Berâmte Enkawltu Tûr Upate

ISUA’N leia rawng a bâwl chhûng zawng khân “berâm vêngtu ṭha” a nihzia a lantîr a. (Joh. 10:11) Phûr taka amah zuitu mipuite chu a hmuhin, “vêngtu nei lo berâmte anga hrehawm leh darha an awm avângin a khawngaih ta êm êm a.” (Mt. 9:36) Petera leh tirhkoh dangte chuan chutianga ngaihsakna duhawm tak a lantîr chu an lo hmu a ni. Israel rama berâmpu dik lo, berâmte darh leh thlarau lama ṭâm khawpa ngaihthahtute lakah chuan Isua chu a va danglam tak êm! (Ezek. 34:7, 8) Zirtîrna kawngah leh a nun thâp hial khawpa berâmte a ngaihsakna kawnga, Isua entawn tur siam ṭha tak aṭangin, tirhkohte chuan rinna neite chu, ‘an thlarau vêngtu leh hotu,’ Jehova hnêna kîr leh tûra ṭanpui dân an zir a ni.—1 Pet. 2:25.

² Ṭum khat chu, Isua’n Petera a biak laiin, berâmte châwm leh enkawl a pawimawhzia a sawi uar hle a. (Joh. 21:15-17) Chu chuan Petera rilru a khawih hle a, a hnuah Kristian kohhran hmasaa upate chu heti hian a fuih hial a ni: “In zînga Pathian pâwlho awm chu enkawl rawh u; tih tûr a nih vâng ni lovin, Pathian thu anga châk chung zâwkin, hlêpna bawlhhlawh duh vâng ni hek lovin, rilrua duh tak zâwkin, in chante chungah intilal hek lovin, pâwlho entawnan insiam zâwkin ho rawh u,” tiin. (1 Pet. 5:1-3) Petera fuihna thu chu, tûn laia kohhran upate tân pawh a ni. Isua entawnin upate chuan berâmte entawn atân inhuam tak leh châk takin rawng an bâwl a, Jehova rawngbâwlnaah hma an hruai a ni.—Heb. 13:7.

³ Kohhranah hian thlarau thianghlima ruat upate kan neih avângin kan lâwm tûr a ni. An enkawlna aṭangin hlâwkna tam tak kan dawng a. Entîr nân, upate chuan kohhrana mite fuihna pein, mi mal ngaihsakna an lantîr a. Chawlhkâr tinin, rinna nei zawng zawngte min tichaktu kohhran inkhâwmte chu taima takin an kaihruai a ni. (Rom 12:8) Mi suaksualte ang chi, thil hlauhawmte laka berâmte taima taka an vênhimna chuan rilru muanna min neihtîr a ni. (Is. 32:2; Tit. 1:9-11) Rawngbâwlnaa hma an hruaina chuan thla tina chanchin ṭha hril ziah tûrin min tichak bawk. (Heb. 13:15-17) Hêng ‘mihringte hnêna thilpêk’ kohhran upate hmang hian, Jehova chuan kohhran a enkawlin, a tichak a ni.—Eph 4:8, 11, 12.

UPATE TLIN NGAI THILTE

⁴ Kohhran ṭha taka enkawl a nih theih nân, upaa ruat mipate chuan Pathian Thu-a târ lan thil phûtte chu an tlin ngei tûr a ni a. Chutianga an tlin chauhvin, thlarau thianghlima ruat an ni tia sawi theih a ni. (Tirh. 20:28) Kristian upate nih chu mawhphurhna sâng tak a nih avângin, an lakah phût Bible tehnate chu a sâng hle a. Chutih rualin, Jehova hmangaihna dik tak nei a, a mi hman nih duh Kristian mipa tân chuan tlin theih loh khawpa sâng erawh a ni lo. Upate chu an nî tin nuna Bible fuihna zâwmtute an ni tih mi tin hmuhah a lang chiang tûr a ni.

⁵ Tirhkoh Paula chuan Timothea hnêna a lehkha thawn hmasa zâwkah leh Tita hnêna a lehkha thawnah upate tâna Bible tehna tlin ngai bulpuite a sawi lang a. Timothea thawn khat 3:1-7-ah chuan heti hian kan chhiar a ni: “‘Tupawh Kohhran hotua ṭan duh chuan hnathawh ṭha a duh a ni,’ tih hi a dik a ni. Chutichuan Kohhran hotu chu sawisêlbo, nupui pakhat nei, insûm thei, rilru dik tak, mi fel, mi lawm dân thiam, zirtîr thiam, uain ruih hmang lo, mi velh hmang lo, mi nunnêm ni zâwk tûr, kawhmawhbâwl lo, tangka sum ngaina lo, zahawm taka fate kilkawia mahni inchhûng khawsak rêl fel thiam mi ni tûr a ni; (miin ama in chhûng khawsak mah a rêl fel thiam si loh chuan Pathian Kohhranho engtin nge a enkawl theih ang?) Ring thar mi ni tûr a ni lo, chutilochuan chapovin a awm ang a, Diabola thiam loh channa chu a chang ve dah ang e. Chûng lo pawh chu pâwn lama mite fakin a awm bawk tûr a ni, chutilochuan sawichhiata awmin Diabola thangah a âwk dah ang e,” tiin.

⁶ Paula chuan Tita hnênah heti hian a ziak a: “He mi avâng hian Kret thliarkârah khân ka hnutchhiah che a ni, thil tihfel bâkte chu i tihfel zêlna tûr leh, thu ka pêk che ang khân khaw tinah upate i ruatna tûrin; tupawh sawisêlbo, nupui pakhat nei, fate Pathian thu ring, nawmsak bâwl lutuk kawnga sawisêl hlawh lo, dân ang lova awm lo nei an nih tawh phawt chuan. Kohhran hotu chu Pathian sum enkawltu a nih avângin sawisêlbo a ni tûr a ni; mi tihmawh, thin ram, uain ruih hmang, mi velh hmang, hlêpna bawlhhlawha duhâm mi ni tûr a ni lo va; mi lawm dân thiam, ṭha lam duh, rilru dik tak, mi fel, mi thianghlim, insûm thei mi a ni zâwk tûr a ni a; zirtîrna dik tak kawngah chuan mi a fuih theihna tûr leh, hnialtute chu thiam loh a chantîr theihna tûrin zirtîrna ang zêl thu rinawm chu pawm tlat mi a ni bawk tûr a ni,” tiin.—Tita 1:5-9.

⁷ Atîrah chuan upate tâna Bible thil phûtte chu tlin harsa deuh tûr angin lang mah se, Kristian mipate tân chuan nih tum loh phah nâna hman tûr a ni lo. Upate tâna phût Kristian miziate an lantîrna hian, kohhrana mi dangte pawh lantîr ve tûrin an fuih a ni. Paula chuan chutiang ‘mihringte hnêna thilpêkte’ chu “rinna leh Pathian Fapa hriatna kawngah chuan thu khat vua a, puitling a, Krista famkimna lenzia tluka kan zaa kan lo awm hma loh zawng, rawngbâwl hna thawk tûra mi thianghlimte tihfamkim nân Krista taksa siam ṭha tûrin” pêk an nih thu a ziak a ni.—Eph. 4:8, 11-13.

⁸ Upate chu kum naupang tak anni lo va, ring thar kum upa tawhte lah an nih hek lo. Chu aiin, Kristian nun kawnga thiltawn ngah tawh tak, Bible hriatna zau leh thûk tak nei, leh kohhran hmangaihna dik tak neite anni zâwk a. Thil sual titute zilh leh siam ṭha tûrin huaisenna an nei a, chutiang chuan berâmte chu mahni hmasial taka hman ṭangkai tumtute lakah an vênghim a ni. (Is. 32:2) Kohhrana mi zawng zawngin upate chu thlarau lama mi puitling, Pathian berâmte ngaihsak tak zettu an nihzia an hmu nghâl thei a ni.

⁹ Upa ni tûra tlingte chuan an nunah finna an neihzia an lantîr a. Nupui nei a nih chuan, upa chu inneihna lama Kristian tehna zâwmtu a ni tûr a ni a, nupui pakhat nei leh mahni inchhûng khawsak rêl fel thiam mi a ni tûr a ni. Kohhran upa chuan Pathian thu ring fate a neih a, anni chu zahawm taka a kîlkawi theih an nih a, nawmsak bâwl lutuk kawnga sawisêl hlawh lo, leh dân ang lova awm lo an nih chuan, kohhrana mi dangte chuan chhûngkaw nun leh Kristian nun dân chungchângah a hnên aṭangin ngaihngam takin fuihna leh thurâwn an la thei ang. Kohhran upa chu sawiselbo leh pâwn lama mite fakin a awm bawk tûr a ni. Kohhran hming tichhe thei tûr zâwnga thil ṭha lo ti anga puh theih a ni tûr a ni lo. Thil sual pawi tak tih avânga tûn hnai lawka zilhna tâwk a ni tûr a ni lo bawk. Kohhrana mi dangte chuan a entawn tûr ṭha entawn an châk a, a kutah an thlarau lam nun kawltîr chu an duh a ni.—1 Kor. 11:1; 16:15, 16.

¹⁰ Chûng mipa tling takte chuan Israel upa, “mi fing, hmang hre mi, chinchâng hre mite” anga sawite chanvo ang chu chelhin Kristian kohhranah rawng an bâwl thei a ni. (Deut. 1:13) Kristian upate chu sual nei lo an ni lo. Mahse, anni chu kohhranah leh vêngchhûngah chuan mi dik leh Pathian ṭih mi, hun engemaw chhûng chu Pathian tehnate mila nung tawhte anga hriat an ni. Sawisêlbo an nihna chuan kohhranah zalên taka thu sawi theihna a neihtîr ani.—Rom. 3:23.

¹¹ Kohhran upa nih tling mipate chuan an nunah leh mi dangte nêna an indâwrnaah a âwm tâwk hre mi an nihzia an lantîr a. Mahni ngaih dân vuan tlat mi an ni lo va, an nun dânah inbûk tâwkna leh insûmtheihna an nei zâwk a ni. Ei leh inah te, chawlhhahdamnaah te, mahni tui zâwng tihna kawngah te, leh intihhlimnaahte hian insûmtheihna an neihzia a lang a. Zu rui emaw, zu ruih hmang emawa mite’n an puh theih loh nân a âwm tâwk chauhvin zu an in a ni. Zu rui chuan awlsam takin insûm theihna a hloh ṭhîn a, chutiang mi chu, kohhran thlarau lam mamawhte vêng thei tûr dinhmunah a ding lo.

¹² Kohhran enkawl tûr chuan mi fel, a nih loh leh fel taka thil ti ṭhîn mi nih a ngai a. Chutiang a nihzia chu a mi mal lan dân, a in chhûng, leh nî tina a thiltihah a lang a ni. Chutiang mi chuan a tih tûrte chu a dâwn ṭêpa tih atân a khêk lo va, thil ṭûlte chu hriain, ruahmanna a siam nghâl ṭhîn a. Pathian thu bulte a zâwm tlat a ni.

¹³ Kohhran upa chu mi nunnêm a ni tûr a ni a. Kohhran upa dangte nêna inremin, thawhpui thei mi a ni tûr a ni bawk. Mahni inthlîr dân dik a neiin, mi dangte a phût sâng lutuk tûr a ni lo. Mi nunnêm a nih angin, kohhran upa chu mahni thu duh tak, a ngaih dân chu upa dangte ngaih dân aia chungnung zâwka ngaitu a ni tûr a ni lo. Upa dangte chuan a aiin mizia leh theihna ṭha zâwk an nei pawh a ni thei. Upa chuan Bible ṭanchhana thu tlûkna a siam a, Isua Krista entawn tûr siam zui a tum tlat hian nunnêmna a lantîr a ni. (Phil. 2:2-8) Upa chu kawhmawhbâwl lo leh mi velh hmang lo a ni tûr a ni a, mi dangte chu a aia sâng zâwkah dahin a zah tûr a ni. A tih dân leh a thlîr dân pawm ngei ngei tûra mi dangte nawrtu mi tihmawh a ni lo. Mi thin ram a ni lo va, mi dangte nêna an indâwrnaa remna duh mi a ni zâwk a ni.

¹⁴ Chutiang bawkin, kohhran upa nih tling chu, rilru dik tak pu mi a ni bawk. Chumi awmzia chu mi rilru fîm pu mi a ni a, ngaihtuah chiang lovin thu tâwp a siam mai lo tihna a ni. Jehova thu bulte leh a hmannate hriatthiamna ṭha tak a nei a. Rilru dik tak pu mi chuan zilhna leh kaihhruaina a dawng thiam a, vervêkna a nei lo bawk.

¹⁵ Kohhran upa chu ṭha lam duh mi a nih thu Paula chuan Tita a hriatnawntîr a. Mi fel leh rinawm a ni tûr a ni. Hêng miziate hi mi dangte nêna an indâwrnaah leh, thil dik leh ṭha a ṭan tlatnaah a lang chhuak ṭhîn. Jehova hnêna a inpêknaah a nghîng ngai lo va, thu bul felte a chawisâng reng ṭhîn. Thu rûk a vawng thei a. Mi dangte ṭhatna tûrin a thil neihte a pêk bâkah mahni ngei pawh inpein, khualchhâwn thiamna dik tak a lantîr ṭhîn bawk.—Tirh. 20:33-35.

¹⁶ Ṭha taka rawng a bâwl theih nân, kohhran upa chu zirtir thiam a nih a ngai a. Tita hnêna Paula sawi angin, kohhran upa chu “zirtîrna dik tak kawngah chuan mi a fuih theihna tûr leh, hnialtute chu thiam loh a chantîr theihna tûrin zirtîrna ang zêl thu rinawm chu pawm tlat mi” a ni tûr a ni. (Tit. 1:9) Upa chuan mi dangte a chhûtpui theiin, finfiahnate a pe thei a, hnialkalhnate ṭha taka chhângin, mi dangte rin tûr zâwng leh an rinna tichak thei tûr zâwngin Bible a hmang thei a ni. Chutiang zirtîr thiamna chu dinhmun harsa leh ṭhaah pawh a lantîr ṭhîn. (2 Tim. 4:2) Thil sual titu thuhnuairawlh taka zirtîr tûr leh ringhleltu hmina rinna ṭanchhana thil ṭha ti tûra chêttîr tûra mamawh dawhtheihna a nei bawk. Mipui hmaah leh a mi mal anga mite a zirtîr theihna chuan he thil pawimawh tak hi upa chuan a tlin a ni tih a târ lang.

¹⁷ Upate tân rawngbâwlnaa ṭhahnemngai taka tel a pawimawi hle a. Hemi kawngah pawh hian chanchin ṭha hrilh dah pawimawh bertu, Isua entawn an tumzia a lang chiang tûr a ni. Isua chuan a zirtîrte chu a ngaihsakin, chanchin ṭha hriltu thiam tak ni tûrin a ṭanpui a. (Mk. 1:38; Lk. 8:1) Upate’n an buai hle chung pawha rawngbâwlnaa tel an tum tlatna chuan kohhran pum chu ṭhahnemngai tûrin a chawk phûr a. Anmahni chhûngkaw mite leh kohhrana mi dangte ruala thuhrilhnaa an telna chuan “inthlamuan tawn theihna” a awmtîr a ni.—Rom 1:11, 12.

¹⁸ Hêng zawng zawngte hi upa pakhat laka beisei chu a lutuk mah mah ni pawhin a lang mai thei. Dik tak chuan, upa tumah hian Bible-a tehna sâng takte chu ṭha famkim chuan an zâwm thei lo ngei mai a; mahse, kohhrana upa atâna ruatte chuan tlin lohna khawpa ngaih theih tûrin hêng miziate hi an tlachham lutuk tûr a ni lo. Upa ṭhenkhat chuan mize ṭha tak ṭhenkhat an neih laiin, upa dangte chu kawng dangah an ṭha hle thei bawk. Chuvângin, Pathian kohhran ṭha taka enkawl tûra neih ngai mize ṭha zawng zawng chu ho khat angin kohhran upate chuan an nei a ni.

¹⁹ Upate chuan kohhran upa ni tûra mite an rawt hunah, tirhkoh Paula thu: “In zîngah tumah inngaihhlut tâwk aliama inngaihlu lovin, Pathianin mi tin hnêna rinna tâwk a pêk ang zêlin fel taka ngaihtuah zâwk tûrin ka ti ṭheuh a che u,” tih hi rilruah an vawng reng tûr a ni. (Rom 12:3) Upate chu tê ber angin an inngai ṭheuh tûr a ni a. Mi dangte tlin ngai miziate an ennawn laiin, tumah chu an “kherkhiap lutuk” tûr a ni lo. (Thur. 7:16) Upate tlin ngai Bible-a tehnate rilrua chiang taka hre reng chungin, upate chuan ruat an tum unaupain chûng tehnate chu a âwm tâwka a tlin leh tlin loh an en chiang tûr a ni. Upate chuan mihring ṭhat famkim lohnate ngaihtuah tel chung leh induhsak bîkna leh vervêkna tel lovin, Jehova tehna felte zahna dik nei chung leh kohhran ṭhatna tûr ngaihtuah chungin rawtna chu an siam ang. Rawtna an pêk apiang chu ṭawngṭaina nên ngun takin an ngaihtuah ang a, Pathian thlarau thianghlim kaihhruaina an zâwm ang. Hei hi an mawhphurhna pawimawh takte zînga pakhat a ni a, Paula’n: “Tuma chungah kut nghat thut suh,” tia a fuihna nêna inmilin an ti ngei tûr a ni.—1 Tim. 5:21, 22.

THLARAU RAH

²⁰ Thlarau lama puitling mipate chuan thlarau thianghlimin a kaihruai tih an lantîr a, thlarau rah chu an nunah an lan chhuahtîr a ni. Paula chuan thlarau rah hmêlhmang pakuate chu heti hian a ziak a ni: “Hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te,” tiin. (Gal. 5:22, 23) Chutiang upate chuan unaute an tihahdam a, rawngbâwlna thianghlima inlungrual tûrin an ṭanpui a. An nun dân leh an thawhrimna chuan anni chu thlarau thianghlim ruat ngei an nihzia a târ lang a ni.—Tirh. 20:28.

INPUMKHATNA AWMTIRTU MIPATE

²¹ Kohhran upate tân kohhrana inpumkhatna awmtîr tûra an thawhho chu a pawimawh hle a. Mize hrang hrang an nei mai thei a; mahse, an thu sawiho apianga an ngaih dân a inan loh hunah pawh zahthiam taka inngaithla tawnin, an inkârah inpumkhatna an vawng a ni. Bible thu bulte bawhchhiat a nih loh phawt chuan, upate chuan a huhova thu tlûkna an siam chu an zâwmin an thlâwp ṭheuh tûr a ni. Chutianga zawm duhna rilru an neihna chuan “chung lam aṭanga finna lo chhuak” kaihhruaiin a awm tih a lantîr a, chu chuan “inrem a duh a, a nunnêm a.” (Jak. 3:17, 18) Upa tumahin upa dangte aia sâng zâwkah a inngai tûr a ni lo va, upa dangte awpbeh a tum tûr a ni hek lo. Upate chuan kohhran ṭhatna tûra an thawhho hian Jehova an thawhpui tak zet tihna a ni.—1 Kor., bung 12; Kol. 2:19.

TLIN TUMA ṬAN LAKNA

²² Kristian puitling mipate chuan kohhran upa nih chu an duh tûr a ni a. (1 Tim. 3:1) Mahse, kohhran upa anga rawngbâwl tûr chuan thawhrimna leh mahni inpêkna neih a ngai a ni. Chumi awmzia chu kohhrana unaute thlarau lam mamawh ngaihtuah a, an mamawhte ngaihsak tûrin an inpe tihna ani. Upa tlin tuma ṭan la tih chu, Bible-a tlin ngai mizia târ lante neih tumna hi a ni.

MI MAL DINHMUN A INTHLAK THEI

²³ Hun rei tak chhûng rinawm taka rawng lo bâwl tawh unaupa chu a dam loh vâng emaw, thil dang vâng emawin engmah a ti thei tawh lo pawh a ni thei. A nih loh leh, kum upatna avangin kohhran upa mawhphurhnate chu a hlen chhuak thei tawh lo pawh a ni thei bawk. Chutichung pawhin, upa a nih chhûng chuan, upa anga en leh zah reng tûr a ni a. A tih theih a tlêm tawh avâng maia bântîr tûr a ni lo. Theih tâwp chhuaha berâmte enkawltu upa zawng zawngte dawn ang, a leh hniha chawimawina chu a la phû reng tho a ni.

²⁴ Mahse, unaupa chuan mi mal dinhmun inthlâk danglamnain rawng a bâwl ṭhattîr theih loh avânga bânsan mai chu a tâna ṭha zâwk tûra a ngaih chuan, a châwl thei ang. (1 Pet. 5:2) Chutiang a nih pawhin, zahna lantîr a la phû reng tho a ni. Upate hnêna pêk chanvote chu chang tawh lo mah se, kohhran tân ṭangkaina tam tak a la nei reng tho a ni.

KOHHRANA MAWHPHURHNA DINHMUNTE

²⁵ Upate chuan kohhranah mawhphurhna hrang hrang an chelh a. Upate râwn khâwmtu coordinator te, secretary te, rawngbâwlna enkawltu service overseer te, Vênnainsâng Zirna kaihhruaitu, leh Nun leh Rawngbâwlna Inkhâwm overseer te an awm a ni. Upa tam takte chu group overseer-te an ni a. Upate chuan chûng chanvote chu tiam chin awm lovin an chelh a ni. Amaherawhchu, unaupa chu kohhran dangah a insawn emaw, hrisêl lohna avânga a mawhphurhnate a hlen thei lo emaw, a nih loh leh Bible tehnate a tlin tawh loh avânga a nihna hlihsak emaw a nih chuan a hmun luah tûrin upa dang pakhat ruat a ni ṭhîn. Upa an tlêmna kohhranah chuan upa nih tling dang an awm hma chu upa pakhatin chanvo pakhat aia tam a chelh pawh a ngai thei bawk.

²⁶ Upate râwn khâwmtu coordinator chu upate inkhâwmnaah chairman a ni ṭhîn a. Pathian berâm rualte enkawlnaah upa dangte chu inngaitlâwm takin a thawhpui a ni. (Rom 12:10; 1 Pet. 5:2, 3) Ani chu thil ruahman thiam tak leh taima taka kaihruai thei mi a ni tûr a ni.—Rom 12:8.

²⁷ Secretary chuan kohhran lehkha leh thu pawimawhte a enkawl a, kohhrana lehkha lût leh chhuak pawimawhte chu upate a hriattîr zêl ṭhîn. A ṭûl chuan amah ṭanpui tûrin upa dang emaw, kohhranho rawngbâwltu tling tak emaw chu ruat theih a ni.

²⁸ Thlawhhma rawngbawlna leh rawngbâwlna lam kaihhnawih thil dangte chu rawngbâwlna enkawltu service overseer hnuaia awm a ni ve thung a. Ani chuan thla tinin chawlhkâr tâwp pakhat zêl chu, rawngbâwlna group dangte tlawh tûrin ruahmanna a siam ṭhîn. Rawngbâwlna group tlêm tê chauh awmna kohhran lian vak lovah chuan, kum khat chhûngin vawi hnih tlawh chhuak tûrin ruahmanna a siam thei ang. Chutianga a tlawh chhûng chuan, thlawhhma rawngbâwlna atâna inhmuhkhâwmna chu a kaihruai ang a, group chu thlawhhma rawngbâwlnaah thawhpuiin, thuchhuahtute chu an tlawhkîr leh Bible zirpuinaah a ṭanpui ang.

GROUP OVERSEER-TE

²⁹ Kohhrana rawngbâwlna chanvote zînga langsâr tak pakhat chu group overseer nih hi a ni a. A mawhphurhnaah chuan hêngte hi a tel, (1) thlawhhma rawngbâwlna group-a mi tinte thlarau lam ṭhatna tûr ṭhahnemngai taka ngaihtuah; (2) group-a mi tinte chu rawngbâwlna hlimawm tak leh awmze nei taka nei ziah tûra ṭanpui; leh (3) group-a kohhrana rawngbâwltute chu, kohhrana mawhphurnate chelh thei tûra ṭanpui leh zirtîr hi a ni. Kohhrana upate chuan hêng mawhphurhnate hlen chhuak tûra tling ber tûra an ngaih unaupate chu group overseer atân an ruat ang.

³⁰ A mawhphurhna hi a pawimawh êm avângin, group overseer-te chu a theih chuan upa an ni tûr a ni. A nih loh pawhin, upa an awm hma chuan kohhranho rawngbâwltu tling tak a hman theih a. Chutiang atâna hman kohhranho rawngbâwltu chu kohhrana upa a nih loh avângin group rawngbâwltu tia koh a ni a, upate kaihhruaina hnuaiah a thawk a ni.

³¹ Group overseer mawhphurhna pawimawh tak pakhat chu thlawhhma rawngbâwlnaa hma hruai hi a ni. Rawngbâwlnaa a tel ziahna, taihmâkna leh phûrna a lantîrna chuan a group-a awmte chu a tichak a. Thuchhuahtute chuan chutianga an kalkhâwmna aṭanga fuihna leh ṭanpuina an hmuhte chu an ngaihhlut avângin, thu hrilhna hun duan chu group-a a tam zâwkte remchân huna neih ṭhin a ṭha ang. (Lk. 10:1-16) Group overseer chuan thu hrilhna bial indaih tâwk a awm ngei tih a chian tûr a ni a. A tlângpuin, thlawhhma rawngbâwlna atâna inhmuhkhâwmna chu a kaihhruai ang a, chumi nia thuchhuahtute rawngbâwl dân tûr chu a ruahman ang. A chhuah theih loh hunah chuan, upa dang emaw, kohhranho rawngbâwltu emaw a aiawh tûrin a ruat ang a, chutiang tûr a awm loh chuan, thuchhuahtute hnêna an mamawh kaihhruaina pe tûrin hêng mawhphurhnate hlen chhuak thei tûra tling thuchhuahtu chu a ruat ang.

³² Group overseer chuan rawngbâwlna enkawltu service overseer rawn tlawh hun atân ruahmanna siamin a group-a mite chu hlâwkna an hmuh tûrte hrilhin phûrna a neihtîr ang. Group-a awmte chuan chûng ruahmannate an hriat vek chuan, phûr takin an ṭâwiâwm thei ang.

³³ Rawngbâwlna group-te chu mi tlêm tê chauh awm tûr rênga siam a ni a. Chuvângin, group overseer chuan a group-a awm zawng zawngte chu a hriat chian theih phah a ni. Hmangaihna nei berâm vêngtu a nih angin, anni chu a ngaihsak ṭheuh va. Thu hrilh rawngbâwlna leh kohhran inkhâwmte atâna mite ṭanpui leh tihchak chu a tum ṭhîn. Mi tinte thlarau lama an chak theih nân, a theih ang apianga ṭanpuina inâwm takte pawh pêk a tum bawk. Dam lo emaw, lunghnual emawte chuan a va tlawhna chu an hlâwkpui ang. Mi tichak thei rawtna emaw, fuihna thu emaw chuan ṭhenkhat chu kohhrana chanvo dangte chelh thei tûr leh kohhrana an unaute ṭanpuitu ṭha lehzual ni tûrin a chêttîr mai thei. Group overseer chuan a group-a mite chu a ṭanpui deuh ber a. Amaherawhchu, kohhran upa leh berâm vêngtu a nih angin, upa chuan kohhrana mi tinte chu hmangaih takin a ngaihtuah vek a, ṭanpui ngai apiangte ṭanpui chu a inpeih reng a ni.—Tirh. 20:17, 28.

³⁴ Group overseer mawhphurhna pakhat chu a group-a awmte thlawhhma rawngbâwlna report lâk khâwm hi a ni. Chûng report-te chu secretary hnênah pêk chhâwn a ni ṭhîn. Thuchhuahtu apiang chuan an thlawhhma rawngbâwlna report a hun taka pêkna hmangin, group overseer chu an ṭanpui thei a. Thla tâwp apiangin an group overseer hnêna report pein an ti thei a, a nih loh leh Kingdom Hall-a report thlâkna tûr bâwm siamah chuan an thlâk thei bawk a ni.

KOHHRAN SERVICE COMMITTEE

³⁵ Kohhrana upahote râwnkhâwmtu coordinator te, secretary te, leh service overseer te hmanga din Service Committee chuan mawhphurhna dang ṭhenkhat a nei a. Entîr nân, service committee chuan inneih nân leh mitthi vui nâna Kingdom Hall hman leh hman loh tûrah thu tlûkna a siam a, field service group-a thuchhuahtu awm tûrte pawh a ruat bawk. He committee hian regular leh auxiliary pioneer thawk tûrte bâkah, rawngbâwlna danga thawk tûra dîlna form-te pawh a khawih bawk. Service committee chuan upate kaihhruaina hnuaiah hna a thawk a ni.

³⁶ Hêng unaupate tih tûrte chu—Vênnainsâng Zirna kaihhruaitu, Nun leh Rawngbâwlna Inkhâwm overseer, leh upa dangte hna thawh dân tûrte rualin—branch office hian kaihhruaina a pe ṭhîn a ni.

³⁷ Kohhrana awm upate chu thlarau lama kohhran ṭhan chhohna nêna inkûngkaih thilte sawiho tûrin hunbi neiin an inhmukhâwm ṭhîn a. Bial kantu tlawh huna neih ṭhin upa inkhâwmnate bâkah, inkhâwmna dangte chu bial kantuin a tlawh hnu thla thum vêlah neih a ni ṭhîn. Mahse, upate chuan dinhmun avânga a ṭûl hun apiangah inkhâwmna an nei thei a ni.

INTULUT RAWH

³⁸ Upate chu ṭha famkim lo an ni a; mahse, Jehova ruahmanna a nih angin kohhrana mi tinte chu an laka intulût tûra fuih an ni. Ani chuan upate chu an thiltihte chungah mawh a phurhtîr ang. Anni chuan amah leh a rorêlna ai an awh si a. Hebrai 13:17 chuan: “In hotute thu âwih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tiin a sawi a ni. Jehova’n a thlarau thianghlim chu upa ni tûra unaupa ruat nâna a hman ang bawkin, unaupa chuan thlarau rah a lantîr loh va, a nun dân chuan Bible-a thil phûtte a tlin tawh loh chuan, Jehova chuan chu a thlarau thianghlim vêk chu upa aṭanga paihthlâk nân a hmang ang.

³⁹ Kohhran upate thawhrimna leh entawn tûr ṭha siamte chu kan ngaihlu a ni lâwm ni? Thessalonika khuaa kohhranho hnêna a lehkha thawnah, Paula chuan: “Nimahsela unaute u, in zînga thawkrim leh, Lalpaa in hotua awm leh, zilhtute che u chu hre tûr leh, an hnathawh vânga hmangaiha ngaihlu êm êm tûrin kan ngên che u a ni,” tiin unaute chu a fuih a. (1 Thes. 5: 12, 13) Kohhran upate thawhrimna a tam zâwkte avângin Pathian rawng kan bâwlna chu a awlsamin, a hlimawm lehzual a. Paula chuan Timothea hnêna a lehkha thawn hmasa zâwkah khân, upate chunga kohhrana mite rilru put dân tûr chu heti hian a sawi a ni: “Kohhran upa rorêl ṭhate chu a leh hniha chawimawi tlâka ngaih ni rawh se, thu hril leh zirtîrnaa thawk rimte chu chawimawi tlâka ngaih lehzual ni rawh se,” tiin.—1 Tim. 5:17.

INAWPNA PAWL CHHUNGA MAWHPHURHNA DINHMUN DANGTE

⁴⁰ A châng chuan, upate zînga thlan chhuah ṭhenkhat chu dam lote tlawh tûrin Patient Visitation Group-a tel tûra thlan an ni a. Mi dangte chuan Hospital Liaison Committee anga rawngbâwlin, thisen tel lova Jehova Thuhretute an inenkawl zêl theih nân, damdawi inte leh doctor-te an tlawh ṭhîn a ni. Kohhran upa dangte chuan Kingdom Hall leh Assembly Hall saknaahte an pui a, a nih loh leh inkhâwmpui tâna Convention Committee member zîngah telin, Lalram hmasâwnnaah an ṭanpui a ni. Hêng unaupate thawhrimna leh hetiang kawnga inhuam taka an inpêkna hi inawpna pâwla awm zawng zawngte hian kan hlut hle a. Ni e, ‘hetiang mite hi kan ngaihlu’ a ni.—Phil. 2:29.

BIAL KANTUTE

⁴¹ Governing Body chuan upate zînga mi tling takte chu bial kantuahte a ruat a. Anni chu branch office-in an bial chhûnga kohhrante tlawh tûrin a tîr a, kum khatah vawi hnih an tlawh tlângpui ṭhîn. Anni chuan hmun hlaa awm thu hrilhna bialte chu a khât tâwkin an tlawh bawk. Bial kan tûra an kal dân tûrte an ruahman a, kohhrante’n a tam thei ang bera an hlâwkpui theih nân an tlawh hun tûr chu a hma thei ang berin an hriattîr ṭhîn.

⁴² Bial kan hun chu mi tin tâna thlarau lama harhna thlentu a nih theih nân, kohhrana upate râwn khâwmtu coordinator chuan hma hruaiin ruahmanna a siam ṭhîn a. (Rom 1:11, 12) Bial kan hun leh bial kantu leh (nupui nei a nih chuan) a nupui thil mamawhte chungchâng hriattîrna a dawn hunah, kohhrana upate râwn khâwmtu coordinator chuan upa dangte ṭanpuinain, bial kantu awmna tûr leh thil ṭûl dangte chu a ruahman a. Tichuan, chûng ruahmanna chu bial kantu leh mi dangte hnênah a hriattîr ṭhîn a ni.

⁴³ Bial kantu chuan thlawhhma rawngbâwlna atâna inhmuhkhâwmna pawh tiamin, inkhâwm hun duan chungchângah kohhrana upate râwn khâwmtu coordinator chu a be pawh ang. Chûng chu bial kantu rawtna pêk leh branch office aṭanga kaihhruainate mila siam tûr a ni a. Kohhran inkhâwm te, pioneer inkhâwm te, upa leh kohhranho rawngbâwltute nêna inkhâwmte neihna tûr a hun leh hmun tûrte bâkah, thlawhhma rawngbâwlna neihna tûr a hun leh hmunte pawh mi tinte hriattîr vek an ngai a ni.

⁴⁴ Thawhlehni chawhnuah, bial kantu chuan thuchhuahtute rawngbâwl dân chhinchhiahna Kohhrana Thuchhuahtute Chhinchhiahna te, inkhâwma tel zât chhinchhiahna te, territory record te, leh sum dinhmunte chu a endik ang a. Chu chuan kohhranin a mamawhte leh a enkawltu mawhphurhna neite a ṭanpui theih dân tûrte chu engemaw chenin a hriatthiamtîr ang. Bial kantuin chûng a mamawhte hma taka a dawn theih nân, kohhran upate râwn khâwmtu coordinator chuan ruahmanna a siam tûr a ni.

⁴⁵ Bial kantu chuan inkhâwmnaah te, thlawhhma rawngbâwlnaah te, chaw eiho hunah te, leh hun dangahte chuan unaute chu a mi mala biak nân hun a hmang a. Chu bâkah, upate leh kohhranho rawngbâwltute chu an berâmte enkawl tûra an mawhphurhnate an thawhna kawnga ṭanpuitu tûr Bible fuihna inâwm tak te, rawtna te, leh fuihnate pe tûrin a kâwm bawk. (Thuf. 27:23; Tirh. 20:26-32; 1 Tim. 4:11-16) Pioneer-te chu an rawngbâwlnaa fuih tûr leh harsatna an neihte a mi mala ṭanpuina pe tûrin a kâwm bawk ṭhîn.

⁴⁶ Thil dang ngaihtuah ngai a awm chuan, bial kantu chuan bial a kan chhûngin theih tâwpin a ṭanpui ang. Chûng chu zawh hman a nih dâwn loh chuan, bial kantu chuan upate emaw, a chinfelnaa telte emaw chu a chinfel dân chungchânga Bible kaihhruaina hre tûra zir bingna an neihnaah a ṭanpui thei a ni. Branch office bawhzui ngai thil a nih chuan, bial kantu leh upate chuan thil nih dân kimchang tak chu branch office-ah an thlen ang.

⁴⁷ Bial kantu chuan kohhrante a tlawh laiin, kohhran inkhâwm pângngaiahte a tel ziah ṭhîn. Chûng inkhâwmte chu branch office kaihhruaina nêna inmilin, a khât tâwka siamremna a awm thei a. Kohhran tihngheh nâna duan fuihna, chêttîrna, zirtîrna pe thei thusawinate a nei ang a. Pathian Jehova, Isua Krista, leh inawpna pâwl hmangaihna awmtîr chu a tum tlat ang.

⁴⁸ Bial kantuin kohhran a tlawh chhan pakhat chu rawngbâwlnaa taima taka tel tûra fuih leh rawtna ṭangkai takte pêk hi a ni a. Kohhrana mi tam takte chuan bial kan kâr rawngbâwlnaa awmze nei taka an tel theih nân an hun duante an siam danglam thei ang a, bial kantu tlawh thlaa auxiliary pioneer thawk tûrin an insiamrem thei pawh a ni thei bawk. Bial kantu emaw, a nupui emaw thawhpui duhte chuan ruahmanna an siam lâwk thei a ni. Bible zirpui leh tlawhkîr neihnaa bial kantu emaw, a nupui emaw hruaina chuan thil ṭha tam tak a thlen thei a. Hetiang kawnga bial kan kâr atâna theih tâwpa i ṭanpuina chu nasa taka ngaihhlut a ni.—Thuf. 27:17.

⁴⁹ Bial chhûngah hian kum khat chhûngin bial inkhâwmpui pahnih neih a ni ṭhîn a. Chûng inkhâwmpuite ruahmanna kawng engkimah bial kantu chuan mawhphurhna a nei a ni. Bial kantu chuan inkhâwmpui atân assembly overseer leh amah ṭanpuitu tûr a ruat ṭhîn a. Anni chuan inkhâwmpui ruahman dânah bial kantu chu ṭha takin an thawhpui tûr a ni. Chu chuan bial kantu chu inkhâwmpui thusawite ṭha taka ngaihsak tûrin a ṭanpui ang. Bial kantu chuan mipa rin tlâkte chu department hrang hrang enkawl tûrin a ruat a. Inkhâwmpui zawh apiangin, bial sum en dikna awm tûrin ruahmanna a siam bawk. Kum khata bial inkhâwmpui pakhatah chuan branch palai pakhat chu khuallian thusawituah a ṭang ang. Kalkawng a thui vâng emaw, inkhâwmpuina hmun a têt vâng emawin bial ṭhenkhat chu section-a ṭhen darh leh a ni a, chûng section tinte tân bial inkhâwmpui ruahmansak ṭheuh a ni.

⁵⁰ Bial kantu chuan a thuhrilh rawngbâwlna report chu thla tâwp apiangin branch-ah a thawn ṭhîn a. Zin vêlna, chaw eina, thlenna, leh a hnathawh nâna ṭûl thil dang atâna a sum hmante chu a kohhran tlawhin a tumsak lo a nih chuan branch office-ah a dîl thei ang. Jehova Lalram chu an nuna an dah pawimawh hmasak ber chuan Isua lo tiam tawh angin, an mamawhte chu pêk an ni ang tih bial kantute chuan an ring tlat a ni. (Lk. 12:31) Kohhrante chuan hêng an rawngbâwlsaktu upa inpe takte chunga khualchhâwn thiamna lantîr chu an tih tûr a ni tih hriat an duh ngei ang.—3 Joh. 5-8.

BRANCH COMMITTEE

⁵¹ Khawvêl puma Jehova Thuhretute branch office-ahte chuan thlarau lama puitling tak unaupa pathum emaw, a aia tam emaw chu Branch Committee angin an awm a, anni chuan ram chhûng, a nih loh leh an thu neihna huam chhûnga awm ram pâwna thu hrilh rawngbâwlna chu an enkawl a ni. An zînga pakhat chu Branch Committee coordinator angin a awm ṭhîn.

⁵² Branch committee-a telte chuan branch hnuaia awm kohhran tinte nêna inkûngkaih thilte chu an enkawl a. Chu committee chuan branch thuneihna huam chhûnga thu hrilhna bial zawng zawngah ram chanchin ṭha hrilhna chu a enkawl a, thlawhhma tâna mamawhte ṭha taka pêk a nih theih nân kohhrante leh bialte chu a din bawk ṭhîn. Branch Committee chuan missionary rawngbâwlna te, special, regular, leh auxiliary pioneer rawngbâwlnate pawh a ngaihsak bawk a. Committee chuan bial inkhâwmpui leh regional inkhâwmpuite a awm hunah pawh “engkim mawi tak leh fel taka tih” a nih theih nân, ruahmannate siamin, chanvote a pe bawk ṭhîn.—1 Kor. 14:40.

⁵³ Ram dang Branch Committee enkawlna hnuaia awm ram ṭhenkhatah chuan Country Committee ruat a ni ṭhîn a. Hei vâng hian Country Committee enkawlna hmuna rawngbâwlnate an vil ṭhat theih phah a. Bethel Home leh office-a hna te, lehkha thawn leh report te bâkah, thlawhhmaa rawngbâwlnate pawh a enkawl tlângpui a ni. Country Committee chuan Lalram hmasâwn nân Branch Committee a thlâwp bawk.

⁵⁴ Branch Committee leh Country Committee-a telte chu Governing Body ruat vek an ni.

HEADQUARTERS PALAITE

⁵⁵ Governing Body chuan a khât tâwkin khawvêl puma branch awmte tlawh tûrin unaupa puitling takte chu a ruat ṭhîn a. Chutiang rawngbâwltu unaupa chu headquarters palai tia koh a ni. A hna ber chu Bethel chhûngkua hnêna fuihna pêk leh thu hrilh leh zirtîr siam rawngbâwlna lama harsatna emaw, zawhna emaw an neihte chingfel tûra Branch Committee ṭanpui hi a ni. A remchânna hmun apiangah, bial kantu thlan bîkte leh missionary thawkte chu a kâwm ṭhîn bawk. Chutianga a tih hunah, an harsatna tawh leh an mamawhte a sawipui a, an hna pawimawh ber, Lalram thu hrilhna leh zirtîr siamna chungchângah a ṭûl ang angin fuihna a pe ṭhîn bawk.

⁵⁶ Headquarters palai chuan a ram tlawh chhûnga Lalram thu hrilhna leh kohhran thiltihte chu a ngaihven hle a. Hun a neih dân azirin, remote translation office-te pawh a tlawh thei bawk. Headquarters palaiin branch a tlawh hunah, Lalram thu hrilhnaah a tam thei ang berin a tel bawk a ni.

HMANGAIH TAKA ENKAWLNA

⁵⁷ Kristian mipa puitling takte thawhrimna leh hmangaih taka enkawlna chu kan hlâwkpui hle a. Berâmte vêng tûra mawhphurhna pêk kohhran upate laka kan intukluh zêl hian, kohhran Lu, Isua Krista nêna inpumkhatin kan awm a ni. (1 Kor. 16:15-18; Eph. 1:22, 23) Chuvângin, Pathian thlarau chuan khawvêl puma kohhrante chu a fan chhuak a, Pathian Thu chuan lei pum puia rawngbâwlna chu a kaihruai a ni.—Sâm 119:105.