Theocratic Hmanga Ruat Hotute leh Kohhranho Rawngbâwltute
“Nangmahni leh in hote zawng zawng chungah chuan fîmkhur rawh u, thlarau thianghlimin an chunga hotuah a siam che u hi.”—TIRHKOHTE 20:28.
1, 2. Engtin nge Isaia 60:22 hi a lo thlen famkim?
JEHOVA chuan tâwpna hunah thil engemaw chhinchhiah tlâk tak a lo thlen tûr thu chu hun rei tak ata a lo sawi lâwk a. Chu chu zâwlnei Isaia kaltlanga sawi a ni: “In zînga hnam tê ber pawh hnam ropui tak an ni ang a, hnam tlêmte pawh hnam chak tak an ni ang; kei LALPA hian a hun hunah chuan ka thlentîr thuai ang,” tiin.—Isaia 60:22.
2 He hrilh lâwkna hi a thleng famkim mêk a ni tih finfiahna a awm em? Awm teh meuh mai! Kum 1870 chho bawr vêl khân, U.S.A. ram Pennsylvania-a Allegheny hmunah Jehova mite kohhran pakhat din a ni a. Chu mi kohhran tê pakhat aṭang chuan, kohhran a sing têla rawn pung chhovin, khawvêl pumah chak takin hma a sâwn zêl a ni. Lalram chanchin puangtu mi maktaduai têl—hnam chak tak—techuan tûnah leilung tluanchhuaka ram 235-a kohhran 91,000-aia tam awmte chu an bêl a. Hnial rual lohvin, hei hian kan hma lawka awm “hrehawmna nasa tak,” a lo thlen hmain Jehova chuan amah chibai bûktu dik takte huikhâwmna chu a ti chak a ni tih a hnemnghet a ni.—Matthaia 24:21; Thu Puan 7:9-14.
3. “Pa leh Fapa leh thlarau thianghlim hmingah” baptisma chang tih chu eng tihna nge ni?
3 Mahnia Jehova hnêna an inpumpêk hnuah, hêng maktaduai tam takte chuan Isua zirtîrna milin, “Pa leh Fapa leh thlarau thianghlim hmingah” baptisma an chang a ni. (Matthaia 28:19) ‘Pa hminga’ baptisma chang tih awmzia chu, hêng inpumpêk tawhte chuan Jehova chu an Pa, vâna mi leh Nunna Petu a ni tih an pawm a; tin, a lalchungnunnaah an intulût tihna a ni. ‘Fapa hminga’ baptisma chang tih chuan Isua Krista chu anmahni Tlantu, Hruaitu, leh an Lal angin an pawm tih a lantîr a. Tin, an nun kaihhruainaah Pathian thlarau thianghlim, a nih loh leh a thiltihtheihna chu an hria a ni. Chu chuan “thlarau thianghlimah” baptisma an chang tih a târ lang a ni.
4. Kristian rawngbâwltute chu engtianga nemngheh nge an nih?
4 Baptisma an chan hian, zirtîr tharte chu Pathian Jehova rawngbâwltu anga nemngheh an lo ni a. A nih leh, tuin nge nemnghet? 2 Korinth 3:5-a thu chuan anni pawh a huam tel thei a ni: “[Rawngbâwltu nih] kan tlin theihna chu Pathian hnên ata a ni zâwk” tih hi. Anni chuan Pathian Jehova nemnghehna aia ropui zâwk chawimawina dang an beisei lo! Baptisma an chan hnua Pathian thlarau kaihhruainate an pawma a Thu an zawm phawt chuan, anni chu “chanchin ṭha” rawngbâwltu angin thlarau lamah an ṭhang chho zêl ang.—Matthaia 24:14; Tirhkohte 9:31.
Democratic Ni Lo—Theocratic Hmanga Ruatna
5. Kristian hotute leh kohhranho rawngbâwltute chu mipui duh thlanna democratic hmanga thlan an ni em? Hrilhfiah rawh.
5 Hotu nih tlingte puitling taka enkawlna leh kohhranhho rawngbâwltute ṭanpuina chu rawngbâwltu thatho tak pung zêlte thlarau lam mamawh enkawl nân a ṭûl a. (Philippi 1:1) Chûng thlarau lam mite chu engtianga ruat nge an nih? Kristianna ram tih dân anga ruat an ni lo. Entîr nân, Kristian hotute chu mipui duh thlanna democratic hmanga thlantlin an ni lo, a awmzia chu kohhrana mi tam zâwkte vote thlâkna hmanga thlantlin an ni lo. Chutiang ni lovin, chûng an mi ruatte chu Theocratic hmanga ruat an ni. Chu chu eng tihna nge ni?
6. (a) Theocracy dik tak chu eng nge ni? (b) Engvângin nge hotute leh kohhranho rawngbâwltute chu theocratic hmanga ruat an nih?
6 Hriat awlsam tûra kan sawi chuan theocracy dik tak chu Pathian inawpna a ni. Jehova Thuhretute chu a awpna hnuaiah an duh thua intulûtin, a duhzâwng chu an thawktlâng dial dial a. (Sâm 143:10; Matthaia 6:9, 10) Kristian hotute, a nih loh leh upate, leh kohhranho rawngbâwltute ruatna kawnga tih dân chu Pathian ruahmanna, Pathian Lehkhabu Thianghlima ziak anga tih a nih avângin chutiang mite chu theocratic hmanga ruat an ni. Tin, “mi zawng zawnga chungnung ber,” a nih angin, Jehova chuan mita hmuh theih a inawpna pâwl inkaihhruai dân tûr chungchângah thutâwp siam theihna a nei a ni.—1 Chronicles 29:11; Sâm 97:9.
7. Engtin nge Jehova Thuhretute chu an inawp?
7 Kristianna rama sakhaw pâwl tam takte nên inkalhin, Jehova Thuhretute chuan an awmna tûr sakhaw inrelbâwl dân an insiam lo. Chûng Kristian dik takte chuan Jehova tehnate zawm tlat an tum zâwk a ni. An zînga hotute chu kohhran mi leh sate emaw, kohhrana thuneitute emaw, a nih loh leh upa pâwlte emaw hmanga thlantlin an ni lo. Chûng chanvo inpêknaah khawvêl lam thil lo inrawlh chu Jehova mite chuan an remti lo a ni. Kum zabi pakhatnaa tirhkohte’n: “Mihring thu aiin Pathian thu kan zâwm zâwk tûr a ni,” an tih laia an târ lan an dinhmun ang chu nghet takin an vuan a ni. (Tirhkohte 5:29) Chuvângin, Thuhretute chuan thil engkimah Pathian lakah an intulût a ni. (Hebrai 12:9; Jakoba 4:7) Chutiang bawkin, theocratic kalhmang zawmna chuan Pathian duhsakna a thlen a ni.
8. Engtin nge democratic and theocratic kalhmang chu a inan loh?
8 Awptu Ropui, Jehova chhiahhlawhte kan nih angin, democratic leh theocratic kalhmang inan lohna chu kan hre reng tûr a ni. Democratic kalhmang chuan intluk tlânna a phût a, nihna leh inthlanna atâna campaign neih chu a zepui a ni fo. Mahse, chutiang kalhmang chu theocratic inruatnaah hman a ni ve lo. Tin, chu chu mihring aṭanga lo chhuak a ni lo va; dân phal pâwl ṭhenkhat aṭanga lo chhuak a ni hek lo bawk. Paula chuan “Jentailte tirhkoh” ni tûra Jehova leh Isua ruat a nihna chu Galatia khuaa mite hnênah, “mihring tirh chhuah ni lovin, mihring zârah ni hek lovin, Isua Krista leh mitthi zînga ata a kai thotu Pa Pathian zârah a ni zâwk” tiin a sawi a ni.—Rom 11:13, 14; Galatia 1:1.
Thlarau Thianghlim Hmanga Ruat
9. Tirhkohte 20:28-in Kristian hotute ruatna chungchângah eng thu nge a sawi?
9 Paula chuan Ephesi khuaa awm hotute chu Pathian thlarau thianghlim kaltlanga ruat an nihzia a hriatnawntîr a ni. Ani chuan: “Pathian kohhranho, ama thisena a leite chu châwm tûrin, nangmahni leh in hote zawng zawng chungah chuan fîmkhur rawh u, thlarau thianghlimin an chunga hotuah a siam che u hi,” tiin a sawi a. (Tirhkohte 20:28) Chûng Kristian hotute chuan Pathian berâm an enkawlnaah thlarau thianghlim kaihhruaina chu an mamawh reng a ni. Chutianga ruat dinhmun chelhtuin Pathian tehnate a tlin tawh lo a nih chuan, thlarau thianghlimin a nihna ata paihthla tûrin hna a thawk ang.
10. Engtin nge theocratic inruatnaah thlarau thianghlimin dinhmun pawimawh tak a chelh?
10 Engtin nge thlarau thianghlim chuan dinhmun pawimawh tak a chelh? A hmasa berah chuan, thlarau lam enkawl nâna mamawh thil phûtte chu thlarau thianghlim hmanga thâwk khum a ni. Timothea leh Tita hnêna lehkha a thawnnaah chuan Paula chuan, hotute leh kohhranho rawngbâwltute ni tûra tehnate a ziak a. A vaiin, thil phût chi hrang hrang 16 lai a sawi a ni. Chutichuan hotute chu sawisêlbo, insûm thei, rilru dik tak, mi fel, mi lâwm dân thiam, zirtîr thiam, leh chhûngkaw lû entawn tlâk an ni tûr a ni. Tin, zu ruih hmang lo, tangka sum ngaina lo, leh insum theihna nei mi an ni bawk tûr a ni. Chutiang bawkin, tehna sângte chu kohhranho rawngbâwltu ni tûra ruatte tân pawh a ni.—1 Timothea 3:1-10, 10, 12, 13; Tita 1:5-9.
11. Kohhrana mawhphûrna chelh tûrte tlin ngai tehna ṭhenkhatte chu engte nge ni?
11 Chûng tehnate ennawnna chuan Jehova biaknaa hruaitute chu Kristian nungchang lamah entawn tlâk an ni tûr a ni tih a târ lang a. Kohhran mawhphurhna chelhte chuan thlarau thianghlimin an chungah hna a thawzia an târ lang tûr a ni. (2 Timothea 1:14) Pathian thlarau chuan an laka “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te” a rah chhuahzia a lang tûr a ni. (Galatia 5:22, 23) Chûng rahte chu an rinpuite leh mi dangte nêna an indâwrnaah a lang chhuak tûr a ni. A ṭhenin thlarau rah ṭhenkhat ṭha takin an lan chhuahtîr laiin, a ṭhen chuan hotu nih nâna ṭûl tehna dangte an tlin hle mai thei. Amaherawhchu, hotu leh kohhranho rawngbâwltu nih inbeiseite chuan an nun kawng engkimah thlarau lam mi an nihzia, leh Pathian Thu-in a phûtte an tlinzia an târ lang tûr a ni.
12. Tute nge tlarau thianghlim hmanga ruat a tih theih?
12 Paula ngeiin ‘a hniaka kan zuina tûra entawn tûr min hnutchhiahtu’ a lo entawn avângin, mi dangte chu amah entawn tûrin huai takin a fuih thei a ni. (1 Petera 2:21; 1 Korinth 11:1) Hotu emaw, kohhranho rawngbâwltu emawa ruat an nih laiin, Pathian Lehkha Thu-in a phûtte an tlin chuan, chûng mite chu thlarau thianghlima ruat a tih theih ang.
13. Kohhrana rawngbâwl tûr rawttute chu engtin nge thlarau thianghlimin a ṭanpui?
13 Hotu ni tûra rawtna leh ruatnaah thlarau thianghlim a inrawlh dân târ langtu dang a la awm leh a. Isua’n ‘in Pa vâna mi chuan a dîltute chu thlarau thianghlim a va pe dâwn em’ tiin a sawi a. (Luka 11:13) Chuvângin, tualchhûng kohhrana upate’n kohhrana mawhphurhna chelh tûra an rawt hmain, Pathian thlarau kaihhruaina an dîl a ni. An rawtnate chu Pathian thâwk khum Thu-ah an nghat a; tin, thlarau thianghlim chuan Pathian Lehkha Thu-in a phûtte a tlin leh tlin loh hre tûrin anni chu a ṭanpui ang. A rawttute chu pâwn lama a lan dân te, zirna lama a hlawhtlinna te, leh a pianpui thiamna te hian a thunun lutuk tûr a ni lo. An en ber tûr chu thlarau mi a ni nge ni lo, kohhrana mite’n thlarau lam thurâwn la tûrin an nêl nge nêl lo tihte hi a ni.
14. Tirhkohte 6:1-3 aṭangin eng nge kan zir?
14 Upaho leh bial kantute chu upa emaw, kohhranho rawngbâwltu emaw ni tûra unaupate rawttu ni mah se, ruatna tak chu kum zabi pakhatnaa tihdân chu zui a ni. Ṭum khat chu, mawhphurhna pawimawh tak pakhat chelh tûrin thlarau lama tling unaute mamawh a ni a. Chutih laia governing body chuan, heti hian kaihhruaina a pe a ni: “In zîngah Thlarau leh fina khat mi hmingṭha hlîr pasarih thlang rawh u, anni chu hêng thil rêltu atân hian kan siam ang,” tiin. (Tirhkohte 6:1-3) A hmuna awmte chuan thlang a, rawtna an siam laiin, Jerusalema awm mawhphurhna neite chuan an ruat a ni. Chutiang kalhphung chu tûn laiah pawh hman a ni.
15. Engtin nge Governing Body chu mite ruatnaah a tel?
15 Jehova Thuhretute Governing Body chuan Branch Committee member zawng zawngte chu a ruat a. Chutiang mawhphûrhna pawimawh tak chelh theitu tûr an thlannaah Governing Body chuan Isua thusawi: “Tupawh tam tak an pêka hnênah chuan tam tak an phût ang; tupawh tam tak an kawltîra hnênah chuan tam deuh an phût ang,” tih an hre reng a ni. (Luka 12:48) Branch Committee member-te a ruat bâkah, Governing Body chuan Bethel upate leh bial kantute chu a ruat bawk a ni. Amaherawhchu, anni chuan unaupa rintlâk takte chu an aiawha ruatna dangte siam tûrin mawhphûrhna an hlân a ni. Chu mi atân pawh Pathian Lehkha Thu kaihhruaina a awm bawk.
‘Thu Ka Pêk Che Ang Khân, Ruat Zêl Rawh’
16. Engvângin nge Paula’n Tita kha Kret thliarkârah a hnutchhiah a, chu chuan tûn laia theocratic inruatna chungchâng eng nge a târ lan?
16 Paula chuan a thawhpui Tita hnênah: “He mi avâng hian Kret thliarkârah khân ka hnutchhiah che a ni, thil tihfel bâkte chu i tihfel zêlna tûr leh, thu ka pêk che ang khân khaw tinah upate i ruatna tûrin,” tiin a hrilh a ni. (Tita 1:5) Tichuan, Paula chuan a mi ruat tûrte tlin tûr tehnate chu a târ lang a. Chuvângin, tûn laiah pawh Governing Body chuan, branch-a unaupa mi tling takte chu a aiawha upate leh kohhranho rawngbâwltute ruat tûrin mawhphûrhna a pe a ni. Governing Body aiawha mawhphurtute chuan chutiang ruatna kawnga Pathian Lehkha Thu kaihhruaina hre chiang a, an zui nge zui lo tih chu ngaihven reng a ni. Chuvângin, Governing Body kaihhruaina hnuaiah mi tling takte chu khawvêl puma Jehova Thuhretute kohhrana rawngbâwl tûrin ruat an ni.
17. Hotute leh kohhranho rawngbâwltute ruat tûra rawtna chu branch office-in engtin nge a lo tih?
17 Hotute leh kohhranho rawngbâwltute ruat tûra rawtna chu Watch Tower Society branch office-a theh luh a nih chuan, thiltawn nei mi puitlingte chu an thiltih kaihruai tûrin Pathian thlarau thianghlimah an innghat a ni. Anni chuan mi dang sualnaa an tel lohna tûrin tuma chungah kut an nghat thut tûr a ni lo tih hriain, mawhphurhna nei niin an inhre tlat a ni.—1 Timothea 5:22.
18, 19. (a) Engtin nge ruatna thenkhat chu thawn a nih? (b) Rawtna leh ruatna zawng zawng chu eng anga tih nge ni?
18 Ruatna ṭhenkhat chu dân phal pâwl aṭanga official stamp chuang lehkha thawn hmanga thawn a ni thei a. Chutiang lehkha thawn chu kohhrana unaupa pakhat aia tam ruat nân pawh a hman theih a ni.
19 Theocratic inruatnate chu a Fapa leh hmuh theih Pathian lei lam pâwl, “bawi rinawm, fing tak” leh a Governing Body kaltlanga Jehova ruat a ni a. (Matthaia 24:45-47) Chutianga rawtna leh ruatna kalphung zawng zawng chu thlarau thianghlimin a kaihhruai, a nih loh leh a kawhhmuh a ni. Thlarau thianghlim hmanga thâwk khum, Pathian Thu-ah tehnate chu târ lan a ni a; tin, mi ruatte chuan chu thlarau rah chu an rah chhuahzia an târ lan vâng a ni. Chuvângin, ruatna chu thlarau thianghlim hmanga siam anga thlir tûr a ni. Kum zabi pakhatnaa theocratic hmanga hotute leh kohhranho rawngbâwltute ruat an nih ang bawkin, tûn laiah pawh chutiang kalhmang chu hman a ni.
Jehova Kaihhruaina Avângin Lâwm Rawh
20. Sâm 133:1-a Davida thuchham chhuah ang chu engvângin nge kan chham chhuah ve?
20 He thlarau lama hnianghnarna leh Lalram thuhrilh rawngbâwlnaa theocratic hmasâwnna hunah hotute leh kohhranho rawngbâwltute ruatna kawnga mawhphûrtu ber chu Jehova a nih avângin kan lâwm êm êm a ni. He Pathian Lehkha Thu ruahmanna hian, Jehova Thuhretute kan nih angin kan zîngah Pathian felna tehkhâwng sâng tak vawng reng tûrin min ṭanpui a. Chu bâkah, he mite Kristian rilru leh ṭhahnemngaihna chuan Jehova chhiahhlawhte kan nih angin kan inremna leh inpumkhatna chu nasa takin a tinghet a ni. Chuvângin, fakna hla phuaktu Davida ang bawkin: “Ngai teh, uanute inngeih dial diala awm khâwm hi a va ṭhain, a va nuam êm!” tiin min au chhuahtîr a ni.—Sâm 133:1.
21. Engtin nge Isaia 60:17 chu tûn laia a thlen famkim?
21 A Thu leh a thlarau thianghlim hmanga Jehova min kaihhruaina avângin kan va lâwm tak êm! Isaia 60:17-a thusawi: “Dâr aiah rangkachak ka rawn la ang a, thîr aiah pawh tangkarua ka rawn la ang, thing aiah pawh dâr, lung aiah pawh thîr: thlamuanna chu i hotuah ka ruat bawk ang a, felna chu nangmah phûttuah kan ruat ang,” tihte hian awmzia a va han nei tak êm. Theocratic kalhmangte chu Jehova Thuhretute zînga zâwi zâwia hman nasat zêl a nih rualin, chu malsâwmna dinhmun chu Pathian lei lam inawpna pâwl kaltlangin kan lo dawng a ni.
22. Eng thil atân nge kan lâwm êm êm a, eng nge tih kan tum ang?
22 Kan zînga theocratic ruahmanna awmte avângin kan lâwm tak zet a. Tin, theocratic hmanga ruat hotute leh kohhranho rawngbâwltute lungâwi taka an thawhrimna chu kan hlut êm êm a ni. Thlarau lama hausakna min petu leh malsâwmnaa min vûrtu, hmangaihnaa khat kan Pa, vâna mi chu kan thinlung zawng zawngin kan fak a ni. (Thufingte 10:22) Chvângin, Jehova inawpna pâwl nên pheikhai rual taka chheh i tum ang u. A bîk takin, Jehova hming ropui leh thianghlim tak chawimawi nân, fak nân, leh tihropui nân inpumkhatin rawng i bâwl tlâng zêl ang u. (w01 1/15)
Engtin Nge I Chhân Ang?
• Engvângin nge hotute leh kohhranho rawngbâwltute chu democratic hmang ni lovin, theocratic hmanga ruat an ni a tih theih?
• Engtin nge Kristian mawhphurhna neite chu thlarau thianghlima ruat an nih?
• Governing Body chu hotute leh kohhranho rawngbâwltute ruatnaah engtin nge a tel?
• Theocratic inruatna chungchângah, engvângin nge Jehova chungah kan lâwm êm êm ang?
[Phêk 23-naa milemte]
Upate leh kohhranho rawngbâwltute chuan theocratic inruatna hmangin rawngbâwlna chanvo hlu an nei