Nun leh Rawngbâwlna Inzirna Lehkhabu Atâna Thu Lâk Chhuahnate
MAY 6-12
PATHIAN THU AṬANGA RO HLUTE | 2 KORINTH 4-6
“Kan Dawl Lo”
(2 Korinth 4:16) Chu mi avângin kan dawl lo va, kan pâwn lam mihring hi lo awngrawp telh telh mah sela, kan chhûng lam mihring chu ni tin siam thar zêlin a awm zâwk a ni.
Hah Chung Pawha Chau Chhe Lo
16 Kan thlarau lam hrisêlna ngaihsak chu a pawimawh hle a. Pathian Jehova nêna inlaichînna hnai tak kan neihin, kan taksa lam chu a chau mai thei; mahse, amah chibai kan bûknaah kan chau ngai lo vang. Jehova chuan “chau hnênahte chuan thiltihtheihna a pe ṭhîn a; chakna rêng rêng nei lote chu a tichak ṭhîn” a ni. (Isaia 40:28, 29) Hêng thute dikzia mahni ngeia tawngtu tirhkoh Paula chuan: “Kan dawl lo va, kan pâwn lam mihring hi lo awngrawp telh telh mah sela, kan chhûng lam mihring chu ni tin siam thar zêlin a awm zâwk a ni,” tiin a ziak a ni.—2 Korinth 4:16.
17 “Ni tin” tih ṭawngkam hi lo chhinchhiah rawh. Hei hian ni tina Jehova thil min pêkte dawn a kâwk a ni. Kum 43 chhûng rinawm taka missionary rawngbâwl tawh nu pakhat chuan taksa lama chauhna leh manganna hunte a tâwk a. Mahse, a chau chhe lo. Ani chuan: “Hna dang ṭan hmaa Jehova hnêna ṭawngṭai leh a Thu ka chhiar theih nân zîng ka tho hma ṭhîn a. He tih dân hian tûn thlenga chhel tûrin min ṭanpui a ni,” a ti. Ni e, “ni tin” a hnêna ṭawngṭai a, a mizia ropui tak takte leh a thutiamte kan chhût ziah chuan, Jehova tihchaknaah kan innghat thei tak zet a ni.
(2 Korinth 4:17) Kan hrehawm nêp tak, tûn mit khap kâr chhûng chauhva awm tûr hian ropuina nasa tak chatuan atân min siamsak nasa tulh tulh a ni;
it-1-E 724-725
Chhelna
Kristian beiseina—sualna nei lova chatuan nun—thlîr reng chu thil pawimawh tak a ni a. Chu beiseina chu tiduhdahtute kuta thihna hial pawhin a tibo thei lo. (Rom 5:4, 5; 1 Thes. 1:2-3; Thup. 2:10) Tûna kan hrehawm tawrhte hi, chu beiseina ropui tak thleng famkim tûr nêna khaikhin chuan nêp tak a ni a. (Rom 8:18-25) Tûna kan hrehawm tawrhte chu engpawh niin, nasa hle mah se, chatuan nun nêna khaikhin chuan, “nêp tak, tûn mit khap kâr chhûng chauhva awm,” a ni. (2 Kor. 4:16-18) Mi chuan hrehawm a tawrhte chu rei lo tê chhûng chauh a ni tih a hriat a, Kristian beiseina a vawn ngheh tlat chuan, chu chuan beidawng lo tûr leh Pathian Jehova chunga rinawm tlat tûrin a veng thei a ni.
(2 Korinth 4:18) thil hmuh theihte hi en lovin, thil hmuh theih lohte chu kan en zâwk si a; thil hmuh theihte hi rei lo tê atân a ni a, thil hmuh theih lohte erawh chu chatuan atân a ni si a.
Thlarau Lam Lunghlute Laih Chhuahna
(2 Korinth 4:7) Nimahsela thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni.
w12-E 2/1 28-29
“Jehova Hlimna Thlen Rawh”
Governing Body member David Splane-a chuan chu Bible chânga thu chu ngun takin a bih chiang a. (2 Korinth 4:7) Ro tih chu eng nge ni? Hriatna, a nih loh leh finna a ni em? “Ni lo,” tiin thusawitu chuan a chhâng a. “Tirhkoh Paula sawi ro chu ‘thutak hriattîrna’ ‘he rawngbâwlna,’ hi a ni,” tiin a sawi. (2 Korinth 4:1, 2, 5) Unau Splane-a chuan zir laite chu inzir nâna an hman thla nga chhûng chu rawngbâwlna chanvo pawimawh tak atâna inbuatsaihna a nih thu a hriatnawntîr a. Chu chanvo chu ngaihhlut hle tûr a ni.
Thusawitu chuan ‘hlum bêl’ chu mihring taksa sawina a ni tiin a hrilhfiah a. Hluma siam bêl leh rangkachaka siam bêl inan lohna chu a sawi a. Rangkachaka siam bêlte chu hman a ni lo tlângpui. Mahse, hluma siam bêl erawh chu hman atâna siam a ni a. Rangkachaka siam bêlah ro kan dah chuan, bêl chhûnga awm ro kan ngaihven ang tlukin a bêla pawh chu kan ngaihven ngei ang. Chuvângin, “Nangni zir laite chuan mahni inngaihventîr chu induh lo va. Missionary in nih angin, mite chu Jehova ngaihventîr in duh a. Nangni chu hlum bêl tlâwm takte in ni,” tiin Unau Splane-a chuan a sawi a ni.
(2 Korinth 6:13) Tichuan, in chunga kan tih ang bawk khân, nangni pawh kan lakah inhawng ve tûrin fate ngenin kan ngên a che u.
Unaute Hmangaihna Nei Lehzual Rawh U
7 Keini kan inhawng ve em? Engtin nge unaute hmangaihna lantîrna kawngah chuan kan ‘inhawn’ ve theih ang? Kan rualpui emaw, kan hnampui emawte chunga unaute hmangaihna lantîr chu a awlsam viau thei a. Tin, intihhlimna ngainatzâwng inangte pawhin hun an hmang tlâng hnem hle thei bawk. Mahse, Kristian ṭhenkhatte nêna kan tuizâwng a inanna chuan a dangte laka min tihhran chuan, kan ‘inhawn’ a ngai a ni. Chuvângin, hetianga inzawh hi a finthlâk ang: ‘Ka ṭhian hnaite zînga mi ni lo unaute nên hian rawngbâwlnaah emaw, thiltih dangah emaw ka kal chhuak khât viau em? Kingdom Hall-a mi tharte chu ṭhiana siam tlâk an nihzia an lantîr hma loh zawng ka kâwm hreh deuh vem? Kohhrana mi a pui a pangte chu ka biain, ka kâwm vek em?
Bible Chhiar
(2 Korinth 4:1-15) Chu mi avâng chuan khawngaihna kan hmuh ang zêla he rawngbâwlna hi kan neih avângin kan dawl lo va; 2 thil zahthlâk inthupte chu kan malmâk ta zâwk a, ngamthlêmna thu kan hmang lo va, Pathian thu mi bum nân kan hmang hek lo; thutak hriattîrin Pathian mithmuhin mi tin chhia leh ṭha hriatna mit kan intluntîr zâwk ṭhîn a ni. 3 Nimahsela, kan Chanchin Ṭha hi khuha a awm chuan boral mêkahte hian a ni, khuha a awm ni; 4 Krista, Pathian anpui, a ropuizia Chanchin Ṭha êng chuan anmahni a chhun ên theih lohna tûrin chûngahte chuan he khawvêl pathian hian ring lote rilru a tidel ta a. 5 Mahni thu kan hril si lo va, Krista Isua chu Lalpa a nih kan hril zâwk ṭhîn a, keini pawh Isua avânga in bâwih kan nih kan hril bawk ṭhîn. 6 Isua Krista hmêlah chuan Pathian ropuizia hriatna êng chu mi pe tûrin, “ Thim ata êng a êng chhuak ang,” titu Pathian chuan kan thinlungte hi a chhun êng ta si a. 7 Nimahsela, thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni. 8 Lehlam lehlama nêksâwrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; 9 tihduhdahin kan awm a, nimahsela kalsanin kan awm si lo; vuak thlûkin kan awm a, nimahsela tihboralin kan awm si lo; 10 kan taksaah hian kumkhuain Isua thihna chu kan pu zêl ṭhîn a, Isua nunna pawh kan taksaah hian a lan theih nân. 11 Keini mi nungdama la awmte hi Isua avânga thi tûra mantîrin kan awm fo va, Isua nunna pawh kan tisa thi theiah hian a lan theih nân. 12 Chutichuan, keimahniah hian thihnain a thawk ṭhîn a, nangniah erawh chuan nunnain a thawk zâwk ṭhîn a ni. 13 Amaherawhchu, “Ka ring a, chuvângin thu ka sawi a ni,” tih ziak ang khân, chu mi rinna rilru ngei puin keini pawhin kan ring ve a, chuvângin thu kan sawi bawk a; 14 Lalpa Isua kaithotu chuan keini pawh Isua hnênah min kaitho ve dâwn a, nangmahni nên min dintîr dâwn tih kan hre si a. 15 Engkim nangmahni ṭhatna tûr a ni si a, khawngaihna chu mi tam zâwk zâra tihpuna awmin, Pathian ropuina tûrin lâwmthu nasa tak a sawitîr theih nân.
MAY 13-19
PATHIAN THU AṬANGA RO HLUTE |2 KORINTH 7-10
“Kan Chhawmdâwl Rawngbâwlna”
(2 Korinth 8:1-4) Tin, unaute u, Makedonia rama kohhranho pâwlte zînga Pathian khawngaihna pêk chu kan hriattîr dâwn a che u; 2 khatia hrehawma fiahna nasa tak chunga an hlimna liam leh nasa taka an retheihna chu a liam a, an thilphalna nasa taka a chan tâkzia kha. 3-4 Khawngaihna, mi thianghlimte rawngbâwla tel ve chu, nasa taka min dîl chiamin, an theih tâwkin, a ni, an theih tâwk aia liam pawh, anmahni duh thu ngeiin an pe tih ka hriatpui asin.
w98-E 11/1 25 ¶1
“Pathian Chuan Hlim Taka Petu A Ni A Hmangaih Ni”
A hmasain, Paula chuan Korinth khuaa mite chu chhawmdâwl rawngbâwlnaa entawn tlâka chhâng lêttu Makedonia rama mite chanchin a hrilh a. Paula chuan: “Khatia hrehawma fiahna nasa tak chunga an hlimna liam leh nasa taka an retheihna chu a liam a, an thilphalna nasa taka a chan tâkzia kha,” tiin a ziak a ni. Makadonia rama mite chu fuih an ngai lo. Chu aiin, Paula chuan anni chu: “Nasa taka min dîl chiamin, an theih tâwkin, a ni, an theih tâwk aia liam pawh, anmahni duh thu ngeiin an pe,” tiin a sawi. Makedonia rama mite chu ‘nasa takin an rethei’ tih kan ngaihtuah hian an thilphalna chu chhinchhiah tlâk tak a ni.—2 Korinth 8:2-4.
kr-E 209 ¶1
Kan Chhawmdâwl Rawngbâwlna
C.E. 46 vêlah, Judia ramah ṭâm nasa tak a tla a. Chuta awm Krista zirtîr Juda mite chuan lei tûr awm chhun buh man to tak leina tûr pawh an nei lo va. An ṭâm tak meuh va, an hmêlah a hriat a ni. Mahse, anni chuan Krista zirtîr dangte’n tûn hmaa an la tawn ngai loh kawngin Jehova humhimna kut chu an tawng dâwn a ni. Eng thil nge thleng dâwn?
(2 Korinth 8:3-4) Khawngaihna, mi thianghlimte rawngbâwla tel ve chu, nasa taka min dîl chiamin, an theih tâwkin, a ni, an theih tâwk aia liam pawh, anmahni duh thu ngeiin an pe tih ka hriatpui asin.
kr-E 209-210 ¶4-6
Kan Chhawmdâwl Rawngbâwlna
4 Korinth khua mite hnêna a lehkha thawn vawi hnihnaah, Paula chuan Kristiante’n rawngbâwlna chi hnih an nei tih a hrilhfiah a. Paula lehkha thawn chu hriak thih Kristiante hnêna ziah ni mah se, a thusawite chu tûn laia Krista “berâm dang” tân pawh hman theih a ni. (Joh. 10:16) Kan rawngbâwlna kawng khat chu “inremna rawngbâwl hna,” a ni a, chu chu kan thu hrilh leh zirtîrna hna hi a ni. (2 Kor. 5:18-20; 1 Tim. 2:3-6) Rawngbâwlna kawng dang leh chu kan Kristian unaute tâna kan rawngbâwlna hi a ni. A bîk takin, Paula chuan ‘chhawmdâwl rawngbâwlna’ a sawina a ni a. (2 Kor. 8:3, 4, C.L. Re-edited.) Heta ‘inremna rawngbâwlna’ leh ‘chhawmdâwl rawngbâwlna,’ tih ṭawngkama ‘rawngbâwlna’ tih thu mal hi Grik thu mal di·a·ko·niʹa aṭanga lehlin a ni. Chu chu engvânga danglam tak nge a nih?
5 Thiltih pahnih sawi nân Grik thu mal pakhat hmangin, Paula chuan chhawmdâwl rawngbâwlna chu Kristian kohhrana thawh ṭhin rawngbâwlna dangte nên inang khatin a dah a ni. Châng hmasa lamah, Paula chuan: “Rawngbâwl dân hrang hrang pawh a awm a, nimahsela Lalpa chu hmunkhat a ni. Hnathawh dân hrang hrang pawh a awm a, . . . nimahsela, thlarau hmunkhat vêk chuan . . . a thawk ṭhîn,” tiin a sawi. (1 Kor. 12:4-6, 11) Dik tak chuan, Paula’n kohhrana rawngbâwlna chi hrang hrang chu “rawngbâwlna thianghlim,” nên a thlun zawm a. (Rom 12:1, 6-8, New World Translation) Chuvângin, “mi thianghlimho rawngbâwl” nâna a hun ṭhenkhat pêk chu a âwm a ni tia a ngai chu a mak lo ve!—Rom 15:25, 26.
6 Paula chuan chhawmdâwl rawngbâwlna chu Jehova tâna rawngbâwlna leh amah an biakna a nih chhan hre thiam tûrin Korinth khuaa mite chu a ṭanpui a. A chhûtpui dân hi lo chhinchhiah teh: Chhawmdâwl rawngbâwlna thawktu Kristiante chu ‘Krista Chanchin Ṭha lama an thurin an zawm,’ avânga chutianga thawk an ni. (2 Kor. 9:13) Chuvângin, Krista zirtîrna nunpui duhtu Kristiante chuan an unaute chu an ṭanpui a. Paula chuan hmangaihna avânga an unaute tâna an thiltihte chu “Pathian khawngaihna nasa êm êm,” tih ṭawngkam aiin a nêp lo tih a sawi a. (2 Kor. 9:14; 1 Pet. 4:10) Chuvângin, chhawmdâwl rawngbâwlna pawh telin, ṭanpui ngai unaute tâna rawngbâwlna chungchângah Vênnainsâng (English) December, 1, 1975 chuan: “Pathian Jehova leh a Fapa Isua Krista chuan hetiang rawngbâwlna hi an ngai pawimawh hle tih kan ringhlel tûr a ni lo,” tiin a sawi. Ni e, chhawmdâwl rawngbâwlna hi rawngbâwlna thianghlim hlu tak a ni.—Rom 12:1, 7; 2 Kor. 8:7; Heb. 13:16.
(2 Korinth 9:7) Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin pe ṭheuh rawh se; Pathian chuan hlim taka petu a ni a hmangaih ni.
kr-E 196 ¶10
Lalram Thiltihte Sum Leh Paia Chhawmdâwl Dân
10 Pakhatnaah, Jehova kan hmangaih vâng leh “a mithmuha thil lâwmawm” tih kan duh avângin phal takin thawhlâwmte kan thawh a. (1 Joh. 3:22) Jehova chu thinlung aṭanga pêk duhna nei, amah betu chungah chuan a lâwm tak zet a ni. Kristiante thilpêk chungchânga tirhkoh Paula thusawi chu i lo bih chiang ang u. (2 Korinth 9:7 chhiar rawh.) Kristian dik tak chu hreh taka petu, a nih loh leh tihluih vânga petu a ni lo. Chu aiin, ani chuan ‘a thinlunga a tum ang zêlin,’ a pe zâwk a ni. Mamawhna leh a ṭanpui theih dânte a ngaihtuah hnuah a pe ṭhîn tihna a ni. ‘Pathian chuan hlim taka petu chu a hmangaih’ ṭhin avângin, chutianga petu chu Jehova’n a lâwm tak zet a ni. Lehlin dangah chuan: “Pathian chuan lâwm taka petu a ni a hmangaih ni,” tiin kan chhiar a ni.
Thlarau Lam Lunghlute Laih Chhuahna
(2 Korinth 9:15) A thilpêk sawi hleih theih loh avângin, Pathian hnênah lâwmthu awm rawh se.
Pathian “Thilpêk Sawi Hleih Theih Loh” Chuan Tîr Lui Che Rawh Se
2 Paula chuan Isua inthawina chu Pathian thutiam ropui takte a thleng famkim ngei dâwn tih tiamkamna a ni tih a hria a. (2 Korinth 1:20 chhiar rawh.) Chu mi awmzia chu, Pathian ‘thilpêk sawi hleih theih lovah’ chuan Isua inthawina leh Pathian Jehova’n kan chunga a lantîr ṭhatna zawng zawng leh hmangaihna rinawm a tel a. Chutiang thilpêk hlu tak chu hriatthiam vek theih tûr khawpa sawifiah theih a ni lo. He thilpêk hlu tak hian engtin nge min awmtîr ang? Engtin nge he thilpêk hian March 23, 2016, Nilainia neih tûr Krista thih Hriatrengna atâna inbuatsaih tûrin min chêttîr ang?
(2 Korinth 10:17) Nimahsela, “A chhuang apiangin Lalpa chu chhuang rawh se.”
g99-E 7/8 20-21
Inchhuan Chu A Sual Em?
Kristian Grik Pathian Lehkha Thu-ah chuan, “chapo, nasa taka lâwm, inchhuang,” tia lehlin thiltih sawina kau·khaʹo·mai, chu a chhe zâwng leh ṭha zâwnga hman a ni ve ve a. Entîr nân, Paula chuan “Pathian ropuina beiseiin lâwmin,” kan awm thei tih a sawi a. “A chhuang apiangin Lalpa chu chhuang rawh se,” tiin a sawi bawk. (Rom 5:2; 2 Korinth 10:17) Jehova chu Pathiana kan neih avângin kan lâwm a, chu chu a hming ṭhatna avânga lâwmna min neihtîrtu rilru put hmang kan nei tihna a ni.
Bible Chhiar
(2 Korinth 7:1-12) Chutichuan, duh takte u, chûng thutiam chu kan neih avângin, tisa leh thlarau bawlhhlawhna zawng zawngah i intifai ang u, Pathian ṭih dêk chunga thianghlimna tifamkimin. 2 In thinlungah hmun min kian rawh u; tu chungah mah kan tisual lo va, tumah kan tikhawlo lo va, tumah kan dinchan khalh lo ve. 3 Chu chu thiam loh chantîr tûr che uin ka ti a ni lo ve; thih leh thi tlâng a, dam leh dam tlâng tûrin kan thinlungah hian kan vawng che u tih hmân lawkah khân ka sawi kha. 4 Nangin lamah chuan ka ṭawng ngamzia hi a nasa a, ka chhuanzia che u hi a nasa a ni; thlamuannain ka khat a, kan hrehawmna zawng zawngah chuan hlimin ka khat liam a. 5 Makedonia ram kan thlen pawh khân, kan tisain muanna rêng rêng a nei chuang lo va, lehlam lehlamah tihhrehawmin kan awm ta zâwk a; pâwn lamah insualnate a awm a, chhûng lamah hlauhnate a awm a. 6 Nimasela, inngaitlâwmte thlamuantu Pathian chuan, Tita lo kalna chuan min thlamuan ta a; 7 a lo kalna chauh chuan a ni lo va, in lunglênzia te, in ṭahzia te, ka chunga in ṭhahnemngaihzia te min hrilhin, nangmahnia a thlamuanna pawh chuan min thlamuan ta a ni; chutichuan ka lâwm lehzual ta a. 8 Ka lehkha thawn khân tilungngai che u mah ila ka inchhîr ta lo; a tîrah erawh kha chuan ka inchhîr a ni, kha lehkha thawn khân a tilungngai che u tih ka hriat avângin; nimahsela rei lo tê chauh a nih kha. 9 Tûnah chuan ka lâwm a ni, tihlungngaiha in awm avâng a ni lo va, simna tûra in lungngaih avâng a ni zâwk e. Keimahni avânga engmah in chân lohna tûrin Pathian duhzâwng anga tihlungngaihin in awm si a. 10 Pathian duhzâwnga lungngaihna chuan chhandamna tûra simna a thlen a, chu chu inchhîrawm lo tak a ni a, Khawvêl lungngaihna erawh chuan thihna a thlen zâwk ṭhîn. 11 Ngai teh mah u, Pathian duhzâwnga tihlungngaiha in awmna chuan thil lâk urhsûnna te, pawi khawih ve lo in ni tih lantîr duhna te, sual huatna leh sual hlauhna te, min ngaihna leh ṭhahnemngaihna te, sual titu thunun zêl tûra inpeihna te a neihtîr tâk che u hi. 12 Chutichuan, in hnênah ziak mah ila, a sual titu avâng khân ka ziak lo va, a sual tuartu avâng khân ka ziak hek lo, kan chunga in ṭhahnemngaihzia Pathian mithmuha in hnêna hriattîra a awm theihna tûrin ka ziak zâwk a ni.
MAY 20-26
PATHIAN THU AṬANGA RO HLUTE | 2 KORINTH 11-13
“Paula ‘Tisaa Hlîng’”
(2 Korinth 12:7) Tin, hriattîrnate chu a nasat êm êm avânga ka inngaihhlut lutuk loh nân tisaah hlîng mi pe a ni, Setana tirhkoh kut thak hnawih nâna mi hmangtu tûr chu; chutilochuan ka inngaihlu lutuk dah ang e.
w08-E 6/15 3-4
Chak Lohnate Nei Chûng Pawha Thiltithei
Chhiahhlawh rinawm dang pakhat chuan Jehova hnênah amah tihrehawmtu ‘tisaa hlîng,’ chu lâkbosak tûrin a dîl a. Tirhkoh Paula chuan chu fiahna ata zalên tûrin Pathian hnênah vawi thum a ngên a ni. Chu chu eng pawh lo ni se, min tihrehawm thei hlîng angin, chu chuan Paula chu Jehova rawngbâwlnaa a hlimna a tikiam thei a ni. Paula chuan, chu chu amah bêngnatu angin a sawi a. Jehova chuan: “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” tiin a chhâng a. Chu tisa hlîng chu a lâk bosak lo. Paula chuan, chu chu a tawrh a ngai a; mahse, “ka chak loh apiangin a ni ka chak ṭhin ni,” tiin a sawi zawm a ni. (2 Kor. 12:7-10) Eng a sawi tumna nge ni?
(2 Korinth 12:8, 9) Chu mi chungchâng thu-ah chuan mi kiansan theih nân Lalpa chu vawi thum ka dîl a. 9 Tin, ani chuan ka hnênah, “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” a ti ta a. Chutichuan Krista thiltihtheihna chu ka chunga a awm theih nân lâwm êm êmin ka chak lohnate hi ka chhuang tawh zâwk ang.
Jehova Chuan “Diltute Chu Thlarau Thianghlim” A Pe
17 Paula ṭawngṭaina chhângin, Pathian chuan a hnênah: “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” a ti a. Tichuan, Paula chuan: “Chutichuan, Krista thiltihtheihna chu ka chunga [“puan in kaih anga,” New World Translation] a awm theih nân lâwm êm êmin ka chak lohnate hi ka chhuang tawh zâwk ang,” a ti a ni. (2 Korinth 12:9; Sâm 147:5) Chutichuan, Paula chuan Pathian vênhimna thiltithei tak chu Krista kal tlangin a chunga puan in kaih ang maiin a dawng a ni. Tûn laiah pawh Jehova chuan chutiang bawk chuan kan ṭawngṭaina chu a chhâng a. A chhiahhlawhte tân a vênhimna chu puan in kaih ang mai a ni.
18 Puan in chuan ruah sûr tûr emaw, thli tleh tûr emaw chu a dang lo ngei mai; mahse, chûng thilte lak ata vênhimna eng emaw tak chu a pe a ni. Chutiang bawk chuan, “Krista thiltihtheihna” min pêk vênhimna chuan kan chunga lo thleng fiahna emaw, harsatna emaw chu a titâwp lo. Mahse, he khawvêla thil hlauhawm takte leh khawvêl awptu Setana beihnate lak ata thlarau lama vênhimna chu a pe ngei a ni. (Thu Puan 7:9, 15, 16) Chuvângin, nangmah “kiansan” thei lo fiahna i tâwk a nih pawhin, Jehova chuan i beih hrâm hrâm dânte a hria a, i ‘au thâwm’ chu a chhâng lêt a ni tih i hre chiang thei a ni. (Isaia 30:19; 2 Korinth 1:3, 4) Paula chuan heti hian a ziak a: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin.—1 Korinth 10:13; Philippi 4:6, 7.
(2 Korinth 12:10) Chuvângin, Krista avângin chak lohnaahte, chhiatnaahte, nêksawrnaahte, tihduhdahnaahte, hnawhchêpnaahte ka lâwm ṭhîn a ni; ka chak loh apiangin a ni ka chak ṭhin ni.
“Chau Hnênahte Chuan Thiltihtheihna A Pe Ṭhîn”
8 Isaia 40:30 chhiar rawh. Thil thiam tam tak kan nei pawh a ni thei; mahse, mahni chakna rinchhana kan tihtheih chu tlêmtê a ni. Hei hi kan vaia kan zir tûr thil a ni. Tirhkoh Paula chuan thil tam tak a tithei a; mahse, a tihduh apiang chu a tithei lo. A rilru awm dân Jehova a hrilh chuan, Jehova’n: “Ka thiltihtheihna hi chak lohnaah asin tihfamkimin a awm ni,” tiin a hrilh a. Paula chuan Jehova sawi chu a hre thiam a ni. Chuvângin: “Ka chak loh apiangin a ni ka chak ṭhin ni,” tiin a sawi. (2 Korinth 12:7-10) A sawi tum chu eng nge ni?
9 Paula chuan a tihtheihte chu tlêmtê a ni tih a hria a. Thiltithei zâwk tuemaw hnên aṭangin ṭanpuina a mamawh a ni. Pathian thlarau thianghlim chuan Paula chak loh hunah chakna a pe thei a. Nasa takin thil a tihtîr thei a ni. Pathian thlarau thianghlim chuan Paula chu ama chakna hmanga a tihtheih loh thilte tithei tûrin chakna a pe thei a. Chutiang chu kan chungah pawh a thleng thei a ni. Jehova’n a thlarau thianghlim min pêk chuan kan chak ngei ang!
Thlarau Lam Lunghlute Laih Chhuahna
(2 Korinth 12:2-4) Kristaa mi pakhat ka hria, chu mi ngei chu kum sâwm leh kum li a ni ta (taksain emaw a awm ka hre lo, taksa lovin emaw a awm ka hre hek lo; Pathianin a hria) vân thumna meuhvah khian lâk chhovin a awm a. 3 Tin, chu mi ngei chu (taksain emaw a awm, taksa lovin emaw ka hre lo; Pathianin a hria) 4 Paradis-a lâk chhohva a awm leh thu sawi hleih theih loh, mihring sawi thian lohte chu a hria tih ka hria.
w18.12-E 8 ¶10-12
Chhiartute Zawhna
Korinth thawn hnih 12:2-a târ lan “vân thumna” chu Isua Krista leh 1,44,000-te kuta awm Messia Lalram “vân tharte,” a ni thei a.—2 Pet. 3:13.
“Vân thumna” a nih theih chhan chu, chu Lalram chu chawisâna awm tawh rorêlna sâng ber a nih vâng a ni.
Inlârnaa Paula ‘lâk chhova’ a awmna “paradis” chuan (1) leia lo awm tûr Paradis tak tak, (2) tûna kan neih mêk aia ropui zâwk nakina lo awm tûr thlarau lam paradis, leh (3) khawvêl thar ruala awm tûr vâna “Pathian Paradis” a kâwk niin a lang.
(2 Korinth 13:12) Fawh thianghlimin chibai inbûk rawh u.
it-2-E 177
Fâwp
‘Fawh Thianghlim.’ Kristian hmasate chu “fawh thianghlimin” (Rom 16:16; 1 Kor. 16:20; 2 Kor. 13:12; 1 Thes. 5:26) a nih loh leh “hmangaihna fawha fâwpin” chibai an inbûk ṭhîn a (1 Pet. 5:14), neih inangte pawh chutiang chuan an inchibai ṭhîn niin a lang. Chûng Kristian hmasate chibai inbûk dân chu hmân lai Hebrai mite’n infâwpa chibai an inbûk ṭhin dân nên a inang mai thei a. Bible chuan chîpchiar takin sawi loh mah se, he “fawh thianghlimin” emaw, “hmangaihna fawha fâwpin” emawa chibai an inbûkna chuan Kristian kohhranah hmangaihna thianghlim leh inpumkhatna a awm tih chiang takin a târ lang a ni.—Joh. 13:34, 35.
Bible Chhiar
(2 Korinth 11:1-15) Ka ât deuhnaah hian nangnin mi dawhtheih ka va duh êm! A ni, dawh pawh mi dawhthei ngei chhap e. 2 Pathian thîknain asin ka thîk che u ni; Krista hnênah chuan nula thianghlim anga ka pêk theihna tûr che uin, pasal pakhat ka hualsak si che u a. 3 Nimahsela, rûl chuan a ngamthlêmnain Evi a bum ang khân Krista lama takna leh thianghlimna ata chu eng emaw tiin in rilru an tikhawlo dah ang e, tih ka hlauthâwng a ni. 4 Kan hrilh che u ni lo, Isua dang hrila in hnêna lo kal apiang in lo ngai thei a, thlarau in chan ngai loh chu in chang a, Chanchin Ṭha dang in pawm ngai loh chu in pawm duh zêl mai maw! 5 Chûng tirhkoh lian berte chu eng kawngah mah tluk loh ka inring lo asin. 6 Thusawiah zawng ṭawng hmang thiam mah suh ila, hriatnaah chuan chutiang ka ni lo; a ni, engkimah, mi zawng zawng zîngah, nangmahni lama kan lantîr kha. 7 A nih loh leh, Pahtian Chanchin Ṭha a thlâwn ngawta ka hrilh a, chawisâna in awm theihna tûra ka intihhniam khân thil ka tisual a lo ni maw? 8 In zînga ka thawh lai khân Kohhran dangten min chhawmdâwl a, nangmahni pui tûrin anni chu ka tihek a. 9 Tin, in hnêna ka awm a, ka tlâkchham lai khân tumah ka tihautak lo va; unaute chuan Makedonia ram ata an lo kalin ka tlâkchhamna chu mi rawn phuhrûksak si a; engkimah nangmahni tihautak lova ka insiam kha, khatiang khân ka insiam zêl ang. 10 Krista thutak keimaha a awm ang hian, Akaia ram lama he ka chhuanna hi tuman mi tihrehsak lo vang. 11 Engvângin nge? Ka hmangaih loh che u avâng em ni? Pathianin a hria. 12 Nimahsela remchânna hmu duhte lak ata remchânna chu ka sah chah theihna tûrin ka tih ṭhin hi ka ti zêl ang; an chhuannaah chuan keimahni awm ang hian an lo awm theih nân. 13 Mi chutiangte chu Krista tirhkohva insiam chawp, tirhkoh derte, hnathawktu mi bum hmangte an ni si a. 14 Chu chu a mak lo ve; Setana meuh pawh êng tirhkohvah a insiam chawp si ṭhîn a. 15 Chuvângin, a rawngbâwltute pawh chu felna rawngbâwltuah insiam chawp mah sela thil mak a ni lo ve; chûngho tâwpna chu an thiltih ang zêlin a ni ang.
MAY 27–JUNE 2
PATHIAN THU AṬANGA RO HLUTE | GALATIA 1-3
“A Hmaichhan Ngeiah Ka Dodâl”
(Galatia 2:11-13) Tin, Kipha chu Antiokei khuaa a lo kal laiin demawm taka a awm avângin a hmaichhan ngeiah ka dodâl a. 12 Mi tute emaw Jakoba hnên ata an lo kal hma chuan ani chuan Jentailte hnênah chaw a ei ṭhîn a: nimahsela, an lo thlen veleh serhtan mite chu a hlauh avângin tel leh ta lovin a intihrang ta si a. 13 Juda dangte pawh an vervêk ve ta hlawm a, chutichuan Barnaba meuh pawh an vervêkna hruai bovin a awm ta hial a.
Jehova Rorêl Dikna Chu I Ṭâwmpui Em?
16 Galatia 2:11-14 chhiar rawh. Petera chuan mihring a hlau a ni. (Thufingte 29:25) Jehova’n Jentailte a thlîr dân chu a hre tawh a. Mahse, Jentail Kristiante nêna an inkawm avângin Jerusalem aṭanga lo kal serh tan Juda Kristiante’n an ngainêp ang tih a hlau a ni. Tirhkoh Paula chuan Petera chu mi vervêk a ni tih a hrilh a. Engvângin nge? C.E. 49-a Jerusalema inkhâwmnaah Petera’n Jentailte a humhim tih Paula’n a hriat vâng a ni. (Tirhkohte 15:12; Galatia 2:13) Petera chunga lungni lo chûng Jentail Kristiante chuan engtin nge an chhân lêt ang? Tlûk phah nân an hmang ang em? Petera chuan a thiltih sual avângin a chanvo a chân ang em?
(Galatia 2:14) Nimahsela, Chanchin Ṭha thutak angin an awm fel lo tih ka hriatin, Kipha hnênah an zaa hmaah, “Nang Juda mi i ni a, Juda anga awm lovin Jentail angin i awm si a. Engtizia nge Jentailte chu Judate anga awm luihtîr kher i tum?” ka ti a.
Jehova Hmangaihtute Tan “Tlûkna Reng Reng” A Awm Lo
12 Petera chuan mihring hlauhna avângin tlûk chhiat châng nei mah se, Isua leh Jehova chungah a rinawm tlat a. Entîr nân, a Pu chu vântlâng hmaah vawi khat mai ni lo, vawi thum lai a phat a ni. (Lk. 22:54-62) A hnuah, Petera chuan Jentail ringtute chu serh tan Juda Kristiante anga ṭha ve lo anga cheibâwlin, Kristian tihâwm lo takin thil a ti a. Mahse, tirhkoh Paula chuan thil nih dân chiang takin a hmu a ni—kohhranah inthliarna a awm thei lo tih chu. Petera rilru put hmang chu a dik lo va. A nungchangin inunauna a tihchhiat hmain, Paula chuan Petera chu hmaichhanah a zilh ta a ni. (Gal. 2:11-14) Petera chuan a chapona avângin, nunna atâna intlânsiakna chawlhsan phah nân a hmang em? Hmang lo ve. Paula zilhna chu ngun taka ngaihtuahin, a nunpui a, a tlân chhunzawm zêl a ni.
Thlarau Lam Lunghlute Laih Chhuahna
(Galatia 2:20) Krista hnênah khenbehin ka awm ta; nimahsela, ka nung a ni; keimah erawh chu ka ni tawh lo. Krista chu keimahah a nung zâwk a ni; tin, tûnah tisaa ka nung hi rinnaa nung ka ni - Pathian Fapa, mi hmangaiha ka aia inpetu rinnaah chuan.
“Hrehawm Tam Tak” Tuar Chung Pawhin Rinawm Takin Pathian Rawng Bâwl Rawh
20 Langsâr lo zâwnga beihna chu eng nge ni ve le? Entîr nân, engtin nge lunghnûalna chu kan hmachhawn theih ang? Kan tih theih dân ṭha ber pakhat chu tlanna chungchâng ngun taka ngaihtuah hi a ni a. Tirhkoh Paula chuan chutiang chuan a ti a ni. Rethei, a nih loh leh hlim lo tak anga inngaih châng a nei tih a inhria a. Krista chu mi ṭha famkimte tân ni lovin, mi sualte tân a thi tih a hre bawk a ni. Paula chu chûng mi sualte zînga pakhat chu a ni a: “Rinnaa nung ka ni—Pathian Fapa, mi hmangaiha ka aia inpetu rinnaah chuan,” tiin a ziak hial a ni. (Gal. 2:20) Ni e, Paula chuan tlanna chu a pawm a. Chu chu a tân a ni tih a hria a ni.
21 Tlanna chu Jehova hnên aṭanga a mi mal taka thilpêk kan dawn anga thlîrna chuan nasa takin min ṭanpui thei a ni. Lunghnûalna chu a bo nghâl mai dâwn tihna erawh a ni lo. Kan zînga ṭhenkhatte hian khawvêl thar a lo thlen hma loh chuan hêng langsâr lo taka beihnate hi kan la tuar zawm zêl a ngai thei a ni. Mahse, hei hi hre reng ang che: Lâwmman chu beidawng lova beitute’n an dawng ang. Pathian Ramin remna a thlentîr a, mi rinawmte ṭha famkim a nihtîr hun tûr ni ropui tak chu kan hnaih zual tawh hle a ni. Hrehawm tam tak tawrh pawh ngai mah se, chu Ramah chuan luh tum tlat ang che.
(Galatia 3:1) Aw Galatia rama mi â te u, tuin nge dawi che u? In mithmuh ngeiah Isua Krista chu khenbehin chiang taka lantîr a nih tehlul nên.
it-1-E 880
Galatia Mite Hnêna Lehkha Thawn
Paula’n “Aw Galatia rama mi â te u,” tih ṭawngkam a hman hian Galatia ram hmâr lama awm Gallic thlah aṭanga lo chhuak hnam chi khat chauh a rilruah a awm vânga sawi a ni lo. (Gal. 3:1) Chu aiin, Paula chuan chuta awm kohhrana mi ṭhenkhatte chu thuthlung thar vânga awm thei, ‘rinna avânga felna’ hmuh tum lo va, Mosia Dân avanga mahni felna zawngtu, Juda ringtute thununa an awm avângin anni chu a zilh a ni. (Gal. 2:15–3:14; 4:9, 10) Hnam lam thuah chuan, Paula’n lehkha a thawn “Galatia rama kohhranhote” (Gal. 1:2) chu Juda mite leh Juda mi ni lote an ni a, Juda mi ni lote chu serh tan saphunte leh serh tan loh Jentailte an ni a, an zînga ṭhenkhat chu Celtic thlahte an ni tih rinhlelh rual a ni lo. (Tirh. 13:14, 43; 16:1; Gal. 5:2) An chênna ram chu Galatia ram tia koh a nih avângin an za vai chuan Galatia rama Kristiante tia koh an ni. Paula’n a lehkha thawn chu Rom rama awm, a tlawh ngai loh hmâr lama a hmêlhriat lohte ni lovin, a hriat chian êm êm chhim lama awmte hnêna a ziak a ni.
Bible Chhiar
(Galatia 2:11-21) Tin, Kipha chu Antiokei khuaa a lo kal laiin demawm taka a awm avângin a hmaichhan ngeiah ka dodâl a. 12 Mi tute emaw Jakoba hnên ata an lo kal hma chuan ani chuan Jentailte hnênah chaw a ei ṭhîn a: nimahsela, an lo thlen veleh serhtan mite chu a hlauh avângin tel leh ta lovin a intihrang ta si a. 13 Juda dangte pawh an vervêk ve ta hlawm a, chutichuan Barnaba meuh pawh an vervêkna hruai bovin a awm ta hial a. 14 Nimahsela, Chanchin Ṭha thutak angin an awm fel lo tih ka hriatin, Kipha hnênah an zaa hmaah, “Nang Juda mi i ni a, Juda anga awm lovin Jentail angin i awm si a. Engtizia nge Jentailte chu Judate anga awm luihtîr kher i tum?” ka ti a. 15 Keini zawng Jentail mi sualte ni lovin Juda mi rênga piang kan ni a. 16 Nimahsela, Dân thiltihte avângin mi thiam changin a awm lo va, Isua Krista rin avâng chauhvin thiam changin a awm zâwk tih ka hre si a, keini pawhin Dân thiltih avângin kan awm theih nân Krista Isua chu ka ring a ni; dân thiltihte avângin mihring rêng rêng thiam changin an awm dâwn si lo. 17 Kristaah thiam changa awm kan tum chung khân keini ngei pawh mi sual kan lo nih hlauh si chuan Krista chu sual rawngbâwltu a lo ni em ni? Hnai lo ve. 18 Ka thil ṭhiatte kha ka sak leh si chuan bawhchhetu ka nih ka inhriattîr mai a ni ang. 19 Pathian lam kawnga ka lo nun theih nân kei zawng Dân avângin Dân lam kawngah ka thi tawh si a. 20 Krista hnênah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zâwk a ni; tin, tûnah tisaa ka nung hi rinnaa nung ka ni - Pathian Fapa, mi hmangaiha ka aia inpetu rinnaah chuan. 21 Pathian khawngaihna chu ka bawh bo lo ve, Dân avânga felna a awm si chuan Krista chu a thlâwnin a thi a ni ang.