Nun leh Rawngbâwlna Inzirna Lehkhabu Atâna Thu Lâk Chhuahnate
MARCH 4-10
PATHIAN THU AṬANGA RO HLUTE | ROM 12-14
“Kristian Hmangaihna Lantîrnaa Thil Tel Chu”
(Rom 12:10) Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula;
it-1-E 55
Lainatna
Unaute hmangaihna (Gr., phi·la·del·phiʹa, a ngial a ngan chuan, “unau inlainatna”) chu Kristian kohhrana mi zawng zawng zîngah a awm tûr a ni. (Rom 12:10; Heb. 13:1; 1 Pet. 3:8 en bawk rawh.) Chuvângin, kohhrana unaute nêna kan inlaichînna chu pianpui unaute nêna kan inlaichînna anga hnai, nghet leh duhawm a ni tûr a ni. Kohhrana mite chuan unaute hmangaihna chu an lantîr tawh reng chung pawhin, nasa lehzuala ti zêl tûra fuih an ni.—1 Thes. 4:9, 10.
“Inlainatna,” tih awmze nei Girk thu mal phi·loʹstor·gos, chu mi dang nêna inlaichînna hnai tak neitu sawi nâna hman a ni a. He ṭawngkam, sterʹgo, lo chhuahna pakhat chu pianpui unaute inkâra inlainatna sawi nâna hman a ni fo va. Tirhkoh Paula chuan Kristiante chu, chu mizia nei tûrin a fuih a ni. (Rom 12:10) Paula chuan ni hnuhnûngahte chuan mite chu “hmangaihna pianpui nei lo te” (Gr., aʹstor·goi) an ni ang tih leh chûng mite chu thi tlâk an ni tih a târ lang bawk.—2 Tim. 3:3; Rom 1:31, 32.
(Rom 12:17-19) Tu sual pawh sualin thungrûl suh u. Mi zawng zawng ngaiha thil mawi ngaihtuah lâwk rawh u. 18 A theih phawt chuan nangmahni lam tal, mi zawng zawng nên inremin awm rawh u. 19 Duh takte u, in phuba la suh ula, Pathian thinurna kian zâwk rawh u, “‘Phuba rêng rêng keima lâk tûr a ni, keiman ka thungrûl ang,’ Lalpain a ti,” tih ziak a ni si.
“Mi Zawng Zawng Nên Inremin Awm Rawh U”
Rom 12:17 chhiar rawh. Paula chuan inhmêlmâkna kan hmachhawn hunah, inhmêlmâkna bawkin kan thungrûl tûr a ni lo tih a sawi a. Sakhaw thuhmun vuan lo chhûngkuaah hian he fuihna thu zawm hi a pawimawh zual a ni. Nupaa a Kristian zâwk chuan ṭawngkam leh thiltih huatthlala takte thil huatthlala tak danga chhân lêt duhna chu a do a ni. ‘Sual chu suala thungrulhna’ aṭangin thil ṭha eng mah a chhuak thei lo. Chutiang rilru put hmang chuan dinhmun a tichhe zâwk mah a ni.
“Tu Sual Pawh Sualin Thungrul Suh U”
12 Ringtute leh ring lotute cheibâwl dân tûr kawnga a dawta Paula fuihna chu: “Tu sual pawh sualin thungrûl suh u,” tih a ni. Chu thusawi chu a hmaa: “Sual chu hua ula” tia a lo sawi tawh rahchhuah inâwm tak a ni a. Dik tak chuan, miin mi dangte rulh lêt nâna sual a hman si chuan, engtin nge suahsualna, a nih loh leh sual ka haw tak zet a tih theih ang? Chutianga tih chu ‘vervêkna tel lo’ hmangaihna nên a inkalh chiah dâwn a ni. Tichuan Paula’n: “Mi zawng zawng ngaiha thil mawi ngaihtuah lâwk rawh u,” a ti a. (Rom 12:9, 17) Engtin nge hêng thute hi kan nunpui theih?
13 Paula chuan Korinth khuaa mite hnêna a lehkha thawnah, tirhkohte hmachhawn tihduhdahna chu a hmain a lo ziak tawh a. Ani chuan: “Khawvêlte leh vântirhkohte leh mihringte mithmuha ennawma kan awm hi. . . . Miin min hauvin mal kan sâwmsak ṭhîn a; miin min tihduhdahin kan tuar hrâm hrâm ṭhîn a; miin min hêkin kan thlêm ṭhîn a,” a ti a. (1 Korinth 4:9-13) Chutiang bawkin, tûn laia Kristian dikte chu he khawvêl mite hian an enthla reng a. Dik lo taka cheibâwl kan ni chung pawha kan thil ṭha tih kan vêla mite’n an hmuh hian, kan Kristian thuchah ken chu an chhâng lêt ṭha duh zâwk thei a ni.—1 Petera 2:12.
(Rom 12:20, 21) Chuvângin i hmêlma a rilṭâm chuan ei tûr pe rawh, a tuihâl chuan in tûr pe rawh: chutiang i tih chuan a lu chungah meiling i chhêk khâwm a ni ang. 21 Sual ngam chein awm suh la, ṭhatnain sual chu ngam zâwk rawh.
Inngaidam Tawn Rawh U
I chunga thil dik lo titu tuemaw chu Kristian tehnate hre thiam tûra ṭanpui theih nia hriat châng i nei mai thei a. Tirhkoh Paula chuan heti hian a ziak a ni: “I hmêlma a rilṭâm chuan ei tûr pe rawh, a tuihâl chuan in tûr pe rawh: chutiang i tih chuan a lu chungah meiling i chhêk khâwm a ni ang. Sual ngam chein awm suh la, ṭhatnain sual chu ngam zâwk rawh,” tiin. (Rom 12:20, 21) Ngilnei taka thinurna i hmachhawnna chuan rilru sual berte pawh a tinêm theiin, an mize ṭha tak lantîr tûrin i ṭanpui thei mai thei a ni. I rilru tinatu chunga hriatthiamna te, lainatna te—khawngaihna hial pawh—i lantîr chuan Bible thutak zir tûrin i ṭanpui thei mai thei asin. Engpawh nise, ngilnei taka chhân lêtna chuan mi chu i chêtze mawi hmuh theihna hun ṭha a pe a ni.—1 Pet. 2:12; 3:16.
Thlarau Lam Lunghlute Laih Chhuahna
(Rom 12:1) Chutichuan unaute u, Pathian khawngaihna avâng hian, inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u; chu chu in rawngbâwlna âwm rêng a ni.
Intihhlimna Ṭha Thlan Dân
5 I thiltih apiang chu Jehova i biakna nên a inkûngkaih a. Paula chuan, chu thu dik chu a Kristian unaute rilrua a tuh ngheh theih nân, Rom khuaa mite hnêna a lehkha thawnah awmze thûk tak nei ṭawngkam a hmang a. Anni chu: “Inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u; chu chu in rawngbâwlna âwm rêng a ni,” tiin a fuih a ni. (Rom 12:1) I taksaah chuan i rilru, i thinlung, leh i chakna a tel a. Chûngte chu Pathian rawngbâwlnaah i hmang vek a ni. (Marka 12:30) Paula chuan chutianga thinlung zawng zawnga rawngbâwlna chu inthawina tiin a sawi a. Chu ṭawngkamah chuan vaukhânna a tel. Mosia Dân hnuaiah chuan, inthawina sawisêl kai chu Pathianin a pawm lo va. (Leviticus 22:18-20) Chutiang bawkin, Kristianin thlarau lam inthawina a hlan chu kawng engemaw taka a bawlhhlawh chuan Pathianin a pawm lo vang. Mahse, chutiang chu engtin nge a thlen theih?
6 Paula chuan Rom khuaa Kristiante chu: “In taksa pêngte . . . sualna hnênah pe phal . . . suh u,” tiin a fuih a. ‘Taksa thiltihte thlarauva tihlum’ tûrin anni chu a hrilh bawk a ni. (Rom 6:12-14; 8:13) A lehkha thawn tîr lamah, chutiang ‘taksa thiltih’ entîrna ṭhenkhat chu a sawi a. Sual nei mihringte chungchângah heti hian kan chhiar a ni: ‘An kâ chu ânchhe lawhnain a khat a.’ “An ke chu thisen chhuah tûrin a pên chak a.” “An mithmuhah Pathian ṭihna rêng a awm lo,” tiin. (Rom 3:13-18) Kristian pakhatin a taksa pêngte chu chutiang thil sual tih nâna a hman chuan a taksa chu a tihmêlhem a ni. Entîr nân, tûn laiah pawh Kristianin saruak lem leh thuziakte emaw, nunrâwng taka tharum thawhna ang chite emaw a en luih chuan, ‘[a mit chu] sualna hnênah a pe’ tihna a ni a, chutiang chuan a taksa pum chu a tibawlhhlawh a ni. Pathian a biakna chu inthawina thianghlim a ni tawh lo va, Pathian tân pawm theih a ni tawh lo. (Deuteronomy 15:21; 1 Petera 1:14-16; 2 Petera 3:11, 12) Intihhlimna thianghlim lo ûmna rah chhuah chu a va râpthlâk êm!
(Rom 13:1) Mi tin an chunga rorêltute thu thuin awm rawh se. Pathian thu lovin tumah rorêltu an awm si lo; rorêltua awmte hi Pathian ruat an ni.
Rom Khuaa Mite Hnêna Lehkha Thawn Aṭanga Thu Pawimawh Hrilhfiahna
13:1—Eng kawngin nge rorêltute chu “Pathian ruat” an nih? Sawrkâr rorêltute chuan Pathian phalnain ro an rêl a, a châng phei chuan Pathianin an rorêltu tûrte chu a hmuh lâwk avângin, anni chu “Pathian ruat” anga sawi theih an ni. Chutianga a hmuh lâwkzia chu Bible-in rorêltu lo awm tûr tam tak a sawi lâwkte hian a târ lang a ni.
Bible Chhiar
(Rom 13:1-14) Mi tin an chunga rorêltute thu thuin awm rawh se. Pathian thu lovin tumah rorêltu an awm si lo; rorêltua awmte hi Pathian ruat an ni. 2 Chuvângin tupawh rorêltu hnial chu Pathian ruat dodâl an ni a; a dodâltute chuan anmahni chungah rorêlna an hmu ang. 3 Rorêltute chu thil ṭha titu tân chuan hlauhawm an ni lo va; thil ṭha lo titu tân erawh chuan hlauhawm an ni. A nih leh, rorêltu hlau lova awm i duh em? Thil ṭha ti la, a fak i hlawh ang chu; 4 ani chu i ṭhatna tûra Pathian rawngbâwltu a ni si a. Nimahsela thil sual i tih chuan hlau rawh, khandaih chu a keng mai mai si lo va; ani chu Pathian rawngbâwltu, thil tisualtu chunga thinura phuba latu a ni si. 5 Chuvângin thinur hlauh vâng chuah ni lovin, i chhia leh ṭha hriatna avâng pawhin rorêltu thu thuin i awm tûr rêng a ni. 6 He mi avâng hian chhiah pawh in chawi ṭhîn alâwm; chutiang thil ngei ti fan fan tûrin Pathian rawngbâwltute an ni si a. 7 Mi zawng zawng hnênah pêk tûr apiang pe rawh u; leiman pêkna tûra hnênah chuan leiman pe ula; chhiah chawina tûra hnênah chuan chhiah chawi ula; ṭih tûra chu ṭih ula; pawisak tûra chu pawisa rawh u. 8 Inhmangaih tawnna ngawt lo chu tuma engmah ba suh u; mahni mihringpui hmangaihtu chuan dân chu a zawh famkim tawh si a. 9 Hêng, “Uire suh, Tual that suh, Ru suh, Awt suh,” tih leh thupêk dang la awm rêng rêngte hi, “Nanmah i inhmangaih angin i vêngte i hmangaih tûr a ni,” tih hian a khai khâwm vek si a. 10 Hmangaihnain vêngte a tikhawlo ngai lo va; chuvângin hmangaihna hi dân zawh famkimna a ni. 11 Tûn lai thil awmzia in hriat avâng leh muhîl thawhharh a hun tawh tak zet tih in hriat avângin chu chu ka sawi a ni; tûnah chuan kan rin tirh lai ai khân kan chhandamna chu a hnai ta zâwk si a. 12 Zân hi a ral lek lek tawh a, khua a vâr dâwn ta e; chuvângin thima thiltih chu paih ila, êng thuamin i inthuam ang u. 13 Chhûna awm angin mawi takin i awm ang u, zu in buai leh zu ruia awm lovin, hur leh inngaih hmanga awm lovin, insual leh inîtsika awm lovin. 14 Lal Isua Krista chuan inthuam zâwk ulang, in tisa châkna puitlin tûrin engmah insiam suh u.
MARCH 11-17
PATHIAN THU AṬANGA RO HLUTE | ROM 15-16
“Chhelna leh Thlamuanna Nei Tûrin Jehova Beisei Rawh”
(Rom 15:4) Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna turin ziak a ni si a.
“Ṭapte Chu Ṭahpui Rawh U”
Lazara thih laia Isua’n nasa taka a tawrhna thuziak chu Pathian Thu-a kan hmuh min thlamuan thei Bible châng tam tak zînga pakhat mai a ni a. ‘Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tura ziak’ a nih avângin hei hi mak kan ti lo. (Rom 15:4) Lusûn i nih chuan, a hnuaia Bible chângte aṭang hian thlamuanna i hmu thei a ni:
▪ “LALPA chuan thinlunga lungchhiate chu a hnaih ṭhîn a,Rilrua inchhîr apiangte chu a chhandam ṭhîn.”—Sâm 34:18, 19.
▪ “Ka rilrua ngaihtuah tam tak ka neih lai chuan I [Jehova] thlamuannate chuan ka nunna hi a tihlim ṭhîn.”—Sâm 94:19.
▪ “Tichuan kan Lalpa Isua Krista ngei leh Pathian kan Pa, min hmangaihtu leh khawngaihna avânga chatuana thlamuanna leh beiseina ṭha min petu chuan, in thinlungte chu tithlamuangin, . . . tinghet rawh se.”—2 Thes. 2:16, 17.
(Rom 15:5-6) Chutichuan kan Lalpa Isua Krista Pathian leh a Pa chu, thinlung hmunkhat leh thuruala kan chawimawi theihna tûrin, chhelna leh thlamuanna Pathian chuan Krista Isua sawi angin rilru hmunkhat pu tawnin awmtîr che u rawh se.
“Chhelna Chuan Thawk Famkim Rawh Se”
Jehova hnênah chakna dîl rawh. Jehova chu “chhelna leh thlamuanna [petu] Pathian” a ni a. (Rom 15:5) Amah chauh chu kan dinhmun, kan rilru veizâwng, leh kan ṭobulte hre chiangtu awmchhun a ni. Chuvângin, chhel tûra kan mamawhte chu a hria a. Bible chuan: “Amah ṭihtute duh chu a hlawhtlintîr ang a; an au thâwm a hria ang a, anni chu a chhandam ang,” tiin a sawi. (Sâm 145:19) Mahse, chhel nâna kan mamawh chakna kan dîlna chu Pathianin engtin nge min chhân ang?
(Rom 15:13) Thlarau thianghlim thiltihtheihna zârah beiseina in ngah theihna tûrin, beiseina Pathian chuan in rin avângin, lâwmna leh remna tinrêngin tikhat che u rawh se.
‘Jehova I Pathian Chu I Hmangaih Tûr A Ni’
Jehova chuan ‘lâwmna leh remna tinrênga khat beiseina’ min pe. (Rom 15:13) Pathian min pêk beiseina chuan rinna fiahna chu chhel taka tuar chhuak tûrin min ṭanpui a. ‘Thih thlenga rinawm’ hriak thihte chu ‘nunna lallukhum pêk an ni ang.’ (Thup. 2:10) An rinawmna vawngtu lei lam beiseina neite chuan lei Paradise-ah chatuan malsâwmna an chên ang. (Lk. 23:43) Chutiang beiseinate kan chhân lêt dân tlângpui chu eng nge ni? “Thilpêk ṭha leh thilpêk famkim zawng zawng” min Petu avângin hlimna, remna leh hmangaihnain kan khat a ni lâwm ni?—Jak. 1:17.
Thlarau Lam Lunghlute Laih Chhuahna
(Rom 15:27) A ni, lungni takin an ti a ni, an lakah an ba rêng bawk a ni; Jentailten an thlarau lam thilte an ṭâwmpui si chuan khawvêl lam thilin anmahni chhawmdâwl ve thung a ṭûl rêng a ni.
w89-E 12/1 24 ¶3
“I Hmangaihna A Dik leh Dik Loh Fiahna”
Dik tak chuan, an Jentail unaute chu an harsatnate chhâng lêt tûra chêttîrin an awm tûr a ni a. Engpawh ni se, a bîk takin Jerusalema awm Kristiante hnênah “bat” an nei a ni. Jerusalem khua aṭangin Jentail mite hnênah chanchin ṭha a thleng a ni lawm ni? Paula chuan heti hian a sawi a: “Jentailten an thlarau lam thilte an ṭâwmpui si chuan khawvêl lam thilin anmahni chhawmdâwl ve thung a ṭûl rêng a ni,” tiin.—Rom 15:27.
(Rom 16:25-26) Ka Chanchin Ṭha leh Krista thu hrilh angin, thurûk puanna ang hian, (chu thurûk chu chatuan ata a inthup ṭhîn a, tûnah erawh chuan tihlan a ni a, rinna chu an lo âwihna tûrin, chatuan Pathian thupêk ang zêlin, zâwlneite Lehkha Thuin hnam tin hnênah hriattîr a ni tawh,) nangni tinghet theitu
it-1-E 858 ¶5
Hriat Lâwk, Ruat Lâwk
Messia, a nih loh leh Krista chu thutiam thlah tûr a ni a, amah avângin lei chunga hnam tin zînga mi fel zawng zawng chu malsâwmin an awm ang. (Gal. 3:8, 14) Chu “thlah” sawi lanna hmasa ber chu Eden huana helna a awm hnuah ni mah se, Abela pian hmain a ni a. (Gen. 3:15) Chu chu Messia, “thlah” hriat chianna avânga “thurûk” puan a nih hma kum 4,000 vêlah a ni. Dik tak chuan, “chu thurûk chu chatuan ata a inthup ṭhîn a.”—Rom 16:25-27; Eph. 1:8-10; 3:4-11.
Bible Chhiar
(Rom 15:1-16) Chutichuan keini mi chakte hian mahni lâwmna zawng lovin, mi chak lote chak lohnate chu kan tuarpui zâwk tûr a ni. 2 Mahni vêngte tihsâwt nân an ṭhatna tûrin tihlâwm i tum ṭheuh ang u; 3 Krista pawh chuan mahni lâwmna a zawng si lo; “Nangmah hautute hauna chu keima chungah a tla ta a,” tih ziak ang khân a ni zâwk. 4 Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna turin ziak a ni si a. 5-6 Chutichuan kan Lalpa Isua Krista Pathian leh a Pa chu, thinlung hmunkhat leh thuruala kan chawimawi theihna tûrin, chhelna leh thlamuanna Pathian chuan Krista Isua sawi angin rilru hmunkhat pu tawnin awmtîr che u rawh se. 7 Chuvângin Krista chuan Pathian tihropui nân a lâwm che u ang bawk khân inlâwm tawn rawh u. 8-9 Hei hi ka sawi chu a ni; thlahtute hnêna thutiamte kha tinghet tûr leh, a khawngaihna avânga Jentailten Pathian an chawimawi theihna tûrin, Pathian thu a dik tih hriattîr nân Krista chu serh tante rawngbâwltuah a lo awm a. “Chuvângin Jentailte zîngah chuan, ka fak ang chia, i hming chawimawina tûrin hla ka sa ang,” tih ziak ang khân. 10 Tin, “Nangni Jentail zawng zawngte u, a mite nên lâwm rawh u,” a ti leh a. 11 Tin, “Nangni Jentail zawng zawngte u, Lalpa chu fak rawh u; mi zawng zawng pawhin amah fak rawh se,” a ti leh a. 12 Tin, Isaian, “Jesaia zungzâm chu a awm ang a, Jentailte lala awm tûrin a lo chhuak tûr chu a awm bawk ang; ani chu Jentailte chuan an beisei chhan ang,” a ti leh bawk a. 13 Thlarau thianghlim thiltihtheihna zârah beiseina in ngah theihna tûrin, beiseina Pathian chuan in rin avângin, lâwmna leh remna tinrêngin tikhat che u rawh se. 14 Tin, ka unaute u, nangmahni chung thu chu, nangmahni ngei ṭhatnain in khat a, finna tinrêng in ngah a, in inzilh tawn thei bawk tih keimah tak pawhin dik takin ka hria. 15-16 Nimahsela Jentailte zînga Krista Isua rawngbâwltua ka awm theihna tûrin Pathianin mi pêk khawngaihna avâng hian hriatpui tûr che uin khawimaw kâr kârah huai deuhvin ka ziak a ni. Ka Jentail hlante chu thlarau thianghlim tihthianghlim an ni a, lawm tlâk an nih theihna tûrin, Pathian Chanchin Ṭha kawngah Puithiam hna ka thawk a ni.
MARCH 18-24
PATHIAN THU AṬANGA RO HLUTE | 1 KORINTH 1-3
“Tisa Mi Nge I Nih A, Thlarau Mi?”
(1 Korinth 2:14) Khawvêl mi chuan Pathian thlarau lam thilte chu a lâwm ṭhîn lo, ani ngaih chuan âtthlâk a ni si a; thlarauva hriat fiah a nih avângin a hre thei lo rêng rêng bawk a ni.
Thlarau Mi Tih Awmzia Chu Eng Nge Ni?
4 Engtin nge khawvêl mi chuan a ngaihtuah? Khawvêl mi chuan mahni châkna ringawt ngaituahna khawvêl rilru put hmang chu a nei a. Paula chuan chu rilru put hmang chu “tûna âwih lo fate chhûnga thawk mêktu thlarau dân,” tiin a hrilhfiah a ni. (Ephesi 2:2) Chu rilru put hmang chuan mi tam tak chu an vêla mite entawn tûrin a thunun a. Pathian tehnate ngaihtuah lovin, an ngaiha ṭha anga langte chu an ti mai ṭhîn a ni. Khawvêl mi emaw, tîsa lam mi emaw chuan tîsa lam thilte chauh a ngaihtuah ṭhîn a, a nihna te, sum leh pai te, leh mi mal diknate chu thil dang zawng aiin a ngai pawimawh zâwk ṭhîn a ni.
5 Khawvêl mi chuan Bible-in “tisa thiltihte” tia a kohte chu a ti fo ṭhîn a. (Galatia 5:19-21) Korinth khuaa Kristiante hnêna Paula lehkha thawn pakhatnaah, khawvêl mite tih ṭhin thil dangte pawh a târ lang bawk. Anni chu an inlungrual lova, mite inṭhen hrantîr an tum a, hel tûrin mite an fuih a, court-ah an inkhing a, thuneihna an zah lova, an nunah ei leh inte an dah pawimawh hle a ni. Khawvêl mi chuan thil sual ti tûra thlêm a nih hunah a do ngai lo. (Thufingte 7:21, 22) Juda chuan khawvêl mite chuan Jehova thlarau thianghlim an hloh hial thei tih a sawi a ni.—Juda 18, 19.
(1 Korinth 2:15, 16) Thlarau mi erawh chuan thil engkim a hre fiah ṭhîn a, ani lah chu tuman an hre fiah si lo. 16 Tuin nge Lalpa rilru hre tawha amah chu zirtîr thei ang? Keini erawh chuan Krista rilru kan pu a ni.
Thlarau Mi Tih Awmzia Chu Eng Nge Ni?
6 Khawvêl mi nêna inkalh takin, thlarau mi chuan Pathian nêna a inlaichînna chu a ngaihsak hle a. Pathian thlarau thianghlim a inkaihhruaitîr a, Jehova entawn a tum tlat a ni. (Ephesi 5:1) Jehova ngaihtuah dânte hre tûr leh Jehova thlîr dân anga thlîr tûrin theih tâwp a chhuah a. A tân chuan Pathian chu a tak hle a. Khawvêl mi nên inang lo takin, thlarau mi chuan a nun kawng tin rêngah Jehova tehnate chu a zah a ni. (Sâm 119:33; 143:10) Ani chuan “tisa thiltihte” chu a ti lo va, “thlarau rah” neih a tum tlat zâwk a. (Galatia 5:22, 23) Thlarau lam thil ngaihsak tih awmzia hrilhfiah lehzual tûrin he khaikhinna hi han ngaihtuah teh: Sumdâwng thiam tak chu sumdâwnna lam ngaihsaktu tiin kan sawi thei a, Pathian biakna ngaihsak tak zettu chu thlarau lam thil ngaihsaktu tiin kan sawi thei bawk a ni.
Thlarau Mi Tih Awmzia Chu Eng Nge Ni?
Engtin nge Krista kan entawn theih? Korinth thawn khat 2:16 chuan “Krista rilru” ang kan neih a ngai tih a sawi a. Rom 15:5-na chuan, “Krista Isua neih ang rilru put hmang” nei tûrin min hriatnawntîr bawk. Krista ang tûr chuan a ngaihtuah dân te, rilru put hmang te, leh thiltih dânte kan hriat a ngai a. Isua chuan thil dang zawng aiin Pathian nêna an inlaichînna chu a ngaihsak ber a ni. Isua ang nih kan tum chuan Jehova kan ang lehzual thei ang. Chuvângin, Isua ngaihtuah dân anga ngaihtuah chu thil pawimawh tak a ni.
Thlarau Lam Lunghlute Laih Chhuahna
(1 Korinth 1:20) Mi fing chu khawiah nge? Lehkhaziaktu chu khawiah nge? He khawvêla hnialtu chu khawiah nge? Pathianin khawvêl finna hi âtthlâk a ni tih a hriattîr lo vem ni?
it-2-E 1193 ¶1
Finna
Khawvêl finna chuan Krista hmanga Pathian ruahmanna siamte chu thil âtthlâk angin a hnâwl a; khawvêl rorêltute chuan a chungah ṭha takin rorêlsak thei mah se, “Lalpa chu an khêngbet,” ta zâwk a ni. (1 Kor. 1:18; 2:7, 8) Mahse, Pathian chuan khawvêl finna chu âtthlâk a ni tih a hriattîr ve thung a, an mi fingte chu “Pathian âtna” nia an ngaih thilte hmangin zahthlâk takin a siam a, chu bâkah, tihdanglam theih loh A thiltum tihlawhtling tûrin khawvêlin mi ‘â, chak lo, leh hmuhsitawm’ nia a ngaihte chu a hmang zâwk a ni. (1 Kor. 1:19-28) Paula chuan Korinth khuaa Kristiante hnênah ‘he khawvêl thu fing leh he khawvêl rorêltute’ chu engmah lo an ni dâwn tih a hriatnawntîr a, chuvângin, chutiang finna chu thlarau lam thuchah a ziah zîngah a tel lo. (1 Kor. 2:6, 13) Kolossa khuaa Kristiante chu ‘mihring thu rochhiah leh khawvêl thu fing [phi·lo·so·phiʹas, a ngial a ngan chuan, finna ngaina] buma,’ awm lo tûrin a vaukhân a ni.—Kol. 2:8; châng 20-23 nên khaikhin rawh.
(1 Korinth 2:3-5) Tin, chak lo leh hlauvin, nasa taka khûr chungin in zîngah ka awm a. 4-5 Tin, in rinna chu mihring finnaa innghat lovin, Pathian thiltihtheihnaa innghata a awm theih zâwkna tûrin, ka ṭawngka chhuak leh ka thu hrilhte chu thu finga thlêmna thuin a ni lova, thlarau leh thiltihtheihna hriattîrin a nih zâwk kha.
Korinth Khuaa Mite Hnêna Lehkha Thawnte Aṭanga Thu Pawimawh Hrilhfiahna
2:3-5. Grik mi fingte leh zirna sâng awmna Korinth khuaa thu a hrilh laiin, Paula chuan a thu ngaithlatute a hmin dâwn leh dâwn loh a ngaihtuah buai ve ngei ang. Amaherawhchu, a neih mai theih chak lohna emaw, hlauhthâwnna emaw a enga mahin Pathian pêk rawngbâwlna chu a hlen lohtîr chuang lo. Chutiang bawkin, dinhmun khirh leh kan la tawh ngai lohte chuan Pathian Ram chanchin ṭha hril lovin min awmtîr tûr a ni lo. Paula ang bawkin, Jehova ṭanpuina chu kan ring tlat thei a ni.
Bible Chhiar
(1 Korinth 1:1-17) Paula, Pathian duhzâwnga Isua Krista tirhkohva koh leh kan unaupa Sosthena chuan, 2 Korinth khuaa Pathian kohhranho awm, Krista Isuaa tihhran, mi thianghlim ni tûra kohte hnênah ram tina kan Lalpa (anmahni leh keimahni Lalpa) Isua Krista hming lam zawng zawng hnênah nên: 3 Pathian kan Pa leh Lalpa Isua Krista hnên ata khawngaihna leh remna in hnênah awm rawh se. 4 Krista Isuaa Pathian khawngaihna in hnêna pêk avâng khân in chung thu-ah Pathian hnênah lâwmthu ka hril fo ṭhîn; 5 engkimah, thusawi tinrêngah leh hriatna tinrêngah, amahah chuan tihhausaka in awm thu-ah khân; 6 chutiangin Krista thu ka hriattîr chu nangmahniah tihngheha a awm kha; 7 chutichuan kan Lalpa Isua Krista inlârna nghâkin, thilpêk rêng rêngah in hlawhtling lo lo ve; 8 ani chuan kan Lalpa Isua Krista ni-ah chuan sawisêlbova in awm nân a tâwp thlengin a tinghet bawk ang che u. 9 Pathian, a Fapa Isua Krista kan Lalpa pâwlnaa ko lûttu che u kha a rinawm a ni. 10 Tin, unaute u, in zain thu thuhmun in sawi a, in zînga inṭhenna rêng a awm lohna tûrin, rilru hmunkhat leh ngaihtuahna hmunkhata fel taka in inzawm tlat zâwkna tûrin kan Lalpa Isua Krista hmingin ka ngên a che u. 11 Ka unaute u, in chungchâng thu chu in zîngah inhnialnate a awm tih Kloii chhûngte chuan mi hrilh a ni. 12 Hei hi a ni ka tih chu, mi tinin, “Kei Paula pâwl ka ni,” “Kei zawng Apollova pâwl ka ni,” “Kei zawng Kiphaa pâwl ka ni,” “Kei zawng Krista pâwl ka ni,” in tih hlawm hi. 13 Krista chu ṭhenin a awm em ni? Paula in aia khenbehin a awm em ni? A nih loh leh, Paula hminga baptis-in in awm em ni? 14 Krispa leh Gaia lo chu in zînga mi tumah ka baptis loh che u avângin Pathian hnênah lâwmthu ka sawi ṭhîn a ni; 15 chutilochuan miin keima hminga baptis in ni emaw an ti dah ang e. 16 Stephana chhûngte erawh chu ka baptis bawk a; chûng lo chu mi dang ka baptis emaw ka hre lo. 17 Krista chuan baptis tûrin mi tîr si lo, Chanchin Ṭha hril tûrin mi tîr zâwk a ni; thu finga hril lovin, chutilochuan Krista kraws chu engmah lovah an chantîr dah ang e.
MARCH 25-31
PATHIAN THU AṬANGA RO HLUTE | 1 KORINTH 4-6
“Dawidim Tlêmtêin Chhang Hlâwm Chu Apumin A Fan Chhuak Ṭhîn”
(1 Korinth 5:1, 2) In zîngah inngaih a awm tih thu a thang vêl chiam a ni; chutiang inngaih chu Jentailte zîngah pawh awm ngai hlei lo, in zînga mi pakhatin a pa nupui a neih kha. 2 Tin, chu thil titu chu in zîng ata hnawh chhuah nâna lungngaih tâk aruangin in uang zâwk si a.
(1 Korinth 5:5-8) Mi chutiang chu, a thlarau Lalpa niah chuan chhandamin a awm theih nân a tisa tiboral tûrin, Setana pe ila ka ti a ni. 6 In uan chhan hi a ṭha lo ve. Dawidim tlêmtêin chhang hlâwm chu apumin a fan chhuak ṭhîn tih in hre lo vem ni? 7 Dawidim tel lo in ni ang bawkin chhang hlâwm thar in lo nih theih nân dawidim hlui chu thianfai rawh u. Kan Kalhlên Kûtna tûr pawh an talh tawh si a, Krista ngei chu; 8 chuvângin i kût ang u, dawidim hluia kût lovin, nunchhiat leh sualna dawidima kût hek lovin takna leh dikna chhang, dawidim telh lohvin i kût zâwk ang u.
(1 Korinth 5:13) In zînga mite chu nangmahni ngaihtuah tûr a ni lâwm ni? Mi sual chu in zîng ata hnawt chhuak rawh u.
it-2-E 230
Dawidim
Tirkhkoh Paula’n Korinth khuaa Kristian kohhran hnênah kohhran aṭanga inngaih hmangpa hnawt chhuak tûra thu a pêk khân, entîrna ngai bawk hmangin heti hian a sawi a ni: “Dawidim tlêmtêin chhang hlâwm chu apumin a fan chhuak ṭhîn tih in hre lo vem ni? Dawidim tel lo in ni ang bawkin chhang hlâwm thar in lo nih theih nân dawidim hlui chu thianfai rawh u. Kan Kalhlên Kûtna tûr pawh an talh tawh si a, Krista ngei chu,” tiin. ‘Dawidimin’ a sawi tum chiah chu heti hian chiang takin a sawi zawm a: “Chuvângin i kût ang u, dawidim hluia kût lovin, nunchhiat leh sualna dawidima kût hek lovin takna leh dikna chhang, dawidim telh lohvin i kût zâwk ang u,” tiin. (1 Kor. 5:6-8) Hetah hian, Paula’n Kalhlên Kût zawh vêla an neih Judate Chhang Dawidim Telh Loh Kût chu mitthla theih tûrin a târ lang a ni. Dawidim tlêmtêin chhang hlâwm chu a fan chhuak nghâl angin, chu inngaih hmangpa thununna ṭha lo tak chu an tihbo loh chuan Jehova mithmuhah kohhran chu a thianghlim lo vang. Kût hun chhûng chu Israel mite inah dawidim dah phal loh a nih angin, “dawidim” chu an zîng ata an paih chhuak tûr a ni.
it-2-E 869-870
Setana
‘A tisa tiboral tûrin, Setana pe’ tih awmzia chu eng nge ni?
A pa nupui mutpuitu, kohhrana thil sual titu chungchânga hma la tûra Korinth khuaa kohhran a hrilhnaah, tirhkoh Paula chuan: “Mi chutiang chu, . . . a tisa tiboral tûrin, Setana pe ila ka ti a ni,” tiin a ziak a. (1 Kor. 5:5) Hei hi, chu pa nêna inzawmna engpawh tichat a, kohhran aṭanga hnawt chhuak tûra thupêkna a ni. (1 Kor. 5:13) Setana hnêna pe tih chu kohhran aṭanga hnawh chhuah a, he khawvêl pathian leh rorêltu Setana hnêna pêk hi a ni. ‘Chhang hlâwm puma’ ‘dawidim thlêmtê’ angin, chu pa chu kohhran chhûnga “tisa,” ang a ni a; thlarau lam thil ngaihventu kohhrana mite chuan bawlhhlawh taka khawsa, chu pa chu dah bovin, kohhran chhûng aṭangin chu “tisa” chu an tibo vang. (1 Kor. 5:6, 7) Chutiang bawkin, Humenaia leh Alexsandra te chuan an rinna leh chhia leh ṭha hriatna chu paih thlain, rinna kawnga lawng keh an lo nih tâk avângin, Paula’n anni chu Setana kutah a pe a ni.—1 Tim. 1:20.
(1 Korinth 5:9-11) Ka lehkha thawnah khân inngaih hmangte pâwl lo tûrin in hnênah ka ziak kha; 10 he khawvêla inngaih hmangte emaw, duhâm leh hlêprute emaw, milem betute emaw hi zawng pâwl hauh loh tûr ti ka ni lo ve; chutiang ni sela chuan khawvêl ata kal chhuak ngei tûr in ni dâwn si a. 11 Tûnah erawh chuan tupawh, unau hming pu siin, inngaih hmang mi emaw, mi duham emaw, milem be mi emaw, hauh hmang mi emaw, zu ruih hmang mi emaw, hlêpru mi emaw ni sela, pâwl lo tûrin in hnênah ka ziak a ni; mi chutiang hnênah chuan ei pawh ei lo tûrin.
19 A châng chuan, kohhrana mi tuemaw chu kâwm tawh lo tûra tih kan ni a. Chutiang dinhmun chu tuemawin inlamlêt lova Pathian dân a bawhchhiat avânga hnawh chhuah a nih hunah emaw, thurin dik lo a zirtîrna hmanga rinna a hnâwl hunah emaw, a nih loh leh ama thua kohhran a chhuahsan hunah emaw a thleng ṭhîn a ni. Pathian Thu chuan chutiang mite chu “pâwl lo tûrin” chiang takin min hrilh a. (1 Korinth 5:11-13 chhiar rawh; 2 Johana 9-11) Kan ṭhian emaw, kan chhûngkhat emaw kawm loh chu thil harsa tak a ni thei ang. Pathian Jehova leh a dân felte chunga rinawmna târ langin, kan ding nghet tlat ang em? Ani chuan rinawmna leh thu âwihna a ngaihlu hle tih hre reng ang che.
20 Hnawh chhuahna hi Jehova ruahmanna duhawm tak a ni a. Engtin nge? Inlamlêt duh lo hnawh chhuahna chu Jehova hming thianghlim leh a tehnate bâkah, Amah Jehova ngei kan hmangaihzia lantîrna a ni. (1 Petera 1:15, 16) Hnawh chhuahna chuan kohhran a vênghim a. Kohhrana mi rinawmte chu duh rêng vânga thil sual titute thununna ṭha lo lakah vênghimin, anni chuan kohhran chu he khawvêl suaksualah hmun him tak a ni tih hriatna nên Pathian chibai an bûk zawm zêl thei a ni. (1 Korinth 5:7; Hebrai 12:15, 16) Hnawh chhuahna chuan thil sual titu chungah hmangaihna a târ lang a. Chu chu a rilru put hmangte thlâk a, Jehova hnêna kîr leh tûrin hma lâk a ngai tih inhriat chhuahna nei tûra a thil mamawh tak a ni thei a ni.—Hebrai 12:11.
21 Kan ṭhian ṭhate’n nasa taka min thunun theihna chu kan pumpelh ngawt thei lo. A nih chuan, kan ṭhian kawm tûrte fing thiam taka thlan chu a pawimawh hle. Jehova ṭhiante ṭhiana siam a, Pathianin a hmangaihte kan hmangaih chuan, ṭhian ṭha berte hual vêlin kan awm ang. An hnên aṭanga kan neih miziate chuan Jehova tihlâwm kan tumna mila nung tûrin min ṭanpui ang.
Thlarau Lam Lunghlute Laih Chhuahna
(1 Korinth 4:9) Pathianin keini tirhkohte hi thi tûra ruat sa angin a hnuhnûng berah min târ chhuakah ka ngai a ni; khawvêlte leh vântirhkohte leh mihringte mithmuha ennawma siamin kan awm hi.
‘Rawngbawltu Thlarau’—Vantirhkohte Chu
Fiahna tuar Kristiante chu ‘vântirhkohte ennawma siamin’ an awm a. (1 Kor. 4:9) Vântirhkohte chuan ngun takin min thlîr reng a, kan rinawmna thiltihte an hmuhin an lungawiin, sual sim chungah phei chuan an lâwm lehzual a ni. (Lk. 15:10) Anni chuan Pathian ngaihsak Kristian hmeichhiate nungchang pawh chu an hmu a. Bible chuan “vântirhkohte avângin hmeichhiain mipa thuneih chhinchhiahna a khum tûr a ni,” tih a târ lang a ni. (1 Kor. 11:3, 10) Ni e, vântirhkohte chuan Kristian hmeichhiate leh lei lama Pathian chhiahhlawh dang zawng zawngte’n theocratic ruahmanna an zui a, lû nihna an pawm hmuh chu nuam an ti a. Chu thu âwihna chu chûng Pathian vân lam fate tân chuan hriattîrna ṭha tak a ni.
(1 Korinth 6:3) Tûn dam chhûng khawsak thute chu sawi loh, vântirhkote lam pawh kan ngaihtuah dâwn tih in hre lo vem ni?
it-2-E 211
Dân
Vântirhkohte Tâna Dân. Mihringte aia chungnung zâwk vântirhkohte chu Pathian dân leh thupêk hnuaiah an awm a. (Heb. 1:7, 14; Sâm 104:4) Jehova chuan a hmêlma Setana meuh pawh thu pein, a khuahkhirh a ni. (Job. 1:12; 2:6) Vântirhkoh chungnung ber Mikaela pawhin Diabola nên an inhnial khân, “Lalpan hau zâwk che rawh se,” tia sawiin Jehova chu Rorêltu Lû Ber a nihzia a pawm a, chu nihna chu a zah hle a ni. (Jud. 9; Zak. 3:2 nên khaikhin rawh.) Pathian Jehova avângin, vântirhkoh zawng zawngte chu chawimawia awm tawh Isua Krista thuneihna hnuaiah an awm a ni. (Heb. 1:6; 1 Pe. 3:22; Mt. 13:41; 25:31; Phil. 2:9-11) Chuvângin, Isua thupêkin, thuchan kengtu vântirhkoh pakhat chu Johana hnênah tirh a ni a. (Thup. 1:1) Mahse, 1 Korinth 6:3-ah, tirhkoh Paula’n Krista thlarau lam unaute chuan thlarau suaksualte chungah ro an la rêl dâwn avângin, anni chu vântirhkohte chungchâng ngaihtuahtu tûr anni tiin a sawi.
Bible Chhiar
(1 Korinth 6:1-14) In zîngah tupawhin mi dang chungah thupawi nei ula, mi thianghlimte hmaa thlen lovin, mi fel lote hmaah in thlen ngam dâwn em ni? 2 A nih leh, mi thianghlimte chuan khawvêl an ngaihtuah dâwn tih in hre lo em ni le? Tin khawvêl mah hi in ngaihtuaha a awm dâwn chuan thil tê berte pawh chu ngaihtuah tlâk lo em ni in nih le? 3 Tûn dam chhûng khawsak thute chu sawi loh, vântirhkohte lam pawh kan ngaihtuah dâwn tih in hre lo vem ni? 4 Chutichuan tûn dam chhûng khawsak thute ngaihtuah tûr in neihin kohhranho zînga mi hmuhsitawmte chu in ngaihtuahtîr ṭhîn em ni? 5 In zahna tûrin ka sawi a ni. A unaute kâra thu titlu thei mi fing pakhat tal in zîngah in hmu thei lo a ni ang maw, 6 unauvin a unau rorêlnaa a thlen zâwk ṭhin? Ring lote hmaah a ni nghâl si. 7 A ni, hei hi in fel zawh zân lohna pakhat chu a ni pang mai, thupawi in neih tawn ṭhin hi. Engati nge dik lo taka tihna chu in tuar zâwk loh? Engati nge tihdâwnna chu in tuar zâwk loh? 8 A ni, nangmahni ngeiin in unaute chungah pawh in tidik lo va, in tidâwng zâwk ṭhîn. 9 A nih leh, mi fel lote chuan Pathian ram an luah lo vang tih in hre lo em ni le? Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte emaw 10 rûk hmangte emaw, mi duhâmte emaw zu ruih hmangte emaw, mi hau hmangte emaw, hlêprute emawin Pathian ram an luah lo vang. 11 Tin, nangni ṭhenkhat chutiang mi in nih ṭhin kha; nimahsela Lalpa Isua Krista hmingah leh kan Pathian thlarauvah tlenfai in ni tawh a, tihthianghlim in ni tawh a, thiam chang in ni tawh. 12 Thil engkim tih ka tân a thiang a, nimahsela thil engkim tih a ṭha kher lo; thil engkim tih ka tân a thiang a, nimahsela eng bâwihah mah ka inphal lo. 13 Eitûrte chu pum tân a ni a, pum chu ei tûrte tân a ni; nimahsela Pathianin a tiboral ve ve dâwn. Tin, taksa hi inngaih nân a ni lo va, Lalpa tân a ni zâwk e; Lalpa pawh chu taksa tân a ni. 14 Tin, Pathianin Lalpa chu a kai tho va, keini pawh a thiltihtheihnain min kai tho ve bawk ang.