Bung Sawmhnih Leh Pakhat
Jehova Thiltum Chu Ropui Takin A Hlawhtling
1, 2. (a) A thil siam finna neite chungchânga Jehova thiltum chu eng nge ni? (b) Pathian betu chhûngkaw lungrual tak zîngah tute nge tel?
THIL SIAM finna nei zawng zawngte Pathian dik awmchhun biaknaa an inpumkhat leh an vaia Pathian fate zalênna ropuia an luh vek chu Jehova thiltum a ni a. Chu chu felna ngainatute duh êm êm pawh a ni bawk.
2 Jehova chuan thil siam hna a thawh aṭangin he thiltum ropui tak hi a tifamkim ṭan a. A thil siam hmasa ber chu thihna ata a thawhleh hnu aṭanga Pathian “ropuina êng leh, atak anpui ngei,” a Fapa hi a ni. (Hebrai 1:1-3) Pathian ngeiin a siam a nih avângin, he Fapa hi a danglam bîk hle a. He Fapa hmang hian mi dang zawng zawng chu siam an ni a: a hmasa berin vâna vântirhkohte, chu mi hnuah leia mihringte siam an ni ve leh a ni. (Joba 38:7; Luka 3:38) Hêng zawng zawng hian lei leh vân huap chhûngkaw pakhat an din a. An zavaia tân Jehova chu Pathian a ni a, Lei leh Vâna Lal Chungnungber a ni bawk a, anmahni hmangaihtu an Pa a ni bawk a ni.
3. (a) Kan nu leh pa hmasa berte hnên aṭangin kan zavai hian eng nge kan rochun? (b) Adama thlahte tân Jehova’n eng ruahmanna duhawm tak nge a siam?
3 Kan nu leh pa hmasa berte chu duh rêng vânga sual tia thi tûra thiam loh chantîr an nih khân, Eden huan aṭanga hnawh chhuah an ni a, Pathianin a hnâwl bawk a. Lei leh vân huap Pathian chhungkaw zîngah an tel ve ta lo a ni. (Genesis 3:22-24; Deuteronomy 32:4, 5) Kan zavai hian an thlahte kan ni a; chuvângin, sual tih duhna chu kan rochung vek a ni. Mahse, Jehova chuan Adama leh Evi thlahte zînga ṭhenkhat chuan felna an ngaina dâwn tih a hria a. Chuvângin, chûng mite chu “Pathian fate zalênna ropuiah” an luh theih nân ruahmanna duhawm tak A siam ta a ni.—Rom 8:20, 21.
Israelin Duhsakna A Chân
4. Hmân lai Israel hnênah Jehova’n eng chanvo hlu nge a pêk?
4 Adama a siam aṭanga kum 2,500 vêlah, Jehova chuan Amah nêna inlaichînna ṭha bîk tak neih theihna chanvo hlu chu mi tuemawte hnênah a pe a. Hmân lai Israel chu a mite ni tûrin a thlang a, an hnênah chuan a Dân a pe bawk a ni. (Genesis 12:1, 2) Anni chu hnamah a din a, a thiltum nêna inzawmin hmanruaah a hmang a. (Deuteronomy 14:1, 2; Isaia 43:1) Amaherawhchu, sual leh thihna bâwihah an la tân cheu avângin atîra Adama leh Evi-te neih ang zalênna ropui kha an nei thei lo.
5. Engtin nge Israel mite’n Pathian duhsak bîkna an dawn chu an chân?
5 Nimahsela, Israel mite chuan Pathian duhsakna an dawng a. Anni pawhin Jehova chu an Pa anga zah tûr leh a thiltum nêna inrema hna thawk tûrin mawhphurhna an nei bawk a. Chu an mawhphurhna chu an hlen chhuah ngei a pawimawhzia Isua’n a sawi uar hle a ni. (Matthaia 5:43-48) Amaherawhchu, Israel hnam chuan a mawhphurhna a hlen chhuak ta lo va. Juda mite’n, “Pa pakhat chauh kan nei, Pathian chu,” ti mah se, Isua chuan an thiltih leh rilru put hmangin a kalhzia a puang a ni. (Johana 8:41, 44, 47) C.E. 33-ah Pathianin Dân chu a titâwp a, Israelte’n amah nêna inlaichînna bîk an neih ṭhin pawh chu a tâwp ve ta bawk a. A nih leh, chu chu mite’n Pathian nên inlaichînna ṭha an nei thei tawh ngai dâwn lo tihna em ni?
“Vâna Thil Awmte” La Khâwmin
6. Paula’n Ephesi 1:9, 10-a ‘khawsak hun’ a tihin a tum chu eng nge ni?
6 Tirhkoh Paula chuan mihring zînga ṭhenkhatin Pathian nên inlaichînna bîk an nei thei tih a târ lang a. Entîr nân, rinna lantîrtute chu A chhûngkaw zînga mi an lo nih theihna tûra Jehova ruahmanna chungchâng chu Paula’n heti hian a ziak a ni: “A duhzâwng thurûk [Pathianin] kan hnêna min hriattîrin; hun bi kim khawsak hunah a lâwmzâwng (engkim—vâna thil awmte, lei chunga thil awmte pawh—Kristaa fâwk khâwm tûr chu) amahin tih a tum ang khân,” tiin. (Ephesi 1:9, 10) He ‘khawsak hun’ hi Isua Kristaah a innghat tlat a. Amah hmangin a ni, mihringte chu Pathian hmaa pawm tlâk ni tûra siam ni. An zînga bithliah chin nei mi tlêm tê chuan vâna awm theih beiseina an nei a. A tam zâwkte chu leiah chatuanin an chêng ang.
7. “Vâna thil awmte” chu tute nge ni?
7 A hmasa berin, C.E. 33 Pentikost nî aṭang khân “vâna thil awmte,” vân Rama Krista ro luahpuitu tûrte chu ngaihven ṭan a ni a. Isua inthawina an rin avângin, Pathianin anni chu mi felah a puang a ni. (Rom 5:1, 2) Hun a lo ral zêl chuan Juda mite leh Jentailte pawh an lo tel ve ta a, tichuan “vâna thil awmte” chu an zavaiin 1,44,000 an ni ang. (Galatia 3:26-29; Thu Puan 14:1) Chûng zînga a la bâng tlêm tê chauh chu leiah hian an la awm a ni.
“Lei Chunga Thil Awmte” La Khâwmin
8. “Lei chunga thil awmte” chu tute nge ni a, anni chuan Jehova nên eng inlaichînna nge an neih?
8 Chu khawsak hun chuan “lei chunga thil awmte” pawh a la khâwm bawk a. Mi maktaduai tam tak chu tûnah hian leia chatuana nung tûrin lâk khâwm mêk an ni. Anni chuan Lalram ro luahtu tûr la bângte nên inpumkhatin Jehova hming chu an chawimawi a, a biakna chu an chawisang bawk a ni. (Isaia 2:2, 3; Zephania 3:9) Jehova chu nunna lo chhuahna a ni tih an hriat avângin “Pa” tiin an ko va. Tin, Isua thisen chhuak an rin avângin, Jehova pawm tlâk an ni bawk. (Thu Puan 7:9, 14) Mahse, an zavai chuan ṭha famkim lo an la nih vek rih avângin, Pathian fate nihna pumhlûm chu nakinah an la chang thei chauh vang.
9. Rom 8:21 hian mihringte tân eng thutiam nge a ken?
9 Hêng lei lam beiseina neitute hian mihringte ‘chhiatna bâwih ata tihchhuaha an awm’ hun tûr chu tûnah hian phûr takin an nghâk a ni. (Rom 8:21) Chu zalênna chu Krista leh a vân lam sipaite’n hrehawm nasa tak chu a vâwrtâwp Armageddon hmanga an tihtâwp hnuah a inṭan ang. Chu chu Lalram thuneihna changa Krista Kum Sâng Rorêlna malsâwmnain a zui tûr, Setana khawvêl kalhmang suaksual zawng zawng tihchhiat vekna a ni ang.—Thu Puan 19:17-21; 20:6.
10. Jehova chhiahhlawhte’n eng fakna hla nge an sak dâwn?
10 Leia Jehova chhiahhlawhte’n: “Aw Lalpa Pathian, Engkimtithei, i thiltihte chu a ropuiin a mak a; nang, hnam tin Lalber, i kawngte chu a felin a dik a ni. Aw Lalpa, tunge i hming zah lo vang a, chawimawi lo vang? Nang chauh i thianghlim si; i thiltih felte chu tihlan a nih tawh avângin, hnam tinrêngin chibai an rawn bûk ang che,” tih puangtu vân lama a chhiahhlawhte an puanpui ve hun chu a va phûrawm dâwn êm! (Thu Puan 15:3, 4) Ni e, Jehova chhiahhlawh zawng zawng chu Pathian dik awmchhun biaknaah an la inpumkhat dâwn a ni. Mitthite meuh pawh kaih thawh leh an ni ang a, Jehova faka an awte chhuah ve theihna hun remchâng pêk an ni ang.—Tirhkohte 24:15.
Hma Lama Zalênna Ropui Tak
11. Hrehawm nasa taka dam khawchhuakte’n eng zalênna ropui tak nge an neih dâwn?
11 Hrehawm nasa tak vâwrtâwp Armageddon hian lei aṭanga sualna zawng zawng a then fai hnuah chuan, Diabol-Setana chu “he khawvêl pathian” a ni tawh lo vang a. Jehova betute chuan a thununna ṭha lo takte chu an do lêt reng a ngai tawh hek lo vang. (2 Korinth 4:4; Thu Puan 20:1, 2) Sakhaw dik lo chu a dik lo zâwnga Jehova aiawhin, mihringte ṭhen darhtuah a ṭang leh tawh ngai lo vang. Pathian dik tak chhiahhlawhte chuan mihring rorêltute kuta rorêl dik lohna leh chhawr dik lohna te chu an tawng leh tawh ngai lo vang. Zalênna ropui tak a va ni dâwn êm!
12. Engtin nge mi zawng zawng chu sualna leh a rah chhuahte lakah an fihlîm dâwn?
12 “Pathian Berâm No, khawvêl sual kalpuitu” a nih angin, Isua’n a inthawina man chu mihringte sual nuai bo nân a hmang dâwn a ni. (Johana 1:29) Isua leia a awm laia mi pakhat sual a ngaihdam khân, ngaihdam a nihzia tihchian nân a natna pawh a tihdamsak a. (Matthaia 9:1-7; 15:30, 31) Chutiang bawkin, vân Pathian Rama Lalber Isua Krista chuan mitdel te, ṭawngthei lo te, bengngawng te, pianphunga rualban lo te, rilru kim lo te, leh natna dang dang neite pawh mak takin a tidam vek dâwn a ni. (Thu Puan 21:3, 4) Thuâwih zawng zawngte chu, an ngaihtuahna leh an thiltihte anmahni tân leh Pathian tâna lâwmawm a nih theih nân, anmahnia “sualna dân” awm chu nuai bosak a ni ang a. (Rom 7:21-23) Kum Sâng Rorêl tâwpah chuan, mihring ṭhat famkimna an chang tawh ang a, Pathian dik awmchhun ‘anpui leh amah ang tak’ an ni tawh ang.—Genesis 1:26.
13. Kum Sâng Rorêl tâwpah Krista’n eng nge a tih ang a, chu chuan eng nge a thlen dâwn?
13 Krista’n mihringte ṭhat famkimnaa a hruai thlen hnu chuan, chu mi hna atâna Pain thuneihna a lo pêk zawng zawng chu a pe lêt leh vek ang: “Rorêlna zawng zawngte leh, thuneihna leh thiltihtheihna zawng zawngte a tihbo hnuah, Pathian hnênah, Pa hnên ngeiah chuan ram chu a pe ang; a hmêlma zawng zawng a ke hnuaia a dah hma loh chuan ani chu lalah a awm tûr rêng a ni si a.” (1 Korinth 15:24, 25) Kum Sâng Rorêlna Lalram chuan a thiltum chu a hlen chhuak famkim dâwn a; chuvângin, Jehova leh mihringte inkârah he sawrkâr hi a awm zui zêl a ngai tawh lo vang. Tin, sualna leh thihna chu nuai bo vek a nih tawh dâwn bâkah mihringte chu tlan chhuah an nih tawh dâwn avângin, Tlantu atân Isua chu mamawh a ni tawh lo vang. Bible chuan heti hian a hrilhfiah a: “Fapa ngei pawh chu a hnuaia engkim dahtu hnuaiah chuan dahin a awm bawk ang, Pathian chu engkima engkim a nih theihna tûrin,” tiin.—1 Korinth 15:28.
14. Mihring ṭha famkim tawh zawng zawng chuan eng nge an tawn vek dâwn a, engvângin nge?
14 Chu mi zawhah chuan, mihring ṭha famkim tawhte chu chatuana Pathian dik awmchhun rawng bâwl an thlanzia lantîr theihna hun remchâng pêk an ni ang a. Chutiang chuan, a fate anga a pawm tak tak hmain Jehova chuan mihring ṭha famkimte chu fiahna hnuhnung ber a tawntîr vek phawt dâwn a ni. Setana leh a ramhuaihote chu leilâwt ata chhuahtîr an ni ang a. Chu chuan Jehova hmangaih tak taktute tân chhiat hlenna engmah a thlen lo vang. Mahse, rinawm nghet lova Jehova thu âwih lote chu, atîra hel hmangpa leh a ramhuaihote rualin chatuan atâna tihboral an ni thung ang.—Thu Puan 20:7-10.
15. Jehova thil siam finna nei zawng zawngte zîngah eng ang dinhmun nge awm leh dâwn?
15 Chu mi zawhah chuan, Jehova chuan fiahna hnuhnung bera Pathian lal chungnunna thlâwptu mihring ṭha famkim tawh zawng zawngte chu a fate angin a pawm tawh ang a. Chutaṭang chuan, lei leh vân huap Pathian chhûngkaw zîngah tel vein Pathian fate zalênna ropui chu a kimin an chang tawh ang. Lei leh vâna thil siam finna nei zawng zawng chu Pathian dik awmchhun biaknaah an inpumkhat leh dâwn a ni. Jehova thiltum chu ropui takin a hlawhtling dâwn! Chu lei leh vân huap chhûngkaw hlim tak, chatuan daih zînga tel chu i duh em? I duh a nih chuan, 1 Johana 2:17-a Bible thusawi hi ngaihsak tûrin kan fuih che a ni: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tih hi.
Ennawn Nâna Sawiho Tûrte
• Eden huana helna a chhuah hma khân, Jehova betu zawng zawngin amah nên eng ang inlaichînna nge an lo neih?
• Pathian chhiahhlawhte’n eng mawhphurhna nge an neih?
• Tute nge Pathian fate lo la ni dâwn a, chu chu engtin nge biakna inpumkhat chungchânga Jehova thiltum nên a inkûngkaih?
[Phêk 190-naa milem]
Thuâwih mihringte chuan lei pum huap paradis-ah nun an chên ang