Nun leh Rawngbâwlna Inzirna Lehkhabu Atâna Thu Lâk Chhuahnate
SEPTEMBER 2-8
PATHIAN THU AṬANGA RO HLUTE | HEBRAI 7-8
“Melkisedeka Awm Dân Anga, Chatuana Puithiam”
(Hebrai 7:1, 2) Chu Melkisedeka, Salem lal, Pathian Chungnungbera Puithiam, Abrahama lalho that haw, lo hmuaka malsâwmtu, 2 Abrahaman engkimah sâwma pakhat a pêk ve bawka kha, puithiamah a awm reng fo si a. A hming awmzia hrilhfiahin a hmasa berah Felna Lal a ni a, a dawt lehah Salem Lal a ni bawk (chu chu Remna Lal tihna a ni)
it-2-E 366
Melkisedeka
Hmân lai Salem lal leh Jehova, “Pathian Chungnungbera Puithiam” a ni a. (Gen. 14:18, 22) Ani chu Pathian Lehkha Thu-a Puithiam târ lan hmasak ber a ni; chu a nihna chu B.C.E. 1933 hma lam hun engemawa a chelh a ni a. “Remna” tih awmze nei Salem lal a nih angin, Melkisedeka chu tirhkoh Paula chuan “Remna Lal” leh, a hming ṭanchhanin “Felna Lal” tiin a sawi a. (Heb. 7:1, 2) Hmân lai Salem chu a hnua Jerusalem khawpui lo ni taa hmun pawimawh ber nia hriat a ni a, a hming chu Jerusalem nêna sawi zawm a ni a, a châng chuan “Salem” tia sawi a ni ṭhîn.—Sâm 76:2.
Abrama’n (Abrahama) lal Kedorlaomera leh a thlâwptu lalte a hneh hnu chuan, Abrama chu Save ruamah, a nih loh leh ‘Lal ruamah’ a chhuk a. Chutah chuan, Melkisedeka chuan “chhang leh uain a rawn la a,” tichuan, Abrahama chu heti hian mal a sâwm a ni: “Lei leh vân neitu Pathian Chungnungbera chuan Abrama malsâwm rawh se. I hmêlmate i kuta petu, Pathian Chungnungbera chu fakin awm bawk rawh se,” tiin. Tichuan, Abrahama’n puithiam lal hnênah “engkim chu sâwma pakhat a pe a,” chu chu hlawhtling taka lal ṭangrualte a beihnaa “râl lâk ṭha” zînga mi a ni.—Gen. 14:17-20; Heb. 7:4.
(Hebrai 7:3) Ani chu pa nei lovin, nu nei lovin, chi thlahtute chanchin nei lovin, awm ṭan ni nei lovin, nun tâwp pawh nei hek lovin Pathian Fapa anga siam a ni zâwk.
it-2-E 367 ¶4
Melkisedeka
Engtin nge Melkisedeka chu ‘awm ṭan ni nei lo leh nun tâwp pawh nei lo’ a nih theih?
Paula chuan Melkisedeka chungchânga thil mak danglam tak chu heti hian a sawi a: “Ani chu pa nei lovin, nu nei lovin, chi thlahtute chanchin nei lovin, awm ṭan ni nei lovin, nun tâwp pawh nei hek lovin Pathian Fapa anga siam a ni zâwk,” tiin. (Heb. 7:3) Mi dangte ang bawkin, Melkisedeka chu a lo piangin, a thi leh a. Mahse, a nu leh pa hming hriat a ni lova, a thlahtute leh a thlahte pawh târ lan a ni lova, a awm ṭan nî leh a nun tâwp hun pawh Pathian Lehkha Thu-ah engmah sawi lan a ni hek lo. Chuvângin, Melkisedeka chuan chatuan puithiam nihna chelhtu Isua Krista chu inâwm takin a entîr lâwk thei a ni. Melkisedeka chuan a hmaa a puithiam nihna lo chelhtu emaw, a hnua amah thlâktu emaw a nei lo ang bawkin, Krista pawh, tûn hmaiin amah ang puithiam lal an awm lova, a hnua amah thlâktu tûr pawh an awm ngai lo vang tih Bible-in a târ lang a ni. Chu bâkah, Isua chu Juda hnam leh Davida lal thlah aṭanga piang ni mah se, tisa lama a thlahtute chuan puithiam nihna an chelh ngai lova, mihring thlahtu zîngah pawh amah anga lal leh puithiam hna thawk kawp an awm ngai hek lo. Chûngte chu Jehova’n a hnêna a tiam vânga lo thleng a ni.
(Hebrai 7:17) “Nang zawng, Melkisedeka awm dân anga, chatuana Puithiam i ni e,” tih hriattîr a ni si a.
it-2-E 366
Melkisedeka
Krista Puithiam Nihna Entîrna. Chhinchhiah tlâk tak Messia hrilh lâwkna chungchânga Davida “lalpa” hnêna Jehova’n chhechhama a tiam chu hei hi a ni: “Nang zawng, Melkisedeka awm dân anga chatuan Puithiam i ni e,” tih hi. (Sâm 110:1, 4) Thlarauva thâwk khum he fakna hla hian Hebrai mite chu lal leh puithiam nihna chelh kawptu tûr thutiam Messia hriat theihna tûr chhan a pe a ni. Tirhkoh Paula’n Hebrai mite hnêna a lehkha thawnah: ‘Isua, Melkisedeka awm dân anga chatuana Puithiam Lalber lo ni tawh’ tia sawiin, hrilh lâwka chu tu nge a nih tih chungchângah rinhlelhna a tibo a ni.—Heb. 6:20; 5:10; COVENANT tih chu en rawh.
Thlarau Lam Lunghlute Laih Chhuahna
(Hebrai 8:3) Puithiam Lalber apiangte chu thilpêk leh inthawinate hlân tûrin ruat an ni si a; chutichuan, he Puithiam Lalber pawh hian eng emaw tal hlan tûr a neih a ngai a ni.
Pathian Lawm Zâwng Inthawinate
11 Tirhkoh Paula chuan: “Puithiam Lalber apiangte chu thilpêk leh inthawinate hlân tûrin ruat an ni si a,” a ti a. (Hebrai 8:3) Paula chuan hmân lai Israel puithiam lal thil hlante chu “thilpêk” leh “inthawinate,” a nih loh leh “sualte avânga . . . inthawinate,” tiin, chi hnihin a ṭhen tih chhinchhiah ang che. (Hebrai 5:1) Mite chuan thilthlâwnpêk chu an inngaihzia te, an inhlutzia te, inṭhianna te, leh induhsakna te lantîr nân an inpe ṭhîn a ni. (Genesis 32:20; Thufingte 18:16) Chutiang bawkin, Dân thupêkin Pathian hnêna “thilthlâwnpêk” tam tak a sawite chu a duhsakna dawn nâna pêk a ni ṭhîn. Dân thupêk bawhchhiat a nih chuan “sualte avânga . . . inthawinate” hlan a ngai a ni. Bible bu hmasa pangate zîngah a bîk takin Exodus-ah te, Leviticus-ah te, leh Number-ah te chuan inthawinate leh thilpêkte chungchâng chipchiar takin a sawi a ni. A vaia chipchiar taka hriat chu harsa mah se, inthawina chi hrang hrang pawimawhnate chuan kan ngaihtuah a phû a ni.
(Hebrai 8:13) “Thuthlung thar,” tiin a sawi avâng khân a hmasa chu a tihlui ta a ni. Tichuan, lo hluia lo upa tawh chu a ral dâwn dâwn a ni.
it-1-E 523 ¶5
Thuthlung
Engtin nge Dân thuthlung chu ‘tihhluia’ a awm?
Mahse, Pathianin zâwlnei Jeremia hmanga thuthlung thar lo awm tûr thu a puan khân, Dân thuthlung chu ‘tihhluiin’ a awm tih theih a ni. (Jer. 31:31-34; Heb. 8:13) C.E. 33 khân, Dân thuthlung chu nghaisakna bana Krista thihna ṭanchhanin thai bo a ni a (Kol. 2:14), thuthlung tharin a ai a awh a ni.—Heb. 7:12; 9:15; Tirh. 2:1-4.
Bible Chhiar
(Hebrai 7:1-17) Chu Melkisedeka, Salem lal, Pathian Chungnungbera Puithiam, Abrahama lalho that haw, lo hmuaka malsâwmtu, 2 Abrahaman engkimah sâwma pakhat a pêk ve bawka kha, puithiamah a awm reng fo si a. A hming awmzia hrilhfiahin a hmasa berah Felna Lal a ni a, a dawt lehah Salem Lal a ni bawk (chu chu Remna Lal tihna a ni), 3 ani chu pa nei lovin, nu nei lovin, chi thlahtute chanchin nei lovin, awm ṭan ni nei lovin, nun tâwp pawh nei hek lovin Pathian Fapa anga siam a ni zâwk. 4 Tichuan, chi thlahtu Abrahaman a râllâk ṭha apiang zînga mi sâwma pakhat a pêka chu, chu mihring ropuizia chu ngaihtuah teh u. 5 Levia thlahte zînga puithiam hna chang apiangte chuan Dân thu angin mite lakah sâwma pakhat lâk tûr thu an hmu ngei a ni, chu chu an unaute lakah a ni, chûngho chu Abrahama ṭhâlbea chhuak ni mah sela; 6 amaherawhchu, an zînga a thlahtute chhui tel ve lohva khân Abrahama lakah sâwma pakhat a la a, thutiamte vawngtu chu mal a sâwm ta bawk a. 7 Nimahsela, hnial rual lohvin a tê zâwk chu ropui zâwka malsâwmsakin a awm ṭhîn. 8 Tin, hetah hian mihring thi ṭhînte hian sâwma pakhat an hmu ṭhîn a, chutah erawh chuan ‘a nung reng’ tia a thu an hriattîra chuan a hmu a ni. 9 Tin, Levia, sâwma pakhat la ṭhîntu mah hian, Abrahama kutah khân sâwma pakhat a pe tawh tih theih a ni; 10 Melkisedekan a lo hmuah lai khân a pa ṭhâlbeah a la awm si a. 11 Tichuan, Levia-ho puithiam nihna avânga famkimna hmuh theih a nih chuan (chu mi hnuaiah chuan miten Dân thu an lo hmu si a), Arona awm dân anga ruat lovin, Melkisedeka awm dân anga puithiam dang lo awm hi eng nge a la ngaih na? 12 Puithiam nihna chu a lo danglam tâk avângin, Dân thu chu tihdanglam ve a lo ngai rêng a ni. 13 Hêng a thu an sawia hi hnam hrang mi a ni si a, chumi hnam zînga mi chu tu mah maichâmah chuan an che ngai lo. 14 Kan Lalpa chu Juda hnam zînga lo chhuak a ni tih a lang fiah si a, chumi hnam thu-ah chuan Mosian puithiamho kawng thu engmah a sawi lo. 15-16 Tin, Melkisedeka anga puithiam dang, tisa thu pêk Dân thu anga siam mi ni lo, nun tâwp nei lo thiltihtheihna anga siam zâwk mi a lo awm dâwn chuan kan thu sawi kha nasa takin a fiah lehzual ang; 17 “Nang zawng, Melkisedeka awm dân anga, Chatuana Puithiam i ni e,” tih hriattîr a ni si a.
SEPTEMBER 9-15
PATHIAN THU AṬANGA RO HLUTE | HEBRAI 9-10
“Thil Ṭha, Lo Awm Tûrte Hlimthla”
(Hebrai 9:12-14) kan tân chatuana tlanna hmu tawhin, kêlte leh bâwng note thisen vâng ni lovin, ama thisen vâng zâwkin Hmun Thianghlimah chuan vawi khatah a lo lût tlingtla ta nghâl a. 13 Kêl leh bâwngpate thisen leh bâwngla vâp, mi bawlhhlawh chunga theh mahin tisa thiang khawpa a tihthianghlim si chuan, 14 Krista, chatuana thlarau zâra hmêlhem lova Pathian hnêna inhlâna thisen chuan Pathian Nung rawng bâwl tûrin in chhia leh ṭha hriatna chu thiltih thite lakah chuan a va tithianghlim nasa dâwn êm!
it-1-E 862 ¶1
Ngaihdamna
Israel mite hnêna pêk Pathian dânah, Pathian emaw, a mihringpui emaw chunga thil tisualtu chu ngaihdam ni tûr chuan, a hmasain, ani chuan Dânin a phût angin, a thil tihsual chu a siam ṭhat a ngai a, tichuan, dinhmun tam zâwka tih ṭhin angin, Jehova hnênah inthawina thisen a hlân ang. (Lev. 5:5–6:7) Chuvângin, Paula chuan heti hian thubul a târ lang a: “Dân thu zawngin engkim thaw mai hi thisena tihthianghlimin a awm ṭhîn a, thisen chhuah lohvin ngaihdamna rêng a awm lo,” tiin. (Heb. 9:22) Mahse, ran thisen chuan sual chu a la bo thei tak tak lova, chhia leh ṭha hriatna thiang pawh a pe thei hek lo. (Heb. 10:1-4; 9:9, 13, 14) Chumi nêna inkalhin, sawi lâwk thuthlung thar chuan Isua Krista tlanna inthawina ṭanchhanin ngaihdamna dik tak a pe thei a ni. (Jer. 31:33, 34; Mt. 26:28; 1 Kor. 11:25; Eph. 1:7) Isua leia a awm lai khân, zeng pakhat tidamin, sual ngaidam tûra thuneihna a neihzia a lantîr a ni.—Mt. 9:2-7.
(Hebrai 9:24-26) Krista chu kuta sak hmun thianghlim, a tak anpuiah chuan a lût si lo va; tûnah Pathian hmaah kan aia ding tûrin vânah ngei a lût ta zawk a; 25 nimahsela, Puithiam Lalber chu kum tinin mahni thisen lo, thisen keng chunga Hmun Thianghlima a lût ṭhîn angin, ani chu mahni inhlân fo tûrin a lût hek lo; 26 chuti ni suh sela, leilung pian tirh achin vawi tam tak a tuar tawh tûr a ni; nimahsela, tûn lai hun tâwpah hian inthawi nâna amah leh amah inhlânin, sual tihbo nân vawi khatah a lo lang ta nghâl a ni.
cf-E 183 ¶4
“Mizui Zêl Rawh”
4 Pathian Lehkha Thu chuan Isua vâna a thlen dân te, lawm a nih dân te, leh a Pa nêna hlim taka an inhmuh dân chungchângah engmah a sawi lang lo. Mahse, Bible chuan Isua vâna a kîr leh hnu lawka thilthleng tûrte chu a lo sawi lâwk a ni. Juda mite chuan kût thianghlim chu kum zabi 15 aia tam an lo hmang tawh ṭhîn a. Puithiam lalber chu thuthlung bâwm hmaah Inremna Nîa inthawina thisen theh tûrin biak ina Hmun Thianghlim Berah chuan kum khatah vawi khat a lût ṭhîn a. Chumi nîah chuan, puithiam lalber chuan Messia a entîr a ni. Isua chuan vâna a kîr leh hnuah chu kût hrilh lâwkna awmzia chu chatuan atân a tifamkim a. Ani chu lei leh vâna hmun thianghlim ber, vâna Jehova awmna ropui takah lûtin, a tlanna inthawina hlutna chu a Pa hnênah a hlân a ni. (Hebrai 9:11, 12, 24) Jehova’n chu chu a pawm em?
(Hebrai 10:1-4) Dân thu chuan thil ṭha, lo awm tûrte anpui tak nei lovin, a thla chauh a neih avângin, kum tina inthawina pângngai an hlan fote chuanin, a rawn hnaite chu engtikah mah an tifamkim thei dâwn si lo. 2 Chuti ni suh sela, a betute chu vawi khata tihthianghlim nghâla awmin, sual inhriatnate an neih loh avângin hlan an bâng tawh daih dâwn lâwm ni? 3 Nimahsela, chûng inthawinaah chuan kum tinin sualte hriat lehna a lo awm fo zâwk ṭhîn. 4 Bâwngpate leh kêlte thisen chuan sualte tibo thei rual a ni si lo.
it-2-E 602-603
Ṭhat Famkimna
Mosia Dâna Ṭhat Famkimna. Mosia hmanga Israel mite hnêna pêk Dânah chuan puithiam nihna nemngheh dân te, leh inthawi nâna ran chi hrang hrang hlan dânte a tel a. Pathian hnên aṭanga lo kal leh ṭha famkim ni mah se, thlarau thâwk khuma awm tirhkoh târ lan angin, Dân leh puithiam nihna, leh inthawinate chuan Dân hnuaia awmte chu ṭhat famkimna a pe thei lo. (Heb. 7:11, 19; 10:1) Sual leh thihna ata chhuah zalên ahnêkin, Dân chuan sual chu a tifiah lehzual a. (Rom 3:20; 7:7-13) Nimahsela, chûng Pathian ruahmanna zawng zawngte chuan, Pathian thiltum an hlen chhuak a ni; Dân chuan Krista lama mite “kaihruaitu” anga hna thawkin “thil ṭha, lo awm tûrte anpui” ṭha famkim chu a târ lang a ni. (Gal. 3:19-25; Heb. 10:1) Chuvângin, Paula’n “tisa avânga Dân chu a chak loh va, a tih theih rual loh chu” tia a sawi khân, (Rom 8:3), ani chuan Hebrai 7:11, 18-28-a hrilhfiah angin, tisa lama Juda puithiam lal (inthawina thiltihtea mawhphurhna latu leh Inremna Nîa inthawina thisen kenga Hmun Thianghlim Bera lûttu) chuan a rawngbâwlsakate chu “a tâwpkhâwk thlengin a chhandam” theih loh thu a sawi tih a chiang a ni. Arona puithiam nihna hmanga inthawina thilhlan chuan mite chu Pathian hmaah thiam chantîr thei mah se, sual sawhkhâwkte lakah a pumin emaw, sawisêl bovin emaw a chhuah zalêntîr thei lo. Tirhkoh chuan chumi chungchâng chu sawiin, inremna nia hlan inthawinate chuan “a lo hnaite chu engtikah mah a tifamkim thei dâwn si lo,” tiin, chûng mite chhia leh ṭha hriatna chungchâng chu a sawi a. (Heb. 10:1-4; Heb. 9:9 khaikhin rawh.) Puithiam lal chuan sual ata chhuah zalênna dik tak atâna mamawh tlanna man chu a pe thei lo va. Chatuan atâna puithiam anga Krista rawngbâwlna leh inthawina dik tak chauhvin, chu chu a hlenchhuak thei a ni.—Heb. 9:14; 10:12-22.
Thlarau Lam Lunghlute Laih Chhuahna
(Hebrai 9:16, 17) Thurochhiah awmna apiangah a chhiahtu thihna awm ve lo thei a ni si lo. 17 Mi an thih hnuin thurochhiahin thu a nei si ṭhîn, a chhiahtu la dam chhûng erawh chuan thu rêng a nei lo.
w92-E 3/1 31 ¶4-6
Chhiartute Zawhna
Paula chuan Pathian leh mihring inkâra thuthlung tihngheha awm tûr chuan thihna a awm a ngai tih a sawi a. Entîrna pakhat chu Dân thuthlung hi a ni. He thuthlungah hian Mosia chu Pathian leh tisa lam Israelte inkâra palai a ni a. Chuvângin, Mosia chuan chanvo pawimawh tak chelhin, ani chu thuthlung hnuaia awm Israel mite dâwrtu mihring a ni. Chuvângin, Mosia chu Jehova hnên aṭanga lo kal Dân thuthlunga thuro chhiahtu anga thlîr theih a ni. A nih leh, Mosia chuan Dân thuthlung nemngheh nân a thisen a leihbuak a ngai em? Ngai lo ve. Chu aiin, ran thisen chu hlan a ni a, chûng thisente chuan Mosia thisen ai a awh a ni.—Hebrai 9:18-22.
Jehova leh thlarau lam Israel hnam inkâra thuthlung thar hi eng nge ni ve? Isua Krista chu Jehova leh thlarau lam Israelte inkâra thuchah kengtu Palai niin, ani chuan hna ropui tak a chelh a. He thuthlung hi Jehova hnên aṭanga chhuak ni mah se, Isua Krista chunga innghat a ni a. Isua chu, chu thuthlung Palai a nih bâkah, ani chuan thuthlunga tel hmasate nên tisa lamah inzawmna a nei a ni. (Luka 22:20, 28, 29) Ani chu thuthlung tinghet tûra mamawh inthawina pe tûrin a tling a. Chu inthawina chu ransa mai ni lovin, mihring ṭha famkim nunna a ni. Chuvângin, Paula chuan Krista chu thuthlung thara thuro chhiahtu angin a sawi a. ‘Krista chu tûnah Pathian hmaah kan aia ding tûrin vânah ngei a luh’ hnuah chuan, thuthlung thar chu hman ṭan a ni.—Hebrai 9:12-14, 24.
Paula’n Mosia leh Isua chu mihring thuro chhiahtute anga a sawi khân, anni chu thuthlungte lo chhuahna an ni a tihna a ni lo, chûng thuthlungte chu Pathian aṭanga chhuak zâwk a ni. Mahse, anni chu chûng thuthlungte nemnghehnaah palaite angin an tel a ni. Chûng thuthlungte nemnghet tûr chuan nunna pêk a ngai a—Mosia aiah rante an thi a, Isua chuan thuthlung thara telte tân a nunna thisen a hlân a ni.
(Hebrai 10:5-7) Chutichuan, khawvêla a luh laiin, “inthawina leh thil hlan i duh lo va, ka tân taksa mi buatsaihsak zâwk a: 6 Hâlrala pumpêknaahte leh, sual tâna inthawinaahte chuan lâwmna rêng i nei lo. 7 Chu veleh chuan keiin, ‘Aw Pathian, ngai teh, (lehkhabu zialah chuan ka thu ziak a ni a) i duh zâwng ti tûrin ka lo kal e,’ ka ti a,” a ti a.
it-1-E 249-250
Baptisma
Luka chuan Isua chu baptisma a chan laiin a ṭawngṭai tih a sawi a. (Lk. 3:21) Chu bâkah, Hebrai mite hnêna lehkha thawn ziaktu chuan Isua Krista “khawvêla” a luh laiin, (hêng thute chhiar thei lo leh sawi thei lova a awm hun, a pian hun lai ni lovin, baptisma changa, rawngbâwlna atâna a inpêk hunah,) ani chuan Sâm 40:6-8 (LXX) nêna inmilin heti hian a sawi a ni: “Inthawina leh thil hlan i duh lo va, ka tân taksa mi buatsaihsak zâwk a. . . . Aw Pathian, ngai teh, (lehkhabu zialah chuan ka thu ziak a ni a) i duh zâwng ti tûrin ka lo kal e,” tiin. (Heb. 10:5-9) Isua chu Juda hnam aṭanga lo piang a ni a, chu hnam chuan Pathian nên thu an thlung a, chu chu Dân thuthlung a ni. (Ex. 19:5-8; Gal. 4:4) Chuvângin, Isua chuan baptisma chang tûra Johana hnêna a kal lai khân, Pathian Jehova nêna thuthlunga inlaichînna a nei tawh a. Isua’n chutah chuan Dânin a phût aia tamin thil a ti a. Ani chuan a tâna ‘buatsaih’ taksa hlan tûr leh Dân anga hlan ṭhin ran inthawinate tihbo nân, a Pa “duh zâwng” ti tûrin a Pa Jehova hnênah a inpe a ni. Tirhkoh Paula chuan: “Chu mi ‘duh zâwng’ chuan Isua Krista taksa vawi khata hlan nghâl vâng khân tihthianghlimin kan awm ta,” tiin a sawi a. (Heb. 10:10) Isua tâna a Pa duh zâwngah chuan Lalram nêna inkûngkaih thiltih pawh a tel a, chu rawngbâwlna atân Isua chu a inpe a ni. (Lk. 4:43; 17:20, 21) Jehova chuan a Fapa inpêkna chu a pawmin, a hriatpui a, thlarau thianghlima hriak thihin, heti hian a sawi a ni: “Nang ka fapa duh tak i ni; i chungah ka lâwm êm êm e,” tiin.—Mk. 1:9-11; Lk. 3:21-23; Mt. 3:13-17.
Bible Chhiar
(Hebrai 9:1-14) Tin, thuthlung hmasa pawh khân Pathian rawngbâwl dânte leh a hmun thianghlim, he khawvêla hmun thianghlim chu a nei a. 2 Biak bûk an siam a, a tawntirh chu khâwnvâr dahna te, dawhkân te, chhangdah te awmna a ni; chu chu Hmun Thianghlim an ti a ni. 3 Tin, puanzâr pahnihna piahah chuan biak bûk, Hmun Thianghlim Ber an tih chu a awm a; 4 chu miah chuan rangkachak rimtui hâlna bâwm leh thuthlunna bâwm, rangkachak tîa luan chu a awm a, chu mi thuthlunna bâwm chhûngah chuan Manna awmna rangkachak bêl te, Arona tiang lo chawr te, thuthlunna lung phêkte a awm a; 5 a chung lamah zahngaihna ṭhutphah hliahin, ropuina Cherup-te an awm bawk a; chûng thute chu tûnah zawng akip akawiin kan sawi thei lo vang. 6 Tin, chûng thilte chu chutianga siam a lo ni a, puithiamhovin Pathian rawng bâwlin biak bûk tawntirhah chuan an lût fo ṭhîn a; 7 a dawttuah erawh chuan Puithiam Lalber chauh, kum tin vawi khat, thinsen keng lo lovin a lût ṭhîn; chu chu mahni tân leh mite sual atân a hlân ṭhîn. 8 Thlarau thianghlimin hei hi a hriattîr a: Hmun Thhianghlima luhna kawng chu a la lang rih lo ve, biak bûk tawntirh chu a la din chhûng chuan tih hi; 9 chu chu tûn lai tehkhinna hi a ni; chumi ang zêlin thilpek leh inthawinate pawh an hlân ṭhîn, chûngte chuan chhia leh ṭha hriatna kawngah chuan a betu chu a tifamkim thei lo; 10 chûng chu (ei tûr te, in tûr te, sil tûr hrang hrangte nên) tisa lam dânte chauh siamṭhat hun hma atân ruat chu a ni. 11 nimahsela, Krista chu thil ṭha, lo awm tûrahte Puithiam Lalbera lo kalin, biak bûk, kuta sak loh, (chu chu hêng thil siam zînga mi a ni lo tihna a ni,) ropui leh famkim zâwk kal tlangin, 12 kan tân chatuana tlanna hmu tawhin kêlte leh bâwng note thisen vâng ni lovin, ama thisen vâng zawkin Hmun Thianghlimah chuan vawi khatah a lo lût tlingtla ta nghâl a. 13 Kêl leh bâwngpate thisen leh bâwngla vâp, mi bawlhhlawh chunga theh mahin tisa thiang khawpa a tihthianghlim si chuan, 14 Krista, chatuana thlarau zâra hmêlhem lova Pathian hnêna inhlâna thisen chuan Pathian Nung rawng bâwl tûrin in chhia leh ṭha hriatna chu thiltih thite lakah chuan a va tithianghlim nasa dâwn êm!
SEPTEMBER 16-22
PATHIAN THU AṬANGA RO HLUTE | HEBRAI 11
“Rinna A Pawimawh Chhan”
(Hebrai 11:1) Tin, rinna hi thil beiseite awm ngeia hriatna, thil hmuh lohte hriatfiahna a ni.
Jehova Thutiamte Chu Ring Rawh
6 Hebrai 11:1-ah Bible chuan rinna awmzia chu a sawi a. (Chhiar rawh.) (1) Rinna chu “thil beiseite awm ngeia hriatna,” a ni. Kan thil “beiseite” zîngah chuan nakin hun atâna Pathian thutiamte a tel a. Entîr nân, suahsualna chu tihtâwp a niin, khawvêl thar a lo awm ang tih kan hre chiang a ni. (2) Rinna chu “thil hmuhlohte” hriatfiahna a ni. Pathian Jehova, Isua Krista, vântirhkohte, leh Lalram te chu hmu thei lo mah ila, vânah an awm tih kan hria a. (Hebrai 11:3) Pathian thutiamah leh kan hmuh theih loh thilah rinna kan nei tak zet tih engtin nge kan lantîr theih? Chu chu kan nun dân te, kan thusawi te, leh kan thiltihte hmangin kan lantîr thei a ni.
(Hebrai 11:6) Nimahsela, rinna lovin ama lâwm zâwng mi nih rual a ni lo; Pathian hnêna lo kal chuan, ani chu a awm tih leh, zawngtute hnêna lâwmman pêk hmang a ni tih rin tûr a ni.
w13-E 11/1 11 ¶2-5
“Zawngtute Hnêna Lâwmman Pêk Hmang”
Jehova tilâwm tûrin eng thil nge kan tih ngai? Paula chuan: “Rinna lovin ama [Pathian] lâwm zâwng mi nih rual a ni lo,” tiin a ziak a. Paula’n rinna lovin Pathian tihlâwm chu a harsa tia a sawi lo hi chhinchhiah ang che. Chu aiin, tirhkoh chuan rinna tel lovin, a lâwm zâwng mi nih rual a ni lo tiin a sawi zâwk a ni. Thu danga sawi chuan, rinna chu Pathian tilâwm tûra loh theih lohva kan neih ngai mizia a ni.
Eng ang rinnain nge Jehova tilâwm? Pathian kan rinnaah chuan thil pahnih a tel tûr a ni. Pakhatna, “ani chu a awm,” tih kan ring tûr a ni a. Bible lehlin dangte chuan “ani chu mi tak tak a ni” tih leh “ani chu a awm tih rin” tûr a ni tiin a sawi. Pathian a awm tih rinhlelhna kan neih chuan engtin nge amah kan tihlâwm theih ang? Ramhuaite pawhin Jehova a awm tih an rin avângin, rinna dik takah chuan rin satliah mai aia tam a tel a. (Jakoba 2:19) Pathian chu mi tak tak a ni tih kan rinna chuan thil ti tûrin min chêttîr tûr a ni a, chu chu Pathian lâwm zâwnga nungin amah kan rinzia kan lantîr tûr tihna a ni.—Jakoba 2:20, 26.
Pahnihna, Pathian chu “lâwmman pêk hmang” a ni tih kan ‘ring tûr a ni.’ Rinna dik tak neitu chuan Pathian lâwm zâwnga nung tûra theih tâwp a chhuahnate chu a thlâwn dâwn lo tih a ring tlat a. (1 Korinth 15:58) Pathianin lâwmman min pe theiin, pêk min châk tih rinhlelhna kan neih chuan, engtin nge amah kan tihlâwm theih ang? (Jakoba 1:17; 1 Petera 5:7) Pathian chu mite ngaihsak lo, lâwm nachâng hre lo, leh thil phal lo tak nia ngaitu chuan Bible-a târ lan Pathian chu a hre lo a ni.
Tute hnênah nge Jehova’n lâwmman a pêk? Paula chuan amah ‘zawngtute hnênah,’ tiin a sawi a. Bible letlingtute puitu lehkhabu pakhat chuan “zawngtute” tia lehlin Grik thu mal hian “zawng tûra kal chhuak” tih awmzia kâwk lovin, Pathian “chibai bûk” tûra lo kal tih a kâwk zâwk tiin a sawi. Lehkhabu dang leh chuan thiltih sawina he Grik thu mal hian tih tak zet leh rilru pe taka thiltihna a kâwk tiin a sawi bawk. Ni e, Jehova chuan thinlung zawng zawnga amah hmangaihna leh ṭhahnemngaihna nêna amah chibai bûk tûra rinnaa chêttîra awmte chu lâwmman a pe a ni.—Matthaia 22:37.
(Hebrai 11:33-38) Chûngte chuan rinnain ramte an la a, thil fel an ti a, thutiamte an chang a, sakeibaknei kâte an tihchihsak a, 34 mei thiltihtheihna an timit a, khandaih hriam lam an pumpelh a, chak lohna ata chak taka siamin an awm a, indonaah chuan mi hrât khawkhêng an lo ni a, hnam dang indo pâwlte an tlânchhiattîr a. 35 Hmeichhiaten an mitthite tho leh an hmu a; mi dangte pawh sawisakin an awm a, thawhlehna ṭha lehzual an chan theihna tûrin chhan chhuah an duh lo va; 36 mi dangte pawhin tihnawmnah leh vuakte an tuar a, a ni, chu lo pawh chu, kawlbun leh tân ina khungte an tâwk bawk a; 37 lunga denin an awm a, thingzainaa zai bunin an awm a, thlêmna an tâwk a, khandaiha sahhlumin an awm a; berâm vun leh kêl vun sinin an vâkvai a; rethei takin, hrehawm takin, tihduhdahin an awm a; 38 (chûngho tân chuan khawvêl hi awmna tlâk a ni lo); thlalêrah te, tlângah te, pûkah te, khuarkhurumah te an vâk an vâk ṭhîn a.
I Thil Beiseiah I Rinna Tinghet Rawh
10 Hebrai bung 11-ah, Paula chuan: “Hmeichhiaten an mitthite tho leh an hmu a, mi dangte pawh sawisakin an awm a, thawhlehna ṭha lehzual an chan theihna tûrin chhan chhuah an duh lo va,” tiin a sawi. (Hebrai 11:35) Mi tam tak chuan Pathian tiam thawhlehnaah rinna nghet tak an neih avângin fiahnate tuar chhuakin Pathian chungah an rinawm tlat a. Jehova’n nakinah nunna a pe lehin leiah chatuanin an nung ang tih an hria a. Nabotha leh Zakaria te hi han ngaihtuah teh. Pathian Thu an awih avângin lunga denhlum an ni a. (1 Lalte 21:3, 15; 2 Chronicles 24:20, 21) Daniela chu sakeibaknei rilṭâm tak pûka paih luh niin, a ṭhiante chu meipuia paih luh an ni bawk. Jehova chunga rinawm loh ai chuan thih an inhuam zâwk a ni. Hêng mite hian Jehova’n a thlarau thianghlim a pe ang tih leh chûng an hrehawm tawrhte chu tuar chhuak thei tûrin a ṭanpui ang tih an ring nghet tlat a ni.—Daniela 3:16-18, 20, 28; 6:13, 16, 21-23; Hebrai 11:33, 34.
11 Mika te, Jeremia te ang zâwlnei tam tak chuan nuihsawh emaw, tân ina khung emaw an tâwk a. Mi dangte chu Elija angin, “thlalêrah te, tlângah te, pûkah te, khuarkhurumah te an vâk an vâk ṭhîn a.” An vaiin “thil beiseite awm ngeia hriatna” an neih avângin, fiahnate an tuar chhuakin Pathian lakah an rinawm tlat a ni.—Hebrai 11:1, 36-38; 1 Lalte 18:13; 22:24-27; Jeremia 20:1, 2; 28:10, 11; 32:2.
Thlarau Lam Lunghlute Laih Chhuahna
(Hebrai 11:4) Rinnain Abela chuan Kaina ai chuan inthawina ṭha zâwk Pathian hnênah a hlân a, chumi avâng chuan mi fel a ni tih hriattîrna a hlawh a, Pathianin a thilpêkte kawngah chuan thu a hriattîr a; tin, chumi rinna avâng chuan ani chuan thi tawh hnuin thu a la sawi ta fo a ni.
it-1-E 804 ¶5
Rinna
Rinna Kawnga Hmân Laia Entawn Tûrte. Paula târ lan ‘chhûmpui nasa tak ang thlîrtute’ (Heb. 12:1) chuan rinna nghah chhan ṭha tak an nei ṭheuh va. Entîr nân, Abela chuan “rûl” lû tithitlingtu tûr ‘thlah’ chungchânga Pathian thutiam chu a hre chiang hle a. Ani chuan Jehova’n Eden huana a nu leh pate chunga a lo sawi tawh hremna chu a thleng famkim tih a hmu a. Lei chu ânchhe lawh a nih a, hlîng leh buara a khah avângin, Eden pâwnah chuan Adama leh a chhûngte chuan an hmaia thlantui luang zawih zawihin chaw an ei a ni. Abela chuan a nu Evi’n a pasal a mamawh ngawih ngawihzia leh a nupui chunga a pa Adama intihlalziate chu a hmuh a rinawm. A nu chuan a nau pai laia a hrehawm tawrhte chu a sawi ngei ang. Chu bâkah, Eden huan luhna kawng pawh cherub-te leh mei khandaih vir tawna vên a ni bawk. (Gen. 3:14-19, 24) Chûng zawng zawng chuan Abela chu ‘thutiam thlah’ hmangin chhanchhuahna a awm ang tih ring nghet tûrin “hriatfiahna” a neihtîr a. Chuvângin, rinnaa chêttîra awmin ani chuan Kaina thil hlan aia hlu “inthawina ṭha zâwk” chu a hlân a ni.—Heb. 11:1, 4.
(Hebrai 11:5) Rinnain Enoka kha thihna hre lo tûra lâk bovin a awm a; tin, Pathianin a lâk bo avângin hmuh theih a ni ta lo va; lâk bova a awm hmain Pathian lâwm zâwng mi a ni tih an hriattîr tawh rêng a.
“Pathian Lâwmzâwng Mi A Ni”
A nih leh, Enoka chu “thihna hre” lo tûrin engtianga “lâk bo” nge a nih? Jehova’n na tuar lova thi tûrin a la bo mai a nih a rinawm. Mahse, Enoka chuan “Pathian lâwmzâwng mi a ni tih hriattîrna” a dawng hmasa phawt a ni. Engtin nge? A thih hma lawk khân, Pathianin Enoka chu inlârnaah lei paradis a hmuhtîr a ni thei a. Jehova lâwmzâwng mi a ni tih chiang taka hriattîrna a hmuh hnuah thihnaah chuan a muhîl ta a ni. Enoka leh mi rinawm a hmei a pate chungchâng ziakin tirhkoh Paula chuan: “Chûng zawng zawngte chu rinna neiin an thi ta a,” tiin a sawi a. (Hebrai 11:13) A thih hnuah chuan a hmêlmate’n a ruang an zawng a; mahse, “hmuh theih a ni ta lo.” Milem biakna, a nih loh leh sakhaw dik lo chawilârna atâna hman a nih loh nân Jehova’n a la bo a ni thei ang.
Bible Chhiar
(Hebrai 11:1-16) Tin, rinna hi thil beiseite awm ngeia hriatna, thil hmuh lohte hriatfiahna a ni. 2 Chumiah chuan upahote khân fak an hlawh si a. 3 Rinnain a ni khawvêlte hi Pathian thua siam a ni tih kan hriat ni; chutichuan, thil hmuh theihte hi thil lang theitea siam a ni lo. 4 Rinnain Abela chuan Kaina ai chuan inthawina ṭha zâwk Pathian hnênah a hlân a, chumi avâng chuan mi fel a ni tih hriattîrna a hlawh a, Pathianin a thilpêkte kawngah chuan thu a hriattîr a; tin, chumi rinna avâng chuan ani chuan thi tawh hnuin thu a la sawi ta fo a ni. 5 Rinnain Enoka kha thihna hre lo tûra lâk bovin a awm a; tin, Pathianin a lâk bo avângin hmuh theih a ni ta lo va; lâk bova a awm hmain Pathian lâwmzâwng mi a ni tih an hriattîr tawh rêng a. 6 Nimahsela, rinna lovin ama lâwm zâwng mi nih rual a ni lo; Pathian hnêna lo kal chuan, ani chu a awm tih leh, zawngtute hnêna lâwmman pêk hmang a ni tih rin tûr a ni. 7 Rinnain Nova chu thil lo la lang lote kawng thu-ah Pathian hrilha lo awmin, Pathian ṭih dêkin, a chhûngte chhandam nân lawng a tu a; chu chuan khawvêl chu thiam loh a chantîr ta a, rinna avânga felna awm chu rochungtu a lo ni ta bawk a. 8 Rinnain Abrahama chu kohva a awm lai khân, a rochun tûr hmuna lût tûrin kal chhuah thu a pawm ta a; tin, a kalna tûr lam pawh hre lovin a kal chhuak ta a. 9 Rinnain ram tiamah khân mi rama châm ang maiin a lo châm ta reng a, thutiam hmunkhat a rochunpui tûr Isaaka leh Jakobate nên chuan puan inahte an awm a; 10 khua, lungphûmte nei mi, Pathian rêlbâwl leh siam chu a nghâk reng si a. 11 Rinnain Sari ngei pawhin, a tiamtu chu rinawma a ruat avângin, tar tawh hnuin chi pai theihna a hmu a. 12 Chutichuan, mipa pakhat lakah (ani chu mitthi ang a ni si a) vâna arsite anga tam, tuifinriat kama ṭiau vaivut chhiar sên loh anga tam an lo chhuak ta a. 13 Chûng zawng zawng chu rinna neiin an thi ta a, thiltiamte chu chang lovin; nimahsela, chûng chu hla tak aṭanga hmuin chibai an lo bûk tawh a, leiah hian mikhual leh khualzin mai an ni tih an inhriattîr tawh bawk a. 14 Chutiang thu sawite chuan anmahni ram tûr an zawng tih an tilang si a. 15 Tin, an chhuahna ram chu lungkham sela chuan hâwnna remchâng an hmu tawh ngei tûr a ni. 16 Nimahsela, tûnah zawng ram ṭha lehzual châk an lo ni a, chu chu vâna mi a ni; chutichuan, Pathianin an Pathian tiha awm chu a zak lo ve; an tân khua lam a lo buatsaihsak tawh si a.
SEPTEMBER 23-29
PATHIAN THU AṬANGA RO HLUTE | HEBRAI 12-13
“Thununna—Jehova Hmangaihna Tichiangtu”
(Hebrai 12:5) fuihna thu, fate zilh anga zilhna che u kha, in lo theihnghilh ta e. “Ka fa, Lalpa thununna chu ngainêp suh la, a zilhhauva i awmin inthlahdah hek suh;
‘Hnung Lama Thilte’ En Suh
18 Zilhna khauh tak kan dawn. Zilhna kan lo dawnte lungawi lo taka thlîr lêt kan chîng a nih chuan engtin nge ni ang? Chu chuan rilru a tina mai ni lovin, chhiatna nasa tak, a tâwpa “inthlahdah,” a nih loh leh bânsan tawpna chu a thlen thei a ni. (Heb. 12:5) Zilhna thu ‘ngainêpin’ kan hnâwl emaw, kan pawm hnua ‘inthlahdahin’ kan bânsan emaw pawh ni se, a rah chhuah chu a inang reng a ni—zilhna chu kan hlâwkpui lova, insiamṭhat nân kan hmang lo, tih hi. Solomona thusawi: “Zirtîrna chu vuan tlat la, chhuah suh; vawng tlat rawh, i nunna a ni si a,” tih zawm chu a ṭha zâwk hle ngei ang. (Thuf. 4:13) Kawnga kaihhruaina târte zâwmtu motor khalhtu angin, zilhna thute chu pawma nunpuiin, hma lam i pan zêl ang u.—Thuf. 4:26, 27; Hebrai 12:12, 13 chhiar rawh.
(Hebrai 12:6, 7) Lalpa chuan a hmangaih chu a thunun ṭhîn a, fa a lawm apiang chu a vaw ṭhin a sin ni,” tih hi. 7 In tuar hi nangmahni thunun nân a ni; fate chunga tih angin Pathianin in chungah a ti a nih hi; pa thunun loh fa tu nge awm ngai le?
w12-E 7/1 21 ¶3
“In Ṭawngṭai Chuan Heti Hian Ti Ang Che U, ‘Kan Pa,’”
Hmangaihna nei tak pa chuan a fate chu mi eng ang nge an nih dâwn tih a ngaihtuah avângin, anni chu a zilh ṭhîn a ni. (Ephesi 6:4) Chutiang pa chu mi khauh tak a ni thei a; mahse, a fate chu râwng takin a zilh ngai lo. Chutiang bawkin, vâna kan Pa chuan zilh kan ngaih châng a awm tih a hria a. Mahse, ani chuan hmangaihna nei takin min zilh ṭhîn a, min hau ngai lo. A Pa ang bawkin, Isua chu a zirtîrte’n a zilhna pêk an chhân lêt nghâl loh hunah pawh an chungah a râwng ngai lo a ni.—Matthaia 20:20-28; Luka 22:24-30.
(Hebrai 12:11) Tin, thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn; tuar hnuah erawh chuan, chumia sawizawia awmte tân chuan rah thlamuanawm tak, felna chu a chhuahsak ṭhîn.
“Thununna Chu Ngaithla Ula, Fing Rawh U”
18 Thununna chu a na mai thei a; mahse, Pathian thununna hnâwlnain a rah chhuah chu, chu aiin a na zâwk a ni. (Hebrai 12:11) Kaina leh Lal Zedekia te entawn tûr ṭha lo tak siam aṭangin kan inzir thei a. Kaina’n a unaupa a hua a, thah a duh tih Pathianin a hriat chuan, a hnênah: “Engati nge i thin a ur? Engati nge i hmêl a lo dur tâk? Thil i tih ṭhat chuan lawm i hlawh dâwn lo vem ni? I tih ṭhat loh erawh chuan sual chu kawngka bulah a bawk reng a ni: a duhzâwng chu nangma hnên lam a ni ang a, a chungah thu i nei tûr a ni,” tiin a vaukhân a. (Genesis 4:6, 7) Kaina chuan Jehova thununna hnâwlin, a unaupa a that a, a sawhkhâwk râpthlâk takte chu a dam chhûngin a tuar a ni. (Genesis 4:11, 12) Kaina’n Pathian thu ngaithla ta se chuan chutianga râpthlâk chu a tuar lo vang.
Thlarau Lam Lunghlute Laih Chhuahna
(Hebrai 12:1-2) Chutichuan, chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u. Ani chuan a hmaa hlimna awm avâng chuan, mualphona chu ngainêpin kraws chu a tuar a, Pathian lalṭhutphah ding lamah khian a han ṭhu ta a.
Intlânsiaknaah Chhel Takin Tlân Rawh
11 Paul chuan Kristian hun hmaa Jehova chhiahhlawhte chu ‘min hual vêltu chhûmpui nasa tak ang thlîrtute’ angin a sawi a. Anni chu an thih thlengin an rinawm a, an entîrna chuan Kristiante chu dinhmun hrehawm tak hnuaiah pawh Jehova lakah an rinawm reng thei tih a târ lang. ‘Chhûmpui ang thlîrtute’ chu an intlânsiakna hlen tawh intlânsiak mi an ni a. An entîrna siam chuan mi dangte chu tlân zêl tûrin a fuih ang. Intlânsiaknaa kan tel laiin chutiang mite’n min thlîrin tlân zêl tûrin min fuih a ni tih kan hriat chuan theih tâwp kan chhuah ve ngei ang. Chuvângin, Hebrai Kristiante tân hun kal tawha Jehova chhiahhlawhte entîrna siam ngaihtuah chu a ngai a ni. Chu chuan huaisenna pein, ‘chhel taka tlân zêl a,’ intlânsiakna an hlen theihzia a hriattîr thei si a. Chutiang chu kan tân pawh a ni ve thei a ni.
(Hebrai 13:9) Zirtîrna tinrêng leh zirtîrna mak tak len bovin awm suh u; thinlung hi khawngaihnaa tihngheha a awm chu a ṭha si a, ei tûrtea tihngheha awm lovin; chutiang kawng lungkhamte chuan chûngah chuan sâwtna an hmu chuang lo.
w89-E 12/15 22 ¶10
Jehova Lawm Zâwng Inthawinate Hlân Rawh
10 Chuvângin, Hebrai mite chuan Mosia Dân zawm phûttu Judate “Zirtîrna tinrêng leh zirtîrna mak tak” chu an hnâwl a ngai a. (Galatia 5:1-6) Chûng zirtîrnate vâng ni lovin, ‘thinlung hi Pathian khawngaihnaa tihngheha’ a awm avângin thutakah nghet takin kan awm reng thei a ni. Paula’n thinlung hi “ei tûrtea tihngheha awm lovin; chutiang kawng lungkhamte chuan chûngah chuan sâwtna an hmu chuang lo” tia a sawi avângin, mi ṭhenkhat chu ei tûrte leh inthawinate chungchângah an inhnial niin a lang. Thlarau lam hlâwknate chu ei tûr ṭhenkhat leh ni bîkte serh chungchânga ṭûl lo taka lungkhamna aṭanga neih theih ni lovin, Pathiana inpumpêkna leh tlanna ngaihhlutna aṭanga neih theih a ni. (Rom 14:5-9) Chu bâkah, Krista inthawina chuan Levia mite inthawinate chu engmah lovah a chantîr a ni.—Hebrai 9:9-14; 10:5-10.
Bible Chhiar
(Hebrai 12:1-17) 1-2 Chutichuan chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u. Ani chuan a hmaa hlimna awm avâng chuan, mualphona chu ngainêpin kraws chu a tuar a, Pathian lalṭhutphah ding lamah khian a han ṭhu ta a. 3 Tin thlarau lamah in inthlahdah a, in lo hah loh nân, anmahni chunga ṭha lo tûrin mi sualte chutianga hnialkalhna tuartu chu ngaihtuah teh u khai. 4 Sual dovin thisen chhuak khawpin in la ṭang lo va, 5 fuihna thu, fate zilh anga zilhna che u kha, in lo theihnghilh ta e. “Ka fa, Lalpa thununna chu ngainêp suh la, a zilhhauva i awmin inthlahdah hek suh; 6 Lalpa chuan a hmangaih chu a thunun ṭhîn a, fa a lawm apiang chu a vaw ṭhin a sin ni,” tih hi. 7 In tuar hi nangmahni thunun nân a ni; fate chunga tih angin Pathianin in chungah a ti a nih hi; pa thunun loh fa tu nge awm ngai le? 8 Fa zawng zawng hlawh ṭhin thununna chu hlawh lova in awm erawh chuan fa tak ni lovin, sâwn in ni a ni ang asin. 9 Chu lo pawh chu min thunun tûrin kan tisa pate kan neih kha, chûngte chu kan zah si a; chumi aia nasa zâwkin, kan nunna tûrin thlaraute Pa thu thuin kan awm dâwn lâwm ni? 10 Anni chuan ni rei lo tê, ṭha an tih ang zêlin min thunun ngei tak a, ani erawh chuan a thianghlimna chu kan chan ve theih nân, kan ṭhatna tûrin min thunun zâwk ṭhîn a ni. 11 Tin, thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn; tuar hnuah erawh chuan, chumia sawizawia awmte tân chuan rah thlamuanawm tak, felna chu a chhuahsak ṭhîn. 12 Chutichuan kut uai thlate chu char rawh u, khûp zawite nên; 13 tin, kebai chu tihpelhsawlh lohva, tihdamin a awm zâwk nân, in kete tân kawng ngîlte siam rawh u. 14 Mi zawng zawng nêna inremna leh thianghlimna ûm rawh u, chumi thianghlimna lovin tuman Lalpa an hmu lo vang: 15 Fîmkhur rawh u; chuti lo chuan, Pathian khawngaihna ata in bo dah ang e, khâkna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang a, 16 inngaih hmang emaw, Esauva anga Pathian zah lo mi emaw an lo awm dah ang e. Ani chuan a fa tîr nihna chu chaw vawi khat eiah a hralh a. 17 Chumi hnuah chuan malsâwmna chu rochun a duh pawhin, mittui tla chungin ṭhahnemngai takin zawng mah sela, rilru inlamlêtna remchâng a hmuh loh avângin paihin a awm ta tih in hre si a.
SEPTEMBER 30–OCTOBER 6
PATHIAN THU AṬANGA RO HLUTE | JAKOBA 1-2
“Sual leh Thihna Kawng”
(Jakoba 1:14) Mi tin mahni châknaa hruai bo leh hîpa an awm chuan thlêmna an tâwk a ni zâwk e.
g17.4-E 14
Thlêmna
Thil engemaw—a bîk takin, thil dik lo engemaw tih châkna i neih chuan thlêmna i tâwk a ni. Entîr nân, dâwra i kal laiin, thil mit la tak mai i hmu a. Tu ma hmuh lovin awlsam taka rûk theih a ni tih ngaihtuahna a lo lût nghâl a. Mahse, i chhia leh ṭha hriatna chuan a phal lo! Tichuan, i rilrua ngaihtuahna lo lût chu hnâwlin i kal chhuak ta a. Chutah chiah chuan, thlêmna chu a zo ta a, hnehna changtu i ni ta ni.
BIBLE SAWI DAN
Thlêma i awm avângin mi sual i ni tihna a ni lo. Bible chuan kan zain thlêmna kan tâwk ṭheuh tih a sawi a. (1 Korinth 10:13) Thil pawimawh zâwk chu thlêmna kan chhân lêt dân hi a ni. Mi ṭhenkhat chuan an rilrua lo lût châkna sual chu ngaihtuah chhunzawmin, a hnuah thil sual an ti ta mai ṭhîn a. Mi dangte erawh chuan chutiang châkna sual chu an hnâwl nghâl vat a ni.
“Mi tin mahni châknaa hruai bo leh hîpa an awm chuan thlêmna an tâwk a ni zâwk e.”—Jakoba 1:14.
(Jakoba 1:15) Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn.
g17.4-E 14
Thlêmna
Bible chuan thil sual tihna lama hruaitu rahbite chu a târ lang a. Jakoba 1:15-na chuan: “Châkna [sual] chuan no a pai a, sual a hring ṭhîn,” tiin a sawi a ni. A awlsam zâwnga sawi chuan, châkna sual kan ngaihtuah reng hian, nu nau paiin matheilova fa a hring angin, kan ngaihtuahna chu a takin a lo lang chhuak ṭhîn a. Mahse, châkna sual bâwiha awm chu kan pumpelh theiin, kan hneh thei a ni.
Thlarau Lam Lunghlute Laih Chhuahna
(Jakoba 1:17) Thilpêk ṭha leh thilpêk famkim zawng zawng chu, chung lam aṭangin êngte Pa hnên ata a lo chhuk ṭhîn a ni, amahah chuan danglamna leh herna hlim rêng rêng a awm thei lo.
it-2-E 253-254
Eng
Jehova chu “êngte Pa” a ni a. (Jak. 1:17) Ani chu “chhûn tiêng tûra nî petu, thla leh arsite tâna dânte ruatsaka, zân tiêng tûra petu” chauh ni lovin, (Jer. 31:35) thlarau lam êng lo chhuahna Hnâr pawh a ni bawk. (2 Kor. 4:6) A dân te, a rorêlna te, leh a thute hmanga a kaihhruaia awm duhte tân chuan chûngte chu êng a ni. (Sâm 43:3; 119:105; Thuf. 6:23; Is. 51:4) Fakna hla phuahtu chuan: “I êngah chuan êng kan la hmu ang,” tiin a sawi a. (Sâm 36:9; Sâm 27:1; 43:3 nên khaikhin rawh.) Ni êng chu khawvâr tirh aṭanga “êng fîm tak” a nih thlenga, a êng zual deuh deuh angin, mi felte kawng chu Pathian finnaa tihêna awmin, a êng zual deuh deuh a ni. (Thuf. 4:18) Jehova min kawhhmuh kawnga kal tûr chuan a ênga kan kal a ngai a. (Is. 2:3-5) Kawng leh lamah, miin a thianghlim lo zâwngin emaw, châkna sual neiin emaw thilte a en chuan thlarau lam thim chhah takah a awm a ni. Isua’n: “I mit a chhiat erawh chuan i taksa a pumin a thim zo vek ang. Chutichuan i chhûnga êng chu thim ni sela, thim chu a va nasa dâwn êm!” tia a sawi ang khân.—Mt. 6:23; Deut. 15:9; 28:54-57, nên khaikhin rawh; Thuf. 28:22; 2 Pet. 2:14.
(Jakoba 2:8) Nimahsela, Pathian Lehkha Thu, “Nangmah i inhmangaih angin i vêngte i hmangaih tûr a ni,” tih lal dân hi in zawm chuan in ti ṭha e;
it-2-E 222 ¶4
Dân
“Lal Dân.” Lalin mite a dâwr huna a zawm tûr “lal dân” chu mihring inlaichînna thununtu dân dangte zînga langsâr ber leh, pawimawh ber a ni. (Jak. 2:8) Dân thuthlungin a tum ber chu hmangaihna a ni a; “nangmah i inhmangaih angin i vêngte pawh i hmangaih tûr a ni,” (lal dân) tih hi Dân thu leh Zâwlneite thu zawng zawng khaikhâwmtu thupêk pahnihna a ni. (Mt. 22:37-40) Kristiante chu Dân thuthlung hnuaiah awm tawh lo mah se, Lal Jehova leh thuthlung thar nêna inzawmna nei, a Fapa Lal Isua Krista dân hnuaiah an awm a ni.
Bible Chhiar
(Jakoba 2:10-26) Tu pawhin Dân zâwm kim mah sela, kawng khata a tihsual si chuan, a zaah chuan thiam loh changin a awm tawh a ni. 11 “Uire suh,” titu chuan, “Tual that suh,” a ti bawk si a. Chutichuan, uirê lo mah la, tual i thah si chuan Dân bawhchhetu i ni rêng rêng tawh a ni. 12 Chuvângin, zalênna dâna rorêlsak tûrate angin thu sawi ula, thil ti bawk rawh u. 13 Mi chunga khawngaihna nei lo chu khawngaihna tel lovin rorêlsakin a awm ang; khawngaihna hi rorêlna aiin a chungnung zâwk a ni. 14 Ka unau te u, miin, “Rinna ka nei,” ti mah sela, thiltih a neih si loh chuan engnge sâwt ang? Chutiang rinna chuan amah a chhandam thei ang em ni? 15 Unaupa emaw, unaunu emaw, saruaka awmin an ni tin chaw tlachham se la, 16 tin, in zînga tuin emaw an hnênah, “Thlamuang takin kal ula lum tak leh puar takin awm rawh u,” ti ula, taksa tâna thil châkkhai chu in pêk si loh chuan engnge sâwt ang? 17 Chutiang bawkin rinna chu thiltih nei lovin amah chauhvin a awm chuan thi a ni. 18 A ni, mi tuin emaw, “Nangin rinna i nei a, keiin thiltih ka nei a ni; i rinna chu i thiltih tel lovin mi entîr rawh, tin, keiin ka thiltihin ka rinna ka entîr ang che. 19 Pathian chu pakhat a ni tih i ring a ni maw? I ti ṭha e; ramhuaite pawhin an ring a, an khûr ṭhîn asin,” a ti ang. 20 Aw mi lawilopa, thiltih tel lova rinna mai chu engmah a ni lo tih i hre duh em le? 21 Min thlahtu Abrahama chuan a fapa Isaaka maichâm chunga a hlan lai khân thiltih avângin thiam a chang a ni lâwm ni? 22 Rinna chuan a thiltih nên a thawk dûn a; tin, thiltih avângin a rinna chu a famkim ta tih i hria e. 23 Pathian Lehkha Thu, “Abrahama chuan Pathian a ring a, chu rinna chu a felnaah ruat a ni,” tih thu kha a lo hlawhtling a; tichuan, Pathian ṭhianah vuahin a awm ta a. 24 Rinna avâng ngawt ni lovin, thiltih avâng zâwkin miin thiam a chang ṭhîn tih in hre ta. 25 Chutiang bawkin Rahabi nawhchizuar pawh khân enthlatute kha a lo lâwm a, kawng danga a hâwntîr lai khân thiltih avângin thiam a chang a ni lâwm ni? 26 Thlarau tel lovin taksa chu thi a ni a, chutiang bawkin thiltih tel lovin rinna pawh chu thi a ni.