Beiseinaa Tihngheh, Hmangaihnaa Tûr
“Hêng pathum, rinna te, beiseina te, hmangaihna te hi a awm reng ang; tin, hêngahte hian a ropui ber chu hmangaihna hi a ni.” —1 KORINTH 13:13.
1. Eng vaukhânna nge tirhkoh Paula’n min pêk?
TIRHKOH Paula chuan kan rinna chu lawng angin a keh chhe thei a ni tiin min vaukhân a. Ani chuan “rinna leh chhia leh ṭha hriatna thiang tak pawm tlatin; mi ṭhenkhatten chûng chu paih thlain rinna kawngah chuan lawng keh angin an keh chhe ta,” tih thu a sawi a ni. (1 Timothea 1:19) C.E. kum zabi pakhatnaah khân tuipuia kal lawngte chu thing hmanga sak a ni a. Chûng lawngte ṭhatna chu a sakna thingzai ṭhat leh ṭhat lohvah leh lawng sak dân thiam leh thiam lohvah a innghat a ni.
2. Engvângin nge kan rinna lawng chu ṭha taka sak a ngaih a, chu chuan eng nge min phût?
2 Lawng anga sawi theih kan rinna chu mihring tuipui so but but zîngah a lâng reng tûr a ni. (Isaia 57:20; Thu Puan 17;15) Chu mi atân chuan ṭha taka sak a ni ngei tûr a ni a, chu chu keimahni-ah a innghat a ni. Hmasâng Kristiante tâna Juda leh Rom khawvêl “tuipui” chu a bîka Kristiante tâna a so but but laiin, Juda chuan: “Duh takte u, nangni zawngin in rin chhan (“rinna,” NW) thianghlim ber chungah chuan nangmahni leh nangmahni inrem chhovin, thlarau thianghlimah ṭawngṭaiin, chatuan nunna neihtîrna khawp kan Lalpa Isua Krista khawngaihna chu nghâk chungin, Pathian hmangaihnaah chuan invawng ṭha rawh u,” tiin, a ziak a. (Juda 20, 21) Juda chuan ‘mi thianghlimte hnêna kawltîr rinna’ atâna beihna a sawi bawk avângin, ‘rinna thianghlim ber’ tih thumal chuan chhandamna chanchin ṭha huam telin Kristian zirtîrna zawng zawng a kâwk a ni. (Juda 3) Chu rinna lungphûm chu Krista a ni a. Kristian rinna dik vuan nghet tûr chuan rinna chak tak kan mamawh a ni.
“Pâwl Hrang Hlauhna” Thlipui Tuar Chhuakin
3. Engtin nge mi ṭhenkhatte’n “pâwl hrang hlauhna” an hman?
3 Kum rei lotê kal ta khân, râp awm tak tak a ruala inthahna te, tual thahna te, leh pâwl hrang tê naute telna mi tihbuaina te a awm a ni. Hriat thiam theih takin, ram hruaitu mi dik takte tiamin, mi tam takte chuan, pawi sawi lo mipuite humhim chungchâng an ngaihtuah a, a bîk takin chutiang pâwl hrang hlauhawm takte ata mi hnuaihnung zâwkte chu humhim an tum a ni. Chûng dân bawhchhiatna râpthlâk takte phênah chuan “he khawvêl pathian,” chu a awm ngei a, ani chuan mi ṭhenkhatin pâwl hrang hlauhna an tih mai chu a siam chhuak a, chu chu Jehova mite do nân a hmang a ni. (2 Korinth 4:4; Thu Puan 12:12) Mi ṭhenkhat chuan chu dinhmun chu kan rawngbâwlna dodâlna awmtîr nân an chhawr bâwk bawk. Ram ṭhenkhatah chuan mite “pâwl hrang hlauhawm tak” ata vêng him tum anga lang beihpui an thlâk a; mahse, Jehova Thuhretute hming chu dik lo takin an lam a; chutiang chuan, sawi chhiatna hmangin thiamloh min chantîr a ni. Hei hian Europe ram ṭhenkhatah chuan in tin kal a harsattîr a, Bible kan zirpui ṭhenkhat pawhin an zirna an tâwptîr phah a ni. Chu chuan kan unau ṭhenkhatte a tilunghnual bawk.
4. Engvângin nge dodâlna chuan min tihlunghnual loh vang?
4 Amaherawhchu, min tihlunghnual ai mahin, dodâlna chuan Kristianna dik kan nunpui a ni tih kan rinna a tichak zâwk tûr a ni. (Matthaia 5:11, 12) Kristian hmasa te chu hel hmang pâwl hrang ni-a puh an ni a, anni chu ram tinah “sawichhiat” an ni. (Tirhkohte 24:5; 28:22) Mahse, tirhkoh Petera chuan a rinpuite hnênah: “Duh tak te u, in zîngah fiahna nasa tak lo awm, nangmahni fiahna tûra in chunga lo thleng hi, thilmak in chunga lo thleng angin mak ti suh u. Krista tuarnaahte tuarpuitute in nihzia ang zêlin lâwm zâwk rawh u; chutichuan a ropuina a lo lan hunah chuan nangni pawh hlim takin in lâwm thei ang,” ti-a ziakin, a thlamuan a ni. (1 Petera 4:12, 13) Chutiang chiah chuan kum zabi pakhatnaa awptu pâwl zînga mi pakhat chuan: “Ka unaute u, in rinna fiahna chuan chhêlna a keng tih hriain, thlêmna tinrêng in tawh hunin lâwmna hlîrah ngai rawh u. Tin, engmah tlachham lova in famkima, in puma in him theih nân chhelna chuan thawk famkim rawh se,” tiin, a ziak bawk. (Jakoba 1:2-4) Lawng ṭhat leh ṭhat loh chu thlipui na takin a fiah ang bawkin, dodâlna thlipui chuan kan rinna lawng chaklohna chu a lailang ang.
Hrehawm Tawrna-in Chhelna a Siam
5. Engtin nge kan rinna hi hrehawm tawhna hnuai-ah a nghet tih kan chian ang?
5 Kristiante chuan an chhelna leh rinnaa an ngehna chu hrehawmna thlipui an tawrh khawchhuah hnû-ah chauh an chiang thei ang. Rinna chak tak tiamin ‘engmah tlachham lova famkima’ kan awm chauhvin kan chhelna chuan thlipui nuai tuipui-ah a “thawk famkim” thei ang. Paula’n: “Pathian rawngbâwltute angin engkimah mi mit tlungin kan awm zâwk ṭhîn, nasa taka chhelnaah te, hrehawmnaah te, nêksâwrnaah te, hnawhchêpnaah te,” tiin, a ziak a ni.—2 Korinth 6:4.
6. Engvângin nge “hrehawmnaah pawh lâwmin” kan awm ang a, hei hian kan beiseina engtin nge a tihchak?
6 A chânga hrehawmna thlipui na tak kan tawnte chu kan rinna lawng ṭhat leh ṭhat loh, leh ngheh leh ngheh loh fiah theihna hun remchâng anga ngaih tûr a ni. Paula’n Rom khuaa Kristiante hnênah: “Kan hrehawmnaah pawh lâwmin i awm ang u, hrehawmna chuan chhelna a siam a, chhelna chuan hriatfiahna (“dinhmun pawm tlâk,” NW) a siam a, hriatfiahna chuan beiseina a siam a ni tih kan hre si a; tin, . . . beiseina chuan a timualpho lo va,” tiin, a ziak a ni. (Rom 5:3-5) Fiahna hnuai-a din nghehna chuan Jehova pawm tlâk min nihtîr a ni. Chu chuan kan beiseina a tinghet leh chhâwng a ni.
Mi Ṭhenkhatte’n Lawng Keh Chhiatna An Tawh Chhan
7. (a) Paula sawi angin mi ṭhenkhatte’n engtin nge thlarau lam lawng keh chhiatna an tawh? (b) Tûn laiah mi ṭhenkhatte’n engtin nge thutak an kal kawisan?
7 Paula’n ‘lawng keh chhiatna’ tawh chungchâng vaukhânna a pêkin, an chhia leh ṭha hriatna thiang tak ‘paih thlaa’ an rinna hlohtute chu a ngaihtuah a ni. (1 Timothea 1:19) Kal pêngte zîngah chuan Humenaia leh Alexsandra chu an tel a, anni chuan thutak kal kawisanin huatthlala takin thu an sawi a ni. (1 Timothea 1:20; 2 Timothea 2:17, 18) Tûn laia thutak kal kawisan, kal pêngte chuan “bawi rinawm, fing tak” te chu ṭawngkamin an sawisa a, dik takin thlarau lama anmahni châwmtute kut an seh sak ang a ni. “Bawi sual” angin mi ṭhenkhat chuan a rûkin, “Ka pu a lo kal lawk dâwn lo ve,” an ti a. (Matthaia 24:44-49; 2 Timothea 4:14, 15) Anni chuan he thilte kalhmang suaksual tâwpna hnai tak hi an hnâwl a, thlarau lama harhvâng bawi pâwlte chu Jehova mite zînga hmanhmawhna thlarau an kenkawh avângin an sawi chhia a ni. (Isaia 1:3) Chûng kal pêngte chuan thlarau lam lawng keh chhiatna tiamin, “mi ṭhenkhatte rinna an tibo” a ni.—2 Timothea 2:18.
8. Engin nge mi ṭhenkhatte rinna lawng chu tihkeh chhiat, a nih loh leh tihpil a nih?
8 Kristian inpumpêk tawh mi dangte chuan an chhia leh ṭha hriatna paih thlaa, he khawvêla khuahkhirh loh nawmsit zawnna leh mipat hmeichhiatna lama bawlhhlawhnaa inchiahpiahna hmangin, an rinna lawng chu an tikeh chhia a ni. (2 Petera 2:20-22) An thlîr dân aṭangin, inhumna thilte kal hmang thar chu lo thleng thuai tûra a lan loh avângin mi dangte rinna lawng chu a pil ta cheu mai. Hrilh lâwkna eng engemaw thlenfamkimna chu an chhût theih loh avângin, leh “Lalpa nî” chu an theihnghilh avângin chûng chuan biakna dik chu an thlahthlam a ni. (2 Petera 3:10-13; 1 Petera 1:9) Anni chu thim zîngah leh tûn lai thilte kalhmang manganna tui-ah an awm tih an inhre thuai ṭhîn. (Isaia 17:12, 13; 57:20) Kristian kohhran nêna inkâwm tawh lo mi ṭhenkhat chuan Kristian kohhran chu sakhuana dik a ni tih an la ring ta cheu mai. Amaherawhchu, Pathian Jehova tiam khawvêl thar nghah nân dawhtheihna leh chhelna an tlachham ni berin a lang. An tân chuan Paradis-a nun chu a lo thleng chak tâwk lo a ni.
9. Eng nge Kristian inpumpêk mi tlêm tête’n an tih a, he thu hian eng nge min ngaihtuahtîr?
9 Khawvêl hmun ṭhenkhata Kristian inpumpêk tawh mi tlêm tête chuan an rinna lawng puanzâr an thlep tê niin a lang a. Lawng erawh a la lâng reng a; mahse, rinna pumhluma chak taka hmalam pan aiin, muangchângin an kal delh delh a ni. “Lo thleng thuai tûr Paradis” beiseina hmanga hîpa awmin, chu mi nei thei tûra theihtâwp chhuah tûrin ṭhenkhatte chu an inpeih a, thuhrilhnaa ṭhahnem ngaiin leh inkhâwmna zawng zawng, inkhâwmpui zawng zawngah mumal takin an tel a ni. Mahse, tûnah chuan an beiseina a tak chan hun tûr chu an rin aia hla angah ngaiin, theihtâwp chhuahin an bei duh tawh lo va. Hei hi thuhrilh rawngbâwlna tihtlêmnaah, mumal taka inkhâwm lohnaah, leh inkhâwmpui program ṭhenkhata tel duh lohnaah hian a lang a ni. Mi dangte chuan an hun tam zâwk chu intuaitharna leh khawvêl thila lungawina hmuh nân an hmang bawk. Hêng thute hian Jehova hnêna kan inpumpêkna mila nung tûra min turtu tûr chu eng nge ni ang tih hi min ngaihtuahtîr a ni. A rawngbâwlnaa kan ṭhahnemngaihna chu “lo thleng thuai tûr Paradis” beiseinaah a innghat tûr em ni?
Thîrchakai Nêna Khaikhin Beiseina
10, 11. Paula chuan kan beiseina chu eng nên nge a tehkhin a, chu tehkhinna chu engvângin nge inâwm tak a nih?
10 Paula chuan Abrahama kaltlanga lo awm tûr thutiam malsâwmna Jehova siam chu a la chhuak a. Tichuan tirhkoh chuan: “Pathian chuan . . . chhechhamin a tinghet a. Pathian daw rual a nih lohna thil danglam thei lo pahnih [a thu leh a chhechham] avângin, keini inchhanhim nân kan hmaa beiseina dah chu chelh tûra thlante hian, fuihna nasa tak kan neih theihna tûrin. Chu beiseina chu nunna thîrchak-aiah kan nei a, rinawm leh nghet tak a ni,” tiin, a hrilhfiah a ni. (Hebrai 6:17-19; Genesis 22:16-18) Kristian hriak thihte hmâa beiseina dah chu vâna tihchhiat theih loh nunna hi a ni. Tûn lai-ah Jehova chhiahhlawh tam zâwkte chuan leia chatuana nun beiseina ropui tak chu an nei a ni. (Luka 23:43) Chûng beiseina tel lo chuan tuman rinna a nei thei lo vang.
11 Thîrchakai chu invenhimna hmanrua thiltithei tak a ni a, lawng chelh din nâna hmanraw pawimawh tak a ni; lawng chu tuiin a len loh nân a vêng him bawk. Thîrchakai tel lo chuan lawngpu tumahin lawng chawlhmun an chhuahsan ngai lo. Paula chuan lawng chhiatna vawi tam tak a tawh avângin, a thiltawn aṭangin lawng mite nun chu lawng thlîrchakai-ah a innghat fo tih a hria a ni. (Tirhkohte 27:29, 39, 40; 2 Korinth 11:25) Kum zabi pakhatnaa lawngte chuan lawng hotu-in a duh anga a hruai kawi theihna tûrin khawl a nei lo. Lawng karfung hmanga khalh indo lawng tih chuah lo chu thli hmanga khalh a ni deuh ber a. A lawng chu lungpui sut hlauhawmna lama a lenin lawng hotu chuan thlîrchakaiin tuipui mawng nghet taka a vawnna a hloh lo vang tih rinchhan tlat chungin a belhfâk awmchhun thîrchakai chu a thlâk a, thlipui chu him takin a pumpelh a ni. Chuvângin Paula chuan Kristian beiseina chu ‘nunna thîrchakai, rinawm leh nghet tak’ nên a khaikhin a ni. (Hebrai 6:19) Dodâlna thlipui emaw, fiahna dang emawin min beihin, kan beiseina ropui tak chu min tinghettu thlîrchakai ang a ni. Tichuan kan rinna lawng chu rinhlelhna tuipui chhûng ṭiau hlauhawm tak emaw, kal pênna lung, mi tichhe thei tak emaw lamah a lên lo vang.—Hebrai 2:1; Juda 8-13.
12. Engtin nge Jehova bânsan chu kan pumpelh ang?
12 Paul chuan Hebrai Kristiante chu: “Unaute u, fîmkhur rawh u, chutilochuan Pathian nung chu bânsan tûrin in zîngah tu chhûngah pawh rin lohna thinlung sual a lo awm dah ang e,” tiin, a vaukhân a ni. (Hebrai 3:12) Greek thumal “bânsân” ti-a lehlin awmzia dik tak chu “kal bosan,” a ni a, chu chu kalpênna tihna a ni. Mahse, chutiang lawng keh chhiatna tâwp khâwk chu kan pumpelh thei a ni. Rinna leh beiseina chuan fiahna thilpui nasa tak kan tawh chhûng pawhin Jehova min vawn tlattîr thei a ni. (Deuteronomy 4:4; 30:19, 20) Kan rinna chu kal pêngte zirtîrna thli tinrenga lehlam lehlama vawrh leh len len lawng ang a ni lo vang. (Ephesi 4:11-14) Tin, kan beiseina thîrchakai hmangin nunna thlipuite chu Jehova chhiahhlawhte angin kan tuar khawchhuak thei ang.
Hmangaihna leh Thlarau Thianghlima Tur
13, 14. (a) Engvângin nge kan beiseina thîrchakai chauh chu a tâwk loh? (b) Jehova hnêna rawngbâwlna thianghlim hlannaah a turtu chu eng nge a nih ngai a, engvângin nge?
13 Kristianin lei paradis-a chatuana nun beiseina avâng chauhva Jehova rawng a bâwl a nih chuan kalhmang thar lamah hmâ a sâwn lo vang. A beiseina thlîrchakai chu a nun tinghettu a nih laiin, chu mi chungah leh a rinna chungah chuan hmangaihna, mi tur theihna chakna nei chu a belh a ngai a ni. Paula chuan: “Hêng pathuam, rinna te, beiseina te, hmangaihna te hi a awm reng ang; tin, hêngahte hian a ropui ber chu hmangaihna hi a ni,” ti-a a ziakin he thu hi a sawi uar a ni.—1 Korinth 13:13.
14 Rawngbâwlna thianghlim kan hlannaa min turtu chu min hmangaihna teh theih loh chhân lêtna, thinlung taka Jehova hmangaihna a ni tûr a ni. Tirhkoh Johana chuan: “Hmangaihna nei lo chuan Pathian a hre lo; Pathian chu hmangaihna a ni si a. He miah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. Amahin min hmangaih hmasak avângin kan hmangaih a ni,” tiin, a ziak a. (1 Johana 4:8, 9, 19) Jehova chunga kan lâwmna avângin, kan ngaihtuah ber chu kan mimal chhandamna ni lovin, a hming thianghlim tihthianghlimna leh a lal chungnunna dik thiamchantîrna a ni tûr a ni.
15. Jehova kan hmangaihna leh a lal chungnunna thu buai chu engtin nge a inlaichîn?
15 Jehova chuan Paradis vâng chauh ni lovin, amah kan hmangaih vânga a rawng bâwl tûrin min duh a ni. Bible encylopedia Insight on the Scripturesa chuan: “Jehova chuan hmangaihnaa innghat a lal chungnunna leh hmangaihnaa innghat a thil siamte thlâwpna chu a chhuang a ni. Ani chuan a lal chungnunna hmangaihtute chauh a duh a ni; a mize ṭhate avâng leh a lal chungnunna fel avânga hmangaihtu chu. Tin, mi dang lal chungnunna aia a lal chungnunna duh zâwktute pawh a duh bawk. (1 Kor. 2:9) Anni chuan mahni ro inrêl tum aiin a lal chungnungna hnuaia rawng bâwl an thlang zâwk a ni—chu chu amah leh a hmangaihna te, a rorêl dikna te, leh a finna te an hriat vâng leh chûng chu anmahni neih aia ṭha zâwk ni-a an hriat avângin a ni. (Sâm 84:10, 11),” tiin, a sawi a ni.—Volume 2, phêk 275.
16. Isua kan hmangaihna chu kan nuna turtu pakhat engtin nge a nih?
16 Kristian kan nih angin, Isua min hmangaihna chhân lêt nân amah hmangaihna kan lantîr bawk a ni. Paula’n: “Krista hmangaihna chuan min tîr lui a ni; heti hian kan ngaihtuah: Mi zawng zawng thih aiin mi pakhat a thi a, chuvângin mi zawng zawng chu an thi a ni; tin, a nungte chu ammahni tân an nun tawh loh va, an thih aia thia tholeha tân chuan an nun tawh zâwkna tûrin a ni, mi zawng zawng thih aiin a thih ni,” tiin, a ngaihtuah a ni. (2 Korinth 5:14, 15) Krista chu kan thlarau nunna, kan rinna, leh kan beiseina sakna lungphûm ngei chu a ni. Isua Krista kan hmangaihna chuan kan beiseina a ṭanpuiin, kan rinna a tinghet a ni, a bîk takin fiahna thlipui tleh hunah chuan.—1 Korinth 3:11; Kolossa 1:23; 2:6, 7.
17. Eng chakna nasa tak nge Jehova’n min pêk a, chu mi pawimawhna chu Tirhkohte 1:8 leh Ephesi 3:16-ah hian eng anga târ lan nge a nih?
17 Kristian kan nih angin Pathian leh a Fapa kan hmangaihna chu min turtu bul ber a nih laiin, Jehova chuan min tur thei, min tichak thei, leh a rawngbâwlnaa hma lam pan zêl tûra chakna min pe thei thil engemaw min pe bawk a ni. Chu chu a thiltihtheihna emaw, a thlarau thianghlim emaw chu a ni. Hebrai leh Greek thumal “thlarau” tih chuan a ṭobul berah chuan boruak chak taka che vêl, thli ang te hi a kâwk a ni. Paula chuanna lawng ang chu an tum ram thlen theih nân hmuh theih loh thli chaknaah a innghat a ni. Chutiang bawkin, kan rinna lawngin Jehova rawngbâwlna lam min panpui tûr chuan hmangaihna leh hmuh theih loh Pathian thiltihtheihna kan mamawh a ni.—Tirhkohte 1:8; Ephesi 3:16.
Kan Tum Ram chu Panin!
18. Nakina lo thleng tûr kan rinna fiahnaah chuan engin nge min chheltîr ang?
18 Thilte kalhmang thar kan thlen hmâ chuan kan rinna leh hmangaihna chu nasa taka fiah a ni thei. Amaherawhchu, Jehova chuan thlîrchakai “rinawm leh nghet tak” min pe a ni—kan beiseina ropui tak chu. (Hebrai 6:19; Rom 15:4, 13) Dodâlna emaw, fiahna emaw hnuaiah kan chhel thei a ni; kan beiseina hmanga him taka tihngheh kan nih chuan. Thlipui pakhat a reh hnû, a dang lo thlen leh hmâ siin, kan beiseina tihngheh leh kan rinna tihchak i tum tlat ang u.
19. Engtin nge kan rinna lawng chu hma lam kan pantîr ang a, inhumna Pathian lei thar chu engtin nge kan thlen theih ang?
19 ‘Nunna thîrchakai’ chungchâng a sawi hmâ-in Paula chuan: “Tâwp thlenga beiseina famkim hmu tûrin in taihmâk pângngai ang khân taihmâk chhuah ṭheuh fo ula [“tichak zual,” tûrin, footnote] kan ti êm êm mai; chutichuan in inthlahdah lovang a, rinna leh nghah peihna vânga thutiamte rochung tawhte zirho in ni zâwk ang,” tiin, a sawi a ni. (Hebrai 6:11, 12) Jehova leh a Fapa hmangaihnaa tur leh thlarau thianghlim tihchaka awmin, Pathian thutiam inhumna lei thar thlen thlengin kan rinna lawng chu hma lam panin i kaltîr zêl ang u.
[Footnote-te]
a Watchtower Bible and Tract Society of New York, Inc. chhuah a ni.
Ennawn Nân
◻ Kan rinna chungchângah Paula’n eng vaukhânna nge min pêk?
◻ Engtin nge mi ṭhenkhatte’n thlarau lam lawng keh chhiatna an tawh a, engtin nge mi dang chu an tlâk hniam?
◻ Eng Pathian mizia chi hnih nge kan rinna nên a kal kawp ngai?
◻ Engin nge Pathian thutiam inhumna lei thar min thlentîr thei ang?
[Phêk 16-naa milem]
Nunna thlipui dâwl tûr chuan kan rinna lawng chu ṭha taka sak a ṭûl
[Phêk 17-naa milem]
Kan rinna lawng chu a keh chhe thei
[Phêk 18-naa milem]
Kristian kan nih angin beiseina chu kan nun atân thîrchakai a ni