Engtin Nge Chhûngkaw Hlim I Neih Theih Ang?—Ṭhen 1

Innei tharte chuan an inneih nîa an hlimnain chatuan a daih an ring a. A daih thei rêng a ni. Hun rei tak chhûng innei tawh a, Bible thurâwn nunpui tum tlattu Kristiante chuan chu chu thil theih a ni tih an hria a ni.

1. Bible-in pasalte hnênah eng thurâwn nge a pêk?

Jehova chuan pasal chu chhûngkaw lû atân a ruat a. (Ephesi 5:23 chhiar rawh.) Ani chu chhûngkuain a hlâwkpui tûr thu tlûknate siam tûrin a beisei a ni. Bible chuan pasalte chu: “In nupuite hmangaih rawh u,” tiin thurâwn a pe. (Ephesi 5:25) Eng nge a awmzia? Hmangaihna nei tak pasal chuan a nupui chu inah leh vântlâng hmaah ngilnei takin a cheibâwl a. Thil ṭha lo lakah vênghimin, a tisa lam leh rilru lam mamawhte chu theih tâwp chhuahin a ngaihsak a ni. (1 Timothea 5:8) A pawimawh ber chu, a thlarau lam mamawh ngaihsaknaah hma a hruai hi a ni. (Matthaia 4:4) Entîr nân, a nupui chu a ṭawngṭaipuiin, Bible a chhiarpui thei a. Pasalin hmangaihna nei taka a nupui a ngaihsak hian Jehova nêna an inṭhianna a vawng ṭha a ni.—1 Petera 3:7 chhiar rawh.

2. Bible-in nupuite hnênah eng thurâwn nge a pêk?

Pathian Thu chuan nupui chu “a pasal hlau thiam,” a nih loh leh zah hle tûrin a ti a. (Ephesi 5:33) Engtin nge chutiang chuan a tih theih ang? Ani chuan a pasal mize ṭhate leh amah leh an fate enkawl tûra theih tâwp a chhuahna chu a ngaihtuah thei a. A pasal thu tlûkna siamte zahin leh thlâwpna hmangin a ti thei a; Jehova betu a nih loh pawhin ngilnei taka a chungchâng thu sawiin leh amah biain, a zahzia a lantîr thei bawk.

3. Engtin nge nupate’n an inneihna an tihngheh theih?

Bible chuan nupate chungchângah: “An pahnih chuan tisa pumkhat an lo ni tawh ang,” a ti a. (Matthaia 19:5) Chumi awmzia chu inṭhenna awmtîr theitu eng thil pawh an do tûr tihna a ni. Hun hmang dûn ziahin leh an ngaihtuahna leh rilru vei zâwngte chu inhawng tak leh hmangaihna nei taka inhrilh tawn ziahin, chutiang chuan an ti a ni. Thil dang, a nih loh leh mi dang tupawh aiin—Jehova tih lovah chuan—an kawppuite an dah pawimawh zâwk a. A bîk takin mi dang tu nên mah inlaichînna inâwm lo tak nei lo tûrin an fîmkhur hle a ni.

ZIR BELHIN HMUH BELH RAWH

4. Pasalte u—in nupuite hmangaihin, ngaihsak rawh u

VIDEO: Pasalte U, Mahni In Inhmangaih Angin In Nupuite Hmangaih Rawh U (9:53)

• Pasalin a nupui a hmangaihin a ngaihsak a ni tih a lantîr theih dân kawng ṭhenkhat chu eng nge ni?

Kolossa 3:12 chhiarin, he zawhna hi sawiho vang che u:

• Engtin nge pasal chuan hêng miziate hi an nupa inkârah a lantîr theih?

5. Nupuite u—in pasalte hmangaihin zah rawh u

Bible chuan nupui chu a pasalin Jehova rawng a bâwl emaw, bâwl lo emaw pawh ni se, zah thiam tûrin a fuih a. Petera thawn khat 3:1, 2 chhiarin, hêng zawhnate hi sawiho vang che u:

• Ring lotu pasal nei i nih chuan, ani chu Jehova betu rawn ni tûrin i duh ngei ang. Eng hi nge hlawhtling zâwka i rin—a hnêna thu hrilh reng nge ni a, nungchang ṭha leh zahna lantîr zâwk? Engvângin nge?

Nupate chuan thu tlûkna ṭhate an siam dûn thei a. Mahse, a châng chuan nupui chuan a pasal thu tlûkna siam chu a pawm lo mai thei. Chutiang hunah chuan, a ngaihtuahnate chu dam tak leh zah thiam takin a sawi chhuak thei a; mahse, an chhûngkaw tâna thu tlûkna ṭha ber siam tûrin Jehova’n a pasal hnênah mawhphurhna a pe tih a hre tûr a ni. A pasal thu tlûkna siam chu theih tâwp chhuahin a thlâwp tûr a ni a. Chutianga a tih chuan, an inah hlimna a awmtîr dâwn a ni. Petera thawn khat 3:3-5 chhiarin, he zawhna hi sawiho vang che u:

• Nupuiin a pasal chunga zahna a lantîr hian Jehova engtin nge a awm?

6. In inneihnaa harsatna awmte i hmachhawn thei

VIDEO: Inneihna Tihngheh Theih Dân (5:44)

• Video-ah khân nupate chu an inhlat telh telh tih târ langtu thil ṭhenkhat chu eng nge ni?

• An inneihna tinghet tûrin eng nge an tih?

Korinth thawn khat 10:24 leh Kolossa 3:13 chhiar rawh. Bible chângte chhiar hnuah he zawhna hi sawiho vang che u:

• Engtin nge he thurâwn zawmna hian inneihna a tihngheh theih?

Bible chuan kan inchawimawi tawn tûr a ni tih a sawi a. A awmzia chu ngilnei tak leh zah thiam taka incheibâwl tawn tihna a ni. Rom 12:10 chhiarin, hêng zawhnate hi sawiho vang che u:

• Nupate chuan an kawppuite’n an chawimawi hmasak hun an nghâk tûr a ni em? Engvângin nge?

KHAIKHAWMNA

Nupate chu an inhmangaih tawn a, an inzah tawn a, Bible thu bulte an nunpui hian an hlim thei.

Ennawnna

• Engtin nge pasal chuan inneihnaa hlimna a belhchhah theih?

• Engtin nge nupui chuan inneihnaa hlimna a belhchhah theih?

• Kawppui nei i nih chuan eng Bible thu bulin nge in inneihna tinghet tûra ṭanpui thei che?

HRIAT BELH NAH

Chhûngkaw nun hlim nei thei tûra nangmah ṭanpui theitu che rawtna ṭangkai takte chhiar rawh.

Chhûngkaw Hlim Engtin Nge I Neih Theih? (brochure)

Inneihnaa Pathian thurâwn zawm a hlâwknate târ langtu music video en rawh.

Ka Hmangaih Tak Zet Che (4:26)

Pasal lû nihnaa intulût tih awmzia bih chiang rawh.

“Hmeichhiate U, Engvângin Nge Lû Nihna Hnuaiah In Intukluh Ang?” (Vênnainsâng, May 1, 2010)

Engtin nge nupa tuak khatin inṭhenna pawh tiamin, harsatna lian tak an neihte chu an chinfel?

Pathian Ṭanpuinain Kan Inneihna Kan Din Ṭha Leh Thei (5:14)