Paradis Chân A Ni

PATHIAN chuan mihringte a siam hma hun rei tak tawhah khân mita hmuh theih loh thlarau thil siam vântirhkohte chu a siam a. Eden huanah chuan, a hnua Diabol-Setana tia kan hriat tâk vântirhkoh hel pakhat chuan Pathianin ei lo tûra a tih thing rah chu ei tûrin Evi chu verther taka thlêm a tum a ni.

Rûlpui hmanga thu sawiin, Setana chuan hmeichhia leh a pasal hnêna thil ṭha tak engemaw pe duh lo angin Pathian chu chhe takin a chhuah a. Chu vântirhkoh chuan Evi hnênah ei lo tûra tih thei rah an ei chuan a pasal nêna an thih dâwn loh thu a hrilh a ni. Chutiang chuan Setana chuan Pathian chu A mihring siamte chunga dâwt sawiah a puh a. Ani chuan Pathian thu âwih loh chu finna leh zalênna kawng duhawm tak angin a târ lang a ni. Mahse, chu chu dâwt hlâwm a ni a—leia dâwt sawi hmasak ber pawh a ni. Buaina dik tak chu Pathian lalchungnunna, a nih loh leh rorêltu sâng ber a nihna—Pathianin rorêl tûra dikna a neih leh neih loh, leh a rorêlna chu fel tak leh a khua leh tuite tâna ṭha tûrzâwnga a hman leh hman loh chungchânga buaina hi a ni.

Evi chuan Setana dâwt sawi chu a âwih a. Thing rah chu a ît ṭan a, tlêm a ei ta bawk a ni. A hnuah a pasal pawh a pe a, ani pawhin a ei ve ta mai a. Chutiang chuan sual nei an lo ni ta a ni. Ho lam taka lang, chu an thiltih chu an helzia târ langtu a lo ni a. Adama leh Evi chuan Pathian thupêk âwih lo lui tlatin, an nunna ṭha famkim pawh tiama engkim petu, anmahni Siamtu rorêlna chu an hnâwl a ni.

Pathianin hel hmangte chungthu chu a rêl a. Ani chuan rûlin a entîr Setana tiboraltu tûr Thlah, a nih loh leh Chhan Chhuaktu a lo lang ang tih a tiam a ni. Pathian chuan Adama leh Evi chunga thi tûra rorêlna chu thlentîr nghâl lovin, an thlah lo la piang tûrte chungah ngilneihna a lantîr a. Pathian rawn tirh Tûra chuan Eden huana helna rah chhuah zawng zawngte a sût lêt dâwn avângin, chûng an thlah lo la piang tûrte chuan beisei tûr an nei ang. Chhandamtu lo la piang tûr chungchânga Pathian thiltum—leh chutianga a rawn tirh Tûra—chu Bible ziak chhoh a nih rualin zawi zawiin a lo lang chho ta tial tial a ni.

Pathian chuan Adama leh Evi chu Paradis ata a hnawt chhuak a. Eden huan pâwna lei leta ei zawng tûr chuan thlan tla bawrh bawrha rim taka hna an thawh a ngai ang. Tichuan Evi chuan nau a pai a, Adama nêna an fa hmasa ber Kaina chu a hring ta a. An nupa chuan fapa leh fanu dangte pawh an nei a, chûng zîngah chuan Abela leh Setha pawh an tel a; Setha chu Nova thlahtu a ni.

—Genesis bung 3 aṭanga bung 5; Thu Puan 12:9 a ṭanchhan.