ZIRLAI 26
Engvângin Nge Suahsualna leh Hrehawm Tawrhna A Awm?
“Engvângin nge?” Hei hi thil râpthlâk tak a thlen huna mite zawh fo ṭhin zawhna a ni a. Bible-in a chhânna fiah tak min pêk avângin kan va lâwm tak êm!
1. Engtin nge Setana’n khawvêlah suahsualna a awmtîr ṭan?
Diabol-Setana chu Pathian lakah a hel a. Ani chuan mi dangte chunga rorêl a duh avângin mihring hmasa ber Adama leh Evi chu Pathian laka hel tûrin a hmin a. Chu chu Evi hnênah dâwtthu hrilhin a ti a ni. (Genesis 3:1-5) Evi chu a tâna thil ṭha eng emaw pe phal lo angin Jehova chungah ngaih dân dik lo tak a siamtîr a. Pathian thu an âwih loh chuan mihringte chu an hlim zâwk dâwn a tihna a ni. Setana chuan Evi hnênah a thi dâwn lo tih hrilhin dâwt hmasa ber chu a sawi a. Chuvângin, Bible chuan Setana chu ‘dawthei leh dâwt pa,’ tiin a ko a ni.—Johana 8:44.
2. Adama leh Evi’n eng tih nge an thlan?
Jehova chu Adama leh Evi te chungah a thilphal hle a. An hnênah thing pakhat rah tih loh chu Eden huana thing rah zawng zawng an ei theih thu a hrilh a ni. (Genesis 2:15-17) Mahse, ei phal loh chu thing rah chu ei an tum ta ṭâlh a. A tâwpah Evi chuan “a rah ṭhenkhat chu a lo va, a ei ta a.” A hnuah, Adama pawhin “a ei ve ta” a ni. (Genesis 3:6) An pahnihin Pathian thu an âwih lo. Mi ṭha famkim an nih avângin an tân thil dik tih chu a harsa lo, thil pângngai tak a ni zâwk mah a. Mahse, duhrêng vângin Pathian thu an âwih lo va, thil sual tiin, a rorêlna chu an hnâwl ta a. Chu an thu tlûkna siam avâng chuan hrehawm nasa tak an tawrh phah a ni.—Genesis 3:16-19.
3. Engtin nge Adama leh Evi thu tlûkna siam chuan kan chungah nghawng a neih?
Adama leh Evi’n thil sual an tih khân, mi ṭha famkim lo an rawn ni a; tichuan, an ṭhat famkim lohna chu an thlah zawng zawngte hnênah an hlân chhâwng a ni. Adama chungchângah Bible chuan: “Mi pakhat avângin sual khawvêlah a lût a, sual avângin thihna a lût bawk a, . . . thihnain mi zawng zawng a fan chhuak ta a,” tiin a sawi.—Rom 5:12.
Chhan hrang hrang avângin hrehawm kan tuar ṭhîn. Thu tlûkna ṭha lote kan siam avânga hrehawm tawrh châng kan nei a. Mi dangte thu tlûkna ṭha lo siam avâng pawhin hrehawm tawrh châng kan nei bawk a. Chu bâkah, a hmun leh hun lova kan awm palh avânga hrehawm tawrh châng kan nei bawk a ni.—Thuhriltu 9:11 chhiar rawh.
ZIR BELHIN HMUH BELH RAWH
Pathian chu tûn lai khawvêla suahsualna leh hrehawm tawrhnate thlentîrtu a nih loh chhan leh hrehawm kan tawrh huna a awm dân ngaihtuah ang che.
4. Kan hrehawm tawrhnaa a mawhphurtu chu
Mi tam tak chuan khawvêl pum hlûm hi Pathian thununna hnuaia a awm an ring a. Chu chu a dik em? VIDEO chu chhuah rawh.
Ṭah Hla 3:33 leh 1 Johana 5:19 chhiarin, he zawhna hi sawiho vang che u:
Pathian chu suahsualna leh hrehawm tawrhnaah a mawhphurtu a ni em?
5. Setana rorêlna sawhkhâwk chu ngaihtuah rawh
Genesis 3:1-6 chhiarin, hêng zawhnate hi sawiho vang che u:
Setana’n eng dâwt thu nge a sawi?—Châng 4 leh 5 en rawh.
Engtin nge Setana’n Jehova chu mihringte hnêna thil ṭha eng emaw pe phal lo anga a târ lan?
Setana sawi ang ni sela, mihringte hian an hlim theih nân an chunga Rorêltu atân Jehova an mamawh em?
Thuhriltu 8:9 chhiarin, he zawhna hi sawiho vang che u:
Jehova chu he khawvêla Rorêltu a nih loh chhûng chuan eng thil nge thleng reng ang?
Adama leh Evi te chu mi ṭha famkim niin Paradis-ah an chêng a. Mahse, Setana thu âwihin, Jehova lakah an hel
Helna a chhuah hnuah khawvêl chu sualna, hrehawm tawrhna, leh thihnain a khat
Jehova chuan sualna, hrehawm tawrhna, leh thihna hi a titâwp dâwn a. Mihringte hi an rawn ṭha famkim leh ang a, lei Paradis-ah an chêng leh ang
6. Jehova’n kan hrehawm tawrhte a ngaihsak
Hrehawm kan tawrh hian Pathianin min ngaihsak em? Lal Davida leh tirhkoh Petera ziah hi lo ngaihtuah ta ila. Sâm 31:7 leh 1 Petera 5:7 chhiarin, he zawhna hi sawiho vang che u:
Jehova’n kan hrehawm tawrhte a hriain, min ngaihsak a ni tih hriatna chuan engtin nge a awmtîr che?
7. Pathianin mihringte hrehawm tawrhna zawng zawng a titâwp ang
Isaia 65:17 leh Thu Puan 21:3, 4 chhiarin, he zawhna hi sawiho vang che u:
Jehova’n mihringte tawh thil ṭha lo zawng zawng sawhkhâwkte a sût lêt vek dâwn tih hriat chu engvângin nge a thlamuanthlâk?
I lo hre tawh em?
Setana’n dâwt hmasa ber a sawi khân Jehova a sawichhia a. Chu chuan Rorêltu dik tak leh hmangaihna nei tak Pathian Jehova hmingṭhatna chu a tichhia a ni. Jehova’n nakin lawka mihringte hrehawm tawrhna a sût lêt hunah chuan hming ṭha a nei leh ang. Thu danga sawi chuan, a rorêlna chu a ṭha ber a ni tih a finfiah ang. Jehova hming thiam chantîr chu lei leh vâna thu buai pawimawh ber a ni.—Matthaia 6:9, 10.
MI ṬHENKHAT SAWI DAN: “Hrehawm tawrhna hi kan tâna Pathian thiltumah a tel sa reng alâwm.”
Engtin nge i ngaih?
KHAIKHAWMNA
Diabol-Setana leh mihring hmasa ber pahnihte kha khawvêla hrehawm tawrhnaa mawhphurtu ber an ni a. Jehova chuan kan hrehawm tawrhte min tawrhpui hle a, chuvângin nakin lawkah a sût lêt ang.
Ennawnna
Diabol-Setana’n Evi hnênah eng dâwt thu nge a hrilh?
Adama leh Evi te helna chuan kan zain eng angin nge min nghawng?
Engtin nge Jehova’n kan hrehawm tawrhnaah min tawrhpui tih kan hriat?
HRIAT BELH NAN
Bible-in sual chungchâng a hrilhfiah dân chhiar ang che.
Diabol-Setana’n Eden huana buaina a chawh chhuah thu buai chungchâng chhiar belh rawh.
“Engvângin Nge Pathianin Hrehawm Tawrhna Awm A Phal?” (Vênnainsâng thuziak)
Zawhna khirh tak tâna chhânna thlamuanthlâk tak bih chiang rawh.
“Engvângin Nge Mihring Insuatna A Thlen? Engvângin Nge Pathianin A Tihtâwp Loh?” (Website thuziak)
Pa pakhatin a chhehvêla hrehawm tawrhna a hmuhte aṭanga a thil zir chu hria ang che.