Jehova Hnaih Tûra Mite Ṭanpuina

“Keimaha kal lo chu tumah Pa hnênah an thleng ngai lo.”—JOHANA 14:6.

1. Eng thupêk nge tho leh Isua’n a zirtîrte chungah a pêk a, Jehova Thuhretute’n chu thupêk chu an âwih a, chu chuan eng rah nge a chhuah tawh?

ISUA KRISTA chuan a hnungzuitute chu ‘hnam tina mi zirtîrahte siam tûrin, leh Pa leh Fapa leh thlarau thianghlim hminga baptis’ tûrin thu a pe a ni. (Matthaia 28:19) Kum sâwm kalta chhûng khân Jehova Thuhretute chuan mi maktaduai thum aia tamte chu Pathian lam hnaih tûrin an ṭanpui a, a hun takah a duh zâwng ti tûra an inpumpêkna entîr nân an baptis a ni. Pathian hnaih tûra anni ṭanpui chu kan va hlimpui êm!​—Jakoba 4:8.

2. Mi thar tam takte’n baptisma an chang nachungin eng thil nge thleng?

² Nimahsela, zirtîr thar tam takte’n baptisma an channa ram ṭhenkhatah chuan, chu mi milin Lalram thuchhuahtu an pung lo. Mitthite kan ngaihtuah tel ngei tûr a ni a, kum tinin mi zâa 1 zêl an thi ang vêl a ni. Chu bâkah, kum tlêm tê kalta khân mi tam tham tak chu chhan engemaw vangin an hnungtawlh a ni. Engvângin maw? He mi leh a dawt leha thu ziak chuan mite Jehova lama hîp an nih chhan leh a ṭhen an hnungtawlh chhan ni âwm takte a enfiah ang.

Kan Thuhrilh Chhan

3. (a) Isua zirtîrte kawltîr hna chuan Thu Puan 14:​6-a vântirhkoh thusawi nên engtin nge inzawmna a neih? (b) Lalram thuchaha mite ngaihsakna chawh thawh nân eng thil nge ṭangkai tak a nih a; mahse, eng buaina nge awm?

³ He ‘tâwpna hunah’ hian Isua zirtîrte chuan “he ram chanchin ṭha” chungchâng ‘hriatna dik’ thehdarhna hna an nei a ni. (Daniela 12:4; Matthaia 24:14) An hna chu “leia awmte hnênah leh hnam tinrêng te, chi tin­rêng te, ṭawng tinrêng te, mi tinrêng te ­hnêna tlângaupui tûra chatuana Chanchin Ṭha nei” vântirhkoh hna nên a inzawm ni. (Thu Puan 14:6) Tisa thila khat he khawvêlah hian mite Pathian Ram ngaihsak tûr leh Jehova hnaih tûra ṭanpui theihna kawng ṭha ber chu lei paradis-a chatuana nun beiseina chungchâng hrilh hi a ni tlângpui a. Hei hi hriat thiam theih tak a nih laiin, paradis luh nân chauhva Pathian mite nêna inkâwmte chuan nunna kawngka zîma din nghehna an nei lo a ni.​—Matthaia 7:​13, 14.

4. Isua leh vântirhkoh vanlaizâwla thlâwk sawi angin, kan thuhrilh chhan chu eng nge ni?

⁴ Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” a ti a. (Johana 17:3) ‘Chatuan chanchin ṭha’ puang vântirhkoh van­lai­zâwla thlâwk chuan lei-a awmte hnênah: “A rorêl hun chu a lo thlen tâk avângin Pathian chu hlau ula, chawimawi rawh u; vân te, lei te, tuifinriat te, tuihna te siamtu chu chibai bûk rawh u,” tiin, a hrilh bawk a ni. (Thu Puan 14:7) Chuvângin, kan chanchin ṭha hrilh chhan ber chu mite’n Isua Krista kal­tlanga Jehova hnaih tûra ṭanpui nân a ni.

Jehova Hna-a Kan Chanvo

5. Paula leh Isua thusawi eng hian nge Jehova hna kan thawk a, kan hna kah thawk lo tih tilang?

⁵ Tirhkoh Paula chuan a hriak thih Kris­tian puite hnênah ziakin “inremna rawngbawl hna” chungchâng a sawi a, Pathianin mite nêna inremna chu amah ngeiin Isua Krista tlanna hmangin a siam a ni tih a sawi a ni. Paula chuan “Pathianin keimahni min hmangin a ngên chiam che u tih theih a ni,” a ti a; tichuan, “‘Pathian nên lo inrem rawh u,’ tiin Krista aiah kan ngên che u a ni,” a ti a. A va phûr awm êm! Hriak thih “Krista aia palai kan ni” emaw, lei lam beiseina nei palai kan ni emaw hei hi Jehova hna a ni a, kan hna a ni lo tih kan theihnghilh tûr a ni lo. (2 Korinth 5:​18-20) Mite hîp a, Krista hnêna lo kalte zirtîrtu chu Pathian a ni tak zet a ni. Isua chuan: “Pa mi tîrtuin a hip loh chuan tumah ka hnênah an lo kal thei lo vang; tin, ni kin niah chuan a lo kala chu ka kai tho vang. Zâwlneite lehkhabuah chuan ‘Pathian zirtîrin an awm vek ang,’ tih ziak a ni. Mi tin Pa thu hriaa zir apiang chu ka hnênah an lo kal ṭhîn,” tiin, a sawi a ni.​—Johana 6:​44, 45.

6. Eng angin nge Jehova chuan hnamte a tihnghîn a, chu mi rualin tute’n nge a biakna ‘inah’ himna an hmuh?

⁶ He ni hnuhnungah hian Jehova chuan engtin nge a mite chu hîpin “rinna kawngkhâr” a hawnsak? (Tirhkohte 14:​27; 2 ­Timothea 3:1) A Thuhretute chu chhandamna thuchah leh he thilte kalhmang suaksual ­chunga rorêlna thuchah a puantîr a, hei hi rinna kawngkhâr a hawnsak dân pawimawh ber chu a ni. (Isaia 43:​12; 61:​1, 2) He khawvêl pumhuap puanchhuahna chuan hnamte zîngah khurhna a thlen a ni​—lo thleng thuai tûr rorêlnaa keh sawmna entîr lâwkna chu. Chu mi rual chuan Pathian mit hmuha “hlu” te chu he kalhmang ata lak chhuah an ni a, a biakna dik awmna ‘inah’ chuan himna an hmu a ni. Tichuan, Jehova chuan Hagaia chhin­chhiah, a hrilhlâwkna chu a ti thleng famkim a ni: “Hnam tinrêng ka tinghîng ang a, hnam tin­rêng thil duhzâwng chu a lo thleng ang a, he in hi ropuinain a khat ang,” tih chu.​—Hagaia 2:​6, 7, NW footnote; Thu Puan 7:​9, 15.

7. Engtin nge Jehova’n mite thinlung a hawn a, mi chu amah leh a Fapa lamah engtin nge a hîp?

⁷ Jehova chuan hêng Pathian ṭihtute​—hnam tin zînga thil duhawm berte​—thinlung chu a Thuhretute “thusawite lo ngaihsak” tûrin a hawnsak a ni. (Hagaia 2:​7, Jewish Publication Society; Tirhkohte 16:14) Kum zabi pakhatna hun lai ang khân, Jehova chuan a chângin a vântirhkohte chu a ṭanpuina dîl mi rilru tluangte hnênah a Thuhretute kaihruai tûrin a hmang a ni. (Tirhkohte 8:​26-31) Miin an tâna Pathian thil pêk mak tak a Fapa, Isua Krista, hmanga a siam an hriat chuan, chu hmangaihna avânga Jehova lama hîpin an awm a ni. (1 Johana 4:​9, 10) A ni, Pathian chuan mite chu a “hmangaih-ngilneihna,” a nih loh leh a “hmangaihna rinawm nghet” hmangin a lam leh a Fapa lamah a hîp a ni.​—Jeremia 31:​3, NW, footnote.

Tute nge Jehova’n a Hîp?

8. Eng ang mi nge Jehova’n a hîp?

⁸ Jehova’n Amah zawngtute chu amah leh a Fapa lamah a hîp thîn a. (Tirhkohte 17:27) Hei hian Kristianna ram, dik takin, khawvêl pumpuia “thil tenawm tih tawhte avânga thaw­pika ṭap ṭhînte” a huam tel a ni. (Eze­ki­ela 9:4) Anni chu “an thlarau lam mamawh ngaihvente” an ni. (Matthaia 5:3, NW) Anni chu lei paradis-a chatuana chêng tûr ‘leia mi thuhnuairawlh [“inngaitlâwm,” NW foot­note] te’ an ni.​—Zephania 2:3.

9. Engtin nge Jehova’n “chatuana nun duhna rilru dik tak nei apiang” chu a hriat a, anni chu engtin nge a hîp?

⁹ Jehova chuan mite thinlung a hre thei a ni. Lal Davida chuan a fapa Solomona hnênah: “LALPA chuan thinlung a en ṭhîn a, rilrua suangtuah zawng zawngte hi a hre vek a ni; amah i zawn chuan i hmu ang,” tiin, a hrilh a ni. (1 Chronicles 28:9) Thinlung dinhmun leh thlarau, a nih loh leh rilru put hmang lang sâr tak aṭangin, Jehova chuan sual ngaihdam nâna van lam ruahmanna leh Pathian kalhmang thar fela chatuana nun beiseina te a chhâng lêt tûr leh tûr lo chu a hre thei a ni. (2 Petera 3:​13) A Thu leh a Thuhretute hrilh leh zirtîrna hmangin Jehova chuan amah leh a Fapa lamah “chatuana nun duhna rilru dik tak nei apiang” chu a hîp a, anni chu “ringtu an lo ni ta a.”​—Tirhkohte 13:48, NW.

10. Jehova’n a ṭhen hîp a, mi dangte a hîp loh­na­ah ruat lâwkna hmêlhmang a tel lo tih engin nge lantîr?

¹⁰ Jehova chuan a ṭhen a hîp a, mi dangte a hîp lohnaah chuan ruat lâwkna hmêlhmang a tel em? A tel lo rêng rêng! Pathian mi hîpna chu anmahni châkna chak takah a innghat zâwk a ni. Ani chuan an duhthlan theihna chu a zah a ni. Jehova chuan tûn lai lei luahtute hmâah chuan kum 3,000 chuang kaltaa Israelte hmâa thlan tûr a dah ang chiah chu a dah a ni. Mosia’n: “Tûnah hian in hmaah nunna leh ṭhatna, thihna leh thil ṭha lo ka dah a; . . . In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan, nunna chu thlang rawh u, in nun theih nân, nangni leh in thlahte nên; LALPA in Pathian hmangaih a, a awkâ âwih a, amah vuan tlatin; amah chu in nunna, in dam reina a ni si a,” a tih khân.​—Deuteronomy 30:15-​20

11. Engtin nge Israelte’n nun an thlan ang?

¹¹ Israel mite chuan nun thlang tûrin ­‘Jehova chu hmangaih a, a awkâ âwih a, amah an vawn tlat’ a ngai tih chhinchhiah ang che. Chûng thute chu sawi a nihin Israel-te chuan Thutiam Ram chu an la luah rih lo va. Anni chu Moab Phaizâwlah an awm a, Jordan Lui kân tûr leh Kanaana lût tûrin an inrâlring a ni. An ngaihtuahna chu ram “ṭha tak leh zau tak, hnutetui leh khawizu luanna” ram an luah thuai tûra an nghah chu dân pângngai tak a nih laiin, an suangtuahna a tak chantîrna chu Jehova an hmangaihna, a awkâ an âwihna, leh amah an vawn tlatnaah a innghat a ni. (Exodus 3:8) Mosia’n: “LALPA in Pa­thian hmangaih tûr te, a kawng zawh tûr te, a thupêk te, a dân te, a rorêl te pawm tûra tûna thu ka pêk che u hi in zawm chuan nungdamin in awm ang a, in lo pung ang a, in va luah tûr ramah chuan LALPA in Pathianin mal a sâwm dâwn che u a ni,” ti-a a sawiin he thu hi a tichiang hle a ni.​—Deuteronomy 30:16.

12. Israel mite entawn tûr siam chuan kan thuhrilhna leh zirtîr siamna chungchângah eng nge min zirtîr?

¹² He thil thleng tawh hian he tâwpna huna kan thuhrilh leh zirtîrna hnaah thil eng­emaw min zirtîr tûr a ni lo vem ni? Lei Paradis lo thleng tûr kan ngaihtuah a, chu chu kan rawngbâwlnaah kan sawi ṭhîn a ni. Amah-erawh­chu, keimahni emaw, zirtîra kan siamte emaw chuan mahni hmasial vânga Pathian rawng bâwl kan nih chuan, a thutiam thlen famkimna chu kan hmu lo vang. Israel mite angin keimahni leh kan zirtîrte chuan ‘Jehova chu hmangaih a, a awkâ âwih a, amah vawn tlat’ dân kan zir tûr a ni. Hei hi kan rawngbâwlnaa kan hriat reng chuan mite Pathian lama hîpnaah Pathian nên kan thawkho tak tak a ni ang.

Pathian Hnathawhpuite

13, 14. (a) 1 Korinth 3:​5-9-a a sawi angin eng­tin nge Pathian hnathawhpui kan lo nih? (b) Punna tinrênga chawimawina chu tu hnêna kal tûr nge ni, engvângin nge?

¹³ Paula chuan Pathian nêna thawhhona chu thlawhhma nên a tehkhin a. Ani chuan: “Apollova chu engnge a nih le? Paula pawh chu engnge a nih? Rawngbâwltu, nangmahni rintîrtu che u chauh an ni asin, chu pawh chu Lalpan a pêk ang ve ve chauh zêlin a ni. Keiin ka phun a, Apollovan tuiin a châwm a, nimahsela Pathianin a ṭhantîr a ni. Chutichuan a ṭhantîrtu Pathian chauh lo chu, a phuntu chu engmah a ni lo va, tuia châwmtu pawh chu engmah a ni hek lo. Tin, a phuntu leh tuia châwmtu chu pumkhat an ni, nimalsela anmahni thawh rim ang zêlin mahni lâwmman an hmu ve ve ang. Keini zawng Pathian hnathawhpuite kan ni si a; nangni Pathian thlawhhma chu in ni a,” tiin, a ziak a ni.​—1 Korinth 3:​5-9.

¹⁴ Pathian hnathawhpui kan nih angin, rin­awm takin “ram thu” chu mite thinlungah tuhin, a lo ngaihsakte chu ṭha taka inbuatsaih tlawhkîrna leh Bible zirpuina hmangin tuiin kan châwm tûr a ni. A lei, thinlung, chu a ṭhat chuan, Jehova chuan Bible thutak thlai chi chu rah chhuah thei tak thingkungah ṭhan lentîrin, a chan chu a ti ang. (Matthaia 13:​19, 23) Ani chuan chu mi chu amah leh a Fapa lamah a hîp ang. Tichuan, endikna tâwp berah chuan Lalram thupuangtu punna apiang chu mite thinlunga Jehova’n hna a thawh vâng niin, thutak thlai chi a ṭhan lentîr a, chutiang mite chu amah leh a Fapa lama a hîp vâng zâwk a ni.

In Sak Awm Reng Tûr Chu

15. Mi dangte rinna tiṭhang tûra kan ṭanpui dân entîr nân Paula’n eng tehkhin thu nge a hman?

¹⁵ Punna avânga kan lâwm laiin, mite’n Jehova hmangaih a, a awkâ âwih a, leh amah an vawn chhunzawm zêl hmuh chu kan châk tak zet a. Mi ṭhenkhat rinna kawnga tlahniam leh kal bo kan hmuhin kan lungngai a ni. He mi dang tûrin tih theih engemaw kan nei em? Tehkhin thu dang hmangin, ­Paula chuan mi dangte’n an rinna tiṭhang tûrin kan ṭanpui theih dân min kawhhmuh a. Ani chuan: “Lungphum rem tawh sa lo chu ­lungphûm dang tuman an rem thei tawh si lo va, chu lungphûm chu Isua Krista chu a ni. Tin, lungphûm chungah chuan tupawhin rangkachakin emaw, tangkain emaw, lung man tamin emaw, thingin emaw, hnimin emaw, buh pâwlin emaw in sa sela, mi tin hnathawh chu a lang tawh ang. Nî chuan a tilang dâwn si a, meia a inlâr dâwn avângin; mei ngei chuanin mi tin hnathawh chu eng ang nge a nih a fiah tawh ang,” tiin, a ziak a ni.​—1 Korinth 3:​11-13.

16. (a) Engtin nge Paula tehkhin thu hman pahnihte thiltum a inan loh? (b) Engtin nge kan in sak hna chu lungawi thlâk lo leh kâng thei a lo nih theih?

¹⁶ Paula thlawhhma tehkhin thu-ah chuan ṭhan lenna chu taima taka chi thehna, mumal taka tuia châwmna, leh Pathian malsâwmnaah a innghat a ni. A tehkhin thu dang chuan an in sak chunga thil lo thlengah Kristian rawngbâwltute mawhphûrhna chu a tipawimawh a ni. Lungphûm nghet tak chungah bungraw ṭha chi hmangin a sa em? Paula chuan: “Mi tin a chunga an sakzia tûrah fîmkhur ṭheuh rawh se,” tiin, a vaukhân a ni. (1 Korinth 3:10) Paradis-a chatuana nun beiseina hrilh a, a tuina kan chawh thawh hnû-in, kan zirtîrna chu Pathian Lehkha thu hriatna bul maia nghatin, chatuana nun neih theih nâna tih ngaite chu thupui berah hmangin kan sawi uar em? Kan zirtîrna chu: ‘Paradis-a chatuana nun i duh chuan, i zir a ngai a, inkhâwmnaah i kal a ngai bawk a; tin, thuhrilhnaah i telve a ngai a ni,’ tih mai a ni em? Chutiang a nih chuan, mi rinna chu lungphûm nghet tak chunga sa kan ni lo vang a, kan in sak chuan fiahna mei a do thei lo emaw, a do rei thei lo emaw a ni ang. Mite chu kum rei lo tê a rawngbâwlna avânga Paradis-a nun beiseina hmanga Jehova lama hîp tum chu ‘thing emaw, hnim emaw, buhpâwl emaw’ hmanga in sak ang chauh a ni.

Pathian leh Krista Hmangaihna Sak

17, 18. (a) Rinna chhel tûr chuan eng nge nasa taka mamawh a nih? (b) Mi chu a thinlunga Krista chêng tûrin engtin nge kan ṭanpui theih?

¹⁷ Rinna chu a chhel theih nân, Isua Krista kaltlanga Pathian Jehova nêna mimal inlaichînnaah a innghat tûr a ni. Mihring ṭha famkim lo kan nih avângin, chutiang Pathian nêna inlaichînna muanawm chu a Fapa ­kaltlang chauhvin kan nei thei a ni. (Rom 5:10) Isua thusawi chu hre reng ang che: “Keimaha kal lo chu tumah Pa hnênah an thleng ngai lo,” tih chu. Mi dangte rinna saknaa ṭanpui tûrin, “lungphûm rem tawh sa lo chu lungphûm dang tuman an rem thei tawh si lo va, chu lungphûm chu Isua Krista chu a ni.” He mi-ah hian eng nge tel?​—Johana 14:​6; 1 Korinth 3:11.

¹⁸ Krista lungphûm chunga sak tih awmzia chu Bible zirlaiin, Chhandamtu, kohhran Lû, hmangaihna nei Puithiam Lal, leh rorêl lai Lal anga A chhanvo-te chipchiar taka a hriatna kaltlanga Isua hmangaihna thûk tak tiṭhang thei tûr zâwnga zirtîr hi a ni. (Daniela 7:​13, 14; Matthaia 20:28; Kolossa 1:​18-20; Hebrai 4:​14-16) Chu mi awmzia chu, Isua chu an tân mi tak tak nihtîr a, an thinlunga chêng ang tluk nihtîr hi a ni. An tâna kan ṭawngṭaina chu Paula’n Ephesi khuaa Kristiante tâna dîlna a siam ang a ni ve tûr a ni. Ani chuan hetiang hian a ziak a: ‘Krista chu in rinna avânga in thinlunga a chên theih nân, . . . Pa . . . hmaah chuan ka ṭhingṭhi ṭhîn a; . . . zungkai leh nghahchhan neia in awm theih nân,’ tiin.​—Ephesi 3:​14-19.

19. Bible zirlaite thinlunga Krista hmangaihna sakna rah chhuah chu eng nge ni ang; mahse, eng nge zirtîr ngei tûr chu?

¹⁹ Zirlaite thinlung chu Krista hmangaihna tiṭhang thei tûr zâwnga kan sak chuan, chu chuan thiam takin Pathian Jehova hmangaihna a sa ang. Isua hmangaihna, ngaihtuahna, khawngaihna te chu Jehova mizia lantîrtu rinawm takte a ni si a. (Matthaia 11:​28-30; Marka 6:​30-34; Johana 15:​13, 14; Kolossa 1:3) Tichuan mite’n Isua an hriat a, an hmangaih chuan, anni chuan Jehova an lo hria ang a, an hmangaih ve ang. a (1 Johana 4:​14, 16, 19) Bible zirlaite chu Isua’n mihringte tâna a tih zawng zawngte phênah Jehova a awm a; chuvângin, A lakah lâwm thu sawina, fakna, leh “min chhandamtu Pathian” anga chibai bûk kan batzia zirtîr a ngai a ni.​—Sâm 68:​19, 20; Isaia 12:​2-5; Johana 3:16; 5:19.

20. (a) Engtin nge mite chu Pathian leh a Fapa hnaih tûra kan ṭanpui theih? (b) Thu ziak lehah eng nge kan ngaihtuahho vang?

²⁰ Pathian hnathawhpuite angin mite chu amah leh a Fapa lam an hnaih theihna tûrin, leh an thinlunga hmangaihna leh rinna tiṭhang tûrin i ṭanpui ang u. Tichuan, Jehova chu an tân mi tak zet a lo ni ang. (Johana 7:28) Krista kaltlangin Pathian nêna inlaichînna bul hnai tak an din thei ang a; tin, amah an hmangaihin, an vuan nghet thei ang. An hmangaih rawngbâwlna rei zâwng tûr an tuk lo vang a, Jehova thu tiam mak takte chu a hun takah a thleng famkim dâwn tih an rinna chu an tinung zâwk ang. (Ṭah Hla 3:​24-26; Hebrai 11:6) Nimahsela, rinna te, beiseina te, leh hmangaihna te tiṭhang tûra mi dangte kan ṭanpui laiin, lawng rinawm tak, thlipui nasa tak pawh tuar khawchhuak thei ang ni tûrin keimahni rinna pawh chu kan sa ngei tûr a ni. Hei hi thu ziak dawt lehah ngaihtuahho a ni ang.

[Footnote-te]

Ennawn Nân

◻ Lalram thuchaha mite ngaihsakna chu engtin nge kan chawhthawh fo va, mahse eng hlauhawm nge awm?

◻ Eng ang mi nge Jehova’n amah leh Fapa lama a hîp?

◻ Israelte Thutiam Rama luh chu engah nge a innghah a, chuta ṭang chuan eng nge kan zir ve theih?

◻ Mite chu Jehova leh a Fapa hnaih tûra ṭanpuinaah eng chanvo nge kan neih?

[Phêk 10-naa milem]

Mite hnênah Paradis-a chatuana nun beiseina kan pe nachungin, kan tum ber chu Jehova lama hîp a ni

[Phêk 13-naa milem]

Ṭha taka kan inbuatsaih chuan kan tlawhkîrna chu hlawhtling tak a ni thei