Pathian ngei chuan a hming awmzia chu a chhiahhlawh rinawm Mosia hnênah a hrilhfiah a. Mosia’n Pathian hming awmzia a zawh chuan Jehova chuan: “AWMA KA NI,” tiin a hming awmzia a hrilhfiah a. (Exodus 3:14) Rotherham-a Bible lehlin chuan chu lai thu chu: “Ka nih duh ang apiang chu ka ni ang,” tiin a let chhuak thung. Chuvângin, Jehova chu a thiltumte tihpuitlin nâna a ṭûl ang apiang a innihtîr thei tihna a ni.

I duh apiang ni thei tûrah han inchan chhin teh. I ṭhiante tân mi eng ang nge i nih dâwn? I ṭhian tuemaw chu dam lo ta se, doctor thiam takah inchantîrin i tidam ngei ang. I ṭhian dang leh chu sum dâwnna lamah tla chhe ta se, mi hausa taka changin, amah chu i tungding leh ngei bawk ang. Mahse, a nihna takah chuan, chutiangin i duh ang apiang chu i ni thei si lo. Kan zîngah hian chutianga duh ang apiang ni thei rêng rêng kan awm lo. Bible i han zir chhoh zêl hian, Jehova chu a thutiamte tihpuitlin nâna a ṭûl ang apiang a innihtîr theih dân mak tak chu i hmu chhuak ngei ang. Tin, ani chuan amah hmangaihtute tâna a thiltihtheihna hman chu a châk hle bawk. (2 Chronicles 16:9) Hêng Jehova mize duhawm takte hi a hming hre lote tân chuan hriat ngaihna a awm lo a ni.

Jehova hming chu Bible-ah a chuang tûr a ni tih a chiang hle. A hming awmzia hriat leh amah kan biaknaa zalên taka hman hi kan Pa Vâna mi, Jehova hnaih tûra min ṭanpuitu thiltithei tak a ni.a

ZAWLNEI Daniela chu Isua pian hma kum 500 chuang laia mi a ni a. Nimahsela, Jehova chuan a hnênah Messia, a nih loh leh Krista anga Isua hriak thih a nih emaw, ruat a nih emaw hun hriat theihna tûr thute chu a hrilh a ni. Daniela hnênah heti hian a sawi: “Jerusalem tung ding leh sa ṭha tûra thupêk a chhuah aṭanga hriakthiha, lal a lo awm thlengin hapta sarih a ni ang, tih hre fiah thiam ang che: tin, hapta sawmruk leh pahnihah . . . a ni ang,” tiin.—Daniela 9:25.

Messia lo lan hun hre thiam tûr chuan, chu mi chungchânga Daniela hrilh lâwkna a thlen famkim ṭan hun kan hriat hmasak phawt a ngai a ni. Hrilh lâwknain a sawi dân chuan, chu mi hun chu ‘Jerusalem tung ding leh sa ṭha tûra thupêk a chhuah aṭangin’ a inṭan a. Eng hunah nge chu ‘thupek chu chhuah’ a nih? Bible ziaktu Nehemia sawi dân chuan, Jerusalem sa ṭha leh tûra thupêk chhuah chu “lal Artazerzia kum sawmhnih a lal kum” khân a thleng a ni. (Nehemia 2:1, 5-8) Thilthleng chanchin zirtute chuan B.C.E. 474 chu a kum pumhlûma Artazerzia a lal hmasak ber kum a ni tih an finfiah a ni. Chuvângin, kum 20 a lal kum chu B.C.E. 455 a ni. Tûnah chuan, Messia chungchâng Daniela hrilh lâwkna inṭanna chu kan hre thei ta a; chu chu, B.C.E. 455 a ni.

Daniela chuan chu “hriakthiha, lal” lo lan hmaa hun liam zât tûr chu a târ lang a. Chu hrilh lâwkna chuan ‘hapta sarih leh hapta sawmruk leh pahnih’—a vaia hapta 69 a sawi lang a ni. Chu hun liam zât tûr chu engtia rei nge ni ang? Bible lehlin tam tak chuan chûng hapta-te chu ni sarih awmna hapta ni lovin, kum sarih awmna kum hapta a ni tih a târ lang. Chu chu, hapta khatah kum sarih zêl a awm tihna a ni. He kum sarih awmna hapta hi hmân lai Judate tân chuan thil thar a ni lo. Entîr nân, a ni sarihna apianga Sabbath nî an hmang ang chiahin, a kum sarihna zêlah Sabbath kum chu an hmang a ni. (Exodus 23:10, 11) Chuvângin, hrilh lâwknaa hapta 69 reizâwng chu, 69 kum 7-a puntîr, a nih loh leh kum 483 nên a intluk reng a ni.

Tûnah chuan, kan tih tûr awmchhun chu chhût chhuah a ni ta. B.C.E. 455 aṭanga kum 483 kan chhiar chhoh chuan, C.E. 29-ah a tâwp dâwn a ni. Chu mi kumah ngei chuan Isua chu baptisma changin, Messia a lo ni ta a nih chu!a (Luka 3:1, 2, 21, 22) Chu chu Bible hrilh lâwkna thlen famkimna chhinchhiah tlâk tak a ni lâwm ni?

MESSIA kan lo hriat theih nâna min ṭanpui tûrin, Pathian Jehova chuan Bible-a zâwlnei tam takte chu thutiam Chhan Chhuaktu lo pian dân tûr te, a rawngbâwl dân tûr te, leh a thih dân tûrte chipchiar taka ziak tûrin a thâwk khum a. Hêng Bible hrilh lâwkna zawng zawng hi Isua Kristaah chuan a thleng famkim vek a ni. Chûngte chu a dik vek a, a chipchiar êm êm a ni. Chu mi entîr nân, Messia pian leh a naupan lai chanchin nêna inkaihhnawiha thilthleng tûr sawi lâwk ṭhenkhatte chu lo en ta ila.

Zâwlnei Isaia chuan Messia chu Lal Davida thlah aṭang lo awm tûr a nihzia a hrilh lâwk a. (Isaia 9:7) A sawi ang ngeiin, Isua chu Davida thlah aṭangin a lo piang a ni.—Matthaia 1:1, 6-17.

Pathian zâwlnei dang, Mika pawhin chu nau lo piang tûr chu a tâwpah chuan lal a lo nih tûr thu leh “Bethlehem Ephratha” khuaa a lo pian tûr thu a hrilh lâwk bawk. (Mika 5:2) Isua a pian lai chuan Israel ramah Bethlehem hming pu khaw pahnih a awm a. A pakhat zâwk chu hmar lam pang Nazareth khaw bula mi a ni a, a dang chu Judai ram Jerusalem bula awm a ni thung. Jerusalem bula awm Bethlehem chu tûn hma chuan Ephratha tia koh ṭhin a ni a. Zâwlnei hrilh lâwk ang ngeiin chu khuaah chuan Isua chu a lo piang ta a ni.—Matthaia 2:1.

Bible hrilh lâwkna dang leh chuan Pathian Fapa chu ‘Aigupta ram ata koh chhuah’ a nih tûr thu a sawi lâwk a. Naupang Isua chu Aigupta rama kalpui a ni a. Heroda a thih hnuah a khaw lama hruaikîr leh, a nih loh leh koh chhuah a ni a, chutiang chuan Bible hrilh lâwkna chu a thleng famkim a ni.—Hosea 11:1; Matthaia 2:15.

Phêk 200-naa chart-ah hian “Hrilh Lâwkna” tih thupui hnuaiah Messia chungchâng hrilh lâwkna thu chuanna Bible chângte târ lan a ni a. Khawngaihin, chûng Bible chângte chu “A Thlen Famkimna” tih hnuaia Bible châng târ lante nên chuan khaikhin ang che. Chutianga i tihna chuan Pathian Thu a dikzia i rinna chu a tichak sawt ngei ang.

Hêng Bible chângte i han enfiah hian, hrilh lâwknate chu Isua pian hma kum za tam taka ziak vek a ni tih hre reng ang che. Isua chuan: “Hêng hi ka thu kha a ni, Mosia Dânahte, Zâwlneite Lehkhabuahte, Fakna Hla Buahte ka chanchin ziak apiang a lo thlen tûrzia in hnêna ka awm laia ka hrilh ṭhin che u kha,” tiin a sawi a ni. (Luka 24:44) I Bible aṭang ngeia i hmuh theih angin, Messia chungchânga hrilh lâwkna zawng zawngte chu a thleng famkim vek a ni—a vai tak meuh meuhvin!