ṬHEN 12
Nun Kaihruaitu Pathian Finna
Thufingte bu hi nî tin nuna kaihhruaina min petu thlarauva thâwk khum thurâwnte lâwr khâwm a ni a, Solomona ziak a ni deuh ber
JEHOVA hi Rorêltu fing a ni em? Chu zawhna fiah taka chhân dân kawng khat chu a thurâwn pêkte ngaihtuah hi a ni. A thurâwn pêk chu a ṭangkai em? Chu mi nunpuina chuan nun a siam ṭhain, awmzia a neihtîr zâwk em? Lal fing Solomona chuan thufing a za têlin a ziak a. Chûng chuan nî tin nun pêng tinrêng deuhthaw a khawih a ni. Entîrna ṭhenkhat lo ngaihtuah ta ila.
Pathian rinchhan rawh. Pathian Jehova nêna inlaichînna ṭha nei tûr chuan amah rinchhan a pawimawh hle a. Solomona chuan: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tiin a ziak a ni. (Thufingte 3:5, 6) Pathian kaihhruaina zawnga zawmna hmanga Pathian rinchhanna chuan nun chu awmze nei tak a nihtîr a. Chutianga tihna chuan mi chu Pathian thinlung a tihlâwmtîr bâkah, Pathian hmêlma Setana tihchhuah thu buai chhânna chu a pêktîr thei bawk a ni.—Thufingte 27:11.
Fing takin mi dangte dâwr rawh. Pasalte, nupuite, leh fate tâna Pathian thurâwn pêkte chu tûn hma zawng aiin a ṭûl lehzual tawh a ni. “I tleirâwl lai nupuiah chuan hlim rawh,” tiin Pathian chuan pasalte hnênah thurâwn a pe a; chu chu a nupui lakah a rinawm tûr tihna a ni. (Thufingte 5:18-20) Nupuite chuan Thufingte bu-ah nupui fel, a pasal leh fate ngaihsân hlawhtu fakna thu inziakte chu an hmu a. (Thufingte, bung 31) Tin, fate pawhin nu leh pate thu âwih tûra kaihhruaina an hmu bawk. (Thufingte 6:20) Inlâk hrannain mahni hmasialna a awmtîr avângin, he lehkhabu hian ṭhian neih a pawimawhzia a târ lang bawk a ni. (Thufingte 18:1) Ṭhiante chuan a ṭha emaw, a ṭha lo emawa min thunun theih avângin kan thlan thiam hle a ngai a ni.—Thufingte 13:20; 17:17.
Fing takin mahni inenkawl rawh. Thufingte bu-ah chuan zu hman sualna te, hrisêlna atâna ṭha rilru put hmang nei a, a ṭha lote do tlat te, leh hnathawktu taima tak nih te chungchânga thurâwn ṭha takte a chuang a ni. (Thufingte 6:6; 14:30; 20:1) Pathian thurâwn nêna inmil lo mihringte ngaih dân rinchhanna chuan chhiatna a thlen a. (Thufingte 14:12) Thufingte bu chuan chhûngrila kan nihna, kan thinlung chu a tichhe thei thil dang dangte laka vênghim tûrin min fuih a, chu chu “nunna lo chhuahna a ni” tih min hriatnawntîr a ni.—Thufingte 4:23.
Khawvêla mi tam takte hian chutiang thurâwnte nunpuinain nun ṭha zâwk a neihtîr tih an hre tawh a. Chuvâng chuan, Pathian Jehova chu an chunga Rorêltu anga pawm chhan tûr tam tak an nei a ni.
—Thufingte bu a ṭanchhan.