Bung Sawm Leh Panga
Zilhna Pawm La, Thununna Pawisa Rawh
1. (a) Engvângin nge kan zavai hian zilhna leh thununna kan mamawh? (b) Eng zawhna nge kan ngaihtuah ngai?
BIBLE chuan Jakoba 3:2-ah chuan, “Kan zain thil tam tak kan tisual fo ṭhîn,” a ti a. Pathian Thu-in ni tûra min fuih ang kan nih theih loh châng tam tak kan hre chhuak leh thei ngei ang. Chuvângin, Bible-in: “Atâwp atâwpa i lo fin theih nân zilhna pawm la, thununna pawisa rawh,” tia a sawi hi a dik hle tih kan pawm a ni. (Thufingte 19:20) Bible zirtîrnate nêna inmil tûrin kan nun chu kan siam ṭha tawh ngei mai. Mahse, kan Kristianpuite’n thil engemaw chungchânga min zilh hunah engtin nge kan chhân lêt ṭhin?
2. Mi mal taka zilhna kan dawn hunah engtin nge kan tih ang?
2 Mi ṭhenkhat chuan mahni inthiam chawp an tum a, thil awm dân chu sawi nêp an tum bawk a, a nih loh leh mi dang thiam lohvah an puh ṭhîn bawk. Mahse, zilhna ngaihthlâk a, zawm hi a ṭha zâwk a ni. (Hebrai 12:11) Mi dangte chu ṭha famkim ni tûrin tuma’n an beisei tûr a ni lo va, thil tê tham tak takahte emaw, Bible-in mi mal duhthlanna tûra a dah ang chi-ahte emaw zilhna an pe fo tûr a ni hek lo. Chu bâkah, a zilhtu ber chuan thil nih dân zawng zawng a ngaihtuah vek lo mai thei a, chûngte pawh chu amah zah tak chunga hriattîr tûr a ni. Mahse, kan thu sawiho zêl tûrah hian zilhna emaw, thununna emaw chu thil âwm tak, Bible ṭanchhana pêk angah lo ngai ta ila. Eng anga dawnsawn tûr nge ni ang?
Zilhna Dawn Huna Kan Ngaihtuah Tûr Entîrnate
3, 4. (a) Zilhna leh thununna chungchânga thlîr dân dik nei tûra min ṭanpui thei eng thu nge Bible-ah chuang? (b) Engtin nge Lal Saula’n zilhna chu a lo chhân lêt a, chu chuan eng rah nge a chhuah?
3 Pathian Thu-ah hian an mamawh ang tak zilhna dawngtute thil tawn tak tak a chuang a. A châng chuan zilhna chu thununna nên a inkawp ṭhîn. Chutianga zilh leh thunun ngai pakhat chu Israel Lal Saula kha a ni. Ani chuan Amalek hnam chungchânga Jehova thusawi chu a zâwm lo va. Amalek mite chuan Pathian chhiahhlawhte an dodâl a, an chunga Jehova rorêlna chu Amalek mi emaw, an ran emaw chu pakhat mah zuah loh tûr a ni a. Mahse, Lal Saula chuan an lal leh an ran ṭha ber berte chu a zuah a ni.—1 Samuela 15:1-11.
4 Jehova chuan Saula zilh tûrin zâwlnei Samuela chu a tîr a. Saula’n engtin nge a lo chhân lêt? Amalek mite chu a va hneh ngei a; mahse, an lal chu zuah a tihtlûk thu a lo sawi ve a. Chu a thiltih chuan Jehova thupêk a kalh tlat a ni. (1 Samuela 15:20) Saula chuan ran ṭhenkhat a zuah chhan chu mipui thiam lohvah puh tumin: “Thil ka tisual dêr mai a ni . . . Mipuite ka hlauh va, an thu ka lo âwihna lamah hian,” a ti a. (1 Samuela 15:24) Saula chuan amah a inngaihtuah zâwk niin a lang, Samuela pawh mipui hmaa amah chawimawi tûrin a ngên hial a nih kha. (1 Samuela 15:30) A tâwpah chuan Jehova chuan Saula chu lal ata a hnâwl ta a ni.—1 Samuela 16:1.
5. Zilhna a pawm loh avângin, Lal Uzia chungah khân eng thil nge lo thleng?
5 Juda lal Uzia chuan “LALPA a Pathian chungah thil a tisual ta a; maichâma rimtui hâl tûrin LALPA biak inah a lût ta mai a.” (2 Chronicles 26:16) Mahse puithiamte chauh chu dân anga rimtui hâl thei an ni. Puithiam lalin Uzia dan a tum pawh khân thinur takin a chhâng lêt a. Eng thil nge lo thleng? Bible chuan: “A chalah a lo phâr a . . . LALPAN a hrem avangin . . . Tichuan lal Uzia chu a thih ni thlengin a lo phâr ta a,” a ti.—2 Chronicles 26:19-21.
6. (a) Engvângin nge Saula leh Uzia khân zilhna an pawm loh? (b) Engvângin nge zilhna pawm duh lohna hi tûn lai huna harsatna khirh tak a nih?
6 Engvângin nge Saula leh Uzia chuan zilhna pawm chu harsa an tih? A bul ber chu chapona a ni a, an pahnih chuan mahni inngaisâng tak an ni ve ve a ni. Mi tam takin he mizia hi an neih avângin lungngaihna an tawn phah a. An ngaihah chuan zilhna pawm chu anmahniah thil engemaw tlâkchham vâng emaw, an hmingchhiat phahna emaw niin a lang. Mahse chapona hi chak lohna pakhat a ni tlat. Chapona chuan mite ngaihtuahna a tibuai vek a, chuvângin Jehova’n a Thu leh a inawpna pâwl hmanga ṭanpuina a pêk pawh chu an hnâwl duh ṭhîn a ni. Chutiang a nih avângin, Jehova’n heti hian a lo vaukhân a ni: “Chapona chu boralna hmaah a kal a, rilru intivei chu tlûkna hmaah,” tiin.—Thufingte 16:18; Rom 12:3.
Zilhna Pawmin
7. Mosia’n zilhna a lo chhân lêt dân aṭangin, zir tûr ṭha eng nge kan zir theih?
7 Pathian Lehkha Thu-ah hian zilhna pawmtute entawn tûr siam ṭha tak takte a chuang bawk a, chûng aṭang chuan kan inzir ve thei a ni. A puzawnin a hna khirh tak mai thawh dân tûr chungchânga zilhna a pêk, Mosia kha han ngaihtuah ta la. Mosia chuan a thu chu ngaithlain, a zâwm nghâl a ni. (Exodus 18:13-24) Mosia khân thuneihna sâng tak chelh mah se, engvângin nge zilhna chu a pawm mai theih? A inngaihtlâwm vâng a ni. “Mosia chu lei chunga mihring zawng zawnga zaidam lâwtlak a ni.” (Number 12:3) Thuhnuairawlhna chu eng ang taka pawimawh nge a nih? Zephania 2:3 chuan kan nunna tûr a nihzia a târ lang.
8. (a) Davida’n eng thil sualte nge a tih? (b) Engtin nge Davida’n Nathana zilhna chu a lo chhân lêt? (c) Davida sualna rah chhuah chu engte nge ni?
8 Lal Davida khân Bath-sebi a uirê a, Bath-sebi pasal Uria chu thahtîrin a thil tihsual chu thup bo a tum a ni. Davida zilh tûrin Jehova’n zâwlnei Nathana a tîr a. Davida chu a inchhîr êm êm a: “LALPA chungah thil ka tisual ta,” tiin a sual tih chu a pawm nghâl a ni. (2 Samuela 12:13) Pathianin Davida simna chu pawm mah se, a thil tihsual rah chu a seng tho tho dâwn. Jehova’n Davida hnênah khandaih chuan “[a] chhûngte chu a kiansan tawp lo vang” tih te, a nupuite chu “[a] vêngte” hnênah pêk an nih tûr thu te, a uirêna aṭanga fapa a neih pawh chu “a thi ngei ngei ang” tih te a hrilh a ni.—2 Samuela 12:10, 11, 14.
9. Zilh emaw, thunun emaw kan nih hunah eng nge kan theihnghilh loh tûr?
9 Lal Davida chuan zilhna ṭha pawm chu a ṭangkaizia a hria a. Ṭum khat pawh, zilhna petu kaltlangin Pathian hnênah lâwmthu a sawi hial a ni. (1 Samuela 25:32-35) Chutiang mi chu kan ni ve em? Kan nih ve chuan inchhîrna min thlen thei thil tam tak chu sawi lo tûr leh ti lo tûrin vênhim kan ni dâwn a ni. A nih leh, zilhna emaw, thununna hial emaw kan dawn phahna tûr thil lo ti ta ila engtin nge ni ang? Chutiang zilhna leh thununna chu kan chatuan hamṭhatna tûr ngaihtuah chunga Jehova hmangaihna lantîrna a nihzia i theihnghilh ngai lo vang u.—Thufingte 3:11, 12; 4:13.
Neih Tûr Mize Hlu Takte
10. Pathian Rama lût tûrte neih ngai mizia Isua târ lan kha eng nge ni?
10 Jehova leh kan Kristian unaute nêna inlaichînna ṭha nei tûr chuan mize eng engemaw kan neih a ngai a. Chûng miziate zînga pakhat chu târ langin, Isua’n a zirtîrte zîngah naupang pakhat a hruai a: “In lamlêt a, naupang tê ang in lo nih loh chuan, vân ramah in lût tawp lo vang. Chutichuan, tupawh he naupang tê anga inngaitlâwm apiang, chu mi chu vân ramah chuan a ropui ber ang,” a ti a. (Matthaia 18:3, 4) Isua zirtîrte chuan an zînga ropui ber tûr chungchânga an inhnial avângin, inngaihtlâwmna an neih a ngai a ni.—Luka 22:24-27.
11. (a) Tu hmaah nge kan inngaihtlâwm ngai a, eng vâng nge? (b) Kan inngaihtlâwm chuan, engtin nge zilhna chu kan dawnsawn ang?
11 Tirhkoh Petera chuan: “In zain . . . thuhnuairawlhnain inthuam rawh u; Pathianin chapote a dodâl a, inngaitlâwmte erawh chu khawngaihna a pe si ṭhîn,” tiin a lo ziak a. (1 Petera 5:5) Pathian hmaah kan inngaihtlâwm a ngai tih chu kan hria a; mahse, he Bible châng hian kan rinpuite bulah pawh kan inngaihtlâwm a ngai tih a târ lang. Chutiang kan nih chuan, mi dangin thurâwn ṭha min pêkte chu kan haw lo vang a, an hnên aṭang chuan kan inzir zâwk ang.—Thufingte 12:15.
12. (a) Inngaihtlâwmna nêna inkungkaih hnai tak mize pawimawh tak kha eng nge ni? (b) Engvângin nge kan khawsak dânin mi dangte a nghawng dân chungchâng chu kan ngaihtuah ang?
12 Inngaihtlâwmna nêna inkungkaih hnai tak chu mi dangte ṭhatna tûr ngaihtuah hi a ni. Tirhkoh Paula chuan: “Tupawhin mahni ṭhatna tûr zawng lovin mi dang ṭhatna tûr zawng zâwk rawh se. . . . Chutichuan in ei pawhin, in in pawhin, in tih apiangah pawh, Pathian ropuina tûr hlîrin ti rawh u. . . . Judate tân pawh Grikte tân pawh Pathian kohhranho tân pawh an tlûk phahna tûr rêng rêng engmah ti suh u,” tiin a lo ziak a ni. (1 Korinth 10:24-33) Paula chuan mahni duhzâwng zawng zawng chu hnâwl vek tûrin a ti lo va, mi dang chhia leh ṭha hriatnain a dik lo a tihte tihtîr tûr zâwnga engmah ti lo tûrin min fuih zâwk a ni.
13. Bible zilhna kan nunpui leh pui loh chu engin nge lantîr thei?
13 Nangma duh dân aiin mi dangte ṭhatna tûr i dah pawimawh zâwk ṭhîn em? Kan zavai hian chutianga tih chu kan zir ṭheuh tûr a ni. Chutianga tih theih dân kawng tam tak a awm a. Entîr nân, silhfên leh lan dân hi han ngaihtuah teh. Hêng hi mawihnai tak, felfai tak, leh thianghlim tak ni tûra Pathian Lehkha Thu kaihhruaina huang chhûnga mi mal duhthlan theihna thil a ni. Mahse, i awmna hmuna chêngte khawsak phung avângin, i silhfên leh i lan dân chuan mi dangte Lalram chanchin ngaihthlâkna a dâl tih lo hria ni ta la, i insiam ṭha ang em? Dik takin, mahni lâwmna mai ai chuan chatuana nunna nei tûra mi dangte ṭanpui chu a pawimawh zâwk daih a ni.
14. Engvângin nge inngaihtlâwmna leh mi dangte ngaihsakna neih chu thil pawimawh tak a nih?
14 Inngaihtlâwmna leh mi dangte ngaihsakna kawngah Isua’n entawn tûr a lo siam a, a zirtîrte ke pawh a silsak hial a ni. (Johana 13:12-15) A chungchâng chu Pathian Thuin heti hian a sawi: “He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlâkhlelh hleih theihah a ruat lo va, mihringte anga lo piangin, bâwih angah a insiam a, amah leh amah a intitlâwm ta zâwk a. Tin, mihring anga lo awmin, a inngaitlâwm a, thi khawp hiala thu zâwmin a lo awm ta a,” tiin.—Philippi 2:5-8; Rom 15:2, 3.
Jehova Thununna Hnâwl Suh
15. (a) Pathian lâwmzâwng mizia kan neih theih nân eng inthlâkthlengna nge kan siam ngai? (b) Eng hmangin nge Jehova chuan kan zavaia hnênah zilhna leh thununna min pêk?
15 Mi sual vek kan nih avângin, kan Pathian mizia lantîr thei tûr chuan kan rilru put hmang leh khawsak dânte kan thlâk thleng a ṭûl a. “Mihring thar” chuan kan inthuam a ngai a ni. (Kolossa 3:5-14) Zilhna leh thununna hian insiam ṭhat kan ngaihna laite hre tûrin min ṭanpui a, insiam ṭhat dân tûrte hre tûrin min ṭanpui bawk. Kan mamawh inkaihhruaina kan hmuh theihna bul ber chu Bible hi a ni a. (2 Timothea 3:16, 17) Jehova inawpna pâwlin a buatsaih Bible thu leh hlate leh inkhâwmte chuan Pathian Thu nunpui tûrin min ṭanpui a ni. Zilhna thu chu kan lo hriat tawh hnu pawh ni mah sela, kan mamawhzia chu pawmin insiam ṭhat kan tum ang em?
16. Mi mal ang ṭheuhvin Jehova’n eng ṭanpuina nge min pêk?
16 Hmangaihna avângin Jehova chuan kan harsatnaahte hian min ṭanpui a. Mi maktaduai tam tak chu in lama Bible zirna hmanga ṭanpui an ni. Nu leh pate chuan an fate chu lungngaihna thlen thei nungchang laka vênghim tûrin zilhna leh thununna an pe ṭhîn a. (Thufingte 6:20-23) Kohhran chhûngah chuan, ṭhenkhat chuan thlawhhma rawngbâwlnaa hma an sâwn theih nân thiltawn ngah zâwk rawngbâwltute hnênah zilhna leh thurâwnte an dîl fo a ni. A châng chuan, upate pawhin upa dangte hnênah emaw, thlawhhma rawngbâwlnaa thiltawn ngah tak mi dangte hnênah emaw zilhna an dîl ṭhîn bawk. Thlarau lama mi puitlingte chuan ṭanpui ngaite an ṭanpuinaah Bible an hmang zêl a, inngaitlâwm takin an ṭanpui ṭhîn a ni. Zilhna i pêk hunah chuan, ‘“Thlêmna ka tâwk ve dah ang e,” tia invêng ṭha chunga’ pêk tûr a ni tih hre reng ang che. (Galatia 6:1, 2) Ni e, kan zavai hian, lungrual taka Pathian dik awmchhun be tûrin zilhna leh thununna kan mamawh vek a ni.
Ennawn Nâna Sawiho Tûrte
• Engtin nge mi mala insiam ṭhat kan ngaihna laite hre thiam tûrin Jehova’n hmangaih taka min ṭanpui?
• Engvângin nge mi tam takin an mamawh zilhna pawm chu harsa an tih êm êm a, zilhna pawm chu eng ang taka pawimawh nge ni?
• Eng mize hlu tak hian nge zilhna pawm thei tûrin min ṭanpui ang a, engtin nge chu mi kawngah chuan Isua’n entawn tûr a lo siam?
[Phêk 142-naa milem]
Uzia chuan zilhna a pawm lo va, phâr hri a vei phah
[Phêk 142-naa milem]
Mosia chuan Jethroa zilhna thu a pawm chu a ṭangkaipui