Rawngbâwlna Zauh Theih Dân Kawngte

ISUA’N a zirtîrte Lalram thu hril tûra a tirh chhuah hun a thlen chuan, an hnênah: “Buh seng tûr a tam hle si a, nimahsela a thawktute an tlêm,” tiin a sawi a. Hnathawh tûr tam tak a awm avângin: “Buh seng tûra thawktu tûrte tîr tûrin buh Neitupa hnênah chuan ngên rawh u,” tiin a sawi belh a ni. (Mt. 9:37, 38) Isua chuan zirtîrte chu rawngbâwlnaa an thawh dân tûr chu a hrilh a. He a thusawi: “Mihring Fapa a lo kal hmain Israel khuate chu in fang chhuak lo vang,” tihah hian a hmanhmawhthlâkzia a lang a ni.—Mt. 10:23.

² Tûn laiah pawh, thlawhhma rawngbâwlnaah thawh tûr tam tak a awm a. Tâwpna a lo thlen hmain he Ram chanchin ṭha hi hrilh zawh a ngai a, hun kan nei tlêm tawh hle! (Mk. 13:10) Khawvêl hi thlawhhma a nih avângin, Isua leh a zirtîrte dinhmun angah kan ding a; mahse, kan thawh tûr chu a tam zâwk a ni. Khawvêl mi maktaduai tam takte nêna khaikhin chuan tlêm tê kan ni a; mahse, Jehova’n min ṭanpui ang tih kan chiang thei a ni. Ram chanchin ṭha hi khawvêl pumah hrilh a ni ang a, Jehova hun ruatah tâwpna chu a lo thleng ang. Kan rawngbâwlna kan hlen theih nân, kan nunah Pathian Ram kan dah hmasa ber ang em? Chutianga ti tûr chuan eng theocratic thiltum nge kan ûm neih?

³ Jehova’n a chhiahhlawh inpumpêk tawhte hnêna a phût chu sawiin, Isua chuan: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,” a ti a. (Mk. 12:30) Thlarau zawng zawnga Pathian rawngbâwl tûra phût kan ni a. A awmzia chu, Jehova rawngbâwlnaa theihtâwp chhuahin, a hnêna kan inpêkna thûkzia leh takzia lantîr hi a ni. (2 Tim. 2:15) Kan mi mal dinhmun leh theihna azir zêlin kan vai tân hun remchâng a inhawng vek a. Hêng hun remchâng zînga ṭhenkhat ngaihtuahin, i rawngbâwlna hlen tûrin eng theocratic thiltumte nge i ûm ang tih thu tlûkna siam ang che.

KOHHRANA THUCHHUAHTU ANGA RAWNGBAWLNA

⁴ Thutak pawmtu apiang chuan thutak puan chhuah theihna chanvo hlu an nei vek a. Hei hi Isua’n a zirtîrte tih tûr a pêk bulpui ber a ni. (Mt. 24:14; 28:19, 20) Isua Krista zirtîr chuan, chanchin ṭha a hriat veleh mi dangte hnênah a hrilh ṭhîn. Chu chu Andria te, Philipa te, Kornelia te leh mi dangte tih dân a ni. (Joh. 1:40, 41, 43-45; Tirh. 10:1, 2, 24; 16:14, 15, 25-34) Chu chu, miin baptisma a chan hma aṭangin chanchin ṭha mite hnênah a hrilh tûr tihna a ni em? Ni e! Baptisma la chang lo thuchhuahtu nih a tlin veleh in tina thu hrilh theihna hun remchâng ṭha tak a nei ṭan nghâl a ni. Chu bâkah, a theihna leh a dinhmun azirin, thu hrilhna chi dangah pawh a tel thei bawk ang.

⁵ Thuchhuahtuin baptisma a chan hnu chuan, chanchin ṭha hre tûra theihtâwp chhuaha mi dangte ṭanpui chu a duh ang tih rinhlelh rual a ni lo. A hmei a pain chanchin ṭha hrilh theihna chanvo kan nei ṭheuh va. Pathian Ram tihhmasâwnaa chanvo chhe tê kan nei ve thei hi malsâwmna a ni a. Rawngbâwlna pêng hrang hranga tela an rawngbâwlna zauhtute chu an hlim ngei ang.

MAMAWH ZUALNA HMUNA RAWNGBAWLNA

⁶ I awmna kohhran bial chhûng chu in tlawh chhuak zingin, chipchiar taka thu hrilhna in nei tawh pawh a ni thei. A nih chuan, mamawh zualna hmunah insawnin, i rawngbâwlna zauh thei tûrah i inngai thei a ni. (Tirh. 16:9) Tûnah hian kohhran upa i ni emaw, kohhranho rawngbâwltu i ni emaw a nih chuan, i ṭanpuina mamawh kohhran dang a awm mai thei a. In bial kantu chuan bial chhûnga kohhran dang i ṭanpui theih dân tûr chungchângah rawtna a nei mai thei bawk. Ram chhûnga hmun dangah rawng bâwl i duh chuan, branch office-in rawtna ṭangkai tak a pe thei ang che.

⁷ Ram danga rawngbâwl i duh em? I duh chuan, ngun taka i inngaihtuah a ngai ang. Chumi chungchâng chu engvângin nge in kohhrana upate i sawipui loh vang? Chutianga insawnna chuan nangmah leh i ruala kalte chungah chuan nghawng a nei ngei ang. (Lk. 14:28) Mahse, rei tak awm i tum lo a nih chuan, i awmna ram chhûnga rawngbâwl zawm chu a ṭha ber mai thei a ni.

⁸ Ram ṭhenkhatah chuan, engkawltu anga hman unaute chu thutaka an awmna a la rei vak lo va. Tualchhûnga unaupa inngaitlâwm takte chuan an kohhrana rawn insawn thar, upa tawnhriat nei zâwkte chu hma hruaitîr an duh ṭhîn. Kohhran upa i nih a, chutiang rama insawn tumna i neih chuan, tualchhûng unaupate hmun luahlan chu i thiltum a ni lo tih hre reng ang che. Luahlan aiin, an rualin rawngbâwl zâwk rawh. Anni chu tling tûra ṭan la tûr leh kohhrana mawhphurhnate pawm tûrin fuih rawh. (1 Tim. 3:1) I rama in tih ṭhin dân anga thil ṭhenkhat tih a nih loh pawhin dawhthei rawh. Upa i nih anga i thiltawn neihte chu tualchhûnga unaupate ṭanpui nân hmang rawh. Chuti a nih chuan, engtik hun emawa i rama kîr leh a ngaih hunah, tualchhûng upate chuan kohhran chu ṭha lehzualin an enkawl thei ang.

⁹ Branch office-in i ṭanpui theih tûr kohhran hmingte an hrilh theih hma chein, i awmna Kohhran Service Committee chuan an recommend-na che lehkha an thawn a ngai ang. Chutiang lehkha chu upa i ni emaw, kohhranho rawngbâwltu i ni emaw, pioneer i ni emaw, a nih loh leh thuchhuahtu i ni emaw pawh ni se, hetiang lehkha hi a ngai a ni. Service committee chuan an recommend-na che lehkha leh rawngbâwlna chungchânga i zawhna chu, rawngbâwl i duhna hmuna branch office-ah an thawn ang.

ṬAWNG DANG HMANNA HMUNA RAWNGBAWLNA

¹⁰ I rawngbâwlna zauh nân, sign language pawh tiamin, ṭawng dang zir i duh mai thei a. Ṭawng dang hmanga thu hrilh dân zir i tum a nih chuan, engvângin nge upate leh bial kantu i biak loh vang? Anni chuan rawtnate leh i mamawh fuihnate chu an pe thei che a. Branch office kaihhruaina hnuaiah, bial ṭhenkhat chuan ṭawng danga thu hriltu tûr thuchhuahtu leh pioneer tling takte tân ṭawng zirna class a buatsaih a ni.

PIONEER RAWNGBAWLNA

¹¹ Thuchhuahtu zawng zawngte chuan auxiliary, regular, leh special pioneer bâkah, hunbi kima rawngbâwlna dangte tâna thil phût tlângpuite chu an hre tûr a ni. Pioneer chu entawn tlâk Kristian baptisma chang tawh, chanchin ṭha hrilh nâna dârkâr phût zât hmu thei tûr dinhmuna ding a ni tûr a ni. Kohhran Service Committee chuan auxiliary leh regular pioneer thawk tûra dîlna chu a lo pawmsak a, special pioneer-te erawh chu branch office aṭanga ruat an ni.

¹² Auxiliary pioneer-te chu an dinhmun azirin a tlêm berah thla khat chhûng atân ruat an ni a, a zâwnin thla engemaw zât an thawk emaw, thawh chen tûr bithliah chin awm lovin an thawk zawm zêl emaw pawh a ni thei. Lalram thuchhuahtu tam takte chuan Hriatrengna hman hun leh bial kantu tlawh hun ang chi hun bîkahte hian auxiliary pioneer thawh chu nuam an ti a. Ṭhenkhat chuan chawlh hman laia thawh an thlang a ni. Baptisma chang tawh school kal lai thuchhuahtute chuan an school chawlh laia auxiliary pioneer thawh chu an duh mai thei. Thuchhuahtute chuan darkâr phût tlêm thla, March, April, leh bial kantu tlawh thlaahte hian auxiliary pioneer thawh an thlang thei a ni. I dinhmun chu eng pawh ni se, nungchang ṭha i neih a, dârkâr phût zât i tlin theih dâwn a, thla khat emaw, a aia tam emaw auxiliary pioneer i thawk thei dâwn a nih chuan upate chuan he chanvo hlu tak thawk tûra i dîlna ngaihtuahsak che chu an châk hle ang.

¹³ Regular pioneer thawk thei tûr chuan kum tina dârkâr hmuh zât tûr bituk chu hmu thei tûr dinhmunah i ding tûr a ni. Regular pioneer i nih angin, i awmna kohhran ruala rawngbâwl chu i duh ngei ang. Pioneer ṭhahnemngai takte chu kohhran tân malsâwmna an ni a, thu hrilh rawngbâwlnaah phûrna an chawk tho va, mi dangte pawh pioneer thawk ve tûrin an fuih a ni. Amaherawhchu, regular pioneer thawh i dîl hmain, entawn tlâk baptisma chang tawh thuchhuahtu i nihna thla ruk tal a liam tawh tûr a ni.

¹⁴ Special pioneer-te chu rawngbâwlnaa an thiamzia târ langtu, regular pioneer-te zîng aṭanga thlan chhuahte an ni a. Branch office-in awm tûra a ruatna apiangah rawng an bâwl thei tûr a ni. A tlângpui thuin, tuina neite an zawn hmuh a, kohhran thar an din theihna tûr hmun kilkhâwrahte a ni ṭhîn. A châng chuan special pioneer-te chu an thu hrilhna bial thawk zo tûra ṭanpui ngai kohhranahte tirh an ni bawk a. Special pioneer leh upa ni bawkte chu thu hrilhna biala thawktu tam lehzual mamawh a nih kher loh pawhin, kohhran tê zawkte ṭanpui tûra tirh an ni bawk. Special pionner-te chuan an mamawh inenkawl nân a âwm tâwk ṭanpuina an dawng a. Special pioneer ṭhenkhat chu rei vak lo chhûng atâna ruat an ni.

MISSIONARY-TE

¹⁵ Governing Body-a Service Committee chuan missionary thawk tûrte chu a ruat a, tualchhûng Branch Committee chuan mipui tamna hmunahte rawngbâwl tûrin an ruat leh chhâwng ṭhîn. Anni chuan thu hrilh rawngbâwlna leh kohhran thiltihte chu an tinghetin an tichak a. Missionary-te chu Lalram Chanchin Puangtute School aṭanga zirtîrna dawngte an ni tlângpui ṭhîn a. In luah man leh an nî tin mamawh atân a âwm tâwk ṭanpuina pêk an ni.

BIAL KAN RAWNGBAWLNA

¹⁶ Governing Body-in a ruat bial kantute chuan bial kantu aiawh anga thawkin zirtîrna leh thiltawn an nei hmasa phawt ṭhîn. Chûng unaupate chuan rawngbâwlna an ngainain, unaute an hmangaih a. Anni chu pioneer ṭhahnemngai tak, Bible zirlai taima tak, leh thusawi leh zirtîr thiam tak an ni. Thlarau rahte lantîrna kawnga entawn tûr ṭha tak an ni a, inbûk tâwkna, a âwm tâwk hriatna, leh remhriatna lantîrtute an ni. Unaupa chu nupui nei tawh a nih chuan, a nupui chu nungchang lam leh mi dangte nêna an indâwr dâna entawn tlâk a ni a. Thu hriltu thiam tak a ni bawk. Kristian nupui intulût tak a nih angin a nihna a hre thiam a, a pasal thusawi tûr a lo sawi khalh lo vang a, thusawi honaah a ṭawng tam ber lo vang. Bial kantute leh an nupuite chuan hun duan tâwt tak leh hahthlâk tak an neih avângin, he rawngbâwlna thawk tûrte hian hrisêlna ṭha an neih a ngai a ni. Pioneer-te chuan bial kantu nih an dîl lo. Bial kan rawngbâwlna thawh an duh thu an bial kantu an hrilh ang a, ani chuan rawtnate a lo pe ang.

THEOCRATIC SCHOOL-TE

¹⁷ Lalram Chanchin Puangtute School: Thu hrilhna bial hrût chhuak tûr leh thlarau lama kohhran chhawmdâwl tûrin Lalram chanchin puangtu tam lehzual mamawh a ni a. Chuvângin, nupui pasal la nei lo unaunu leh unaupate bâkah, nupate pawhin Lalram Chanchin Puangtute School-a a bîk taka zirtîrna dawn an dîl thei a ni. Chu school an kal zawh chuan an awmna rama mamawh zualna hmunah regular pioneer thawk tûrin tirh chhuah an ni ṭhîn. Mahse, mahnia inpe theite chu an awmna ramah emaw, ram dangah emaw rawngbâwlna chanvo dang pêk an ni thei bawk. Mi tlêm tê chu temporary, a nih loh leh permanent special pioneer anga thawn chhuah an ni thei a. He school-a kal duh pioneer-te chuan, regional inkhâwmpuia hemi atâna inkhâwm buatsaihah thil tlin ngaite chu an hre thei ang.

¹⁸ Watchtower Bible School of Gilead: He school-a kal tûra thlan, nupui pasal la nei lo unaunu leh unaupate, leh nupate chu English hmang thei special hunbi kima rawngbâwltute an ni a. Anni chu thlawhhma emaw, branch inawpna pâwl emaw tichak leh tinghet thei tûra beiseina neite an ni. An unaute rawngbâwlsak nuam an tihzia târ lang tawh a, Bible leh theocratic kaihhruaina zir tûr leh zâwm tûrin ngilnei takin mi dangte ṭanpui thei tawhte an ni bawk. Tualchhûng Branch Committee chuan chutiang theihna nei nia an hriatte chu dîlna theh lût tûrin a sâwm ang. He school-a zir chhuakte hi ram dangah emaw, an awmna ramah emaw thlawhhmaah a nih loh pawhin branch office-ah thawhtîr an ni ṭhîn.

BETHEL RAWNGBAWLNA

¹⁹ Bethel-a rawngbâwl hi chanvo hlu a ni a. Bethel tih awmzia chu “Pathian In,” tihna a ni a, chu nihna chu theocratic thiltihna hming atân a inhmeh hle. Bethel-a hna thawk unaute chuan Bible thu leh hla tihchhuahte, lehlinte, leh sem chhuahnate nêna inkûngkaih hna pawimawh tak an thawk a. An rawngbâwlna chu khawvêl puma kohhrante enkawl leh kaihruaitu, Governing Body tân chuan a hlu tak zet a ni. Bethel-a ṭawng lehlin lam thawkte chu branch huam chhûnga chumi ṭawng hmanna hmunah chuan an awmin, hna an thawk a. Chuvângin, nî tin nuna chu ṭawng mite’n an hman dân chu an hre thei a ni. Chu bâkah, thu leh hla tihchhuah tawha ṭawngkam hmante chu mite’n an hriatthiam leh thiam loh an hre nghâl thei a ni.

²⁰ Bethel-a hnathawh tam tak hi chu a hahthlâk a. Chuvângin, Bethel kal tûra sâwmte chu baptisma chang tawh unaupa, la naupang, hrisêlna ṭha leh chak ṭha takte an ni tlângpui. I awmna ram enkawltu branch-ah thawktu mamawh a nih a, chuta rawngbâwl i duh chuan, i lawina kohhran upate hnênah i tih ngaite i hriat belh thei ang.

IN SAK RAWNGBAWLNA

²¹ Pathian biakna atâna kan hman inte sak hi Solomona biak in sak anga rawngbâwlna thianghlim a ni a. (1 Lal. 8:13-18) Unau tam takte chuan he hna atân hian an hun leh an thil neihte thawhin, ṭhahnemngaihna nasa tak an lantîr a ni.

²² Ṭanpui thei dinhmunah i ding em? Chutiang hnathawhnaa tel duh, baptisma chang tawh thuchhuahtu i nih chuan, in bial chhûnga insak lam enkawltu unaupate chuan i ṭanpuina chu an ngaihluin, thiamna nei tam lo mah la, zirtîr che an inhuam reng a ni. Ṭanpui i inpeih thu chu engvângin nge tualchhûng upate i hrilh loh vang? Thuchhuahtu baptisma chang tawh tling takte chu Pathian biakna atâna hman ram danga in sakna hmunahte pawh an inpe hial thei a ni.

²³ In sak rawngbâwlnaa tel dân kawng tam tak a awm a. An awmna bul hnaia he hna ṭanpui thei baptisma chang tawh thuchhuahtu, thiamna engemaw neite chuan Local Design/Construction volunteers angin an thawk thei a. Hun rei vak lo hmun hla deuha in sakna ṭanpui thei tûr mi dangte chu branch office-in chawlhkâr hnih aṭanga thla thum thlenga rawngbâwl tûrin construction volunteers angin a ruat bawk. Hun rei tak thawk tûra ruatte chu construction servants tia koh an ni. In sak hna thawktu, ram danga tirhte chuan expatriate construction servant angin rawng an bâwl a. Construction servants leh construction volunteers awmna Construction Group chuan project apiangah hma a hruai a, Local Design/Construction volunteers leh chu project-a tel kohhrante chuan an ṭanpui a ni. Construction Group chuan branch bial huam chhûnga project pakhat an zawh hunah a dangah an insawn zêl ṭhîn.

I THLARAU LAM THILTUMTE CHU ENG NGE NI?

²⁴ Jehova hnêna i nun i pumpêk tawh chuan, kumkhuaa a rawngbâwl chu i duh a. Mahse, chutianga i bâwlnaah thlarau lam thiltum engte nge i neih? Thlarau lam thiltum neihna chuan i chakna leh thil neihte fing taka hmang tûrin a ṭanpui ang che. (1 Kor. 9:26) Chutiang thiltumte neihna chuan thlarau lama ṭhan chhohna a thlen a, chanvo hlu dangte i chan hian thil pawimawh zâwkte ngaihtuah tlat tûrin a ṭanpui ang che.—Phil. 1:10, 11; 1 Tim. 4:15, 16.

²⁵ Tirhkoh Paula chuan Pathian rawngbâwlnaah kan tân entawn tûr ṭha min hnutchhiah a. (1 Kor. 11:1) Jehova rawngbâwlnaah nasa takin a inhmang a ni. Jehova chuan hun remchâng tam tak a pe tih a hria a. Korinth khuaa unaute hnênah Paula chuan heti hian a ziak a ni: “Kawngka zau tak leh sâwt tak ka tân a inhawng si a,” tiin. Hei hi kan tân pawh a dik a ni lâwm ni? Ni e, kohhran ruala Jehova rawngbâwl theihna hun remchâng tam tak, a bîk takin Lalram chanchin ṭha puan chhuahna lamah a inhawng a ni. Mahse chu ‘kawngka zau taka’ luhnaah chuan, Paula tân “dodâltute tam tak” hmachhawn a ngai a ni. (1 Kor. 16:9) Ani chu mahni inthunun a inhuam a. “Ka taksa ka tichhel a, ka thuhnuaiah ka dah tawh a ni,” tiin a sawi chhuak a ni. (1 Kor. 9:24-27) Chutiang rilru chu kan pu ve em?

²⁶ Mi tinte hi an dinhmun azir zêlin theocratic thiltumte nei tûra fuih an ni a. Mi tam takte’n tûna hunbi kima rawng an bâwl theih chhan chu atîr aṭanga theocratic thiltumte an neih vâng a ni. Naupang mai an la nih lai aṭangin, an nu leh pate leh mi dangte’n chutianga rawngbâwl tûrin an lo fuih tawh a. Chuvângin, Jehova rawngbâwlnaah chuan inchhîrna nei miah lovin hun nuam tak an hmang a ni. (Thuf. 10:22) Thiltum dang ṭha tak chu chawlhkâr tina thu hrilhnaa chhuah leh in lama mite Bible zirpuite, a nih loh leh inkhâwmna atâna inbuatsaih nâna hun tam lehzual hmante hi a ni a. Thil pawimawh tak chu, kan dinngheh a, kan rawngbâwlna kan hlen hi a ni. Chutianga kan tih chuan, Jehova kan chawimawi ang a, kan thiltum ber, chatuana Jehova rawngbâwl chu kan ti thei ang.—Lk. 13:24; 1 Tim. 4:7b, 8.