Jehova Chuan A Berâm Vêngtute A Zirtîr
“LALPA chuan finna a pe ṭhîn a, a kâ aṭang chuan finna leh hriat thiamna a lo chhuak ṭhîn a ni.”—THUFINGTE 2:6.
1, 2. Engvângin nge baptisma chang mipate chuan kohhranah mawhphurhna an neih belh?
KUM sarih lai upa nia rawngbâwl tawh Nick-a chuan: “Upaa ruat ka nihin ka lâwm hle a. He chanvo hi Jehova rawng ka bâwlna zauh theihna hun remchângah ka thlîr a ni. Ka chunga a thiltih zawng zawng avângin lâwm thu hrilh bâ niin ka inhria a. Upa dangte’n min ṭanpui ang bawkin, kohhrana mite theih tâwpa ṭanpui chu ka duh bawk a ni,” a ti a. Mahse, a hlimna chu mangan rûkna nên a inpawlh a. “Upaa ruat ka nih chuan kum 30 pawh ka la tlin loh avângin, thiam taka kohhran enkawl tûra mamawh thiamna—hriat thiamna leh finna—chu ka tlachham ang tih ka hlau a ni,” tiin a sawi belh a ni.
2 Jehova’n a berâmte enkawl tûra a ruatte chuan lâwm chhan tûr tam tak an nei a. Tirhkoh Paula chuan: “Englo lâk aiin pêkin lukhâwng a nei zâwk,” tia Isua thusawi la chhâwngin, Ephesi khuaa upate chu an hlim chhan tûr pakhat a hriattîr a ni. (Tirhkohte 20:35) Kohhranho rawngbâwltu emaw, upa emaw anga rawngbâwlna chuan baptisma chang mipate chu kawng dangin Jehova leh kohhran tân rawng a bâwl belhtîr thei. Entîr nân, kohhranho rawngbâwltute chuan upate an thawhpui a. Tin, hun tam tak pêk ngai hna dang tam tak, tih ngei ngei ngai site chu an thawk bawk. Chutiang unaupate chu rawngbâwlna hlu tak thawk tûrin Pathian leh ṭhenawmte hmangaihna chuan a chêttîr a ni.—Marka 12:30, 31.
3. Engvângin nge ṭhenkhat chuan kohhrana chanvote chelh chu an hreh mai theih?
3 A nih leh tling lo nia inhriatna avânga rawngbâwltu leh atâwpa upa nihna chanvo thlenga chelh hreh Kristian mipa chungchâng hi engtin nge ni le? Nick-a ang bawkin, berâm vêngtu thiam tak ni tûra mamawh thiamna nei lo nia inngaiin, a lungngai mai thei a ni. Baptisma chang tawh unaupa i nih chuan, chutiang rilru put hmang neite zînga mi i ni em? Chutianga lungngaihna neih chu a thiamawm hle. Jehova chuan berâm vêngtua a ruatte chu berâm rual an cheibâwl dânah mawh a phurhtîr si a. Isua chuan: “Tupawh tam tak an pêka hnênah chuan tam tak an phût ang; tupawh tam tak an kawltîra hnênah chuan tam deuh an phût ang,” tiin a sawi a ni.—Luka 12:48.
4. Engtin nge Jehova’n a berâmte enkawl tûra a ruatte chu a ṭanpui?
4 Jehova chuan kohhranho rawngbâwltu leh upaa a ruatte lakah an mawhphurhnate chu ṭanpuina tel lova an hlen a beisei em? Chutih ahnêkin, an mawhphurhnate hlen tûra a ṭanpui bâkah, hlawhtling taka thawk thei tûrin ṭanpuina ṭangkai tak a pe zâwk a ni. Thuziak hmasaa sawiho a nih tawh angin, Jehova’n anni chu thlarau thianghlim a pe a, chu mi rah chuan berâmte duat taka enkawl tûrin a ṭanpui a ni. (Tirhkohte 20:28; Galatia 5:22, 23) Chu bâkah, Jehova chuan finna te, hriatna te, leh hriat thiamna te chu a pe bawk. (Thufingte 2:6) Chu chu engtin nge a pêk? Jehova’n a berâmte enkawl tûra a ruat mi tinte a zirtîr dân kawng thum chu ilo sawiho ang u.
Thiltawn Nghah Berâm Vêngtute Hmanga Zirtîr
5. Engvângin nge Petera leh Johana chu berâm vêngtu thiam tak an nih?
5 Senhedrin hmaa tirhkoh Petera leh Johana an din khân, khawvêl lama mi fing chuta rorêltute chuan anni chu “lehkha thiam lo, mi mâwl tak” angin an thlîr a. Tirhkohte chuan ziak leh chhiar chu an thiam ngei mai a; mahse, Pathian Lehkha Thu zirna rabbi zirtîrna erawh an dawng lo. Chutichung pawhin, Petera te, Johana te, leh zirtîr dangte chu zirtîrtu thiam tak an ni a, anmahni thu ngaithlatu tam tak chu ringtu ni tûrin an chêttîr thei a ni. Engtin nge hêng mi pângngai ve maite hi zirtîrtu thiam tak an lo nih? Petera leh Johana te thusawi an ngaihthlâk hnu chuan rorêltute chuan anni chu “Isua hnênah an awm tawh tih an hre ta a.” (Tirhkohte 4:1-4, 13) Ni e, anni chuan thlarau thianghlim an dawng ngei mai a. (Tirhkohte 1:8) Mahse, Isua’n chûng mite a zirtîr tih thlarau lama mitdel rorêltute tân pawh a chiang a ni. Isua leia a tirhkohte hnêna a awm lai khân, anni chu berâm ang mite lâk khâwm dân chauh ni lovin, a huang chhûnga awm tawh berâmte enkawl dân thlengin a zirtîr a ni.—Matthaia 11:29; 20:24-28; 1 Petera 5:4.
6. Mi dangte zirtîrna kawngah Isua leh Paula chuan eng entawn tûr nge an siam?
6 Isua’n a thawhleh hnu khân, berâm vêngtu tûra a ruatte chu a zirtîr chhunzawm zêl a. (Thu Puan 1:1; 2:1–3:22) Entîr nân, amah ngeiin Paul chu thlangin, a zirtîrna dawng tûrin ruahmanna a siamsak a. (Tirhkohte 22:6-10) Paula chuan a zirtîrna dawn chu a hlut a, a thil zirte chu upa dangte hnênah a hlân chhâwng a ni. (Tirhkohte 20:17-35) Entîr nân, Timothea chu Pathian rawngbâwlna ‘zahpui lo hnathawktu’ ni tûra zirtîrnaah hun leh tha tam tak a sêng a. (2 Timothea 2:15) An inkârah inzawmna nghet tak a lo awm a ni. A hmain, Paula chuan Timothea chungchângah: “Fain a pa rawng a bâwl angin, chanchin ṭha tihdarh kawngah rawng mi bâwlpui ṭhin kha,” tiin a ziak a. (Philippi 2:22) Ani chuan Timothea emaw, mi dangte emaw chu ama zirtîrte ni tûra siam a tum lo. Chu aimah chuan, a rinpuite chu “mi zirtute ni rawh u, kei pawh Krista zirtu ka ni ang bawk hian,” tiin a fuih zâwk mah a ni.—1 Korinth 11:1.
7, 8. (a) Upate’n Isua leh Paula an entawn hunah rah ṭha a chhuah tih eng thiltawnin nge târ lang? (b) Engtikah nge upate chuan kohhranho rawngbâwltu ni thei tûrte chu an zirtîr ṭan ang?
7 Isua leh Paula entawnin, thiltawn ngah berâm vêngtute chuan baptisma chang unaupate zirtîr tûrin hma an la a, chutiang bawk rah ṭha chu an chhuah a ni. Chad-a thiltawn hi han ngaihtuah teh. Ani chu sakhaw thuhmun lo chhûngkuaa sei lian a ni a; mahse, tûn hnai mai khân upaa ruat a ni. Ani chuan: “Kum kalta chhûng zawngahte khân, thiltawn ngah upa engemaw zât chuan thlarau lama hma ka sâwnna tûrin min ṭanpui a. Ka pa chu ring lo mi a nih avângin, chûng upate chuan a bîkin min ngaihsak a, ka tân chuan thlarau lama pa ang mai an lo ni a. Rawngbâwlnaa min zirtîr tûrin hun an sêng a, a hnuah chuan kohhrana ka chanvo dawnte enkawlnaah upa pakhat chuan min zirtîr bîk a ni,” tih a sawi.
8 Chad-a thiltawnin a târ lan angin, hriat thiamna nei upate chuan kohhranho rawngbâwltu leh upa ni thei tûrte chu chûng mawhphurhnate tlin tûra hma an sâwn hma daih aṭangin zirtîrna chu an pe ṭan a ni. Engvângin nge? Bible chuan kohhranho rawngbâwltu leh upate chu chutianga ruat an nih hma aṭanga nungchang leh thlarau lam tehna sâng tlin tûra a tih vâng a ni. Anni chu ‘fiahin an awm hmasa’ tûr a ni.—1 Timothea 3:1-10.
9. Berâm vêngtu puitlingte chuan eng mawhphurhna nge an neih a, engvângin nge?
9 Baptisma chang unaupate chuan fiah an nih hmaa zirtîrna an dawn phawt chu a âwm a ni. Thehkhin nân: School naupang pakhat chu zirtîrtuin zirtîrna chiang taka a pêk loh zirlai chungchânga exam tûra tih ni ta se, a pass ang em? A pass loh a rinawm hle. Chuvângin, zirtîr a ngai a ni. Amaherawhchu, zirtîrtu taima takte chuan zirlai chu exam-naa pass tûr chauh ni lovin, an hriatna neihte hmang thiam tûrin an zirtîr bawk a ni. Chutiang bawkin, upa taima takte chuan baptisma chang unaupate chu zirtîrna chiang tak pêkna hmangin mi ruatte tlin tûr thilte nei tûrin an ṭanpui a. Anni chuan hêng unaupate hi ruat an nih theih nâna ṭanpui mai ni lovin, berâm rualte thiam taka an enkawl theih nâna ṭanpui tûra ti an ni. (2 Timothea 2:2) Baptisma chang unaupate pawhin ṭan an lain, kohhranho rawngbâwltu emaw, upa emawin a tlin ngaite tlin tûrin an thawkrim ngei tûr a ni bawk. (Tita 1:5-9) Amaherawhchu, thiltawn ngah berâm vêngtute chuan kohhrana mawhphurhna la thei tûra hma sâwnte châk taka zirtîrna hmangin, anni chu hma sâwn chak lehzual tûrin an ṭanpui thei a ni.
10, 11. Engtin nge berâm vêngtute chuan chanvo dangte chelh thei tûra mi dangte an zirtîr theih?
10 Thiltawn ngah berâm vêngtute chuan kohhran chanvote enkawl tûrin mi dangte chu engtin chiah nge an zirtîr theih? A hmasa berah chuan, kohhrana unaupate ngaihsakna lantîr hi a ni a, chutah chuan thlawhhma rawngbâwlnaa anmahni thawhpui ziahna leh “thutak thu fel taka” hmang tûra ṭanpuina a tel a ni. (2 Timothea 2:15) Berâm vêngtu puitlingte chuan chûng unaupate chu mi dangte rawngbâwlsakna aṭanga an dawn hlimna leh anmahni ngeiin an siam thlarau lam thiltumte leh chûngte an hlenna aṭanga an dawn lungawina chu an sawipui a. Unaupa chu ‘pâwlho entawn’ tûr a nih thlenga hma a sâwn theih dân tûr thurâwn chiang takte chu ngilnei takin an pe bawk ṭhîn a ni.—1 Petera 5:3, 5.
11 Unaupa chu kohhranho rawngbâwltua ruat a nih ve leh, berâm vêngtu fingte chuan amah chu an zirtîr chhunzawm zêl a. Kum sâwmbi têl upa nia rawngbâwl tawh Bruce-a chuan: “Rawngbâwltu nia ruat thar nêna ṭhu dûn a, bawi rinawm fing tak chhuah kaihhruainate ennawnpui chu nuam ka ti a. A chanvo dawn chungchânga kaihhruainate chu kan chhiar bawk a, a thawh tûr a thiamnal thlenga thawhpui chu ka duh bawk a ni,” tiin a sawi. Rawngbâwltu chuan thiltawn a lo neih hnuah, berâm tlawh tûra zirtîr theih a ni bawk. Bruce-a chuan: “Berâm tlawhnaa kohhranho rawngbâwltu ka hruaiin, kan va tlawh mi emaw, chhûngkua emawte tichak tûr leh chêttîr tûr Bible chângte chu thlang tûrin ka ṭanpui a. Rawngbâwltu chu berâm vêngtu thiam tak lo ni tûr chuan, Bible chângte mi thinlung khawih tûra hman dân thiam chu a pawimawh a ni,” tiin a sawi zawm a ni.—Hebrai 4:12; 5:14.
12. Engtin nge thiltawn ngah berâm vêngtute chuan upaa ruat tharte chu an zirtîr theih?
12 Berâm vêngtu nia ruat tharte pawhin, zirtîrna dawn belh chu nasa takin an hlâwkpui a. A hmaa kan târ lan, Nick-a chuan: “Upa enkawltu pahnihte hnên aṭanga kan dawn zirtîrna chu a bîk takin ka ṭangkaipui hle. Hêng unaupate hian thil engemaw chungchâng tihven dân an hre ṭhîn a. Dawhthei taka min ngaithla rengin, ka thlîr dân min pawmpui loh hunah pawh tih tak zetin an ngaihtuah a ni. Inngaitlâwm tak leh zahthiam taka kohhrana unaupa leh unaunute an dâwr dân ka hmuh aṭangin thil tam tak ka zir a. Hêng upate hian buaina chinfel hun emaw, fuihna pêk hun emawa Bible thiam taka hman a ṭûlzia ka rilruah an tuh nghet a ni,” a ti.
Pathian Thu Hmanga Zirtîr
13. (a) Berâm vêngtu thiam ni tûrin unaupa chuan eng nge a mamawh? (b) Engvângin nge Isua’n: “Ka thu zirtîr hi ka ta a ni lo” a tih?
13 Dik takin, Pathian Thu, Bible-ah chuan berâm vêngtu chu “hna ṭha tinrêng thawk tûra kim taka inthuamin a famkim theih” nâna a mamawh dânte, thu bulte, leh entîrnate a chuang a. (2 Timothea 3:16, 17) Unaupa chu lehkha thiam tak a ni mai thei a; mahse, Pathian Lehkha Thu a hriatna leh a hman dân chuan berâm vêngtu thiam a nihtîr a ni. Isua entîrna hi han ngaihtuah teh. Ani chu leia awm tawh azawnga thlarau lam berâm vêngtu hriatna ngah ber, hriat thiamna nei ber, leh fing ber a ni a; mahse, Jehova berâmte a zirtîrnaah chuan ama finnaah a innghat lo. Ani chuan: “Ka thu zirtîr hi ka ta a ni lo va, mi tîrtu ta a ni zâwk,” tih a sawi. Engvângin nge Isua chuan a Pa vâna mi chu a chawimawi? Ani chuan: “Tupawh mahni phuahchawp thu sawi chu, mahni mawina zawng a ni,” tiin a hrilhfiah a ni.—Johana 7:16, 18.
14. Engtin nge berâm vêngtute chuan mahni mawina an zawn loh?
14 Berâm vêngtu rinawm takte chuan mahni mawina an zawng lo va. Zilhna leh fuihna an pêkte chu mahni finnaah ni lovin, Pathian Thu an ṭanchhan zâwk a ni. Berâm vêngtu hna chu berâmte’n upate rilru ni lovin, “Krista rilru” pu tûra ṭanpui a ni tih an hre thiam a. (1 Korinth 2:14-16) Entîr nân, upa pakhat chuan inneihnaa harsatna tâwk nupa tuakkhat ṭanpui nân Bible thu bulte leh “bawi rinawm, fing tak” hmanga chhuah hriattîrnate ṭanchhan lovin ama thiltawn aṭangin thurâwn pe ta se, engtin nge ni ang? (Matthaia 24:45) A thurâwn pêk chu tualchhûng chîn dânte leh a hriatna neih chin chuan a khuahkhirh thei a ni. Chîn dân ṭhenkhat chu sual a ni hran lo ngei ang a, upa chuan a nunah thiltawn a nei pawh a ni mahna. Mahse, berâm vêngtuin mihring ngaihtuahna emaw, tualchhûng chîn dân emaw aia Isua aw leh Jehova thute ngaithla tûra a fuih hunah, berâmte chuan an hlâwkpui zâwk a ni.—Sâm 12:6; Thufingte 3:5, 6.
“Bawi Rinawm, Fing Tak” Hmanga Zirtîr
15. Eng hna nge Isua’n “bawi rinawm, fing tak” hnêna a pêk a, bawi pâwl hlawhtlin chhan pakhat chu eng nge ni?
15 Tirhkoh Petera, Johana, leh Paula ang berâm vêngtute chu Isua’n “bawi rinawm, fing tak” tia a sawi zînga mi an ni a. He bawi pâwl hi vâna Krista nêna rorêl tûra beiseina nei, thlarauva hriak thih leia Isua unaute hmanga din a ni. (Thu Puan 5:9, 10) He kal hmang tâwp ni hnuhnûngte chhûng hian, Krista unau leia a la bângte chu beisei ang ngeiin an tlêm sâwt hle a. Mahse, Isua’n hlen tûra a tih hna—tâwpna a lo thlen thlenga Ram chanchin ṭha hrilhna—chu tûn hma zawng aiin nasa taka zauh a ni. Chutichung pawhin, bawi pâwl chu chhinchhiah tlâk takin a hlawhtling a ni! Engvângin nge? Engemaw chen chu, thu hrilh leh zirtîr hnaa anmahni ṭanpui tûra “berâm dang” pâwla mite an zirtîr vâng a ni. (Johana 10:16; Matthaia 24:14; 25:40) Tûn laiah, he berâm dang pâwl rinawm tak hian hna tam zâwk chu a thawk a ni.
16. Engtin nge bawi pâwl chuan mi ruatte chu a zirtîr?
16 Engtin nge bawi pâwl chuan he zirtîrna hi a pêk? Kum zabi khatnaah, bawi pâwl aiawhtute chu kohhrana zirtîr tûr leh enkawltu tûrte ruat tûra thu neihna pêk an ni a, chûng enkawltute chuan berâmte chu an zirtîr lehchhâwng a ni. (1 Korinth 4:17) Chutiang bawk chu tûn laiah pawh a ni. Governing Body—bawi pâwl aiawhtu hriak thih upa pâwl tlêm tê—chuan khawvêl puma kohhran sâng têlah zirtîr tûr leh rawngbâwltu tûrte leh upate ruat tûrin thu neihna an pe a. Chu bâkah, Governing Body chuan berâmte ṭha taka enkawl a nih nân Branch Committee member te, bial kantu te, upa te, leh kohhranho rawngbâwltute zirtîr tûrin school-te chu a buatsaih a ni. Lehkhathawn te, Vênnainsâng thuziakte, leh thu leh hla chhuah dang Organized to Do Jehovah’s Willa tih ang chite hmangin kawhhmuh belhna chu a pe a ni.
17. (a) Engtin nge Isua’n bawi pâwl chunga a rinna chu a târ lan? (b) Engtin nge thlarau lam berâm vêngtute chuan bawi pâwl an rinzia an târ lan?
17 Isua chuan bawi pâwl a rin ngheh êm avângin, “a neih zawng zawng”—chu chu, leia a thlarau lam thil zawng zawng—chunga hotuah a siam a ni. (Matthaia 24:47) Berâm vêngtua ruatte pawhin Governing Body hnên aṭanga an dawn kaihhruainate nunpuina hmangin, bawi pâwl an rinzia chu an târ lang a. Ni e, berâm vêngtute’n mi dangte an zirtîr hunah te, Pathian Thu zirtîra an awm hunah te, leh bawi pâwl pêk zirtîrna an nunpui hunah te hian berâm huang chhûngah inlungrualna an awmtîr a ni. Jehova’n Kristian kohhran chhûnga mi tinte ngaihsak tak zettu unaupate a zirtîr avângin kan va lâwm tak êm! (w06 5/1)
[Footnote]
a Jehova Thuhretute chhuah a ni
Engtin Nge I Chhân Ang?
• Engtin nge thlarau lam berâm vêngtu puitlingte chuan mi dangte an zirtîr?
• Engvângin nge berâm vêngtute chuan anmahni ngaihtuahna ṭan chhana an zirtîr loh?
• Engtin nge berâm vêngtute chuan bawi pâwl an rinzia an târ lan a, engvângin nge?
[Phêk 24, 25-naa milemte]
Kristian upate chuan kohhrana unaupa naupang zâwkte an zirtîr
[Phêk 26-naa milemte]
“Bawi rinawm, fing tak” chuan upate chu nasa takin a zirtîr