Mangan Laiin Jehova Ring Tlat Rawh

“Pathian chu kan inhumhimna leh kan chakna, mangan laia ṭanpui vartu hnai reng a ni.”​—SAM 46:1.

1, 2. (a) Eng entîrna hian nge Pathian ringa inchhâl ringawt chu a tâwk lo tih lantîr? (b) Engvângin nge Jehova kan ring tih mai aia tam kan tih ang?

PATHIAN ring nia inchhâl chu kan rinzia thiltiha lantîr aiin a awlsam zâwk daih a ni. Entîr nân, U.S. pawisa leh pawisa nawiah chuan “Pathianah Rinna Kan Nghat” tih chu a chuanna a rei hle tawh a.a Chu thu chu kum 1956 khân, U.S. Congress chuan United State hnam châng vawn a nih thu a puang a ni. Inkalh tak maiin, mi tam tak​—kan sawi tâk ramah chauh ni lo, khawvêl pum puia mite​—chuan Pathian aiin sum leh pai leh hausakna an ring zâwk a ni.​—Luka 12:​16-21.

² Kristian kan nih angin, Jehova kan ring tih mai aia tam kan ti tûr a ni. ‘Thiltih tel lo rinna chu a thih’ ang chiahin, Pathian ring nia kan inchhâlna engpawh chu thiltiha lantîr a nih loh chuan engmah lo mai a ni. (Jakoba 2:26) Thuziak hmasa zâwkah khân, Jehova kan rinzia chu a hnêna ṭawngṭai te, a Thu aṭanga kaihhruaina zawn te, leh min kaihruaitu atâna a inawpna pâwl beiseina te hmangin kan târ lang a ni tih kan zir tawh a. Tûnah chuan chûng rahbi pathumte chu mangan laia kan rah theih dân i lo en thung ang u.

Hna Thawh Lai Chân Emaw, Hlawh A Tlêm Emaw Hunah

3. Hêng “hun khirh takte” hunah hian Jehova chhiahhlawhte chuan eng sum leh pai lama harsatna nge an tawh a, engtin nge Pathianin min ṭanpui a inhuam tih kan hriat theih?

³ Hêng “hun khirh takte” hunah hian, keini Kristiante hian mi dangte ang bawkin sum leh pai lamah harsatna kan tâwk ve a. (2 Timothea 3:1) Chuvângin, kan hna thawh laite pawh kan chân thut thei a. A nih loh leh, sum tlêmte hlawha dârkâr rei tak tak kan thawh a ngai pawh a ni thei bawk. Chutiang dinhmun hnuaiah chuan, “mahni chhûngkhat lainate ngaihsak” chu harsa kan ti mai thei a ni. (1 Timothea 5:8) Chutiang hunah chuan Pathian Chungnungbera chuan min ṭanpui a inhuam em? Tehrêng mai! Jehova chuan he khawvêla nun harsatna zawng zawng lakah min fihlîmtîr dâwn tihna zawng a ni lo. Amaherawhchu, amah kan rin phawt chuan, Sâm 46:1 thu: “Pathian chu kan inhumhimna leh kan chakna, mangan laia ṭanpui vartu hnai reng a ni,” tih hi kan chungah a thleng dik ve dâwn a ni. A nih leh, engtin nge sum leh pai lama manganna kan tawh laiin, Jehova kan ring tlat tih kan lantîr ang?

4. Sum leh pai lama harsatna kan tawh hunah, eng nge kan dîl theih a, engtin nge chutiang dîlna chu Jehova’n a chhân lêt?

⁴ Jehova kan rinzia târ lan dân kawng khat chu a hnêna ṭawngṭai hi a ni. Mahse, eng nge kan dîl ang? Aw le, sum leh pai lama harsatna hnuaiah chuan tûn hma zawng aiin finna dik emaw, remhriatna emaw kan mamawh ngei ang. Chuvângin, chu mi dîlin ṭawngṭai ngei ngei ang che! Jehova Thu chuan: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin min tiam a ni. (Jakoba 1:5) Ni e, thutlûkna fing leh duhthlanna dik i siam theih nân Jehova hnênah finna, a nih loh leh remhriatna​—hriatna, hriatthiamna, leh hriatthiam theihna i neihte hman ṭangkai theihna​—chu dîl ang che. Hmangaihna ngah kan Pa vâna mi chuan chutiang ṭawngṭaina chu a ngaithla dâwn tih min tiam a ni. Ani chuan an thinlung zawng zawnga amah ringtute kawng tihngîlsak chu a inhuam reng a ni.​—Sâm 65:2; Thufingte 3:​5, 6.

5, 6. (a) Engvângin nge sum leh pai lama harsatna kan tawh hunin Pathian Thu-ah ṭanpuina kan zawn ang? (b) Hna thawh lai kan chân huna kan lungkhamna tikiam deuh tûrin eng nge kan tih theih?

⁵ Pathian Thua kaihhruaina zawn chu Jehova kan rinzia târ lanna kawng dang a ni a. A thu hriattîrna fing tak Bible-a kan hmuhte chu “a rinawm êm êm” a ni. (Sâm 93:5) Kum 1,900 liam taa ziah zawh ni mah se, he Pathian thâwk khum lehkhabuah hian sum leh pai lama harsatna kan tawhte hmachhawn thei tûra min ṭanpui thei finna thuril leh thurâwn rin tlâk tak tak a chuang a ni. Bible finna târ langtu thil ṭhenkhat lo en ta ila.

⁶ Hmân laiin Lal fing Solomona chuan heti hian a lo sawi a: “Thawkrimtu chu a ei tlêm emaw, a ei tam emaw, a mut a tui ṭhîn a, mi hausa chuan a ngahna chu a muthilh loh phah zâwk ang,” tiin. (Thuhriltu 5:12) Kan thil neihte siamṭhat nân te, tihfai nân te, enkawl nân te, leh vênhim nân te chuan sum leh hun sên ral a ngai ṭhîn. Chuvângin, kan hna kan chân a nih chuan, kan nun dân ennawnna hun remchângah hmangin, kan thil duh mai maite leh kan mamawh tak zette thliar hran chu kan tum thei ang. Lungkhamna tihtlêm nân, inthlâk thlengna engemaw neih pawh a finthlâk mai thei bawk. Entîr nân, in tê deuh zâwk luah emaw, kan bungraw neih kan mamawh lêm lohte tihriral emawna hmangin kan nun dân chu kan tisamkhai zâwk thei ang em?​—Matthaia 6:22.

7, 8. (a) Engtin nge Isua chuan mihring ṭha famkim lote’n tisa lam thila lungkhamna nasa tak kan nei ṭhîn tih a hriatzia a târ lan? (Footnote en rawh.) (b) Ṭûl lo taka lungkhamna pumpelh theih dân tûr chungchângah fuihna fing tak eng nge Isua’n min pêk?

⁷ Tlâng chunga a Thusawiah Isua chuan: “‘Engnge ka ei ang a, engnge ka in ang aw?’ tiin in nunna thu leh, ‘Engnge ka silhin ka fên ang aw’ tiin in taksa thu lungkham suh u,” tiin min fuih a.b (Matthaia 6:25) Isua chuan mihring ṭha famkim lote’n an mamawh bulpuite neih chu an lungkham ṭhîn tih a hria a. Mahse, engtin nge chutiang thilte chu kan ‘lungkham loh’ theih ang? Isua chuan: “A ram . . . chu zawng hmasa zâwk rawh u,” a ti. Eng harsatna pawh tâwk mah ila, Jehova biakna chu kan nunah kan dah pawimawh ber tûr a ni. Chutianga kan tih phawt chuan, kan Pa vâna mi chuan kan nî tin mamawh dang zawng zawng chu min “pêk belhchhah dâwn” a ni. Eng kawng emaw ber hmangin, kan mamawh chu min phuhrûksak dâwn a ni.​—Matthaia 6:33.

⁸ Isua chuan thurâwn dang heti hian min pêk belh a: “A tûk atân lungkham suh u, atûk chuan ama tân a lungkham chawp dâwn si a,” tiin. (Matthaia 6:34) A tûka thil lo thleng tûr lo pawngpaw lungkham ringawt chu a finthlâk lo. Bible lama mi thiam pakhat chuan: “Nakin hun chu kan hlauhthâwn ang êm êmin a lo chhe lo fo,” tiin a sawi. Kan ngaih pawimawh tûr dah hmasa bera ni khat atân zêla nung tûra Bible fuihna zuina chuan, ṭûl lo taka lungkhamna chu pumpelh tûrin min ṭanpui thei a ni.​—1 Petera 5:​6, 7.

9. Sum leh pai lama harsatna kan tawh hunah, “bawi rinawm, fing tak” thu leh hla chhuah aṭangin eng ṭanpuina nge kan hmuh theih?

⁹ Tin, sum leh pai lama harsatna kan tawh hun chuan, min ṭanpui tûra “bawi rinawm, fing tak” thu leh hla chhuahte chhiarna hmangin Jehova kan rinzia kan lantîr thei bawk. (Matthaia 24:45) A khât tâwkin, Awake! magazine hian sum leh pai lama harsatna hmachhawn dân kawnga thurâwn ṭangkai tak tak a tichhuak ṭhîn. “Hna Neih Loh​—A Sutkianna Eng Nge?” tih thuziak August 8, 1991 chhuak chuan, hna a neih loh laia sum leh pai lam leh rilru lama nghehna mi tam takte petu rawtna ṭangkai tak pariat a târ lang a.c Chutiang kaihhruainate chu sum pawimawhna thlîr dân dik tak nên a inbûk tâwk tûr a ni ngei mai. Chu mi chungchâng chu, chu mi ṭuma chhuak bawk “Sum leh Pai Aia Pawimawh Zâwk Thil” tih thuziakah târ lan a ni.​—Thuhriltu 7:12.

Hrisêl Lohna Avânga Mangan Hunah

10. Engtin nge Lal Davida entawn tûr siam chuan kan hrisêl loh laia Jehova rin chu a tih chi tih a târ lan?

¹⁰ Kan hrisêl loh hle hunin Jehova rin chu a tih chi em? Tih chi e! Jehova chuan a mite zînga dam lote chu a tuarpui a ni. Chu mai bâkah, anmahni ṭanpui pawh a duh bawk. Entîr nân, Lal Davida hi ngaihtuah ta ila. Pathianin mi fel dam lote a enkawl dân a ziah lai hian, amah ngei chu a na hle a nih a rinawm a. Heti hian a ziak a ni: “LALPAN a chauhna mut hmunah chuan a tichak ang a: nangin a dam loh laiin a mutna i siamsak vek ṭhîn,” tiin. (Sâm 41:​1, 3, 7, 8) Davida’n Jehova a rinna chu a chak reng a, a tâwpah a ṭha chhuak leh ta nge nge a ni. A nih leh, engtin nge hrisêl lohna avânga kan mangan hunah Pathian kan rinzia kan lantîr theih?

11. Kan hrisêlna a ṭhat loh viau chuan, kan Pa vâna mi hnênah eng nge kan dîl ang?

¹¹ Kan hrisêl loh laia Jehova kan rinzia lantîr theihna kawng khat chu tuar chhuak thei tûra a ṭanpuia dîla ṭawngṭai hi a ni. Kan tlin tâwk ang anga kan inenkawl theih nân, “finna” hmang thiam tûrin a ṭanpuina kan dîl thei bawk. (Thufingte 3:21) Tin, kan tawrh chhuah theih nâna chhelna leh dawhtheihnate nei tûra min ṭanpui tûrin kan dîl thei bawk. Chu bâkah, eng thil pawh lo thleng se, Jehova chhawmdâwlna, leh tlu chhe lova a laka rinawm reng tûra a chakna dîl chu kan duh ngei ang. (Philippi 4:13) Pathian laka rinawm reng chu tûna kan nunna humhim ai pawhin a pawimawh zâwk a ni. Kan rinawm phawt chuan, Lâwmman Petu Ropui chuan nun ṭha famkim leh hrisêlna ṭha famkim chatuan daih chu min pe ang.​—Hebrai 11:6.

12. Damdawi lama inenkawlna chungchânga thu tlûkna fing siam thei tûrin, eng Pathian Lehkha Thu-a thu bulin nge min ṭanpui thei?

¹² Jehova kan rinna chuan kaihhruaina ṭangkai tak min pe tûra a Thu, Bible râwn tûrin min chêttîr bawk a ni. Pathian Lehkha Thua thu bul kan hmuhte chuan damdawia inenkawlna chungchânga thutâwp fing siam thei tûrin min ṭanpui thei a ni. Entîr nân, Bible-in “dawi thiamna” a dem tih kan hriat avângin, dawi lam pang telna chi thil hmanga inenkawl rêng rêng chu kan pumpelh a ni. (Galatia 5:​19-21; Deuteronomy 18:​10-12) Bible finna rin tlâk tak dang leh chu hei hi a ni: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tih hi. (Thufingte 14:15) Chuvângin, damdawi lama inenkawl kan rilrûk rêng rêngin, “thu tin . . . ring” mai lovin, thu rin tlâk kan zawn phawt chu a finthlâk a ni. Chutianga “rilru fel tak putna” chuan kan duhthlan theihte chhût thiam tûr leh a sawhkhâwk hre reng chunga thutâwp siam thei tûrin min ṭanpui thei a ni.​—Tita 2:​12, NW.

13, 14. (a) Vênnainsâng leh Awake! magazine-ah hrisêlna lam pang chungchânga thu ṭangkai tak tak engte nge tihchhuah ni tawh? (Phêk 17-a bâwm en rawh.) (b) January 22, 2001 Awake!-ah natna benvawn tawrhna chungchângah thurâwn eng nge tih chhuah a nih?

¹³ Bawi rinawm pâwl thu leh hla chhuahte râwnna hmangin, Jehova kan rinzia kan târ lang thei bawk a. Vênnainsâng leh Awake! magazine-ahte chuan hrisêlna leh natna chi hrang hrang chungchângah thu bengvârthlâk tak tak chhuah a ni fo va.d A châng phei chuan kawng chi hrang hranga ṭhat lohna te, natna te, leh piansualna te hlawhtling taka hmachhawn theite chanchin pawh a chhuak ṭhîn a. Chu bâkah, thuziak ṭhenkhat chuan natna benvawn nei chunga nun dân thurâwn leh rawtna ṭangkai tak takte pawh a târ lang bawk ṭhîn a ni.

¹⁴ Entîr nân, January 22, 2001 chhuak Awake! chuan “Damlote Tâna Thlamuanna” tih a tichuak a. Chu thuziakah chuan Bible thu bul ṭangkai tak takte leh, kum tam tak chhûng natna khirh tak lo tuar tawh mi chinchâng hriate biangbiakna aṭanga lâkkhâwm thu ṭangkai tak takte pawh a târ lang a ni. “Dam Lohna Nêna Nun Hlawhtling Neih​—Engtin Nge?” tih thupui chuan: I natna chungchâng i theih ang tâwk tâwk zir rawh, tih thurâwn a pe a ni. (Thufingte 24:5) Tihthlawhtlin theih tûr thiltum ṭha tak tak, mi dangte ṭanpui tum ang chite insiam la; mahse, mi dangte thiltum ang chu i thei ve kher lo mai thei tih hre reng ang che. (Tirhkohte 20:35; Galatia 6:4) Mahniin inkulh hrang suh. (Thufingte 18:1) Miin an tlawh hunah che chuan, nuam an tih tûrin awm rawh. (Thufingte 17:22) Chu bâkah, Jehova leh kohhran nêna inzawmna ṭha leh nghet tak nei reng ang che. (Nahuma 1:7; Rom 1:​11, 12) Jehova’n a inawpna pâwl hmanga kaihhruaina rin tlâk tak min pêk avâng hian kan lâwm hle lâwm ni?

Tisa Chak Lohna Kan Neih Reng Hunah

15. Engtin nge tirhkoh Paula’n a tisa ṭha famkim lo chak lohnate a do hneh theih a, eng inrin tâwkna nge kan neih theih?

¹⁵ Tirhkoh Paula chuan: “Keimahah thil ṭha rêng a awm lo,” tiin a ziak a. (Rom 7:18) Paula chuan ṭha famkim lo tisa châkna leh chak lohnate do chu thil harsa tak a ni tih amah ngeiin a tawng a ni. Nimahsela, chu chu a do hneh thei tih a ring tlat bawk a ni. (1 Korinth 9:​26, 27) Engtin nge a hneh theih? Jehova rin tlatna hmangin. Chuvângin Paula chuan: “Mi rethei ka va ni tehlul êm! He thihna taksa lakah hian tuin nge mi chhan chhuak ang? Isua Krista kan Lalpa avângin Pathian hnênah lâwmthu ka sawi a ni,” a tih theih phah a ni. (Rom 7:​24, 25) Kan chungchângah eng nge ni ve? Keini pawhin tisa chak lohna kan do tlat a ngai a. Chutiang chak lohnate kan do lai chuan, inrin tâwkna hloh va, kan hlawhtling thei lo tûra indah mai chu a awl hle. Mahse, Paula anga mahni chakna ring lo va, Jehova kan rinchhan tlat chuan, Ani’n min ṭanpui ang.

16. Tisa chak lohna kan neih reng chuan, eng nge kan dîl ang a, kan tlu leh a nih chuan eng nge kan tih ang?

¹⁶ Tisa chak lohna kan neih reng chuan, ṭawngṭaia Jehova ṭanpuina dîlin amah kan rinzia kan lantîr thei a ni. A thlarau thianghlim ṭanpuina min pe tûrin Jehova hnênah kan dîl a, kan ngen ngâwng ngâwng hial a ngai a ni. (Luka 11:​9-13) Pathian thlarau rah pêng pakhat, insûmtheihna chu kan dîl bîk thei bawk. (Galatia 5:​22, 23) A nih leh tisa chak lohna lamah tlu leh ta ila, eng nge kan tih ang? Kan beidawng tûr a ni lo rêng rêng. Zahngaihna ngah kan Pathian hnêna ngaihdamna leh ṭanpuina dîla inngaitlâwm taka ṭawngṭai chu i ning ngai lo vang u. Jehova chuan rilrua inthiam lohna avânga thinlung “lungchhia leh inchhîr ngawih ngawih” hi a hnâwlin, a hmusit ngai lo vang. (Sâm 51:17) Thinlunga inchhir tak tak leh tih tak zeta kan ṭawngṭai chuan, Jehova chuan thlêmna do tûrin min ṭanpui ang.​—Philippi 4:​6, 7.

17. (a) Engvângin nge tisa chak lohna kan chai lai mêk chungchâng Jehova thlîr dân ngaihtuah chu a ṭangkai theih? (b) Thinrim insûm emaw, kan lei vên ṭhat emaw, intihhlimna thianghlim lo lawm kan duh emaw a nih chuan, eng Bible châng nge kan chhinchhiah theih?

¹⁷ Jehova kan rinna chu a thua ṭanpuina zawngin kan lantîr thei bawk a. Bible concordance emaw, Watch Tower Publications Index emaw aṭangin, ‘Engtin nge Jehova hian tisa chak lohna ka chai lai mêk hi a ngaih?’ tih zawhna chhânna hi kan hmu thei a ni. Jehova thlîr dân ngaihtuahna chuan amah tihlâwm kan duhna chu a tichak thei a. Tichuan, thilte chu a thlîr angin kan thlîr ṭanin, a thil huatte chu kan haw ve ṭan thei ang. (Sâm 97:10) Ṭhenkhat chuan an tisa chak lohna beih lai mêk atâna hman theih Bible chângte rilrua vawn reng chu a ṭangkai tih an hmu chhuak a ni. Thinrim insûm harsa kan ti em? Kan tih chuan Thufingte 14:17 leh Ephesi 4:31 thute hi kan chhinchhiah reng thei ang. Kan lei vên ṭhat harsa kan ti em? Kan tih chuan Thufingte 12:18 leh Ephesi 4:29 thute hi kan chhinchhiah thei ang. A nih loh leh, intihhlimna thianghlim lo lawm duhna kan nei em? Kan neih chuan Ephesi 5:3 leh Kolossa 3:5 thute hi kan chhinchhiah thei bawk ang.

18. Engvângin nge zahzumna chuan kan tisa chak lohna hneh theih nâna upate hnêna ṭanpuina dîl min hrehtîr tûr a nih loh?

¹⁸ Thlarauvin a thlan kohhran upate ṭanpuina dîl pawh hi Jehova kan rinzia lantîr theihna kawng dang leh a ni. (Tirhkohte 20:28) Tihah chuan, hêng “mihringte hnêna thilpêkte” hi a berâmte vênghim leh enkawl tûra Krista kal tlanga Jehova ruahmanna siam an ni. (Ephesi 4:​7, 8, 11-14) Amaherawhchu, tisa chak lohna hneh theih nâna ṭanpuina dîl chu thil awlsam a ni kher lo vang. Ṭanpuina kan dîl chuan upate’n min hmusit ang tih hlauvin kan zak mai thei. Mahse, hêng thlarau lama mi puitlingte hian ṭanpuina dîl tûra huaisenna kan neih avângin min zah zâwk ang. Chu bâkah, upate chuan berâm rualte enkawlnaah Jehova mizia lantîr chu an tum tlat bawk a. Pathian Thu aṭanga thlamuanna leh fuihna ṭangkai tak leh zirtîrna min pêkte chu kan tisa chak lohna hneh kan tumruhna tichak tûra kan mamawh tak a ni thei a ni.​—Jakoba 5:​14-16.

19. (a) Eng kawngin nge Setana’n he khawvêla nun lawilo hi hman a tum? (b) Rinnaah hian eng nge tel a, eng nge tih kan tum tlat ang?

¹⁹ Setana chuan hun a neih tlêm tawhzia a hria tih theihnghilh ngai suh. (Thu Puan 12:12) Ani chuan min tilunghnual tûr leh min tlâwmtîr tûrin he khawvêla thil lawilo hi hman a duh a ni. Chuvângin, Rom 8:​35-39-a târ lan he thu hi i ring nghet tlat ang u: “Krista hmangaihna ata chu tuin nge min ṭhen ang? Hrehawmnain emaw, lungngaihnain emaw, tihduhdahnain emaw, ṭâmin emaw, saruaknain emaw, hlauhawmnain emaw, khandaihin emaw min ṭhen thei ang em ni? . . . Ṭhen suh e, chûng zawng zawngah chuan min hmangaihtu avâng chuan, ropui taka ngamtu kan ni. Thihna te, nunna te, vântirhkoh te, lalna te, thil awm sa te, thil lo la awm tûr te, thiltihtheihna te, sânna te, thûkna te, thil siam dang rêng rêngte pawhin, kan Lalpa Krista Isuaa awm Pathian hmangaihna ata chu mi ṭhen thei lovang tih dik takin ka hre si a,” tih hi. Jehova a rinzia târ lanna a va ni tehlul êm! Mahse, chutiang rinna chu rilrua veina mai a ni lo. Kan nî tin nuna a sawhkhâwk hre reng chunga thutlûkna tel rinna a ni zâwk a ni. Chuvângin, kan mangan hunah Jehova rin chu i tum nghet tlat ang u. (w03 9/1)

[Footnote-te]

I Hre Chhuak Thei Em?

• Sum leh pai lama harsatna kan tawh hunin, eng kawngin nge Jehova kan rinzia kan lantîr theih?

• Hrisêl lohna avânga kan mangan hunin, engtin nge Pathian kan rinzia kan lantîr theih?

• Tisa chak lohna kan neih tlatin, engtin nge Jehova kan rinchhan tak zetzia kan lantîr theih?

[Phêk 17-naa bâwm]

Hêng Thuziakte Hi I La Hria Em?

Kan hrisêl lohna avânga kan mangan hunin, keimahni ang bawka hrisêl ṭhat lohna te, natna te, a nih loh leh piansualnate hlawhtling taka tuar chhuaktute chungchâng chhiar chuan min tichak thei hle. Hêng a hnuaia thuziak târ lante hi Vênnainsâng leh Awake! magazine-a tihchhuah tawh thuziak ṭhenkhat a ni.

“Ka Chak Lohnate Hnehin” tih chu a chhe zâwnga inngaihtuahna leh lunghnualna lam tuar dân chungchâng bîk a ni.​—Vênnainsâng (English) May 1, 1990.

“Thir Chuap Pawhin A Thuhrilh A Titâwp Chuang Lo.”​—Awake!, (English) January 22, 1993.

“Ka Nun Thlâk Danglamtu Silaimu,” tih chuan zenna tawrh dân chungchâng bîk a sawi.​—Awake!, October 22, 1995.

“Nakina I Chunga Thil Lo Thleng Tûr I Hre Lo,” tih chuan a lutuka rilru awmdân inthlâkna (bipolar disorder) tawrh dân chungchâng a thlûr bing.​—The Watchtower, December 1, 2000.

“Ngawihna Khawvêl Ata Loida Zin Chhuahna” tih chuan thluak zenna (cerebral palsy) tawrh dân a târ lang.​—Awake!, (English) May 8, 2000.

“Chhûl Lâwng (Endometriosis) Ka Tawrh Dân.”​—Awake!, (English) July 22, 2000.

“Vun Châr Natna Hlauhawm Tak (Scleroderma) Ka Do Dân.”​—Awake!, (English) August 8, 2001.

“Nau Hrin Hnua Lunghnualna (Postpartum Depression) Ka Do Hneh.”​—Awake!, (English) July 22, 2002.

[Phêk 15-naa milem]

Hna thawh lai kan chân a nih chuan, kan khawsak phung ennawn chu a finthlâk mai thei

[Phêk 16-naa milem]

Loida chanchin chuan Jehova rinnain mi chu tuar chhuak thei tûra a ṭanpui dân a târ lang (Phêk 17-naa bâwm en rawh)

[Phêk 18-naa milem]

Kan chak lohna hneh nâna ṭanpuina dîl chu kan zak tûr a ni lo