Bung Sawm Leh Pasarih
In Chhûng Khurah Pathian Ngaihsakin Awm Rawh
1. Engtin nge Pathian Thu kaihhruainate zawmna chuan inneihna a nghawng?
JEHOVA chu inneihna Dintu a ni a, a Thu hian chhûngkaw tâna kaihhruaina ṭha ber min pe a ni. Chu kaihhruaina chu an zawm avangin, mi tam tak chuan inneihna hlawhtling tak an nei thei a. Innei lêm lova khawsa dûn ṭhenkhatte pawh dân ang thlapa an inneihna ziaklût tûrin a chêttîr a, an fakawm hle. Mi dangte pawhin an nupui pasal ni lote nêna mipat hmeichhiatna an hman ṭhîn chu an bânsan a. An nupuite leh an fate chunga nunrâwng tak ṭhenkhat chuan ngilneihna leh nunnêmna lantîr dân te an zir bawk a ni.
2. Kristian chhûngkaw nunin eng nge a ken tel?
2 Kristian chhûngkaw nun hian thil tam tak a keng tel a, inneihna nghehzia kan thlîr dân te, chhûngkuaa kan mawhphurhna hlen chhuak tûra kan thiltih te, leh chhûngkuaa mite kan cheibâwl dân ang chi te hi a huam tel vek a ni. (Ephesi 5:33-6:4) Bible-in chhûngkaw nun chungchâng a sawi chu kan hre tawh pawh a ni mai thei a; mahse, Bible zilhna nunpui erawh chu thil dang daih a ni thung. Pathian thupêkte an pênsan avânga Isua sawisêlte ang nih hi tuman kan duh hauh lo vang. Chutiang mite chuan sakhaw ngaihsakna ringawt chu a tâwk mai nia ringin, an ring sual der a ni. (Matthaia 15:4-9) Pathian ngaihsak anna nei si a, mahni in chhûng khura chutianga awm leh si lo nih chu kan duh lo va. Pathian ngaihsakna dik tak, “hlâwkna nasa tak” ni bawk si chu lantîr kan duh zâwk a ni.—1 Timothea 5:4; 6:6; 2 Timothea 3:5.
Inneihna Chuan Eng Chen Nge A Daih Ang?
3. (a) Inneihna tam tak chungah eng nge thleng ṭhîn a, mahse eng nge kan tum ngheh tlat tûr? (b) I Bible hmang hian he mi paragraph hnuaia zawhna awmte hi chhâng ang che.
3 Inneihnaa inphuarna hi a nghet lo tial tial a. Kum tam tak chhûng lo innei tawhte pawhin inṭhen a, mi dang neih leh an titlu ṭhîn. Chu bâkah, nupa la ṭhalai deuhte chu rei lo te chhûng an inneih hnua an inṭhen leh mai thu hriat pawh chu thil mak a ni tawh lo. Mi dangte chuan eng pawh lo ti mah se, keini chuan Jehova tihlâwm chu kan duh tûr a ni. Chuvângin, inneihna nghehzia Pathian Thu-in a sawite hriat nân a hnuaia zawhnate leh Bible chângte hi lo ngaihtuahho ila.
Mipa leh hmeichhia an inneih chuan, eng chen nge chên dun an inbeisei ang? (Marka 10:6-9; Rom 7:2, 3)
Pathian hmaa nupui pasal dang nei leh thei tûra inṭhen theihna kawng awmchhun chu eng nge ni? (Matthaia 5:31, 32; 19:3-9)
A Thu ang ni lova nupa inṭhenna chu Jehova’n eng angin nge a ngaih? (Malakia 2:13-16)
Nupa inkara buaina chinfel nâna awm hran chu Bible-in a sawi mawi em? (1 Korinth 7:10-13)
Eng ang dinhmun hnuaiah nge nupa awm hran chu phal a nih theih? (Sâm 11:5; Luka 4:8; 1 Timothea 5:8)
4. Engvângin nge inneihna ṭhenkhat chu a ngheh?
4 Inneihna ṭhenkhat chu nupate an khawsak dun theih avângin a hlawhtling a tih theih a. Engvâng nge ni? Innei tûrte an puitlin hmaa inneih rih loh chu a chhan pakhat a ni; tin, mahni tuina min ṭawmpui thei leh inhawng taka thu sawipui theih tûr kawppui zawn hmuh pawh a pawimawh hle bawk. Chu ai maha la pawimawh zâwk chu, Jehova hmangaihtu leh buaina chinfelna bul ber anga a Thu zahna neitu kawppui tûr zawn hmuh chu a ni. (Sâm 119:97, 104; 2 Timothea 3:16, 17) Chutiang mi chuan thil a fel theih loh chuan awm hrang thei emaw, inṭhen thei emaw anga inngaihna a nei lo vang. A kawppui tlin lohnate chu ama mawhphurhna tih loh phah nân chhuanlamah a hmang lo vang a. Buainate chu a hmachhawn zâwk ang a, a chinfel dân kawng a hmu chhuak zâwk ang.
5. (a) Jehova laka rinawm nghehnain inneihnaah eng chanvo nge a chelh? (b) Dodâlna tawh hunah pawh Jehova tehnate zawm ngheh tlat avângin eng hlâwkna nge lo thleng thei?
5 Setana chuan hrehawm kan tawrh hunah Jehova kawngte chu kan kalsan dâwn a ti tlat a. (Joba 2:4, 5; Thufingte 27:11) Mahse, an kawppuite dodâlna tuartu Jehova Thuhretu tam tak chuan an inneih thutiam chu an phatsan chuang lo. Jehova leh a thupêkte chungah an rinawm zui zêl a ni. (Matthaia 5:37) Chhel taka tuar hrâm hrâmtu ṭhenkhat chuan a tâwpa an kawppuite’n kum tam tak chhûng an dodâl hnua Jehova rawng an bâwl tâk avângin hlimna nasa tak an tawng a ni. (1 Petera 3:1, 2) Inthlâk thleng tum lo kawppui nei Kristiante emaw, Jehova rawng an bâwl avânga an kawppuite’n an kalsan tâk Kristiante emaw chuan in chhûng khura Pathian ngaihsaka an awm tlat avângin malsâwmna an dawng dâwn tih an hria a ni.—Sâm 55:22; 145:16.
Mahni Mawhphurhna Ṭheuh Tiin
6. Inneihna hlawhtling tak nei tûrin eng ruahmanna nge zah tûr?
6 Inneihna hlawhtling nei tûr chuan khawsak dun ringawt hi a tâwk mai lo. Jehova’n lû nihna a ruahmanna zah ve ve hi nupate tân mamawh bul ber a ni a. Chu chuan inremna leh in chhûng khurah him nia inhriatna a awmtîr a ni. 1 Korinth 11:3-ah chuan: “Mipa tawh phawt lû chu Krista a ni, hmeichhe lû chu mipa a ni, Krista lû chu Pathian a ni,” tiin a sawi.
7. Chhûngkuaa lû nihna chu eng anga hman tûr nge ni?
7 He lai Bible chângin a sawi hmasak ber hi i hria em? Ni e, mipa tawh phawt chuan a intukluhna tûr Lû, Krista chu an nei ṭheuh tih hi a ni. Chu chu pasal chuan Isua miziate lantîr thei tûr zâwngin lû a nihna chu a hmang tûr a ni tihna a ni a. Krista chu Jehova hnuaiah a intulût a, kohhranho a hmangaih êm êm a, a ngaihsak bawk a. (1 Timothea 3:15) ‘An aiah amah a inpe’ hial a ni. Isua chu a chapo lo va, mi dangte a ngaihtuah lo lo va, “thuhnuairawlh leh rilrua inngaitlâwm tak” a ni zâwk a ni. A lû nihna hnuaia intulûtte chuan “chawlhna [an] hmu” a ni. Pasalin hetiang zâwnga a chhûngte a cheibâwl chuan, Krista hnuaia a intukluhzia a lantîr tihna a ni a. Tichuan, Kristian nupui pawhin a pasal lû nihna chu ṭangkai a ti tûr a ni a, a pasal thlâwp chu hahdamthlâk a tiin, a lû nihna hnuaiah a intulût tûr a ni.—Ephesi 5:25-33; Matthaia 11:28, 29; Thufingte 31:10, 28.
8. (a) Engvângin nge chhûngkaw ṭhenkhatah Kristian nun phung chuan rah ṭha chhuah lo nia a lan? (b) Chutiang dinhmun chu kan tawng a nih chuan eng nge kan tih ang?
8 Amaherawhchu, buaina a lo chhuak ngei ang a. Chhûngkuaa mi tumahin Bible dân bulte an nunpui hmain mi dangte thiltih avânga lungnih lohna chu a lo intuh thûk hle tawh mai thei a. Ngenna ṭawngkam nêm leh lainatna lantîrna chuan rah engmah a chhuah dâwn lo ni tein a lang mai thei bawk. Bible-in “thinurna te, tauhna te, ânna te, sawichhiatna te zawng zawng” bânsan tûrin min hrilh tih kan hria a ni. (Ephesi 4:31) Mahse, chhûngkuaa mi ṭhenkhatin thinur taka ân buan buan loh chu thiam si lo sela, engtia tih tûr nge ni ang? Aw le, Isua chuan vautute leh mi hau hmangte chu a entawn lo va, a Pa chu a rinchhan tlat zâwk a ni. (1 Petera 2:22, 23) Chuvângin, in chhûng khurah rilru tihrehawm tak thil lo thleng mah se, khawvêl kawngte zawh lovin Jehova ṭanpuina dîla ṭawngṭaina hmangin Pathian i ngaihsakna chu lantîr zâwk ang che.—Thufingte 3:5-7.
9. Dik lohna zawn aiin Kristian pasal tam takin eng tih nge an zir tâk zâwk?
9 Vawilehkhatah inthlâk thlengna hi a awm nghâl ṭhîn lo va, mahse Bible zilhnate hi dawhthei tak leh taima taka kan nunpui chuan a ṭangkai tak zet a ni. Pasal tam tak chuan Krista’n kohhranho a cheibâwl dân an hriat thiam hnuah an inneihna chuan a ṭhat phah sawt ṭhîn tih an hria a ni. Chu kohhran chu mihring ṭha famkim awmkhâwmna a ni lo. Mahse, Isua chuan a hmangaih a, entawn tûr ṭha a tihhmuh a, siam ṭhat nân Pathian Lehkha Thu-te a hmang bawk a. Tin, chu kohhran tân chuan a nunna pawh a hlân hial a ni. (1 Petera 2:21) A entawn tûr siam hian Kristian pasal tam takte chu lû an nihna ṭha taka hmang tûrin leh an inneihna tichangkâng tûra ṭanpuinate pe tûrin a fuih bawk. Hei hian dik lohna zawn reng emaw, inbiak duh loh emaw ai chuan rah a chhuah ṭha zâwk a ni.
10. (a) Eng kawngtein nge pasal emaw, nupui emaw chuan—Kristian nia inchhâl pawh ni se—in chhûng khura mi dangte nun an tihhrehawm mai theih? (b) Chutiang dinhmun siam ṭha tûrin eng nge tih theih awm?
10 A nih leh pasalin a chhûngte rilru leh thinlung lam mamawhte hre thiam lo emaw, chhûngkuaa Bible sawihona leh thil dang tihhona tûr chu ruahmanna a siam lo emaw a nih chuan engtin nge ni ang? A nih loh leh nupuiin a pasal thlâwp lovin a lakah intulût lo ta se, engtin nge ni ang? Ṭhenkhat chuan buainate chungchânga chhûngkuaa sawihona zahawm tak neihna aṭangin rah ṭha tak an seng a ni. (Genesis 21:10-12; Thufingte 15:22) Mahse, kan beisei anga ṭha a rah chhuak lo a nih pawhin, mi tinin kan nî tin nuna Pathian thlarau rahte lantîr a, chhûngkuaa mi dangte ngaihsakna lantîrna hmangin in chhûng khur boruak ṭha zâwk kan siam thei a ni. (Galatia 5:22, 23) Hmasâwnna chu mi dangte’n thil engemaw an tih lo nghahna aṭang ni lovin, keimahni’n kan mawhphurhnate tihna aṭanga lo awm a ni a, chutianga kan tih chuan Pathian ngaihsakin kan awm tih kan lantîr a ni ang.—Kolossa 3:18-21.
Chhânna Hmuh Theihna
11, 12. Chhûngkaw nun hlawhtling tak nei tûra min ṭanpui tûrin Jehova’n eng nge min pêk?
11 Mite’n an chhûngkaw thila thurâwn an hmuh theihna hmun tam tak a awm a. Mahse keini chuan Pathian Thu-ah hian thurâwn ṭha ber chu a awm tih kan hria a, Pathianin mita hmuh theih a inawpna pâwl hmanga chûng thurâwnte nunpui tûra min ṭanpui avângin kan lâwm êm êm bawk a ni. Chu ṭanpuina chu i hlâwkpui tak zet em?—Sâm 119:129, 130; Mika 4:2.
12 Kohhran inkhâwmnaa tel hun bâkah chhûngkuaa Bible zirho hun tûr i ruat hrang ziah em? Chutianga ti ṭhîn chhûngkuate chuan Pathian an biaknaa inpumkhat tûrin an thawkho thei a. Anmahni dinhmun ang zêla Pathian Thu an nunpuina chuan an chhûngkaw nun chu a tinuam lehzual a ni.—Deuteronomy 11:18-21.
13. (a) Chhûngkaw thilah zawhna kan neih chuan, khawi hmunah nge ṭanpuina kan hmuh theih ṭhin tlângpui? (b) Kan thutlûkna siam zawng zawngah eng nge kan târ lan ang?
13 Chhûngkaw thilah zawhna eng engemaw i nei mai thei a. Entîr nân, naupai lo tûra insiam chungchâng hi engtin nge? Nau tihtlâk hi thiamchantîr theih a ni ngai em? Naupang chu thlarau lam thilah tui vak lo ta se, chhûngkuaa Pathian biaknaah eng chen nge teltîr ve tûr ni ang? Chutiang zawhna chi hrang hrangte chu Jehova Thuhretute thu leh hla chhuahah sawi lan a ni a. I zawhnate a chhânna zawng hmu tûrin Bible zirna ṭanpuitute leh zawn awlna bu (index) ang chite a hman dân chu zir ang che. Zawn awlna bu-in a kawhhmuh lehkhabu chu i nei lo a nih pawhin Kingdom Hall library-ah zawng ang che. A nih loh leh i computer-ah hêng thu chhuahte hi i hmu thei pawh a ni mai thei a. I zawhnate chu Kristian mi puitling mipa emaw, hmeichhia emawte pawh i sawipui thei bawk. Mahse, i zawhna apiang atân a chhânna chiang taka an hrilh che chu beisei suh. Mi mal angin emaw, nupa angin emaw thu i tihtlûk a ngai fo vang. Chutih hunah chuan mipui vântlâng hmaah chauh ni lovin in chhûng khurah pawh Pathian ngaihsaka i awmna târ lang tûr zâwngin thu tlûkna siam ang che.—Rom 14:19; Ephesi 5:10.
Ennawn Nâna Sawiho Tûrte
• Engtin nge Jehova laka rinawm nghehnaah chuan mahni nupui pasalte laka rinawmna a tel?
• Chhûngkaw buaina avânga rilru hrehawmna kan tawrh hunah pawh, Pathian lawmzâwng thil ti tûrin engin nge min ṭanpui ang?
• Chhûngkuaa mi dangte’n tlin lohna an neih hunah pawh dinhmun siam ṭha tûrin eng nge kan tih theih?
[Phêk 155-naa milem]
Pasal lû nihna chuan Isua miziate a lantîr tûr a ni
[Phêk 157-naa milem]
Chhûngkuaa Bible zirho ziah hian chhûngkuaa inpumkhatna nei tûrin a ṭanpui