Bung Hnih
Pathian Dik Awmchhun Jehova Chu Chawimawi Rawh
1. Tunge Pathian dik awmchhun chu?
BIBLE chuan pathian anga ngaih tam tak awm mah se, “keini tân erawh chuan Pathian pakhat chauh (Pa chu) a awm” a ti a. (1 Korinth 8:5, 6) Chu “Pathian pakhat chauh” chu thil zawng zawng Siamtu, Jehova hi a ni. (Deuteronomy 6:4; Thu Puan 4:10, 11) Isua’n ani chu “ka Pathian, in Pathian” tiin a sawi a. (Johana 20:17) “LALPA chu Pathian [dik] a ni . . . amah lo chu a dang rêng an awm lo,” tih Mosia thusawi hi a pawmpui a ni. (Deuteronomy 4:25) Jehova chu pathian anga biak thil dang zawng zawng: milem te, mi thianghlim te, a nih loh leh a hmêlma “he khawvêl pathian,” Diabol-Setana ai pawhin a chungnung zâwk daih a ni. (2 Korinth 4:3, 4) Pathian anga biak thil dang zawng zawngte ang lo takin, Jehova chu Isua koh angin, “Pathian dik awmchhun” a ni.—Johana 17:3, NW.
2. Pathian chanchin kan zirna chuan engtin nge kan nun a khawih danglam ang?
2 Pathian mize duhawm tak takte, kan tâna a thil tih tawhte leh a la tih tûrte hre thiamtute chu a lama hîpin an awm a. Jehova an hmangaihna a lo pun zêl chuan, amah chawimawi lo thei niin an inhre ta lo a ni. Engtin nge an chawimawi? An chawimawi dân kawng khat chu a chanchin mi dangte hnêna hrilh hi a ni. Rom 10:10 chuan: “Kain an ṭan a, chhandamna an hmu bawk ṭhîn,” a ti. An chawimawi dân kawng dang leh chu, ṭawngkam leh thiltiha amah entawn hi a ni. Ephesi 5:1 chuan, “A fa duh takte angin Pathian awm dân latute ni rawh u,” a ti a. Chutianga ti lehzual thei tûr chuan Jehova nihna tak tak kan hriat chian a ngai a ni.
3. Pathian mize bulte chu engte nge ni?
3 Bible pum puiah hian Pathian mize langsâr tak takte sawi lanna tam tak a awm a. A mize bul palite chu finna te, rorêl dikna te, thiltihtheihna te, leh hmangaihna te a ni. “A hnênah . . . finna . . . a awm a.’ (Joba 12:13) Ani chu ‘rorêl dikna ngaina mi’ a ni a. (Sâm 37:28) ‘Thiltihtheihna lamah a chak’ bawk. (Isaia 40:26) Tin, “Pathian chu hmangaihna a ni.” (1 Johana 4:8) Nimahsela, Pathian mize bul palite zîngah hian, a mize dangte aia Pathian nihphung târ langtu ber chu eng nge ni?
“Pathian Chu Hmangaihna A Ni”
4. Pathian miziate zîngah eng berin nge lei leh vân leh thil nung zawng zawng siam tûra chêttîr?
4 Lei leh vân leh finna nei thlaraute leh mihringte siam tûra Jehova chêttîrtu chu han ngaihtuah teh. A finna emaw, a thiltihtheihna emaw a ni em? Ni lo, Pathian chuan hêng mize pahnihte hi hmang tel tho mah se, amah chêttîrtu ber a ni lo ve ve a. Tin, a rorêl dikna lahin nunna thilthlâwnpêk chu mi dangte pe tûrin a phût hek lo. Pathian hmangaihna nasa tak chuan a ni, finna nei mi nih theihna hlimawm tak chu mi dangte hnêna pe ve tûra chêttîr zâwk ni. Hmangaihna chuan thuawih mihringte Paradis-a chatuana an chên nân ruahmanna a siamtîr a. Hmangaihna avâng bawkin, Adama bawhchhiatnain mihringte chunga tawrhna a thlen chu la bo tûrin ruahmanna a siam a ni.
5. Bible sawi angin, Jehova chu eng mizia chhinchhiahna nge ni a, engvâng nge?
5 Chuvângin, Pathian mizia zawng zawnga langsâr ber chu hmangaihna a ni a. Chu chu a nihna tak tak emaw, a nihphung emaw a ni. A finna te, rorêl dikna te, leh thiltihtheihna te chu pawimawh hle mah se, Bible chuan Jehova chu chutiang Pathian a nih thu a sawi ngai lo. Mahse, hmangaihna a ni tih erawh a sawi ngei a ni. Ni e, Jehova chu hmangaihna chhinchhiahna a ni. He hmangaihna hi rilru vei zâwnga kaihhruai a ni lo, thu bul hmanga kaihruai a ni zâwk. Pathian hmangaihna chu thutak leh felna thu bulte hian a thunun a. Amah Pathian Jehova ngeiin a entîr angin, chu chu hmangaihna sâng ber chi a ni. Chutiang hmangaihna chu mahni hmasialna a awm lohzia lantîrna a ni a, a tichiangtu thiltih engemawin a zui ziah bawk a ni.
6. Pathian chu kan aiin chungnung zâwk daih mah se, engin nge amah min entawntîr thei?
6 He hmangaihna ze mak tak avâng hian chutiang Pathian chu kan entawn theih phah a ni. Mi tlâwm tak, ṭha famkim lo, thil tisual ṭhîn kan nih avângin, Pathian chu kan entawn tak tak thei lo tûrah kan inngai mai thei a. Mahse, Jehova hmangaihna nasa tak lantîrna dang la awm chu hei hi a ni: Kan tlin lohnate a hre thiam a, kan lakah ṭhat famkimna a phût lo, tih hi. Ani chuan famkimna kan la hlat rihzia a hre chiang hle a ni. (Sâm 51:5) Chuvângin, Sâm 130:3, 4 chuan: “LALPA, nangin khawlohnate i chhinchhiah chuan, aw LALPA, tunge ding ang le? Nimahsela i hnênah ngaihdamna a awm a ni,” tiin a lo sawi a ni. Ni e, Jehova chu “Pathian lainatnaa khat, mi khawngaih thei tak, thin nel tak, ngilneihna leh thutak ngah” a ni. (Exodus 34:6) “Lalpa, nang chu i ṭha a, ngaihdam i peih a.” (Sâm 86:5) A va thlamuanthlâk êm! He Pathian ropui tak rawng bâwl leh hmangaih tak leh lainat taka a enkawlna dawn chu a va thawventhlâk êm!
7. Engtin nge Jehova hmangaihna chu a thil siamah hmuh theih a nih?
7 Jehova hmangaihna chu a thil siamah pawh a hmuh theih a. Kan hlimna tûra thil ṭha tam tak Jehova’n a siam: tlâng mawi tak te, ramngaw mawi tak te, dîl mawi tak te, leh tuifinriat mawi tak tak te hi han ngaihtuah teh. Min châwm tûr leh kan tui tihzâwngte kan thlan theih nân ei tûr chi hrang tam tak min pe a. Tin, Jehova chuan pangpâr mawi leh rimtui tak tak chi hrang hrang kan tâna a siam bâkah, ramsa duhawm tak takte pawh a siam bawk. Siam kher ngai lo mah se, mihringte tilâwm tûr thil tam tak a siam a ni. Tûnah hian ṭha famkim lo chunga he khawvêl suala chêng kan nih avângin, Pathian thil siamte chu a nih tûr ang takin kan chên thei rih lo va. (Rom 8:22) Mahse, Paradis-a Jehova’n kan tâna min tihsak tûrte chu han suangtuah teh! Fakna hla phuahtu chuan: “I kut i phar a, thil nung zawng zawng châkna [ṭha] chu i tihrehsak ṭhîn,” tiin min tiam a ni.—Sâm 145:16.
8. Jehova min hmangaihzia târ lanna langsâr ber chu eng nge ni?
8 Jehova’n mihringte a hmangaihzia târ lanna langsâr ber chu eng nge ni? Bible chuan heti hian a sawi: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin. (Johana 3:16) Hetianga Jehova’n thil a ti hi mihringte ṭhat vâng em ni? Rom 5:8 chuan heti hian a chhâng: “Pathian chuan a mi hmangaihna chu fak tlâkin a lantir a, mi sualte kan la nih laia Krista kan aia a thih avang khân,” tiin. Ni e, Pathian chuan a Fapa mi ṭha famkim chu sual leh thihna ata min tlan nâna a nun hlân tûrin a rawn tîr a ni. (Matthaia 20:28) Chu chuan Pathian hmangaihtute tân chatuana nun theihna kawng a rawn hawng ta a. Pathian hmangaihna chuan a duhzâwng ti duhtu zawng zawngte a pawm vek hi a lâwmawm hle a ni, Bible pawhin heti hian min hrilh: “Pathianin mi duhsak bîk a nei lo . . . nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tiin.—Tirhkohte 10:34, 35.
9. Engtin nge min tlan nâna Jehova’n a Fapa a pêkna hian min thunun ang?
9 Jehova’n min tlan nân a Fapa pea chatuana nunna kawng min hawnsakna chuan engtin nge tûna kan nun kan hman dân hi a thunun ang? Chu chuan Pathian dik Jehova kan hmangaihna a tizual tûr a ni a. Chutih rual chuan, Pathian aiawhtu Isua thu zawm duhna min neihtîr bawk tûr a ni. “A nungte chu anmahni tân an nun tawh loh va, an thih aia thia . . . tân chuan an nun tawh zâwkna tûrin a ni, mi zawng zawng thih aiin [Isua] a thih ni.” (2 Korinth 5:15) Jehova hmangaihna leh lainatna entawnna kawngah Isua chu entawn tlâk ber a nih avângin, a hniakhnung zui chu a va nuam êm! A nawmzia chu mi thuhnuairawlhte hnêna Isua thusawi: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, . . . chawlhna in hmu ang. Ka nghâwngkawl chu a nuam a, ka phur pawh a zâng a ni,” tih aṭangin a hriat theih a ni.—Matthaia 11:28-30.
Mi Dangte Hmangaihna Lantîrin
10. Kan Kristianpuite kan hmangaihzia lantîr theih dân kawng ṭhenkhat chu engte nge?
10 Engtin nge kan Kristianpuite chu Jehova leh Isua min hmangaihna ang chia kan hmangaihzia kan lantîr theih ang? Kan lantîr theih dân kawng chi hrang hrang hi lo en teh: “Hmangaihnain a dawhthei a, ngil a nei bawk ṭhîn; hmangaihnain a îtsîk lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lâwm lo va, thutak erawh chu a lâwmpui ṭhîn a; engkim a tuar hrâm hrâm a, engkim a ring a, engkim a beisei a, engkim a tuar chhuak ṭhîn. Hmangaihna hi engtikah mah a reh lo vang.”—1 Korinth 13:4-8; 1 Johana 3:14-18; 4:7-12.
11. Tu dang hnênah nge hmangaihna kan lantîr ang a, engtin nge kan lantîr ang?
11 Tu dang hnênah nge hmangaihna kan lantîr ang a, engtin nge kan lantîr ang? Isua’n heti hian a sawi a: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pek zawng zawng che u pawm tûrin zirtîr rawh u,” tiin. (Matthaia 28:19, 20) Hei hian kan Kristianpui la ni rih lote hnêna Pathian paradis khawvêl thar lo thleng tûr chanchin ṭha hriattîr hi a huam tel a ni. Isua’n: “In hmangaitute chauh in hmangaih hian lâwmman engnge in hmuh ang? Chhiahkhawntute pawhin chutiangin an ti ve lâwm ni? Tin, in unaute chauh chibai in bûk hian engnge in tih hnem chuan bîk? Jentailte pawhin chutiangin an ti ve lâwm ni?” tia a sawi avângin kan hmangaihna chu kan rinpuite hnênah chauh lo pawh kan lantîr tûr a ni tih a chiang hle.—Matthaia 5:46, 47; 24:14; Galatia 6:10.
‘Jehova Hmingin Kal Rawh’
12. Engvângin nge Pathian hming hi amah chauhvin a put theih?
12 Pathian dik chawimawina kawng pawimawh tak dang leh chu a hming danglam tak Jehova hi hriat a, hman a, mi dangte hriattîr bawk hi a ni. Fakna hla phuahtu chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a thinlung duhzâwng chu a sawi chhuak a. (Sâm 83:18) Jehova tih hming awmzia chu “A Nihtir” tihna a ni. Ani chu thiltum siamtu Mi Ropuia chu a ni a, a thiltum apiang chu a tihlawhtling zêl ṭhîn. Mihringte hian an thawhrimnate a hlawhtling dâwn leh dâwn loh an chian theih tlat loh avângin, chu hming chu Pathian dik chauhvin a pu thei a. (Jakoba 4:13, 14) Jehova chauhvin a thu chu thil ti tûra a tirhnaah “a hlawhtling . . . ang” tih a sawi thei a ni. (Isaia 55:11) Mi tam tak chu anmahni Bible ngeia Pathian hming an hmuh hmasak ber ṭum leh a hming awmzia an hriat hmasak ber ṭum chuan an phûr hle a. (Exodus 6:3) Mahse, ‘Jehova hminga kumkhuaa an kal’ chauhvin he hriatna hi an hlâwkpui ang.—Mika 4:5, NW.
13. Jehova hming hria tih leh a hminga kal tih hian eng nge a huam tel?
13 Pathian hming chungchângah Sâm 9:10 chuan: “I hming hre tute chuan an ring ang che,” a ti a. Hei hian Jehova hming hriat satliah bâk pawh a la huam tel a ni, a hming hriat satliahin amah rinna a siam nghâl si lo va. Pathian hming hria tih awmzia chu Jehova chu eng ang Pathian nge a nih tih hria a, a thuneihna zah a, a thupêkte zawm bawk a, engkima amah ring tlat tihna a ni. (Thufingte 3:5, 6) Chutiang bawkin, Jehova hminga kal tih chuan a hnêna inpumpêk te, amah chibai bûktute zînga mi anga a aiawh te, leh Pathian duhzâwng mila kan nun hman tak tak te hi a kâwk a ni. (Luka 10:27) Chutiang chuan i ti em?
14. Chatuana Jehova rawng kan bâwl dâwn chuan, tih tûr nia ngaih vâng ringawt bâkah eng dang nge ṭûl?
14 Chatuana Jehova rawng kan bâwl dâwn chuan tih tûr nia ngaih vâng ringawta rawng bâwl kan ni tûr a ni lo. Tirhkoh Paula chuan kum tam tak chhûng Jehova rawng bâwl tawh Timothea chu: “Pathian ngaihsak tûrin in sawizawi rawh,” tiin a fuih a ni. (1 Timothea 4:7) Inpumpêkna chu kan inpêknate chunga lâwmna thinlung kan neih aṭanga lo awm a ni a. “Pathian ngaihsak” tih chuan mi mal taka Jehova zahna thûk tak nei tih a târ lang a ni. Amah leh a kawngte zahna nasa tak avânga a lama beh tlatna a târ lang bawk a. Chu chuan Pathian hming chu mi tinte ngaihsântîr duhna min neihtîr bawk a ni. Pathian dik awmchhun Jehova hminga kumkhuaa kal tûr chuan kan nunah Pathian ngaihsakna kan nei ngei tûr a ni.—Sâm 37:4; 2 Petera 3:11.
15. Engtin nge Pathian hnênah inpêkna pumhlûm kan hlan theih ang?
15 Pawm tlâka Pathian rawng bâwl tûr chuan amah chauh kan biak a ngai a ni, a chhan chu “inpekna pumhlûm phûttu Pathian” a nih avângin. (Exodus 20:5, NW) Setana pathianna khawvêl sual tak hi hmangaih chungin, Pathian kan hmangaih tel thei lo. (Jakoba 4:4; 1 Johana 2:15-17) Jehova chuan eng ang mi nge nih kan tum ṭheuh tih hi a hre chiang a. (Jeremia 17:10) Felna kan ngainat tak zet chuan, a ni chuan a hria ang a, kan nî tin harsatnate tuar chhuak tûrin min ṭanpui ang. A thlarau thianghlim chak tak chuan min ṭanpui a, he khawvêla sualna tam takte pawh hi min hnehtîr dâwn a ni. (2 Korinth 4:7) Lei paradis-a chatuana nun kan beiseina nghet tak hi vawng reng thei tûrin min ṭanpui bawk ang. Hmabâk ropui tak a va ni êm! Chu hmabâk avâng chuan kan lâwm êm êm tûr a ni a, chatuana nun theihna siamtu Pathian dik Jehova rawng chu duh tak chungin kan bâwl tûr a ni.
16. Mi maktaduai tam takte ruala tih ve i duh tûr chu eng nge ni?
16 Khawvêl pum puia mi maktaduai tam tak chuan fakna hla phuahtu sâwmna hi lâwm takin an pawm tawh a ni: “Aw, LALPA chu mi fakpui ula, a hming chu i chawimawi tlâng ang u,” tih hi. (Sâm 34:3) Jehova chuan a hming faka chawimawitu hnam tin zînga mi maktaduai tam takte zîngah chuan tel ve tûrin a sâwm che a ni.
Ennawn Nâna Sawiho Tûrte
• Jehova chu eng ang mi nge a nih? Engtin nge a mize hriat chianna chu kan hlâwkpui?
• Engtin nge Pathian chungchânga thutak hre tûrin mi dangte kan ṭanpui theih?
• Jehova hria tih leh a hminga kal tih hian eng nge a huam tel?
[Phêk 14-naa milem]
Jehova chuan a hmangaihna nasa tak avângin, ‘a kut a phar ang a, thil nung zawng zawng châkna chu a tihrehsak ang’