Isua’n Thilmakte A Ti

PATHIANIN Isua chu mihring dangte tih theih loh tûr thilte ti tûrin thiltihtheihna a pe a. Isua chuan thilmak tam tak a ti a—chu chu a rûk a râla tih ni lovin, thlîrtu mipui hmaa tih a ni fo bawk. Chûng Isua thilmak tihte chuan mihring ṭha famkim lote’n chatuana an hneh hlen theih loh tûr hmêlma leh harsatnate a hneh theihzia a târ lang. Entîrna ṭhenkhat lo ngaihtuah ta ila.

Isua’n ei leh in tûr a pe. Isua thilmak tih hmasa ber chu tui uain-a chantîr hi a ni a. Ṭum hnih dangah chuan, mipui rilṭâm sâng têlte chu chhang leh sangha tlêm têin a hrai puar a ni. Chu mi ṭum hnihah chuan mi tinte tân ei sên loh a awm a ni.

Isua’n natnate a tidam. Isua chuan “natna tinrêng leh chak lohna tinrêng” a ti dam a ni. (Matthaia 4:23) Mitdel te, bengngawng te, phâr te, leh phungzâwl te chu lainat takin a ti dam a. Kebai te, ramtuileilo te, leh piangsual te pawh a ti dam vek bawk. A tihdam theih loh natna rêng a awm lo.

Isua’n thlipui hlauhawm tak a thunun. Isua leh a zirtîrte’n Galili Tuipui râl lehlam an kai lai chuan, thlipui na tak mai a rawn tleh thut a. Zirtîrte chuan an hlau hle a ni. Isua chuan thlipui chu enin: “Ngawi la, awm hle hle rawh!” tiin a hau va. Tichuan, thlipui chu a reh ta duak a. (Marka 4:37-39) Ṭum dangah chuan, thlipui hlauhawm tak a tleh laiin, tui chungah a kal a ni.—Matthaia 14:24-33.

Isua’n thlarau suaksualho a ngam. Thlarau suaksualho chu mihringte aiin an chak zâwk fê a. Mi tam takte chu he Pathian hmêlma suaksual takte kut ata an tâl chhuak thei lo. Mahse, vawi tam tak chu Isua thupêkah chuan an chhuak a, thlaraute chuan chûng mite chu an luh chilh thei tawh lo. Ani chuan chutiang thlarau suaksualte chu a hlau ve lo va. Chutiang thlaraute chuan Isua thu neihna an hriat avângin an hlau hle zâwk a ni.

Isua’n thihna a hneh. “Hmêlma hnuhnûng ber” tia inchawih taka koh a nih angin, thihna chu tuma hneh theih loh hmêlma a ni. (1 Korinth 15:26) Chuti chung pawhin, Isua chuan mitthite a kaitho va, tlangvâl pakhat chu a nu hmeithai tân a kaihthawhsak a, hmeichhe naupang chu amah sûntu a nu leh pate tân a kaihthawhsak bawk a ni. Mitthi kaihthawhna chhinchhiah tlâk ber chu, Isua’n a ṭhian duh tak Lazara, mipui hmaa a kaihthawhna hi a ni—ni li dâwn lai thi tawh lehnghâl chu! Isua hmêlma hlun, mi tumruh takte pawhin he thilmak hi a ti ngei tih an pha lo.—Johana 11:38-48; 12:9-11.

Engvângin nge Isua’n chûng thilmak zawng zawngte chu a tih? A mi kaihthawhte chu a hnuah an thi leh tho a ni lâwm ni? Ni e, mahse Isua thilmak tihte chuan hlâwkna tluantling a nei a ni. Chûng chuan Messia Lal rorêlna chungchânga hrilh lâwkna phûrawm takte hi duhthusâm thil mai a ni lo tih finfiahna a pe a. Pathian Lal ruat chuan ei leh in tlâkchhamna te, natna te, thlipui hlauhawm te, thlarau suaksual te, leh thihna te ngei pawh a tibo hlen thei tih kan rinhlelh a ngai lo. Pathianin chutiang thil ti tûrin thu neihna a kutah a hlân tih a lo lantîr tawh si a.

—Matthaia; Marka; Luka; Johana a ṭanchhan.