Hlim Nâna Thil Mamawh Ber Chu

“PATHIAN hlim” Jehova leh “mi hlim leh Thuneitu tak chauh,” Isua Krista chuan hlim nâna kan thil mamawh ber chu mi dang zawng aiin an hre zâwk a. (1 Timothea 1:​11; 6:​15, NW) Chuvângin, Pathian Thu, Bible-ah hian hlimna thurûk kan hmu thei hi thil mak a ni lo.​—Thu Puan 1:3; 22:7.

Tlâng chunga a thusawi hmingthang takah Isua chuan hlim nâna thil mamawhte a sawifiah a. Heti hian a sawi a ni: (1) Rilrua retheite, (2) lungngaite, (3) thuhnuairawlhte, (4) felnaa rilṭâma tuihâlte, (5) mi khawngaih thei takte, (6) thinlunga thianghlimte, (7) remna siamtute, (8) felna avânga tihduhdah tuar hnute, leh (9) amah avânga sawichhiat leh tihduhdah tuarte chu “an eng a thâwl,” a nih loh leh an hlim a ni tiin.​—Matthaia 5:​3-​11.a

Isua Thusawite Hi A Dik Chiang Em?

Isua thusawi ṭhenkhatte dikzia chu hrilhfiah deuh hlek a ngai a. Thinlung thianghlimin a tur avânga mi thuhnuairawlhte, mi khawngaih thei takte, leh remna siamtute chu mi thinur, intihbuai hrât tak, leh khawngaihna nei lote aiin a hlim zâwk ang tih chu tuin nge hnial thei tehlul ang?

Mahse, felnaa rilṭâma tuihâlte leh lungngaite chu hlim tia koh theih an nih dân kan ngaihtuah mai thei. Chung mite chuan khawvêl dinhmun thlîr dân dik an nei a. Anni chu kan hun laia ‘thil tenawm tih tawhte avânga thawpikin an ṭap ṭhîn’ a ni. (Ezekiela 9:4) Chu mi ringawt chuan anni chu a tihlim lo. Amaherawhchu, Pathian thiltum he leia dinhmun fel tak awmtîr leh hnehchhiaha awmte tâna rorêlna dik an han hriat hian, nasa takin an hlim a ni.​—Isaia 11:4.

Felna hmangaihna pawhin mite chu thil dik an tih theih ṭhin loh avângin lungngaihna a thlen bawk a ni. Chuvângin chutiang mite chuan an thlarau lam mamawh an ngaihven a. Pathian chauhvin mite chu an chak lohnate hneh tûra ṭanpui thei nia an hriat avangin, Pathian kaihhruaina an zawng peih a ni.​—Thufingte 16:​3, 9; 20:24.

Lungngai te, felnaa rilṭâma tuihâl te, leh mahni thlarau lam mamawh ngaihventute chuan Siamtu nêna inlaichînna neih a pawimawhzia an hre chiang hle a ni. Mi dangte nêna inlaichînna ṭha neih chuan hlimna a thlen a; Pathian nêna inlaichînna ṭha neih hian hlimna a thlen lehzual a ni. Ni e, thudik ngainatu mi tak, Pathian kaihhruaina pawm duhte chu an hlim a tih theih tak zet a ni.

Amaherawhchu, sawichhiat leh tihduhdah tuar tuemaw a hlim thei chu rin harsa i ti mai thei. Mahse, Isua ngeiin a sawi si a, a dik ngei a ni ang. Chuvângin, a thusawi chu eng anga hriat thiam tûr nge ni ang?

Tihduhdah Tuar Chung Pawha Hlim​—Engtin Nge A Nih Theih?

Isua khân sawichhiatna leh tihduhdahnate kha hlimna thlentu angin a sawi lo tih chhinchhiah ang che. Heti hian a sawi zâwk a ni: “Felna avânga tihduhdah tuar hnute chu an êng thâwl e, . . . miin keimah avânga an hau che u a, an tihduhdah che u . . . hunah in eng a la thâwl ang,” tiin. (Matthaia 5:​10, 11) Chuvângin, hlimna chu miin Krista zuitu a nih avânga huat a hlawh hunah leh Isua zirtir thu bulte mila a nun chauhvin a awm thei a ni.

Hei hi Kristian hmasate chunga thilthleng khân an entîr a ni. Sanhedrin rorêltute zînga mi, Juda Rorêlna sâng chuan, “tirhkohte chu an ko va, an vêl a; an velh zawhin, Isua hminga thu sawi loh tûr ti tlatin an thlah ta a.” Engtin nge tirhkohte’n an chhân lêt? “Chuti chuan, rorêltute zîng ata an kal chhuak a, chu Hming avâng chuan mualpho tuar tlâka ruat an nih avângin an lâwm hle a. Tin, ni tin Pathian biak inah leh anmahni inahte, ‘Isua chu Krista a ni,’ tiin zirtîr leh hrilh an bâng chuang lo.”​—Tirhkohte 5:​40-​42; 13:​50-​52.

Tirhkoh Petera chuan sawichhiatna leh hlimna inzawm dân chungchâng a rawn tifiah zual sauh va. Heti hian a ziak a ni: “Krista hming avânga hau in nih chuan in eng a thâwl e; thlarau ropui tak, Pathian thlarau chu in chungah a awm si a,” tiin. (1 Petera 4:​14) Ni e, thil ṭha kan tih avânga Kristian anga hrehawm kan tawrh hian, chûng tawrhnate chu nuam lo hle mah se, Pathian thlarau thianghlim kan dawng tih inhriatna aṭanga lo awm hlimna kan nei a ni. Engtin nge Pathian thlarau thianghlim leh hlimna a inzawm?

Tisa Hnathawhte Nge Thlarau Rah Zâwk?

Pathian thlarau thianghlim chu rorêltu anga a thu zâwm apiangte hnênah a awm a. (Tirhkohte 5:​32) Jehova chuan “tisa thiltihte” titu hnênah a thlarau thianghlim a pe lo. Chûng thiltihte zîngah chuan “inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te,” a tel a ni. (Galatia 5:​19-​21) A dik a ni, tûn lai khawvêlah hian “tisa thiltihte” a hluar êm êm a ni. Hêng thil titute hian hlimna dik tak leh tluantling an nei lo. Chu ai chuan, an chhûng te, an ṭhian te, leh mi dangte nêna an inlaichînna an tichhe zâwk a ni. Chu bâkah, Pathian Thu chuan “chutiang thil tih hmangte chuan Pathian ram an chang lo vang,” a ti.

Chu mi nêna inkalh takin, Pathian chuan “thlarau rah” lantîrte hnênah a thlarau a pe ṭhîn. He thlarau rah zînga awm miziate chu “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te,” a ni. (Galatia 5:​22, 23) Hêng miziate kan lantîr hian, Pathian leh mi dangte nêna inlaichînna muanawm kan siam a, chu chuan hlimna dik tak a thlen a ni. (Bâwm en rawh.) A pawimawh zâwk chu, hmangaihna te, ngilneihna te, ṭhatna te, leh Pathian mize dangte kan lantîr hian, Pathian Jehova kan tilâwmin, Pathian felna khawvel thara chatuan nun beiseina hlimawm tak kan nei a ni.

Hlimna Hi Duh Thlanna A Ni

German rama chêng Wolfgang-a leh Brigitte-i te nupain tih tak zeta Bible an zir ṭan lai chuan, mite’n hlim nâna mamawh nia an ngaih thil tam tak an nei a. An hrisêlin an la naupang bawk a ni. Thawmhnaw man to tak tak an inbêl thei a, in cheimawi nuam takah an chêng a, sumdâwnna hlawhtling tak an nei bawk a. An hun zawng zawng deuhthaw chu hausak ûmna lamah an hmang a; mahse, hlimna tak tak an nei si lo. A hnuah chuan, Wolfgang-a leh Brigitte-i te chuan duhthlanna khirh tak chu an siam ta. Thlarau lam thil ûm nân ṭan an lain, hun tam zâwk an hmang a, Jehova hnaih lehzual theih dân kawng an dap bawk a ni. An duhthlanna chuan an rilru put hmang a thlâkthleng thuai a, chu chuan pioneer, a nih loh leh hunbi kima Lalram chanchin ṭha hriltu ni tûrin an nun a tisamkhai a. Tûnah Germany rama Jehova Thuhretute branch office-ah rawngbâwlin an awm a ni. Chu bâkah, ram dang mite hnêna Pathian Thu, Bible aṭanga thutak an hmuhte an zirtîr theih nân Asia ram ṭawng chi khat an zir mêk bawk.

He nupa tuak hian hlimna dik tak an hmu em le? Wolfgang-a chuan heti hian a sawi: “Thlarau lam thila kan han inhman nasat tâk a chinah chuan, kan hlim zual sauh va, lungawina nasa zâwk kan tawng a ni. Kan rilru zawng zawnga Jehova rawng kan bâwlna hian kan inneihna pawh a tinghet sauh va. Tûn hma pawhin nupa hlim tak kan ni a; mahse, thiltih tûr leh tum hrang kan neihte chuan min tibuai a. Tûnah chuan tum thuhmun chu lungrual takin kan ûm tawh a ni,” tiin.

Hlim Nân Eng Nge Ngai?

Tawi fêl taka sawi chuan, “tisa thiltihte” tlânsan a, “[Pathian] thlarau rah” neih a ngai a ni. Hlim tûr chuan, Pathian nêna inlaichînna ṭha tak neih châk ngawih ngawih a ngai a. Neih tuma ṭan khawh mi chu Isua’n mi hlim a tihte ang a ni ang.

Chuvângin, hlimna hi i neih phâk loh thilah ngai rêng rêng suh. Tûnah hian, hrisêl lohnain a tlâkbuak che emaw, in nupa nunah harsatna in tâwk emaw pawh a ni thei. Fa in nei thei tawh lo emaw, eizawnna hlawhtling neih i tum hrâm hrâm emaw pawh a ni mai thei a. Tûn hma angin in awm thei tawh lo pawh a ni thei. Mahselangin, lungphâng suh; lungngaih chhan tûr i nei lo! Pathian Ram rorêlna chuan hêng harsatnate bâkah a dang tam takte a tiveng vek ang. Pathian Jehova chuan fakna hla phuahtuin a sawi: “I ram chu chatuan ram tûr a ni a . . . I kut i phar a, thil nung zawng zawng châkna chu i tihrehsak ṭhîn,” tih a thutiam chu a tithleng famkim dâwn a ni. (Sâm 145:​13, 16) Khawvêl pum puia Jehova chhiahhlawh maktaduai tam takte’n an hriat angin, he Jehova thutiam rinawm tak rilrua vawn tlatna chuan tûn laiah hlimna nei tûrin nasa takin a ṭanpui ang che.​—Thu Puan 21:3. (w04 9/1)

[Footnote]

[Phêk 6-naa bâwm/milem]

Hlimna Awmtîrtu Thilte

Hmangaihna chuan mi dangte chu nangmah hmangaih lêt tûrin a chêttîr a ni.

Remna chuan inhngirnghona tel lo inlaichînna nei tûrin a ṭanpui che.

Dawhtheihna chuan fiahna i tawh lai pawha hlim reng tûrin a ṭanpui che.

Ngilneihna chuan i lamah mi a hîp a ni.

Ṭhatna i lantîr chuan mi dangte chu ṭanpui i mamawh huna ṭanpui lêt tûr che-in a chêttîr.

Rinna chuan hmangaih taka Pathian kaihhruaina a pe ang che.

Thuhnuairawlhna chuan thinlung, rilru, leh taksa lama hahdamna a thleng ang che.

Insûmtheihna chu thil tihsual neih tlêm phahna a ni.

[Phêk 7-naa milemte]

Hlimna nei tûrin, i thlarau lam mamawhte i phuhrûk a ngai