‘Thawhlehna Hmasa Ber’—Tûnah A Thleng Mêk!

“Kristaa thi tawhte chu an tho hmasa ang.”​—1 THESSALONIKA 4:16.

1, 2. (a) Thi tawhte tân beiseina eng nge awm? (b) Eng ṭanchhanin nge thawhlehna i rin? (Footnote en rawh.)

“MI NUNGDAMTE chuan an la thi dâwn tih an hre si a.” Adama’n thil sual a tih aṭang khân he thu hi a thleng dik a ni. Mihringte chanchin tluan chhuakah hian, mihring piang chhuak tawh phawt chuan atâwp atâwpah chuan a la thi dâwn tih a hria a, mi tam takte chuan: ‘Thih hnuah eng thil nge lo thleng ang? Engtin nge mitthite chu an awm?’ tih an ngaihtuah a. Bible chuan: “Mitthi erawh chuan engmah an hre lo,” tiin a chhâng a ni.​—Thuhriltu 9:5.

² Chuti a nih chuan, thi tawhte tân beisei tûr engemaw a awm em? Awm e. Dik takin, mihringte tâna atîra Pathian thiltum thleng famkim tûr chuan mitthi tawhte tân beiseina a awm ngei tûr a ni. Kum zabi tam tak chhûngin, Pathian chhiahhlawh rinawmte chuan Setana tiboral a, a pawi lo khawih tawhte sût leh tûr Jehova min tiam Thlah chu an lo ring a. (Genesis 3:15) An zînga a tam zâwkte chu an thi tawh a ni. Chûng mite’n chu thutiam leh Jehova thutiam dangte thlen famkimna hmu tûr chuan, thihna ata kaihthawh an nih a ngai dâwn a ni. (Hebrai 11:13) Chu chu thil theih a ni em? Ni e. Tirhkoh Paula chuan: “Mi fel leh fel lote thawhlehna a awm ang,” tiin a sawi a ni. (Tirhkohte 24:15) Ṭum khat chu Paula chuan tleirâwl Eutuka, in chhâwng thumna aṭanga a tlâk avânga ‘thia an chhar’ chu a kaitho va. Hei hi Bible-a chhinchhiah mitthi kaihthawh pakuate zînga a hnuhnûng ber chu a ni.​—Tirhkohte 20:​7-12.a

3. Johana 5:​28, 29-a chhinchhiah Isua ṭawngkam aṭang chuan eng thlamuanna nge mi mal taka i hmuh a, engvângin nge?

³ Hêng thawhlehna pakuate hian Paula thusawi rinna chhan tûr lungphûm chu a siam a. Chûng chanchinte chuan: “A hun a thleng dâwn ta, chutih hunah chuan thlâna awm zawng zawngin [Isua] aw an hria anga, an chhuak vek ang,” tih Isua thutiam kan rinna chu a tinghet a ni. (Johana 5:​28, 29) A va phûrawm tak êm! An hmangaih tak chân ta mi maktaduai tam takte tân chuan a va thlamuanthlâk tak êm!

4, 5. Eng thawhlehna chi hrang nge Bible-in a sawi a, a eng ber hi nge he thuziakah hian kan sawiho ang?

⁴ Tholeh a tam zâwkte chu Pathian Lalram awpna hnuaia remna leiah hian an lo nung leh ang. (Sâm 37:​10, 11, 29; Isaia 11:​6-9; 35:​5, 6; 65:​21-23) Amaherawhchu, thawhlehna chi dang chu chu mi hmain a thleng tûr a ni. A hmasain, Pathian hnêna kan tâna a inthawina hlutna hlân tûrin Isua Krista chu a tholeh phawt tûr a ni a. Isua chu C.E. 33-ah a thiin, kaihthawh leh a ni bawk.

⁵ A dawtah chuan, hriak thih “Pathian Israelte” chuan ‘kumkhuaa Lalpa hnêna an awmna’ tûr vân lam ropuinaah chuan Lalpa Isua Krista chu an va fin ang. (Galatia 6:16; 1 Thessalonika 4:17) He thilthleng hi ‘thawhlehna hmasa ber’ tia koh a ni. (Thu Puan 20:6) Chu thawhlehna hnuah chuan, Paradis-a chatuana nunna nei tûra mi maktaduai tam takte leia kaihthawh hun a lo thleng ang. Hei vâng hian, kan beiseina chu vân lam a ni emaw, lei lam a ni emaw pawh ni se, ‘thawhlehna hmasa ber’ chu kan ngaihven hle a ni. Chu chu eng ang thawhlehna nge ni? Eng tikah nge a thlen?

“Taksa Eng Ang Puin Nge?”

6, 7. (a) Hriak thih Kristiante vâna an lâwn hmain, an chungah eng thil nge thleng tûr a nih? (b) Eng ang taksa puin nge an thawh leh ang?

⁶ Tirhkoh Paula chuan Korinth khuaa mite hnêna a lehkha thawn hmasa zâwkah, thawhlehna hmasa ber chungchângah zawhna a siam a ni: “Mitthite chu engtin nge kaihthawhin an awm dâwn? Taksa eng ang puin nge an lo kal dâwn?” tiin. Tichuan, chu zawhna chu chhângin: “Nangmah ngeiin i tuh ṭhin pawh hi a thih zet loh chuan tihnunin a awm hlei nêm . . . nimahsela Pathianin ama duh ang zêlin taksa a pe ṭhîn . . . Vân taksa ropuina chu a dang a, lei taksa ropuina chu a dang a ni,” tiin a sawi.​—1 Korinth 15:​35-40.

⁷ Paula thusawite chuan thlarau thianghlima hriak thih Kristiante chu vân lama an lâwmman an dawn hmain an thih phawt a ngai tih a târ lang. An thih chuan, an lei lam taksa chu vaivutah a kîr leh a ni. (Genesis 3:19) Pathian hun ruatah chuan, anni chu vâna awm theihna tûr taksa neia kaihthawh an ni. (1 Johana 3:2) Pathianin an hnênah thih theih lohna a pe bawk. Chu chu ṭhenkhatin pian tirh aṭanga nei nia an inhriat thlarau thi thei lo tia an sawi hi a ni lo. Paula chuan: “He thi thei pawh hian thih theih lohna a sin bawk tûr a ni,” a tih avângin. Thih theih lohna hi Pathian thilpêk a ni a, thawhlehna hmasa bera telte “sin” tûr hi a ni.​—1 Korinth 15:​50, 53; Genesis 2:7; 2 Korinth 5:​1, 2, 8.

8. Engtin nge Pathianin 1,44,000-te chu kohhran hrang hranga mite zîng aṭangin a thlang lo tih kan hriat theih?

⁸ Mi 1,44,000-te chauh chu thawhlehna hmasa berah an tel a. Jehova chuan Isua a kaihthawh hnu lawk, C.E. 33 Pentikost nîah chuan chuta tel tûrte chu a thlang ṭan a ni. ‘An chalah [Isua] hming leh a Pa hming a inziak’ ṭheuh va. (Thu Puan 14:​1, 3) Hei vâng hian, anni chu kohhran hrang hrang aṭanga thlan chhuah an ni lo. An vai hian Krista zuitu an ni a, Pa hming​—Jehova​—chu chhuang takin an pu vek a ni. Kaihthawh an nih chuan, vâna an hna thawh tûr chu an dawng a. Chutianga mi dang tumah kaltlang lova Pathian rawng an bâwl thei chu an tân chuan a phûrawm tak zet a ni.

Tûnah A Thleng Mêk?

9. Engtin nge Thu Puan 12:7 leh 17:14 chuan thawhlehna hmasa ber inṭan hun chhût thiam tûra min ṭanpui?

⁹ Eng tikah nge thawhlehna hmasa ber chu a thlen? Tûnah a thleng mêk a ni tih fiahna chiang tak a awm a ni. Entîr nân, Thu Puan bu chhûnga bung pahnih hi han khaikhin teh. A hmasain, Thu Puan bung 12 chu han en la. Chutah chuan lal thar Isua Krista chuan a vântirhkoh thianghlimte nên Setana leh a ramhuai hote chu an do thu kan chhiar a. (Thu Puan 12:​7-9) He magazine-a thuziakin a târ lan fo ṭhin angin, chu indona chu kum 1914-ah a inṭan a ni.b Mahsela, chu vân lam indonaah chuan Krista zuitu hriak thihte tumah hi Isua kianga an awm thu sawi lan a ni lo tih chhinchhiah rawh. Tûnah chuan, Thu Puan bung 17 chu lo en leh ta ila. Chutah chuan “Babulon Khaw Ropui” tihchhiat a nih hnuah Berâm No chuan hnamte chu a hneh tûr thu kan chhiar a ni. Tichuan, heti hian a sawi belhchhah a ni: “A hnêna awm, kohva te, thlana te, rinawma te chuan an hneh bawk ang,” tiin. (Thu Puan 17:​5, 14) “Kohva te, thlana te, rinawma te” chu Setana khawvêl hnehna hnuhnûng bera Isua kianga awm tûr chuan anni chu an tholeh vek tawh tûr a ni. Chuti a nih chuan, hriak thih Armageddon hmaa thite chu kum 1914 leh Armageddon inkâr vêla kaihthawh an ni ngei dâwn a ni.

10, 11. (a) Upa 24-te chu tute nge ni a, an zînga pakhat chuan Johana hnênah eng nge a hrilh? (b) Heta ṭang hian eng nge kan hriat theih?

¹⁰ Thawhlehna hmasa ber a inṭan hun chu dik lehzualin kan sawi thei em? Chu mi chhui chhuah theihna chanchin ngaihnawm tak mai chu Thu Puan 7:​9-15, tirhkoh Johana’n “mipui tam tak tuma chhiar sên loh” a hmuhna inlârnaah hian kan hmu a ni. Upa 24 zînga pakhatin Johana hnênah chu mipui tam takte nihna chu a hrilh a, chûng upate chuan an vân lam ropuina nêna Krista rorêl pui mi 1,44,000 te ai chu an awh a ni.c (Luka 22:​28-30; Thu Puan 4:4) Johana ngei chuan vân lam beiseina a nei a; mahse, upain a biak lai chuan leia a la awm si avângin, chu inlârnaah Johana chuan leia hriak thih a la bâng, vâna an lâwmman la hmu rih lote chu a entîr ngei ang.

¹¹ Chuvângin, upa 24 zînga pakhatin Johana hnêna mipui tam tak chanchin a hrilhna aṭangin eng nge kan hriat theih? Upa 24 zînga mi kaihthawh tawhte chu tûn lai huna Pathian thu, thutak sawi chhuahnaah an tel niin a lang. Engvângin nge chu chu a pawimawh? A chhan chu kum 1935 khân mipui tam takte nihna dik tak chu leia Pathian chhiahhlawh hriak thihte hnêna puanchhuah a nih vâng a ni. Chu thutak pawimawh tak hrilh chhâwng tûra upa 24 zînga pakhat hman a nih chuan, ani chu a lo berah pawh kum 1935-ah vâna kaihthawh a ni tawh ngei tûr a ni. Chu chuan thawhlehna hmasa ber chu kum 1914 leh 1935 inkâr vêla inṭan a ni tih a târ lang. A hun chu chiang lehzualin kan sawi thei em?

12. Kum 1918 ṭhâl lai chu thawhlehna hmasa ber inṭanna anga ngaih theih a nih chhan sawifiah rawh.

¹² Tûnah tak hian, Bible-a thilthleng tawh zulzuia thil ngaihtuah chu a ṭangkai thei ang. C.E. 29 tâwp dâwn lamah khân, Isua Krista chu Pathian Lalrama lal ni tûra hriak thih a ni a. Kum thum leh a chanve hnu, C.E. 33 ṭhâl lai chuan thlarau thiltithei tak nia kaihthawh a ni. Chuti chu, kum 1914-a Isua lala a ṭhut aṭang chuan, amah zuitu hriak thih rinawmte kaihthawhna chu kum thum leh a chanve hnu, 1918 ṭhâl lai vêlah a inṭan tih chu a âwm ang em? Chu chu thil ni thei âwm tak leh ngaihven awm tak chu a ni. Hei hi Bible hmanga nemngheh theih ni chiah lo mah se, Krista lo awm lehna inṭan hnu lawka thawhlehna hmasa ber a inṭan tih târ langtu Bible châng dangte nên erawh a inmil a ni.

13. Eng kawngin nge 1 Thessalonika 4:​15-17 chuan thawhlehna hmasa ber chu Krista lo awm lehna ṭan tîr lama thleng anga a sawi hmuh?

¹³ Entîr nân, Paula chuan heti hian a ziak a ni: “Keini Lalpa lo kal [“lo awm lehna,” NW] thlenga [a lo awm lehna tâwp thleng, a ti lo] nunga lo la awm rengate hian muhîl tawhte chu kan lehkhalh tawp lo vang tih hi. Lalpa ngei chu au thâwm nên, vântirhkoh chungnung ber aw nên, Pathian tawtawrâwt ri nên, vân aṭangin a lo chhuk dâwn si a; tin, Kristaa thi tawhte chu an tho hmasa ang a; chu mi hnuah chuan keini nunga lo la awm rengte hi boruakah Lalpa hmuak tûrin anmahni rualin chhûm zîngahte khian lâk chhohvin kan awm ang; chutichuan kumkhuain Lalpa hnênah ka awm tawh ang,” tiin. (1 Thessalonika 4:​15-17) Chuvâng chuan, Krista lo awm leh hmaa thi hriak thih Kristiante chu, Krista lo awm leh huna la damte aiin vân nunna chang tûra kaihthawh hmasak an ni. Chu mi awmzia chu thawhlehna hmasa ber chu Krista lo awm lehna ṭan tîr lamah a thleng ṭan tihna a ni ngei ang a, chu chu “a lo awm leh chhûng” zawngin a thleng chhunzawm zêl a ni. (1 Korinth 15:​23, NW) A ruala vawi lehkhata kai tho vek lovin, thawh lehna hmasa ber chu hun engemawti chhûnga thilthleng a ni.

“An Hnênah Chuan Puan Vâr An Pe Ṭheuh”

14. (a) Thu Puan bung 6-a chhinchhiah inlârna chu engtik khân nge a thlen famkim? (b) Thu Puan 6:​9-ah eng nge târ lan a nih?

¹⁴ Thu Puan bung 6-a finfiahna chuang hi ngaihtuah bawk teh. Chutah chuan Isua chu hneh chung zêla sakawr chunga chuang Lal anga hmuh a ni a. (Thu Puan 6:2) Indona nasa takah chuan hnamte chu an tel a ni. (Thu Puan 6:4) Hmun tam takah ṭâm a tla a. (Thu Puan 6:​5, 6) Thihna hri chuan mihringte a suasam a ni. (Thu Puan 6:8) Hêng hrilh lâwkna zawng zawngte hian kum 1914 aṭanga khawvêl dinhmun chu a mil chiang hle. Mahse, thil dang daih a thleng a. Inthawina maichâm chanchin sawi a ni. Chu mi bulṭhutah chuan, “Pathian thu avâng leh an pawm hriattîrna thu avânga thlahte thlarau,” a nih loh leh atîra ziakin a sawi angin nunna chu a awm a. (Thu Puan 6:9) “Tisa nunna chu thisenah chuan a awm si” avângin, maichâm bulṭhuta nunna awmin a entîr taka chu Isua chhiahhlawh rinawm, huaisen tak leh taima taka thu an hrilh avânga thahte thisen chu a ni.​—Leviticus 17:11.

15, 16. Thu Puan 6:​10, 11 thu hian thawhlehna hmasa ber chungchâng a kawh chhan hrilhfiah rawh.

¹⁵ Mi fel Abela thisen angin, chûng Kristian martar-te thisen chu phuba ngiatin a au va. (Genesis 4:10) “Anni chuan aw ring takin, ‘Aw Lalpa mi thianghlim leh dik tak, eng chen nge rorêl lovin leia awmte chungah kan thisen chhuahna phuba chu la lova i awm dâwn le?’ tiin an au va.” A dawtah eng nge lo thleng? “An hnênah chuan puan vâr an pe ṭheuh va; tin, an bâwihpuite leh an unaute anmahni ang bawka thah tûrte chu an thah kim hma loh chuan an la nghâk rih tûr a ni tih an hrilh a.”​—Thu Puan 6:​10, 11.

¹⁶ Hêng puan vârte hi maichâm bulṭhuta thisen awm khâwm hnêna pêk a ni em? Ni lo ve! Puan vârte chu maichâma an thisen tihchhuahsakte hnêna pêk a ni a. Anni chuan Isua hmingin an nun an chân a, tûnah chuan thlarauva kaihthawh an ni tawh a ni. Engtin nge chu chu kan hriat theih? Thu Puan bu hmasa lamah heti hian kan chhiar a ni: “A hnehtu apiang chutiangin puan vârte sintîr an ni ang; tin, Nunna Bu ata an hming chu ka thai bo tawp lo vang,” tiin. Tin, upa 24-te chuan ‘puan vâr sinin, rangkachak lallukhumte an khum’ tih kha hre chhuak leh bawk rawh. (Thu Puan 3:5; 4:4) Chuvângin, indo te, ṭâm te, leh hri lêng te chuan leilung a suasam hnuah, maichâm bulṭhuta thisenin a entîr 1,44,000 zînga mi a thi tawhte chu vân nunna changa kaih thawh an ni a, entîr nei puan vâr chu sintîr an ni.

17. Puan vâr pêkate chuan eng kawngin nge an ‘nghah rih’ a ngaih?

¹⁷ Chûng kaihthawh hlimte chuan an “nghâk rih” tûr a ni. Pathian phuba lâkna nî chu dawhthei takin an nghâk tûr tihna a ni. Hriak thih Kristian leia la awm, an “bâwihpuite” chuan fiahna hnuaiah an rinawmna chu an lantîr a la ngai a. Pathian phuba lâkna nî a lo thlen hunah chuan, an ‘nghah rih’ hun chu a tâwp ang. (Thu Puan 7:3) Chutih hunah chuan, kaihthawhte chuan chûng Kristian pawisawi lote thisen chhuahtute pawh tiama mi suaksualte tihboralnaah Lalpa Isua Krista chu an thawhpui ang.​—2 Thessalonika 1:​7-10.

Kan Tâna Awmzia A Neih Chu

18, 19. (a) Engvângin nge Thawhlehna hmasa ber chu a thleng mêk kan tih theih? (b) Thawhlehna hmasa ber i hriatthiamna chuan engtin nge a awmtîr che.

¹⁸ Pathian Thu chuan thawhlehna hmasa ber thlen hun dik chiah chu a târ lang lo va; mahse, Krista lo awm lehna hun chhûng, hun engemawti chhûnga thilthleng a ni tih erawh a târ lang. Kaihthawh hmasak ber tûrte chu Krista lo awm leh hmaa thi tawh Kristian hriak thihte an ni a. Krista lo awm lehna hun kan hman chhoh mêk hian, hriak thih Kristian an lei lam nun rinawm taka hmang zo tawhte chu “mit khap kâr lovah” thlarau thil siam thiltithei takah an inthlâk thleng a ni. (1 Korinth 15:​51, 52) Hriak thih zawng zawngte hian Armageddon indona a lo thlen hmain an vân lam lâwmman chu an hmu vek ang em? Chu chu kan hre lo. Amaherawhchu, Pathian hun ruatah chuan 1,44,000-te chu an zain vân lam Zion Tlângah an ding dâwn tih erawh kan hria a ni.

¹⁹ Mi 1,44,000 zînga a tam zâwkte chu Krista hnênah an awm tawh tih pawh kan hre bawk. Tlêm tê chauh hi leiah hian an la bâng a ni. Hei hi Pathian rorêl hun a thleng thuai dâwn tih chiang taka târ langtu a va ni tak êm! Rei lo têah Setana khawvêl zawng zawng hi tihchhiat vek a ni ang a. Setana ngei chu leilâwtah khung a ni ang. Tichuan, mi nâwlpuite thawhlehna chu a inṭan thei ang a, mihring rinawmte chu Isua tlanna inthawina zârah Adama hloh tawh ṭhat famkimnaah hlân kai theih an ni tawh ang. Jehova hrilh lâwkna Genesis 3:​15-a chhinchhiah chu ropui takin a thleng famkim mêk a ni. Hetiang hun laia nun hi chanvo ropui a va ni tak êm! (w07 1/1)

[Footnote-te]

I Hrilhfiah Thei Em?

Engtin nge a hnuaia Bible chângte hian ‘thawhlehna hmasa ber’ thlen hun hre thiam tûra min ṭanpui?

• Thu Puan 12:7; 17:14

• Thu Puan 7:​13, 14

• 1 Korinth 15:23; 1 Thessalonika 4:15-17

• Thu Puan 6:​2, 9-11

[Phêk 28-naa milemte]

Mi nâwlpuite kaihthawh an nih hmain eng thawhlehna nge thleng?