Engtik Lai Pawhin Bible Thupêk Kan Mamawh Em?
I naupan lai chuan i nu leh pate’n dân tam tak an pe che a. I rawn puitlin deuh chuan, tih tak zetin an ngaihsak che tih i hre thiam ta a. I rawn puitlin chhoh tak tak hnuah pawh, an thuneihna hnuaiah awm tawh lo mah la, an dân siam ṭhenkhat chu i la nunpui zawm zêl a ni.
Kan Pa vâna mi, Jehova pawhin a Thu, Bible-ah hian thupêk tam tak min pe a. Entîr nân, milem biak te, inngaih te, uirê te, leh rûkrûkte chu a khap tlat a. (Exodus 20:1-17; Tirhkohte 15:28, 29) Thlarau lama ‘kan ṭhan’ chhoh zêl rual hian, Jehova’n min ngaihsak tak zet tih leh a thupêkte chu a khirh lutuk lo tih pawh kan hre thiam a ni.—Ephesi 4:15; Isaia 48:17, 18; 54:13.
Mahse, thupêk chiang tak a awm lohna dinhmunte pawh a awm a. Chuvângin, mi ṭhenkhat chu Bible-a thupêk chiang tak a awm lohna dinhmunahte chuan an duh dâna thil tithei niin an inngai a. Anni chuan, Pathianin ṭûl ti se chuan, thupêk chiang tak min pe ngei ang tih ngaihdân an nei a ni.
Chutiang ngaihdân neitute chuan a hnua an inchhîr ngawih ngawihna tûr thu tlûknate an siam fo ṭhîn. Anni chuan Bible-ah hian dânte chauh ni lovin, Pathian ngaihtuah dânte pawh târ lan a ni tih an hre lo a ni. Bible kan zir chhoh zêl rualin, Jehova’n dinhmunte an thlîr dân chu hriain, kan chhia leh ṭha hriatna chu Bible hmangin kan sawizawi a, chu chuan Pathian ngaihtuah dân târ langtu duh thlannate siam tûrin min ṭanpui a ni. Chutianga tihna chuan, Jehova thinlung tihlâwmna a thlen bâkah, thu tlûkna fing kan siam avânga hlâwknate pawh min thlen bawk.—Ephesi 5:1.
Bible-a Entîrna Ṭha Takte
Bible-a târ lan hmân laia Pathian chhiahhlawhte chungchâng kan chhiar hian, thupêk chiang tak an dawn lohna dinhmunte an hmachhawn hunah pawh, anni chuan Pathian ngaihtuah dân chu an entawn tlat tih kan hmu a ni. Josefa chungchâng hi han ngaihtuah teh. Potiphara nupuiin mutpui tûra a sâwm lai khân, uirêna chungchânga Pathian thupêk a la awm lo. Mahse, thupêk chiang tak a awm loh hunah pawh, a chhia leh ṭha hriatna chuan uirêna chu thil sual a ni tih a hriattîr mai ni lovin, ‘Pathian chunga thil sual tihna’ a ni tih a ring nghet tlat a ni. (Genesis 39:9) Eden huana Pathian thusawi aṭangin, Josefa chuan uirêna chu Pathian ngaihtuah dân leh a duh zâwng kalh a ni tih a hria tih a chiang hle.—Genesis 2:24.
Entîrna dang hi han ngaihtuah leh teh. Tirhkohte 16:3 kan chhiar chuan, Paula’n Timothea chu a zinnaa a hruai hmain a serh a tansak tih kan hmu a. Mahse, châng 4-na kan chhiar chuan, a hnuah Paula leh Timothea chuan khaw tina an kal pahin “Jerusalem khuaa tirhkoh leh upa awmte thurêl” an hrilh thu kan hmu a ni. Chûng an thurêl zîngah chuan serhtan dân hnuaia Kristiante an awm tawh loh thu pawh a tel! (Tirhkohte 15:5, 6, 28, 29) A nih leh, engvângin nge Paula’n Timothea serh tansak chu thil ṭûl nia a ngaih? “Chumi lama Juda awmte avâng chuan a serh a tansak a, [Timothea] pa chu Grik a ni tih an hre vek si a.” Paula chuan ṭûl lo taka mi dangte chunga thinurna leh tlûkna thlentu nih chu a duh lo. Ani chuan Kristiante chu ‘Pathian mit hmuhin mi tin chhia leh ṭha hriatna mit an intluntîr ṭhîn’ tih a hria a ni.—2 Korinth 4:2; 1 Korinth 9:19-23.
Paula leh Timothea chuan chutiang rilru put hmang chu an nei a ni. Hêng Bible châng, Rom 14:15, 20, 21 leh 1 Korinth 8:9-13; 10:23-33-te hi chhiarin, Paula’n mi dangte thlarau lam dinhmun a ngaihtuahzia hria ang che; a bîk takin, thil sual ni kher lo thilte pawh tlûk phah nâna hmang mai theitute a ngaihtuahzia chu. Chu bâkah, ani chuan Timothea chungchângah: “Hetiang rilru pu, in awmzia tih tak zeta ngaihtuahsaktu tûr che u tu mah ka nei si lo. An zain Isua Krista tân zawng lovin, mahni tân an zawng si ṭhîn. Nimahsela, ani hi chu fiaha a awm tawhzia in hria, fain a pa rawng a bâwl angin, chanchin ṭha tihdarh kawngah rawng mi bâwlpui ṭhin kha,” tiin a sawi. (Philippi 2:20-22) Paula leh Timothea chu tûn laia Kristiante tân entawn tûr ṭha an va ni tak êm! Anni chuan Bible-a thupêk chiang tak a awm lohna dinhmunah pawh, an mi mal remchân dân leh ṭha tih dâna thil ti mai lovin, an thu tlûkna siamin mi dangte thlarau lam dinhmun a nghawng theih dân chu an ngaihtuah a, Jehova leh Isua hmangaihna chu an entawn zâwk a ni.
Kan entawn ber Isua Krista chungchâng hi han ngaihtuah teh. Ani chuan Tlâng chunga a Thusawiah, Pathian dânte hre thiamtu chuan chiang taka thupêk, a nih loh leh ti lo tûra khap thilte piah lam thlengin a zâwm ang tih a hrilhfiah a. (Matthaia 5:21, 22, 27, 28) Isua, Paula, Timothtea, leh Josefa te zînga a tua mah hian, Pathian dânin chiang taka a târ lan loh dinhmunah chuan miin ama duh dânin thil a ti thei, tih ngaih dân an nei lo. Anni chuan Pathian ngaihtuah dânte chu entawnin, Isua’n thupêk ropui ber pahnih nia a sawi—Pathian leh mihringpuite hmangaih—chu a takin an nunpui a ni.—Matthaia 22:36-40.
Tûn Laia Kristiante Chungchâng Hi Eng Nge Ni Ve?
Bible hi thil engkim chiang taka ziah chhuahna dân lam lehkhabu angin kan ngai tûr a ni lo tih a chiang hle. Dânin chiang taka a târ lan loh dinhmunte kan hmachhawn hun pawha Pathian ngaihtuah dânte târ langtu thu tlûknate kan siam hian, Pathian Jehova thinglung kan tilâwm a ni. Thu danga sawi chuan, Bible aṭanga thupêk chiang tak hmuh inbeisei reng aiin, ‘Lalpa duh zâwng eng nge ni tih [kan] hre’ thei tihna a ni. (Ephesi 5:17; Rom 12:2) Engvângin nge chu chuan Jehova a tihlâwm? Kan mi mal duh zâwng leh diknate aiin, amah tihlâwm kan duhna chu kan dah pawimawh zâwk tih a târ lan avângin. Chu chuan Pathian min hmangaihna avânga kan lâwm êm avângin, a mi hmangaihna chu entawn kan duh tih a târ lang bawk; chu hmangaihna chu a ni, min chêttîrtu thiltithei tak chu. (Thufingte 23:15; 27:11) Chu mai bâkah, Bible nêna inmila thil tihna chuan thlarau lam leh tisa lamah min vênghim fo ṭhîn a ni.
Chu thu bul chu kan mi mal nuna kan nunpui theih dân i lo en ang u.
Intihhlimna Thlanah
Ṭhalai pakhat chuan rimawi album lei a tum angah han mitthla teh. Album-a hlate chu a ngaihthlâk duh zâwng tak a ni a; mahse, album hnungah chuan mipat hmeichhiatna lam hawi leh ṭawngkam bawlhhlawhte a chuan avângin, chu chuan a rilru a kam a. Chu bâkah, album-a hla tam takah chuan a satu aw chu a thinrim hmêlin, pawisak a neih loh hmêl hle tih a hre bawk. Jehova hmangaihtu a nih angin, chu ṭhalai chuan chumi chungchânga Jehova ngaihtuah dân chu a ngai pawimawh hle a ni. Chutiang dinhmunah chuan Pathian duh zâwng chu engtin nge a hriat theih ang?
Galatia mite hnêna a lehkhathawnah, tirhkoh Paula chuan tisa thiltihte leh Pathian thlarau rahte a târ lang nual a. Pathian thlarau rah zîngah chuan hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, leh insûmtheihnate a tel tih i hriat ngei a rinawm. A nih leh, tisa thiltihte chu engte nge ni? Paula chuan: “Tisa thiltihte chu a lang fiah a ni; chûng chu hêng hi a ni: inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te, chutiangte chu; chûng khawngah chuan tûn hmaa, ‘Chutiang thil tih hmangte chuan Pathian ram an chang lo vang,’ tia ka hrilh lâwk che u ang khân ka hrilh lâwk che u hi,” tiin a ziak a ni.—Galatia 5:19-23.
Tisa thiltihte a sawina tâwpa “chutiangte chu,” tia a sawi hi lo chhinchhiah teh. Paula chuan tisa thiltih anga ngaih theihte chu chipchiar takin a sawi lang vek lo. Mahse, chumi avâng chuan miin, ‘Paula’n tisa thiltih a sawite zînga tel lo chu Bible-in tih min phalsak,’ tiin ngaihdân an nei tûr a ni lo. Chu aiin, chu Bible châng chhiartute chuan târ lan zînga tel lo; mahse, “chutiangte” zînga telte chu an hriatthiam theih nân, an hriat theihna chu an hmang zâwk tûr a ni. Târ lan zînga tel lo; mahse, “chutiangte” tia sawi thiltihtea inchhîrna nei lova inhmang zawm zêltute chuan Pathian Rama malsâwmna chu an dawng lo vang.
Chuvângin, Pathian mit hmuha thil ṭha lote chu kan hriat, a nih loh leh kan hriatthiam a ngai a ni. Chu chu thil harsa a ni em? Doctor-in thei leh thlai ei tam a, thei aṭanga siam chhang ur te, ice cream te, leh chutiang lam chi rêng rêng ei lotûrin a hrilh che angah han inchan teh. Chhang ur i ei theih loh tûrte hriat chu thil harsa a ni ang em? Tûnah chuan, Pathian thlarau rah leh tisa thiltihte kha han en leh ta ila. A chunga kan târ lan tâk rimawi album kha Bible chânga a khawi ber nên hian nge inmil? Hmangaihna te, ṭhatna te, insûmtheihna te, leh Pathian thlarau rah dangte nên chuan a inmil lo tih a chiang hle. Chuvângin, mi chuan rimawi ṭhenkhat chu Pathian ngaihtuah dân nên a inlim lo tih hre tûrin dân chiang tak a mamawh kher lo. Chu thu bul chu kan thil chhiar tûr te, film leh tv program en tûr te, computer games khelh tûr te, Web site luhna tûrte kan thlanna kawngah pawh a hman theih a ni.
Pawm Tlâk Mi Mal Lan Dânah
Bible-ah hian silhfên leh inchei dân chungchânga thu bulte pawh a chuang a. Chute chuan Kristian chu inâwm tâwk taka inthuam tûr leh mi mal lan dân mawi tak nei reng thei tûrin a kaikhruai thei a. Hemi chungchângah pawh hian, Jehova hmangaihtu chuan zalên taka duh thlan theihna an neih chu an duh zâwng apiang tih nâna hmang lovin, an Pa vâna mi lâwmna thlentu thilte tihna hun remchâng angin an thlîr a ni. Kan hriat tâk ang khân, Jehova’n dinhmun ṭhenkhata kaihhruaina chiang tak min pêk loh avâng maiin, chutiang dinhmuna mite thiltih chu a ngaihven lo tihna a ni lo. Kan inchei dânte chu kan awmna hmun azirin a inang lo thei a; chu bâkah, hmun khata awmte pawhin an inchei dânte chu an thlâk kual reng a ni. Mahse, Pathian chuan a mite chu khawi hmunah pawh awm se, englai pawha anmahni kaihruaitu tûr thu bulte chu a pe a ni.
Entîr nân, 1 Timothea 2:9, 10-na chuan: “Chutiang bawkin hmeichheho pawh inthlahdah lo leh inbel lutuk lovin, thuam inchawih tâwkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin; amaherawhchu, (hmeichhia, Pathian ngaihsak intite chu inphu tâwkin) thil tihṭhatin inchei sela ka duh,” tiin a sawi a. Chuvângin, Kristian hmeichhiate—leh mipate—chuan an awmna chheh vêla mite’n “Pathian ngaihsak intite” chu eng anga inchei leh inthuam tûrin nge an beisei tih an ngaihtuah tûr a ni. A bîk takin, an lan dânin mi dangte’n Bible thuchah an chhân lêtna kawnga nghawng a neih theih dân ngaihtuah chu a inâwm hle. (2 Korinth 6:3) Kristian entawn tlâk tak chuan a mi mal duh zâwngte leh diknate ngaih pawimawh lutuk aiin, mi dangte rilru tibuaitu, a nih loh leh titlutu nih loh chu a tum tlat zâwk ang.—Matthaia 18:6; Philippi 1:10, 11.
Kristian tu emaw chuan, a inchei duh dânin mi dangte chungah a ṭha lo zâwngin nghawng a nei tih a hriat chuan, a mi mal duh zâwngte aia mi dangte thlarau lam dinhmun ngaih pawimawh zâwkna hmangin Puala chu a entawn thei a. Paula chuan: “Mi zirtute ni rawh u, kei pawh Krista zirtu ka ni ang bawk hian,” tiin a sawi a ni. (1 Korinth 11:1) Isua chungchângah ani chuan: “Krista pawhin mahni lâwmna a zawng si lo,” tiin a ziak bawk. Kristian zawng zawngte tâna Paula fuihna chu a chiang hle: “Keini mi chak zâwkte hian mahni lâwmna zawng lovin, chak lo zâwkte chu an chak lohnaah kan ṭanpui tûr a ni. Intihsâwt tawn nân mahni vêngte tilâwmin an tâna ṭha tih i tum ṭheuh vang u.”—Rom 15:1-3.
Kan Hriat Theihna Chu Tât Hriamin
Bible-a kaihhruaina chiang tak kan hmuh lohna dinhmunah pawh Jehova tihlâwm dân kan hriat theih nân, engtin nge kan hriat theihna chu kan tihhmasâwn theih ang? A Thu nîtin kan chhiar a, kan zir ziah a, kan thu chhiarte kan chhût ngun ziah chuan, kan hriat theihna chuan hma a sâwn zêl ang. Chutiang hmasâwnna chu vawilehkhata neih theih a ni lo. Naupang taksa ṭhan chhoh dân ang chiahin, thlarau lama ṭhan chhohna pawh hi zawi zawia thleng a ni a, hmuh nghâl mai theih a ni lo. Chuvângin, dawhtheihna kan neih a ngai a, hmasâwnna kan hmu nghâl lo a nih pawhin kan lunghnual tûr a ni lo. Kawng leh lamah chuan, hun tam tak liamtîrna mai chuan kan hriat theihna chu a tât hriam lo vang. Chûng hunte chu a chunga kan târ lan tâk ang khân, Pathian Thu chhût ngun ziah nân leh theih tâwp chhuaha nunpui nân kan hmang tûr a ni.—Hebrai 5:14.
Pathian dânte’n kan thuâwihna a fiah laiin, a thu bulte chuan kan thlarau lam dinhmun leh Amah tihlâwm kan duhna chu a fiah tiin kan sawi thei a ni. Thlarau lama kan ṭhan chhoh zêl rualin, Jehova leh a Fapa entawn kan duhna pawh a ṭhang chho ve zêl ang a. Bible-in a târ lan angin, Pathian ngaihtuah dân nêna inmila thu tlûkna siam pawh kan tum lehzual ang. Chu bâkah, kan thiltih engkima kan Pa vâna mi kan tihlâwm avângin, kan hlim lehzual bawk ang.
[Milem]
Kan inchei dânte chu kan awmna hmun azirin inang lo thei mah se, kan duh thlanna siamah Bible thu bulte chu kan inthununtîr tûr a ni