Bung Sawm Leh Pariat
“Anni Chu Khawvêla Mi An Ni Lo”
1. (a) Isua’n a thih hma khân a zirtîrte tân eng nge a dîlsak? (b) Engvângin nge ‘khawvêla mi nih loh’ chu thil pawimawh tak a nih?
TIHHLUM a nih hma chiah zân khân, Isua chu a zirtîrte tân a ṭawngṭai a. Anni chu Setana’n nêksâwrna nasa tak a tawntîr dâwn tih a hriat avângin, Isua’n a Pa hnênah heti hian a sawi: “Nangin anni chu khawvêl ata i lâk chhuah tûra ngên ka ni lo va, mi sual lakah chuan i hum tûr ka ti zâwk a ni. Anni chu khawvêla mi an ni lo, kei khawvêla mi ka ni lo ang bawk hian,” tiin. (Johana 17:15, 16) Engvângin nge khawvêl aṭanga inlâk hran chu thil pawimawh tak a nih? A chhan chu he khawvêl awptu hi Setana a nih vâng a ni a. Kristiante chuan a thununna hnuaia awm khawvêla mi nih chu an duh dâwn lo a ni.—Luka 4:5-8; Johana 14:30; 1 Johana 5:19.
2. Eng kawngtein nge Isua kha khawvêla mi a nih loh?
2 Khawvêla mi a nih loh avângin Isua chuan mi dangte hmangaihna a nei lo tihna a ni lo. Chutih ahnêkin, dam lote a tidam a, mitthite a kai tho va, mite hnênah Pathian Ram chanchin chu a zirtîr zâwk a. Mihringte tân a nunna pawh a pe hial zâwk a ni. Mahse, Setana khawvêl thlarau lantîrtute Pathian ngaihsak lohna rilru put hmang leh thiltihte erawh chu a hmangaih hauh lo thung. Chu mi avâng chuan, nungchang bawlhhlawhna te, sum leh pai âtchilhna te, leh dinhmun sâng ûmna ang chite laka inthiar fihlîm tûrin min hrilh a ni. (Matthaia 5:27, 28; 6:19-21; Luka 20:46, 47) Chuvângin, khawvêl politics-a Isua a inhnamhnawih lo pawh kha a mak lo. Juda mi a ni nachungin, Isua chuan Rom leh Juda-te politics lama intihbuainaah pawh ṭan lam a nei lo a ni.
“Ka Ram Chu He Khawvêla Mi Hi A Ni Lo”
3. (a) Juda sakhaw hruaitute’n Pilata hmaah Isua chu engtin nge an hêk a, engvângin nge? (b) Isua’n mihring lal nih a duh lo tih engin nge lantîr?
3 Juda sakhaw hruaitute’n Isua an man hnua Rom ram awptu, Pontia Pilata hnêna an hruai laia thil thleng kha han ngaihtuah teh. A nihna takah chuan chûng sakhaw hruaitute chu Isua’n an vervêkna a sawi chhuah vek avângin an chiai a ni. Ram awptu chu Isua chunga kutthlâktîr ngei an tum a: “He mi hian kan chite a tikhawlo va, Kaisara hnênah chhiah chawi a khap a, Krista, lal, a intih kan hria e,” tiin Isua chu an hêk a ni. (Luka 23:2) A kum hmasa lawkah khân Isua’n mipuiin lala siam an tumna a lo hnâwl avângin an hêkna chu dâwt a ni tih a chiang hle. (Johana 6:15) Nakinah, vân Lalber a ni dâwn tih a inhre tlat a ni. (Luka 19:11, 12) Chu bâkah, lalṭhutthlênga amah ṭhuttîrtu tûr chu mihringte ni lovin Jehova a ni bawk.
4. Chhiah chawi chungchânga Isua rilru put hmang kha eng nge ni?
4 Isua an man hma ni thum nîah khân, Pharisaite chuan Isua chu chhiah chawi chungchângah thu sawi sualtîr an tum a. Mahse ani chuan: “Duli [Rom pawisa] mi entîr rawh u. Tu lem leh tu hming nge chuang hi?” a ti a. “Kaisara,” tia an chhân veleh ani chuan: “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” tiin a chhâng a ni.—Luka 20:20-25.
5. (a) Man a nih lai khân Isua’n a zirtîrte hnênah eng nge a zirtîr? (b) Engtin nge Isua’n a thiltih chu a hrilhfiah? (c) An thubuai sawi rah chhuah chu eng nge ni?
5 Isua chuan khawvêl thuneitute laka hel tûrin mi a zirtîr hauh lo. Sipaite leh mi dangte chu Isua man tûra an lo kal khân, Petera chuan a khandaih a phawi a, mi pakhat beng chu a lo sât thla a. Mahse Isua chuan: “I khandaih kha a dahnaah dah leh rawh, khandaih ruaitute zawng zawng chu khandaih vêkah an thi dawn si a,” a ti thung. (Matthaia 26:51, 52) A tûkah chuan Isua’n a thiltih dân chu Pilata hnênah hrilhfiahin: “Ka ram chu he khawvêla mi hi a ni lo; ka ram chu he khawvêla mi hi ni sela, ka ṭhuihruaiten an bei ang, Judate hnêna pêka ka awm loh nân,” a ti a. (Johana 18:36) Pilata pawhin Isua an ‘hêkna thu chu a dik lo’ tih a pawm a. Mahse, mipui nawrna a nasat êm avângin Pilata chuan Isua chu a khenbehtîr ta a ni.—Luka 23:13-15; Johana 19:12-16.
Zirtîrte’n Isua Hruaina An Zui
6. Engtin nge Kristian hmasate khân khawvêl rilru put hmang pu lovin, an mihringpuite an hmangaihzia an lantîr?
6 Chutiang chuan Isua zirtirte chuan khawvêla mi ni lo tûra thil ṭûlte chu an lo hre thiam ta a. Chu chu khawvêla Pathian ngaihsak lo rilru put hmang leh thiltihte pumpelh vek hi a ni a, chûng zîngah chuan tharum thawhna leh nungchang bawlhhlawhnaa intihhlimna Rom mite lemchan leh ennawm chhuahnate a tel a ni. Chutiang intihhlimna an pumpelh avângin zirtîrte chu mihring hawtute tiin an koh phah hial a. Mahse, an mihringpuite huat ahnêkin, zirtîrte chuan chhandamna atâna Pathian ruahmanna an chan ve theih nâna mi dangte ṭanpui tûrin an thawk rim hle zâwk a ni.
7. (a) Khawvêla mi an nih loh avângin zirtîr hmasate khân eng thil nge an lo tawn? (b) Politics rorêltute leh chhiah chawi chungchâng chu engtin nge an ngaih a, engvângin nge?
7 Isua hnungzuitute chu amah ang bawka tihduhdah an ni ṭhîn a, chu chu sawrkâr thuneitute thudik hriat loh vâng a ni fo. Chutichung pawhin, C.E. 56 vêl khân tirhkoh Paula chuan Rom khuaa Kristiante hnênah lehkha a thawn a, ‘rorêltute [politics rorêltute] thu thuin awm rawh u. Pathian thu lovin tumah rorêltu an awm si lo’ tiin a fuih tho a ni. Jehova’n khawvêl sawrkârte hi a din tihna a ni lo va, lei pum pui chunga ama Lalram chauhvin ro a rêl hma loh zawng an awm a la phal rih tihna mai a ni zâwk. Chuvângin, Paula’n Kristiante chu rorêltute zah tûr leh chhiah chawi tûrin thurâwn inhmeh tak chu a pe a ni.—Rom 13:1-7; Tita 3:1, 2.
8. (a) Kristiante chu an chunga rorêltute hnuaiah eng chen chiahin nge an intukluh ang? (b) Kristian hmasate’n engtin nge Isua tih dân an entawn?
8 Amaherawhchu, politics rorêltute hnuaia intukluhna chuan chin tawk a nei tûr a ni, a pumhlûm tawp tûr a ni lo. Jehova dân leh mihringte dân a inkalh hunah chuan Jehova rawngbâwltute chuan A dân chu an zâwm zâwk tûr a ni. On the Road to Civilization—A World History tih lehkhabuin Kristian hmasate chanchin a sawi dân hi lo chhinchhiah teh: “Kristiante chuan Rom khua leh tuite tih tûr ṭhenkhat chu an ti ve duh lo va. Kristiante chuan . . . sipaia ṭan chu an rinna kalhna niin an hria a ni. Politics-ah nihna engmah an chelh duh lo va. Rom lalber pawh chibai an bûk duh hek lo,” tih hi. Juda rorêltute’n zirtîrte chu thu hril tawh lo tûra an “tih tlat” khân, anni chuan: “Mihring thu aiin Pathian thu kan zâwm zâwk tûr a ni,” tiin an chhâng a ni.—Tirhkohte 5:27-29.
9. (a) Jerusalem-a Kristiante’n C.E. 66-a an thiltih kha engvângin nge an tih? (b) Chu chu eng kawngin nge entawn tûr ṭha tak a nih?
9 Politics leh sipai lama buainaah pawh zirtîrte chu an tualdâwih tlat reng a. C.E. 66 khân, Judai rama Judate chu Kaisara lakah an hel a. Rom sipaite’n Jerusalem chu an rawn hual nghâl vat a ni. Khawpui chhûnga Kristiante chuan eng nge an tih tâk? Khawpui aṭanga tlân chhuak tûra Isua thurâwn pêk kha an la hre reng a. Rom sipaite an hnungtawlh lawk hlânin, Kristiante chu Jordan lui kânin Pella tlâng ramah an tlân chhe ta a ni. (Luka 21:20-24) An tualdâwihna chu a hnua Kristian rinawm lo la ni tûrte tân entawn tûr a ni ta a ni.
Tûn Ni Hnuhnûngah Hian Kristiante Chu An Tualdâwih
10. (a) Jehova Thuhretute chu eng hna thawkin nge an buai a, engvângin nge? (b) Anni chu eng thilah nge an tualdâwih?
10 Mihringte chanchin ziak hian Kristian hmasate entawna tûn ni hnuhnûnga tualdâwiha awm tum tlat eng pâwl emaw tal a awm tih a târ lang em? Aw, Jehova Thuhretute chu chutiang chuan an awm a ni. Tûn hun chhûng zawng hian anni chuan Pathian Ram chauh chu felna ngainatute tâna remna, hausakna, leh hlimna tluantling thlen thei a nih thu an puang reng a. (Matthaia 24:14) Mahse, hnam hrang leh ram hrangte buaina kârah hian tualdâwihin an awm tlat reng a ni.
11. (a) Engtin nge Thuhretute tualdâwihna leh sakhaw hruaitute thiltih chu a inkalh? (b) Politics-a mi dangte inhnamhnawihna chu Jehova Thuhretute’n eng angin nge an thlîr?
11 Anni nên inkalh tak maiin, he khawvêl sakhaw hruaitute hi politics thilah an inhnamhnawih nasa hle a. Ram ṭhenkhatah chuan inthlannaah candidate-te ṭan zâwngin emaw, a do zâwngin emaw an campaign nasa hle bawk a. Sakhaw hruaitu ṭhenkhat chuan politics-ah nihna an chelh hial bawk a ni. Mi dangte erawh chuan sakhaw hruaitute remtihzâwng thilte pawmpui tûrin politics khêltute chu an lo nawr ve thung a. Nimahsela, Jehova Thuhretute chu politics-ah an inhnamhnawih ve lo va. Mi dang politics-a eng party ber emaw zâwm tûr te, nihna chuh tum te, a nih loh leh inthlannaa vote thlâk tum te chu dan an tum hek lo. Isua’n a zirtîrte chu khawvêla mi an ni lo a ti a; chuvângin, Jehova Thuhretute chuan politics-ah inhnamhnawihna an nei lo a ni.
12. He khawvêla sakhuate hi an tualdâwih ve loh avângin eng thil nge a lo thlen ṭhin?
12 Isua sawi lâwk ang ngeiin ram chi hrang hrangte chu an indo leh ṭhîn a. Ram pakhat chhûngah pawh hel pâwlte chu an indo bawk a ni. (Matthaia 24:3, 6, 7) Sakhaw hruaitute lahin eng ram ber emaw, eng pâwl ber emaw chu an lo ṭan ve deuh ziah a, an hnungzuitute pawh chutianga ṭan lam nei tûr chuan an fuih bawk ṭhîn. Chu chuan eng nge a thlen? Sakhaw thuhmun zuitute chu hnam hrang an nih vâng emaw, chi hrang an nih vâng emawin an inthat ta ṭhîn a. Chu chu Pathian duhzâwng nên a inkalh tlat a ni.—1 Johana 3:10-12; 4:8, 20.
13. Finfiahnate hian Jehova Thuhretute tualdâwihzia eng nge a târ lan?
13 Amaherawhchu, chutiang indona zawng zawngah chuan Jehova Thuhretute chu an tualdâwih tlat a ni. November 1, 1939 chhuak Vênnainsâng (English) chuan: “Lalpa lama ṭang apiangte chu indonaah hian an tualdâwih ang,” a ti a. Ram zawng zawng leh dinhmun chi hrang hrang hnuaia awm Jehova Thuhretute chuan chu ngaih dân chu an pawm tlat a. Inṭhen darhna awmtîrtu khawvêl politics leh indonate chuan khawvêl puma an inunauna a tihchhiat chu an phal lo. Anni chuan an ‘khandaihte chu leilehna hmâwr zumahte an chher a, an feite chu theikung ahchhumna chem kawmahte an chher’ a ni. An tualdâwih tlat avângin, indo dân pawh an zir tawh ngai lo.—Isaia 2:3, 4; 2 Korinth 10:3, 4.
14. Khawvêl aṭanga an inlâk hran avângin, Jehova Thuhretute’n eng thil nge an tawn?
14 An tualdâwihna rah chhuah pakhat chu eng nge ni? Isua’n heti hian a sawi: “Khawvêla mi in ni si lo va . . . khawvêlin a hua che u a ni e,” tiin. (Johana 15:19) Jehova Thuhretu tam tak chu Pathian chhiahhlawh an nih avângin tân inahte khung an ni a. Ṭhenkhat chu kum zabi pakhatnaa Kristiante angin nasa taka nghaisak an ni a, tihhlum pawh an ni hial a ni. Hei hi “he khawvêl pathian,” Setana’n khawvêla mi ni ve lo Jehova chhiahhlawhte a dodâl vâng a ni.—2 Korinth 4:4; Thu Puan 12:12.
15. (a) Ram zawng zawng chu eng lam panin nge an kal mêk? (b) Engvângin nge khawvêl aṭanga inlâk hran hi thil pawimawh tak a nih?
15 Jehova chhiahhlawhte chu khawvêla mi an nih ve loh avângin an hlim a ni; khawvêla ram zawng zawngin Armageddon-a an boralna tûr lam an pan mêk si a. (Daniela 2:44; Thu Puan 16:14, 16; 19:11-21) Khawvêl aṭanga kan inlâk hran avângin a hmachhawn tûr vânduaina chu kan pumpelh ang. Khawvêl puma mipui inpumkhat kan nih ang ngeiin, Pathian vân lam Lalram lakah chuan kan rinawm nghet tlat a ni. Khawvêla mi kan nih loh avângin sawichhiat leh tihduhdah chu kan ni ngei mai. Mahse, Setana awpna hnuaia awm he khawvêl sual hi chatuan atâna tihboral hlen a nih thuai tawh dâwn avângin, chûng zawng zawng chu rei lo têah a tâwp vek ang. Jehova rawngbâwltute erawh chu Pathian Ram awpna hnuaia felna khawvêl tharah chuan chatuanin an chêng thung ang.—2 Petera 3:10-13; 1 Johana 2:15-17.
Ennawn Nâna Sawiho Tûrte
• Engtin nge Isua’n ‘khawvêla mi nih lohnain’ a kaihhnawih thilte chu a lantîr?
• (a) Khawvêl rilru put hmang (b) Khawvêl rorêltute (c) Chhiah chawi chungchânga Kristian hmasate ngaih dân kha eng nge ni?
• Tûn lai huna Jehova Thuhretute’n an Kristian tualdâwihna chu eng kawngtein nge an târ lan?
[Phêk 165-naa milem]
Isua chuan amah leh a hnungzuitute chu “khawvêla mi an ni lo” tih a hrilhfiah