Bung Ruk

Kan Hmachhawn Ṭheuh Tûr Thu Buai Chu

1, 2. (a) Eden huanah khân Setana’n eng thu buai nge a chawh chhuah? (b) A thu sawi chuan chu thu buai chu engtin nge a sawi thawi?

MIHRINGTE hmachhawn tawh zawng zawnga thu buai pawimawh berah i tel a. I ṭanna lam chuan i chatuan hmakhua tûr a hril dâwn a ni. Eden huana helna a chhuah khân chu thu buai chu a lo chhuak a. Chutih lai chuan Setana’n Evi hnênah: “Pathianin, ‘Huana thing rah rêng rêng hi in ei tûr a ni lo,’ a ti elo maw?” tiin a zâwt a. Evi chuan thing pakhat chungchânga Pathian thusawi chu hrilhin: “‘In ei tûr a ni lo . . . chutilochuan in thi ang,’ a ti a ni,” a ti a. Chutah Setana chuan Jehova chu dâwt sawiah puhin, Evi nunna emaw, Adama nunna emaw chu Pathian thu an âwih leh âwih lohvah a innghah loh thu tlang takin a hrilh a. Setana chuan Pathian chu a thil siamte hnênah thil ṭha engemaw​—anmahni duh ang anga nun theihna​—pe duh lovah a puh bawk a ni. “In ei ni apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” tih Setana chuan a puang chhuak a ni.​—Genesis 3:​1-5.

² Dik tak chuan, Setana chuan mihringte’n Pathian dân zawm aiin anmahniin thutlûkna insiam se an ṭhatpui zâwk tûr thu a thawi zâwnga a sawina a ni a. Chutiang chuan Pathian rorêl dân chu a cho ta a ni. Hei hian lei leh vâna Pathian lal chungnunna, rorêl tûra dikna a neih, chungchângah thu buai pawimawh ber mai a chawk chhuak ta a. He zawhna hi siam a ni: Mihringte tân eng nge ṭha zâwk? Jehova rorêlna nge a tel lova ro inrêlna? tih hi. Jehova chuan Adama leh Evi chu a tihlum nghâl thei reng a, mahse chu chuan lal chungnunna thu buai chu lungawithlâk takin a chingfel dâwn si lo. Mihringte chu hun rei tâwk tak chhûng anmahnia ro inrêl phalsakin, Pathian chuan amah leh a dânte aṭanga inlâk hranna rah chhuah chu a lantîr thei a ni.

3. Setana’n eng thu buai pahnihna nge a chawh chhuah?

³ Setana’n rorêl tûra Jehova dikna neih a beihna chu Eden huana thil thlengah khân a tâwp nghâl mai lo. Jehova laka mi dangte rinawmna chungchângah pawh rinhlelhna a rawn siam a. Chu chu thu buai hmasa zâwk nêna inkungkaih hnai tak thu buai pahnihna a lo ni ta a ni. Setana chona chuan Adama leh Evi thlah zawng zawng bâkah, Pathian thlarau fate zawng zawng leh Jehova duhtak a Fa tîr ngei pawh a huam tel vek a ni. Entîr nân, Joba hun lai khân Setana chuan Jehova rawngbawltute’n amah an hmangaih vâng leh a rorêlna an duh vâng ni lovin, mahni hma an sial vâng zâwka a rawng bâwl an nih thu sawiin a lo bei tawh a. Harsatna an tawh meuh chuan an châk zawng lam lamah an kal vek tûr thu sawiin a hnial bawk a ni.​—Joba 2:​1-6; Thu Puan 12:10.

Thilthlengin A Finfiah Chu

4, 5. Mihringin mahni pheikhai a hruai chungchângah thilthleng tawhin eng nge a finfiah?

⁴ Lal chungnunna thu buaia thu pawimawh tak chu hei hi a ni: Pathianin mihringte hi a rorêlna aṭanga inla hranga hlawhtling thei tho tûrin a siam lo, tih hi. An ṭhatna tûrin a dân felte rinchhana nung tûrin a siam zâwk a ni. Zâwlnei Jeremia chuan: “Aw LALPA, mihring awm dân chu, mahni thu mai a ni lo tih ka hre ta: Tungchhova kal mihringah hian, a pheikhai hruai tûr a awm lo. Aw LALPA, mi thunun la,” a ti a. (Jeremia 10:​23, 24) Chuvângin, Pathian Thu chuan: “I thinlung zawng zawngin LALPA ring la, nangma hriatnaah innghat suh,” tiin min fuih a ni. (Thufingte 3:⁠5) Pathianin mihringte chu leilung dân a siamte thununna hnuaia awm tûra a lo siam ang bawkin, nungchang lama a dân siamte hnuaia awm tûrin a lo siam bawk a, chu dân an zawm chuan khawtlângah remna a awm dâwn a ni.

⁵ Pathian chuan mihringte chu a rorêlna tel lo chuan hlawhtling takin ro an inrêl thei ngai dâwn lo tih a hre chiang hle a. Mihringte chuan mahnia ro inrêl hranna tihhlawhtlin tumin rorêlna chi hrang hrang, ei leh bâr zawnna kawng chi hrang hrang, leh sakhaw chi hrang hrang an din a; mahse, an hlawhtling lo. Hêng inan lohnate hian mihring inkârah inngeih lohna a awmtîr reng a, tharum thawhna te, indona te, leh thihna te a thlen a ni. “Mi, mi dang chungah pawi khawpin a intilal ṭhîn.” (Thuhriltu 8:⁠9) Chu chu mihring chanchin pum puia thil thleng chiah chu a ni. Pathian Thua sawi lâwk angin, mi sual leh tihdertute chu “an sual zual deuh deuh” a ni. (2 Timothea 3:13) Tin, mihringte’n science lam leh thil siam chhuahna lama nasa taka hma an sâwnna hun, kum zabi 20-na chuan chhiatna râpthlâk berte chu a tawng a. Jeremia 10:23 thu​—mihringte hi mahni pheikhai hruai tura siam an ni lo tih​—hi a finfiahna tam tak a awm a ni.

6. Engtin nge Pathianin a lak ata mihringte inlâk hranna hi a chinfel thuai dâwn?

⁶ Pathian aṭanga inlâk hranna rah chhuah râpthlâk tak leh daih rei tak hian mihringte rorêlna chu a hlawhtling thei ngai dâwn lo tih chatuan atân a lantîr tawh a. Pathian rorêlna chauh hi hlimna, inpumkhatna, hrisêlna, leh nunna kawng awmchhun a ni. Tin, Pathian Thu chuan Jehova’n mihringte a hranga ro inrêlna a ngaihhnathiam hun a tâwp ṭêp tawh tih a târ lang bawk. (Matthaia 24:​3-14; 2 Timothea 3:​1-5) Rei lo têah lei chunga a rorêlna lantîr tûrin mihringte thiltihah a rawn inrawlh dâwn a ni. Bible hrilh lâwkna chuan: “Chûng lalte [tûna mihring rorêltute] nîah chuan vân Pathianin [vânah] ram a . . . din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang [mihringin leiah ro an rêl leh tawh ngai lo vang]; hêng [tûn laia] ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi.​—Daniela 2:44.

Pathian Khawvêl Thara Dam Khawchhuakin

7. Pathian rorêlnain mihring rorêlna a tihtâwp hunah chuan tute nge dam khawchhuak ang?

⁷ Pathian rorêlnain mihring rorêlna a tihtâwp hunah chuan tute nge dam khawchhuak ang? Bible chuan: “Mi tluangte [Pathianin rorêl tûra dikna a neih thlâwptute] chu leilungah hian an chêng ang a, ṭha famkimte chu chutah chuan an awm reng a; mi suaksualte [Pathianin rorêl tûra dikna a neih thlâwp lotute] erawh chu leilung ata tihboral an ni ang a, vervêk taka titute chu tihboral phiar an ni ang,” tiin a chhâng a ni. (Thufingte 2:​21, 22) Chutiang bawkin, fakna hla phuahtu chuan: “Rei lo tê achinah mi suaksual chu a awm tawh dâwn si lo . . . Mi felte chuan ram hi an luah ang a, a chhûngah hian kumkhuain an awm ang,” tiin a lo sawi bawk a ni.​—Sâm 37:​10, 29.

8. Engtin nge Pathianin a lal chungnunna chu thiam a chantîr dâwn?

⁸ Setana khawvêl tihchhiat a nih hnuah chuan Pathianin a khawvêl thar a rawn thlentîr ang a, chu chuan kum sâng tam tak chhûng mihringte bâwiha tântîrtu tharum thawhna te, indona te, retheihna te, tawrhna te, natna te, leh thihna te chu a nuai bo hlen tawh ang. Thuâwih mihringte’n malsâwmna an dawn tûr chu Bible-in heti hian mawi takin a lo sawi a ni: “[Pathianin] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin. (Thu Puan 21:​3, 4) Krista lalna a vân Ram sawrkâr hmangin Pathianin kan Rorêltu, kan Lal Chungnungber ni tûra dikna A neih chu thiam a chantîr (a finfiah, a nih loh leh a târ lang) hlen tawh ang.​—Rom 16:20; 2 Petera 3:​10-13; Thu Puan 20:​1-6.

Thu Buai An Chhân Lêt Dân

9. (a) Jehova laka rinawm nghette chuan a thu chu engtin nge an thlîr? (b) Engtin nge Nova’n a rinawm nghehna a finfiah a, entawn tûr a lo siam hi engtin nge kan hlâwkpui theih ang?

⁹ Hun kal tawh zawng zawngah hian Jehova chunga rinawm nghehna leh Lal chungnung ber anga an zahna lantîrtu mi rinawm a hmei a pa an lo awm tawh a. Anni chuan an nunna chu Pathian thu an ngaihthlâk leh an âwihnaah a innghat tih an hria a. Nova pawh kha chutiang mi chu a ni. Chuvângin, Pathianin Nova hnênah: “Tisa zawng zawng tâwpna chu ka hmaah a lo thleng ta . . . I tân . . . lawng siam rawh,” a ti a. Tichuan, Nova chuan Jehova kaihhruaina chu a pawm ta a. Vaukhânna thu hriattîr an ni chung pawhin, chutih laia mi dangte chu thil danglam tak lo thleng lo tûr ang maiin an khawsa reng a ni. Nova erawh chuan lawng lian tak a tuk a, Jehova kawng felte chu mi dangte hnênah hrilhin a ṭûl hle thung a ni. Chhinchiahna chuan: “Chutiang chuan Novan a ti a; Pathianin a hnêna thu a pêk zawng zawng ang ngei chuan a ti ta a,” a ti a ni.​—Genesis 6:​13-22; Hebrai 11:7; 2 Petera 2:⁠5.

10. (a) Engtin nge Abrahama leh Sari’n Jehova lal chungnunna an thlâwp? (b) Abrahama leh Sari entawn tûr siam hi eng kawngin nge kan hlâwkpui theih?

¹⁰ Jehova lal chungnunna thlâwptu Abrahama leh Sari pawh hi entawn tûr ṭha tak an ni bawk a, anni chuan Pathian thupêk apiang an zâwm zêl a ni. Kaldai-ho khua, khawpui hausa tak Ur khuaah an chêng a. Mahse, Jehova’n a hriat ngai lohna rama kal chhuak tûra a han hrilh chuan, Abrahama chu “LALPAN a hnêna a sawi angin a kal ta a.” Sari chu in leh lo ṭha neiin, ṭhiante, leh chhûngkhatte kârah nuamsa takin a khawsa ngei ang. Chutichung chuan, Jehova leh a pasal thu hnuaiah a intulût a, a thil tawn tûr pawh hre lovin Kanaan ramah a kal ve ta a ni.​—Genesis 11:​31-12:4; Tirhkohte 7:​2-4.

11. (a) Eng ang dinhmun hnuaiah nge Mosia’n Jehova lal chungnunna a thlâwp? (b) Engtin nge Mosia entawn tûr siam chu kan hlâwkpui theih?

¹¹ Jehova lal chungnunna thlâwptu dang leh chu Mosia hi a ni a. Ani chuan dinhmun khirh ber​—Aigupta lal Pharaoa hmaichhanah pawh a thlâwp tlat a ni. Mosia chu a inrin tâwk vâng a ni hauh lo. A ṭawngkam thiam tâwk lohzia sawiin, a insit hle zâwk mah a ni. Mahse, Jehova thu chu a âwih a. Jehova leh a unaupa, Arona ṭanpuinain Mosia chu mi luhlul tak Pharaoa hnênah Jehova thu hriattîr tûrin a kal nawn fo a ni. Mi ṭhenkhat, Israela fate zînga mi ngei pawhin Mosia chu an sawisêl nasa hle a. Chutichung pawhin, Mosia chuan Jehova thupêk zawng zawng chu rinawm takin a zâwm a, tichuan amah hmangin Israelte chu Aigupta aṭanga chhanchhuah an ni ta a ni.​—Exodus 7:6; 12:​50, 51; Hebrai 11:​24-27.

12. (a) Jehova laka rinawm nghehnaah hian Pathian thupêk ziaka chhinchhiahte chauh zawm mai a tâwk lo tih engin nge lantîr? (b) Engtin nge hetiang chi rinawm nghehna hriat thiamna chuan 1 Johana 2:15 thu nunpui tûrin min ṭanpui theih?

¹² Jehova laka rinawm nghette chuan Pathian thupêk ziaka chhinchhiahte zawm chu tâwk mai tûrah an ngai lo va. Potiphara nupuiin mutpui atâna Josefa a thlêm lai khân, uirê khapna Pathian thupêk ziaka chhinchhiah a la awm lo. Nimahsela, Josefa chuan Eden huana Jehova bul ṭan inneihna ruahmanna chu a hre chiang a. Mi dang nupui nêna mipat hmeichhiatna hman chu Pathian lawmzâwng a ni dâwn lo tih a hria a ni. Josefa chuan eng chen chiah nge Pathianin Aigupta mite anga khawsak a phal tih enchhin a tum lo. Pathianin mihringte a dâwr dân chu ngun taka chhûtin Jehova pawm zâwng nia a hriat kawng chu a zawh a, Pathian duhzâwng ni ngeia a hriat chu fîmkhur takin a nunpui a ni.​—Genesis 39:​7-12; Sâm 77:​11, 12.

13. Engtin nge (a) Joba chungchângah, (b) Hebrai mi pathumte chungchângah, Diabola dâwttheihzia tihchian a nih?

¹³ Fiahna khirh tak an tawh hunah pawh Jehova hre tak takte chuan amah an phatsan chuang lo. Amah Jehova ngei pawhin a lo fak êm êm Joba chuan a neih zawng zawng a chân emaw, bawrhsâwm taka a awm emaw phawt chuan Pathian chu a phatsan ngei ngei tûrah Setana chuan a puh a. Joba chuan chhiatna râpthlâk tak takin a tlâkbuak chhan hre lo mah se, Diabola chu dawthei a nihzia a târ lang a ni. (Joba 2:​9, 10) Kum zabi engemaw zât a liam hnuah pawh Setana chuan a puhna dikzia chu finfiah a la tum reng tho va; Babulon lal thinur tak chu Hebrai tlangvâl pathumte’n a milim siam chibai an bûk loh chuan rawhtuina mei puiah paiha tihhlumah a vautîr a ni. Lal thupêk leh milem biakna khapna Jehova thupêk inkâra âwih zâwk tûr thlan luihtîr an nih tâkah chuan, Jehova rawng chauh an bâwl a, ani chu an Lal Chungnungber a ni tih chiang takin an hriattîr ta a. An tân chuan Pathian laka rinawm chu an nunna ai pawhin a hlu zâwk daih a ni!​—Daniela 3:​14-18.

14. Mihring ṭha famkim lo mah ni ila, engtin nge Jehova laka kan rinawm ngheh tak zetzia kan lantîr theih?

¹⁴ Chutiang entîrnate aṭang chuan, Jehova laka rinawm nghet tûrin mi ṭha famkim nih a ngai emaw, thil tisualtu chu a hlawhchham dêr emaw niah thutâwp kan siam tûr em ni? Ni teh suh e! Mosia pawhin tlin loh châng a nei ve ṭhîn tih Bible-in min hrilh a ni. Chutianga a tlin loh châng chuan Jehova chu lâwm lo mah se, Mosia chu a hnâwl phah chuang lo. Isua Krista tirhkohte pawhin chak lohna chu an nei bawk a. Famkim lohna kan rochun hi a hriat reng avângin, eng kawng zâwng maha a duhzâwng kan ngaihthah luih tlat loh chuan Jehova chuan min pawm tho a ni. Chak lohna avânga thil kan tisual a nih chuan, tih tak zeta kan inchhîr a, chu sual chu tih ṭhana kan neih loh a pawimawh hle. Hetiang hian Jehova’n ṭha a tihte kan duh tak zetzia leh sual a tihte kan huat tak zetzia kan târ lang a ni. Isua sual tlanna inthawinaa kan rinna avângin Pathian hmaah dinhmun thianghlim kan nei thei a ni.​—Amosa 5:15; Tirhkohte 3:19; Hebrai 9:14.

15. (a) Mihring zawng zawng zîngah tuin nge Pathian lakah rinawmna famkim vawng a, chu chuan eng nge a finfiah? (b) Engtin nge Isua thiltih chuan min ṭanpui?

¹⁵ Nimahsela, Jehova lal chungnunna hnuaia intuk luhna famkim chu mihringte tihtheih piah lam a ni lo vang maw? He zawhna chhânna hi kum 4,000 vêl chhûng chu “thurûk” ang mai a lo ni tawh ṭhîn a. (1 Timothea 3:16) Ṭha famkima siam a ni nâ a, Adama khân Pathian ngaihsakna kawngah entawn tûr ṭha famkim a siam lo va. A nih leh tuin nge siam thei? Adama thlah sualna neite zînga tumahin an siam thei lo tih a chiang hle. A siam thei awmchhun chu Isua Krista chauh a ni. (Hebrai 4:15) Isua thiltih chuan dinhmun duhawm zâwk nei Adama’n a duh phawt chuan a rinawmna a vawng tlat thei tih a finfiah a ni. Pathian kut chhuakah hian dik lohna a awm lo. Chuvângin, Pathian dân zawmna kawngah chauh ni lovin, lei leh vâna Lal Chungnungber Jehova hnêna mi mal inpumpêkna kawngah pawh Isua Krista chu kan entawn ber tûr a ni.​—Deuteronomy 32:​4, 5.

Kan Chhânna Chu Eng Nge Ni?

16. Engvângin nge Jehova lal chungnunna lama kan rilru put hmangah kan fîmkhur reng ang?

¹⁶ Tûnah hian lei leh vâna lal chungnunna thu buai chu kan hmachhawn ṭheuh a ngai a. Jehova lamṭang kan nih thu a lang a pauva kan sawi chuan Setana’n min tum bîk ta ṭhîn a ni. Kil tin aṭangin min nêkchêp ṭhîn a, a khawvêl suaksual a tâwp thlengin min la nêkchêp zêl ang. Chuvângin, kan fîmkhur reng tûr a ni. (1 Petera 5:⁠8) Kan chêtzia chuan Jehova lal chungnunna thu buai pawimawh berah leh a dawttu, fiahna hnuaia Pathian laka rinawm leh rinawm loh chungchânga kan ṭan lam chu a târ lang a ni. Rinawm lo taka khawsak chu khawvêla a hluar êm avâng maiin thil pawimawh lo anga thlîr thei kan ni lo. Rinawmna vawng reng tûr chuan nun kawng engkima Jehova kawng felte nunpui tûra theihtâwp chhuah a ngai a ni.

17. Dâwt sawi leh rûkrûk kan hnâwl nachhan tûr a lo chhuahna chu eng nge ni?

¹⁷ Entîr nân, “dâwt pa,” Setana hi kan entawn thei hauh lo va. (Johana 8:44) Kan thiltih apiangah kan rinawm tûr a ni. Setana khawvêlah hian ṭhalaite hian nu leh pate hnênah dâwt an hrilh ṭhîn a. Mahse Kristian ṭhalaite chuan hei hi an pumpelh tlat a, chutiang chuan Pathian mite chu fiahna hnuaia rinawm lo tûra Setana puhna dik lohzia an finfiah a ni. (Joba 1:​9-11; Thufingte 6:​16-19) Tin, mite chu thutak Pathian lama ṭang lova “dâwt pa” lama an ṭan zâwkzia lantîr thei sumdâwnna kawnga inbumna chi hrang hrang a awm bawk a. Chûng chu kan hnâwl a ni. (Mika 6:​11, 12) Chu bâkah, miin a mamawh ngawih ngawih vâng emaw, a rawkate chu an hausa hle emaw pawh ni se, rûkrûk hi englai mahin thiam chantîr theih a ni ngai lo. (Thufingte 6:​30, 31; 1 Petera 4:15) Kan vêngah rûkrûk a hluar hle emaw, thil rûk chu ho tham tak emaw pawh ni se, rûkrûk chu Pathian dân kalh a ni tho tho.​—Luka 16:10; Rom 12:2; Ephesi 4:28.

18. (a) Krista Kum Sang Rorêl tâwpah mihring zawng zawng chungah eng fiahna nge thleng dâwn? (b) Eng thil nge tûn aṭanga tih ṭhana kan lo neih tûr?

¹⁸ Krista Kum Sang Rorêl chhûngin Setana leh a ramhuaiho chu leilâwtah khung an ni ang a, mihringte thunun thei lovin an awm ang. A va thawventhlâk dâwn êm! Mahse kum sângkhat a ral hnuah rei lo te chhûng chhuah an ni leh dâwn a. Setana leh a ṭhuihhruaite chuan siam ṭhat tawh mihring, Pathian laka rinawm tlatte chungah harsatna an rawn thlentîr leh ang. (Thu Puan 20:​7-10) Chu mi huna nung dama kan awm ve a nih chuan, lei leh vâna lal chungnunna thu buai chu engtin nge kan chhân lêt ang le? Chu mi hunah chuan mihring zawng zawng chu an ṭhat famkim vek tawh dâwn avângin rinawm lohna rêng rêng chu tihluih vâng a ni vek tawh ang a, chatuana boralna a thlen tawh ang. Chuvângin, Jehova’n a Thu emaw, a inawpna pâwl emaw hmanga kaihhruaina min pêk apiang thuâwih taka tûn aṭanga zawm zêl hi tih ṭhana neih chu a va pawimawh tak êm! Chutianga kan tih chuan Lei leh Vâna Lal Chungnungber a nih anga a hnêna kan inpumpêk tak zetzia kan lantîr tihna a ni ang.

Ennawn Nâna Sawiho Tûrte

• Kan hmachhawn ṭheuh tûr thu buai ropui tak chu eng nge ni? Engtin nge chu thu buaiah chuan kan lo tel ve?

• Hmân lai mi rinawm a hmei a pate’n Jehova laka an rinawmna an lantîr dân langsâr tak chu eng nge ni?

• Engvângin nge nî tina kan chêtziaa Jehova kan chawimawi chu thil pawimawh tak a nih?