mi rinawmte chu a thlahthlam ngai lo tih an ring tlat bawk a ni.—Sâm 55:22.

18. Luka 21:25-28-a kan hmuh Isua thusawite chuan hrehawmna nasa tak lo thleng tûr i ngaih dân chu engtin nge a thunun?

¹⁸ Keini pawhin Pathian Jehova chu kan rinchhan tlat tûr a ni, ani chu he kal hmangin mihring chanchina hrehawmna nasa ber a tawh huna min chhan chhuak theitu awmchhun a ni si a. Hrehawmna nasa tak a inṭan hnu leh Pathian Jehova’n khawvêl thil dangte chunga a rorêlna a thlentîr hma engtik lai emawah chuan, mite chu “thlabâr avâng leh khawvêla thil lo thleng tûr chu ngaihtuah avângin . . . an thi dang ang.” Amaherawhchu, Pathian Jehova hmêlmate an thlabâr hle laiin, a chhiahhlawh rinawmte erawh chu thlamuang takin an awm ang a. An chhan chhuahna a hnai tawh tih an hriat avângin an hlim zâwk mah ang.—Luka 21:25-28 chhiar rawh.

19. A dawta thuziakah eng nge kan ngaihtuah dâwn?

¹⁹ Ni e, khawvêl leh a “thil bulte” laka inla hrangte chan tûr chu a va phûrawm tak êm! Mahse, a dawta thuziakin a hrilhfiah angin, nunna neih kan duh chuan thil ṭha lo pumpelh aia tam kan tih a ngai a. Pathian Jehova tilâwmtu miziate kan neih leh a pawm tlâk hnate kan thawh a ngai a ni.—2 Pet. 3:11, 12. (w10-E 07/15)

“Mi Eng Ang Nge In Nih Tûr Le?”

“Chûng thilte chu chutianga boral vek tûr a ni tih in hriat avângin . . . awm dân thianghlim leh Pathian ngaihsak kawngah chuan mi eng ang nge in nih tûr le?”—2 PET. 3:11, 12.

1. Engvângin nge Petera lehkha thawn pahnihna chu chutih hun laia Kristiante tân a hun taka fuihna a nih?

TIRHKOH Petera’n thlarauva thâwk khum a lehkha thawn pahnihna a ziak lai chuan, Kristian kohhran chuan tihduhdahna nasa tak a lo tuar tawh a; mahse, chu chuan ṭhahnemngai lo tûr emaw, pung lo tûr emawin a dang chuang lo. Chuvângin, Diabola chuan tûn hmaa a lo hman tawh ṭhin tih dân dang chu an chungah a hmang ta a. Petera târ lan angin, Setana chuan Pathian mite chu “mit uirêa khat” leh “awh hmang thinlung” nei zirtîrtu derte hmang chuan tihchhiat a tum a ni. (2 Pet. 2:1-3, 14; Jud. 4) Chutiang a nih avângin, Petera lehkha thawn pahnihna chu rinawmna vawng tûra tih tak zeta infuihna a ni.

2. Petera thawn hnih bung 3-ah hian eng thute nge chuang a, eng zawhnate nge kan inzawh ang?

² Petera chuan: “He bâwktêa ka awm chhûng zawng hian nangmahni hriatpuiin chawh harh fo che u hi ṭha ka ti a ni . . . ka bâwktê dah bo hun chu a thleng thuai ang tih ka hre si a. A ni, ka kal chhuah hnuin chûng thil chu in hriat reng fo theih nân ka bei ang,” tiin a ziak a. (2 Pet. 1:13-15) Ni e, Petera chuan a thi dâwn tawh tih a hria a, mahse a hun taka a pêk hriattîrna chu hriat reng ni tûrin a duh a ni. A duh ang ngeiin, a hriattîrna thute chu Bible-ah a chuang a, tûn thlengin kan la chhiar reng thei a ni. Petera lehkha thawn pahnihna