Jehova Lâwm Zâwng Fakna Inthawinate
‘Inthawina nung leh thianghlim leh Pathian lawm tlâk ni tûrin in taksa chu inhlân rawh u.’—ROM 12:1.
1. Mosia Dân hnuaia inthawinate hlutna chungchâng Bible-in eng nge a sawi?
“DAN THU chuan thil ṭha, lo awm tûrte anpui tak nei lovin, a thla chuah a neih avângin, kum tina inthawina pângngai a hlan fote chuanin a lo hnaite chu engtikah mah an tifamkim thei dâwn si lo.” (Hebrai 10:1) He mi chângah hian Paula chuan mihringte chhandam nân Mosia Dân hnuaia inthawina hlan zawng zawngte chuan chatuan hlutna rêng a nei lo tih a tilang chiang hle.—Kolossa 2:16, 17.
2. Dân thupêka thilhlante leh inthawinate chipchiar taka hriat tum chu engvângin nge thil lohthlâwn mai a nih loh?
2 Bible bu hmasa panga-a thilhlante leh inthawinate chungchâng thuziak chuan tûn lai Kristiante tân hlutna rêng a nei lo tihna em ni? Dik tak chuan, kum khat chuang kalta aṭangin, khawvêl pum puia Jehova Thuhretute kohhrana Theocratic Rawngbâwlna School-a tel zawng zawngte chuan, Bible bu hmasa pangate chu an chhiar chhuak vek a ni. Ṭhenkhat phei chuan chhiarchhuak tûr leh chipchiar taka hriat tumin taihmâk an chhuah a. Chu an taihmâk chhuahna zawng zawng chu engmah lo mai a ni ta em ni? Chu chu thil ni thei a ni lo. Bible ngeiin: “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tûrin ziak a ni,” a ti si a. (Rom 15:4) Zawhna lo awmta chu, Dân thupêka thilhlante leh inthawinate aṭangin eng “zirtîrna” leh “thlamuanna” nge kan dawn theih? tih hi a ni.
Min Zirtîr Nân leh Min Thlamuan Nân
3. Mamawh bulpui eng nge kan neih?
3 Dân thupêkin fiah taka a sawi inthawinate a taka hlan ngai tawh lo mah se, inthawinain Israel te tâna a ṭhen a zâr a lo tih tawh, kan sualte ngaihdam ni a, Pathian duhsakna dawn chu kan la mamawh êm êm a ni. Inthawinate a taka kan hlan loh avângin, chûng chu engtin nge kan dawn theih ang? Rana inthawinate tihtheih chin a sawi hnuah Paula chuan: “[Isua] khawvêla a luh laiin ‘Inthawina leh thil hlan i duh lo va, ka tân taksa mi buatsaihsak zâwk a: hâlrala pumpêknaahte leh, sual tâna inthawinaahte chuan lâwmna rêng i nei lo. Chu veleh chuan keiin, “Aw Pathian ngai teh, (Lehkhabu zialah chuan ka thu ziak a ni a) i duhzâwng ti tûrin ka lo kal e,” ka ti a,’ a ti a,” tiin a puang a ni.—Hebrai 10:5-7.
4. Paula chuan Sâm 40:6-8 chu engtin nge Isua Kristaah a hmehbel?
4 Sâm 40:6-8 lachhâwngin, Paula chuan Isua chu “inthawina leh thil hlan” ‘hâlrala pumpêknate leh, sual tâna inthawinate’ awmtîr reng tûra lo kal a nih lohzia a kawhhmuh a. Chûng zawng zawng chu, Paula thu ziah lai chuan, Pathianin a pawm tawh lo va. Isua chu a van lam Pa ruahman taksa, Adama A siam dân nêna kawng engkima inang taksa puin a lo kal zâwk a ni. (Genesis 2:7; Luka 1:35; 1 Korinth 15:22, 45) Pathian Fapa ṭha famkim a nih avângin, Isua chu Genesis 3:15-a sawi lâwk, hmeichhe “thlah” a lo ni a. Isua ngei chu ‘a ke artuia tihthitlin’ tûr ni mah se, ‘Setana lu tithitling’ tûrin hma a la ang. Hetiang kawng hian, Isua chu Abela hun aṭanga mi rinawmte lo thlîr, mihringte chhandam nâna Jehova ruahman a lo ni ta a ni.
5, 6. Kristiante tân Pathian hnaih theihna kawng ṭha zâwk eng nge awm?
5 Isua chanvo chu sawiin, Paula chuan: “Amahah chuan Pathian felna kan lo nih theihna tûrin, sual rêng rêng hre lo chu Pathianin keimahni avângin sualah a siam a,” a ti a. (2 Korinth 5:21) “Suahah a siam” tih thu chu ‘sual inthawinaah a siam’ tih pawhin a lehlin theih a ni. Tirhkoh Johana chuan: “Ani chu kan sualte thupha chawina a ni; keimahni sual chauh ni lovin, khawvêl zawng zawng sual thupha chawina pawh a ni,” a ti bawk. (1 Johana 2:2) Chuvângin, Israel mite’n an inthawinate hmanga rei lo tê Pathian an hnaih theih laiin, Kristiante chuan Pathian hnaih theihna ṭha zâwk—Isua Krista inthawina chu—an nei a ni. (Johana 14:6; 1 Petera 3:18) Pathian ruahman tlanna inthawinaa rinna nei a, A thu kan zawm chuan, kan sualnate ngaihdam niin, Pathian duhsakna leh malsâwmna kan dawng thei a ni. (Johana 3:17, 18) Hei hi thlamuanna hnâr a ni lâwm ni? Mahse, tlanna inthawinaah rinna kan nei tih engtin nge kan lantîr ang?
6 Kristiante neih Pathian hnaih theihna kawng ṭha zâwk a hrilhfiah hnuah, Hebrai 10:22-25-a kan chhiar angin, tirhkoh Paula chuan Pathian thil ruahman tlannaa rinna kan neihzia leh kan ngaihhlutzia târlan theihna kawng thum a ziak a. Paula fuihna chu van lam kohna chang, hriak thih Kristian ‘hmun thianghlima lût tûrte’ tân bîk ni mah se, Isua tlanna inthawina aṭanga hlâwkna têl duh apiangin an ngaihsak ngei tûr a ni.—Hebrai 10:19, 20.
Inthawina Thianghlim leh Bawlhhlawhkai Lo Hlân Rawh
7. (a) Hebrai 10:22 chuan inthawinaa thiltih chu engtin nge a lantîr? (b) Inthawina chu Pathian pawm tlâk a nih ngei theih nân eng nge tih ngai?
7 A hmasa berin, Paula chuan Kristiante chu heti hian a fuih a: “Kan thinlunga chhia leh ṭha hriatna ṭha lo chu theh faisaka awma kan taksa pawh tui fîma buala awmin, rinna famkim neia thinlung tak zet puin i hnaih ang u,” tiin. (Hebrai 10:22) Heta a thu hman hian Dân thupêk hnuaia inthawina hlan dân a lantîr chiang hle a ni. Inthawina hi pawm tlâk ni tûr chuan rilru dik tak pua hlan leh, thianghlim leh bawlhhlawhkai lo a ni tûr a nih avângin, hei hi a inchawih hle. Inthawina ran chu ran thianghlim a ni tûr a ni a, “sawisêlbo,” ṭhat lohna nei lo a ni tûr a ni; chûnglêng sava lama inthawina a nih chuan, ṭhuro emaw, pârva no emaw hlan tûr tih a ni si a. Chûng chu hlan a nih chuan, “atân inremna siamna tûrin pawmsak a ni ang.” (Leviticus 1:2-4, 10, 14; 22:19-25) Chhangphut thilhlanah chuan ṭawihchhiatna entîrtu dawidim a tel lo va; bilh thawh theihna nei theitui sawina khawizu pawh a tel hek lo. Ran emaw, chhangphut emaw pawh ni se, maichâma inthawina hlan rêng rêng chu ei tûr vawn ṭhat theihna, chi phul ṭhin a ni.—Leviticus 2:11-13.
8. (a) Inthawina hlântu hnênah eng nge phût a nih? (b) Kan biakna chu Jehova pawm tlâk a ni tih engtin nge kan tihchian ang?
8 Inthawina hlântu chungchâng chu eng nge ni ve? Dân thupêk chuan Jehova hmaa lo kal apiang chu an thianghlimin, bawlhhlawh an kai tûr a ni lo a ti a. Eng engemaw avânga bawlhhlawh chuan a sual thawina emaw, a bawhchhiat thawina emaw chu Jehova hmaa dinhmun thianghlim a neihlêt leh theih nân a hlân hmasa tûr a ni; chuti chuan, hâlral thilhlan emaw, remna thilhlan emaw a hlan chu Pathian pawm tlâk a ni ang. (Leviticus 5:1-6, 15, 17) Tichuan, Jehova hmaa dinhmun thianghlim neih reng pawimawhzia kan hre thiam em? Kan biakna Pathian pawm tlâk nihtîr kan duh chuan, Pathian dân kalha kan thiltih engkim mai chu rang takin kan siam ṭha tûr a ni. Tin, Pathian pêk ṭanpuina kan dawng nghâl tûr a ni—“kohhran upa” leh “kan sualte thupha chawina” Isua Krista ṭanpuina chu.—Jakoba 5:14; 1 Johana 2:1, 2.
9. Jehova hnêna inthawina leh pathian dik lote hnêna inthawina danglamna bul ber chu eng nge ni?
9 Bawlhhlawhna tinrêng ata fihlimna chu Israel ram kianga pathian dik lo betute inthawina hlan leh Jehova laka inthawina hlan inkâr danglamna bul ber a ni. Mosia Dân hnuaia inthawinate hmêlhmang danglamna chu ziaktu pakhat chuan: “Aienna emaw, aisânna emaw nên inzawmna a nei lo va; sakhaw lama âtphûrna te, mahni intihnatna, a nih loh leh nawhchizawrhna te, hurna leh tisa nawmsak khap burna te nên inzawmna a nei lo bawk a; mihringa inthawina te; mitthi tâna inthawina te nên inzawmna a nei bawk hek lo” tiin a ziak a. Hêng hian thil pakhat min hriattîr a ni: Jehova chu a thianghlim a, thil sual tih a pawmzam mai mai ngai lo tih chu. (Habakuka 1:13) A hnêna hlan biakna leh inthawinate chu tisa lam, nungchang lam, leh thlarau lamah a thianghlimin, bawlhhlawh a kai tûr a ni lo.—Leviticus 19:2; 1 Petera 1:14-16.
10. Paula fuihna Rom 12:1, 2-a kan hmuh nêna inzul zuiin, engtin nge kan inenfiah ang?
10 Chu mi avâng chuan, Jehova rawng kan bâwl hi pawm tlâk ni tûrin, kan nun kawng engkim chu kan enfiah tûr a ni. Kristian inkhâwmnaa ka tel a, rawngbâwlnaa ka tel phawt chuan ka hun awl neiha ka thiltih chuan kawngro a su tak tak lo tih ngaihdân kan nei ngai tûr a ni lo. Kristian rawngbâwlnaa telna chuan kan nunphung ṭhenkhatah Pathian dân zawmna ata min tizalên chuang hek lo. (Rom 2:21, 22) Kan ngaihtuahna emaw, kan thiltih emaw chu thil thianghlim lo emaw, bawlhhlawh emawin a tihchhiat kan rêmtih vaih zawngin, Pathian malsâwmna leh duhsakna kan beisei thei lo vang. He Paula thu sawi hi vawng reng ang che: “Unaute u, Pathian khawngaihna avâng hian, inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u; chu chu in rawngbâwlna âwm rêng a ni. He khawvêl dân ang hian awm suh ula; Pathian duhzâwng, a ṭha leh lawm tlâk leh, ṭhat famkim chu in hriatfiah theih nân, in rilru athara awmin lo danglam zâwk tawh rawh u,” tih chu.—Rom 12:1, 2.
Tih Tak Zetin Fakna Inthawina Hlân Rawh
11. Hebrai 10:23-a “thurin tlângzarhna” tihah hian eng nge tel?
11 Hebraite lehkha a thawnnaah Paula chuan, biakna dik hmêlhmang pawimawh tak min ngaihtuahtîr a: “Kan beisei thurin hi a nghîn lohna tûrin i pawm tlat ang u, thutiamtu chu a rinawm si a,” tiin. (Hebrai 10:23) “Thurin” awmze dik tak chu “thurin tlângzarhna” a ni a, chuvângin, Paula chuan “fakna inthawina” chungchâng pawh a sawi rêng a ni. (Hebrai 13:15) Hei hian Abela te, Nova te, leh Abrahama te lo hlan inthawina ang chi min hriatchhuahtîr a ni.
12, 13. Israel miin hâlral inthawina a hlan hian eng nge a puan chhuah a, chutiang bawk rilru chu lantîr tûrin eng nge kan tih theih?
12 Israel miin hâlral inthawina a hlan hian, ‘[ama duh thuin] Jehova hmaah a hlân a ni.’ (Leviticus 1:3) Chutiang inthawina hmangin, Jehova’n a mite laka a lantîr malsâwmna leh ngilneihna nasa tak a dawn chu mipui hriatah a tlângzarh, a nih loh leh a puang chhuak a ni. Hâlral inthawi danglamna chu thilhlan apuma maichâma hlan a ni tih hre reng rawh. Chu chu inpumpêk pumhlumna entîrna inhmeh tak a ni. Chutiang bawkin, keini pawhin, châk tak leh tih tak zeta Jehova hnêna “fakna inthawina . . . hmuite rah chu” hlanin, tlanna inthawina kan rinna leh, chu ruahmanna avânga kan lâwmzia kan lantîr a ni.
13 Kristiante’n ran emaw, thlai emawa a ngial a ngana inthawina hlân lo mah se, Lalram chanchin ṭha hriattîrna tûr leh Isua Krista zîrtîrte siam tûrin mawhphurhna an nei a ni. (Matthaia 24:14; 28:19, 20) Thuâwih mihringte tâna Pathian tih tûr thil mak takte mi tam zâwkin an lo hriat theihna tûrin, Pathian Lalram chanchin ṭha hrilh nân hun remchâng apiang i la em? Tuina neite Isua zirtîr lo ni tûra zirtîr nân i hun leh tha leh zung chu phal takin i hmang em? Rawngbâwlnaa taima taka kan telna chuan, hâlral thilhlan rimtui tak angin, Pathian a tilâwm a ni.—1 Korinth 15:58.
Pathian leh Mihringte Nêna Inkawmnaah Hlim Rawh
14. Hebrai 10:24, 25-a Paula thute leh remna inthawina chu engtin nge a inan?
14 A tâwp berah chuan, Paula chuan Pathian chibai kan bûknaa kan Kristianpuite nêna kan inlaichînna min ngaihtuahtîr a. “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin infuih tawn zâwk ang u; ni chu lo hnai telh telha in hriatin in fuih tawn nasa lehzual sauh rawh u,” tiin. (Hebrai 10:24, 25) “Hmangaih leh thil ṭha tiha inchawk tho,” “kan inkhâwmnate,” leh “infuih tawn” tih thu malte hian Israel rama remna thilhlanin Pathian mite tâna a tihsak chu min hriatchhuahtîr a ni.
15. Remna inthawina leh Kristian inkhâwmnate inanna eng nge kan hmuh?
15 “Remna thilhlante” tih thuah “remna” atân pakhat aia tam sawina Hebrai thu mal hman a ni a, chu chuan chu inthawinaa telnain Pathian leh amah chibai kan bûkpuite nêna inremna a thlen tih a kâwk a ni thei ang. Remna inthawina chungchâng chu mithiam pakhat chuan: “Chu chu, Thuthlungtu Pathian nêna inkawmna hlimawm tak neih hun a ni tak zet a, Pathian chu anmahni Thlengtu a nih reng laiin, chu inthawina chaw kîlnaah chuan Israelte Mikhual ni tûrin a intihniam a ni” a ti a. Hei hian Isua thutiam: “Mi pahnih emaw pathum emaw ka hminga an inkhâwmna apiangah chuan an zîngah ka awm si ṭhîn a,” tih chu min hriatchhuahtîr a ni. (Matthaia 18:20) Chuvângin, Kristian inkhâwmnaa kan tel apiangin, inkawmna mi tihmasâwn thei tak te, zirtîrna mi tiphur thei tak te, leh kan zîngah Lalpa Isua Krista a awm tih hriatna te aṭangin hlâwkna kan dawng a ni. Chu chuan, Kristian inkhâwmna chu hlimawm tak leh rinna lama mi tichak thei tak a nihtîr a ni.
16. Remna inthawina ngaihtuah hian, engin nge Kristian inkhâwmnate chu hlimawm tak nihtîr?
16 Remna inthawinaah chuan a thau zawng zawng—a kawchhûng thau te, a kal te, a thin tuamtu râng te, a nâk nêm thau te, berâm mei thau tak te—chu maichâmah Jehova hnêna hâlral a ni. (Leviticus 3:3-16) A thau chu a tui hnai ber leh a ṭha bera ngaih a ni a, maichâma chu mi hâlralna chuan a ṭha ber Jehova hnêna pêkna a entîr a ni. Kristian inkhâwmte hlimawm tak nihtîrtu chu kaihhruaina kan dawnte mai ni lovin, Jehova fakna kan hlan theihnate hi a ni. Hei hi inkhâwmnaa inngaitlâwm tak; mahse, theihtâwp chhuah si-a rilru taka fakna hla kan sakna te, ngun taka kan ngaihthlâkna te, leh a remchân huna chhânna kan pêkna te hmangin kan ti a ni. Fakna hla phuahtu chu: “LALPA chu fak rawh u. LALPA chawimawiin hla thar sa ula, mi thianghlimte inkhâwmnaah chuan a fakna hla sa rawh u,” tiin a au chhuak hial a ni.—Sâm 149:1.
Jehova Malsâwmna Ropui Takin Min Nghâk Reng
17, 18. (a) Jerusalema biak in hlan a nih khân, Solomona chuan eng inthawina ropui tak nge a hlan? (b) Chu inthawina aṭang chuan eng malsâwmna nge mipuihote’n an dawn?
17 Jerusalema biak in hlan a nih hun, B.C.E. 1026 a thla sarihnaah khân, Lal Solomona chuan “LALPA hmaah inthawina” ropui tak a hlân a. Chu inthawinaah chuan “hâlral thilhlan te, chhangphut thilhlan te, remna thilhlan sa thau te” a tel a ni. Chhangphut thilhlan te bâkah, chu mi ṭum chuan, bâwngtuai 22,000 leh berâm 120,000 hlan a ni.—1 Lalte 8:62-65.
18 Chutiang thiltih hau tak dân tûr leh sênso tam dân tûr chu i ngaihtuah thei mai em? Mahse, Israelte malsâwmna dawn chu, chûng ai chuan nasa takin a hlu zâwk a ni. Chu biak in hlan khârnaah, Solomona chuan: “Mipuihote chu a ṭîntîr a, tin, lal chu mal an sâwm a, tichuan LALPAN a chhiahhlawh Davida leh a mi Israelte chunga a ṭhatna chuti zozaia a lantîr avâng chuan rilru hlim leh lâwm takin an in lamah an haw ta,” a ni. (1 Lalte 8:66) “LALPA malsâwmna chuan a tihausa ṭhîn a, lungngaihna a belhchhah ṭhîn lo,” tia Solomona ziak ang hi a ni tak zet a ni.—Thufingte 10:22.
19. Jehova malsâwmna ropui tak, tûnah leh chatuana dawng tûrin eng nge kan tih theih awm?
19 Kan hunah chuan ‘thil ṭha, lo la awm tûr thla’ chu “anpui tak nei” thila thlâk a ni tawh a. (Hebrai 10:1) Puithiam Lal ropui takin a entîr, Isua Krista chu vânah lûtin, a inthawinaa rinna tilangtu zawng zawngte tlan nân a thisen hlutna chu a hlân tawh a ni. (Hebrai 9:10, 11, 24-26) Chu inthawina ropui tak leh, fakna inthawina thianghlim leh bawlhhlawhkai lo chu tih tak zeta Pathian hnêna hlanna chuan, “rilru hlim leh lâwm takin,” Jehova malsâwmna ropui takte min beiseitîr thei a ni.—Malakia 3:10. (w00 8/15)
Engtin Nge I Chhân Ang?
• Dân thupêk hnuaia inthawinate leh thilhlante aṭangin, eng zirtîrna leh thlamuanna nge kan dawn theih?
• Inthawina pawm tlâk ni tûra thil ṭûl hmasa ber chu eng nge ni a, chu chuan kan tân eng awmzia nge a neih?
• Duh thua hâlral thilhlan nêna khaikhin theih eng nge kan hlan theih?
• Eng kawngin nge Kristian inkhâwmnate chu remna thilhlan nên a khaikhin theih?
[Phêk 26-naa milem]
Isua tlanna inthawina chu mihringte chhandam nâna Jehova thil ruahman a ni
[Phêk 28-naa milem]
Kan rawngbâwlna Jehova pawm tlâk ni tûr chuan, bawlhhlawhna tinrêng ata kan fihlîm a ngai
[Phêk 29-naa milem]
Rawngbâwlnaa kan telin, Jehova ṭhatna chu vântlâng hmaah kan puang chhuak a ni