Bung Sawm Leh Pakua
Huai Takin Pathian Thu Hril Zêl Rawh
1. (a) Isua zirtîrte’n eng chanchin ṭha nge an puan chhuah a, engtin nge Juda mi ṭhenkhatte’n an lo tih lêt? (b) Eng zawhnate nge kan inzawh theih?
KUM 2,000 deuhthaw kalta khân Pathian Fapa, Isua Krista chu nakina lei pum pui chunga Lalber ni tûra hriak thih a ni a. Isua chu sakhaw lama a hmêlmate phiar rûkna avângin tihhlum a ni a; mahse, Jehova’n thihna ata a kai tho leh a ni. Isua avângin chatuana nunna chu a lo awm thei ta a. Amaherawhchu, Isua zirtîrte’n he chanchin ṭha hi a lang a pauva an puan chhuah chuan tihduhdahna a lo inṭan ta a ni. Ṭhenkhat chu tân inah an khung a, an vua a, Isua chanchin sawi tawh lo tûrin thu an pe bawk a. (Tirhkohte 4:1-3; 5:17, 18, 40) Engtin nge an tih tâk? Nang ni ta la, engtin nge i tih ang? Huai takin thu i hril zawm zêl ang em?
2. (a) Kan hun lai hian eng chanchin ropui tak nge puan chhuah ngai? (b) Chanchin ṭha hril tûrin tute’n nge mawhphurhna nei?
2 Kum 1914-ah Pathian Rama Lalber, Isua Krista chu ‘amah dotute zînga’ rorêl tûrin lalṭhutthlênga ṭhuttîr a ni a. (Sâm 110:2) Chu mi zawhah, Setana leh a ramhuaihote chu leiah paihthlâk an ni leh a. (Thu Puan 12:1-5, 7-12) He khawvêl suaksual tak atâna ni hnuhnûng chu a lo inṭan ta. He ni hnuhnûng hi a tâwp hunah chuan, Pathianin khawvêla Setana inrêlbâwlna awm zawng zawng chu a tikehsawm vek ang. (Daniela 2:44; Matthaia 24:21) Chu mia dam khawchhuakte chuan paradis lo la ni tûr he leia chatuana nun chu an hmabâk dâwn a ni. He chanchin ṭha hi i lo pawm tawh a nih chuan, mi dangte hriattîr ve pawh i duh ngei ang. (Matthaia 24:14) Mahse, eng ang chhân lêtna nge i beisei theih?
3. (a) Engtin nge mite’n Lalram chanchin chu an chhân lêt? (b) Eng zawhna nge kan hma chhawn ngai?
3 Lalram chanchin ṭha i puan hunah ṭhenkhat chuan lâwm takin an lo dawng sawng ang a; mahse, a tam zâwk chuan an lo ngaihsak lo vang che. (Matthaia 24:37-39) Ṭhenkhat chuan an lo nuihzat che ang a, a ṭhenin an lo dodâl ang che. Isua chuan dodâlna chu chhûngkhat lainate aṭangin a lo chhuak mai thei tih a vaukhân lâwk a ni. (Luka 21:16-19) Dodâlna chu i hnathawhnaah emaw, i school kalnaah emaw i tâwk thei bawk. Khawvêl hmun ṭhenkhatah phei chuan, Jehova Thuhretute chu sawrkârin a khap bet hial a ni. Chutiang dinhmun i tawn hunah chuan huai taka Pathian Thu hril zêlin, ‘rinnaah chuan i ding nghet’ ang em?—1 Korinth 16:13.
Mahni Chaknaa Innghat Lovin
4. (a) Pathian chhiahhlawh rinawm kan nihzia lantîr nâna thil ṭûl pawimawh tak chu eng nge ni? (b) Engvângin nge Kristian inkhâwmnate hi thil pawimawh tak a nih?
4 Jehova chhiahhlawh rinawm tak ni tûra thil ṭûl pawimawh tak chu kan thlarau lam ṭhatna tûra a thil min pêkte chunga innghah hi a ni. Chûng zînga pakhat chu kohhran inkhâwmna hi a ni a. Pathian Lehkha Thu chuan inkhâwmte bânsan lo tûrin min fuih a ni. (Hebrai 10:23-25) Jehova Thuhretu rinawm ni zui zêlte chuan an rinpuite nêna inkhâwmnaa tel zat zat tûrin theihtâwp an chhuah a. Hêng inkhâwmahte hian Pathian Lehkha Thu kan hriatna chu a pung ṭhîn a ni. Chu bâkah, thutak hriat lâr takte kan hriatthiamna chu a lo pung a, chûng thutak kan nunpui dân tûr pawh kan hre chiang lehzual a ni. Kan Kristian unaute nên biakna inpumkhatah kan inhnaih lehzual sauh va, Pathian duhzâwng ti tûra tihchak kan ni bawk ṭhîn. Jehova thlarau chuan kohhran hmangin kaihhruaina min pe a, chu thlarau hmang tho chuan Isua chu kan zîngah a awm a ni.—Matthaia 18:20; Thu Puan 3:6.
5. Jehova Thuhretute khap beh an nih hunah engtin nge inkhâwmna an neih ṭhin?
5 Inkhâwmna zawng zawngah i tel kim vekin, chuta i thu hriatte chu i nunpui em? Jehova Thuhretute khap beh an nihna hmunah chuan, mi mal inah mi tlêm tê chauh tân inkhâwmna neih a ṭûl châng a awm ṭhîn a. Inkhâwmna hmun leh a hun chu a inang lo thluah thei a, a remchâng reng lo thei bawk a; tin, inkhâwm ṭhenkhat chu zân rei tawh hnuahte neih a ni mai thei bawk. Mahse, mi mal remchân lohna emaw, hlauhawm emaw awm chung pawhin unau rinawmte chuan inkhâwm apianga tel ve ziah tûrin theihtâwp an chhuah a ni.
6. Engtin nge Jehova chunga kan innghahzia kan lantîr a, chu chuan engtin nge huaisen taka thu hril zêl tûrin min ṭanpui?
6 Jehova chunga innghahna chu Pathian ṭanpuina kan mamawh tih hre reng chunga thinlung taka a hnêna ṭawngṭai ṭhinna aṭangin a lo awm chho a ni. Chutiang chuan i ṭawngṭai ṭhîn em? Leia rawng a bâwl lai khân Isua chu a ṭawngṭai nawn fo va. (Luka 3:21; 6:12, 13; 22:39-44) Tin, khenbeh a nih hma chiah zân khân, a zirtîrte chu: “Thlêmnaa in luh loh nân inring rengin ṭawngṭai rawh u,” tiin a fuih a ni. (Marka 14:38) Lalram chanchin ngaihsak lotute kan tawn chuan kan rawngbâwlnaa hnufual tûrin thlêmna kan tâwk thei a. Miin min nuihzat emaw, min tiduhdah emaw a nih chuan, buaina pumpelh nân thu hrilh bânsan mai tûrin thlêmna kan tâwk thei bawk. Mahse, huaisen taka thu hril zêl tûra Pathian thlarau ṭanpuina dîla tih tak zeta kan ṭawngṭaina chuan thlêmna laka tlâwm lo tûrin min vênghim dâwn a ni.—Luka 11:13; Ephesi 6:18-20.
Huai Taka Thu Hrilhna Chanchin
7. (a) Engvângin nge Tirhkohte bu-a chanchin ziak hi kan tân a bîk taka ngaihven tûr a nih? (b) He paragraph tâwpa zawhna awmte hi chhâng la, kan hlâwkpui theih dân tûr sawi lang bîk ang che.
7 Tirhkohte bu-a chanchin inziak hi kan zavai tân a bîk taka kan ngaihven tûr chanchin a ni a. Chu chuan tirhkohte leh zirtîr hmasa dangte—kan rilru ang putute—hian harsatna paltlanga Jehova thuhretu huaisen leh rinawm an lo nih dân chanchin min hrilh a ni. Chu chanchin ziak a ṭhen lai chu a hnuaia zawhnate leh Bible châng târ lante hmang hian lo enfiah ila. Chutianga kan enfiah rual chuan, i chhiar lai kha nangmaha i hlâwkpui theih dân tûr ngaihtuah tel nghâl ang che.
Tirhkohte kha lehkha thiam tak an ni em? Anni chu eng thil pawh lo thleng se, huaisen ve chi hrim hrim an ni em? (Johana 18:17, 25-27; 20:19; Tirhkohte 4:13)
Petera’n Pathian Fapa thiam loh chantîrtu Juda rorêltute hmaa huaisen taka thu a sawi theih chhan kha eng nge ni? (Matthaia 10:19, 20; Tirhkohte 4:8)
Rorêlna hmaa an hruai hma chawlhkâr engemaw zâtah tirhkohte’n eng nge an tih? (Tirhkohte 1:14; 2:1, 42)
Engtin nge roreltute’n tirhkohte chu Isua hminga thu sawi tawh lo tûra an tih tlat khân Petera leh Johana’n an chhân? (Tirhkohte 4:19, 20)
An chhuahtîr hnuah tirhkohte’n tu hnênah nge ṭanpuina an zawn leh? Tihduhdahna titâwp tûrin an ṭawngṭai nge thil dang an dîl zâwk? (Tirhkohte 4:24-31)
Dodâltute’n thu hrilhna tihtâwp an tum khân, Jehova’n eng hmangin nge ṭanpuina a pêk? (Tirhkohte 5:17-20)
Engtin nge tirhkohte’n chhanchhuah an nih chhan an hriatthiamzia an lantîr? (Tirhkohte 5:21, 41, 42)
Tihduhdahna avânga zirtîr tam takte an tlân darh chung pawhin, eng nge an tih chhunzawm zêl tho? (Tirhkohte 8:3, 4; 11:19-21)
8. Zirtîr hmasate rawngbâwlna avângin eng thil phûrawm tak nge thleng a, engtin nge chutiang rawngbâwlnaah chuan kan lo tel ve?
8 Chanchin ṭha hrilh rawngbâwlna chu a thlâwn lo va. C.E. 33 Pentikost nî khân zirtîr 3,000 vêlin baptisma an chang a ni. “A ring tharho hmeichhia leh mipa tam takin Lalpa hnênah chuan an rawn belhchhah lehzual ṭhîn a.” (Tirhkohte 2:41; 4:4; 5:14) Hun a lo ral zêl chuan, Pathian mite tiduhdahtu mi kawlh tak, Tarsa khawchhuak Saula ngei pawh Kristian a rawn ni ve a, thutak chu huaisen takin a hril ve ta a. A hnuah chuan tirhkoh Paula tia hriat a lo ni ta a ni. (Galatia 1:22-24) Kum zabi pakhatnaa rawngbâwlna lo inṭan chu a la tâwp lo va. Tûn ni hnuhnûngah hian a vânglai tak a rawn thleng chho va, lei hmun tin a thleng vek tawh a ni. Chu rawngbâwlnaa tel ve theihna chanvo chu kan nei a, chutaṭang chuan kan hmaa rawng lo bâwl thuhretu mi rinawmte entawnin an tihdân kan zir ve thei a ni.
9. (a) Paula’n eng hun remchângte nge thu hrilh nân a hman? (b) Eng kawngtein nge Lalram chanchin chu mi dangte hnênah i theh darh?
9 Paula’n Isua Krista chanchin dik tak a han hriat chuan eng nge a tih? “Isua chu Pathian Fapa a nihzia thu a tlângaupui ta nghâl a.” (Tirhkohte 9:20) A chunga Pathian zahngaihna nasa tak avâng chuan a lâwm êm êm a, a chanchin ṭha dawn ang chu mi tinin an hriat a ngai tih pawh a hre thiam bawk a ni. Paula chu Juda mi a ni a, a hun laia an tih ṭhin dânin inkhâwmna inah a kal a, thu a hril a. In tinahte thu hrilin, dâwr hmunahte mi a sawipui bawk a. Tin, chanchin ṭha hril tûra hmun danga kal pawh a hreh lo.—Tirhkohte 17:17; 20:20; Rom 15:23, 24.
10. (a) Engtin nge Paula chuan thu a hrilhnaah huaisen chung siin remhre tak a nihzia a lantîr? (b) Engtin nge chhûngkhat lainate, hna thawhpuite, leh school kalpuite hnêna thu hrilh hunah Paula mizia ang hi kan lantîr ve ang?
10 Paula chu a huaisen mai bâkah, remhre tak a ni bawk a, keini pawh chutiang chu kan ni ve tûr a ni. Juda-te hnênah chuan an thlahtute hnêna Pathian thu tiamte ṭanchhanin a ngên chiam a. Grik mite hnênah chuan an thil hriat ṭhan tawh ṭanchhanin thu a sawi a. A châng chuan thutak a zirna kawnga ama thiltawn ngei chu thu hrilhna hmanruaah a hmang bawk a ni. Heti hian a sawi: “Chanchin ṭha avângin engkim ka ti ṭhîn, chan ka neih ve theih nân,” tiin.—1 Korinth 9:20-23; Tirhkohte 22:3-21.
11. (a) Paula chuan dodâltute nêna an inhmachhawn fo loh nân eng nge a tih? (b) Paula tih dân chu eng hunah nge kan entawn ve theih ang a, engtin nge kan entawn ang? (c) Huaisen taka thu hril thei tûra chakna chu khawi aṭangin nge a lo awm?
11 Dodâlna avânga hmun danga thu hrilh ṭha zâwk nia a lan chuan, dodâltute hmachhawn fo aiin Paula chu hmun dangah a insawn mai ṭhîn. (Tirhkohte 14:5-7; 18:5-7; Rom 12:18) Mahse, chanchin ṭha chu a zahpui ngai rêng rêng lo. (Rom 1:16) Dodâltute diriamna—kutthlâkna hialte—chu nuam ti lo mah se, thu hrilh zawm zêl tûrin ‘kan Pathianah chuan a intihuai’ a. “Chanchin ṭha keimah avânga hrilh kimin a awm theih nân . . . Lalpa chuan mi ṭan a, mi tichak ta zâwk a ni,” tiin a sawi. (1 Thessalonika 2:2; 2 Timothea 4:17) Kristian kohhran Lû ber, Isua chuan kan hun laia hnathawh tûr a lo sawi lâwk chu thawk thei tûrin kan mamawh ang chakna min pe zêl a ni.—Marka 13:10.
12. Engin nge Kristian huaisenna chu târ lang a, chu chu enga innghat nge a nih?
12 Isua leh kum zabi pakhatnaa Pathian chhiahhlawh rinawmte’n huaisen taka Pathian thu an lo sawi ang chiahin, keini pawhin kan sawi ve tûr a ni. Hei hi mi dangte ngaihtuah lo lêka tih tûr emaw, a duh lo tute hrilh luih ṭâlh tûr emaw tihna a ni lo. Mahse, mi min ngaihsak lohna avângin kan beidawng mai lo va; dodâlna lahin min ngawihtîr mai hek lo. Isua ang bawkin, Pathian Ram hi lei pum pui chunga rorêl tûr dik tak a nihzia kan sawi zâwk a ni. Lei leh Vân Lalber, Jehova aiawhtu kan nih avângin leh kan chanchin puan chhuah chu keimahni phuahchawp ni lova a hnên aṭanga lo kal a nih avângin inring tâwk takin thu kan sawi a ni. Tin, Jehova kan hmangaihna chu amah kan fak chhan ber a ni tûr a ni.—Philippi 1:27, 28; 1 Thessalonika 2:13.
Ennawn Nâna Sawiho Tûrte
• Engvângin nge Lalram chanchin chu mi tin hnêna hriattîr a pawimawh a, chutih rualin engtia an lo chhân lêt nge kan beisei theih?
• Engtin nge Jehova rawng bâwl tûrin keimahni chaknaa kan innghah lohzia kan lantîr theih?
• Tirhkohte bu aṭang hian thil hlu tak engte nge kan zir chhuah?
[Phêk 173-naa milem]
Hmân lai ang bawkin, tûn laia Jehova chhiahhlawhte chuan huaisen takin Pathian thu an sawi