ZIRLAI 28
I Tâna Jehova leh Isua Thiltih Avânga I Lâwmzia Lantîr Rawh
I ṭhian tuemawin thilpêk mawi tak a pêk che hian engtin nge i awm? Chu chuan a tihlim hle chein, i ṭhian hnênah chuan a thilpêk avânga i lâwmzia lantîr chu i duh ngei ang. Jehova leh Isua chuan thilpêk kan dawn theih azawnga hlu ber chu min pe a. Chu chu eng nge ni a, engtin nge kan lâwmzia kan lantîr theih?
1. Pathian leh Krista thiltih avânga kan lâwmzia lantîr theih dân kawng khat chu eng nge ni?
Bible chuan “[Isua] ring apiang” chu chatuanin an nung thei tih min tiam a. (Johana 3:16) Isua kan ring tih engtin nge kan lantîr? Kan rinna chu kan duhthlanna siamte leh kan thiltihte hmanga kan lantîr a ngai a. (Jakoba 2:17) Kan thiltih leh kan thusawia rinna kan lantîr hian Isua leh a Pa, Jehova nêna kan inṭhianna chu kan tinghet a ni.—Johana 14:21 chhiar rawh.
2. Eng thilthleng pawimawh takin nge Jehova leh Isua thiltihte avânga kan lâwmzia lantîr tûra min ṭanpui?
Isua chuan a thih hma zân khân a hnungzuitute chu a inthawina avânga an lâwmzia lantîr theih dân kawng dang a hrilh a. Bible-in “Lalpa Zanriah” tia a koh, Krista thih Hriatrengna ti pawha kan hriat hun pawimawh tak chu a hmêlhriattîr a ni. (1 Korinth 11:20) Isua chuan a tirhkohte leh a hnua Kristian dik rawn ni tûr zawng zawngte’n a nun a pe tih an hriat chhuah reng nân a thih Hriatrengna chu a hmêlhriattîr a ni. He hun pawimawh tak chungchângah Isua chuan heti hian thu a pe a ni: “Mi hriat reng nân hei hi ti ṭhîn rawh u,” tiin. (Luka 22:19) Hriatrengna inkhâwma i tel hian Jehova leh Isua min hmangaihna nasa tak avânga i lâwmzia i lantîr tihna a ni.
ZIR BELHIN HMUH BELH RAWH
Jehova leh Isua lantîr hmangaihna ropui tak avânga i lâwmzia lantîr theih dân kawng dangte chu bih chiang la. Krista thih Hriatrengna a pawimawhna chu ngaihtuah ang che.
3. Lâwmna thinlung chuan thil ti tûrin min chêttîr
Tuemawin i nunna a chhanhim angah han mitthla teh. I tâna a thiltih chu i theihnghilh mai ang em? Nge ni a, a thiltih avânga i lâwmzia lantîr theih dân kawng i zawng zâwk dâwn?
Jehova tâna nun kan bâ a. Johana thawn khat 4:8-10 chhiarin, hêng zawhnate hi sawiho vang che u:
Engvângin nge Isua inthawina chu thilpêk danglam tak a nih?
Engtin nge i tâna Jehova leh Isua thiltih chu i ngaih?
Engtin nge kan tâna Jehova leh Isua thiltihte avânga kan lâwmzia kan lantîr theih? Korinth thawn hnih 5:15 leh 1 Johana 4:11; 5:3 chhiar rawh. Bible châng târ lan pakhat in chhiar zawh apiangin, he zawhna hi sawiho vang che u:
He Bible châng ṭanchhan hian kan lâwmzia engtin nge kan lantîr theih?
4. Isua entawn rawh
Kan lâwmzia lantîr theih dân kawng dang leh chu Isua entawn hi a ni a. Petera thawn khat 2:21 chhiarin, he zawhna hi sawiho vang che u:
Eng kawngtein nge Isua hniak hnung i zui tlat theih?
Isua’n Pathian Thu a ngaina a, chanchin ṭha hrilin, mi dangte a ṭanpui
5. Krista thih Hriatrengnaah tel rawh
Lalpa Zanriah hmasa bera thil thlen dân hriat nân, Luka 22:14, 19, 20 chhiar la. Tichuan, hêng zawhnate hi sawiho vang che u:
Lalpa Zanriahah eng nge thleng?
Chhang leh uain chuan eng nge a entîr?—Châng 19 leh 20 en rawh.
Isua chuan a zirtîrte chu a thih champhaphâk nîah Lalpa Zanriah kum khatah vawi khat hmang tûrin a duh a. Chuvângin, Jehova Thuhretute chuan a thupêk angin Krista thih Hriatrengna chu kum tinin an hmangho ṭhîn a ni. He inkhâwm pawimawh tak chungchâng hriat nân, VIDEO chu chhuah la. Tichuan, a hnuaia zawhna hi sawiho vang che u.
Hriatrengna inkhâwmah eng nge thleng ṭhîn?
Chhang leh uain chu entîrna a ni a. Chhang chuan kan tâna Isua hlan a mihring taksa ṭha famkim a entîr a. Uain erawh chuan a thisen a entîr
MI ṬHENKHAT SAWI DAN: “Chhandam ni tûr chuan Isua ring la a tâwk.”
Engtin nge Johana 3:16 leh Jakoba 2:17-te chu rin mai a tâwk lo tih târ lan nân i hman theih?
KHAIKHAWMNA
Isua ringin leh a thih Hriatrengna inkhâwma telin kan tâna a thiltihte chunga kan lâwmzia kan lantîr.
Ennawnna
Isua ring tih awmzia chu eng nge ni?
I tâna Jehova leh Isua thiltihte avânga i lâwmzia chu eng anga lantîr nge i duh?
Engvângin nge Krista thih Hriatrengna inkhâwma tel chu a pawimawh êm êm?
HRIAT BELH NAN
Krista thihna chuan engti tûrin nge min chêttîr?
Rinna chungchâng leh kan lantîr theih dân zir belh rawh.
“Jehova Thutiamte Chu Ring Rawh” (Vênnainsâng, October 2016)
“Ka Nun Dân Pumhlûm Chu A Thianghlim Tawh Ni Hian Ka Hria,” tih nun kawng chanchinah, Krista inthawina awmzia hriatthiamnain nu pakhat nun a nghawng dân chhiar ang che.
Hriatrengna inkhâwma mi tlêm tê chauhvin entîrnate an ei in chhan ngaihtuah rawh.