Chhiartute Zawhna

Tirhkoh Johana’n “hmangaihna famkimin hlauhna a hnawt chhuak” tih a ziah khân, ‘hmangaihna famkim’ a tih chu eng a tihna nge ni a, eng “hlauhna” nge hnawh chhuah a nih?

Tirhkoh Johana chuan: “Hmangaihnaah chuan hlauhna rêng a awm lo: hmangaihna famkimin hlauhna a hnawt chhuak zâwk ṭhîn a ni, hlauhnaah chuan hremna a awm si a; a hlautu chu hmangaihnaah a la famkim lo a ni,” tiin a ziak a.​—1 Johana 4:18.

A chheh vêla thu awmte chuan Johana’n hlau lova thusawi theihna​—a bîk takin Pathian kan hmangaihna leh A hnêna zalên taka thusawi theihna​—chungchâng a sawi a ni. Chu chu châng 17-ah kan hmu: “He miah hian kan chungah hmangaihna a famkim tawh, rorêl nia hlau lova kan awm theihah hianin,” tiin. Kristianin ṭawngṭaia Pathian a pan hian zalên taka thusawi theihna emaw, sawi theih lohna emaw a neih chu Pathian a hmangaihna leh hmangaih lêt nia a inhriatnaah tlang takin a innghat a ni.

He ṭawngkam ‘hmangaihna famkim’ tih hian awmzia a nei hle a. Bible-in “famkim” tih ṭawngkam a hman hian ṭha famkim ṭhak sawina a ni reng ṭhîn lo va, ṭha famkim thawkhat sawina a ni ṭhîn. Entîr nân, Tlâng Chunga Thusawiah, Isua chuan: “In Pa vâna mi a ṭha famkim angin in ṭha famkim tûr a ni,” a ti a. Isua chuan a hnungzuitute hnênah anmahni hmangaihtute chauh an hmangaih lêt chuan, an hmangaihna neih chu a kim lo vang a, sawisêl a kai ang a ti. Anni chuan an hmêlmate pawh hmangaih telin an hmangaihna chu an tifamkim, a nih loh leh an tipumhlûm tûr a ni. Chutiang bawkin, Johana’n ‘hmangaihna famkim’ chungchâng a ziah hian, thinlung zawng zawng leh nun kawng zawng zawng huap Pathian hmangaihna chungchâng a sawi a ni.​—Matthaia 5:​46-48; 19:​20, 21.

Ṭawngṭaia Pathian a biak hian, Kristian chuan sual nei leh ṭha famkim lo a nih a inhre reng tûr a ni. Amaherawhchu, Pathian a hmangaihna leh hmangaih lêt nia inhriatna a neih tak zet chuan, hnâwl leh thiam loh chantîr hlauhnain a tibahlah lo vang. Chutih a hnêkin, a rilru phawrh chhuahna kawngah leh Isua Krista hmanga Pathian pêk sual ngaihdamna dîlna kawngah hlau lovin thu a sawi thei ang. A ṭawngṭainate chu Pathianin a ngaihthlâksak tih a ring tlat a ni.

Engtin nge mi chuan ‘hmangaihna famkim’ nei a, hnâwl leh thiam loh chantîr hlauhna a ‘hnawh chhuah’ theih ang? “Tupawh [Pathian] thu pawm erawh chu amahah chuan Pathian a hmangaihna a famkim tak zet tawh a ni,” tirhkoh Johana chuan a ti. (1 Johana 2:5) Ngaihtuah teh: Mi sual kan nih lai maha Pathianin min hmangaih chuan, kan inchhîr tak zet a, taima taka ‘a thu kan zawm’ chuan min hmangaih lehzual dâwn lâwm ni? (Rom 5:8; 1 Johana 4:10) Kan rinawm chhûng chuan, tirhkoh Paula neih ang rinna chu kan nei ve thei a ni; ani chuan Pathian chungchângah: “Ama Fapa ngei pawh zuah lova, kan zaa aia petu chuan thil zawng zawng pawh athlâwnin min pe tel lo vang em ni?” a ti.​—Rom 8:32. (w04 10/1)