thil phût tharte pawh tiamin Pathian thupêk rêng rêng chu an zawm a ngai a ni. Chuvângin, mite chu Rorêlna Nî chhûnga an thiltih ang zêla rorêlsak an ni ang.

Rorêlna Nî chhûng chuan, mi chhiarsên lohte chuan Pathian duhzâwng zir a, chu mi mila nun theihna hun remchâng chu a hmasa ber atân an nei ang. Chuti a nih chuan, inzirtîrna hna nasa taka thawh a ni dâwn tihna a ni. Dik takin, “khawvêla awmte chuan felna chu an zir” ang. (Isaia 26:9) Mahse, mi zawng zawngin Pathian thu anga awm chu an thlang kher lo vang. Isaia 26:10 chuan: “Mi suaksual chu duhsakin awm mah sela, felna a zir chuang hlei lâwng e: dikna ramah chuan dik lo takin a ti ang a, LALPA ropuina a hmu chuang lo vang,” a ti a ni. Chutiang mi suaksualte chu Rorêlna Nî chhûng la laa tihboral hlen an ni ang.—Isaia 65:20.

Rorêlna Nî a zawh hunah chuan, chuta dam khawchhuakte chu mi ṭha famkim niin ‘an nung’ tawh ang. (Thu Puan 20:5) Chuvângin, Rorêlna Nî chhûng chuan mihringte chu atîra Pathian thiltum angin an ṭha famkim tawh ang. (1 Korinth 15:24-28) Tichuan, fiahna hnuhnûng ber chu a lo thleng ang a. Setana chu a tânna hmun ata chhuah a ni ang a, a tâwp ber atân mihringte bum tuma a beih leh chu phalsak a ni ang. (Thu Puan 20:3, 7-10) Chutih huna lo dodâl tlattute chuan Bible thutiam: “Mi felte chuan ram hi an luah ang a, a chhûngah hian kumkhuain an awm ang,” tih hi a takin an chên tawh ang. (Sâm 37:29) Ni e, Rorêlna Nî chu mi rinawm zawng zawngte tân chuan malsâwmna a ni dâwn a ni.

BIBLE zirlaite chuan kum 1914 chu thil pawimawh tak a thlen hun a nih tûr thu a hma kum sawmli vêlah an lo sawi lâwk diam tawh a. Chûng thil pawimawh thleng tûrte chu eng nge ni a, eng thilte’n nge kum 1914 chu kum pawimawh tak a nihzia târ lang?

Luka 21:24-a chhinchhiah dânin, Isua chuan: “Jentailte nî a kin hma loh zawng Jerusalem khua chu Jentailte rah behin a awm ang,” tiin a sawi a. Jerusalem chu Juda hnam khawpui ber—Lal Davida aṭanga lalte rêng rêng lal anga an ṭhutna khawpui a ni. (Sâm 48:1, 2) Nimahsela, chûng lalte chu hnam hruaitu dangte lakah chuan an danglam bîk a. Anni chu Pathian aiawhin “LALPA lalṭhutthlêngah” an ṭhu a ni. (1 Chronicles 29:23) Chutiang chuan Jerusalem chu Jehova rorêlna chhinchhiahna a lo ni ta a ni.

Mahse, eng hunah leh engtin nge Pathian rorêlna chu ‘Jentailte rah beha’ a awm? Chu chu B.C.E. 607-a Babulon hovin Jerusalem an hneh ṭum khân a thleng a. Tichuan, ‘LALPA lalṭhutthlêng’ chu a ruak ta a, Davida aṭanga lal thlah kal zêl pawh chu tihkhaihlak a ni ta a ni. (2 Lalte 25:1-26) Chu ‘rahbehna’ chuan kum khua a awh ang em? Awh dâwn lo ve, a chhan chu Jerusalem lal hnuhnûng ber Zedekia chungchângah Ezekiela hrilh lâwknain: “Hotu lukhum chu paihsak ula, lallukhum chu paihsak rawh u, . . . a neitu tak tûr a lo kal hma zawng, [a neitu tak tûr a lo kal hunah chuan] amah chu ka pe ang,” tia a sawi avângin. (Ezekiela 21:26, 27) Davida lallukhum “neitu tak” chu Isua Krista a ni a. (Luka 1:32, 33) Chuvângin, ‘rahbehna’ chu Isua Lalber a nih hunah a tâwp dâwn a ni.

Chu thil ropui tak chu eng huna thleng tûr nge ni? Isua chuan Jentailte’n hun tiam chin bituk chhûng an awp dâwn tih a sawi a. Daniela bung 4-naah chuan chu hun tiam chin reizâwng chhût chhuah dân tûr chu a awm a ni. Chutah chuan Babulon Lal Nebukanezzara’n hrilh lâwkna mumang a hmuh chu târ lan a ni a. Ani chuan thing hrawl tak kih thlûk chu a hmu a ni. A bul chu thir leh dara ṭawn beh tlat a nih avângin a ṭhang thei lo va. Vântirhkoh chuan: “A chungah hun sarih ral rawh se,” tiin a puang a ni.—Daniela 4:10-16.

Bible-ah hian, thing hi a châng chuan rorêlna sawi nâna hman a ni a. (Ezekiela 17:22-24; 31:2-5) Chuvângin, he entîr nei thing kih thlûkna chuan Jerusalem-a lalte kaltlanga Pathian rorêlna tihkhaihlak a ni dâwn tih a entîr a ni. Mahse, chu mumanga inlârna chuan ‘Jerusalem khua rahbehna’ chu chatuan atân a ni lo, “hun sarih” chhûng a awh dâwn tih a puang chhuak bawk a ni. Chu chu engtia rei nge ni ang?

Thu Puan 12:6, 14 chuan hun thum leh a chanve chu “ni 1,260” a ni tih a târ lang a. Chuvângin “hun sarih” chu a lêt hnih chiah, a nih loh leh ni 2,520 a ni ang. Mahse, Jentailte chuan Jerusalem khua an tihchhiat hnuah ni 2,520 chhûng chauh an ‘rap bet’ lo. Chuti a nih chuan, he hrilh lâwkna hian chu mi aia rei a huap a ni tih a chiang hle. “Ni khat aiah kum khat zêl” hman tûr chungchâng sawina, Number 14:34 leh Ezekiela 4:6 ṭanchhanin, “hun sarih” chu kum 2,520 tihna a ni ta a ni.

B.C.E. 607 October thlaa Babulon-ho kuta Jerusalem a tlâwma Davida lal thlah kal zêl lâk bo a nih khân, kum 2,520 chu a inṭan a ni. Chu chu kum 1914 October thlaah a tâwp a. Chu mi kum chuan, “Jentailte nî” chu a kin ta a, Isua Krista chu Pathianin vân Lalberah a siam ta a ni.a—Sâm 2:1-6; Daniela 7:13, 14.

Isua sawi lâwk angin, vân Lalber anga ‘a lo awm lehna’ chu khawvêla thilthleng mak tak indona te, ṭâm te, lîrnghîng te, hrilêng te hmanga chhinchhiah a ni a. (Matthaia 24:3-8; Luka 21:11) Chûng thilthlengte chu kum 1914-ah Pathian vân lam Lalram a piang ngei a ni tih leh tûn lai thil kalhmang suaksual tak atân a ‘ni hnuhnûng’ a inṭan tawh a ni tih târ lanna chiang tak a ni.—2 Timothea 3:1-5.