Zirtîrtu Ṭha Ni Tûra Neih Ngai Mize Pawimawh Ber Chu
1. Zirtîrtu ṭha ni tûra neih ngai mize pawimawh ber chu eng nge ni?
1 Engin nge mi chu Bible zirtîrtu ṭha nihtîr? Lehkha thiamnain nge ni a, thiltawn neihnain? Nge, pianpui thiamna zâwkin? A nihna takah chuan, zirtîrtu ṭha nihtîrtu mizia chu Dân famkimna te, Isua zirtîrte chhinchhiahna te, leh Pathian Jehova mize pui ber leh duhawm berte nên a thuhmun reng a. (Joh. 13:35; Gal. 5:14; 1 Joh. 4:8) Chu chu hmangaihna a ni. Zirtîrtu ṭha chuan hmangaihna a lantîr ṭhîn.
2. Engvângin nge mite kan hmangaih a pawimawh êm êm?
2 Mite Hmangaih Rawh: Zirtîrtu Ropui Isua chuan mite chungah hmangaihna a lantîr a, chu chuan a thusawi ngaithla tûrin anni chu a chêttîr a ni. (Lk. 5:12, 13; Joh. 13:1; 15:13) Mite kan ngaihsak chuan, a remchân hun apiangah thu kan hrilh ang a. Tihduhdahna leh ngaihsak lohna ang chi harsatnate chuan min tilunghnual lo vang. Kan thu hrilhnate chungah mi mal ngaihsakna dik tak kan lantîr ang a, an veizâwngte mil tûrin thu kan hrilh ang. Bible zirlai nêna kan awm dun lai chauh ni lovin, zirna kaihruai tûra inpuahchah nân pawh hun kan hmang bawk ang.
3. Engtin nge Bible thutak hmangaihna chuan rawngbâwlnaah min ṭanpui ang?
3 Bible Thutak Hmangaih Rawh: Isua pawhin Bible thutak chu a hmangaih a, ro hlu angin a thlîr a ni. (Mt. 13:52) Thutak kan hmangaih chuan phûr takin kan sawi ang a, chu chuan ngaithlatute chu a tiphûr thei a ni. Chutiang hmangaihna chuan kan tlin lohnate aia kan thu hrilh hlutna ngaihtuah tûrin min ṭanpui ang a, tichuan rawngbâwlnaah kan zâm loh phah ang.
4. Engtin nge hmangaihna kan neih theih?
4 Hmangaihna Nei Rawh: Engtin nge mite hmangaihna kan neih theih? Jehova leh a Fapa te lantîr hmangaihna ngaihtuahna leh kan thu hrilhna biala mite thlarau lam dinhmun chhe tak ngaihtuahna aṭangin kan nei thei a ni. (Mk. 6:34; 1 Joh. 4:10, 11) Mi mala zirna leh chhût ngunna aṭangin Bible thutak kan hmangaihna chu a zual sauh vang. Hmangaihna hi thlarau rah pêng pakhat a ni a. (Gal. 5:22) Chuvângin, Jehova hnênah thlarau thianghlim kan dîlin, hmangaihna kawnga ṭhang chho tûrin a ṭanpuina kan dîl thei a ni. (Lk. 11:13; 1 Joh. 5:14) Kan lehkha thiam dân te, thutaka kan awm rei dân te, leh kan pianpui thiamnate chu eng ang pawh ni se, hmangaihna lantîrna aṭangin Bible zirtîrtu hlawhtling tak kan ni thei a ni.