a ni. Mahse, Jehova kan rinchhan tlat chuan, chûng fiahnate chu kan tuar chhuak theiin kan rinawm reng thei a ni. (1 Petera 5:8, 9) Korinth thawnkhat bung 10, tîr lamah chuan Paula’n thlalêra Israelte tawn fiahna ṭhenkhat chungchâng a ziak a. (1 Korinth 10:6-11) Jehova rinchhantute chuan chûng fiahnate chu an tuar chhuak thei a ni. Mahse, Israel mi ṭhenkhatin Jehova thu an âwih lo va. Amah an rinchhan loh avângin an rinawm reng lo a ni.
A chhan pahnihna chu “Pahthian zawng a rinawm a ni.” Chu chuan eng awmzia nge a neih? Mihring chanchina Jehova’n a chhiahhlawhte a ngaihsak dân kan en hian ‘amah hmangaiha a thu zâwmtute’ chu rinawm takin a ṭanpui tih kan hre thei a ni. (Deuteronomy 7:9) Jehova chuan a thutiamte chu englai pawhin a hlen ṭhîn tih kan hria a. (Josua 23:14) Hei hi kan chiang thei a ni (1) Jehova chuan kan tuar chhuah theih loh khawpa harsa fiahnate min tawhtîr a phal dâwn lo, tih leh (2) kan tân “tlân chhuahna kawng” min siamsak ang tih hi.
Jehova’n amah rinchhantute chu engtin nge “tlân chhuahna kawng” a siamsak? Fiahnate chu a tibo thei ngei mai. Mahse, Jehova’n “in tuar theihna tûrin . . . tlân chhuahna kawng a siam,” ang tia Paula sawi chu hre reng ang che. Chuvângin, kan rinawm reng theih nâna min tihchakna hmangin Jehova chuan tlân chhuahna kawng min siamsak ṭhîn. Chutianga a tih dân kawng ṭhenkhatte chu i lo sawiho ang u:
▪ Jehova chuan “kan hrehawmna zawng zawngah min thlamuan ṭhîn.” (2 Korinth 1:3, 4) Ani chuan Bible, a thlarau thianghlim, leh bâwih rinawm hmangin kan rilru, thinlung leh rilru vei zâwngte chu a thlamuan thei a ni.—Matthaia 24:45; Johana 14:16, Rom 15:4.
▪ Jehova chuan a thlarau thianghlim chu min kaihruai tûrin a hmang thei a. (Johana 14:26) Thlarau thianghlim chuan thu tlûkna ṭha siam thei tûra min ṭanpuitu Bible thute leh thu bulte hre reng tûrin min ṭanpui thei a ni.
▪ Jehova chuan min ṭanpui tûrin a vântirhkohte a hmang thei.—Hebrai 1:14.
▪ Jehova chuan min ṭanpui tûrin kan unaute a hmang thei a. Anni chuan an thusawi leh an thiltih hmangin min tichak thei a ni.—Kolossa 4:11.
Chuti chu, 1 Korinth 10:13 kan hmuh Paula thusawite aṭangin eng nge kan zir theih? Jehova’n fiahna kan tawh tûrte chu a thlang lo va. Mahse, amah kan rinchhan chuan, eng fiahna pawh kan tuar chhuak thei tih kan chiang a ni. Jehova chuan a chunga kan rinawm reng theih nân tlân chhuahna kawng min siamsak ṭhîn ang tih kan hria a ni.
(1 Korinth 10:13) Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang.
Thlarau Lam Lunghlute Laih Chhuahna
(1 Korinth 10:8) An zînga ṭhenkhatin nula an ngai a, ni khatah sînghnih leh sângthumin an tlûkhlum phah ang khân i inngai hek suh ang u.
Chhiartute Zawhna
Engvângin nge inngaihna avânga ni khata Israel mi thi zât kha Number 25:9-in 24,000 a ni a tih laia 1 Korinth 10:8-in 23,000 a ni a tih?
He Bible châng pahniha number zât inan loh chhan hi kawng engemaw zât a awm a. A chhan mâwlmang ber chu, a thi zât chiah chu 23,000 leh 24,000 inkâr vêl a ni ang a, chu chuan a tlêm lam emaw, a tam lam emawa number bikima sawi mai a tirem a ni thei ang.
A chhan dang ni thei âwmte hi ngaihtuah teh. Tirhkoh Paula chuan Sittim-a Israelte chanchin chu nun kawng bawlhhlawhna avânga hmingthang, hmân lai Korinth khawpuia Kristiante tâna vaukhânna entîrna ni tûrin a târ lang a ni. Heti hian a ziak a: “An zînga ṭhenkhatin nula an ngai a, ni khatah sînghnih leh sângthumin an tlûkhlum phah ang khân i inngai hek suh ang u,” tiin. An inngaih avânga Jehova tihboralte chu la hrangin, Paula chuan mi 23,000 a ti a ni.—1 Korinth 10:8.
Mahse, Number bung 25-na chuan “Israel-ho chuan Peor hmuna Baal chu an pawm ve ta a; tichuan Israelho chungah LALPA thin chu a alh ta a,” tih min hrilh thung a. Tichuan Jehova chuan “mipuite hotu zawng zawng” chu tiboral tûrin Mosia chu thu a pe a. Chutah, Mosia’n chu thupêk anga ti tûrin rorêltute chu a hrilh lehchhâwng a ni. A tâwp a tâwpah Phinehasa’n puan in chhûnga Midian hmeichhe rawn hruai lûttu Israel mi rang taka a thah tâkah chuan “hremna chu a reh ta” a ni. Chutah, thuziak chu heti hian a tâwp a ni: “Chu mi hremnaa thite chu 24,000 an ni,” tiin.—Number 25:1-9.
Number bua a thi zât târ lanah hian, rorêltute’n an tihhlum “mipuite hotu zawng zawng” leh Jehova’n a thahte pawh an tel vek ngei ang. Rorêltute kuta thi mipuite hotute chu sângkhat vêl an ni ang a, chu chuan 24,000 a nihtîr a ni thei ang. Chûng mipuite hotute, a nih loh leh hruaitute chuan hmeichhia an ngai emaw, ngai lo emaw pawh ni se, inthâwinaah an tel ve, a nih loh leh chutianga mi dangte an tel chu an phal avângin, anni chuan ‘Peor hmuna Baal pawmna’ sual mawh chu an phur a ni.
He thu mal “pawm” tih chungchângah Bible hrilhfiahna pakhat chuan “tuemaw lama hîp tlata awm” tihna a kâwk thei a ti. Israelte chu Jehova hnêna inpumpêk an ni a; mahse, “Peor hmuna Baal an pawm” hian Pathian hnêna an inpumpêk inlaichînna chu an tichhia a ni. Chu mi hnu kum 700 vêlah, Jehova chuan zâwlnei Hosea hmangin heti hian Israelte chanchin a sawi a ni: “Anni chu Baal-peor hmunah an lo kal a, thil zahthlâk takah chuan an inpumpêk ta a, an ngainat tak milemte ang bawk chuan an tenawm a ni,” tiin. (Hosea 9:10) Chutianga ti apiang chuan Pathian rorêlna râpthlâk tak chu an phu a ni. Chuvângin, Mosia chuan Israel fate chu hetiang hian a hriattîr a ni: “Baal-peor avânga LALPA thiltih chu in mitin a hmu a: Baal-peor betu zawng zawngte chu LALPA in Pathianin in zîng ata a tiboral a,” tiin.—Deuteronomy 4:3.
(1 Korinth 11:5, 6) Amaherawhchu hmeichhia lukhum khum lova ṭawngṭai emaw, thu hril emaw apiangin an lû an timualpho a ni; ziah kâwn nên thuhmun reng a ni si a. 6 Hmeichhia lukhum khum lova a awm si chuan mêt law law rawh se; amaherawhchu, hmeichhe tân lu meh emaw, ziah kâwn emaw a zahthlâk si chuan lukhum khum zâwk rawh se.
(1 Korinth 11:10) Chu mi avâng chuan vântirhkohte avângin hmeichhiain mipa thuneih chhinchhiahna a khum tûr a ni.
w15-E 2/15 30
Chhiartute Zawhna
Lalram thuchhuahtu unaunu chuan thuchhuahtu unaupa awm laia Bible zirna a kaihhruai hunah a lû a khuh a ngai em?
▪ Vênnainsâng (English) 2002, July 15 chhuak “Chhiartute Zawhna” tihah, baptisma chang tawh emaw, chang lo emaw unaupa hmaah unaunuin Bible zirna a kaihruai a nih chuan a lû a khuh tûr a ni tiin a târ lang a. He mi chungchâng ngun taka ngaihtuah nawnna chuan kaihhruaina thar siam a ngai tih a târ lang a ni.
Unaunuin Bible zirna a kaihhruai laia a ruala awm ve thuchhuahtu unaupa chu baptisma chang tawh a nih chuan, unaunu chuan a lû khuh chu a duh ngei ang. A tlângpuia unaupate mawhphurhna chu unaunuin a thawh avângin, Kristian kohhrana lû nihna chungchânga Jehova ruahmanna a zahzia a lantîr a ni. (1 Kor. 11:5, 6, 10) Chuti a nih loh chuan, unaupa chu Bible zirna kaihruai tûra a tling a nih chuan, kaihruai tûrin ṭanpuina a dîl thei a ni.
Kawng leh lamah chuan, unaunuin Bible zirna a kaihhruai huna a pasal ni lo, batisma la chang lo thuchhuahtu unaupa a awm ve a nih chuan, lû khuh tûrin Bible-in a phût kher lo. Mahse, unaunu ṭhenkhatte chu chutiang dinhmunah pawh lû khuh tûrin an chhia leh ṭha hriatnain a chêttîr mai thei a ni.
Bible Chhiar
(1 Korinth 10:1-17) Unaute u, hêng hi in hriat loh ka duh lo ve, khatia min thlahtute zawng zawng chhûm hnuaia an awm vek a, an zaa tuifinriat pawh an kai vek a, 2 an zaa chhûmah leh tuifinriatah pawh Mosia bêl tûra baptisa an awm vek a, 3 an zaa thlarau lam chaw hmunkhat pawh an ei ṭheuh va, 4 an zaa thlarau lam in tûr hmunkhat pawh an in ṭheuh kha; anmahni zuitu thlarau lam lungpuia mi kha an in ṭheuh si a; chu lungpui chu Krista a ni. 5 Nimahsela an zînga mi tam zâwk chungah chuan Pathian a lungni ta lo va; thlalêrah khân tluhlumin an awm a. 6 Tin, chûng chu kan tân entîrna a ni, thil sual an châk ang bawk khân kan châk ve loh nân. 7 An zînga ṭhenkhat milem betu an ni ang khân milem betu ni suh u, “Mipui chu ei leh in tûrin an ṭhu hlawm a, infiam tûrin an tho leh a,” tih ziak ang khân. 8 An zînga ṭhenkhatin nula an ngai a, ni khatah sînghnih leh sângthumin an tlûkhlum phah ang khân i inngai hek suh ang u. 9 An zînga ṭhenkhatin Lalpa an fiah a, rûla tihborala an awm phah ang khân Lalpa chu i fiah hek suh ang u. 10 An zînga ṭhenkhat an phunnawi a, tiboraltu tihborala an awm phah ang khân phunnawi hek suh u. 11 Tin, chûng chu entîrna tûrin an chungah a lo thleng a nih kha; keini, hun tâwp lo thlennate hi, min zilhna tûrin an ziak a ni bawk a. 12 Chuvângin dinga inring chu fîmkhur rawh se, chutilochuan a tlu dah ang e. 13 Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang. 14 Chuvângin ka duh takte u, milem biak hi tlânsan rawh u. 15 Mi fingte hnêna sawi angin ka sawi a ni; ka thusawi hi ngaihtuah rawh u. 16 Malsâwmna no mal kan sâwmsak ṭhin hi Krista thisen ṭâwmpuina a ni lo vem ni? Chhang kan phel ṭhin hi, Krista Taksa ṭâwmpuina a ni lo vem ni? 17 keini mi tam tak hi chhang tlang khat, taksa pumkhat kan nih hi; kan zain chhang tlang khata mi kan chang ṭheuh si.
APRIL 22-28
PATHIAN THU AṬANGA RO HLUTE | 1 KORINTH 14-16
“Pathian Chu ‘Engkima Engkim’ A Ni Ang”
(1 Korinth 15:24, 25) Chu mi hnuah chuan a tâwp chu a lo la thleng ang; chu mi hnuah chuan rorêlna zawng zawngte leh, thuneihna leh thiltihtheihna zawng zawngte a tihbo hnuah, Pathian hnênah, Pa hnên ngeiah chuan ram chu a pe ang; 25 a hmêlma zawng zawng a ke hnuaia a dah hma loh chuan ani chu lalah a awm tûr rêng a ni si a.
w98-E 7/1 21 ¶10
“Tihbova Awm Tûr Chu Thihna Hi A Ni”
10 “A tâwp” tih chu Isua’n a Pathian leh Pa hnênah inngaitlâwm tak leh rinawm taka Lalram a pêk kîr leh hun, Krista Kum Sang Rorêl tâwpna a ni. (Thu Puan 20:4) ‘Eng kim Kristaa fâwk khâwm tûra’ Pathian thiltum chu a thleng famkim tawh ang. (Ephesi 1:9-10) Mahse, Krista chuan Lei leh vâna Pathian duh zâwng dodâltu “rorêlna zawng zawngte leh thuneihna leh thiltihtheihna zawng zawngte” chu a tiboral hmasa ang. Chutah chuan Armageddon-a tihchhiatna aia tam a tel ang. (Thu Puan 16:16; 19:11-21) Paula chuan: “[Krista] chu lalah a awm tûr rêng a ni si a. Hmêlma hnuhnûng ber tihbova awm tûr chu thihna hi a ni,” tiin a sawi a. (1 Korinth 15:25, 26) Ni e, Adama sualna leh thihna avânga a sawhkhâwk zawng zawng chu tihbo a ni tawh ang. Chu bâkah, Pathian chuan mitthite kai thovin [“hriatrengna,” NW] thlânte chu a tiruak tawh ang.—Joh. 5:28.
(1 Korinth 15:26) Hmêlma hnuhnûng ber tihbova awm tûr chu thihna hi a ni.
kr-E 237 ¶21
Lalram Chuan Pathian Duh Zâwng Leiah A Thlentîr
21 A nih leh, natna leh pumpelh theih loh sual rah chhuah thihna hi engtin nge ni ang? Chu chu ṭha famkim lo mihringte’n kan hneh theih ngai loh “hmêlma hnuhnûng ber,” hi a ni. (1 Kor. 15:26) Mahse, thihna chu Jehova tân hmêlma hlauh awm tak a ni em? Isaia hrilh lâwkna hi chhinchhiah rawh: “Thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang,” tih hi. (Is. 25:8) Chu hun chu i mitthla thei em? Mitthi vui te, thlânmual te, lungngaih mittui tlâkte a awm tawh lo vang! Jehova’n mitthite kaitho leh tûra a thutiam phûrawm tak a thlen famkimtîr hunah chuan lâwm avânga mittui tlâkna a awm tawh zâwk ang! (Isaia 26:19 chhiar rawh.) A tâwpah chuan, thihna avânga hrehawm tuar mi chhiarsên lohte chu tihdam an ni tawh ang.
(1 Korinth 15:27, 28) “Ani chuan a ke hnuaiah engkim a dah si a,” nimahsela, “A hnuaiah engkim dahin a awm,” a tih hian, a hnuaia engkim dahtu chu a tel ve lo tih a lang reng a ni. 28 Tin, a hnuaia engkim dahin a awm hun chuan Fapa ngei pawh chu a hnuaia engkim dahtu hnuaiah chuan dahin a awm bawk ang, Pathian chu engkima engkim a nih theihna tûrin.
Kum Sangkhat Chhûng Leh A Hnu Lama Remna Chu!
17 Kum Sâng Rorêl zawha nun awm dân tûr hrilhfiah nân ‘Pathian chu engkima engkim a ni’ tih thu aia ṭha hi a awm thei lo. Chu mi awmzia chu eng nge ni? Eden huana mihring ṭha famkim Adama leh Evi chu lei leh vâna Jehova chhûngkaw inngeih leh lungrual tak zînga mi an nih lai kha han ngaihtuah lêt leh teh. Chutih lai chuan lei leh vâna Lalchungnungber Jehova ngei chuan a thilsiam zawng zawng vântirhkoh leh mihringte chungah ro a rêl a. Anni chuan a mi malin an be pawp thei a, chibai an bûk thei a, a malsâwmna an dawng thei a ni. Ani chu “engkima engkim” a ni.
Thlarau Lam Lunghlute Laih Chhuahna
(1 Korinth 14:34, 35) Kohhranho inkhâwmnaah chuan hmeichheho chu ngawi rengin awm rawh se, anni zawng thu an sawi phal a ni si lo; Dân Lehkhabuin a sawi ang bawk khân thu zâwmin awm zâwk rawh se. 35 Tin, engpawh zir an duh chuan in lamah mahni pasal zâwt rawh se; kohhran inkhâwmnaa hmeichhe thusawi hi a zahthlâk si a.
w12 10/1 9, bâwm
Tirhkoh Paula’n Hmeichhiate Tân Thusawi A Khap Em?
“Tirhkoh Paula chuan: “Kohhranho inkhâwmnaah chuan hmeichheho chu ngawi rengin awm rawh se,” tiin a ziak a. (1 Korinth 14:34) Eng a tihna nge ni? Hmeichhiate finna a ngainêp tihna em ni? Ni lo ve. A nihna takah chuan, hmeichhiate zirtîrna ṭhate chu a sawi lang fo a ni. (2 Timothea 1:5; Tita 2:3-5) Korinth mite hnêna a lehkha thawnah Paula chuan hmeichhiate chauh ni lovin, ṭawng hriat loh leh hrilh lâwk theihna neite pawh an Kristian unau dangte an ṭawng lai chuan “ngawi mai” tûrin a fuih a ni. (1 Korinth 14:26-30, 33) Kristian hmeichhe ṭhenkhat chu an rinna chhar tharah an phûr êm avângin, chutih hun laia chîn dân angin, thusawitu thusawi lai lo pawtchatin, zawhna an lo zâwt ṭhîn a nih hmêl hle. Chutianga lo tihbuai chu pumpelh nân Paula chuan “in lamah mahni pasal zâwt” tûrin a fuih a ni.—1 Korinth 14:35..
(1 Korinth 15:53) He ṭawih thei hian ṭawih theih lohna a sin tûr a ni a, he thi thei pawh hian thih theih lohna a sin bawk tûr a ni.
it-1-E 1197-1198
Ṭawih theih lohna
A thawhlehna anpuia Isua zawmtu a roluahtute chu chatuan nunna chang tûr chauhva thlarauva tho leh ni lovin, thih theih lohna leh ṭawih thei lohna nunna changin an tho a ni. Anni chu mihring angin an nung tawh a, rinawm takin rawng an bâwl a, ṭawih thei mihring taksa neiin an thi a; mahse, 1 Korinth 15:42-54-ah Paula’n chiang taka a sawi angin, tûnah chuan ṭawih thei lo thlarau taksa an dawng tawh a ni. Chuvângin, thih theih lohna tih chuan an neih tâwp nei lo leh tihchhiat theih loh nun ṭha tak a kawh laiin, ṭawih theih lohna tih erawh chu Pathian pêk an ruangâm, a nih loh leh an taksa ṭawih thei lo, chhe thei lo, leh tihchhiat theih lohna lam sawina a ni. Chuvângin, pâwn lam chakna rinchhana nung, tisa leh thlarau thil siam dangte nêna inang lovin, Pathian chuan an hnênah mahnia nun reng theihna a pe niin a lang. Chu chu Pathianin an chunga rinna a neihzia finfiahna langsâr tak a ni. Mahse, chutianga a hrang leh tihchhiat theih lova an awm theihna chuan Pathian thununna hnuaiah an awm lo tihna a ni lo; an Lû Ber Krista Isua ang bawkin, anni pawh an Pa duh zâwng leh kaihhruaina hnuaiah an awm zawm zêl a ni.—1 Kor. 15:23-28; immortality; soul en rawh.
Bible Chhiar
(1 Korinth 14:20-40) Unaute u, rilru lamah naupang suh u; amaherawhchu sual kawngah zawng nausên ula, rilru lamah erawh chuan puitling rawh u. 21 Dân Lehkhabuah chuan, “‘Awze mite kain leh ram danga mite hmuiin hêng mite hnênah hian thu ka sawi ang a; chuti pawhin mi ngaithla chuang lovang,’ Lalpan a ti,” tih ziak a ni. 22 Chuvângin ṭawng hriat lohte hi ringtute tân chhinchhiahna a ni lo va, ring lote tân a ni zâwk; thuhril erawh hi chu ring lote tân chhinchhiahna a ni lo va, ringtute tân a ni zâwk. 23 Chuvângin kohhranho zawng zawng in inkhâwmin, in zaa ṭawng hriat lohtea thu in sawi chuan la hre lote emaw, ring lote emaw lo lût sela, â an ti dâwn lo che u em ni? 24 In zaa thu in hrilh erawh chuan ring lo emaw, la hre lo emaw lo lût sela, a thiam lohzia in zaa tihlan a ni tawh ang a, in zaa chhuahchhalh a ni tawh ang; 25 a thinlunga thurûkte chu tihlanin a awm tawh ang; chutichuan bawkkhupin Pathian chibai a bûk ang a, Pathian in zîngah a awm tak zet tih a puang ang. 26 Unaute u, engtin nge ni ta ang le? In rawn inkhâwmin fakna hla emaw, thu zirtîr emaw, hriattîrna thu emaw, ṭawng hriat loh emaw, hrilhfiahna emaw in nei ṭheuh ṭhîn a. Engkim siam ṭhatna tûrin tih ni tawh se. 27 Tupawhin ṭawng hriat lohva thu an sawi chuan pahnihin emaw, a tam berah pathumin emaw ni sela, inchhâwk zêlin ni bawk rawh se; tin, mi pakhatin hrilhfiah rawh se; 28 hrilhfiahtu an awm loh erawh chuan kohhranho inkhâwmnaah chuan ngawi rengin awm sela, mahni leh Pathian hnênah sawi rawh se. 29 Thu hriltute pawhin pahnihin emaw, pathumin emaw sawi sela, mi dangte chuan ngun takin ngaihtuah rawh se. 30 Amaherawhchu a kianga ṭhu mi dang hnênah hriattîrna thu pêkin a lo awm chuan a hmasa chu ngawi mai rawh se. 31 Mi zawng zawngin an zir theihna tûr leh mi zawng zawng thlamuanga an awm theihna tûrin, in zain pakhat zêlin thu in hril thei si a. 32 Thu hriltute thlaraute chu thu hriltute thu thuin an awm a ni. 33 Pathian chu buaina Pathian a ni lo va, remna Pathian a ni zâwk si a, mi thianghlim kohhranho zawng zawnga a awm ang hian 34 Kohhranho inkhâwmnaah chuan hmeichheho chu ngawi rengin awm rawh se, anni zawng thu an sawi phal a ni si lo; Dân Lehkhabuin a sawi ang bawk khân thu zâwmin awm zâwk rawh se. 35 Tin, engpawh zir an duh chuan in lamah mahni pasal zâwt rawh se; kohhranho inkhâwmnaa hmeichhe thusawi hi a zahthlâk si a. 36 Pathian thu hi nangmahni laka chhuak a ni maw? A nih loh leh nangmahni hnên chauhvah a lo thleng a ni maw? 37 Tupawh thu hriltuah emaw thlarau miah emaw a inngaih chuan in hnêna thu ka ziak hi Lalpa thupêk a ni tih lo hre rawh se. 38 Nimahsela, tupawhin a hriat loh chuan hre lovin awm mai rawh se. 39 Chutichuan ka unaute u, thu hrilh hi châk hle ula, ṭawng hriat lohtea thusawi pawh hi khap suh u; 40 nimahsela, engkim mawi tak leh fel taka tih ni rawh se.
APRIL 29–MAY 5
PATHIAN THU AṬANGA RO HLUTE | 2 KORINTH 1-3
“Jehova—‘Thlamuanna Zawng Zawng Pathian’”
(2 Korinth 1:3) Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se.
“Ṭapte Chu Ṭahpui Rawh U”
4 Hmangaihna ngah tak kan Pa chuan a hmangaih tak a chhiahhlawh Abrahama te, Isaaka te, Jakoba te, Mosia te, leh Lal Davidate chu a chân a. (Numbers 12:6-8; Matthaia 22:31, 32; Tirhkohte 13:22) Bible chuan Jehova’n chûng a mi rinawmte a kaihthawh hun tûr nî chu a nghâkhlel tak zet tih a sawi a ni. (Joba 14:14, 15) Chutih hunah chuan an hlimin hrisêlna ṭha famkim an nei tawh ang. Jehova chuan a fapa piang hmasa ber thihna pawh a tawng a. Bible chuan Isua chu Pathian “lâwmna” a ni tih a sawi. (Thufingte 8:22, 30) Jehova’n a Fapa na tuara a thi lai a hmuh huna a tawrh dân tûr chu kan ngaihtuah phâk bâk a ni.—Johana 5:20; 10:17.
(2 Korinth 1:4) Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna tûrin, ani chuan kan hrehawmna zawng zawngah min thlamuan ṭhîn.
“Ṭapte Chu Ṭahpui Rawh U”
14 Lusûn tuemaw hnêna thusawi tûr hriat chu a harsa thei a. Mahse, Bible chuan “khandaih chhun anga na taka mi chhun thu sawi an awm,” tih a sawi a ni. (Thufingte 12:18) Mi tam tak chuan When Someone You Love Dies tih brochure-ah sawi tûr thlamuanna thute an hmu a ni. Chuti chung pawhin, i tih theih ṭanpuina ṭangkai ber chu “ṭapte chu ṭahpui” hi a ni. (Rom 12:15) A pasalin a boralsan Gaby-i chuan a châng chuan rilrua a tawrhnate sawi chhuah dân awmchhun chu ṭah hi a ni tih a sawi a. “Chuvângin, ka ṭhiante’n min ṭahpui hian thlamuana engemaw chen ka nei a. Chutih hunah chuan, ka lusûnna avângin khawhar lutuk niin ka inhre lo,” tiin a sawi belh bawk.
Thlarau Lam Lunghlute Laih Chhuahna
(2 Korinth 1:22) Ani chu min chhinchhiahtu leh kan thinlunga zakhamna thlarau min petu a ni bawk a.
w16.04-E 32
Chhiartute Zawhna
Pathian hnên aṭanga Hriak thih Kristian tinte dawn “zakhamna” leh “chhinchhiahtu” chu eng nge ni?—2 Kor. 1:21, 22.
▪ Zakhamna: Lehkhabu pakhat sawi dân chuan, 2 Korinth 1:22-a “zakhamna” tia lehlin Girk thu mal chu “tlêm tlêma pawisa pêkna, pawisa dah luhna, a ṭhen azâr pêk lâwkna, tiamkamna, chu chu kan thil lei man zât a ṭhen pêk lâwk a nih avângin chu thil chu kan hmu ngei dâwn tih nemnghehna, a nih loh leh thuthlunna tih awmze nei “dân lam leh sumdâwnna lama hman ṭawngkam” a ni a. Hriak thihte chungchângah chuan an lâwmman chu 2 Korinth 5:1-5-a târ lan a ni a, chutah chuan an dawn tûr ṭawih thei lo vân taksa a tel a, chu lâwmmanah chuan an dawn tûr thih theih lohna nun pawh a tel bawk.—1 Kor. 15:48-54.
Tûn lai Grik ṭawngah chuan, chu mi nêna inkungkaih ṭawngkam chu inhualna zungbun sawi nâna hman a ni a. Hei hi entîr nei Krista nupuia tel tûrte tâna tehkhinna ṭha tak a ni.—2 Kor. 11:2; Thup. 21:2, 9.
▪ Chhinchhiahtu: Tûn hma chuan, chhinchhiahtu chu a neitu, thuneitu, a nih loh leh ṭâwmpuitu a nihzia nemngheh nâna hman a ni a. Hriak thihte chungchângah chuan, anni chu Pathian ta anga thlarauva “chhinchhiahin,” an awm a ni. (Eph. 1:13, 14) Mahse, rinawm taka mi a thih hma, a nih loh leh hrehawm nasa tak a thlen hmain, chu chhinchhiahtu chu a bo leh thei a ni.—Eph. 4:30; Thup. 7:2-4.
(2 Korinth 2:14-16) Nimahsela, Kristaa hnehnaa min hruai fotu leh, keimahni hmanga hmun tina amah hriatna rim hriattîrtu Pathian hnênah chuan lâwmthu awm rawh se. 15 Chhandam mêkahte leh boral mêkahte chuan Pathian tân Krista rimtui kan ni si a; 16 pâwl khatte tân chuan thihna lakah thihna tûr rim kan lo ni a, pâwl khatte tân chuan nunna laka nunna tûr rim kan lo ni a. Chûng ang atân chuan tunge tling zo vang?
w10-E 8/1 23
I Lo Hre Tawh Em?
Tirhkoh Paula’n “hnehnaa” tia a sawi khân a rilruah eng nge awm?
▪ Paula chuan: “Kristaa hnehnaa min hruai fotu leh, keimahni hmanga hmun tina amah hriatna rim hriattîrtu Pathian hnênah chuan lâwmthu awm rawh se. Chhandam mêkahte leh boral mêkahte chuan Pathian tân Krista rimtui kan ni si a; pâwl khatte tân chuan thihna lakah thihna tûr rim kan lo ni a, pâwl khatte tân chuan nunna laka nunna tûr rim kan lo ni a,” tiin a ziak a.—2 Korinth 2:14-16.
Tirhkoh chuan Ram hmêlmate hnehtu sipai lal chawimawi tûra Rom mite’n kawng zawhna an neih ṭhinna chu a sawi a. Chutiang an tihnaah chuan, râllâk thilte leh an sal mante chu mipui hmuhtîrin, bâwngpate chu talh tûra an hruai laiin, hnehna changtu sipai lal leh a sipaihote chu mipuiin an chawimawi dual dual a ni. Chawimawina kawng zawh, an zawh tâkah chuan, bâwngpate chu inthawi nân an hmang a, sal tâng tam tak chu an tihlum niin a lang.
Ṭhenkhat tâna nunna leh ṭhenkhat dangte tâna thihna tia tehkhinna ṭawngkam “Krista rimtui” tih hi “an kawng zawh laia Rom mite’n rimtui an hâl ṭhin dân aṭanga lo chhuak niin a lang. Hnehna changtute tâna hnehna entîrna rimtui chuan an sal mante chu rei lotêah tihhlum an ni tawh dâwn tih a hriattîr a ni,” tiin The International Standard Bible Encyclopedia chuan a sawi.
Bible Chhiar
(2 Korinth 3:1-18) Mahni nisawimawi kan ṭan leh dâwn ta maw? A nih loh leh, in hnêna pêk tûr emaw, in hnên ata emaw sawimawina lehkha, mi ṭhenkhat tân a ngai angin kan tân a ngai ve dâwn maw? 2 Nangni hi kan lehkha, kan thinlunga ziak, mi zawng zawng hriat leh chhiar chu in ni e: 3 Krista lehkha, keimahni min ziaktîr, lehkhatuia ziak ni lo, Pathian nung thlarauva ziak zâwk, lung phêka ziak ni lo, tisa thinlung phêka ziak zâwk chu in ni tih chiang taka lantîr a ni si a. 4 Tin, Pathian lamah chutiang rinna chu Krista zâra kan neih a ni; 5 engpawh keimahni aṭanga chhuaka ruat tûrin keimahni ngawtin kan tlin kan ti lo va; kan tlin theihna chu Pathian hnên ata a ni zâwk. 6 Amah bawk chuan thuthlung thar rawngbâwltuahte min tlintîr a; a lehkha thu mai rawngbâwltuahte ni lovin a thlarau rawngbâwltuahte a ni zâwk e; lehkha thu mai chuan a tihlum si ṭhîn a, thlarau erawh chuan a tinung ṭhîn a ni. 7 Mosia hmêl a ropui avângin Israel fate chuan a hmêl an en reng thei lo va (chu ropuina chu a ral ta riai riai a) thihna rawngbâwlna lunga hawrawpa ziak mah, chuti khawpa ropuia a thlen chuan, 8 thlarau rawngbâwlna chu engti taka ropuiin thleng ang maw; 9 Thiam loh chantîrna rawngbâwlna mah a ropui chuan, felna rawngbâwlna chu ropui lamah chuan a nasa zâwk êm êm tûr a ni. 10 Tihropuia awm tawha chuan he mi lamah zawng ropuina rêng a nei ta si lo, ropuina nasa zâwk chuan a khûm avângin. 11 Ral ta riai riaia mah ropuia a thlen chuan awm reng tûra chu ropuia thuamin a awm zâwk êm êm tûr a ni. 12 Chutichuan chutiang beiseina kan neih avângin engkim kan sawi chhuak ṭhîn a ni. 13 Mosia tih ang khân kan ti lo ve; ani chuan ral ta riai riaia ral tâwpna chu Israel fate chuan an en reng lohna tûrin a hmai chu hmaikhuhnain a khuh a: 14 an rilru erawh chu tihkhauhvin a awm ta zâwk a; vawiin thleng pawh hian thuthlung hlui chu an chhiarin khuhna pângngai chu hlîm lohvin a awm reng si a, chu khuhna chu Kristaah chuan tihbovin a awm ta a. 15 Nimahsela vawiin thleng hian Mosia Lehkhabu an chhiar apiangin an thinlungah chuan khuhna a awm ṭhîn. 16 Nimahsela an thinlung chu Lalpa lama a hawi tik apiangin khuhna chu lâk bo a ni tawh ang. 17 Tin Lalpa chu thlarau a ni a; Lalpa thlarau awmna apiangah chuan zalênna a awm ṭhîn. 18 Chutichuan keini chu kan zain hmai khuh lovin darthlalang anga Lalpa chhun ênin, ropuina aṭanga ropui zêlin, chu mi anpui ngeia awm tûrin tihdanglamin kan awm ṭhîn, Lalpa (thlarau) ata chu kan hmuh ang zêlin.