Hmanhmawh Lehzuala Kan Ngaihven A Ngai

“Chutichuan ngaihven rawh u, eng niah nge in Lalpa a lo kal dâwn in hre si lo.”​—MATTHAIA 24:42.

1, 2. Engin nge tûn lai khawvêl tâwpna hunah kan awm tawh tih târ lang?

“KUM zabi sawmhnihna chu indona hian a thunun ber a ni,” tiin lehkhabu ziaktu Bill Emmott-a chuan a sawi a. Ani chuan mihringte’n englai pawhin indona leh tharum thawhna an tawng reng tih a pawm a; mahse, heti hian a sawi belh a ni: “Kum zabi sawmhnihna hi thiltawn lamah chuan kum zabi dang lakah danglam bîk lo mah se, a nasat lamah chuan a danglam hle a ni. Chu chu khawvêl pum huap indona lo chhuahna kum zabi hmasa ber a ni a . . . Tin, a nemnghehna tûr ang hrimin, chutiang khawvêl indopui pakhat mai ni lo, pahnih lai a thleng a ni,” tiin.

² ‘Hnam hrang leh hnam hrang; ram hrang leh ram hrang’ indonate chu Isua Krista’n a lo sawi lâwk vek a. Mahse, chûngte chu ‘Krista lo awm lehna leh khawvêl tâwpna chhinchhiahna’ pêng pakhat mai a ni. A hrilh lâwkna ropui takah hian, Isua chuan ṭâm tlate, hri lêngte, leh lîrnghîngte pawh a sawi tel a ni. (Matthaia 24:​7, 8; Luka 21:​6, 7, 10, 11) Kawng tam takin hetiang chhiatnate hi a pungin, a nasa telh telh a ni. Pathian leh mahni mihringpuite chunga an rilru put hmanga a lan angin, mihringte sualna chu a nasa ta hle. Nungchang chhiatna, leh dân bawhchhiatna leh tharum thawhna te a punzia chu a lang chiang hle a ni. Mite chu Pathian hmangaih aia tangka sum ngainatute an lo ni a, nawmsip bâwlin an buai reng a. Hêng zawng zawngte hian “hun khirh takte” kârah kan awm tih a târ lang a ni.​—2 Timothea 3:​1-5.

3. Engtin nge “hun chhinchhiahna” hian min nghawng ang?

³ Engtin nge mihring chanchin chhe tawlh tawlhte chu i thlîr le? Tam tak chuan tûn lai thilthleng lungchhiatthlâk tak takte hi an ngaimawh lovin, an pawisa lo hial a. Mi liante leh mi fingte chuan “hun chhinchhiahna” an hmu thiam lo va; sakhaw hruaitute lahin he mi chungchângah hian kaihhruaina ṭha an pe bawk hek lo. (Matthaia 16:​1-3) Mahse, Isua chuan a hnungzuitute chu: “Chutichuan ngaihven rawh u, eng niah nge in Lalpa a lo kal dâwn in hre si lo,” tiin a fuih a ni. (Matthaia 24:42) Hetah hian Isua chuan a châng chânga ngaihven mai ni lovin, ngaihven reng tûrin min fuih a ni. Ngaihven reng tûr chuan kan harhfîmin kan harhvâng reng tûr a ni. Chutianga awm tûr chuan ni hnuhnûngah kan awm tawh tih hriat mai leh tûn hi hun khirh a ni tih hriat mai bâk a ngai a. “Thil zawng zawng tâwpna chu a hnai tawh” tih kan rin ngheh tlat a ngai a ni. (1 Petera 4:7) Chutianga kan awm chauhvin hmanhmawh lehzualin kan ngaihven a ni ang. Chuvângin, zawhna kan ngaihtuah tûr chu: ‘Engin nge tâwpna a hnai tawh tih kan rinna tinghet tûrin min ṭanpui ang?’ tih hi a ni.

4, 5. (a) He khawvêl suaksual tâwpna a hnai tawh tih kan rinna chu engin nge tichak ang a, engvângin nge? (b) Nova dam lai leh Pathian Fapa lo awm lehna inanna pakhat chu eng nge ni?

⁴ Mihring chanchina thilthleng dangdai ber mai​—Nova hun laia Tuilêt ropui tak​—a thlen hmaa thil awm dân kha ngaihtuah teh. Mite chu an sual êm avângin Jehova chuan “rilru nat nân a hman phah a.” Heti hian a puang a ni: “Ka mihring siam hi lei chung ata ka tiboral teh mai ang” tiin. (Genesis 6:​6, 7) A puan ang ngei chuan a ti ta rêng a. Nova hun lai leh kan hun lai khaikhinin, Isua chuan: “Nova dam lai ang bawk kha Mihring Fapa lo kal lehna [“awm lehna,” NW] chu a ni ang,” tiin a sawi a ni.​—Matthaia 24:37.

⁵ Jehova chuan kan tûn lai khawvêl hi Tuilêt hmaa khawvêl a thlîr ang bawkin a thlîr ang tih rin chu a âwm hle a ni. Nova hun laia Pathian ngaihsak lo khawvêl chu a tihboral avângin, tûn laia khawvêl suaksual tak pawh hi a tiboral ve ngei ngei dâwn a ni. Nova hun lai leh kan hun lai inannate hriatthiamna fiah tak kan neihna chuan khawvêl tâwpna a hnaih tawhzia kan rinna chu a tinghet ang. A nih leh, engahte nge a inan le? A lo berah inanna kawng nga lai a awm a ni. A hmasa ber chu, chhiatna lo thleng tûr vaukhânna chiang taka pêk a ni hi a ni.

“Thil Lo La Lang Lote” Chungchânga Vaukhânna

6. Nova hun laiin Jehova’n eng vaukhân lâwkna nge a pêk mai theih?

⁶ Nova hun laiin Jehova chuan: “Ka thlarau chuan mihring chu kumkhuain a bei fo lo vang, anni pawh chu tisa an ni si a: nimahsela kum za leh kum sawmhnih chu an la dam ang,” tiin a puang a. (Genesis 6:3) He Pathian thupêk chhuah a nih hun, B.C.E. 2490 chu chutih hun laia Pathian ngaihsak lo khawvêl tâwpna bul inṭanna a ni. Chutih hun laia chêngte tâna chu thupêk pawimawhna chu han ngaihtuah teh! Chu hun aṭanga kum 120 lekah Jehova chuan ‘nunna thaw pai rêng rêng chu vân hnuai ata tiboral tûrin leiah hian tui a tilêt’ dâwn a, chu chu a hnuah Nova hnênah a hriattîr ni âwm tak a ni.​—Genesis 6:17.

7. (a) Tuilêt chungchânga vaukhânna chu engtin nge Nova’n a chhân lêt? (b) Engtin nge he khawvêl tâwpna tûr chungchâng vaukhânna hi kan chhân lêt ang?

⁷ Nova chuan chhiatna lo thleng tûr ata vaukhânna chu kum sâwmbi engemaw zâta hmain a dawng a, chûng hunte chu dam khawchhuah nâna lo inbuatsaih nân ṭha takin a hmang a ni. Tirhkoh Paula chuan, “Thil lo la lang lote kawng thu-ah Pathian hrilha lo awmin, [Nova chuan] Pathian ṭih dêkin, a chhûngte chhandam nân lawng a tu” tih a sawi a. (Hebrai 11:7) Eng nge kan tih ve? Kum 1914-a he khawvêl kalhmangte ni hnuhnûnga kan luh ṭan aṭangin kum 90 dâwn lai a liam tawh a. “Tâwpna hun” chhûngah kan awm tak tak tawh a ni. (Daniela 12:4) Engtin nge vaukhânna kan dawn chu kan chhân lêt ang? Bible chuan: “Pathian duhzâwng titute erawh chu kumkhuain a awm reng ang,” a ti. (1 Johana 2:17) Chuvângin, tûn hi nasa taka hmanhmawh lehzuala Jehova duhzâwng tih hun a ni.

8, 9. Eng vaukhânnate nge Jehova’n tûn laiah a pêk a, chûngte chu engtin nge puan chhuah a nih?

⁸ Tûn laiah chuan, tih tak zeta Bible zirtute chuan Pathian thâwk khum Lehkha Thute aṭangin he khawvêl hi tihchhiat a ni dâwn tih an hria a. Chu chu kan ring em? Isua’n chiang taka a sawi hi lo chhinchhiah teh: “Chu mi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” tih hi. (Matthaia 24:21) Isua chuan Pathian ruat rorêltu angin a lo kal ang a, berâm puin kêl zîng ata berâmte a hlîr angin mite a hlîr dâwn tih pawh a sawi bawk. Chuta tling lova ngaihte chu “kumkhaw hremnaah an kal ang a; mi felte erawh chu kumkhaw nunnaah an kal ang.”​—Matthaia 25:​31-33, 46.

⁹ Jehova chuan “bawi rinawm, fing tak” pêk chhuah a hun apianga thlarau lam chawte hmangin, a mite hmaah hêng vaukhânnate hi a dah a ni. (Matthaia 24:​45-47) Chu bâkah, hnam tinrêng te, chi tinrêng te, ṭawng tinrêng te, mi tinrêng te chu ‘a rorêl hun a lo thlen tâk avânga Pathian hlau va, chawimawi’ tûrin kohkhâwm an ni. (Thu Puan 14:​6, 7) Jehova Thuhretute’n khawvêl zawng zawnga an hrilh Lalram chanchin pawimawh tak chu Pathian Lalramin mihringte rorêlna a tihchhiat thuai tûrzia vaukhânna a ni. (Daniela 2:44) He vaukhânna hi ngaihnêp tûr a ni hauh lo. Pathian Engkimtitheia chuan a thutiamte a hlen lo ngai si lo va. (Isaia 55:​10, 11) Nova hun laiin a hlen a, kan hunah pawh a hlen ngei dâwn.​—2 Petera 3:​3-7.

Mipat Hmeichhiatna Lama Sualna A Hluar

10. Nova hun laia mipat hmeichhiatna lama sualna chungchâng eng nge sawi theih awm?

¹⁰ Kan hun lai leh Nova hun lai hian inanna dang a nei a. Jehova chuan mipa leh hmeichhe hmasa ber hnênah Pathian pêk chi thlah theihna chu nupa inkârah ṭha taka hmangin, chi thlaha “leilung hi luah khat” tûrin thu a pe a ni. (Genesis 1:28) Nova hun laiin, thuâwih lo vântirhkohte chuan dân lo ang taka mipat hmeichhiatna hmangin mihring nihna chu an tibawlhhlawh a. Mihring taksa puin leiah an lo chhuk a, hmeichhe hmêlṭha tak takte nên mipat hmeichhiatna an hmang a, a chanve mihring, a chanve ramhuai​—Milianho [Nephilim-ho]​—chu an lo piang ta a ni. (Genesis 6:​2, 4) Hêng vântirhkoh hur takte sualna chu Sodom leh Gomorra mite nungchang bawlhhlawhna nên tehkhin a ni. (Juda 6, 7) Chuvângin, mipat hmeichhiatna lama sualna chu chutih lai chuan a hluar hle a ni.

11. Eng nungchang lam dinhmunin nge Nova hun leh kan hun chu thuhmun nihtîr?

¹¹ A nih leh tûn lai nungchang lam dinhmun hi eng nge a an ve? Hêng ni hnuhnûngahte hian, mi tam takte nun chu mipat hmeichhiatnaah a innghat a. Chutiang mite chu Paula chuan ‘inhriat chhuah theihna rêng rêng nei tawh lo’ angin a sawi chiang hle a; mi tam takte chu “thil bawlhhlawh tinrêng duhâm taka ti tûrin hurnaah an inpumpêk” a ni. (Ephesi 4:19) Zahmawh lam thil te, inneih hmaa mipat hmeichhiatna hman te, mipat hmeichhiatna lama naupang suasam te, leh mawngkawhurnate hi a tam tawh hle a. Ṭhenkhat chuan mipat hmeichhiat hmanna aṭanga inkaichhâwn theih natnate, chhûngkaw kehdarhna te, leh harsatna dang dangte tâwkin “an sual man hmuh tûr chu . . . an hmu” tawh a ni.​—Rom 1:​26, 27.

12. Engvângin nge sual huatna kan neih a ngaih?

¹² Nova hun laiin, Jehova chuan Tuilêt nasa tak thlentîrin, mipat hmeichhiatna âtchilh khawvêl chu a titâwp a ni. Kan tûn lai hun hi Nova hun lai ang chiah a ni tih kan theihnghilh ngai tûr a ni lo. “Hrehawm nasa tak” lo thleng tûr chuan lei ata ‘inngaih hmangte emaw, uirête emaw, mi hurte emaw, mawngkawhurte emaw’ chu a thianfai vek dâwn a ni. (Matthaia 24:21; 1 Korinth 6:​9, 10; Thu Puan 21:8) Sual huatna neih leh nungchang bawlhhlawhnaa min hruai thei dinhmun rêng rêng hawisan chu a va hmanhmawhthlâk êm!​—Sâm 97:10; 1 Korinth 6:18.

Lei Hi “Inpâwngnêknain A Khat Zo Ta”

13. Nova hun lai khân, engvângin nge lei chu ‘inpâwngnêknaa a khah’?

¹³ Nova hun laia thilthleng dang chungchângah Bible chuan heti hian a sawi a: “Lei hi Pathian mithmuhin a chhe zo tawh a, lei hi inpâwngnêknain a khat zo ta bawk a,” tiin. (Genesis 6:11) A nihna takah chuan inpâwngnêkna emaw, tharum thawhna emaw hi thil thar a ni hauh lo. Adama fapa Kaina chuan a unaupa fel tak chu a that a ni. (Genesis 4:8) Lameka chuan a hun laia inpâwngnêkna hluarzia târ langin hla a phuah a, chu hla chu mahni inhumhim nâna tlangvâl a thah a uanpuina thu a ni. (Genesis 4:​23, 24) Mahse, Nova hun laia thilthar chu inpâwngnêkna a nasat dân chu a ni. Pathian fapa vântirhkoh thuâwih lote’n leia hmeichhiate nupuiah an nei a, fa​—Milianho​—an neih chuan inpâwngnêkna leh tharum thawhna chu a hma zawng aiin a nasa a ni. Chûng nunrâwng tak milianho sawina atîra Hebrai thu mal chu “Titlutute”​—“mi dang tlûktîrtute” tihna a ni tih New World Translation chuan a târ lang. Chuvângin, lei chu “inpâwngnêknain a khat zo ta” a ni. (Genesis 6:13) Chutiang dinhmun hnuaia a chhûngte enkawlnaa Nova’n harsatna a tawh tûrte chu ngaihtuah teh. Chuti chung pawhin Nova chu “ṭhangthar zîngah hian [Jehova] mithmuhin mi fel tak” a ni.​—Genesis 7:1.

14. Eng chenin nge tûn lai khawvêl hi ‘inpâwngnêknaa a khah’?

¹⁴ Inpâwngnêkna emaw, tharum thawhna emaw chu mihring chanchin zawng zawngah a awm reng tawh a. Mahse, Nova hun lai ang bawkin, kan hun lai pawh hian inpâwngnêkna chu a tawng nasa zual a ni. In chhûng khura tharum thawhna te, misual beihna (terrorism) thiltih te, insâmna te, tum nei lêm lova silai chelek mite’n mipui tam tak an thah chanchin te kan hre fo va. Hêng zawng zawngte bâkah, indona avânga thisen chhuahna te a awm leh bawk a. Lei hi inpâwngnêkna emaw, tharum thawhna emawin a khat leh tawh a ni. Eng nge a chhan? Eng thilin nge tipung chiam le? A chhânna chuan Nova hun lai nêna inanna dang a târ lang a ni.

15. (a) Ni hnuhnûnga inpâwngnêkna a pun chhan hi eng nge ni? (b) A tâwpa lo thleng tûr eng nge kan rin tlat theih?

¹⁵ Kum 1914-a Pathian Messia Lalram vâna din a nih khân, chu Lalrama Lal, Isua Krista chuan hma pawimawh tak a la a. Diabol-Setana leh a ramhuaihote chu vân aṭangin leiah a paih thlâ a ni. (Thu Puan 12:​9-12) Tuilêt hma chuan, vântirhkoh thuâwih lote chuan mahni thuin an van awm hmun chu an kalsan a; mahse, tûnah chuan tharum hmanga hnawhchhuah luih an ni thung. Chu bâkah, tûnah chuan tisa nawmchenna chên tûrin mihringah an chang thei tawh lo bawk a ni. Chuvângin, an beidawn avâng te, an thinur avâng te, leh rorêlna lo thleng tûr chu an hlauh avâng tein mite leh pâwlte chu Nova hun lai aia nasain inpâwngnêkna leh dân bawhchhiatna lama tel tûrin an thunun a ni. Jehova chuan Tuilêt hmaa khawvêl chu vântirhkoh thuâwih lote leh an thlahte’n suahsualnaa an tihkhah hnu chuan a tiboral daih a. Chuvângin, kan hunah pawh chutiang bawkin a ti leh ngei dâwn tih hre reng rawh! (Sâm 37:10) Mahse, tûn laia ngaihven renga awmte chuan an chhandamna a hnai tih an hria a ni.

Thuchah Chu Puan A Ni

16, 17. Nova hun lai leh kan hun lai inanna a palina chu eng nge ni?

¹⁶ Tuilêt hma leh tûn lai hun inanna a palina chu, Nova tâna tuk sak a hna aṭangin a hmuh theih a ni. Nova chuan lawng lian tak a tuk a. “Thu hriltu” pawh a ni bawk. (2 Petera 2:5) Eng thu nge a hril? Nova thu hrilhah chuan inlamlêt tûra ngenna leh chhiatna lo thleng tûr laka vaukhânna a tel a rinawm hle. Mahse, Nova hun laia mite chuan “tui a lo lêt a, an zaa a lâk bo vek hma loh chuan engmah an hre lo” tih Isua chuan a sawi a ni.​—Matthaia 24:​38, 39.

¹⁷ Chutiang bawkin, Jehova Thuhretute chuan thu hril tûra rawngbâwlna an neih chu taima takin an hlen chhuak a, Pathian Lalram chu khawvêl pum puiah puan chhuah mêk a ni. Khawvêl hmun tin deuhthawa mite chuan Lalram thuchah chu anmahni ṭawng ngeiin an hre theiin, an chhiar thei tawh a ni. Vênnainsâng magazine, Jehova Lalram puanchhuahna tih chu bu 25,000,000 chuanga chhut chhuah a ni a, ṭawng chi hrang 140 aia tama chhut a ni. Ni e, Pathian Lalram chanchin ṭha chu “hnam zawng zawng hriattîrna tûrin khawvêl zawng zawngah hrilhin a awm” tawh rêng a ni. Chu hna chu Pathian lungawi thlenga thawh a nih hunah chuan, tâwpna a lo thleng ngei ngei ang.​—Matthaia 24:14.

18. Engtin nge mi tam takin kan thu hrilh an chhân lêt dân leh Nova hun laia mi tam takin an chhân lêt dân chu a inan?

¹⁸ Tuilêt hmaa mite thlarau lam leh nungchang lama an bawlhhlawhzia han ngaihtuah chuan, Nova chhûngkuain an ṭhenawm ringlo tute nuihzatbûr leh sawichhiatna an tawrh nasat dân tûr chu ngaihruat thiam a har lo. Mahse, tâwpna chu a lo thleng ta ngei a ni. Chutiang bawkin, ni hnuhnûngahte hian “nuihsantute” an tam êm êm a. “Nimahsela Lalpa nî chu rûkru angin a lo thleng ngei ang” tiin Bible chuan a sawi. (2 Petera 3:​3, 4, 10) A hun tiamah tak chuan a lo thleng ngei dâwn a. A tlai lo vang. (Habakuka 2:3) Ngaihven renga kan awm chu a va finthlâk êm!

Tlêmtê Chauh An Dam Khawchhuak

19, 20. Tuilêt leh kan khawvêl tihchhiatna inkârah inanna eng nge kan hmuh?

¹⁹ Nova hun lai leh kan hun lai inanna chu mipuite suahsualna leh tihboralnaah a tâwp mai lo. Tuilêta dam khawchhuak an awm ang bawkin, tûn lai khawvêl a tâwp hunah pawh dam khawchhuak an awm dâwn a ni. Tuilêta dam khawchhuakte chu mi nâwlpuite anga nung ve lo, thuhnuairawlhte an ni a. Anni chuan Pathian vaukhânna thu chu an ngai pawimawh a, chutih hun laia khawvêl suaksual tak lakah chuan an inla hrang a ni. Bible chuan: “Nova erawh chuan LALPA mit a tlung a,” a ti a. “A dam rualpuite zîngah chuan sawisêlbo a ni,” a ti bawk. (Genesis 6:​8, 9) Mihring zawng zawng zîngah chhûngkaw pakhat, “mi tlêm tê (chu chu mi pariat tihna a ni) tuia chhandamin an awm ta” a ni. (1 Petera 3:20) Tichuan, an hnênah Jehova chuan: “Chi tam tak thlaha lo pungin, lei hi luah khat rawh u,” tiin thu a pe a ni.​—Genesis 9:1.

²⁰ Pathian Thu chuan “mipui tam tak” chu “hrehawm nasa tak ata” an chhuak ang tih min tiam a. (Thu Puan 7:​9, 14) Mipui tam takte chu engzât nge ni ang? Isua ngei chuan: “Nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni,” a ti. (Matthaia 7:​13, 14) Tûna he khawvêla mihring awm tlûklehdingâwn ruk vêl nêna khaikhin chuan, hrehawm nasa tak lo thleng tûra dam khawchhuak tûrte chu tlêm tê chauh an ni ang. Mahse, Tuilêta dam khawchhuakte neih ang bawk chanvo chu an nei ve mai thei a. Dam khawchhuakte chuan khawvêl thar luahkhat tûrin engemaw chen chu fa an nei thei mai thei a ni.​—Isaia 65:23.

“Ngaihven Rawh U”

21, 22. (a) Engtin nge Tuilêt chungchâng thuziak ngaihtuahna chu i hlâwkpui? (b) Kum 2004 atâna kum châng chu eng nge ni a, engvângin nge a thurâwn pêk chu kan ngaih pawimawh ang?

²¹ Tuilêt chu kan tân chuan hmân lai thil ang ni mah se, kan ngaihthah miah loh tûr vaukhânna min pe a ni. (Rom 15:4) Nova hun lai leh kan hun lai inannate chuan tûn laia thilthleng mêkte pawimawhna min hriattîr lehzualin, mi suaksualte chunga rorêl tûra rûkru anga Isua lo kal hun tûr chu min ngaihventîr lehzual tûr a ni.

²² Tûn laiah, Isua Krista chuan thlarau lam in sakna ropui tak chu a kaihruai a. Pathian betu dikte him nân leh dam khawchhuah nân, lawng ang mai thlarau lam paradis chu a awm a ni. (2 Korinth 12:​3, 4) Hrehawm nasa tak laka dam khawchhuak tûr chuan, chu paradis-ah chuan kan awm reng tûr a ni. Chu thlarau lam Paradis chu Setana khawvêlin a hual vêl a, thlarau lama muthlu apiangte lem tûrin a inring reng a ni. Chuvângin, kan “ngaihven” reng a, Jehova nî atâna kan lo inrin reng chu a pawimawh êm êm a ni.​—Matthaia 24:​42, 44. (w03 12/15)

I Hre Chhuak Em?

• Isua’n a lo awm lehna chungchângah eng fuihna nge a pêk?

• Isua’n a lo awm lehna chu eng nên nge a tehkhin?

• Eng kawngin nge kan hun lai leh Nova hun lai a inan?

• Engtin nge Nova hun lai leh kan hun lai inannate ngaihtuahna chuan kan hmanhmawh duhna a nghawng?

[Phêk 18-naa thu lâk chhuah]

Kum 2004 kum châng tûr chu: “Ngaihven rawh u . . . Inring rengin awm rawh u,” tih a ni.​—Matthaia 24: 42, 44.

[Phêk 21-naa milem]

Nova chuan Pathian vaukhânna a ngai pawimawh. Keini kan ngai pawimawh ve em?

[Phêk 22-naa milem]

“Nova dam lai ang bawk kha Mihring Fapa lo kal lehna chu a ni ang”